د لاسرسۍ وړ لېنکونه

تازه خبر
دوشنبه ۱۸ لیندۍ ۱۳۹۸ کابل ۰۸:۰۶

افغانستان

لوګر کې د پکتیا د استېناف محکمې د ۳ قاضیانو په ګډون ۴ تنه وژل شوي

د لوګر مرکز پل علم

د لوګر ولایت امنیتي چارواکي وايي چې نن د کابل – لوګر په عمومي سړک د وسله والو مخالفینو په یوه کمین کې د پکتیا د استېناف محکمې د درېیو قاضیانو په شمول څلور تنه وژل شوي.

د لوګر امنیه قوماندان رحم خدا مخلص په لنډه توګه ازادي راډیو ته د دې پېښې په اړه وویل: "ساحه په اردو پورې مربوط ده، موږ ور تسلیم کړې ده، هو هلته (محمد اغي ولسوالۍ) کې دا پېښه شوې ده، دری قاضیان او یو ملکي کس وژل شوي دي."

د پکتیا د استېناف محکمې رئیس فضل قادر قناعت ازادي راډیو ته تأیید کړه چې د استېیاف محکمې مرستیال، دوه قاضیان او یو کارکوونکی نن د لوګر په محمداغې ولسوالۍ کې وژل شوي دي.

وسله والو طالبانو تر اوسه د دغه برید په اړه څه نه دي ویلي، خو دا ډله چې په لوګر کې فعاله بلل کېږي، اکثر د کابل – لوګر په لویه لار پر دولتي چارواکو د دغسې بریدونو مسؤلیت په غاړه اخلي.

د ورځې تازه خبرونه دلته ولولئ

قطر کې د امریکايي او طالب مرکچیانو تر منځ د خبرو دوام

ارشیف

د قطر په پلازمېنه دوحه کې د امریکايي او طالب مرکچیانو تر منځ خبرو نن د دریمې ورځې لپاره هم خبرو اترو دوام درلود.

په دې خبرو کې د افغانستان د سولې لپاره د واشنګټن ځانګړی استازی زلمی خلیلزاد د طالبانو د سیاسي دفتر له استازو سره پر هغه څه بحث کوي چې د خلیلزاد مطبوعاتي دفتر په افغانستان کې د تاوتریخوالي کمول او بالاخره یو اوربند ته رسیدل بللي دي.

په ننیو خبرو کې تر اوسه د کوم پرمختګ راپور نه دی ورکړل شوی.

پرون ځینو رسنیو د طالب ویاند سهیل شاهین له خولې وویل که له امریکايي لوري سره توافق لاسلیک شي نو طالبان به په امریکایانو بریدونه نه کوي.

خو وروسته ښاغلي شاهین پر خپل ټویټر وویل، د ده د خبرو موخه داده چې که له امریکا سره توافقنامه لاسلیک شي نودوی به بهرنیو سرتیرو ته له افغانستان څخه د وتلو لار ورکوي.

له وسله والو طالبانو سره تر دې مخکې هم د زلمي خلیلزاد په مشرۍ امریکايي هییت نهه پړاوه خبرې کړي چې په سيپټمبر میاشت کې ولسمشر ټرمپ په کابل د طالبانو د هغه برید له کبله لغوه کړې چې۱۲ افغانان او یو امریکايي په کې ووژل شول.

طالبانو ویلي اوسنۍ خبرې یې له هماغه ځایه پیل کړي کوم ځای چې دریدلې وې.

چارواکي: د ډاکتر ناکامورا د وژنې په تور دوه کسان نیول شوي

جاپانی ډاکتر ټیټسو ناکامورا له اوږدو کلونو راهېسې یې په ختیځ کې د اوبو لګولو، کرنې او روغتیا پر یو شمیر پروژو کار کاوه.

د ننګرهار ولايت چارواکي وايي، د ډاکټر ناکامورا په وژلو کې د لاس لرلو په تور دوه کسان نیول شوي او همدارنګه ددې پېښې د څېړنې په هدف له مرکز څخه یو پلاوی جلال اباد ته ورغلی دی.

د ننګرهار والي شاه محمود میاخیل نن د امنیې قومندانۍ په انګړ کې خبریالانو ته وویل، د ډاکټر ناکامورا د وژنې د عاملینو د موندلو په هدف د ولايتي ادارې په مشرۍ ګډو امنيتي ځواکونو هلې ځلې چټکې کړي او له مرکز نه هم تخنيکي ټيم د مرستې په موخه ور رسیدلی دی.

بلخوا د ننګرهار امنيه قوماندان محمد ايمل نيازي خبریالانو ته وویل چې د جاپاني مرستندویه کارکونکي ناکامورا د قتل په تړاو د پوليسو له لورې دوه کسان نيول شوي او پوښتنې ګرویږنې ترې روانې دي.

نوموړې د دې کسانو د هویت په اړه څه ونه ویل خو زیاته یې کړه چې د نیول شویو کسانو له کورونو یې وسلې او پوځي تجهیزات ترلاسه کړي.

جاپانی ډاکتر ټیټسو ناکامورا چې له اوږدو کلونو راهېسې یې په ختیځ کې د اوبو لګولو، کرنې او روغتیا پر یو شمیر پروژو کار کاوه، تیره چارشنبې په ننګرهار کې ناڅرګندو وسله والو له خپلو پنځو ساتونکو سره په ډزو وواوژه .

د لامبو وهنې معلول افغان لوبغاړي امریکا کې مډالونه ګټلي

ارشیف

د افغانستان د لامبو وهنې معلول لوبغاړي عباس کریمي د امریکا په ایالتي سیالیو کې د سرو زرو څلور مډالونه وګټل.

د افغانستان د لامبو وهنی فدراسیون رییس قاسم حمیدي ازادي راډیو ته وویل چې عباس کریمی په دریو ورځو کې اته ځلی د لامبو په بیلابیلو سبکونو یا ډولونو سره د لامبو پرواني ډوله ۵۰ متره سیالیو، د کرال ډوله لامبو په ۵۰ مترو او په ۱۰۰ مترو کې د فری سټایل ډول په کولو سره ګټونکی اعلان شو.

عباس کریمي له دې وړاندې هم په ګڼو بهرنیو سیالیو کې د افغانستان لپاره زیات شمېر مډالونه ګټلي دي.

د یادونې وړ ده چې لامبو دغه سیالي د امریکا متحده ایالاتو د تکزاس ایالت په کوربه توب تر سره شوې.

له فساد سره مبارزه کې د افغانستان د لاسته راوړنو ستاینه

د افغانستان لپاره د ملګرو ملتونو ځانګړي استازي تدامیچي یاماموتو

ملګري ملتونه وايي له فساد سره د مبارزې په برخه کې د افغانستان لاس ته راوړنې ستايي خو په دې برخه کې په لا زیاتو پرمختیاوو ټینګار کوي.

په کابل کې د ملګرو ملتونو مرستندویه دفتر یا یوناما دا خبره نن د فساد په وړاندې د مبارزې د نړیوالې ورځې په مناسبت یوه خبرپاڼه کې کړې ده.

په خبرپاڼه کې د افغانستان لپاره د ملګرو ملتونو ځانګړي استازي تدامیچي یاماموتو له خولې ویل شوي: "ملګري ملتونه د هغو حقوقي کړنلارو، پالیسیو او بنسټیزو پرمختګونو هرکلی کوي، چې له فساد سره د مبارزې لپاره په افغانستان کې رامنځ ته شوی چوکاټ پیاوړی کوي. "

د یماموتو له خولې وړاندې ویل شوي: ”ډیره مهمه ده چې اوس د قوانینو په عملي کولو تمرکز وشي او له فساد سره د مبارزې د هوډ څرګندولو په خاطر له هغو کسانو سره حساب کتاب وشي، چې سرغړونه کوي."

ملگري ملتونه وايي، د جزا د نوي قانون، اطلاعاتو ته د لاس رسي قانون، د فساد په وړاندې د مبارزې قانون او د ۲۰۱۷ کال د فساد پرضد ستراتیژۍ په ګډون د فساد په وړاندې د افغان حکومت د پورته شویو ګامونو ملاتړ کوي خو پر عملي کیدو یې هم ټینګار کوي.

د یوناما خبرپاڼه زیاتوي، ملګري ملتونه هغه ستونزمن امنیتي وضیعت درک کوي چې افغان قاضیان او څارنوالان په کې فعالیت کوي او د قضايي چارواکو هدفي وژنې غندي.

د ملګرو ملتونو په وینا په داسې حال کې د فساد پر ضد د مبارزې عدلي مرکز د درغلیو قضیې څیړي خو دا مرکز لا هم په لوړ کچ د درغلیو د موثرې څیړنې په برخه کې موثر پرمختګ نه لري.

د یوناما په وینا د اداري فساد د اړوندو څیړنو په اړه د نیونې او احضار یو شمیر امرونه او د ممنوع الخروج حکمونه نه دي عملي شوي او ډیر محکوم شوي باید ونیول شي او سزا پرې عملي شي.

ملګرې ملتونه د 2003 میلادي کال راهېسې هر کال د ډیسمبر 9مه د اداري فساد پر ضد د نړېوالې ورځې په نوم لمانځي.

چارواکي: د سمنټو برخه کې د کورنۍ لګښت پوره کولو په موخه طرحه جوړو

د افغانستان د کانونو او پټرولیم وزارت پر داسې یوه طرحه کار کوي چې له مخې به یې افغانستان و کولای شي د سمنټو په برخه کې خپل کورني لګښت په خپله پوره کړي.

د کانونو او پټرولیم وزارت ویاند عبدالقدیر مطفي ازادی راډیو ته وویل، د افغانستان د سمنټو د تولید کورنۍ فابریکې د ۱۲ زره مټریک ټنه سمنتو د تولید وړتیا لري او په دې برخه کې د لا ډیرې پانګونې سره به افغانستان پر ځان بسیا شي.

هغه زیاته کړه چې په دی برخه کې د پانګونې لپاره له خصوصي شرکتونو سره خبرو کې پرمختګ شوی او په نږدې راتلونکي کې به په دې برخه کې قرار داد لاسلیک شي.

په افغانستان کې د غنمو کمښت

په هیواد کې د غنمو د کموالي په اړه د افغانستان د خوراکي توکو د ټولنې خبرداری.

د دغې ټولنې مسول، فضل الرحمن وایی، که حکومت د سيمي له هیوادونو نه د غنمو او اوړو د پیرلو اقدام ونه کړي، دا امکان شته چې په روان ژمی کې افغانان د غنمو له کموالي سره مخ شي.

هغه زیاتوي: "مونږ چې ګورو په نړۍ کې هم څه نا څه د اوړو د کموالي ستونزه موجوده ده، مونږ په دې برخه کې د دولت پاملرنه غواړو او که دولت پام ونه کړي نو د اوړو په برخه کې به ستونزه رامنځته شي."

هغه زیاته کړه چې اوس مهال افغانستان یواځې له قزاقستان څخه غنم او اوړه واردوی او پاکستان چې په خپله د اوړو له کموالی سره مخ دی، افغانستان ته یې د صادراتو لړی درولی ده.

خو د افغانستان د کرنې او مالدارۍ وزارت وایي، سږ کال په افغانستان کې د اوبو او للمي غنمو حاصلات ۴۲ په سلو کې لوړ شوي دي.

د کرنې وزارت ویاند اکبر رستمی وایي، سږ کال په هیواد کې د غنمو حاصلات څه باندې پنځه میلیونه ټنو ته رسیږي او د هند لخوا د مرسته شویو غنمو په رارسېدو سره به له نورو هیوادونو څخه د غنمو د پیرل اړتیا نه وی.

د هغه په خبره: "له هنده هم ۷۵ زره ټنه غنم را رسیږي، نو په خپلو ستراتیژیکو ذخایرو کې هم یو اندازه غنم لرو، او دا اړتیا نشته چې نور غنم و پیرو."

افغانستان هر کال شپږ میلیونه مټریک ټنه غنمو ته اړتیا لری او د کرنې وزارت وایي چې سږ کال به افغانستان ۹۰۰ زره مټریک ټنه غنمو ته اړتیا ولري.

کندز کې د عبدالله عبدالله د لسګونه پلویانو لاریون

ارشیف

دثبات او همپالنۍ ټاکنیزې ډلې لسګونو پلویانو نن دوشنبه (ليندۍ ۱۸) په کندز ښار کې لاریون وکړ او اعتراض کوونکو د ټاکنو له کمېسیون غوښتنه کوله چې پاکې او ناپاکې رأيي سره جلا کړي.

په کندز ولایت کې د ثبات او همپالنۍ ټاکنیز ډلې یوتن استازې عبدالصبور امامي رسنیو ته وویل، که چېرې د دوی مشروع غوښتونو ته رسېدنه ونه شي نو دوی به په پراخه کچه لاریون وکړي او د دې ولایت لویي لارې د ترافیک پرمخ تړي.

د یادونې وړ ده، چې دا لومړۍ ځل دي د ثبات او همپالنۍ ټاکنیزې ډلې پلویان په کندز ولایت کې خپل لاریون ترسره کوي.

چارواکي: په غزني کې ۹ سرتیرې وژل شوي

د غزني چارواکي وايي، د دغه ولایت د مرکز او قره باغ ولسوالۍ اړوندو سیمو کې کې د ملي اردو ۸ سرتېري او د پولیسو د پوستې یو قومندان وژل شوي دي.

د ولایتي شورا مرستیال امان الله کامران د دو شنبې په ورځ په دې اړه ازادي راډیو ته وویل: "تیره ورځ ناوخته وسله والو طالبانو د ملي اردو پنځه تنه سرتیري د کابل – کندهار پر لویه لاره د قرباغ په سیمه له موټره ښکته کړي او وژلي دي."

بل لور بیا د کابل – کندهار د لویې لارې موټر چلوونکي د دغه سرتېرو شمېر ۹ شمېري او وايي مړي یې په یاده سیمه کې پر سړک پراته لیدلي دي.

کامران زیاتوي، د دې ترڅنګ د غزني مرکز په مربوطاتو د شهباز په سیمه کې طالبانو د ملي اردو او پولیسو پر پوستو بریدونه کړي، چې درې تنه د ملي اردو سرتیري او د پولیسو د پوستې یو قومندان یې وژلی او دوه تنه پولیس ټپیان دي.

وسله والو طالبانو تر دې دمه په دې اړه څه نه دي ویلي.

--

په خوست کې د افغانیو د رایجولو هڅې چټکې شوي

خوست کې د افغانیو رایجولو هڅې

په خوست کې یو ځل بیا د ځايي چارواکو، امنیتي ادارو او د افغانستان بانک د کارکوونکو لخواد افغانیو د رایجولو لپاره هڅې پیل شوې دي.

خوست له هغو ولایتونو ده، چې خلک يې له شاوخوا ۲۸ کلونو راهیسې کلداره کاروي او د خلکو او سوداګرو اصلي سرمایه يې هم په کلدارو ده.

که څه هم پخوا څو ځلې حکومت د افغانیو د رایجولو هڅې کړي، خومسوولین وايي، دا ځل د افغانیو ترویج ځکه اسان دي، چې دوه کلدارې په یوه افغانۍ تبادله کیږي او دوکاندارن هم ډیری توکي له کابل او نورو ولایتونو په افغانیو رانیسي.

په خوست کې دا ځل د افغانیو د رایجولو لپاره حکومتي مسوولینو د ښار په ټولو عبوري او داخلیدونکو دروازو کې صرافان توظیف کړي، چې خلکو ته د دوی د کلدارو په عوضافغانۍ ورکړي.

خلک او سورلۍ له ګاډو د پولیسو لخوا راکوزیږي او خپلې پیسې افغانیو ته اړوي.

ددې په خوا کې حکومتي مسوولینو لدې بهیره څارنه چټکه کړې او هم يې په ښار او اطرافو کې د افغانیو د کارونې، د اړتیا او ګټې په اړه عامه پوهاوی پیل کړی دی.

د خوست د والي ویاند طالب منګل پدې اړه مشال راډیو ته وویل: "په خوست کې د افغانیو د ترویج پروسه پیل شوې ده، د ولسوالیو په لویو لارو او د خوست ښار په عبوري دروازو او د ښار په منځ کې هغه څوک چې راځي د پولیسو لخوا ښکته کیږي، دوی صرافانو ته معرفي کېږي، کلدارې ورکوي او افغانۍ ترلاسه کوي، ټولو امنیتي ارګانونو ته په جدیت هدایت شوی، چې د افغانیو د رایجولو لپاره مبارزه وکړي، ټول ولسونه راسره همکاره دي او د دې پروسې کلک ملاتړ کوي."

د خوست اوسیدونکي وايي، افغانۍ د دې وطن خپله سیکه ده، خو شرط دادی چې په اول ګام کې په ښارونو کې مروجه شي.

د خوست درې تنه اوسیدونکي محمود، حاجي غفار او حاجي بخت محمد وايي، په کلدارو راکړه ورکړه باندې د خلکو تاوان دی، ځکه نن سبا سوداګر او دوکانداران توکي او شيان په کابل او نورو ولایتونو کې په افغانیو اخلي او کله چې یو ځل کلداره اخلي او بیا يې افغانیو ته اړوي، نو دوه وارې تاواني کیږي.

دوی زیاتوي، کچیرې د افغانیو د رایجولو لپاره د افغان حکومت اراده پیاوړي وي، نو باید په ټولو يې یو شان عملي کړي.

په سویل ختیز زون کې د افغانستان بانک چارواکي وايي، چې د افغانیو د رایجولو پروسه څوارلس کاله مخکې پیل شوې وه او چا به چې سرغړونه کوله، نو هغوی به نقدي جریمه کېدل، دې کار لس کاله وخت ونیو، خو دا پروسه د فساد ښکار شوه او خلکو ورڅخه سوء استفادې وکړې.

په سویل ختیز زون کې د افغانستان بانک مسوول معلم شاه نیکیار وايي، د خوست خلک چې سرمایه يې کلدارې ده، باید په افغانیو باندې يې بدله کړي.

دی زیاتوي، که چیرې خلک لدې فرصته ګټه وانخلي، نو نور به هم تاواني شي.

امریکا د افغانستان جګړې حل لار د افغان حکومت، طالبانو امریکا ترمنځ هوکړه بولي

د امریکا د دفاع وزیر مارک ایسپر

د امریکا دفاع وزیر مارک ایسپر ویلي د افغانستان د اتلس کلنې جګړې لپاره یواځينۍ حل لاره د افغان حکومت، طالبانو او امریکا تر منځ سیاسي هوکړه ده.

هغه دا خبره د فاکس نیوز له ټلویزیوني شبکې سره بیګاه په یوه مرکه کې وکړه.

هغه زیاته کړه: "تاسو د افغانستان یادونه وکړه، مونږ هلته اتلس، نولس کاله کېږي چې یو، د پرمختګ یواځینۍ لار سیاسي موافقه ده، که مونږ د طالبانو، اوسني افغان حکومت او زموږ تر منځ یوې سیاسي موافقې ته ورسېږو چې یقیني کړي افغانستان نور د تروریستانو لپاره امن ځاله نه ده دا یو ښه کار دی، دا به ما، مونږ ته اجازه راکړي چې سرتیري را خلاص کړو او د هغو دوو هېوادونو [ روسیه او چین] پر وړاندې یې ځای پرځای کړو چې موږ یې په اوږدمهال کې په اړه اندېښمن یوو."

د امریکا دفاع وزیر داسې وخت دا خبره وکړه چې امریکايي مرکچي پلاوی عملاً نن د دریمې ورځې په مخه په قطر کې له طالبانو سره په خبرو بوخت دی.

د امریکا د بهرنیو چارو وزارت د معلوماتو له مخې دا وار بحثونه په دې متمرکز دي چې تاوتریخوالی کم او بین الافغاني خبرو او اوربند ته لار برابره شي.

د طالبانو د سیاسي ډلې ویاند سهیل شاهین بیګاه شپه په خپله ټوېټر پاڼه لیکلي که چېرته له امریکا سره د سولې موافقتنامه لاسلیک شي نو دوی به بهرنیو عسکرو ته له افغانستانه د وتلو لار ورکوي.

هغه ویلي چې دوشنبه به د امریکا او طالبانو پلاوي بیا خبرو ته کښیني.

د اسیا زړه- استانبول کنفرانس کې پر سوله، مشارکت او سوکالۍ بحث کېږي

د ولسمشرۍ ماڼۍ ویاند صدیق صدیقي

د اسیا زړه – استانبول پروسې د وزیرانو په اتم کنفرانس کې د افغانستان او سیمې پر سولې، مشارکت او سوکالۍ بحث کیږي.

د افغانستان د ولسمشر ویاند صدیق صدیقي ازادي راډیو ته وویل چې دا کنفرانس نن په استانبول کې د افغان ولسمشر اشرف غني او د ترکیې د ولسمشر رجب طیب اردوغان له خوا پرانیستل کیږي.

په دغه کنفرانس کې د استانبول د پروسې د پنځلسو ګډونوالو هېوادونو د بهرنیو چارو وزیران، شپاړس ملاتړي هېوادونه او دولس ملاتړي سیمه ایز او نړیوال سازمانونه ګډون وکړي.

تمه ده د یادې پروسې په پای کې یوه اعلامیه هم د نویو ژمنو په اساس تصویب شي.

د اسیا زړه – استانبول پروسه په ۲۰۱۱ کال کې د یوه با امنه او با ثباته افغانستان لپاره د سیمه ییزه امنیتي، سیاسي او اقتصادي همکاري په هدف پیل شوې.

د ناکامورا د وژل شویو ساتونکو کورنۍ له دولته مرسته غواړي

په ننګرهار کې د جاپاني خدمتګاره ډاکتر ټیټسو ناکامورا د وژل شویو ساتونکو کورنۍ له دولته غواړي چې له دوی سره مرسته وکړي.

د ناکامورا د یوه وژل شوي ساتونکي سیدرحیم پلار ولس خان ازادي راډیو ته وویل چې واړه لمسیان یې مرستې ته اړتیا لري.

هغه زیاتوي: "زوی مې یواځې وظیفه اجراء کوله او شهید شو، بچیان یې اوس بې سرپرسته شول، نه پوهېږم څه به وشي، حکومت باید دوی ته یو کار وکړي."

تېره چهارشنبه په جلال اباد ښار کې د جاپاني مرستندویه ډاکتر ټیټسو ناکامورا په موټر وسله والو ډزې وکړې.

ناکامورا روغتون ته په لار ساه ورکړه خو دری ساتونکي، یو موټر چلوونکی او یو بل همکار یې ځای پر ځای وژل شوي و.

د ویلو ده چې د ډاکتر ټیټسو ناکامورا مړی پرون جاپان ته ورسېد.

د سولې ولسي حرکت غړي بیا ولایتونو ته سفر کوي

د سولې د ولسي حرکت غړو تېرکال دوبی له همدې پیغام سره له هلمنده تر کابله او له هغه ځایه تر بلخه پورې پلی مزل وکړ.

د سولې ولسي حرکت وايي چې دا ځل به د موټرو په یوه کاروان کې د سولې له پیغام سره د هېواد یوشمېر ولایتونو ته ځي.

د سولې د ولسي حرکت ویاند بسم الله وطندوست نن رسنیو ته په استول شوي غږیز پیغام کې وویل، دا لړۍ له هلمنده پیلېږي او په هلمند کې به پای ته رسېږي.

هغه وویل: "د ولسي ولسي حرکت داځلې له هلمنده تر هلمنده د موټریزو کاروانونو لړۍ پیلوي. دا لړۍ به دوه ورځې وروسته له غور څخه پیل شي، بیا تر بادغیس، هرات، نیمروز، فراه، هلمند، کندهار، کابل او وروسته تر شمالي ولایتونو پورې غځول کېږي."

ښاغلي وطندوست زیاته کړه چې د دې لړۍ په ترڅ کې به خلک د سولې لپاره د غږ اوچتولو ته وهڅول شي او د جګړې له ښکېلو اړخونو څخه به د اوربند او سولې غوښتنه وشي.

د سولې د ولسي حرکت غړو تېرکال دوبی له همدې پیغام سره له هلمنده تر کابله او له هغه ځایه تر بلخه پورې پلی مزل وکړ.

د ملي اردو د ځانګړو ځواکونو یو قومندان طالبانو په بلخ کې وژلی

په فاریاب ولایت کې د پولیسو د ځانګړو ځواکونو یو قومندان له خپلو یوشمېر همکارانو سره په بلخ ولایت کې وژل شوی دی.

د بلخ د امنیه قوماندانۍ ویاند عادل شاه عادل آزادۍ راډیو ته وویل سمونیار محمدخان احمدي له خپل یوه سرتېري سره تېره شپه د شولګرې ولسوالۍ په بابا عوض سیمه کې وژل شوی.

ښاغلي عادل وویل چې احمدي د خپل یوه خپلوان د جنازې په مراسمو کې د ګډون لپاره شولګرې ته تللی و، او د یو بل خپلوان په کور کې د طالبانو له خوا ووژل شو. ویاند زیاتوي چې طالبانو د دې قوماندان ځینې نور ملګري له ځان سره بیولي وو، چې څو ساعته مخکې یې پولیسو د یوه مړی موندلی دی.

د طالبانو ویاند ذبیح الله مجاهد د برید مسوولیت منلی او ویلي یې دي چې د پولیسو دا قوماندان او مرستیال یې له څلورو نورو سرتېرو سره وژلي او د هغوی درې نور ملګري یې ټپیان کړي دي.

هرات او سمنګان کې د ثبات او همپالنې د یو شمېر پلویانو اعتراض

ارشیف

د عبدالله عبدالله په مشرۍ ثبات او همپالنې ټاکنیز ټیم پلویانو په سمنګان او هرات ولایتونو کې د هغه څه پرضد چې دوی یې په انتخاباتو کې درغلۍ بولي، مظاهره وکړه او د تقلب او تقلبکارانو پرضد یې شعارونه ورکړل.

د نننیو مظاهرو ګډونوالو وویل، د دوی اعتراضونه به تر هغه وخته دوام وکړي چې د افغانستان د انتخاباتو خپلواک کمېسیون پاکې او ناپاکې رایې سره جلا نه کړي.

د عبدالله عبدالله په مشرۍ د ثبات او همپالنې او د ګلبدین حکمتیار په مشرۍ د سولې او اسلامي عدالت ټیمونو د مخالفت له کبله د تلې د شپږمې د انتخاباتو لومړنۍ پایلې تراوسه نه دي اعلان شوي.

نور راوښيه

XS
SM
MD
LG