د لاسرسي لېنکونه

تازه خبر
پنجشنبه ۲۳ لړم ۱۳۹۸ کابل ۰۳:۱۳

افغانستان

جان بس: د ولسمشر غني وروستۍ څرګندونې مایوسوونکې دي

په کابل کې د امریکا د متحدو ایالاتو سفیر جان بس

په کابل کې د امریکا د متحدو ایالاتو سفیر جان بس ویلي چې د امریکا د نړیوالو پراختیايي مرستو د پروګرام (یو.اېس اېډ) په اړه د جمهور رئيس غني وروستیو څرګندونو چې له ازادي راډیو سره یې په مرکه کې کړي، مایوسوونکې دي.

جان بس پرون د سپټمبر په ۲۶مه پر ټوېټر لیکلي چې د ولسمشر غني پر دې کار چې د (یو. اېس اېډ) فوق العاده ښه کار او په ټول افغانستان کې د خلکو د ژوند د ښه کولو لپاره د دوی هڅې یې له پامه غورځولي، مایوس دی.

د افغانستان ولسمشر محمد اشرف غني د چهارشنبې په ورځ له ازادي راډیو سره په مرکه کې وویل چې د امریکا د نړیوالو پراختیايي مرستو اداره بې کفایته ده او د دې ادارې له لاري افغانانو ته د مرستې له یوه ډالره یوازې لس سنټه رسېږي.

د امریکا د متحدو ایالاتو سفیر د دې خبرو په وړاندې په غبرګون کې د هغو پروګرامونو په اړه معلومات خپاره کړي چې د (یو. اېس اېډ) په ملاتړ د افغانستان په مختلفو سیمو کې ترسره شوي دي.

د ورځې تازه خبرونه دلته ولولئ

د انتخاباتو خپلواک کمېسیون: د رأیو بیاشمېرنه ودرول شوه

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

د افغانستان د انتخاباتو خپلواک کمېسیون وايي، د ولسمشریزو انتخاباتو د رأیو د بیاشمېرنې او تفتیش بهیر ودرول شو.

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

ښاغلی ابراهیمي زیاتوي چې دغه بهیر د کمېسیون تر راتلونکي هدایت درېدلی، د هغو محلونو د تفتیش او بیاشمېرنې بهیر چې د رأیو صندوقونه‌یې پرانیستي دي او د تفتیش او څېړنې لاندې دي، له دغه امر مستثنی دی.

د انتخاباتي شکایتونو کمېسیون هم د دغه بهیر له درېدو هرکلی کوي.

د دغه کمېسیون کمېشنر او ویاند محمد قاسم الیاسي ازادي راډیو ته وویل، د ولسمشرۍ انتخاباتو د رأیو د تفتیش او بیاشمېرنې بهیر باید له یو یا دوو ورځو زیات وخت ونه‌نیسي.

طالبان: خوندي ځای ته د طالب بندیانو رسېدو پورې برمته استادان نه‌خوشې کوو

ذبیح‌الله مجاهد چې ځان د طالبانو ویاند بولي ازادي راډیو ته په یوه استولي پیغام کې دا خبره کړې ده.

طالبان وایي تر هغه به د افغانستان-امریکايي پوهنتون دوه تښتول شوي استادان خوشې نه‌کړي چې انس حقاني او دوه نور طالبان چې پرون‌یې د افغانستان حکومت د خوشې کولو اعلان وکړ، یوه خوندي ځای ته انتقال شوي نه‌وي.

ذبیح‌الله مجاهد چې ځان د طالبانو ویاند بولي نن (عقرب ۲۲مه) ازادي راډیو ته په یوه استولي پیغام کې دا خبره کړې ده.

ولسمشر محمد اشرف غني پرون د امریکايي پوهنتون د دغو استادانو د خوشې کولو په بدل کې له بګرام زندان څخه د انس حقاني او د طالبانو ډلې دوو نورو غړو عبدالرشید عمري او ملي خان د ازادولو اعلان وکړ.

ښاغلي غني وویل، دغه پرېکړه‌یې له نړیوالو شریکانو او په ځانګړې توګه له امریکا سره په مشوره او له طالبانو سره د سولې مخامخ خبرو پیلېدو په هدف کړې ده.

تر اوسه څرګنده نه‌ده چې د طالبانو دغه بندیان اوس چېرته دي، خو تېره ورځ یوې سرچینې چې نه‌یې غوښتل نوم‌یې واخیستل شي، ازادي راډیو ته وویل چې دا کسان د بګرام له زندان څخه لېږدول شوي دي.​

ننګرهار کې د 'کاسا-۱۰۰۰' پروژې پر لاره د ماينونو شنډول پيل شوي

ارشیف

په ننګرهار کې د 'کاسا-١٠٠٠' پروژې په مسير کې د ماينونو د موندلو او شنډولو چارې پيل شوې.

د والي وياند پرون ازادي راډيو ته وويل، ماينونو د موندلو او شنډولو کار د جلال‌اباد له اتمې ناحيې پيل شو، په کامې، ګوشتې، لعلپورې او مومندرې ولسواليو کې به هم ترسره کېږي.

عطاالله خوګياڼي وويل، په دې ډول به د 'کاسا-١٠٠٠' په نوم د برښنا د لېږد پروژې د ټولو ټاورونو يا ستنو ساحې له ماينونو پاکې شي.

هغه زیاته کړه: "د دې پروسې په ترڅ کې به د ټولو ټاورونو ځمکه وپلټل شي، څو د ماينونو د موجوديت په صورت کې ماينونه له‌منځه يووړل شي او په راتلونکي کې د کار پر مهال کومه بده پېښه ونه‌شي."

د ننګرهار چارواکي وايي داسې اندېښنې شته چې د 'کاسا-١٠٠٠' پروژې په مسير کې به له پخوانيو جګړو ماينونه پاتې وي.

'کاسا-١٠٠٠' د منځنۍ او جنوبي اسيا په سطحه يوه مهمه پروژه ګڼل کېږي چې په مرسته به‌يې د افغانستان له طريقه د قرغزستان او تاجکستان ١٣٠٠ مېګاواټه برښنا پاکستان ته انتقالېږي.

افغانستان به د ٣٠٠ مېګاواټه برښنا د ترلاسه کولو ترڅنګ د ټرانزيټ له درکه له دې پروژې په کال کې له ٤٠ تر ٦٠ میليونه ډالره عوايد ترلاسه کړي.

چارواکي: ارزګان کې طالبانو د روغتيا وزارت د پروژې دوه کارکوونکي وژلي

عبادي وويل، وسله‌والو طالبانو دواړه برمته شوي کسان وژلي دي.

د ارزګان چارواکي وايي، وسله‌والو طالبانو د روغتيا وزارت د يوې پروژې دوه کارکوونکي پرون وژلي دي.

دغه کسان تېره يکشنبه د يوه کلینيک په ساختماني چارو بوخت وو چې وسله‌والو طالبانو وتښتول.

د ارزګان د والي وياند زړګي عبادي پرون ازادي راډيو ته وويل، وسله‌والو طالبانو دواړه برمته شوي کسان وژلي دي.

هغه زیاته کړه: "دوه کسان چې د روغتيا وزارت پروژه تطبيقوله چې کلینيک و، طالبانو له ځان سره يووړل، بدبختانه چې دواړه کسان‌يې شهيدان کړي دي."

د والي وياند وايي د عصمت‌الله او عبدالباري په نوم دغه دوه کسان د ترينکوټ ښار اړوند له ده‌يک سيمې برمته شوي وو.

وسله‌والو طالبانو د دې پېښې په اړه څه نه‌دي ويلي.

دا هم څرګنده نه‌ده چې د دغو کسانو د خوشې کېدو په بدل کې برمته کوونکو کومه غوښتنه مطرح کړې وه؟

د ټاکنو کمېسیون د ولسمشرۍ ټاکنو لومړنیو پایلو د ممکنه ځنډ خبر ورکړ

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

لوګر کې د بهرنیو ځواکونو پر قطار ځانمرګی برید شوی

د لوګر مرکز پل علم انځور

د لوګر امنیتي چارواکي وایي، نن له غرمې وړاندې د پل علم اړوند د شېنګ کمپ په سیمه کې د بهرنیو ځواکونو پر قطار ځانمرګی برید شوی.

په لوګر کې د ملي اردو د څلورمې پلې لوا قوماندان عبدالمتین حسن خېل ازادي راډیو ته وویل، چې په یاد برید کې د ځانمرګي بریدګر له وژل کېدو پرته نورو ملکي او نظامي کسانو ته تلفات نه دي اوښتي.

تر اوسه وسله والو طالبانو او کومې بلې مخالفې ډلې د دې برید مسؤلیت او په برید کې اوښتو تلفاتو په اړه رسنیو ته څه نه دي ویلي.

په کابل کې د امریکا سفیر د ۳ طالب زندانیانو له خوشې کېدو ملاتړ وکړ

په کابل کې د امریکا سفیر جان بس

په کابل کې د امریکا سفیر د درېیو طالب زندانیانو له خوشې کېدو هرکلی وکړ.

کابل کې د امریکا سفیر جان بس له خبریالانو سره په خبرو کې وویل، د ولسمشر غني له دې اقدامه ملاتړ کوي او هیله لري چې دغه کار به دې لامل شي څو طالبان هم ځیني ګامونه پورته کړي.

ښاغلي بس وویل: "د امریکا متحده ایالات د درېیو طالبان بندیانو د خوشې کولو لپاره د ولسمشر غني له دغه زړور تصمیم د یو انساني حرکت په توګه ملاتړ کوي، دغه کار به د اوسنۍ جګړې د وضعیت پای سره مرسته وکړه."

هغه زیاتوي، دا وروستی زړور اقدام دی چې ولسمشر او د افغانستان حکومت‌یې د افغانانو د سولې غوښتنې د ترلاسه کېدو په هدف ترسره کوي.

بس زیاتوي، هیله لري څو طالبان دغه اقدام "خپل انساني اقداماتو" په توګه د یو شمېر افغان ځواکونو او د غربي برمته شویو په خوشې کولو ځواب کړي.

له دې مخکې افغان ولسمشر محمد اشرف غني وویل، پرېکړه‌یې کړې څو انس حقاني او د طالبانو د ډلې دوه نور مهم غړي په مشروط ډول له بګرام زندانه خوشې کړي.

ولسمشر نن د سې شنبې په ورځ د (عقرب ۲۱مه) کابل کې خبري غونډې ته وویل، دغه پرېکړه‌یې له نړیوالو شریکانو او په ځانګړې توګه له امریکا سره په مشوره د سولې او ثبات د مخامخ مذاکراتو لپاره د رسېدو په هدف کړې ده.

هغه زیاته کړه: "حاجي ملي خان د والي خان زوی، عبدالرشید د محمد زوی او انس د جلال‌الدین زوی چې په بګرام زندان کې بندیان دي، په مشروط ډول خوشې کوو."

افغان ولسمشر ټینګار وکړ، د حقاني شبکې د درېیو مهمو غړو خوشې کېدل هغه څه چې ده ورته د دښمن خطاب وکړ د بریدونو د زیاتوالي لامل نه‌شي.

ولسمشر غني زیاته کړه، د امریکايي پوهنتون د دوو برمته شویو استادانو روغتیايي وضعیت نازک و او له طالبانو سره په غیر مستقیمو خبرو کې د دغو استادانو خوشې کېدل اساسي غوښتنه وه.

که څه هم ولسمشر غني په مستقیمه توګه اشاره ونه‌کړه، خو ویې‌ویل چې طالبان به د امریکايي پوهنتون دوه استادان هم خوشې کړي.

طالبانو دوه امریکايي استادان، ۶۰ کلن کيون کېنګ او ۴۸ کلن تيموتي وېکس په ۲۰۱۶ کال کې له کابله وتښتول.

مسئولین: پکتیا کې نږدې ۲۲ زره ټنه مڼې د خوسا کېدو په حال کې دي

د پکتیا د سوداګرۍ او صنایع خونې مشر وايي، په دغه ولایت کې نږدې ۲۲ زره ټنه مڼې د خوسا کېدو په حال کې دي.

نصیر عالمیار نن ازادي راډيو ته وویل چې د پاکستان له لوري د تعرفې د لوړېدو له امله سوداګر چمتو نه‌دي چې مڼې پاکستان ته صادر کړي.

هغه وايي: "کله چې د افغانستان حاصلات راټولېږي، موږ بیا نه‌شو کولای چې هغه پاکستان ته صادر کړو، تر اوسه یوه لارۍ مڼې هم د پکتیا د ډنډ پټان له لارې صادر شوې نه‌دي."

نوموړي دغه‌شان وویل چې دا مهال د پکتیا په بازار کې د یو من مڼو بیه ۱۰۰ تر ۱۲۰ افغانۍ ده چې بڼوالو ته له دې امله ګڼ زیانونه رسېدلي دي.

خو د سوداګرۍ او صنایعو وزارت چارواکي وايي، دا مهال د افغانستان د محصولاتو د خرڅلاو بازار یوازې پاکستان نه‌دی او سوداګر کولای شي چې د هوايي دهلېزونو له لارې خپل توکي بهر ته صادر کړي.

د دغه وزارت د عامه اړیکو رئیس جواد دبیر وايي: "اوس مهال موږ له پاکستان سربېره اروپا، عربي هېوادونو، چین، هند، منځنۍ اسیا او روسیې بازارونو ته صادرات لرو."

خو د پکتیا د سوداګرۍ خونې چارواکي وايي، افغان سوداګر د مالیې د لوړوالي له امله د هوايي دهلېزونو له لارې بهر ته د صادراتو لپاره زړه نه ښه کوي.

د پکتیا په ځاځي اریوب کې پر یو موټر هوايي برید شوی

د افغانستان په عمومي نقشه کې پکتیا ولایت

د پکتیا د ځاځي اریوب ولسوالۍ په علي سینګۍ سیمه کې تېر مازدیګر په یوه موټر هوایي برید شوی چې په‌کې سپاره ټول کسان وژل شوي دي.

د پکتیا امنیه قومانداني پېښه تأییدوي، خو د جزئیاتو په اړه‌یې څه نه‌وایي.

له بلې‌خوا بیا د پکتیا د ولایتي شورا پخوانی غړی وکیل مبارز او د سیمې یو تن اوسېدونکی سید جمال‌الدین اصف‌خېل ازادي راډیو ته وویل چې په پېښه کې وژل شوي اووه تنه ټول ملکیان د یوې کورنۍ غړي دي چې درې ښځې، درې ماشومان او یو سپین ږیری په‌کې شامل دي.

دوی وایي، دا څووم ځل دی چې په دې ولسوالۍ کې په ملکي خلکو هوایي بریدونه کېږي او که دوام وکړي، سوله‌ییز لاریونونه به وکړي او عمومي لارې به وتړي.

یاده دې وي چې د ازادي راډیو خبریال د پېښې د لاسپیناوي په اړه د پکتیا له ولایت مقام او د ۲۰۳ تندر قول اردو له عمومي قوماندان او مطبوعاتي مسؤلینو سره تماس نیولی، خو اړیکه‌یې نه‌ده ځواب شوې.

د جوزجان د درزاب د بېرته نیولو په هدف عملیات پیل شوي

ارشیف

د جوزجان چارواکي، د درزاب ولسوالۍ د بېرته نیولو په هدف د افغان ځواکونو د عملیاتو د پیل خبر ورکړ.

د جوزجان والي لطف‌الله عزیزي تېر ماښام ازادي راډیو ته وویل چې په دې عملیاتو کې د تېرې ورځې تر ناوخته پورې درې کلي تصفیه شوي دي.

نوموړي زیاته کړه: "عملیات له انتن تپې څخه د ولسوالۍ د مرکز په لوري چې درې کیلومتره فاصله لري پیل شول، په دې سیمه کې چې مرکز درزاب ته تللې په بشپړ ډول ماینونه خښ شوي دي، سیمه غرنۍ هم ده نو له همدې کبله د سیمې د تصفیې چارې ورو پر مخ ځي."

د جوزجان والي زیاته کړه، په دې عملیاتو کې ملي پوځ، کمانډو، ملي پولیس او سیمه‌ییز پاڅون کوونکي برخه لري چې هوایي ځواک‌یې ملاتړ کوي.

نوموړي وویل چې طالبانو ته مرګ ژوبله اوښتې، خو دقیقه شمېره‌یې یاده نه‌کړه.

طالبانو تر اوسه په دې اړه څه نه‌دي ویلي.

افغان کرکټ لوبډله له وېسټ انډیز سره نورې لوبې هم لري

ارشیف

د افغانستان د کرکټ ملي لوبډله د دې میاشتې تر وروستیو پورې له وېسټ انډیز لوبډلې سره درې ۲۰ اوره او یوه ټېست لوبه لري.

دا خبره د افغانستان د کرکټ بورډ چارواکو ازادي راډیو ته وکړه.

د دغو لوبو په لړۍ کې تر دې وړاندې د افغانستان د کرکټ لوبډلې وېسټ انډیز لوبډلې ته درې ۵۰ اوره لوبې بایللې دي.

د افغانستان د کرکټ بورډ د رسنیو مسؤل فرید هوتک تېر ماښام ازادي راډیو ته وویل چې ۲۰ اوره لوبې د پنجشنبې په ورځ پیل او تر راروانې دوشنبې پورې به دوام وکړي.

هوتک وايي: "موږ هیله لرو چې زموږ لوبډله په راتلونکو لوبو کې چې درې ۲۰ اوره او یوه ټېسټ لوبه ده، وکولای شي ښې پایلې ولري."

ښاغلي هوتک زیاته کړه چې افغانستان دغو لوبو ته ښه چمتووالی لري.

دا لوبې د هند د لکنوو ښار په ایکانا سپورټي لوبغالي کې د افغانستان د کرکټ لوبډلې په کوربه‌توب ترسره کېږي.

د افغانستان د کرکټ بورډ په وینا له وېسټ انډیز سره ټېست لوبه د نومبر پر ۲۷مه نېټه ترسره کېږي.

د وېسټ انډیز لوبډله د نړۍ د کرکټ لوبې له ۱۰ وتلو لوبډلو څخه ګڼل کېږي.

په ارزګان کې د یوې پرمختیایي پروژې ۲ کارکوونکي تښتول شوي

د ارزګان ولایت سیمه ییز چارواکې خبر ورکوي چې په ارزګان کې نامعلومو وسله والو د یوي روغتیايي پرمختیايي پروژي مسؤل او کارکوونکې برمته کړي دي.

د دغه ولایت د والي ویاند زړګي عبادي نن ناوخته ازادي راډيو ته وویل چې نامعلومو وسله والو دغه کسان د ترینکوټ ښار اړوند په ده یک نومي سیمه کې هغه مهال برمته کړي چې کله دوی په یاد سیمه کې د یو کلينيک په ساختماني چارو بوخت وو او دغلته يې د سیمې خلکو ته روغتیايي کلینيک جوړاوه.

عبادي وايي، دا تر اوسه معلومه نه ده چې دغه کسان چا برمته کړي دي.

ده یک سیمه د ترینکوټ ښار دوه کیلومترۍ کې په شمال لوېدیځه برخه کې پرته ده.

د عامې روغتیا ریاست چارواکو تر اوسه په دې اړه څه نه دي ويلي.

په خوست کې ۳ پولیس وژل شوي او ۳ ټپیان دي

د خوست امنیتي چارواکي وايي، چې تېره شپه د یاد ولایت د تریزیو او علي شیرو ولسوالۍ اړوند سیمه کې د یو ماین په چاودنه کې درې پولیس وژل شوي او درې نور ټپیان دي.

د خوست د امنیې قوماندانۍ ویاند ازادي راډیو ته وویل چې په یاده سیمه کې پر یوې امنیتي پوستې وسله والو برید کړی و، کله چې سیمې ته پولیس ورتلل، نو ماین پرې چاودنه کړې.

ځايي خلک وايي، په دې پېښه کې د تریزیو او علي شیرو ولسوالۍ د جنايي جرمونو مدیر هم وژل شوی دی.

د یو بل خبر له مخې نن ماسپښین د تڼیو ولسوالۍ اړوند د دره ګي په سیمه کې د یو ملکي وګړي ګاډي پسې بمي چاودنه شوې چې همدا کس په کې وژل شوی او د کورنۍ درې ښځې او یو ماشوم په کې ټپيان شوي دي.

سرچینه وايي، ممکن په دې ګاډي پسې چسپکي ماین تړل شوی وي، کله چې ګاډی کور ته رسېدلی، نو ماین چاودنه کړې ده.

د خوست د امینې قوماندانۍ چارواکي وايي چې د پېښې د پلټنې لپاره سیمې ته پولیس ورغلي دي.

په لغمان کې د وریژو حاصلات زیات شوي

د لغمان د کرنې او مالدارۍ ریاست په دې ولایت کې د وریژو د تولیداتو له زیاتوالي خبر ورکوي.

د دې ولایت د کرنې او مالدارۍ رئیس محمد جمیل خوشحال نن ازادي راډيو ته وویل چې تېر کال یوې هکټار ځمکې څلور ټنه شولې کړې وې، خو سږ کال دا حاصل له څلورو ټنو زیات شوی دی.

نوموړي د دغه زیاتوالي لامل د وریژو د کښت په برخه کې د عامه پوهاوي زیاتوالی، د کرنیزو ناروغیو مخنیوی او د بارانونو زیاتوالی یاد کړل.

د کرنې وزارت د معلوماتو پر بنسټ، په کلنې ډول افغانستان اوس مهال ۵۷۴ زره ټنه وریژو ته اړتیا لري، خو په دې هېواد کې یوازې ۳۵۲ زره ټنه وریژې تولیدېږي او د ځان بساینې لپاره ۲۲۲ زره ټنو د وریژو تولید ته لا هم اړتیا لیدل کېږي.

شولې د افغانستان د ۱۷ ولایتونو په ۸۱ ولسوالیو کې کرل کېږي.

چارواکي: په ځاځي آریوب او څمکنیو کې ۱۱ وسله وال وژل شوي

ارشیف

د پکتیا امنیتي چارواکي وايي، چې تېره شپه د یاد ولایت د ځاځي آریوب او څمکنیو په ولسوالیو کې په دوو جلا جلا پېښو کې ۱۱ وسله وال وژل شوي دي.

د پکتیا د امنیې قوماندانۍ ویاند سردار ولي تبسم نن سهار مشال راډیو ته وویل، چې وسله والو ته یاده مرګ ژوبله په ځاځي آریوب کې د افغان ځواکونو په هوايي برید او په څمکنیو کې وسله والو ته د خپل ماین په چاودنه کې اوښتې ده.

د ده په وینا چې په وژل شویو کې د احمدخېلو لپاره د طالبانو نومول شوی ولسوال هم شامل دی.

ده زیاته کړه: "بیګاه شپه په دوو ولسوالیو کې ۱۱ تنه وسلوال وژل شوي دي، چې ۷ تنه د ځاځي آریوب ولسوالۍ اړوند د روکیانو په سیمه کې وژل شوي، چې په وژل شویو کې د طالبانو لخوا د احمدخېلو ولسوال هم موجود و، همدارنګه د څمکنیو د اندړو په سیمه کې وسله والو غوښتل، چې ماینونه ځای پر ځای کړي، چې خپل ماین ور پورې چاودلی او ۴ تنه وژل شوي دي."

تر اوسه کومې وسله والې ډلې په دې اړه رسنیو ته څه نه دي ویلي.

چارواکي: د تورخم پولې په عوایدو کې زیاتوالی راغلی

د تورخم پوله

د ننګرهار چارواکي وایي، د ۲۴ ساعتونو پر مخ د تورخم د پولې له پرانېستل کېدو سره د تورخم په ښارګوټي کې ګمرکي خدمتونه هم د ۲۴ پرمخ هم فعاله شوي چې ورسره عواید هم د پخوا په پرتله ډېر زیات شوي دي.

د ننګرهار د والي ویاند عطاالله خوګیاڼي تیره ورځ ناوخته ازادي راډیو ته وویل: "تقریباً د ورځې په متوسط ډول لس میلیونه افغانۍ زمونږ په عوایدو کې زیاتوالی راغلی دی، د ګمرک ټولې اسانتیاوې د تورخم په ښارګوټۍ کې د ښاروالۍ ادارې له لوري خلکو او مسافرینو ته برابرې شوي، اوس ۲۴ ساعته باروړونکي موټر او عام خلک تګ راتګ کولای شي."

د افغانستان او پاکستان ترمنځ د تورخم پوله څه کم دوه میاشتې مخکې د یو لړ مراسمو په ترڅ کې چې د پاکستان صدراعظم عمران خان هم په کې ګډون کړی و، پرانېستل شوه.

خو له هغه مهال راهیسې یې د ۲۴ ساعتونو پر مخ د پرانېستل کېدو پر وړاندې د ځینو ستونزو راپورونه هم ورکړل شوي دي.

جوزجان کې له طبعي ګازو د ۴۰ میګاواټه برېښنا دستګاه فعالیت پیل کړ

ارشیف: د جوزجان یو انځور

په جوزجان کې د لومړي ځل لپاره له طبعي ګازو د ۴۰ میګا واټه برېښنا د تولید دستګاه پرون په فعالیت پیل وکړ.

د افغانستان د کانونو او پترولیم وزارت وایي، دغه دستګاه د بیات پاور په پانګونه په شبرغان کې چې د طبعي ګازو ډیرې زیرمې لري، جوړه شوې او پرون یې په آزمایښتي بڼه فعالیت پیل کړ.

د دغې دستګاه له تولید شوې بریښنا به چې د افغانستان د برېښنا شرکت د شبکې له لارې انتقالیږي، په جوزجان، سرپل او فاریاب ولایتونو کې په لسګونه زره کورنۍ ګټه پورته کړي.

په اوس وخت کې د برېښنا له پلوه افغانستان تر ډېره د منځنۍ آسیا د هېوادونو پر وارداتي بریښنا متکي دی چې ځینې وختونه یې د کمښت پړه افغان چارواکي پر صادرونکو هېوادونو اچوي خو د کتونکو په باور په کور دننه د برېښنا د تولید هره پروژه به پر بهرنیانو د افغانستان اتکا راکمه کړي.

ټاکنو کمېسیون: د رأیو تفتیش او بیا شمېرنې وروسته لومړنۍ پایلې اعلانېږي

سادات وايي، نهایي کوښښ دا دی څو په هغه نېټه چې د عقرب ۲۳ ده، د ولسمشرۍ د ټاکنو لومړنۍ پایلې اعلان شي.

د افغانستان د ټاکنو خپلواک کمېسیون وايي، د رأیې ورکولو د څه باندې اتو زرو محلونو د رایو د بیا شمېرنې او تفتیش پروسه روانه ده او هڅه کوي چې د ټاکلي مهالویش سره سم د ولسمشرۍ د ټاکنو لومړنۍ نتیجه اعلان کړي.

د ټاکنو د خپلواک کمېسیون یوه ویاند ذبیح سادات دغه څرګندونې تېر ماښام وروسته له هغې ازادي راډیو ته وکړې چې د ولسمشرۍ یوه کاندید او اجرائیه ریس عبدالله عبدالله کابل کې د لویې جرګې په کیږدۍ کې خپلو پلویانو ته په وینا کې د دغو محلونو د رأیو د بیا شمېرنې او تفتیش پر وړاندې خپل مخالفت څرګند کړ او له دې کمېسیونه یې وغوښتل چې دغه بهیر سمدستي ودروي.

خو سادات وویل، دغه پرېکړه د دې کمېسیون د رهبرۍ په اکثریت شوې او له ټولو کاندیدانو غواړي څو په دې بهیر کې له کمېسیون سره همکاري وکړي.

ښاغلي سادات د یو شمېر لورو هغو اندېښنو ته په پام سره چې ښایي د ولسمشرۍ د انتخاباتو د لومړنیو پایلو نتیجه بیا وځنډیږي وویل، کمېسیون تر ډېره هڅه کوي چې په ټاکلي وخت دغه نتیجه اعلان کړي.

سادات زیاته کړه: "زموږ نهایي کوښښ همدا دی چې په هغه نېټه چې د عقرب ۲۳ ده، د ولسمشرۍ د انتخاباتو ابتدایي پایلې اعلان کړو خو مونږه مشروطې بللې وې چې د درملوګ کمپنۍ پر خپل وخت معلومات د رأیې ورکونکو راکړي، د کاندیدانو ناظرین همکاري وکړي په پروسه کې، ځینې نور شرطونه هم وو چې د هغو پر اساس موږ کولی شول، اما درملوګ په پنځه ورځني ځنډ د رأیې ورکوونکو معلومات مونږ ته راکړي خو اوس هم موږ نهایي کوښښ کوو څو وتوانېږو د عقرب په ۲۳ د ولسشمرۍ د ټاکنو ابتدایي پایلي اعلان کړوو."

د افغانستان د ولسمشرۍ انتخابات چې په څو ځلې په ځنډ د میزان د میاشتې په ۶ نېټه ترسره شوې، په پام کې ده لومړنۍ نتیجه یې د راتلونکې پنجشنبې په ورځ چې د عقرب ۲۳ ده اعلان او وروستۍ نتیجه یې د قوس په ۱۵ اعلان شي.

میلي: امریکایي ځواکونه به څو کلونه نور هم افغانستان کې وي

د امریکا د وسله والو ځواکونو لوی درستیز جنرال مارک میلي

د امریکا د وسله والو ځواکونو لوی درستیز وایي، امریکایي ځواکونو به د څو نورو کلونو لپاره هم په افغانستان کې پاتې شي.

جنرال مارک میلي له امریکایي اې بي سي نیوز ټلویزیون سره په مرکه کې چې پرون خپره شوه وویل، تر اوسه په افغانستان کې هغه ماموریت چې له خاورې به یې ترهګر د امریکا پرضد د حملې لپاره کار نه اخلي، نه دی بشپړشوی.

هغه وویل، دا هغه اصلي دلیل و چې پر امریکا د ۲۰۰۱ کال د سپټمبر د یولسمې له تروریستي حملو وروسته امریکایي ځواکونه دې هېوادته واستول شول.

میلي زیاته کړه: "تر اوسه دغه ماموریت نه دی بشپړ شوی او د دې لپاره چې دغه ماموریت بریالی شي، د افغانستان حکومت او د دې هېواد امنیتي ځواکونه باید دا وړتیا ولري چې خپل کورنی امنیت په خپله تأمین کړي او له خاورې یې د هغو تروریستانو مخه ونیسي چې غواړي پر نورو هېوادونو په تېره بیا متحدوایالتونو د حملې لپاره کار واخلي."

په اوس وخت کې شااوخوا دولس زره امریکایي او د ناټو د غوڅ ماموریت په چوکاټ کې د نورو ښکېلو هېوادونو په زرګونو سرتیري دیره دي.

له افغانستانه د ټولو بهرنیو ځواکونو وتل د وسله والو طالبانو او د امریکا ترمنځ د هغو خبرو یوه عمده مسئله وه چې شااوخوا لس میاشتې یې دوام وکړ او په تېره سپټمبر میاشت کې د امریکا ولسمشر ډونالډ ټرمپ په کابل کې د طالبانو د یوې حملې په غبرګون کې چې د یوه امریکایي سرتېري په ګډون دولس تنه ووژل شول، لغوه کړې.

ملي امنیت شورا: هېڅ حکومتي پلاوی قطر ته نه دی تللی

د ملي امنیت شورا ویاند کبیر حقمل

د افغانستان د ملي امنیت شورا هغه اوازې ناسمې بولي چې وايي، د حکومت یو پلاوی له طالبانو سره د خبرو لپاره د قطر پلازمېنې دوحې ته تللی دی.

د ملي امنیت شورا ویاند کبیر حقمل په یو ویډیويي پیغام کې چې نن خپور شو، ټینګار کړی دی چې د سولې او خبرو په برخه کې د افغان حکومت په دریځ کې بدلون نه دی راغلی.

حقمل زیاته کړه: "هېڅ پلاوی له کومې ډلې سره د خبرو لپاره کوم هېواد ته نه دی استول شوی، د سولې او مذاکراتو په برخه کې د حکومت دریځ ډېر روښانه دی، مونږ وخت ناوخته په دې اړه پرمختګونه له خپل ولس سره شریکوو."

د راپورونو له مخې د یو شمېر سیاسي فعالانو په ګډون یو پلاوی له کابله دوحې ته رسېدلی، خو د دوی د سفر د هدف په اړه تر دې دمه ډېر معلومات نشته.

چارواکي: د پکتیا په زرمت کې ۹ وسله وال وژل شوي

د پکتیا ولایت چارواکي وايي چې تېره شپه ناوخته د یاد ولایت د زرمت ولسوالۍ کې د افغان ځانګړو ځواکونو په عملیاتو کې ۹ وسله وال وژل شوي او ۲ نور نیول شوي دي.

د یکشنبې د ورځې مازیګر مهال د پکتیا د والي ویاند عبدالله حسرت ازادي راډیو ته وویل چې وسله والو د زرمت لسوالۍ په کمربندي پوستو د برید لپاره تیاری نیوه چې د افغان ځواکونو تر برید لاندې راغلل.

نوموړی زیاتوي چې په دې برید کې د وسله والو اړوند یو شمېر ماینونه، وسلې او پوځي تجهیزات له منځه تللي او ځیني يې د افغان ځواکونو لاسته لوېدلي دي.

د والي ویاند وايي چې په دې عملیاتو کې افغان ځواکونو او ملکیانو ته زیان نه دی اوښتی.

تر اوسه کومې وسله والې ډلې په دې اړه رسنیو ته څه نه دي ویلي.

چارواکي: د پکتیکا په مټاخان کې شپږ وسله وال طالبان وژل شوي

د پکتیکا امنیتي چارواکي وایي چې په مټاخان ولسوالۍ کې د یوه قوماندان په ګډون شپږ وسله وال طالبان وژل شوي دي.

د پکتیکا د پولیسو ویاند شاه محمد ارین ازادي راډیو ته وویل چې د مټاخان ولسوالۍ په خواجه رم کلي کې د افغان هوایي ځواکونو په هوایي برید کې د یوه سیمه ییز قوماندان په ګډون، شپږ وسله وال طالبان وژل شوي دي.

نوموړي وویل چې په دې برید کې عامو خلکو ته کوم زیان نه دی اوښتی.

خو وسله والو طالبانو تر اوسه په دې اړه رسنیو ته څه نه دي ویلي.

چارواکي: د بغلان په نهرین کې ۹ طالبان وژل شوي

افغان ځواکونه

په شمال کې د ملي اردو چارواکي وايي چې د بغلان ولایت په نهرین ولسوالۍ کې یې ۱۴ طالبانو ته مرګ ژوبله اړولې ده.

۲۱۷ پامیر قول اردو په یوه خبرپاڼه کې وايي چې د نهرین ولسوالۍ په قرغان مزار سیمه کې په پرونیو هوايي حملو کې نهه تنه طالب وسله وال وژل شوي او پنځه نور ټپیان دي.

په بیان کې دا یادونه هم شوې چې په بمبارۍ کې د طالبانو څو سنګرونه او د سوق و ادارې یو مرکز هم ویجاړ شوي خو طالبانو تر اوسه په دې اړه څه نه دي ویلي.

چارواکي: د ارزګان ګیزاب ولسوالۍ کې ۱۱۵طالبان وژل شوي

د ارزګان یو انځور

د ارزګان امنيتي چارواکي وايي، د هغه سلګونه وسله والو طالبانو پلانونه يي ورشنډ کړه چې غوښتل يي د دغه ولایت ګیزاب ولسوالۍ ته سقوط ورکړي.

د دغه ولايت امنيې قوماندان جنرال محمد خطاب خنجري تيره ورځ وويل چې په ياده ولسوالۍ کې يې له وسله والو طالبانو سره په جګړه کې تر ۱۱۵ وسله وال طالبان وژلي او ۲۶ نور یې ټپيان کړي دي.

دي وايي: "ټول ۱۱۵ وسله وال طالبان وژل شوي، ۸ مهم قوماندان يي هم ووژل شول، لکه ملا سنګین، ملا جلیل، عربي، ملا رحمت الله ،تور زین الله، جمشدي او حمزه."

پر ګیزاب ولسوالۍ شااوخوا ۲۷ ورځې وسله والو طالبانو پرله پسې ډله ییز بریدونه وکړل.

خو وسله وال طالبان بیا د امنيتي چارواکو دغه ادعاوې نه مني او د زیات شمېر افغان سرتېرو ته د اوښتې مرګ ژوبلې ادعا یې کړې.

لوګر چارواکي: د پکتیا د ۳ قاضیانو وژونکې ډله له منځه یوړل شوه

د لوګر مرکز پل علم انځور

د لوګر امنیتي چارواکي وایي، هغه قوماندان او ډله یې له منځه وړي، چې د پنجشنبې په ورځ د پکتیا ولایت د استیناف محکمې د دریو قاضیانو او یو تن کارکوونکي په وژلو کې یې لاس درلود.

د لوګر امنیه قوماندانۍ د پولیسو ویاند شاپور احمدزي ازادي راډيو ته وویل، چې یاد څلور تنه وسله وال طالبان تېر ماښام د لوګر ولایت د محمد اغې ولسوالۍ په سلطان باغ سیمه کې د یوه هوايي برید په ترڅ کې وژل شوي.

تر اوسه وسله والو طالبانو ددغه برید د رد او تائید په اړه رسنیو ته څه ندي ویلي.

د یادونې ده، چې په دې وروستیو کې د کابل او ګردیز تر منځ د لوګر په سیمه کې د ناامنۍ دا څوومه پېښه ده، چې رامنځته کیږي.

نور راوښيه

XS
SM
MD
LG