د لاسرسۍ وړ لېنکونه

تازه خبر
سه شنبه ۱۲ وری ۱۳۹۹ کابل ۰۷:۰۸

خبرونه

په کاپيسا کې چاودنې يو ملکي وګړى وژلى دى

د کاپيسا ولايت چارواکي وايي د يوه توغندي په چاودنه کې يو تن وژل شوى او ٢ تنه نور ټپيان شوي دي.

د کاپيسا د امنيې قوماندانۍ وياند عبدالشايق شورش ازادۍ راډيو ته وويل، دغه چاودنه نن سهار په نجراب ولسوالۍ کې شوې ده.

ده وويل چې توغندى په صالح خېلو سيمو کې په کرنيزه ځمکه کې ځاى پر ځاى شوى و، چې د يوي پر وخت چاودلى دى.

ښاغلى شورش وايي د پېښې قربانيان ملکي وګړي دي.

تر اوسه معلومه نه ده، چې دغه توغندى د چا له خوا هلته ښخ کړاى شوى و.

د ازادۍ راډيو خبريال وايي د پېښې سيمه د وسلوالو طالبانو په کنټرول کې ده.

د ورځې تازه خبرونه دلته ولولئ

سرچینه: د ملي امنیت د جندر برخې ټپي شوې رئیسه مړه شوه

ارشیف

د افغانستان د ملي امنیت ریاست یوه سرچینه ازادي راډیو سره په خبرو کې تأییدوي چې د دغه ریاست د جندر رئیسه جنرال شرمیلا فروغ مړه شوې ده.

دغه سرچینې ونه‌غوښتل چې د موضوع د حساسیت له کبله خپل نوم واخلي، خو زیاته‌یې کړه چې په دې اړه به د دغه ریاست له‌خوا ډېر ژر اعلامیه خپره شي.

ویل کېږي چې جنرال شرمیلا فروغ تېره ورځ د یو مقناطیسي ماین په چاودنه کې چې د دې په موټر کې ځای پر ځای شوی و سخته ټپي شوه چې نن‌یې ساه ورکړه.

سرچینې وویل چې د پېښې د عاملینو د نیولو لپاره د دوی هڅې روانې دي، خو په ډاګه‌یې نه‌کړه چې دا د چا کار کېدلای شي.

امنیتي چارواکي: لغمان او ننګرهار کې ۶ وسله‌وال طالبان وژل شوي

ارشیف

په ختیځ کې د ملي اردو چارواکي په ننګرهار او لغمان کې د ۶ وسله‌والو طالبانو د وژل کېدو خبر ورکوي.

د ۲۰۱ سېلاب قول اردو مسؤلان ادعا کوي چې په تېرو دوو اوونیو کې په ننګرهار او لغمان کې د وسله‌والو طالبانو له لوري د افغان ځواکونو پر پوستو ۱۰ وسله‌والې حملې شوي چې د دوی له‌خوا په شا تمبول شوي دي.

د یادې قول اردو ویاند هارون یوسفزي وویل، د ننګرهار په شېرزادو کې وسله‌وال له افغان ځواکونو سره په نښته کې د یادې ډلې د یو قوماندان چې په منصور مشهور و، وژل شوی او پنځه ملګري یې ټپیان شوي دي.

هغه زیاته کړه په ورته مهال د لغمان په علیشنګ او الینګار ولسوالیو کې هم د افغان ځواکونو او وسله‌والو طالبانو ترمنځ نښته شوې چې پر مهال‌یې ۵ وسله‌وال طالبان وژل شوي او ۶ نور ټپیان شوي دي.

ښاغلي یوسفزي وویل: "تېرو دوو اوونیو کې د وسله‌والو طالبانو ۱۰ ډله‌ییز بریدونه په شا تمبول شوي، طالبانو په تېرو دوو اوونیو کې د ننګرهار په شېرزادو او د لغمان په الینګار ولسوالیو کې د امنیتي او دفاعي ځواکونو په پوستو بریدونه کړي چې افغان زړورو سرتېرو ورسره جګړه پیل کړه چې په شېرزادو کې د طالبانو یو قوماندان وژل شوی او پنځه ټپیان شوي او د لغمان په علیشنګ او الینګار کې پنځه طالبان وژل شوي او شپږ نور ټپیان دي."

وسله‌والو طالبانو تر اوسه په دې اړه څه نه‌دي ویلي.

جرمني د افغانانو جبري ستنول وځنډول

ارشیف

د جرمني حکومت افغانستان ته د هغو افغانانو د جبري ستنولو بهیر ځنډولی چې له غیر قانوني لارو دې هېواد ته تللي دي.

د جرمني د کورنیو چارو وزارت ویانده وايي چې د افغان حکومت د غوښتنې له مخې او د کرونا ویروس له وجې رامنځته شوي بحران ته په پام سره‌یې د افغانانو جبري ایستل موقتاً ځنډولي دي.

د جرمني خبري اژانس «DPA» د راپور له مخې له دې هېواده د ایستل شويو افغان کډوالو وروستۍ جوپه د روانې مارچ میاشتې په ۱۲مه نېټه کابل ته واستول شوه.

جرمني ټول ۹۰۷ افغانان چې ټول نارینه دي، افغانستان ته ستانه کړي دي.

'ننګرهار روغتون کې مړ شوی کس په کرونا ویروس اخته نه‌و'

د ننګرهار نقشه

د ننګرهار عامې روغتیا مسؤلین وایي، د هغه ناروغ د معایناتو نتیجه منفي راغلې چې د کرونا ویروس شکمنې نښې یې درلودې او تېره ورځ په روغتون کې مړ شو.

د ننګرهار د عامې روغتیا ویاند ظاهر عادل نن سې شنبه د وري په ۱۲مه ازادي راډيو ته وویل چې یاد ناروغ ۶۵ کلن وو او د شکر او زړه د ناروغۍ له امله‌یې ساه ورکړې.

دا کس د ننګرهار اوسېدونکی وو.

د ښاغلي عادل په خبره، د دغه ۶۵ کلن سړي معاینات د مارچ په ۲۸مه کابل ته لېږل شوي وو چې تېره شپه ناوخته‌یې پایله له دوی سره شریکه شوه. ده وویل د ناروغ سړي مړی نن د هغه کورنۍ ته وسپارل شو.

مخکې خلکو اندېښنه څرګنده کړې وه چې ښايي دغه ناروغ د روغتیایي کارکوونکو د بې‌غورۍ او په وخت د تشخیص نه‌کېدو له امله مړ شوی وي.

په ننګرهار کې تر اوسه د کرونا ویروس په تړاو ۷ پېښې ثبت شوي چې ۶یې منفي او یوه‌یې مثبته ده.

د یوه پاکستاني خبریال تښتولو په اړه د بې‌پولې خبریالانو سازمان شک

د بلوچستان ټایمز خبري وېب‌پاڼې مدیر مسئول ساجد حسین

د بې‌پولې خبريالانو اداره شک لري چې په سويډن کې شااوخوا یوه میاشت مخکې یو ورک شوی پاکستانی خبریال د دې هېواد د استخباراتي ادارې په امر تښتول شوی دی.

د بلوچستان ټایمز خبري وېب‌پاڼې مدیر مسئول ساجد حسین د مارچ میاشتې په دوهمه نېټه د سويډن په اوپسالا ښار کې ورک شو.

دا وېب‌پاڼه په پاکستان کې د بلوڅانو له بشري حقونو د سرغړونو راپورونه ورکوي.

په سويډن کې د بې‌پولې خبریالانو سازمان مسؤل ایریک هالکر پرون وویل: "په اروپا کې له پاکستاني خبریالانو سره وروستیو د ځپنو او ځورونو پېښو ته په کتو موږ د ده د کار په خاطر د ده ورکېدل له پامه نه‌شو غورځولای."

په پاریس کې د بې‌پولې خبریالانو ادارې مرکزي دفتر ویلي چې بلوچستان ټایمز وېب‌پاڼه څو ځلې له هغو سرو کرښو تېره شوې چې په اسلام‌اباد کې نظامي مؤسسې جوړې کړي.

امریکا پر ایران په لګول شویو بندیزونو معافیت وغځاوه

ایران

د امریکا حکومت پر ایران په لګول شویو بندیزونو کې معافیت د نورو ۶۰ ورځو لپاره تمدید کړ.

له دې پرېکړې سره به روسیه، چین او اروپايي هېوادونه وکولای شي چې د دې هېواد په اټمي بټیو کې د اټمي وسلو د پراختیا د مخنیوي کار ته دوام ورکړي.

د امریکا د بهرنیو چارو وزیر مایک پومپیو دا معافیت پرون دوشنبه تأیید کړ، خو هغه یادونه وکړه چې دا پرېکړه د ایران اټمي فعالیت محدودوي.

د امریکا د بهرنیو چارو وزارت ویانده مورګان اورتاګوس په یوه بیان کې وايي د ایران د اټمي فعالیتونو پراخېدل د منلو وړ نه‌دي.

مېرمن اورتاګوس زیاتوي، د ایران د رژیم له‌خوا په اټمي برخه کې اخاذي د نړۍ سولې او امنیت ته لوی ګواښ دی.

په بندیزونو کې معافیت ایران ته اجازه ورکوي چې د اټمي وسلو د نه‌پراختیا پر اساس په اراک د درنو اوبو په تحقیقي اټمي بټۍ، د بوشهر په اټمي تأسیساتو او د تهران په تحقیقاتي رېکټور او نورو ساحو کې کار ته دورام ورکړي.

تخار کې د غیر مسئوله وسله‌والو نښته کې ۳ ملکیان وژل شوي

د تالقانو ښار یوه څنډه- ارشیف

د تخار ولایت په کلفګان ولسوالۍ کې د غیر مسئوله وسله‌والو په نښته کې ۳ ملکیان وژل شوي دي.

د تخار د امنیه قوماندانۍ ویاند عبدالخلیل اسیر د سې شنبې په ورځ ازادي راډيو ته وویل چې تېر ماښام د کلفګان ولسوالۍ په خان دستمال سیمه کې د دوو غیر مسؤله قوماندانانو د کسانو ترمنځ په نښته کې ۳ ملکي کسان ووژل شول.

ښاغلي اسیر زیاته کړه چې دولتي ځواکونه د دغو غیر مسؤله وسله‌والو د نیولو په هدف سیمې ته لېږل شوي، خو غیر مسؤل کسان له سیمې تښتېدلي دي.

ده وویل چې د کلفګان ولسوالۍ د خان دستمال سیمې اوسېدونکو د اعتراض په توګه د بدخشان-تخار لویه لاره د ټرافیکو پر مخ وتړله د او د دې پېښې د عاملینو د مجازات غوښتنه‌یې وکړه.

چارواکي: کندز کې ۶ طالبان او یو د ملي اردو سرتېري وژل شوي

ارشیف

د کندز په دشت ارچي ولسوالۍ کې په وسله‌واله نښته کې د ملي اردو د یوه سرتېري او ۶ طالب وسله‌والو د وژل کېدو خبر ورکړل شوی دی.

ځايي چارواکي وايي چې تېره شپه وسله‌والو طالبانو د دشت ارچي ولسوالۍ په قولق سیمه کې د دولتي ځواکونو پر پوستو حمله وکړه چې د سهار تر درې نیمو بجو روانه وه.

د دشت ارچي ولسوال نصرالدین سعدي د سې شنبې په ورځ «۱۳۹۹ کال د وري ۱۲» ازادي راډيو ته وویل چې تېره شپه ۱۲ بجې د طالبانو حمله پیل شوه او په نتيجه کې يې یو د ملي اردو سرتېری ووژل شو او درې نور ټپيان شول او همداراز ۶ وسله‌وال طالبان ووژل شول.

ده زیاته کړه: "د شپې پر ۱۲ بجو دښمن پر امنیتي ځواکونو حمله وکړه چې تر درې څلورو بجو يې دوام وکړ، په دې حمله کې زموږ د امنیتي ځواکونو یو کس شهید شو او درې ټپیان دي او د مخالف لوري ۶ کسان ووژل شول."

ښاغلي سعدي زیاته کړه چې نوي ځواکونه د مرستې لپاره ورسېدل او طالبان له سیمې ووتل.

طالبانو تر اوسه په دې اړه رسنیو ته څه نه‌دي ویلي.

د پولنډ طبیعي ګاز ادارې د روسیې ګازپروم شرکت نه دعوه‌ ګټلې

ارشیف، ګازپروم شرکت کې د نفت تصفیه

د پولنډ د طبیعي ګاز اداره وايي، د روسیې د انرژۍ له دولتي شرکت ګازپروم سره د یو نیم میلیارد ډالرو په ارزښت څو کلنه دعوه‌یې په سویډن کې په یوه نړیواله محکمه کې ګټلې ده.

د پولنډ د طبیعي ګاز د وېش دې لوی دولتي شرکت په یوه بیان کې چې پرون د مارچ په ۳۰مه نېټه خپور شو ویلي چې دا دعوه‌یې د ۱۹۹۶ کال د ګاز د خرڅلاو د یوې معاملې په تړاو ګټلې ده.

په بیان کې راغلي چې ګازپروم له دې شرکت څخه د څو کلونو لپاره د جریمې په نوم اضافه پیسې اخیستې دي چې اوس به‌یې بېرته ورکوي.

په بیان کې دا یادونه هم شوې چې سویډنۍ محکمې ګازپروم ته امر کړی دی چې په بازار کې د کوټېشن یا نرخ اخیستو اصولو ته په پام سره د ګاز د بیو د ټاکلو فورمول هم بدل کړي.

د کانګرس ۲ غړو په هنګري کې د یوه نوي قانون تصویب وغانده

صدراعظم ویکتور اوربن د هنګري په پارلمان کې د خبرو پر مهال.

د متحده ایالاتو د کانګرس دوو غړو په هنګري کې د هغه نوي قانون تصویب غندلی دی چې له مخې یې د دې هېواد ښي اړخي صدراعظم ویکتور اوربن ته له کرونا ویروس سره د مبارزې په مقصد د بېړني حالت د اعلان په برخه کې مطلق صلاحیت ورکوي.

د استازو جرګې غړي ډیموکرات ایلیوت انجېل او د سنا د بهرنیو اړیکو د کمېټې مشر جمهوري‌پال جیم ریچ پرون د مارچ په ۳۰مه نېټه وویل د ځانګړې اندېښنې وړ خبره ده چې د ناټو او اروپايي ټولنې یو غړی هېواد د دوی په وینا پر واک د ولکې لپاره داسې اقدام وکړي.

د هنګري پارلمان چې د اوربان په مشرۍ نشنلست ګوند له یوې لسیزې راهیسې اکثریت په‌کې لري پرون د مارچ په ۳۰مه هغه لایحه تصویب کړه چې حکومت ته تر نامعلومې مودې د مارچ په ۱۱مه د اعلان شوي بېړني حالت د تمدید صلاحیت ورکوي.

ګرجستان کې شپنی ګرځ‌بندیز نافذېږي

د ګرجستان پلازمېنه تبلیسي ښار

د ګرجستان حکومت به پرېکړه وکړي چې د کرونا ویروس د مخنیوي لپاره د شپې له ۹ بجو د سهار تر ۶ بجو ګرځ‌بندیز نافذ کړي.

دا د قرنطین د نویو اصولو یوه برخه ده چې موخه‌یې د شمالي قفقاز په دغه هېواد کې د کرونا ویروس د خپرېدو سوکه کول دي.

صدراعظم ګیورګي کاخاریا پرون دوشنبه وویل، د ګرځ‌بندیز پر وخت به یوازې درملتونونه پرانیستي وي.

سر له نن سې شنبې به د پلازمېنې تبلیسي د مټرو سیستم هم بند وي، د ښارونو ترمنځ به عامه ټرافیک هم فعالیت نه‌لري.

تر درېیو ډېر کسان به یوازې په دکانونو او درملتونونو کې د راغونډېدو اجازه ولري.

د امریکا د جانز هاپکنز پوهنتون په حواله، په ګرجستان کې لږترلږه ۱۰۰ کسان په کرونا ویروس اخته شوي دي.

اروپایي کمېسیون ځینو هېوادونو ته ۱۴۰ میلیونه یورو تخصیص کړې

د اروپايي ټولنې بیرغ

اروپایي کمېسیون وايي د کرونا ویروس په وړاندې له مبارزې سره د مرستې لپاره‌یې ارمنستان، اذربایجان، بلاروس، ګرجستان، مالدووا او اوکراین ته ۱۴۰ میلیونه یورو تخصیص کړې دي.

دغه کمېسیون پرون په یوه اعلامیه کې وویل، د اروپايي ټولنې د ختیځ مشارکت له دغو شپږو هېوادونو سره به د ۷۰۰ میلیونه یورو په ارزښت د اوسنیو ابزارونو کارول هم له سره تنظیم کړي، څو د کرونا ویروس د بحران ټولنیز او اقتصادي تأثیرات کم کړي.

د اروپايي کمېسیون د ګاونډیتوب او پراختیا کمېشنر اولیفر وارهیليي وویل، دا نه‌یوازې اروپايي ټولنې، بلکې ټولو شریکو هېوادونو ته سخته شېبه ده.

اروپايي کمېسیون وايي دغو شپږو هېوادونو سره به د طبي وسایلو او پرسونل په لېږلو کې هم همکاري وکړي.

روسیه د قرنطین مودې پر غځولو غور کوي

ارشیف، مسکو

روسیه پر دې غور کوي چې په ملي کچه پر کورونو د خلکو د پاتې کېدو موده وغځوي.

تر دې مخکې د مسکو چارواکو د دغه ښار له ۱۲ میلیونه اوسېدونکو غوښتنه کړې وه چې په خپلو کورونو کې پاتې شي.

د روسیې د ارتودوکس کلیسا هم، د کرونا ویروس د خپرېدو د مخینوي په هدف، له عبادت کوونکو غوښتنه وکړه چې کلیساوو ته د تګ پر ځای په کورونو کې عبادت وکړي.

صدراعظم میخایل میشوستین پرون له واليانو غوښتنه وکړه چې د مسکو په څېر پر کورونو د خلکو د پاتېدو امر تعقیب کړي.

د روسیې حکومت پرون د دغه هېواد ټول سرحدونه وتړل، خو روسي ډیپلوماتان، حمل او نقل او نور ضروري وسایط او خلک کولای شي له سرحده داخل شي.

د روسې فدراتیف د امنیت شورا مرستیال دمتري مدودف تېره یکشنبه پر خپل فېس‌بوک پاڼه په یوه وېډیويي پیغام کې وویل: "د کرونا ویروس د خپرېدو نامطلوبه سناریو نورو سختو اقداماتو ته اړتیا لري، د دغه ویروس د خپرېدو مخنیوی دې ته اړتیا لري چې هر کس باید ولسمشر ته غوږ شي او خپل انضباط وښيي."

په روسیه کې د کرونا ویروس د بحران په وړاندې د مبارزې مرکز پرون وویل، په دغه ویروس وروستی تن په پسکوف سیمه کې مړ شوی دی.

د روسیې په ۷۱ ساحو کې په کرونا ویروس د خلکو د اخته کېدو راپورونه ثبت شوي دي.

ارزګان چارواکي: د ښاروالۍ عواید ۶۰ فیصده زیات شوي

د ارزګان نقشه

د ارزګان چارواکي وایي، تېر لمریز کال د مرکز ترینکوټ د ښاروالۍ عواید، د وړم کال په نسبت، شااوخوا ۶۰ فیصده زیات وو.

د ترینکوټ ښاروال نعمت‌الله بختیار پرون دوشنبه ازادي راډیو ته وویل، د دوی د تېر کال عواید په تېره یوه لسیزه کې تر بل هر کال زیات وو.

هغه زیاته کړه: "د ۱۳۹۷ ل کال په وروستیو شپږو میاشتو کې د ترینکوټ ښاروالۍ عواید ۳۴ سلنه زیات شوي و چې په ۱۳۹۸ل کال کې د ښاروالۍ په عوایدو کې ۶۵ فیصده زیاتوالی راغی. په تېرو ۱۰ کلونو کې د ترینکوټ ښاروالۍ عواید له ۱۰ تر ۱۱ میلیونو افغانیو نه‌وو اضافه شوي."

د ترینکوټ ښـاروال وایي، دوی پـه ۱۳۹۸ل کال کې نـږدې ۲۰ میلیونه افغانۍ عواید راټول کړي دي. ښاروال د عوایدو د زیاتېدو یو علت د تعرفو د سیستم معیاري کـول، د فزیکي پیسو پر ځای په انلاین بڼه مالي خدمات، له هټۍوالو د تېرو ۷ کلونو د مالیې ټولول، لـه دولتي او غیر دولتي ادارو د پورونـو ټولول او نور فعالیتونه وګڼل.

له پاکستان راستنېدونکي کسان تورخم کې قرنطین کېږي

تورخم دروازه

د ننګرهار والي وایي، هر هغه کس چې له تورخم دروازې دغه ولایت ته اوړي، له دوو تر درېیو اوونیو په تورخم کې قرنطین کېږي.

شاه محمود میاخېل پرون مازیګر په یوه وېډیویي پیغام کې وویل، تورخم دروازه تړلې ده او پاکستان چا ته اجازه نه‌ورکوي چې افغانستان ته واوړي.

هغه زیاته کړه: "هر څوک چې له پېښوره تورخم ته راځي، له ۱۴ تر ۲۱ ورځو په تورخم کې پاتې کېږي. دوی ته مو خیمې او مشخص ځایونه ټاکلي دي. ډاکتران، روغتیایي خدمات او امکانات ورته زموږ له‌خوا برابر شوي دي."

پاکستان، د کرونا ویروس د خپرېدو د مخنیوي په هدف تورخم دروازه د مارچ پر ۱۶مه، د مسافرو پر مخ وتړله.

د مسافرو ترڅنګ پر دغه دروازه تجارتي موټرو ته هم د تګ راتګ اجازه نه‌ورکول کېږي چې دې کار سوداګرو ته سخت مالي زیانونه اړولي دي.

نور راوښيه

XS
SM
MD
LG