د لاسرسي لېنکونه

تازه خبر
یکشنبه ۱۰ لیندۍ ۱۳۹۸ کابل ۰۹:۵۳

افغانستان

مسلمیار: له بیومټریک پرته کارول شوې رایې شمېرو

ښاغلي مسلمیار خبرداری ورکوي چې د میزان ۶مې په ولسمشریزو ټاکنو کې له بیومټریک پرته کارول شوې رایې به د ټاکنو کمیسیون د رئیسې "په پلار هم وشمېرو."

د افغانستان د مشرانو جرګې رئیس فضل هادي مسلمیار وایي، په ولسمشریزو ټاکنو کې له بیومټریک پرته کارول شوې رایې باید وشمېرل شي.

ښاغلي مسلمیار په یوه ویډیو کې چې په ټولنیزو رسنیو کې لاس په لاس کېږي خبرداری ورکوي او وایي چې له بیومټریک پرته کارول شوې رایې به د ټاکنو کمیسیون د رئیسې "په پلار به یې هم وشمېرو."

د مشرانو جرګې رئیس په ولسمشریزو ټاکنو کې د محمد اشرف غني په مشرۍ د دولت جوړوونکي ټاکنیز ټیم ملاتړی دی.

ددغه کمیسیون رئیسې حوا علم نورستانۍ د دوشنبې په ورځ (میزان ۸مه) وویل چې له بیومتریک پرته رایې باطلې دي.

اغلې نورستانۍ زیاته کړه چې د کمیسیون د پرېکړې له مخې بیومټریک رایې د اعتبار وړ دي او "له دې پرته کارول شوې رایې قطعا نه منو."

د عبدالله عبدالله په ګډون د ولسمشریزو ټاکنو یو شمېر کاندیدانو د ټاکنو کمیسیون ددغې پرېکړې هرکلی وکړ.

د ورځې تازه خبرونه دلته ولولئ

غني پر جنرال مقبل برید د تروریستانو کار وباله

افغان ولسمشر محمد اشرف غني

د افغانستان ولسمشر د هلمند د څلورمې سرحدي لوا پر قوماندان جنرال ظاهرګل مقبل برید غندلې او د تروریستانو کار یې بللې ده.

د ارګ په خبرپاڼه کې چې پرون، د نومبرپه ۳۰مه، خپره شوه ، د ولسمشر محمد اشرف غني په حواله لیکل شوي چې تروریستان او د هغوي پلویان په داسې بزدلانه بریدونو د افغانستان د خلکو اراده نه شي کمزوې کولای.

جنرال ظاهرګل مقبل پرون د هلمند د ناوې او مارجې ولسوالیو ترمنځ پر سرک د ماین په چاودنه کې ووژل شو.

د هلمند د والي ویاند، عمرځواک بېګا ازادي راډیوته وویل چې جنرال مقبل په مارجه کې په وروستیو پوځي عملیاتو کې مهم رول درلود.

عمر ځواک: "دی هلته په عملیاتو کې مستقیماً، خپله موجود و خو اوس د عملیاتو د پای لپاره مارجې ته تللی و څو پرسونل هم ورسوي او د عملیاتو د پای ته رسېدو څارنه هم وکړي خو په لاره کې يې موټر په ماین والوت."

جنرال ظاهر ګل مقبل درې کاله مخکې، په هلمند کې د سرحدي لوا قوماندان ټاکل شوی و.

د هلمند د والي ویاند تائید کړه چې په پرونۍ چاودنه کې د شمشاد ټلوېزیون ولایتي خبریال هم ټپي شوی خو روغتیايي حالت يې ښه دی.

راشد: ویسټ انډیز سره کمزورې لوبه د تجرې د کمښت له امله وه

د افغانستان د کرکټ ملي لوبډلمشر راشد خان

د افغانستان د کرکټ د ملي لوبډلې کپټان، راشد خان ویلي چې له ویسټ انډیز سره په ټیست لوبه کې د هغه د لوبډلې د نسبتاً کمزورې لوبې یو دلیل د تجربې کموالی دی.

هغه ویلي چې په راتلونکې کې د ښې لوبې لپاره باید په زیاتو ټیسټ لوبو کې ګډون وکړي.

د راشد خان خبرې د د کرکټ ځانګړې ویبپاڼې کرکټ ټرکر وېبپاڼې خپرې دي.

ده ویلي چې لوبډله یې د پخېدو لپاره زیات تمرین ته اړتیا لري.

له ویسټ انډیز سره په ټیستلوبه کې د افغانستان د ملي لوبډلې یو شمېر تجربه کارو لوبغاړو برخه نه لرله.

د هغوی په منځ کې یو هم محمد نبي دی چې د بنګله دېش پر وړاندې په ټیسټ لوبه کې تر ګډون وروسته یې د تل لپاره له ټیسټلوبو د وتلو اعلان وکړ.

د ویسټ انډیز پر وړاندې د شل اورونو، پنځوسو اورونو او تیسټ مچ په سیالیو کې یو شمېر نویو افغان لوبغاړو ته موقع ورکړل شوه.

چارواکي: لوګر کې ۱۱ وسله وال وژل شوي

ارشیف

د لوګر امنیتي چارواکي وایي، چې تيره شپه افغان امنيتي ځواکونو د لوګر ولايت په برکي برک ولسوالۍ اړوندو سيمو کې د یو لړ عملياتو پر مهال 8 وسله وال طالبان وژلي او دوه نور هغه مهال وژل شوي، چې غوښتل یې د مرکز اړوند په پاد خواب روغني د قلعه نو په سيمه کى ماين ځاى پر ځاى کړي او خپله پرې چاودلی.

د ۲۰۳ تندر قولو اردو د څلورمې پلي لوا قوماندانۍ ویاند احمد شکیل تسل ازادي راډیو ته وویل، چې د دې ولایت د محمداغې ولسوالۍ اړوند د لشکري خېلو په سیمه کې د وسله والو طالبانو په خپل منځي نښته کې یو طالب وژل شوی او دوه نور ټپیان شوي دي.

طالب وسله والو تر اوسه ددې پېښو په اړه رسنیو ته څه ندي ویلي.

کابل کې د والیبال اتلولۍ جام لپاره د غواروۍ سیالۍ پیل شوې

ارشیف

په کابل کې د والیبال د اتلولۍ جام لپاره د پنځو ولایتونو د لوبډلو ترمنځ د غواروۍ سیالۍ پیل شوې.

ددې سیالیو لومړي لوبه چې، د جمعې په ورځ د سرې میاشتې او جهان سپورټ لوبډلو ترمنځ د کابل د بدني روزنې په جمنازیوم کې پیل شوې لس ورځې به دوام کړي.

د افغانستان د بدني روزنې د نشراتو برخې امر عارف پیمان د شنبې په ورځ ازادي راډيو ته وویل په یادو سیالیو کې د لغمان، دایکندي، ننګرهار، بلخ او کابل لوبډلې ګډون لري.

افغان فوټبال لوبډلې د مرکزي اسیا په سیالیو کې جایزه ګټلې

ارشیف

د افغانستان د ښځینه فوټبال لوبډلې د مرکزي اسیا د فوټبال په لوبو کې د Fair Play جایزه وګټله.

د افغانستان د فوټبال فدراسیون ویاند شفیع شاداب د شنبې په ورځ ازادي راډيو ته وویل چې، د هېواد د ۲۳ کلنو ښځینه فوټبال ملي لوبډلې د مرکزي اسیا د ۲۳ کلنو د فوټبال په دغو لوبو د یوې لوبې په ګټلو سره د یادو سیالیو پنځم مقام يې ترلاسه کړ.
د دغو سیالیو لومړي مقام ازبکستان، دویم ایران، دریم تاجیکستان درېیم، او قیرغیزستان څلورم مقام خپل کړ.

د ترکمنستان د ۲۳ کلنو ښځينه فوټبال لوبډله بیا د ټولو لوبو په بایللو سره په شپږم او وروستي مقام کې وشمېرل شوه.
د یادونې وړ ده، چې په یادو شویو سیالیو کې د افغانستان په استازیتوب، دوه تنو، یاسمین حیدر او فرشتې شیخمیري د لوبڅارې او مرستیالې لوبڅارې په توګه ګډون درلود.

" کابل کې د رومیانو د بیې لوړېدا اندېښنې رامنځته کړي"

ارشیف

د افغانستان د متشبثینو عالي بورډ، په کابل کې د رومیانو د بیې لوړیدل، د اندېښنې وړ بولي.

د دې بورډ رئيس رحم الدین حاجي اغا د شنبې په ورځ ازادي راډیو ته وویل، د سړو خونو نشتون، د هوا سړېدل او نورو هېوادونو ته زیات صادارات هغه لاملونه دي چې، له امله یې د رومیانو بیه لوړ شوې ده.

نوموړی وايي، اوس مهال د کابل په بازارونو کې یو من رومیان له ۸ تر ۹ سوه افغانیو پورې پلورل کېږي.

هغه وویل: "د سړې هوا په رارسېدو سره او ګاونډیو هېوادونو ته د رومیان زیات صادرات هغه لاملونه دی چې، په هېواد کې دننه یې د رومیانو بیې لوړې کړي، د دې ستونزې د هواري لپاره باید معیاري سړې خونې جوړې شي."

د افغانستان د کرنې او مالدراۍ وزارت ویاندې اکبر رستمي بیا وايي، په روان کال کې په یو شمېر ولایتونو کې سړې خونې جوړې شوي خو دا بسنه نه کوي.

د ښاغلي رستمي په خبره، دوی پلان لري چې په راتلونکي ۱۳۹۹ کال کې، د افغانستان په څو لویو ښارونو کې سړې خونې هم جوړې کړي.

"د کابل اقتصادي پروژو د پلي کېدو په هدف تړون لاسلیک شو"

د کابل ښار انځور

د افغانستان د سوداګرۍ او صنایعو خونې، د خصوصي سکټور د پیاوړتیا په هدف یو د کابل ولایت له سیمه ییزې ادارې سره یو هوکړه لیک لاسلیک کړ.

د دې خونې ویاند جان آقا نوید د شنبې په ورځ ازادي راډيو ته وویل، ددې هوکړه لیک په لاسلیک کېدو سره به، خصوصي سکټور د کابل ولایت د مهمو اقتصادي پروژو په پلي کېدلو کې برخه ولري.

هغه زیاته کړه: "په دغو پروژو کې مهمې پروژې لکه د سړکونو جوړول، د ودانیو جوړولو او دغه شان د پلونو او پارکونو جوړول شامل دي."

د ښاغلي نوید په خبره، په روان لمریز کال کې په کابل ولایت کې د شاخوا دوه میلیارده افغانیو په ارزښت بېلابېلې پروژې د پلي کېدو په حال کې دي چې، لګښت یې د سیمه ییزې ادارې له بودجې څخه ورکول کېږي.

د افغانستان د سوداګرۍ اوصنایع خونې ویاند دغه شان وايي چې، د دې هوکړه لیک په پلي کېدلو سره به سلګونو کسانو ته د کار زمینه هم برابره شي.

چارواکي: کندهار، زابل او ارزګان کې ۱۷ وسله وال وژلي شوي

ارشیف

د کندهار په معروف او شاوليکوټ کي ۲۸ وسله والو ته مرګ ژوبله اوښتې ده.

په کندهار کي د ۲۰۵ اتل قول اردو مرستیال ویاند صادق عيسي ازادی رادیو ته وویل ، چي د افغان ځواکونو په ترسره شویو عملياتو کي په معروف او د شاوليکوټ ولسوالۍ د وچ باغتو په سيمه کي ۱۳ وسله وال وژل سوی او ۱۵ نور ټپيان دي.

نوموړی وایي په دغو عملياتو کي د وسله والو يو شمېر وسلې او مهمات هم له منځه وړل شوي دي.

عيسي وایي د افغان ځواکونو په هوایي عملياتو کي د ارزګان په مرکز ترينکوټ او زابل کې هم ۴ وسله وال وژل شوی او ۴ نور ټپيان شوي دي.

ښاغلي عیسی په عملياتو کي د افغان ځواکونو د زيان يادونه ونه کړه.

وسله والو بيا په کندهار او زابل کي پر افغان ځواکونو د بريدونو ادعا کړې.

افغان-بریټانيايي سوک وهونکي خپل انګلیس سیال ته ماتې ورکړه

سهیل ماشومتوب کې انګلستان ته تللی و او هلته د سوک وهنې لوبه مخته وړي.

افغان-بریټانيايي سوک وهونکي سهیل احمد مغلزي خپل انګلیس سیال ناک اوټ کړ.

د سهیل احمد مغلزي او ډایلین ډراپر تر منځ لوبه بیګاه شپه د لندن په یارک هال کې وشوه.

سهیل احمد په خپله فیسبوک پاڼه د دې لوبې جزییات او عکسونه خپاره کړي او لیکلي یې دي چې په دریم رونډ کې یې خپل سیال ناک اوټ کړی دی.

سهیل احمد افغان پروفیشنل سوک وهونکی دی چې تر اوسه یې ۱۴ بریاوې خپلې کړي دي.

یواځې یوه ماته یې خوړلې ده.

د سهیل احمد او ډایلین ډراپر په لوبې سربېره د انګلستان د کمنوېلټ یا ګډوګټو او بریټیش اتلولۍ کمربندونو پر سر ګڼو نورو سوک وهونکو هم بیګاه لوبې کړي.

سهیل احمد مغلزی ۳۱ کلن دی.

دی په ماشومتوب کې انګلستان ته تللی و او هلته د سوک وهنې لوبه مخته وړي.

"هلمند کې ماین چاودنې د ملي اردو جنرال وواژه"

ارشیف

د هلمند چارواکي تائیدوي چې نن سهار په یوه چاودنه کې یو افغان جنرال وژل شوی دی.

د هلمند ولایت د عامه اړیکو مسوول زاهد اتل ازادي راډیو ته تایید کړه چې د مارجې او ناوې ولسوالیو تر منځ په لار په یوه ماین چاودنه کې د ملي اردو د سرحدي ځواکونو د څلورمې پلې لوا قومندان جنرال ظاهرګل مقبل وژل شوی او دوه عسکر یې ټپیان دي.

د ازادي راډیو خبریال هم وايي چې له افغان پوځیانو سره په موټرو کې یو شمېر خبریالان مارجې ته روان و او له ډلې یې د شمشاد خصوصي ټلویزیون خبریال سردارمحمدسروري د نن سهار په دې ماین چاودنه کې ټپي شوی دی.

ټپیان په لښکرګاه ښار کې ایمرجنسي روغتون ته انتقال شوي دي.

مارجه کې افغان پوځیانو له ډېره وخته عملیات پيل کړي و.

چا د نننۍ ماین چاودنه مسوولیت په غاړه نه دی اخیستی.

وسله والو طالبانو ادعا کړې چې په مارجه کې یې د افغان پوځیانو عملیات ناکامه کړي او دولتي عسکرو ته یې تلفات اړولي.

چارواکي: پکتیا کې ۹ وسله وال وژل شوي دي

ارشیف

د پکتیا امنیتي مسوولین وايي، چې تېره شپه د احمدابا ولسوالۍ په زرګل سیمه کې د افغان ځانګړو ځواکونو په هوايي برید کې ۵ وسله وال وژل شوي.

د پکتیا د امنیه قوماندانۍ ویاند سردارولي تبسم مشال راډیو ته وویل، چې وسله والو غوښتل د یادې سیمې له لارې په یو کرولا موټر کې وسلې بلې سیمې ته یوسي، چې هوايي برید ورباندې شوی دی.

نوموړی زیاتوي، په دې برید کې پنځه وسله وال وژل شوي او وسلې يې هم له منځه تللي دي.

د چارواکو په وینا وړمه شپه د سیدکرم ولسوالۍ د کوسین په سیمه کې هم د افغان ځانګړو ځواکونو په هوايي برید کې ۴ وسلوال مخالفین وژل شوي وو.

د چارواکو د یادو ادعاوو په اړه تر اوسه کومې وسله والې ډلې رسنیو ته څه نه دي ویلي.

د پل خشتي جومات د بیارغونې کار بشپړ شو

د پل خشتي د جامع د بیارغونې کار د ۲۰۱۷ میلادي کال په ډېسمبر کې پېل شوی و.

د کابل ښار د پل خشتي جومات د بیارغولو کار پرون، د نومبر په ۲۹مه ، بشپړ شو.

په دې اړه په مراسمو کې د افغانستان ولسمشر محمد اشرف غني وویل چې دا جومات په کابل کې له مهمو تاریخي ځایونو دی چې د نظافت او ساتنې به پرخه کې باید ټول همکاري وکړي.

محمد اشرف غني وویل: "له خد ایه توفیق غواړو چې ۳۷۷ جوماتونه چې په ولسوالیو کې جوړېږي، بشپړ شي، په ۲۶ ولایتونو کې چې جامع جوماتونه نه و، جامع جوماتونه د بشپړېدو په حال کې دي."

د پل خشتي د جامع د بیارغونې کار د ۲۰۱۷ میلادي کال په ډېسمبر کې پېل شوی و.

د افغانستان حکومت ویلي و چې د بیارغونې لپاره یې ۱۱۷ میلونه افغانۍ بودجه ځانګړې کړې وه.

سټولټنبرګ: په افغانستان کې د سولې د مذاکرو هرکلى کوو

ينس سټولټنبرګ

د ناټو سرمنشي په افغانستان کې د سولې د مذاکرو هرکلى وکړ.

ينس سټولټنبرګ نن دا څرګندونې په داسې حال کې وکړې، چې د امريکا ولسمشر ډونالډ ټرمپ پرون افغانستان ته ناڅاپي سفر وکړ.

ښاغلي سټولټنبرګ نن د بلجيم په پلازمېنه بروکسل کې يوه کنفرانس ته وويل:

”په افغانستان کې د سولې د مذاکرو هرکلى کوو. طالبانو ته په کار ده پر يوه باوري موافقه د سلا کېدو لپاره واقعي جوړجاړى وښيي. ناټو د افغان امنيتي ځواکونو ملاتړ ته دوام ورکوي، چې د سولې لپاره شرايط برابر شي.“

په عين حال کې د امريکا ولسمشر ډونالډ ټرمپ پرون په بګرام پوځي اډه کې وويل، امريکا له طالبانو سره د سولې خبرې له سره پيل کړي دي.

وسلوالو طالبانو له امريکايي لوري سره مخامخ مذاکرو ته چمتووالى ښوولى دى.

رويټرز اژانس د طالبانو په حواله راپور ورکړى، چې دغې ډلې د دې اوونۍ له پيله د قطر په پلازمېنه دوحه کې د امريکا له لوړ رتبه چارواکو سره کتلي دي.

د امريکا ولسمشر ډونالډ ټرمپ له طالبانو سره د سولې مذاکرې په تېره سپټمبر مياشت کې وروسته له هغې لغوه کړې، چې په کابل کې د طالبانو په يوه حمله کې ١٢ کسان ووژل شول، چې په کې امريکايي و.

ولسمشرغني: که طالبان سوله غواړي، اوربند دې وکړي

ولسمشر غني او ولسمشر ټرمپ

د افغانستان جمهوري رياست وايي ولسمشر محمد اشرف غني د امريکا له ولسمشر ډونالډ ټرمپ سره په کتنه کې ټینګار وکړ که طالبان ريښتیا د سولې پر موافقه سلا کېدل غواړي، باید اوربند ومني.

جمهوري رياست په يوه اعلاميه کې ويل شوي دواړه ولسمشرانو پر دې هم ټینګار وکړ، چې د اوږدمهالې سولې لپاره باید له افغانستان څخه بهر د تروريستانو ځالې له منځه لاړې شي.


د امریکا ولسمشر ډونالډ ټرمپ پرون افغانستان ته د ناڅاپي سفر په لړ کې په بګرام پوځي اډه کې وويل، واشنګټن له طالبانو سره خبرې له سره پیل کړي دي:

”ګورو چې دوی غواړي یوې موافقې ته ورسېږو. دا به یوه رښتینې موافقه وي ځکه چې دوی دا موافقه غواړي. خو چې هره موافقه وشي علت به یې دا وي چې تاسو خپله دنده ښه ترسره کړې. زه غواړم له تاسو او له افغان سرتېرو مننه وکړم، ځکه تاسو راته ویل چې دوی ډېره ښه جګړه کوي.“

ذبيح اله مجاهد چې ځان د وسلوالو طالبانو وياند معرفي کوي، نن جمعه ويلي، طالبان د امريکا له متحدو ايالتونو سره د سولې د مذاکرو بيا پيل ته چمتو دي.

په کاپيسا کې د طالبانو يو نظامي مسوول وژل شوى دى

د کاپيسا ولايت چارواکي وايي په يوه هوايي حمله کې د دغه ولايت لپاره د طالبانو د پوځي کمېټې تش په نوم مسوول وژل شوى دى.

د کاپيسا د امنيې قوماندانۍ وياند عبدالشايق شورش نن ازادۍ راډيو ته وويل، د طالبانو دغه پوځي مسوول قاري نظرګل په اله ساى ولسوالۍ کې د افغانستان د هوايي ځواک له خوا په نښه شوى دى.

ښاغلى شورش وايي دغه کس په کاپيسا کې د طالبانو مهم غړى و، چې د افغان قواوو په وړاندې په زياتو حملو کې يې لاس درلود.

وسلوالو طالبانو د دې پېښې په اړه څه نه دي ويلي.

په پکتيکا کې د ٦٥ مليون افغانيو په ارزښت څو پروژې عملي کېږي

د پکتیکا په دوو ولسوالیو کې د ۶۵ میلیونه افغانیو په لګښت د څو پروژو کارونه پيل شول.

د پکتیکا والي مجیب الرحمن څمکني چې پرون د ځینو ولایتي مسوولینو په ملتیا دغو ولسوالیو ته ورغلی وو، رسنیو ته وویل:

”یو د جاني خېلو ولسوالۍ دېرش بستریز روغتون دی، چې هغه به د ۵۳ میلیونه افغانیو په لګښت سټنډرډ او په معیار جوړیږي، بل په خیر کوټ کې دوه استنادي دیوالونه وو، چې په هغو ۸ میلیونه افغانۍ لګښت شوی او بل دا سړک دی چې جغل پرې اچول شوی ۷ کیلومتره اوږدالۍ لري، د ۴ میلیونه افغانیو په لګښت جوړیږي.“

د پکتيکا اوسېدونکو په ليرې پرتو سيمو کې د بيارغونې د نورو پروژو غوښتنه هم کړې ده.

د ثبات او همپالنې په لسګونو پلويانو لاريون وکړ

د عبدالله عبدالله په مشرۍ د ثبات او همپالنې ټاکنیز ټیم په لسګونو پلويانو نن په کابل کې لاريون وکړ.

لاریون د هغه څه د مخنیوي لپاره کېږي چې دوی یې په انتخاباتو کې تقلب بولي.

دغې انتخاباتي ډلې په شپږو مادو کې پرېکړه ليک هم خپور کړى دى.

په پرېکړه ليک کې ويل شوي، که د ټاکنو خپلواک کميسيون او اړوند بنسټونه د دې ډلې مشروع غوښتنې په پام کې ونه نيسي، دغه ډله به د خلکو د واقعي ارادې د عملي کېدو لپاره له ټولو مشروع او سوله ييزو لارو چارو کار واخلي.

د ثبات او همپالنې ډله وايي، د انتخاباتو خپلواک کمیسیون باید هغه شاوخوا ۳۰۰ زره رایې چې دوی یې تقلبي بولي، له سیسټم څخه وباسي خو د انتخاباتو خپلواک کمیسیون وايي چې د قانون پر خلاف کار یې نه دی کړی.

لوګر کې د ځینو ښوونځیو له زده کوونکو د ناوړه جنسي استفادې په اړه ارګ کې بحث وشو

دا غونډه د ولسمشر اشرف غني په مشرۍ تېر ماښام په ارګ کې جوړه شوې وه.

د افغانستان جمهوري ریاست وايي چې د قانون د حاکمیت او د فساد پرضد د عالي شورا په غونډه کې د لوګر ولایت په ځینو ښوونځیو کې له ماشومانو د ناوړه جنسي استفادې د ادعاوو په اړه بحث وشو.

دا غونډه د ولسمشر اشرف غني په مشرۍ تېر ماښام په ارګ کې جوړه شوې وه.

جمهوري ریاست په یوه خبرپاڼه کې وايي، په دې غونډه کې ټینګار وشو چې دا قضیه باید د افغانستان د لویې څارنوالی او د بشري حقونو د خپلواک کمیسیون له خوا وڅېړل شي او دا ادارې دې بیا خلکو ته په دې برخه کې د خپلو اقداماتو په اړه معلومات ورکړي.

د لوګر د مدني ټولنې رییس موسی محمودي په دې وروستیو کې له یوشمېر رسنیو سره په خبرو کې ادعا وکړه چې د لوګر ولایت په ځینو ښوونځیو کې له زده کوونکو هلکانو څخه ناوړه استفاده شوې.

نوموړی وروسته د ملي امنیت له خوا ونیول شو. په دې پسې د ملي امنیت له توقیف ځای څخه د محمودي او د هغه د یو ملګري احسان الله حمیدي خپرې شوې ویډیو هم یولړ غبرګونه وپارول.

د چهارشنبې په ورځ د افغانستان د بشري حقونو د خپلواک کمیسیون ویاند شکرالله مشکور آزادۍ راډیو ته وویل چې محمودي او حمیدي خوشې شوي او دې کمیسیون ته سپارل شوي دي.

د عبدالله عبدالله په مشرۍ د ثبات او همپالنې ټاکنیز ټیم نن کابل کې لاریون کوي

د ثبات او همپالنې ټیم لاریون د هغه څه د مخنیوي لپاره کېږي چې دوی یې په انتخاباتو کې تقلب بولي.

د عبدالله عبدالله په مشرۍ د ثبات او همپالنې ټاکنیز ټیم نن په کابل کې لاریون کوي. دا ډله وايي، لاریون د هغه څه د مخنیوي لپاره کېږي چې دوی یې په انتخاباتو کې تقلب بولي.

د دې انتخاباتي ډلې لومړي مرستیال عنایت الله بابر فرهمند پرون په کابل کې په یوه خبري غونډه کې هیله څرګنده کړه چې نننۍ ورځ به تاریخ جوړوونکې وي.

ښاغلي فرهمند وویل: "سبا یکشنبې به تاریخي نه بلکې تاریخ جوړوونکې ورځ وي. که د دې تاریخ پیل له کابل ښار څخه ونه شي، نو ډاډه اوسئ چې د افغانستان خلک به بیا ښه ورځ ونه ویني."

په همدې حال کې د کابل د ګارنیزیون قومانداني په یوه خبرپاڼه کې ویلي دي چې د دې لاریون لپاره د حضوري چمن ساحه ټاکل شوې ده.

ګارنیزیون له لاریون کوونکو غوښتي چې په نورو ځایونو کې دې مظاهرې نه کوي او د پلازمېنې اوسېدونکو ته دې ستونزې نه جوړوي.

د کابل ګارنیزیون قوماندانۍ دا هم ویلي چې معترضان د وسلو د ګرځولو اجازه نه لري.

د ثبات او همپالنې ډله وايي، د انتخاباتو خپلواک کمیسیون باید هغه شاوخوا ۳۰۰ زره رایې چې دوی یې تقلبي بولي، له سیسټم څخه وباسي خو د انتخاباتو خپلواک کمیسیون وايي چې د قانون پر خلاف کار یې نه دی کړی.

محب: افغانستان ته د سولې په برخه کې هر اغېزناک لوری مهم دی

ښاغلي محب دا خبرې د اروپا د سولې انستتیوت له مشر مایکل کیټنګ سره نن د لیدو پر مهال وکړې.

د افغانستان د ملي امنیت سلاکار حمدالله محب وايي، د افغانستان حکومت د سولې په دې اړه یو منظم پلان لري او هر ښکېل او اغېزناک لوری ورته مهم دی.

ده دا خبرې د اروپا د سولې انستتیوت له مشر مایکل کیټنګ سره نن د لیدو پر مهال وکړې.

د اروپا د سولې انستتیوت مشر وویل، د پخلاینې په برخه کې باید تر کورنیو، بهرنیو او سیمه ییزو څېړنو وروسته پرېکړې وشي.

د ملي امنیت سلاکار وویل، که څه هم د افغانستان لانجه په مختلفو برخو کې له نورو هېوادونو سره توپیر لري، خو د هرې تجربې له مثبت اړخ څخه باید استفاده وشي.

ولسمشر غني د امریکا د لوی درستیزانو د کمېټې له مشر سره وکتل

ارشیف

ولسمشر محمد اشرف غني نن د امریکا د لوی درستیزانو د کمېټې له مشر جنرال مارک ميلي سره وکتل.

د ولسمشر ویاند صدیق صدیقي پر خپله ټویټر پاڼه لیکلي، دواړو لوریو د امریکا له خوا د افغانستان له دفاعي او امنیتي ځواکونو سره د ملاتړ، د تروريزم پر ضد د ګډې مبارزې او سولې په اړه خبرې وکړې.

مارک میلي پرون کابل ته لاړ او هلته یې وویل چې په افغانستان کې د جګړې پای ته رسېدو هیلې تر بل هر وخت زیاتې شوي دي.

امریکا له طالبانو سره یو کلنې خبرې لغوه کړې خو طالبان بیا د اروپايي هېوادونو له استازیو او د سیمې له قدرتونو سره وخت ناوخته لیدنې کوي.

تېره ورځ هم د افغانستان لپاره د اروپايي ټولنې ځانګړی استازی رولاند کوبیا او د جرمني ځانګړی استازی مارکوس پوتزیل دوحې ته تللي وو او پر د افغانستان پر سوله یې له طالبانو سره خبرې کړي.

د ټاکنو کمېسیون د پاتې ۷ ولایتونو د رأیو بیاشمېرنې په اړه وروستۍ پرېکړه نه ده کړې

د افغانستان د ټاکنو خپلواک کمېسیون لا هم په هغه اووه ولایتونو کې د رایو دبیا شمېرنې او څېړنې په اړه وروستۍ پرېکړه نه ده کړې چې د یو شمېر ټاکنیزو ټیمونو د پلویانو په لوري په کې د کمیسیون دروازې تړل شوي دي.

د ټاکنو خپلواک کمېسیون رئیسې حوا علم نورستانۍ د پنج‌شنبې په ورځ په یوه خبري غونډه کې وویل، له معترضو نوماندانو سره ددوی ډېر ناستې وشوې، خو یوې پایلې ته ونه رسېدل.

خودا چې په سرپل، بغلان، بدخشان، تخار، فاریاب، پنجشېر او جوزجان ولایتونو کې د ثبات او همپالني انتخاباتي ټیم په ګډون لا هم د معترضو نوماندانو د پلویانو له‌خوا د رایو د بیا شمېرنې او څېړنې اجازه نه ده ورکړل شوې، بالاخره د ولسمشرۍ ټاکنو د لومړنۍ پایلو د اعلان برخلیک څه ډول کېږي؟

د ټاکنو خپلواک کمېسیون کمېشنر محمد حنیف دانشیار وايي، دوی به په دې اړه د قانون پر بنسټ پرېکړه وکړي.

"که خدای مه کړه بیا هم په دې ولایتونو موږ ته د بیا شمېرنې او څېړنې اجازه را نه کړل شي، کمېسیون به یې د قانون په رڼا په اړه پرېکړه وکړي، خو تر اوسه په دې اړه تازه پرېکړه نه ده شوې. "

د افغانستان د انتخاباتو قانون د ۴مې مادې د ۱۹ جز له مخې، د ټاکنو لومړنۍ پایلې هغه مهال اعلانېږي چې د ټولو ولایتونو پایلې په کې شاملې وي.

"د تخار پر درقد ولسوالۍ د طالبانو برید په شا تمبول شوی"

تخار نقشه

د تخار ولایت امنیتي چارواکي وايي، د دې ولایت پر درقد ولسوالۍ د طالبانو حمله پر شا وتمبول شوه.

د ۲۱۷ پامیر قول اردو په اعلامیه کې راغلي چې طالبانو تېره شپه په قره تېپه سیمه حملې پیل کړې.

ویل شوي چې له دولتي ځواکونو سره په نښتو کې د دوو قومندانانو په ګډون یوولس طالبان وژل شوي. په اعلامیه کې د یوه پوځي د وژل کېدو خبر ورکړل شوی دی خو طالبانو د ۲۲ سرتېرو د وژلو ادعا کړې ده.

کندز کې ماین چاودنې د ښځو او ماشومانو په ګډون ۱۵ کسان وژلي

دا کسان د کندز له خان‌اباد ولسوالۍ څخه د امام صاحب په ولسوالۍ کې واده ته تلل.

د کندز په امام صاحب ولسوالۍ کې د ماین په چاودنه کې د ښځو او کوچنیانو په ګډون ۱۵ تنه وژل شوي او دوه تنه زخمیان شوي دي.

چاودنه پرون ماښام په پنځو بجو شوې ده.

د کندز د والي ویاند عصمت‌الله مرادي پرون د نومبر په ۲۷مه وویل: "په دې کې ۶ ښځې، یو نارینه، ۶ ماشومانې نجونې او ۲ هلکان وژل شوي او دوه ملکي وګړي زخمیان شوي دي."

مرادي زیاته کړې چې دا کسان د کندز له خان‌اباد ولسوالۍ څخه د امام صاحب په ولسوالۍ کې واده ته تلل.

هغه وویل چې ماین وسله‌والو طالبانو ايښي و. طالبانو په دې اړه خبرې نه‌دي کړي.

د افغانستان د ولسمشر ویاند صدیق صدیقي پرون پر ټویټر ولیکل چې د بې‌ګناه ښځو او ماشومانو په قتل خوابدي دي او په کلکه‌یې غندي.

د کندهار هوايي لوا کې ۱۵ کسان له روزنیزې دورې فارغ شول

ارشیف

د کندهار په هوايي لوا کې ۱۵ پيلوټان، نښه ویشتونکي او ښوونکي له درې میاشتنۍ روزنیزې دورې فارغ شول.

د کندهار د والي له دفتره په اعلامیه کې چې پرون د نومبر په ۲۷مه خپره شوه لیکل شوي چې دغو پیلوټانو ته د امریکايي بلک هاک هليکوپټرو په اړه تعلیم ورکړل شوی دی.

په هغوی کې ۸ پيلوټان، ۵ نښه ویشتونکي او دوه ښوونکي دي.

په پرونیو مراسمو کې د کندهار د هوایي لوا قوماندان او د بهرنیو قواوو استازو منصبدارانو هم حضور درلود.

نور راوښيه

XS
SM
MD
LG