د افغانستان د مالیې وزارت وايي، سږ کال یې تر اوسه ۱۶۰ میلیارده افغانۍ عواید را ټول کړي، چې د تېر کال د همدې مودې په پرتله۱۰میلیارده زیاتوالی ښيي.

د دغه وزارت ویاند شمریزو مسجدي نن ازادي راډيو ته وویل: "تېر کال مو تر دې وخته پورې ۱۵۰ میلیارده افغانۍ عواید راټول کړي و، سږ کال ۱۶۰ میلیارده افغانۍ راټولې شوې، نو تېر کال ته په پام سره مو ۱۰ میلیارده افغانۍ عواید زیات راټول کړې."

ښاغلی مسجدي زیاتوي، تېر مالي کال د افغانستان د مالیې وزارت په ټول کال کې ۱۸۹ میلیارده افغانۍ عواید راټول کړي و او روان کال پلان کې ده چې له ۲۰۰ میلیارده زیات عواید راټول شي.

د ښاغلي مسجدي په خبره، له فساد او قاچاق سره مبارزه، د مالیې په راټولو کې له خصوصي سکتور سره هم غږي او د یو غوره میکانیزم پلي کول یې عواید زیات کړي.

په پاکستان کې وروسته له دې چې د دې هېواد الوتکو پر افغانستان هوايي برید وکړ، کلک امنیتي تدابیر نیول شوي دي.

د رویټرز خبري آژانس د راپور له مخې د پاکستان د کورنیوچارو وزارت مرستیال طلال چودري نن وویل، پر ننګرهار او پکتیکا ولایتونو د شنبې ورځې له حملو وروسته په پاکستان کې چارواکو امنیتي تدابیر پیاوړي کړي او لسګونه مشکوک کسان یې نیولي دي.

ښاغلی چودري زیاتوي چې کله هم دوی په افغانستان کې، د ده په وینا پر وسله والو ډلو برید کړی نو هغو غبرګون ښودلی. چودري رویټرز ته ویلي چې پاکستاني امنیتي ځواکونه د تیارسۍ په حال کې دي څو د احتمالي بریدونو مخنیوی وکړي.

په پاکستان کې په وروستیو کې څو تروریستي حملې وشوې. په دې ترڅ کې د سه شنبې په ورځ د خیبرپښتونخوا په کوهاټ او د پنجاب په بهکر سیمو کې حملې وشوې چې په یوه کې پنځه پولیس او دوه ملکیان او په دوهمه کې دوه پولیس ووژل شول.

د پاکستان حکومت وايي دا حملې د پاکستاني طالبانو په ګډون هغه ډلې کوي چې مرکزونه یې په افغانستان کې دي، خو د طالبانو حکومت وايي هېڅ یوې ډلې ته اجازه نه ورکوي چې د کوم هېواد امنیت وګواښي او وايي پاکستان دې د خپلو ناکامیو پړه پر افغانستان نه اچوي.

دا په داسې حال کې ده چې طالبانو او پاکستاني چارواکو پرون تایید کړه چې ځواکونو یې تېره شپه د ډیورنډ کرښې په اوږدو کې نښتې کړې دي.

د افغانستان د بشري حقونو لپاره د ملګروملتونو ځانګړی راپورتر وايي چې د طالبانو پالیسیو د افغان مېرمنو او نجونو پر روغتیا ناوړه اغېز کړی دی.

ریچارډ بینېټ په خپل تازه راپور کې چې نن چارشنبې (د کب ۶مه) خپور شو ویلي دي چې طالبانو پر افغانستان له بیاواکمنېدو وروسته د جنسیت پربنسټ د تبعیض داسې یو منظم سیسټم رامنځ ته کړی چې زده کړو، کار، صحي پاملرنې، تګ راتګ او په عامه ژوند کې د ښځو ګډون محدودوي. بینیټ دا سیسټم له بشري ضد جرمونو سره انډول بللی دی.

راپور ټینګار کوي چې دا تبعیضي پالیسي نه یوازې د ښځو بنسټیز حقوق تر پښو لاندې کوي بلکې د هېواد په کچه د روغتیايي سیسټم پایښت هم ګواښي.

ښاغلي بینیټ د دې وضعیت د پای ته رسولو لپاره د بېړني او دوامداره نړیوال اقدام غوښتنه کړې او خبرداری یې ورکړی چې که داسې ونه شي نو افغانستان به یې له اوږدمهاله ناوړه عواقبو سره مخامخ شي.

طالبانو د ښاغلي بینېټ د تازه راپور په اړه تراوسه څه نه دي ویلي خو مخکې له دې یې د نوموړي راپورونه له حقایقو لیرې بللي او افغانستان ته یې د هغه پر تګ راتګ هم بندیز لګولی دی.

طالبانو او پاکستاني چارواکو تایید کړې ده چې ځواکونو یې تېره شپه د ډیورنډ کرښې په اوږدو کې نښتې کړې دي.

د طالبانو د حکومت یوې سرچینې د خپل نوم نه ښودلو په شرط بېګا ناوخته ازادۍ راډیو ته تایید کړه چې د ننګرهار ولایت د نازیانو ولسوالۍ په شاه کوټ سیمه کې د دوی د پوله ساتو او پاکستاني پوځیانو ترمنځ نښته شوې ده.

سرچینې زیاته کړه چې نښته پاکستاني لورې پیل کړه او د طالبانو ځواکونو ځوابي ډزې وکړې. د سرچینې په وینا نښته پای ته رسیدلې او مرګژوبله نه لري.

بل خوا د پاکستان د صدراعظم یوه ویاند مشرف زیدي تېره شپه پر ایکس شبکې ولیکل چې د طالبانو ځواکونو په تورخم او تیرا سیمو کې پر پاکستاني ځواکونو بې دلیله ډزې کړي چې امنیتي ځواکونو يې سمدستي ځواب ورکړی دی.

د طالبانو او پاکستاني ځواکونو ترمنځ دا نښتې وروسته له هغه کېږي چې تېره شنبې د پاکستان جنګي الوتکو په ننګرهار او پکتیکا ولایتونو کې هوايي حملې وکړې. دې حملو د ننګرهار په بهسودو ولسوالۍ کې د یوې کورنۍ د ۱۸ غړو په ګډون لسګونه کسانو ته مرګ ژوبله واوړله.

په کابل کې د ترکیې سفارت شاررژدافیر د طالبانو د حکومت د عامې روغتیا له وزیر په کتنه کې د روغتیا په برخه کې پر دوه اړخیز همکاریو خبرې کړي.

دغه وزارت د سه شنبې په ورځ د (فبروري۲۴مه) په یوې اعلامیه کې ویلي،"سادین اییلدیز له نورجلال جلالي سره د روغتیا په برخه کې د کارکوونکو د روزنې، د زړه په ناورغۍ د اخته ماشومانو لپاره په روغتونو کې د امکاناتو په زیاتیدو او په لیرو پرتو سیمو کې د روغتونو د جوړیدو په اړه خبرې وکړې".

په اعلامیه کې راغلي، "دواړو لورو له ترکیې څخه افغانستان ته د دوا او درملو د وارداتو په اړه هم خبرې کړي دي".

د طالبانو حکومت په وروستیو کې له پاکستان څخه د هر ډول درملو په وارداتو بندیز لګولی دی.

بل پلو، عام افغانان په کلینیکونو او درملتونو کې د دوا له کمښت او بې کیفیتي څخه شکایت لري.

یو شمیر افغان او نړیوالو مدني بنسټونو په یوه ګډ بیان کې د ملګرو ملتونو د بشري حقونو پر شورا غږ کړی چې د طالبانو نویو قوانیو د پخوا پرتله په افغانستان کې د بشري حقونو وضعیت کړکچین شوی دی.

په دغه کډ بیان کې چې ۸۲ کورنیو او ۱۳نړیوالو بنسټونو د سه شنبې په ورځ د (فبروري۲۴مه) ملګروملتونو ته استولی راغلي،"د طالبانو د جزايي محاکمو اصولي نامې پلي کیدو د بشري حقونو وضعیت بدتر کړی دی".

په بیان کې له نړیوالې ټولنې غوښتل شوي چې د طالبانو نوی قانون محکوم کړي او په افغانستان کې د بشري حقونو د نقض مخه ونیسي.

تمه ده د پنجشنبې په ورځ د ملګرو ملتونو د بشري حقونو په شورا کې د افغانستان د بشري وضعیت په اړه خبرې وشي.

د طالبانو حکومت د روان کال په جنورۍ کې د محاکمو جزايي اصول نامه په لسو فصلونو او ۱۱۹ مادو کې تصویب او د دوی د لوی مشر ملا هبیت الله اخوندزاده له خوا توشیح شوه.

په اصولو نامه کې د پخوا پرتله د ښځو په ګډون په عامو خلکو د قوانینو پلي کیدل سخت شوي دي.

د افغانستان لپاره د ملګرو ملتونو مرستندویه ماموریت یوناما وايي،"په تیرو دوو کلونو کې شاوخوا پنځه میلیونه افغان کډوال افغانستان ته ستانه شوي دي".

دغه سازمان د سه شنبې په ورځ د (فبروري۲۴مه) پر خپلې فیسبوک پاڼې ویلي،"یوازې په ۲۰۲۵کال کې نژدې درې میلیونه افغانان له ایران او پاکستانه بیرته افغانستان ته راستانه کړای شوي دي".

د یوناما په ټکو، په دغه لوړ شمیر د کډوالو بیرته راتګ په افغانستان کې په شته اسانتیاو او د خدمتونو په وړاندې کولو فشار اچولی دی.

دغه سازمان وړاندې ویلي،" نړیواله ټوله دې له راستنو شویو کډوالو سره بشري مرستې وکړي".

کرکټ بورډ اعلان وکړ چې ریچارډ پایبس د افغانستان د کرکټ د ملي ټیم د نوي سر روزونکي په توګه وټاکل شو.

ریچارډ پایبس په څه باندې شل کلنه روزنګرۍ کې د ویسټ اندیز، بنګله دیش، جنوبي افریقا او پاکستان د ملي ټیم د مشر روزونکي او د مهارتونو د لوړولو د مشر په توګه دندې ترسره کړي.

دی د انګلستان د هېواد دی.

د افغانستان د کرکټ د ملي ټیم د پخواني مشر روزونکي جاناټان ټراټ دنده په روان نړیوال شل اووریز جام کې د افغانستان له وروستۍ لوبې سره سم پای ته ورسېده.

پاکستاني چارواکي وايي چې د خیبرپښتونخوا په کوهاټ ولسوالۍ کې د ناپېژاندو وسله والو په برید کې لږترلږه اوه کسان وژل شوي او درې نور ټپیان دي.

د کوهاټ د پولیسو ویاند نعمان زېب نن سه شنبې (د کب ۵مه) د آزادۍ راډیو مشال څانګې ته وویل چې وسله والو د کوهاټ د لاچي سیمې د شکردرې پر سړک د پولیسو پر یوه موټر برید وکړ چې په نتیجه کې یې د اسد په نوم د پولیسو یو چارواکی او څلور نور پولیس ووژل شول.

نوموړي زیاته کړه چې په دې پېښه کې دوه ولسي وګړې هم وژل شوي دي.

په خیبرپښتوخوا کې پر امنیتي ځواکونو وسله وال بریدونه په دې وروستیو کې زیات شوي چې د ډېرو پړه د پاکستاني طالبانو تحریک یا ټي ټي پي منلې ده.

د نننۍ حملې پړه تراوسه کومې ډلې نه ده منلې.

د طالبانو د حکومت د بهرنیوچارو وزیر امیرخان متقي د ملګروملتو د سرمنشي له مرستیالې روزمېري دې کارلو سره پر افغانستان د پاکستان د وروستیو حملو په اړه خبرې کړې دي.

د بهرنیوچارو وزارت په یو بیان کې چې نن سه شنبې (د کب ۵مه) خپور شو ویلي دي چې ښاغلي متقي په دې ټلفوني خبرو کې د دې حملو او د ملکي وګړو د مرګ ژوبلې په اړه اندېښنه څرګنده کړه.

په بیان کې د متقي له قوله راغلي دي چې په تېرو څلورو کلونو کې د پاکستان په هوايي حملو کې یوازې ملکي وګړي په نښه شوي دي. د بیان له مخې ښاغلي متقي همداراز ویلي دي چې په افغانستان کې هېڅ یوه وسله واله ډله نه شته او بهرني ډیپلوماتان کولای شي د پاکستان د حملو له سیمو څخه لیدنه وکړي.

په بیان کې د مېرمن دې کارلو له قوله ویل شوي دي چې نوموړې د ملکي افغانانو د مرګ ژوبلې له کبله اندېښنه ښودلې، ویلي یې دي چې د پاکستان د هوايي حملو مسئله به د ملګروملتونو غړو هېوادونو ته وریاده کړي. د دې ټلفوني خبرو په اړه ملګروملتونو تراوسه څه نه دي ویلي.

په افغانستان کې د ملګروملتونو مرستندوی ماموریت یا یوناما د دوشنبې په ورځ وویل د ننګرهار په بهسودو او خوګیاڼیو ولسوالیو کې د پاکستان وروستي برید د ښځو اوماشومانو په ګډون ۱۳ تنه وژلي او ۷ نور یې ټپیان کړي دي.

د پاکستان پوځ تېره شنبې د پکتیکا او ننګرهار ولایتونو پر یوشمېر سیمو هوايي حملې وکړې. پاکستاني چارواکو ادعا کړې چې په دې حملو کې د پاکستاني طالبانو په ګډون له اویا ډېر وسله وال وژل شوي خو د طالبانو حکومت ویلي چې برید پر ملکي وګړو شوی دی.

د بښنې نړیوال سازمان ایمنسټي انټرنیشنل پر افغانستان د پاکستان په هوايي حملو کې د ملکي وګړو پر مرګ ژوبله ژوره اندېښنه ښودلې او په دې اړه یې د څېړنو غوښتنه کړې ده.

په افغانستان کې د ملګروملتونو مرستندوی ماموریت یا یوناما د دوشنبې په ورځ وویل د ننګرهار په بهسودو او خوګیاڼیو ولسوالیو کې د پاکستان وروستي برید د ښځو اوماشومانو په ګډون ۱۳ تنه وژلي او ۷ نور یې ټپیان کړي دي.

د بښنې نړیوال سازمان نن سه شنبې (د کب ۵مه) پر خپله ایکس پاڼه د یوه بیان په خپرولو سره وویل چې په ننګرهار کې د فبروري په ۲۱ او ۲۲مه د پاکستان په هوايي حملو کې د ملکي افغانانو مرګ ژوبله باید د رښتینو، خپلواکو او بې پرې څېړنو په ترڅ کې وارزول شي.

د پاکستان پوځ د شنبې په شپه د پکتیکا او ننګرهار ولایتونو پر یوشمېر سیمو هوايي حملې وکړې. د پاکستان د اطلاعاتو او خپرونو وزارت ویلي دي چې په دې حملو کې د تحریک طالبان پاکستان او داعش ډلې مرکزونه په نښه شوي خو د طالبانو حکومت ویلي چې برید پر ملکي وګړو شوی دی.

د بښنې نړیوال سازمان د تېرکال د اکتوبر او ډسمبر میاشتو ترمنځ د پاکستان په هوايي حملو کې د ملکي افغانانو د مرګ ژوبلې په اړه د یوناما د تېرو ارقامو یادونه کړې چې له مخې یې اویا تنه ملکي افغانان وژل شوي او څلورسوه اته اویا نور ټپیان شوي دي او ویلي یې دي چې دا لومړی ځل نه دی چې د ملکي افغانانو پر وړاندې له زور څخه کار اخیستل کېږي.

ایمنسټي انټرنیشنل پر ښکېلو خواوو غږ کړی دی چې د ملکي وګړو د مرګ ژوبلې د مخنیوي لپاره لازم اقدامات وکړي.