د لاسرسۍ وړ لېنکونه

تازه خبر
شنبه ۱۶ وری ۱۳۹۹ کابل ۰۸:۲۹

افغانستان

د صلاح‌الدین رباني استعفا ته د امریکا سفیر او اروپايي ټولنې استازي غبرګون

د افغانستان د بهرنیو چارو وزارت پخوانی وزیر صلاح‌الدین رباني

په کابل کې د امریکا د متحدو ایالاتو سفیر جان بس د افغانستان د بهرنیو چارو د سرپرست وزیر صلاح الدین رباني تر استعفا وروسته هغه د کابل او واشنګټن ترمنځ د اوږدمهالي شراکت ښه ملاتړی بللی او له هغه یې مننه کړې ده.

ښاغلي بس پر خپلې ټویټرپاڼې لیکلي چې "زه خوښ یم چې صلاح الدین رباني پلان لري چې د افغانستان د خدمت لپاره د خپلې کورنۍ دود ژوندی وساتي."

په ورته وخت کې د افغانستان لپاره د اروپايي ټولنې ځانګړي استازي رولاند کوبیا په خپله تويټر پاڼه لیکلي "مننه وزیر رباني له دې چې ښې خبرې اترې مو درلودلي دي. زه په راتلونکي کې د یوه ټوله‌ییز او استازي دولت هیله لرم چې د ټولو اصلي لوبغاړو د قدرت ترکیب وي ترڅو په مشروعیت او پیاوړتیا د سولې بهیر پر مخ یوسي."

ښاغلي رباني پرون (د اکټوبر ۲۳مه) د بهرنیو چارو وزارت له سرپرستۍ استعفی وکړه.

د نوموړي د استعفالیک کې چې هغه پر خپل ټویټرپاڼې خپور کړی راغلي چې د اوسني حکومت په چوکاټ کې کار د ځان په صلاح نه ګڼي، خو د افغانستان خلکو ته به سیاسي خدمت جاري وساتي.

د افغانستان د ولسمشر ویاند صدیق صدیقي پرون وویل چې جمهور رئيس د افغانستان د اساسي قانون پراساس، د صلاح الدین رباني استعفی منلې ده.

د ورځې تازه خبرونه دلته ولولئ

کابل ته د ازبکستان د پرې شوې برښنا بېرته نښلولو چارې پيل شوې

ارشیف، تزئیني بڼه لري.

د افغانستان برښنا شرکت کابل ته د ازبکستان د پرې شوې وارداتي برښنا د مزو بېرته نښلولو چارې پیل کړې دي.

د دغه شرکت ویاند وحیدالله توحیدي نن ازادي راډیو ته وویل، د طالبانو له اجازې وروسته د دوی کارکوونکو د بغلان په چشمه شېر او ډنډ شهاب‌الدین سیمو کې کارونه پیل کړل.

ښاغلی توحیدي وایي، د برښنا بېرته نښلول ممکن دوه ورځې وخت ونیسي.

کابل ته د راغځېدلې برښنا مزي دوه شپې وړاندې د چشمه شېر په سیمه کې له جګړې وروسته پرې شول.

طالبان وایي، دوی د برښنا مزي نه‌دي پرې کړي.

د بغلان لاريون کوونکي: د ملکي کسانو وژونکي باید مجازات شي

ارشيف

په بغلان کې قهرجنو لاريون کوونکو نن سهار د چشمه شېر په سیمه کې د بغلان- سمنګان لویه لاره بنده کړه.

لاريون کوونکي د هغه بمبارد په غبرګون کې راوتلي چې د یوې کورنۍ دوه غړي په کې ووژل شول او څلور نور ټپيان شول.

د عاشق الله په نوم د دغې کورنۍ یو غړی وایي، وژل شوي یوه وړه او بله پیغله نجلۍ ده او ټپيانو کې هم ښځې او ماشومان شته.

دوی وایي، دولت باید د دغه برید عاملین پيدا او د ملکیانو د وینې پوښتنه ترې وکړي.

دغه هوایي برید پرون وروسته له هغې وشو چې طالبانو همدې چشمه شېر سیمه کې د امنیتي ځواکونو پر کاروان برید وکړ.

د بغلان د پولیسو ویاند جاوید بشارت وایي، دوی څېړنه کوي چې معلومه کړي برید کې ریښتیا هم وژل شوي او ټپيان ملکیان دي او که نه؟

افغانستان کې د کرونا ویروس له امله د مړو شمېر ۶ تنو ته ورسېد

د افغانستان د عامې روغتیا وزارت ویاند وحیدالله مایار

په افغانستان کې د کرونا ویروس له امله د مړو شويو شمېر ۶ تنو ته لوړ شو.

په همدې حال کې په دې ویروس د اخته کسانو شمېر ۲۷۴ شوی دی.

د افغانستان د عامې روغتیا وزارت ویاند وحیدالله مایار د جمعې په ماښام په کابل کې رسنیو ته وویل: "د کرونا ویروس پنځه دېرش نوې مثبتې پېښې ثبت شوي چې پنځلس په هرات ولایت کې، څوارلس کابل کې، یوه په ننګرهار کې او په دایکندي، بغلان او کندهار هر یوه کې یوه پېښه ثبت شوې. په هرات کې پنځلس نارینه او څلور ښځې په دې ویروس اخته شوي دي.

د ښاغلي مایار په وینا د کورونا ناروغۍ له کبله په ۲۴ ساعتو کې د مړینې دوه نوي پېښې ثبت شوي چې له دې سره د مړو شویو شمېر ۶ ته لوړ شو.

یوه ښځه په دایکندي کې له دې ویروسه مړه شوې چې له مخکې يې د پښتورګو ناروغي درلوده او په دې وروستیو کې يې ایران ته سفر کړی وو.

همداراز په هرات ولایت کې یو ۷۰ کلن سړی چې له مخکې يې د زړه او سابندۍ ناروغي درلوده، له کووید-۱۹ څخه مړ شوی.

تر دې مخکې یو کس په بلخ ولایت او درې په هرات ولایت کې مړه شوي وو.

د امریکا سفارت د کابل برېښنا د بیا جوړېدو غوښتنه وکړه

ارشیف

په کابل کې د امریکا سفارت وايي، جګړه باید ژر تر ژره ودرېږي چې د افغانستان برېښنا شرکت برق فعاله کړي او د کرونا ویروس پر وړاندې روغتيايي کارکوونکي خپل کار ته دوام ورکړي.

دوه شپې مخکې د پلخمري ښار په چشمه شېر سیمه کې تر وسله والې نښتې وروسته کابل ته د ازبکستان وارداتي برېښنا پرې شوه.

د افغانستان برېښنا شرکت ډاډ ورکړی وو چې د برق پرې شوي مزي به بېرته سم کړي خو برق تر اوسه نه دی فعاله شوی.

دغه شرکت ویلي وو چې طالبانو ورته له ازبکستانه کابل ته د برق بېرته وصلولو اجازه ورنکړه.

په کابل کې د امریکا سفارت د جمعې په ماښام پر خپله ټويټر پاڼه لیکلي: "د تاسیساتو ویجاړول او د اساسي خدماتو پرې کول یوازي بې ګناه افغانانو ته زیان رسوي، دا ډول کړنې هيڅ پلمه او مشروعیت نه لري."

د دې شرکت ویاند وحیدالله توحیدي ازادي راډيو ته ویلي وو - هڅې روانې دي چې طالبان د دوی کارکوونکي د برق بیرته وصلولو ته پرېږدي.

طالبانو تر اوسه د برق پرې کېدو سره د دوی د تړاو په اړه څه نه دي ویلي.

د افغانستان برېښنا شرکت وايي، اوسمهال په کابل کې د تاجکستان ۱۲۰ میګاواټه وارداتي برق، ۱۳۰ کورنی تولید او ۸۰ میګاواټه حرارتي برق کارېږي.

د کرونا ویروس د منفي اغېز له امله د بشر حقونو کمېسیون اندېښنه

ارشیف

د افغانستان د بشري حقونو خپلواک کمېسیون اندېښنه څرګنده کړې چې د کرونا ویروس د لا خپرېدو وېره باید د سولې په پروسه کې د افغانانو پر ګډون منفي اغېز ونه کړي.

د دې کمېسیون کمېشنرې شبنم صالحي د جمعې په ماښام ازادي راډيو ته وویل چې د کرونا ویروس د خپرېدو له کبله خلک په کورو کې قرنطین شول او د سولې اړوندو غونډو او اعتراضونو کې ګډون نشي کولای.

دې زیاته کړه: "د افغانستان د بشري حقونو خپلواک کميسیون اندېښنه درلوده چې په مذاکراتو کې ښايي د جګړه ځپلو افغانانو غږ وانورېدل شي نو موږ یوه بدیله لاره رامنځته کړه، موږ پر خپله ویب پاڼه او ټولنیزو رسنیو له ټولو افغانانو وغوښتل چې که د جګړې د هرې خوا قربانيان وي، له موږ سره دې خپلې تجربې او غوښتنې شریکې کړي، موږ به یې د مذاکراتو پر مهال له ټولو خواوو سره شریکې کړو."

مېرمن صالحي زیاته کړه چې په دې اقدام سره دوی د مخامخ غونډو بدیل رامنځته کول غواړي چې د سولې په بهیر کې د عادي افغانانو غږ له پامه ونه غورځېږي.

د نشه يي موادو د قاچاق په تور ۲۰ تنه عدلي او قضايي مرکز ته معرفي شوي

ارشیف

د نشه يي موادو د قاچاقو په تور شل تنه عدلي او قضايي مرکز ته معرفي شول.

له نشه يي موادو سره د مبارزې عدلي او قضايي مرکز ویاند خالد موحد ازادۍ راډیو ته وویل: "امنیتي ځواکونو دا شل کسان په بېلا بېلو ولایتونو کې د (۱۵) پېښو په تړاو له نږدې سل کیلوګرامه نشه يي موادو سره نیولي او د عدلي او قضايي مرکز څارنوالۍ ته یې معرفي کړي دي."

د یادونې وړ ده چې له نشه يي موادو سره د مبارزې عدلي او قضايي مرکز محکمو په تېرو اوو ورځو کې د نشه يی موادو (۲۶) خرڅوونکي او قاچاق کوونکي له پنځو کالو څخه نیولې بیا تر (۳۰) کالو پورې په بند باندې محکوم کړي دي.

ننګرهار کې د کرونا ویروس دوهمه مثبته پېښه ثبت شوه

ارشيف

په ننګرهار کې د کرونا ویروس دوهمه مثبته پېښه ثبت شوه.

د ننګرهار د عامې روغتیا ریاست وایي، نن جمعه په جلال اباد ښار کې یو کس چې نوم یې نه دی ښودل شوی او تازه له امریکا راګرځېدلی، تېره ورځ یې د ننګرهار سیمه ييز روغتون ته مراجعه کړې وه او له تشخیص وروسته معلومه شوه چې په کرونا ویروس اخته دی.

د ننګرهار د عامې روغتیا ریاست ویاند عادل ظاهر ازادي راډيو ته په رالېږلي پیغام کې ویلي چې ناروغ کس د خپلې ځيرکۍ له مخې د ځان ښه مراقبت کړی او له هېڅ چا سره یې تماس نه دی نیولی.

دی وایي، دا چې نوموړي له لومړۍ لحظې ځان په خپل کور کې قرنطین کړی و، له همدې وجې یې وضعیت ښه دی او د کورنۍ نور غړي یې هم ښه دي.

دا په داسې حال کې ده چې د ننګرهار ولایتي ادارې نن خبرداری ورکړی چې له جلال اباد ښار سره به سر له نن څخه د ټولو ولسوالیو د لویو لارو په ګډون د کابل، لغمان او کونړ لویې لارې بندې وي، تر څو ننګرهار او د دغه ولایت مرکز ته د کرونا ویروس د انتقال مخنیوی شوی وي.

د یادونې وړ ده چې تېره میلادي میاشت یو بل کس هم چې حضرت بلال نومېده او له لغمان څخه ننګرهار ته راغلی و، په کرونا ویروس اخته ښودل شوی و، چې اوس هم په لغمان کې تر طبي څارنې لاندې دی.

د چارواکو په خبره، حضرت بلال اوس ښه دی او له کرونا ویروسه خلاص شوی دی.

پکتیا کې د کرونا ویروس د مخنیوي په هدف نوي بندیزونه اعلان شوي

پکتیا کې د خلکو پر لویو غونډو، په جوماتونوکې په جمع د لمانځه، ودونو او خیراتونو لپاره د خلکو پر راغونډېدو بندیز لګول شوی.

په پکتیا کې د کرونا ویروس د لاخپرېدو د مخنیوي لپاره نوي بندیزونه ولګول شو.

د پکتیا د والي ویاند عبد الله حسرت په یوه ویډیويي پیغام کې چې نن د اپرېل په ۳مه، خپور شوی چې په ګردیز کې د کرونا ویروس د ۲ مثبتو پېښو تر ثبت وروسته پرېکړه وشوه چې د خلکو پر لویو غونډو، په جوماتونوکې په جمع د لمانځه، ودونو او خیراتونو لپاره د خلکو پر راغونډېدو بندیز ولګول شي.

حسرت ونه ویل چې دا بندیز به تر کومه دوام کوي.

بل پلو په پکتیا کې د ۲۰۳ تندر قول اردو مسولین وایي، چې د کرونا ويروس د خپرېدو د مخنيوي په موخه یې د تندر قول اردو قرارګاه او ګارنيزيون ټول جزوتامونه قرنطين کړل او قول اردو ته په ننوتو بشړپ بندیز ولګېد.

د دې مرکز د رسنیو د برخې مسول ایمل مومند ازادي راډيو ته وویل، چې دغه ګام یې په دې ولایت کې د کرونا د دوو مثبتو پېښو له ثبت وروسته پورته کړی.

نوموړي د امنيتي ځواکونو له منسوبینو او د عامو خلکو څخه غوښتنه وکړه، چې له نن وروسته دې دغه مرکز ته له ورتګ ډډه وکړي خو په وینا یې د قول اردو روغتون ته ور وړونکي نظامي ټپیان له دې امر څخه مستثنا دي.

بغلان کې ګرځبندیز اعلان شو

ارشیف

په بغلان کې د کرونا ویروس د لا خپرېدو د مخنیوی لپاره نن، د اپرېل په ۳مه، د پلخمرۍ ښار قرنطین شو.

په پلخمرۍ کې به د خلکو پر ورځنیو فعالیتونو بندیز وي.

د ازادي راډیو خبریال وایي چې د یو شمېر دولتي دفترونو مامورین به هم رخصت وي.

دا بندیز به له سبا (شنبه) عملي کېږي او تر راتلونکو ۲۱ ورځو به پرځای وي .

د بغلان سرپرست والي عبدالقدیم نیازي له خلکو غوښتنه کړې چې بندیز مراعت کړي که نه له سخت غبرګون سره به مخامخ شي.

په بغلان کې تر نن سهاره د کرونا ویروس دوې مثبتې پېښې ثبت شوې دي.

برېښنا شرکت: بغلان کې د برېښنا د پرې شويو مزو د جوړېدو هڅې دوام لري

ارشیف

د افغانستان برېښنا شرکت وايي بغلان ته یې تخنیکي ډله تللې او د برېښنا د پرې شوي جریان د سمولو هڅې کوي.

په کابل او هغو سیموکې چې د ازبکستان وارداتي برق ورځي له پرون ماسخوتن راهیسې برق نشته.

د افغانستان برېښنا شرکت وايي چې په بغلان کې د جګړې له امله د ازبکستان د وارداتي برق مزي پرې شوي یا تخریب شوي وو او له دې امله په کابل کې د برېښنا جریان پرې دی.

برښنا شرکت ویلي چې ډېر ژر به یې انجینیران دا ستونزه حل کړی.

بغلان کې د کرونا ویروس بله مثبته پېښه ثبت شوې

ارشیف

په بغلان کې په کرونا ویروس د بل وګړي د اخته کېدو خبر هم تائید شو.

دازادي راډیو خبریال نن، د مارچ په دریمه، له بغلانه په راپور کې وویل چې پرون هم هلته یوه مثبته پېښه ثبت شوې وه.

په افغانستان کې پرون په کرونا ویروس د ۲۹ نویو مثبتو مواردو راپور ورکړل شوی دی.

د افغانستان د عامې روغتیا وزارت پرون خبریالانو ته وویل چې په ویروس د اخته کسانو شمېر ۲۷۳ ته لوړ شوی دی.

د عامې روغتیا ورازت په وروستي یوه شواروز کې د کرونا ویروس د تازه پېښو د ثبت په اړه معلومات نه دي خپاره کړي.

چارواکي: غزني کې ۷ وسله وال وژل شوی

ارشیف

دولتي چارواکي خبر ورکوي چې د غزني ولایت په اندړو ولسوالۍ کې په هوايي بمبار کې ۱۶تنو وسله والو ته مرګ ژوبله اوښتې ده.

د ولایت مقام د مطبوعاتو مرستیال سمیر احمد احمدي د جمعې په ورځ ازادي راډیو ته وویل: "تېره شپه د یادې ولسوالۍ په ملاح نوح بابا، عاشقوالو او ابو کلا سیمه کې د امنتي ځواکونو او وسله والو طالبانو ترمنځ جګړه رامنځ ته شوې چې سیمه ته هوايي ځواکونه رسیدلي او بمبار یې کړی دی.

دی وايي د بمبار له امله ۷ تنه وسله وال طالبان وژل شوي او ۹ تنه نور ټپیان دي.

وسله والو طالبانو تر دې محاله په دې اړه څه نه دي ویلي.

افغانستان کې د کرونا ویروس د مثبتو پېښو شمېر ۲۷۳ کسانو ته ورسېد

د عامې روغتیا وزارت ویاند وحید مایار

په افغانستان کې پرون په کرونا ویروس د ۲۹ نویو مثبتو مواردو راپور ورکړل شو چې له دې سره په دې ناروغۍ د اخته کسانو ټول شمېره ۲۷۳ ته لوړه شوه.

د عامې روغتیا وزارت ویاند وحید مایار له آزادۍ سره په خبرو کې وویل، پرون د کرونا ویروس ۱۴ تازه موارد- ۹ په کابل، ۲ په پکتیا، یوه په کندهار، یوه په بغلان او یوه په دایکنډي کې تثبیت شوي.

له بلې خوا د هرات د عامې روغتیا رییس عبدالحکیم تمنا د آزادۍ راډیو خبریال ته وویل چې په هرات کې په کرونا ویروس د اخته کېدو ۱۵ نور موارد یې تثبیت کړي دي.

تمنا وايي چې له دې نویو پېښو سره په هرات کې په دې ناروغۍ د اخته کسانو شمېره ۱۹۹ ته لوړه شوه.

له بلې خوا پرون په افغانستان کې د کوروناویروس له کبله د یو بل ناروغ د مړینې راپور هم ورکړل شو.

د دایکندي د عامې روغتیا رییس اسحاق علي درمان وايي، یوې ۶۵ کلنې مېرمنې چې پرون ناوخته یې ناروغي تثبیت شوه، تېره شپه په روغتون کې سا ورکړه.

د درمان په وینا دا مېرمن د میرامور ولسوالۍ اوسېدونکې وه، له ایران څخه هېواد ته راستنه شوې وه او د بډوډو او نورې ناروغۍ یې درلودې.

ولسمشر غني له باجوه سره د سولې په روانو هڅو خبرې کړي

ولسمشر غني د ټېلېفوني تماس پرمهال

ارګ وايي چې ولسمشر اشرف غني پرون ماښام د پاکستان د پوځ له لوی درستیز سره په ټېلېفوني خبرو کې له طالبانو سره د سولې د روانو هڅو په اړه خبرې وکړې.

جمهوري ریاست په یو خبرپاڼه کې وايي چې د پاکستان لوی درستیز جنرال جاوید قمر باجوه ولسمشر غني ته له طالبانو سره د خبرو لپاره د ټولو اړخونو په ګډون د یوه پلاوي د ټاکلو مبارکي وویله او د دې خبرو د پرمختګ هیله یې وکړه خو په خبرپاڼه کې په دې اړه د دوی د خبرو نور جزییات نه دي ورکړل شوي.

په خبرپاڼه کې همداراز راغلي چې د ښاغلي غني او جنرال باجوه په خبرو کې د کرونا ویروس پرضد د دواړو هېوادونو د ګډې مبارزې، سوداګرۍ او ترانزیت مسایل هم شامل وو.

چارواکي: نړیوال بانک افغانستان ته ۱۰۰ میلیونه ډالره ځانګړي کړي

ارشیف

افغان چارواکي وايي چې د کرونا ویروس پرضد د مبارزې لپاره له افغان حکومت سره د نړیوالو مرستې راروانې دي.

د کرونا ویروس پرضد د مبارزې لپاره دولتي کمېټه چې د ولسمشر دوهم مرستیال سرور دانش یې مشري کوي وايي، په دې لړ کې نړیوال بانک سل میلیونه ډالر د افغانستان لپاره ځانګړي کړي دي.

د ښاغلي دانش مطبوعاتي سلاکار محمد هدایت پرون له آزادۍ راډیو سره په خبرو کې وویل دا مرستې په لومړي ګام کې هغو بېوزلو کسانو ته ورسېږي چې په ورځنیو کارونو بوخت دي.

هغه زیاته کړه: "دا ټول خوراکي مواد دي او هغو کسانو ته به ورکړل شي چې ورځني کارونه درلودل او د ګرځبندیز له کبله زیانمن شوي، هغه کسان چې پر کراچیو شیان پلوري او د ټولنې محرومه طبقه ده."

ښاغلی هدایت وايي چې د کرونا ویروس پرضد د مبارزې کمېټه به په نژدې ورځو کې په کابل او ولایتونو کې د دې مرستو د مستحقو کسانو فهرست برابر کړي.

نوموړی زیاتوي، د نورو هېوادونو او نړیوالو موسسو مرستې هم راروانې دي چې د کرونا ویروس پرضد د مبارزې د هڅو په ترڅ کې به ولګول شي.

نور راوښيه

XS
SM
MD
LG