د لاسرسي لېنکونه

تازه خبر
جمعه ۱ لیندۍ ۱۳۹۸ کابل ۰۱:۳۵

خبرونه

د ايران هوايي ځواک يوه نامعلومه بې پېلوټه الوتکه ويشتلې ده

د ايران يوه چارواکي ويلي د ايران هوايي ځواک، په جنوب لوېديځ کې يوه نامعلومه بې پېلوټه الوتکه ويشتلې ده.

ايسنا دولتي اژانس ويلي چې دغه بې پېلوټه الوتکه نن سهار د خوزستان ولايت د ماهشهر بندري ښار پر فضا ويشتلې ده.

په راپور کې نه دي ويل شوي چې دغه الوتکه پوځي وه که تجارتي.

نيمه دولتي اژانس مهر وروسته راپور ورکړ، چې د الوتکې د بدن ټوټې ترلاسه شوي او چارواکي ورباندې تحقيقات کوي.

د دې موضوع په اړه سم د لاسه امريکايي چارواکو څرګندونې نه دي کړي، خو فاکس نيوز د امريکا يوه پوځي چارواکي چې نوم يې نه دى اخيستل شوى په حواله راپور ورکړى چې ويلي يې دي، د امريکا دفاع وزارت داسې راپورونه نه لري، چې د امريکا کومه بې پېلوټه الوتکه دې ويشتل شوې وي.

ايران په جون مياشت کې په هرموز تنګي کې د امريکا يوه اکتشافي بې پېلوټه الوتکه ويشتلې وه.

تهران ويلي چې دغې الوتکې يې له فضايي قلمرو څخه سرغړونه کړې وه، خو امريکا ويلي وو چې ايران په نړيوال فضايي قلمرو کې بې دليله دا حمله کړې ده.

د ورځې تازه خبرونه دلته ولولئ

د افغانستان حکومتي مشرانو د احمد وحید مژده وژنه غندلې

ښاغلی مژده پرون ماښام (عقرب ۲۹مه) د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو له خوا په ډزو ووژل شو.

د افغانستان ولسمشر محمد اشرف غني او اجرائیه رئیس عبدالله عبدالله د لیکوال او سیاسي کارپوه احمد وحید مژده وژل غندلي. ښاغلی مژده پرون (عقرب ۲۹مه) په کابل ښار کې د وسله والو کسانو په ډزو ووژل شو.

د ارګ په خبرپاڼه کې چې نن له غرمې وروسته خپره شوې، ولسمشر محمد اشرف غني امنیتي چارواکو او عدلي ادارو ته سپارښتنه کړې چې د مژده وژنه وڅېړي او عاملین یې مجازات کړي.

اجرائیه رئيس عبدالله عبدالله پرون، د هغه پر وژل کېدو خواشیني څرګنده کړه او هغه یې یو تروریسي عمل وباله.

ښاغلی مژده پرون ماښام د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو پرې برید وکړ. بریدګر د هغه تر وژلو وروسته له سیمې وتښتېدل.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هغه به ترډېره په رسنیو کې د دولت د منتقدینو په توګه راڅرګندېده او په افغانستان کې د بهرنیو پوځیانو د حضور مخالف و. پر هغه د طالبانو د نظر پلوی شخص ګڼل کېده.

طالبانو هم په یوه اعلامیه کې د ښاغلي مژده وژنه غندلې او هغه یې د استخباراتي کړیو کار بللی.

طالب ویاند ذبیح الله مجاهد په یوې اعلامیې کې ویلي چې وحیده مژده د یو پیاوړي اسلامي نظام د ټینګښت لپاره مبارزه کوله او ادعا یې کړې چې په دې لاره کې یې هڅې د وژنې سبب شوي دي.

افغانستان کې په ټولنیزو رسنیو کې ګڼو ژورنالیستانو، مدني فعالانو او سیاستوالو هم د وحید مژده وژنه غندلې ده.

تر اوسه هیچا پر نوموړې د برید مسولیت پر غاړه نه دی اخیستی.

ایران کې محکمې ۶ دولتي کارکوونکي د جاسوسۍ په تور په زندان محکوم کړل

د تهران انقلابي محکمې نن د نومبر په ۲۱مه، د چاپيریال ساتنې د یوې سیمه ییزې ادارې ۶ غړي له شپږو تر لسو کلونو زندان محکوم کړي دي.

هغوی د جاسوسۍ په تور چې په نړیواله کچه يې بحثونه پارولي او انتقادونه پرې شوي، محاکمه او په زندان محکوم شوي دي.

دا خبر د هغوی کورنیو او مدني فعالانو خپور کړی دی.

د ایران د بشري حقونو ځانګړي مرکز چې له نیویارکه فعالیت کوي، ویلي چې هغوی تقریباً ۲۲ میاشتې په دې تور په توقیف کې تېرې کړې چې د امریکا له دولت سره چې د ایران رژیم یې دښمن ګڼي، په تماس کې وو.

د ایران د قضائیه قوې یوه ویاند غلام حسین اسماعیلي ویلي چې د چاپېریال ساتنې محکوم شوي فعالان د استیناف غوښتنه کولای شي.

"اوکراین د ټرمپ او زېلېنسکي د خبرو په ورځ د امریکا د مرستې پر بندېدو اندېښنه ښوولې وه"

د روسیې او اوکراین لپاره د امریکا د دفاع وزارت مرستیاله لاورا کوپر

اوکراین، له دغه هېواد سره د امریکا د ۳۹۰ میلیون ډالره پوځي مرستې پر بندیدو د جولای په ۲۵ نېټه اندېښنه ښودلې وه، هماغه ورځ چې ولسمشر ټرمپ له خپل اوکرایني سیال ولادیمیر زېلېنسکي سره جنجال پاروونکې ټیلفونې خبرې کړي دي.

دا خبره د روسیې او اوکراین لپاره د امریکا د دفاع وزارت مرستیالې لاورا کوپر د چهارشنبې په ورځ (نومبر ۲۰مه) د امریکا د کانګرس غړیو ته چې د ولسمشر ټرمپ د استیضاح په اړه څېړنې کوي وکړه.

هغې زیاته کړه، دا خپله اوکراین ته د امریکا د مالي مرستو د ځنډېدو په اړه د هغو ایمیلونو له لارې خبره شوه چې ددې همکارانو د اوکراین له سفارت څخه تر لاسه کړي وو.

میرمن کوپر د ډیموکراتانو په مشرۍ د امریکا د استازو مجلس هغه هیئت ته چې له اوکراین سره د ولسمشر ټرمپ چلند څیړي، وویل: "د اوکراین د سفارت کارکونکو پوښتلي وو، له اوکراین سره امنیتي مرستو په اړه څه روان دي."

دا ایمیلونه په ورستیو کې هغې ته ښودل شوي دي او تېره میاشت یې د تړلو دروازو تر شا له غونډې وروسته د کانګرس غړو ته ورکړي دي.

د استازو د مجلس د بهرنیو اړیکو کمیټې په همدې ورځ د لاورا له همکارانو هم د امنیتي مرستو په اړه پوښتلي دي.

خو له دې سره د امریکا د دفاع وزارت دې مرستیالې ویلي، نه شي ویلی چې په کییف کې اوکرایني چارواکي به هم ددې مرستو په بندېدو خبر وو کنه، خو وايي، د همکارانو نظر یې دا دی چې "په غالب ګومان هغوی هم خبر وو".

روسیې یو پوځي افسر اوکراین ته د جاسوسۍ په تور نیولی

ارشیف

د روسیې د امنیتي خدمتونو اداره وايي، په روستوف سیمه کې یې یو پوځي افسر پرون اوکراین ته د جاسوسۍ په تور نیولی دی.

که چېرې پر دغه پوځي افسر د جاسوسۍ تورونه ثابت شي، له ۱۲ تر ۲۰ کلونو بند باندې محکومیږي.

د روسیې د امنیتي خدمتونو د اداري په وینا د پولیسو دغه افسر د دندې پر مهال د روسي ځواکونو په اړه داسې پټ معلومات راټول کړي وو چې کولی شي له هېواد څخه بهر د روسي دفاعي وړتیا ته زیان ورسوي.

د نیول شوي پوځي افسر نوم روسلان ارتیکوف بلل شوی چې په ۱۹۹۱ میلادي کال کې زیږیدلی دی. د اوکراین حکومت تر اوسه په دې اړه تبصره نه ده کړې.

سټولټنبرګ: د افغانستان په ټاکنو کې هېڅکله مداخله نه کوو

د ناټو تړون عمومي منشي ینس سټولټنبرګ

د ناټو تړون عمومي منشي په افغانستان کې د ډیموکراتیک حق ترلاسه کولو لپاره په تېرو ولسمشریزو ټاکنو کې د خلکو ګډون ستایلی او ویلي یې دي چې دوی هېڅکله په ټاکنو کې مداخله نه کوي.

د ناټو عمومي منشي ینس سټولټنبرګ پرون، د نومبر په ۲۰مه، خبریالانو ته په افغانستان کې د ټاکنو په تړاو د روانو لانجو په اړه وویل چې دوی له افغانستان سره همکارۍ ته متعهد دي، د ټاکنو لپاره یې د امنیت په تامین کې همکاري کړې خو په ټاکنیزو چارو کې لاسوهنه نه شي کولای.

ښاغلي سټولټنبرګ دا مهمه وګڼله چې انتخاباتي کمېسونونه د رأیو د تفتیش او بیا شمېرنې بهیر بشپړ کړي او پایلې اعلان کړي.

د افغانستان د ټاکنو خپلواک کمېسون ویلي چې د راییو د تفتیش او بیا شمېرنې بهیر به د دې اونۍ تر پایه بشپړ کړي او راتلونکې اونۍ به د ټاکنو ابتدايي پایلې اعلان کړي.

بیني ګانتز پر ټاکلي وخت د اسرائیل نوي حکومت پر جوړولو بریالی نه شو

بیني ګاتز په اسرائیل کې د سپین او ابي ګوند مشر دی.

په اسرائیل کې د صدراعظم بنیامین نتانیاهو اساسي رقیب بیني ګانتز بریالی نه شو چې له مهالوېش سره سم، یو ائتلافي حکومت جوړ کړي.

پر دې اساس، داسې ګڼل کېږي چې په اسرائیل کې یو وار بیا د پارلماني ټاکنو امکان شته دی.

بیني ګاتز په اسرائیل کې د سپین او ابي ګوند مشر دی.

د هغه ګوند پرون ماښام د نومبر په ۲۰مه، اعلان وکړ چې د نوي حکومت په تشکیل نه دي بریالي شوي.

په اسرائيل کې پارلماني انتخابات د سپټمبر په میاشت کې وشول. د نتانیاهو ګوند هم د نوي حکومت په جوړولو کې پاتې راغلی و. دواړو لویو ګوندونو د ستر ائتلاف په کولو هم موافقه نه ده کړې.

که چېرې هېڅ موافقه ونه شي، باید په مارچ کې له سره انتخابات وشي.

د پاکستان د بشري حقونو کمېسیون د بشري حقونو د یوه فعال پر برخلیک اندېښنه ښوولې

پاکستان کې د بشري حقونو فعال ادریس خټک تېره اونۍ صوابۍ ته پر لاره له خپل موټرچلوونکي سره یوځای بې درکه شو.

په پاکستان کې د بشري حقونو کمېسیون د بشري حقونو د فعال ادریس خټک د برخلیک په اړه اندېښنه څرګنده کړې ده.

د ادریس خټک کورنۍ ویلي چې د هغه په اړه هېڅ معلومات نه لري.

نوموړی تېره اونۍ صوابۍ ته په لاره کې له خپل موټرچلوونکي سره یوځاي بې درکه شو.

د پاکستان د بشري حقونو کمېسون پرون، د نومبر په ۲۰مه وویل، دا ښايي په پاکستان کې د روانو جبري بې درکیو یوه بله پېښه وي.

ادریس خټک د نوښار (نوشهره) اوسېدونکی دی او په پاکستان کې یې د بشري حقونو د څارنې نړیوالې ادارې او د عفوې نړیوال سازمان ته کار کړی و.

د پاکستان حکومت تر اوسه پر دې پېښه هېڅ خبره نه ده کړې.

حمدالله محب د ګډو ګټو لرونکو هېوادونو ناسته کې د افغانستان پر وضعیت خبرې کړي

د افغانستان د ولسمشر د ملي امنیت سلاکار حمدالله

د افغانستان د ولسمشر د ملي امنیت سلاکار حمدالله محب د ګډو ګټو لرونکو خپلواکو هېوادونو د امنیتي مشرانو په غونډه کې د افغانستان پر امنیتي وضعیت خبرې کړې دي.

دغه غونډه پرون د نومبر په ۲۰مه، په مسکو کې جوړه شوې وه.

د ګډو ګټو لرونکو خپلواکو هېوادونو د وېبپاڼې په حواله، د دې سازمان د ملي امنیت شورا مشرانو پر هغو تهدیدونو او امنیتی خطرونو خبرې وکړې چې د دې سازمان غړي هېوادونه ورسره مخامخ کېدلائ شي.

د حمدالله محب او نورو د خبرو جزئیات نه دي په ډ اګه شوي.

په پرونۍ غونډه کې د ګډو ګټو لرونکو خپلواکو هېوادونو ترمنځ د همکارۍ پر پراختیا خبرې شوي، ترڅو په اغېزناک ډول د غړو هېوادونو په سرحدي سیمو کې د بهرنیو تروریستانو د فعالیت او تګ راتګ مخنیوی وکړي.

د قزاقستان د ولسمشر د ملي امنیت سلاکار پرون د بهرنیو ګواښونو او همدا راز د سوریې او افغانستان د وضعیت په اړه خپل رپوټ نورو ته وړاندې کړ.

ټرمپ هیله ښوولې د بندیانو تبادله د افغانستان سوله کې پرمختګونو ته لاره هواره کړي

د امریکا ولسمشر ډونالد ټرمپ

د امریکا ولسمشر ډونالد ټرمپ هېله څرګنده کړې چې په په افغانستان کې د بندیانو وروستۍ تبادله به د سولې په برخه کې د اوربند په څېر ښو پرمختګونو ته لاره هواره کړي.

ولسمشر ټرمپ پرون (نومبر ۲۰مه) پر خپل ټویټر ولیکل، د طالبانو له برمتې څخه د کیون کینګ او ټیموټي ویکس د خوشې کېدو په خوښۍ کې د دوی له کورنیو سره شریک دی.

په افغانستان کې د امریکايي پوهنتون دا دوه استادان چې یو امریکایی او بل استرالیایی دی، وروسته له هغې طالبانو امریکايي لوري ته وسپارل چې د افغانستان حکومت له بګرام زندان څخه د انس حقاني په شمول درې مهم طالب بندیان خوشې کړل.

ولسمشر ټرمپ پر خپل ټویټر د ولسمشر اشرف غني مننه کړې او د هغه ملاتړ یې شجاعانه بللی. ټرمپ زیاته کړې "په دې هېله چې دا ګام د سولې په برخه کې د اوربند په څېر نورو ښو پرمختګونو ته لاره پرانیزې، څو دا اوږده جګړه پای ته ورسیږي."

طالبانو او د افغانستان حکومت دواړو ویلي چې دواړو لورو ته د یو شمېر بندیانو وروستي خوشې کېدل به د سولې پر بهیر مثبت اغیز ولري.

سیاسي کارپوه احمد وحید مژده کابل کې ناپيژاندو وسله والو وواژه

احمد وحید مژده

د افغانستان د کورنیو چارو وزارت ویلي، سیاسي کارپوه احمد وحید مژده نن ماښام د ناپېژاندو وسله والو له خوا په ډزو وژل شوی دی.

ددغه وزارت ویاند نصرت رحیمي وايي، نوموړی نن (عقرب/لړم ۲۹مه) په داسې حال کې چې د لمانځه ادا کولو لپاره د مسجد پر لور روان و، د موټر سایکل سپرو له خوا د کابل په دارلامان سیمه کې په نښه شو.

ښاغلي رحیمي ویلي چې موضوع د پولیسو تر تعقیب لاندې ده، خو تراوسه یې په تړاو څوک نه دي نیول شوي.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هېچا د ښاغلي مژده د وژلو مسئولیت نه دی منلی.

سروې: طالبان د نړۍ تر ټولو مخکښه وژوونکې ډله ده

ارشیف

یوه نوې سروې ښیې چې طالبان تیرکال تر ټولو وژونکې ډله وه.

د سروې له مخې په سوریې او عراق کې د تاوتریخوالي په کمېدو په افغانستان کې تروریستي بریدونه ډیر شوي دي.

په ۲۰۱۹ میلادي کال کې د تروریزم نړیوال انډکس چې د آسترالیا په سیدنې ښار کې د مېشت د سولي او اقتصاد انسټېټیوټ لخوا خپور شو ، ښیي په ۲۰۱۸ میلادي کال کې افغانستان کې د ټولو وژنو یو اویا ۷۱ سلنه د طالبانو له خوا شوي دي.

دا شمېره د ټولې نړۍ د تروریستي پېښو د قربانیانو ۳۸ فیصده جوړوي.

طالبان تېر کال تر داعش وسله والې ډلې چې تر ټولو لویه وژونکې ډله وه، مخکې شول.

د سولې او اقتصاد انسټېټیوټ د راپور پر اساس تېر کال د داعش ډلې له خوا د وژل شویو مجموعي شمېر ۷۰ فیصده راټیټ شوی او ۱۳۲۸ تنو ته رسېږي.

د دغه راپور له مخې په ټوله نړۍ کې تېرکال د تروریستي بریدونو د قربانیانو شمېر ۱۵۹۵۲ تنو ته ورسېد.

کابل کې د سوک وهنې سیالۍ پای ته ورسېدې

ارشیف

په کابل کې د سوک وهنې منتخبې سیالۍ نن پای ته ورسېدې.

د سوک وهنې په دغو سیالیو کې ۲۸۴ لوبغاړو ګډون کړی وو.

یادې سیالۍ په مرکز کابل کې له تېرو ۷ ورځو راهیسې په بېلابېلو وزنونو کې روانې وې.

د سوک وهنې فدراسیون مسوولین وايي، دوی له ۲۸۴ لوبغاړو څخه ۲۰ تنه د کابل د سوک وهنې منتخبې لوبډلې ته غوره کړي دي.

دغه سیالۍ هر کال د هېواد د سوک وهنې ملي فدراسیون له لوري د غوره لوبغاړو د پیژندلو په هدف ترسره کېږي.

د نړۍ د کاتولیکانو مشر پاپ فرانسس تایلنډ ته رسېدلی

تمه ده چې نوموړی به په جاپان کې هم تم شي.

د نړۍ د کاتولیکانو مشر پاپ فرانسس تایلنډ ته ورسېد.

دی به آسیا ته په دې یو اونیز سفر کې په تایلنډ کې د کاتولیکانو له یوه کوچني اقلیت سره وګوري.

تمه ده چې نوموړی به په جاپان کې هم تم شي.

بنکاک ته له رسېدو سره پاپ فرانسس له عیسوۍ مبلغې آنا روزا سیفوري سره چې له څه باندي پنځوسو کلونو راهیسې په تایلنډ کې اوسیږي، ولیدل.

کاتولیک عیسویان د تایلنډ د نفوس یوه سلنه جوړوي.

اسرائیل په سوریه کې د سوریې او ایران پوځي اهداف ویشتلي

ارشیف

د اسرائیل پوځ وایې په سوریې کې ېې لسګونه ایراني او سوریه یې پوځي اهداف ویشتلي دي.

دوی وایې په دې سره یې د اسرائیل تر واک لاندې جولان پر لوړو د راکټي بریدونو غچ واخیست.

د اسرائیل د پوځ په خبره د دې هېواد جنګي جټ الوتکو نن د نومبر ۲۰ د ایران د سپاه پاسداران قدس اړوند اهداف چې له ځمکې هوا ویشتونکي توغندي، د وسلو زیرمې او نورې پوځي اډې پکي شاملې دي، ویشتلي.

د جګړو د حالاتو یوه څارونکې ډله وایي، په دې هوایې بریدونو کې ۱۱ پوځیان وژل شوي دي چې ۷ کسه یې د سوریې نه دي.

د سوریې دولتي رسنیو وړاندې راپور ورکړ چې پلازمینې دمشق ته څېرمه د اسرائیل په بریدونو کې دوه ملکي وګړي وژل شوي او یو شمېر نور ټپیان دي.

ایراني چارواکو تر اوسه په دې اړه څه نه دي ویلي خو روسیې د اسرائیلو دا بریدونه یو ناسم اقدام بللی دی.

اسرائیلو په تکرار په سوریې کې د ایران ګټي په نښه کړي او غواړي په دې ډول په سیمه کې د ایران د دایمي پوځي حضور مخه ونیسي.

د پاکستان حکومت سیاسي مخالفینو د لارو د بندېدا پای وغوښت

د پاکستان د جمعیت علمای اسلام ګوند د مشر مولانا فضل الرحمن په مشرۍ دغه حکومت ضد اعتراضونه تیره میاشت د آزادۍ مارش په نوم پیل شول.

د پاکستان د حکومت مخالفو مشرانو پر خپلو پلویانو غږ کړی چې د هغه هیواد په لویو ښارونو کې د لارو بندول ختم کړي.

دوی وایې دا اعتراضونه عام خلک زیانمنوي.

دغو مخالفو مشرانو د نومبر پر ۱۹مه اسلام آباد کې یوې خبري غونډې ته دا هم وویل چې د صدراعظم عمران خان تر استعفی پورې به خپلو نورو فشارونو ته دوام ورکوي.

دوی ادعا کوي چې خان د ۲۰۱۸ میلادي کال په ټاکنو کې په درغلیو د پاکستان د پوځ له خوا واک ته رسیدلی دی.

د پاکستان د جمعیت علمای اسلام ګوند د مشر مولانا فضل الرحمن په مشرۍ دغه حکومت ضد اعتراضونه تیره میاشت د آزادۍ مارش په نوم پیل شول.

لسګونه زره لاریون کوونکو له کراچۍ څخه اعتراضونه پیل کړل او د اکټوبر پر یو دېرشمه پلازمېنه اسلام آباد ته ورسېدل.

دوی په پلازمینه کې پر عمده لویو لارو تحصن پیل کړ او د نویو تروخت مخکي ټاکنو غوښتنه یې کوله.

د نومبر پر ۱۳مه مولانا فضل الرحمن په پلازمېنه کې دوه اوونیز تحصن ختم او خپلو پلویانو ته یې وویل چې په ټول هېواد کې لویې لارې وتړي.

په پاکستان کې پوځ ډېر کلونه واکمن پاتې شوی او د دولتونو په جوړولو کې لوی لاس لري.

په تېرو ۷۰ کلونو کې هیڅ پاکستانی صدراعظم نه دی توانېدلی خپله کاري موده بشپړه کړي.

خوست کې چاودنې ټرافیک وژلی

ارشیف

په خوست ښار کې چاودنې یو ټرافیک وژلی او ۳ نور يې ټپیان کړي دي.

نن د چارشنبې په ورځ غرمه مهال د خوست ښار په مجاهد څلور لاري کې د ځای پر ځای شوي ماین چاودنه کې یو ټرافیک وژل شوی او دوه ټرافیکان او یو ملکي وګړی ټپیان شوي دي.

د خوست د امنیه قومدانۍ ویاند حیدر عادل مشال راډیو ته وویل، چې وژل شوی ټرافیک غني شاه نومیږي چې د موټرو د لایسنس مدیر و.

ده وویل، په دې پېښه کې دوه نور ټرافیکان او یو ملکی وګړي ټپیان شوي دي.

د امنیې قوماندانۍ ویاند دا هم وویل، چې ماین د ښار په ګلدان کې ځای پر ځای شوی وو.

بلخوا د خوست د عامې روغتیا ریاست چارواکي بیا د ټپیانو شمېر څلور کسه ښيي.

د عامې روغتیا ریاست مرستیال ډاکټر ګل محمدالدین محمدي وايي، د پېښې له ځایه د یو وژل شوي ټرافیک مړی، همدارنګه څلور ټپیان روغتونونو ته لیږدول شوي، چې درې يې ترافیک او یو ملکي وګړی دی.

تر اوسه د پيښې مسؤلیت کوم چا پر غاړه نه دی اخیستی.

راتلونکی کال له ۵۰ زره ډېرو ښځو ته د کرنیزو پروګرامونو لړۍ پیلیږي

ارشیف

د افغانستان د کرنې او مالدارۍ وزارت په پام کې لري چې راتلونکي کال کې له۵۰ زرو ډېرې مېرمنې د کرنیزو پروګرامونو تر پوښښ لاندې راولي.

د دغه وزارت ویاند اکبر رستمي نن ازادي راډيو ته وویل، د کرنې وزارت هڅه کوي چې په راتلونکي کال کې په ۲۵ زرو میرمنو کورنۍ باغچې وویشي.

نوموړي دغه شان وویل، تېرکال د افغانستان په بېلابېلو ولایتونو کې ۵۴ زره میرمنې د کرنې او مالدارۍ وزارت له پروګرامونو چې د چرګانو او مچیو د ساتنې، شنو خونو، باغونو او د میوو او سبزیجاتو د پروسس پروګرامونه په کې شامل و برخمنې شوې دي.

ښاغلی رستمي وايي،د دې پروګرامونو له جوړولو هدف دا دی چې د کرنې او کورني تولیداتو د پرختیا په برخه د ښځو وړتیاوې زیاتې شي.

مالیې وزارت: د افغانستان اقتصادي وده ۳ سلنه لوړه شوې

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

د افغانستان اقتصادي وده په روان ۱۳۹۸مالي کال کې ۳ سلنې ته لوړه شوې ده.

د افغانستان مالیې وزارت ویاند شمعروز خان مسجدي نن ازادي راډيو ته وویل، چې د افغانستان د اقتصادي ودې مهم دلایل د سیمې له هېوادونو سره د هوایي دهلیزونو رامنځته کېدل دي، چې صادرات ورسره ښه او د کرنې په برخه کې هم وده رامنځته شوې.

هغه زیاته کړه: "خوشبختانه کوم راپورونه چې مونږ لرو په بيلابيلو سکټورونو کې د پراختیا له امله د افغانستان اقتصادي وده ۳ سلنه لوړه شوې چې دا په تېرو څلورو کلونو په پرتله تر ټولو لویه اقتصادي پراختیا ده."

د یادولو وړده، چې د ۱۳۹۹ لمریز مالي کال لپاره اقتصادي وده د ۳.۴ سلنې په شاوخوا کې ټاکل شوې، چې د ۱۳۹۸ لمریز کال په پرتله ۰،۵ سلنه ښوول شوې ده.

د اقتصادي چارو پوه میرویس افغان وایي، د نړیوالو اوسني مالي ملاتړ ته په کتو په ۱۳۹۸ لمریز مالي کال کې ۳ فیصده اقتصادي وده لږ ده او باید د افغانستان په کورنیو سرچینو ډېر کار وشي.

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

باور دا دی، که افغان حکومت مالي چارې رڼې کړي، اقتصادي وده به نوره هم زیاته شي.

پنټاګون: د ایران د توغندیو زیرمې په منځني ختیځ کې تر ټولو زیاتې دي

د ایران د توغندیو زیرمې په منځني ختیځ کې بې سارې ان د اسراییل له زیرمو هم زیاتې دي.

د ایران د توغندیو زیرمې په منځني ختیځ کې بې سارې ان د اسراییل له زیرمو هم زیاتې دي.

دا خبره د امریکا د دفاعي استخباراتو ادارې په نوي راپور کې چې پرون سې شنبې یې خپور کړی، کړې ده.

پنټاګون په دغه څیړنیز راپور کې ویلي چې په تېرو څلویښتو کلونو کې ایران د توغندیو پراخ پروګرام، د توغندیو اندازه او د پرمختللو توغندیو د ځواک پراختیا ته له دې سره سره دوام ورکړی چې د توغندیو د پراختیا د مخنیوي لپاره له لسیزو راهیسې هڅه کیږي.

پر ایران له لسیزې راهیسې د لګول شویو بندیزونو سره سره تهران د لرې واټن ویشتونکو توغندیو په ګډون دغو وسلو ته چې د توغندیو واټن یې تر۲۰۰۰ کیلومټره واټن چې اسرائیل هم په نښه کولی شي، ویشتلی شي.

په راپورکې ویل شوي چې دوه کاله مخکې ایران د ۱۲۵۰ کیلومټرو واټن ویشتونکی توغندی وښود چې مختلف سروکې لیږدولی شي او داسې ښکاري چې په تولید کې یې د شمالي کوریا له تکنالوجۍ کاراخیستل شوی دی.

په راپور کې دا هم ویل شوي چې دې ته په پام سره چې ایران پرمختللی هوایي ځواک نه لري، د لرې واټن ویشتونکو توغندیو ته یې ځکه پراختیا ورکړې چې په سیمه کې د خپلو دښمنانو په تېره بیا د متحدو ایالتونو، اسرائیل او سعودي عربستان د ممکنه برید مخه ونیسي.

چارواکي کندهار او ارزګان کې د ۲۸ وسله والو د وژنې ادعا کوي

AFGHANISTAN -- Afghan policemen stand guard at a checkpoint ahead of parliamentary election in Kandahar, October 18, 2018

افغان ځواکونو کندهار او ارزګان کي د لسګونه وسله والو د مرګ ژوبلي ادعا کوي.

د ګډو افغان ځواکونو پوځي عمليات په سوېل کې د ۲۰۵ اتل قول اردو د پوځي چارواکو تر قومندې لاندې د کندهار په میوند او د روزګان په ګيزاب ولسوالۍ کې ترسره شوي دي.

د ۲۰۵ اتل قول اردو ویاند خواجه يحي علوي ازادي رادیو ته وویل چې په دغه عملیاتو کې د کمانډو ځواکونو ترڅنګ افغان هوایي ځواک هم برخه اخستې وه.

نوموړی وایي، د افغان ځواکونو په دغو عملياتو کې د کندهار په میوند کې ۱۹ وسله وال وژل شوي او ۱۴ نور ژوبل شوي او همدراز د ارزګان په ګيزاب کې ۴ وسله وال وژل شوي او ۴ نور ژوبل شوي دي.

علوي وایي، په دغو عملياتو کې د وسله والو ۴۸ کړۍ ماينونه او وسلې هم د افغان ځواکونو لاسته ورغلي دي.

طالب وسله والو تر اوسه په دې اړه رسنيو ته څه نه دي ویلي.

د یو بل خبر له مخې افغان ځانګړو ځواکونو تېره شپه د کندهار په خاکريز ولسوالۍ کې پوځي عمليات ترسره کړي دي.

د کندهار د والي ویاند احمد بهير احمدي ازادی راډیو ته وویل چې په دغو عملياتو کې پنځه وسله وال وژل شوي او پنځه نور ژوبل شوي دي.

په دې اړه هم طالب وسله والو تر اوسه رسنيو ته څه نه دي ویلي.

لوګر کې د هیلکوپټر راغورځېدو پېښه کې دوه امریکايي سرتېري وژل شوي

ارشیف

د امریکا دوه پوځیان په افغانستان کې د هیلکوپټر د را غورځیدو په پيښه کې وژل شوي دي.

په افغانستان کې دیره امریکایي ځواکونو نن په یوه خپره کړې خبرپاڼه کې ویلي، په دې اړه چې د دغه هیلکوپټر د راغورځېدو علت څه و، څېړنه کوي.

د خبرپاڼې له مخې لومړنۍ څیړنې ښیي چې دغه هیلکوپټر د دښمن په ډزو نده را نسکوره شوې.

په دې اړه نورجزئیات نه دي ورکړل شوي خو د طالبانو ویاند ذبیح الله مجاهد په خپله ټویټرپاڼه کې ادعا کړې چې د امریکا شینوک ډوله هیلکوپټر دوی د لوګر په څرخ ولسوالۍ کې رانسکوره کړې او په کې ټول پوځیان یې وژلي دي.

خو د افغانستان دفاع وزارت د طالبانو دغه ادعا ردکړې ده.

د دې وزارت ویاند فواد امان نن په یوه خپره کړې خبرپاڼه کې ویلي چې دغه هیلکوپټر د دښمن په ډزو نده رانسکوره شوې.

هغه همداشان ویلي چې افغان ځواکونو ته زیان نه دی رسېدلی.

وسله وال طالبان پرته له دې چې شواهد وښیي تل د هیلکوپټر او د بې پیلوټه الوتکو د رانسکوریدو ادعاوې کوي.

د روان کال له پیل راهیسې په افغانستان کې د جګړو په تړاو پېښو کې ۱۹ امریکایي پوځیان وژل شوي دي.

په اوس وخت کې شاوخوا دیارلس زره امریکایي ځواکونه په افغانستان کې دېره دي او د دې ترڅنګ د ناتو د نورو اروپایي غړیو هېوادونو زرګونه سرتېري د دې تړون د غوڅ ملاتړ په ماموریت کې دنده ترسره کوي.

د روانې میاشتې په پیل کې د امریکا د وسله والو ځواکونو لوی درستیز جنرال مارک میلي اټکل کړی چې امریکایي ځواکونه چې اتلس کاله په افغانستان کې حضورلري، د څو نورو کلونو لپاره هم په دې هېواد کې پاتې شي.

"نږدې دوه دریمه برخه افغان ماشومان جګړې اغیزمن کړي"

ارشیف

نږدې دوه دریمه برخه افغان ماشومان په افغانستان کې روانې جګړې اغیزمن کړي دي.

دا خبره په بریټانیا کې میشتې سیف د چیلډرین مرستندویه مؤسسې کړې ده.

سیف د چیلډرن پرون په خپاره کړي راپور کې پر ماشومانو د جګړې د اغېزو د مختلفو بڼو یادونه کړې او ویلي یي دي چې د کورنۍ د غړي د له لاسه ورکولو، د جګړې یا د بریدونو د پېښو د لیدلو یا په جګړه کې د ټپي کېدو له لارې ماشومان اغیزمن شوي دي.

په دغه راپور کې چې په څلورو ولایتونو کې له اوو سوو لویانو او ماشومانو سره د مرکو پر بنسټ چمتو شوی ویل شوي چې د ماشومانو ډېره برخه یې لکه له ژور خفګان او اندېښنو څخه کړیږي او د درملنې لپاره یې ضروري خدمتونو ته لاس رسۍ هم نه لري.

میندو او پلرونو چې ورسره مرکې شوي ویلي چې ماشومان ښوونځي ته په لاره ویریږي.

د افغانستان لپاره د ملګروملتونو د مرستندویه ماموریت یوناما له خوا د وروستي درې میاشتني خپور شوي راپور له مخې تیرکال افغانستان د افغان ماشومانو لپاره له کله چې یوناما له ۲۰۰۹ میلادي کال راهیسې د جګړې د زیانونو په اړه د راپور ورکولو لړۍ پیل کړې، تر ټولو خونړی کال و.

د دغه راپورله مخې ۹۲۷ ماشومان وژل شوي او ۲۱۰۰ نورټپیان شوي و.

چارواکي: کونړ کې داعش ډله جدي ګواښ نه شي پېښولى

ارشیف

د کونړ ولايت چارواکي وايي په دغه ولايت کې د داعش په نوم وسله وال کوم جدي ګواښ نه شي پېښولى.

د افغانستان ولسمشر محمد اشرف غني پرون د کونړ څنګلور ولايت ننګرهار په مرکز جلال اباد کې وويل، چې په دې ولايت کې داعش ډله په بشپړ ډول له منځه تللې ده.

خو په ولسي جرګه کې د کونړ د خلکو استازي نعمت اله کرياب پرون وويل، چې د داعش ډلې وسله والو د کونړ په ځينو ولسواليو کې امنيتي خطر رامنځته کړى دى.

د کونړ د والي مرستيال ګل محمد بيدار تېر ماښام ازادۍ راډيو ته وويل، د داعش وسلوال دومره جدي ګواښ نه دى.

بیدار زیاته کړه: "جدي ګواښ يې په دې نه ګڼو، يو خو دا دى چې دوى په لرې پرتو سيمو او ځنګلونو کې دي چې کله مو عمليات تنظيم کړي او د دوى پر وړاندې مو اقدام کړى، دوى ته مو زیانونه اړولي او دوى تښتېدلي دي، ژمى دى، هوا هم يخه ده، دوى يوازې پټنځايونه ګوري چې ژوندي پاتې شي، د پرمختګ او ګواښ پېښولو وړ نه دي."

د ننګرهار والي تېره يکشنبه ازادۍ راډيو ته ويلي وو، چې په دې ولايت کې د داعش ډلې تر ٦٠٠ زيات غړي دولت تسليم شوي دي.

هغو وسله والو چې ځانونه په افغانستان کې د داعش د خراسان څانګې غړي بولي، په افغانستان کې د ځينو خونړيو بریدونو مسؤليت منلى دى.

قطر لوبډلې افغان لوبډلې ته په فوټبال کې ماته ورکړې

د قطر د فوټبال ملي لوبډلې پرون د افغانستان لوبډلې ته يو د صفر پر وړاندې ماته ورکړه.

دغه سيالي نړيوال او د اسيايي هېوادونو جام ته د لار موندنې لپاره د سیالیو په لړ کې وشوه.

دغه سیالي تېره شپه د تاجکستان د پلازمېنې دوشنبې په مرکزي لوبغالي کې وشوه.

د فوټبال نړيوال فډراسيون (فيفا) د امنيتي دلايلو له مخې د افغانستان په کوربه توب د سیالیو لپاره د تاجکستان ډګرونه غوره کړي دي.

د افغانستان د فوټبال ملي لوبډلې تر اوسه په E ګروپ کې پنځه سیالۍ کړې دي.

له بنګله دېش څخه يې لوبه ګټلې، له هندوستان سره مساوي شوې، خو د قطر او عمان په وړاندې يې ماتې خوړلې ده.

افغانستان په خپل ګروپ کې، د ٢٠٢٢میلادي کال نړيوال جام او په ٢٠٢٣میلادي کال کې د اسيايي هېوادونو جام ته د لار موندنې لپاره په دریم کتار کې دى.

سټولټنبرګ: افغانستان لا هم ناټو لپاره تر ټولو ستر ماموريت ګڼل کېږي

ارشیف

د ناټو سرمنشي وايي، افغانستان لا هم د ناټو پوځي تړون لپاره تر ټولو ستر ماموريت ګڼل کېږي.

ينس سټولټنبرګ پرون سې شنبه په بروکسل کې په يوه خبري کنفرانس کې وويل، چې ناټو په افغانستان او عراق کې د اسلامي دولت ډلې د بيا ټوکېدلو په مخنيوي کې مهم رول لوبولى دى.

هغه وايي: "د افغانستان ماموريت چې لا هم زمونږ تر ټولو پراخ پوځي عمليات ګڼل کېږي لا دوام لري، چې د ټروريزم پر وړاندې پر مبارزه متمرکز دى، څو ډاډ ترلاسه شي چې افغانستان بيا د تروريستانو په خوندي ځاله بدل نه شي، د ناټو په نړيوال تړون کې ټول متحدان او شريکان د داعش ډلې ماتې ته ژمن دي."

د ناټو سرمنشي دا خبرې په بروکسل کې د ناټو تړون د بهرنيو چارو وزيرانو تر غونډې يوه ورځ مخکې کړې دي.

تمه کېږي د دغو چارواکو په نننۍ غونډه کې د ناټو تړون غړو هېوادونو د اجنډا پر وروستي کولو او د کتنو پر پروګرام بحث وشي.

د ډسمبر مياشتې پر دريمه او څلورمه به د ناټو په هغه سر مشريزه کې چې په لندن کې جوړېږي، د بحثونو په اجنډا کې د افغانستان موضوع هم شامله وي.

نور راوښيه

XS
SM
MD
LG