د امريکا د متحدو ايالتونو د بهرنيو چارو وزير خبردارى ورکړ، چې د روسيې او چين په څېر هېوادونو د نورو ملتونو ډيموکراتيکو ازاديو ته خطر پېښ کړى دى.

مايک پامپيو له غربي متحدانو غوښتنه وکړه، چې د خپلې ازادۍ دفاع دې وکړي.

د جرمني په پلازمېنه کې د برلين دېوال د نړول کېدو د دېرشمې کليزې په مناسبت جوړو شويو مراسمو ته په وينا کې پامپيو وويل: خپلواک ملتونه له هغو هېوادونو سره د ارزښتونو په رقابت بوخت وو، چې د خپلو اتباعو پر حقونو يې سترګې پټې کړې وې.

د امريکا د بهرنيو چارو وزير وويل: د غرب ازاد ملتونه مسووليت لري هغه خطرونه چې د چين، روسيې او ايران غوندې حکومتونو له خوا زموږ خلکو ته راجع دي، شنډ کړي.

مايک پامپيو د برلين د هغه نړول شوي دېوال په څومترۍ کې دا خبرې کولې، چې جرمني يې سره وېشلې وه:

”موږ يعنې جرمني، امريکا او ټولو متحدانو او شريکانو په ګډه سړه جګړه وګټله. ځکه نو ډېر هيجاني او خوشحاله يم چې دلته يم، ځکه نو وياړم چې د هغه دېوال په څو مترۍ کې خبرې کوم، چې يو وخت ولاړ و او درې لسيزې مخکې د دغه دېوال نړېدل لمانځو.“

مايک پامپيو له خپل دوه ورځني سفر څخه په استفاده هڅه کوي، چې له اروپايي متحدانو سره د امريکا ترينګلې اړيکې ورغوي.

دغه اړيکې له امريکا سره د ځينو ډيپلوماتيکو او تجارتي لانجو له کبله ترينګلي شوي دي.

ارنستو بورخس فرانسپرس ته وویل له خپلې ازادۍ خوشاله دی که څه هم د سترګو عملیات باید وکړي.

بورخس ویلي ژر غواړي له کیوبا ووځي او امریکامتحده ایالتونو ته لاړ شي.

دا کیوبايي افسر په ۱۹۹۹ کال کې امریکايي ډپلوماټانو ته د پټو معلوماتو د لېږد د هڅې پر مهال نیول شوی وو او د هاوانا د یوې پوځي محکمې له خوا په ۳۰ کلونو بند محکوم شو.

هغه په ځلونو د دې حکم په وړاندې اعتراض کړی وو او ویلي یې وو داسې حکم ورباندې شوی چې ګواکې ده واقعاً هغه کار کړی وو.

بورخس ۵۹ کلن دی او یوه ۲۱ کلنه لور یې په کاناډا کې اوسیږي.

هغه ویلي چې د زندان ۱۱ کاله یې په کوټه قلفۍ کې تېر کړي دي.

د اروپايي ټولنې یوه چارواکي ویلي له پاکستانه د ایستل شویو کډوالو لپاره په بېړني ډول دوه نیم لکه یورو مرسته کوي.

دا خبره د منځني ختیځ او مرکزي اسیا لپاره د اروپايي کمیسیون مشر اندریاس پاپاکونستانټینو په خپله ایکس پاڼه په یوه بیان کې کړې ده.

دا پیسې به د ښاغلي اندریاس په وینا د سرپنا، روغتیایي خدماتو، خواړو او اوبو د برابرولو لپاره ولګول شي.

اندریاس د اروپايي ټولنې په استازولۍ پرون د خیبر پښتونخوا له یوه لوړ پوړي اداري چارواکي شهاب علي خان سره د افغان کډوالو پر وضعیت خبرې کړي دي.

پاکستان د اپریل له پیل راهیسې لسګونه زره افغان کډوال ایستلي دي. ځینو دغو کډوالو ازادي راډیو راډیو سره په خبرو کې ویلي چې دوی د اخراج پرمهال له ډیرو ستونزو سره مخ شوي دي.

د ټیکنالوژۍ په برخه کې د نجونو د نړیوالې ورځې په مناسبت، ملګري ملتونه وايي چې انټرنیټ او ټیکنالوژۍ ته د مساوي لاسرسي نشتوالی نجونې د ژوند له مهمو فرصتونو څخه محرومولی شي.

د پنجشنبې په ورځ، د اپرېل په ۲۴مه، د ملګرو ملتونو د سرمنشي مرستیالې امینې محمد د دې ورځې په مناسبت په خپل ایکس پاڼه کې ولیکل چې د ټیکنالوژۍ په برخه کې د نجونو حضور خورا اهمیت لري.

ملګرو ملتونو زیاته کړه چې د پرمختګ سره سره، نجونې او ښځې لاهم د ډیجیټل ټیکنالوژۍ ته د لاسرسي او رول لوبولو په برخه کې له خنډونو سره مخ دي، په ځانګړې توګه د مصنوعي زیرکتیا په برخه کې.

د ټیکنالوژۍ په برخه کې د نجونو نړیواله ورځ داسې حال کې راغله چې افغانستان کې نجونې له شپږ ټولګي پورته له هر ډول زده کړو منع دي او انټرنیټ او ډیجیټل ټیکنالوژیو ته یې لاسرسی ډېر محدود دی.

د هند صدراعظم خبرداری ورکړ چې د پهلګام په برید کې ښکېلو کسانو ته به له تصوره پورته سزا ورکړي.

نریندرا مودي نن په بیهار کې یوې غونډې ته وویل، هند به هر ترهګر او د هغوی ملاتړي وپيژني، وبه یې څاري او سزا به ورکړي. ښاغلي مودي زیاته کړه چې د دغو بریدونو تر شا لاس لرونکو ترهګرو ته به د هغوی له ملاتړیو سره یوځای سخته سزا ورکړي.

دا لومړی ځل دی چې ښاغلی مودي تر خپلې ادارې لاندې د کشمیر په پهلګام کې د شوي برید په اړه په یوه عمومي غونډه کې د وینا پر مهال د خپل حکومت دریځ روښانوي.

د سه شنبې په ورځ د هند تر واک لاندې کشمیر د پهلګام په تفریحي سیمه کې وسله والو پر سیلانیانو ډزې وکړې چې ۲۶ کسان پکې ووژل شول.

د هند حکومت د پهلګام په تفریحي سیمه کې پر سیلانیانو له ډزو وروسته د ټولو هغوو پاکستاني وګړو ویزې چې په تیر کې يې ترلاسه کړې وې لغوه کړې او ویلي دي، پاکستاني وګړي اړ دي چې په ۴۸ساعتونو کې له هنده ووځي.

د هند د بهرنیو چارو وزارت یو لوړ پوري ډیپلماټ ویکرم مېشري وړمه ورځ خبریالانو ته ویلي، " پاکستانیان د جنوبي اسیا د ویزو له استثنايي طرحې بې برخې کیږي او د ټولو هغوو کسانو ویزې لغوه دي چې په تیر کې ورته د هند حکومت ورکړې وې".

د مېشرې په ټکو، د دواړو هېوادونو ترمنځ په سرحد کې امنیتي پوستې ستمدسي تړل کیږي چې ورسره به د واهګې بندري لار د تګ راتګ پرمخ وتړل شي.

مېشري وړاندې خبریالانو ته وویل، "په پهلګام کې برید د هند له پولو د باندې پلان شوی وو".

د مېشري په ټکو، "د برید جدیت ته په کتو له پاکستان سره د اباسین سیند د اوبو توافق ځنډوو او له دې هېواد سره ډیپلماټیکې اړیکې را کموو".

مېشري خبریالانو ته ویلي، "څو چې پاکستان په کلکه له خپلو پولو ورخوا د ترهګرۍ له ملاتړه لاس وانخلي، دوی به دا توافق له سره نه کړي".

د اباسین سیند د همالیه له غرونو د هند تر واک لاندې له جمو کشمیر څخه سرچینه اخلي.

په ۱۹۶۰کې هند او پاکستان د نړیوال بانک په منځګړیتوب د دې سیند د اوبو پر ویش توافق وکړ.

د سه شنبې په ورځ د هند تر واک لاندې د کشمیر په تفریحي پهلګام سیمه کې وسله والو پر سیلانیانو ډزې وکړئ چې ۲۶ کسان په کې ووژل شول.

دې برید پراخ نړیوال غبرګونه درلودل.

د طالبانو د حکومت عدلیه وزارت وايي، په تیرو نژدې څلورو کلونو کې يې یو شمیر قوانین د لوی مشر ملا هبت الله اخندزاده له خوا تر توشیح وروسته په رسيمي جریدو کې خپاره کړي دي.

دغه وزارت نن پنجشنبې په یوه اعلامیه کې ویلي، تراوسه لس عنوانه قوانین توشیح شوي چې تر ټولو مهم يې د امربالعمروف او نهی المنکر قانون وو.

طالبانو د تیرکال په سنبلې میاشت کې د امربالعمروف قانون توشیح او په رسمي جریده کې خپور کړی و.

په دغه قانون کې "د فتنې د مخنیوي په موخه ښځو ته امر شوی څو داسې واغوندي چې ټول بدن يې پټوي".

د قانون پر بنسټ په عامه ځایونو کې د ښځو له خوا په لوړ غږ د قرانکریم تلاوت او نعمت ویل هم منعه شوي دي.

د طالبانو د امربالعمروف قانون له توشیح کیدو وروسته پراخ کورني او بهرني غبرګونه راوپاول.

پر دې قانون له پراخو نیوکو وروسته، د طالبانو عدلیې وزارت ویلي و، "هر څوک یا رسنۍ چې پر دغه قانون نیوکه وکړي له شرعي چلند سره به مخ شي او محکمې ته به معرفي کیږي".

طالبانو پر افغانستان له واکمنیدو وروسته د تیر جمهوریت ټول قوانین لغوه او د فرمانونو په ورکولو سره يې نوي قوانین رامنځته کړل.

د روغتیا نړیوال سازمان وايي، د روانې میاشتې له پیله تر ۱۳نېټې پورې څه باندې ۱۳۰ زره افغان کډوال له پاکستان او ایرانه افغانستان ته راستانه شوي دي.

دغه سازمان په هغه راپور کې چې پرون چهارشنبې يې خپور کړی ویلي، " د راستانه شویو کډوال لپاره يې په سرحدي سیمو کې سیار روغتیايي کمپونه جوړ کړي چې کډوالو ته د ابتدايي معایناتو سربیره روغتیايي خدمتونه وړاندې کوي".

د راپور په ټکو، په راستانه کډوال کې ساري ناروغۍ تشخیص شوي چې تر ټولو ډیرې يې د کویډ ۱۹ مثبتې پېښې دي.

په راپور کې وړاندې ویل شوي، د راستانه شویو کورینو ماشومان د تنفسي ناروغیو سربیره، په اسهال، ملاریا او نورو ساري ناروغیو اخته دي.

د روغتیا نړیوال سازمان په خبره، ښايي د روان کال تر پایه دوه میلیونه افغان کډوال له ایران او نژدې دوه میلیونه نور له پاکستانه بیرته افغانستان ته راستانه شي.

بل پلو، د طالبانو د حکومت د اقتصاد وزارت سرپرست وزیر دین محمد حنیف له نړیوالو خیریه ټولنو غوښتي چې له راستانه کډوالو ملاتړ وکړي.

ښاغلي حنیف دا غوښتنه پرون چهارشنبې په کابل په یوې ناسته کې کړې ده.

پاکستان د اپریل میاشتې له پیله د افغان کډوال د ایستلو بهر پیل کړی چې په دې لړ کې تراوسه په زرهاوو افغانې کورنۍ بیرته افغانستان ته ستنې شوي دي.

په نورستان کې د ترافیکې پېښې له کبله ۶ کسان وژل شوي دي.

د طالبان تر واک لاندې باختر خبري اژانس د دې ولایت د امنیې قومندانۍ ویاند غلام رحمان حیدري په حواله ویلي، "پيښه پرون ماښام د کامدیش ولسوالۍ اړوند په پتیګل سیمه کې رامنځته شوې ده".

د حیدري په ټکو، په وژل شویو کې ښځې او ماشومان شامل دي.

خراب سړکونه او د ترافیکي اصولو نه رعایت په افغانستان کې د ډیرو ترافیکي پېښو عمده لامل بلل کیږي.

د اوکراین په پلازمېنه کییف کې د شپې د روسیې د راکټي بریدونو په پایله کې لږ تر لږه دوه کسان وژل شوي دي.

د کییف ښاروال ویتالي کلیچکو نن سهار، په ټیلیګرام کې لیکلي چې د دوو مړینو سربیره، په بریدونو کې ۵۴ نور ټپیان شوي دي.

کلیچکو دا هم وویل چې د استوګنې د یوې ودانۍ اوسیدونکي د کنډوالو لاندې بند پاتې دي او ودانۍ اور اخیستی دی.

روسیې تېره شپه پر اوکراین خپلو راکټي بریدونو ته دوام ورکړ، دقیقا څو ساعته وروسته له هغه چې چارواکو وویل د اوکراین د شخړې د حل په لور پرمختګ شوی دی.

د امریکا متحدو ایالتونو، اروپايي ټولنې، انګلستان او د اوکرایین استازو د چهارشنبې په ورځ په لندن کې سره ولیدل او په دې برخه کې یې د پرمختګ په اړه بحث وکړ.

د امریکا ولسمشر ډونالډ ټرمپ هم تېره شپه په سپینه ماڼۍ کې خبریالانو ته وویل چې هغه فکر کوي د روسیې ولسمشر ولادیمیر پوتین او د اوکراین ولسمشر ولودومیر زیلینسکي سره یوې موافقې ته رسیدلی دی.

ټرمپ وویل: "زه فکر کوم چې روسیه چمتو ده. زه فکر کوم چې موږ له روسیې سره یو تړون ته رسېدلي یو. موږ باید له زیلینسکي سره یو تړون وکړو."

ټرمپ دا هم وویل چې له زیلینسکي سره هوکړې ته رسېدل تر هغه څه سخته وو چې په اړه یې فکر کېده. "ما فکر کاوه چې له زیلینسکي سره موافقې ته رسیدل به اسانه وي. خو تر اوسه دا کار ستونزمن وو، مګر زه فکر کوم چې موږ د دواړو خواوو سره موافقې ته رسیدلي یو."

بریټانیايي پولیسو یو افغان ځوان په جرمني کې د یوه کس د وژلو په تور نیولی دی.
دا اولس کلن افغان تورن دی چې په جرمني کې یې د فبروري په ۴ یو کس وژلی دی او بیا بریټانیا ته تللی.

جرمني چارواکو ویلي چې دغه افغان ځوان په شویرین ښار کې یو کس وژلی او لومړی فرانسې بیا بریټانیا ته تښتېدلی دی.

جرمن چارواکو له بریټانیا غوښتي چې دا تورن کس دوی ته وسپاري.