د لاسرسۍ وړ لېنکونه

تازه خبر
شنبه ۱۴ چنګاښ ۱۳۹۹ کابل ۰۷:۳۳

افغانستان

د عاشورا ورځ؛ په مزار شریف کې چاودنې ۱ تن وژلی او ۲ نور ټپیان دي

د افغانستان په عمومي نقشه کې بلخ ولایت

د افغانستان په شمال کې د بلخ امنیتي چارواکي، په مزار شریف ښار کې د یوې چاودنې له د یو کس د وژل کېدو او ۲ نورو د ټپي کېدو خبر ورکوي.

د بلخ پولیس وایي، چاودنه د روضې په یو کیلومترۍ کې د محکمې پر سړک شوې ده.

د بلخ د پولیسو ویاند عادل‌شاه عادل وایي، چاودېدونکي توکي په یوه بایسکل کې ځای پر ځای شوي وو او ډېر مالي زیان‌یې اړولی دی.

د بلخ د حوزوي روغتون مسؤلین وايي چې تر اوسه یو مړی او ۴ ټپیان ورلېږدول شوي دي.

عیني شاهدان د دغې پېښې د مرګ ژوبلې شمېر زیات یادوي.

نن د عاشورا یا د اسلام پیغمبر د لمسي د وژل کېدو ورځ ده چې د افغانستان د نورو ښارونو ترڅنګ په مزار شریف کې هم د ویرجنو مسلمانانو له‌خوا لمانځل کېږي او ښايي د دغې چاودنې هدف هم د عاشورا ماتم کوونکي وي چې تر ډېره شیعه مسلمانان دي.

د ورځې تازه خبرونه دلته ولولئ

غزني چارواکي: د وسله والو برید کې ۲ پولیسو ته مرګ ژوبله واوښته

ارشیف

په غزني کې یو پولیس وژل شو یو ټپي دی.

‎په غزني ښار کې په وسله وال برید کې یو پولیس وژل شوي او یو بل ټپي دي.

د غزني ولایت د والي ویاند واحدالله جمعه زاده د شنبې په ورځ ازادي راډیو ته وویل: "نن تر ماسپښین وروسته ۲ تنه پولیس د غزني ښار په بزازي سیمه کې وسله والو په بې غږه توپانچه ویشتلي، چې یو یې وژل شوی او بل ټپي دی."

ښاغلی جمعه زاده زیاتوي، د پېښې په تړاو یو تن نیول شوي چې تر پوښتنو ګروېږنو لاندې دی.

په غزني کې دغه لړۍ له کلونو کلونو روانه ده.

دا په داسې حال کې ده، چې ازادي راډیو د شنبې په روځ د غزني د یو شمیر اوسېدونکو، دولتي چارواکو او د امنیتي چارو د پوهانو له خولې په یو راپور کې ویلي وو چې په غزني کې ډېری وخت افغان سرتېري د خپلو بې غوریو له امله وژل کېږي.

دوی وايي، ډیری ځله یې لیدلي چې افغان سرتېري له خلکو سره په خبرو او یا هم په موبایلونو کې بوخت وي چې وسله وال یې ترور کړي.

چارواکي: هرات کې ماین چاودنې ۳ پولیس ووژل

آرشیف، هرات کې یو شمېر پولیس

په هرات کې چارواکي وایي، ۳ پولیس د سړک غاړې یوه چاودنه کې ووژل شول.

د هرات د کهسان ولسوال امین الله هفت بلا ازادي راډیو ته وویل، دغه چاودنه نن د هرات- اسلام قلعه ترمنځ لویه لاره کې د تیرپل سیمه کې شوې ده.

تراوسه چا د دغې چاودنې مسئولیت نه دی اخیستی.

په هرات کې د ازادي راډیو خبریال وایي، وروستیو کې د اسلام قلعه- هرات ترمنځ لویه لاره کې ناامنۍ زیاتې شوي دي.

هلته نن د هرات ګمرک کارکوونکو او کمېشنکارانو د ناامنیو پر وړاندې اعتراض وکړ او ویل یې، د ناامنیو له کبله دندو ته نه شي تلی.

‎د سویل لویدیځې حوزې استازي: حکومت باید زمونږ حقونه راکړي

ارشیف

د افغانستان د سویل لویدیځې حوزې یو شمېر استازي شکایت لري چې حقونه یې نه دي ورکړل شوي.

‎د هرات، غور، فراه، نیمروز او بادغیس ولایتونو یو شمېر استازو په کابل کې د پارلمان مخې ته د تحسن خیمه درولې او وایي چې حکومت یې باید حقونه ورکړي.

‎د دغو تحسن کوونکو یو استازي عبدالخالق فراهي ازادي را‌‌‌‌‌‌ډیو ته وویل چې ولسمشر غني او عبدالله عبدالله دې په حکومت کې د دغې حوزې خلکو ته ونډه ورکړي.

‎ښاغلی فراهي وایي، دوی د هېواد ۲۵ سلنه نفوس جوړوي او د ګمرکونو د عوایدو لوړه برخه راټولوي، خو په خبره یې د حکومت له پامه غورځول شوي دي.

‎د نوموړي په خبره د دغو تحسن کوونکو شمېر لسګونو ته رسېږي چې په کې د یادو ولایتونو قومي مشران، ځوانان، ولایتي شورا استازي مدني فعالان شامل دي او له حکومته غواړي چې په حکومتي او دولتي ادارو کې دې ونډه ورکړل شي.

‎بلخوا د ولسي جرګې لومړی مرستیال محمد میرزا کټوازی وایي حکومت باید په کابینه کې د افغانستان د ټولو وګړو استازي شامل کړي.

‎د کټوازي په خبره که د دغې حوزې خلکو په لاریونونو او یا نورو مدني غبرګونونو د خپل حق غوښتنې لپاره لاس پورې کوي ورسره ولاړ دي.

روانه اوونۍ د افغان سولې په اړه درې مهمې غونډې جوړېږي

د افغانستان د بهرنیو چارو وزارت

افغان دولت روانه اوونۍ د سولې په اړه د سیمه ییزې او نړیوالې اجماع د رامنځته کېدو په هدف د درې مهمو غونډو کوربه توب کوي.

لومړنۍ غونډه د شلو سیمه ییزو هېوادونو د استازو، دویمه هغه د افغانستان، پاکستان او چین درې اړخیزه غونډه او دريیمه د هغو هېوادونو غونډه ده چې تېرو دوه لسیزو کې د افغانستان په امنیتي او اقتصادي مسایلو کې ښکيل وو.

د بهرنیو چارو وزارت ویاند ګران هېواد رسنیو ته ویلي، دغه غونډې له دوشنبې ورځې پیليږي.

هغه زیاته کړه: "د سولې د بین الافغاني خبرو له پيله مخکې افغان دولت د سیمه ییزې او نړیوالې اجماع د پیاوړتیا او ګړندیتوب لپاره دا اوونۍ د درېیو سیمه ییزو، نړیوالو او درې اړخیزو غونډو کوربه توب لري، د درې واړو لویو غونډو هدف د اجماع پیاوړتیا ده چې بین الافغاني خبرې ژر پيل او مطلوبو نتایجو ته ورسېږو."

افغان دولت او طالبانو تراوسه د بین الافغاني خبرو پيل ته نېټه نه ده ټاکلې، خو ارګ ویلي، لومړنۍ ناسته به د قطر پلازمېنې دوحه کې ترسره کېږي.

افغان دولت غواړي چې له دغو خبرو مخکې د نړیوالو او سیمه ییزو شریکانو نظرونه واوري او د هغوی ملاتړ ورجلب کړي.

د غضنفر د جنازې او فاتحې مراسمو ترسره کېدو لپاره کمېسیون وټاکل شو

غضنفر د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

افغان ولسمشر د محمد یوسف غضنفر د جنازې او فاتحې د ځانګړو دولتي مراسمو ترسره کېدو ته یو کمېسیون وټاکه.

د ارګ یوه خبرپاڼه وایي چې د کمېسیون مشري د ولسمشر د دفتر رئیس محمد شاکر کارګر ته سپارل شوې.

د کمېسیون په جوړښت کې د کورنیو چارو، دفاع ،حج او اوقافو ، اطلاعاتو او فرهنګ وزاتونه او یو شمېر نورې دولتي ادارې شاملې دي.

ښاغلی غضنفر د اقتصادي او سوداګرۍ پراختیا او د بیوزلۍ کمولو په چارو کې د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

لغمان کې د ۴ میلیونه افغانیو په ارزښت د شیدو ټولولو مرکز جوړېږي

ارشیف

د لغمان په قرغیو کې ولسوالۍ کې د ۴ میلیونه افغانیو په ارزښت د شیدو ټولولو د یو ستر مرکز د جوړولو بنسټ کېښودل شوه.

د لغمان د کرنې، اوبو لګولو او مالدارۍ ریاست رئیس انجنیر محمد جمیل خوشحال نن ازادي راډیو ته وویل، چې د شیدې ټولولو دغه مرکزونه چې د کرنې وزارت له پراختیایي بودیجې څخه جوړېږي، د جوړولو لګښت یې څلور میلیونه افغانۍ ده.

نوموړي وویل، چې په قرغیو کې به د دغه مرکز د جوړولو چارې یې د روان کال تر پایه بشپړ او ګټې اخیستنې ته به وسپارل شي.

د شیدو ټولولو دغه مرکز چې د لسګونه لېټره شیدو د ټولولو وړتیا به ولري عصري خونې، د زېرمې خونه، او ګدام به هم ولري.

د یادو مرکزونو د جوړولو موخه د مالدارۍ د تولیداتو له لارې د خوړو خوندیتوب دی.

د لغمان د کرنې او مالدارۍ ریاست چارواکي وایي، چې د شیدې ټولولو یاد مرکز په مستقیمه توګه له کلیوالو مالدارانو شیدې راټولوي او د لبنیاتو د پروسس د فابریکو په واک کې یې ورکوي، چې هم د کلیوالو مالدارانو د اقتصادي ودې لامل کېږي او هم په هېواد کې د لبنیاتو د پروسس د پراختیا په برخه کې د پام وړ مرسته کوي.

د چارواکو په خبره د دغو مرکزونو جوړېدل د لبنیاتو د پراختیا او کاروبار په برخه کې یو مثبت ګام دی.

دوی زیاتوي، چې د شیدې ټولول او شیدو ته بازارموندنه کولای شي، چې د مالدارانو اقتصاد ته وده ورکړي.

افغان او پاکستاني چارواکو د واګه بندر پر ټرانزیټي ستونزو خبرې کړي

محمد یونس مهمند

د افغانستان د سوداګرۍ او پانګونې خونې چارواکو او یو شمېر سوداګرو نن سهار له پاکستاني چارواکو سره د واګه بندرله لارې هندوستان ته د صادراتي توکو د ټرانزیټ په ستونزو خبرې وکړې.

د دغې خونې لومړي مرستیال محمد یونس مهمند ازادي راډیو ته وویل چې دغه ناسته د ویډیو کنفرانس له لارې ترسره شوه.

ښاغلي مهمند وویل، په دغه ناسته کې له پاکستان سره په ټرانزیټ کې د افغان سوداګرو د ننګونو په خاص ډول د واګه بندر له مسیر څخه هندوستان ته د افغان سوداګرو د صادراتي توکو پر وړاندې شته ستونزې او ننګونې مطرح شوې او د پاکستان د حکومت له لوري یې پر حل ټینګار وشو.

نوموړي وویل چې په یاده ناسته کې د سوداګرۍ د پراختیا پر ضرورت ټینګار وشو او د پاکستان له حکومت یې وغوښتل چې سیاسي موضوعګانې باید پر سوداګرۍ او ټرانزیټ منفي اغېز ونه کړي.

د ښاغلي مومند په خبره، په یاده ناسته پاکستاني لوري ژمنه کړې چې د افغانستان د سوداګرو د صادراتو، ټرانزیټ او وارداتو ستونزې به د مشرتابه په کچه له اړوندو پاکستان چارواکو سره شریکې کړي او بشپړ ډاډ یې ورکړی چې د واګه بندر او کراچۍ بندر ټرانزیټي ستونزې به ژر تر ژر هوارې او د واګه بندر له لارې به صادراتو ته اجازه ورکړل شي.

امنیتي مسئولین: پکتیا او پکتیکا کې ۶ طالبان وژل شوي

ارشیف

په سویل ختیځو ولایتونو پکتیا او پکتیکا کې د ماین چاودنو ۶ طالبان وژلي او یو بل یې ټپی کړی دی.

په پکتیا کې د ۲۰۳ تندر قول اردو ویاند ایمل مومند ازادي راډیو ته وویل، د پکتیا احمد خېلو او د پکتیکا خوشامند کې طالبانو ماینونه خښول چې پرې چاودېدلي دي.

هغه زیاته کړه: "بېګا شپه ناوخته وسله والو طالبانو غوښتل چې په پکتیا کې د غونځې په سیمه کې ماین ځای پر ځای کړي، خپل ماین پرې چاودنه کړې، ۴ ماین خښوونکي هملته وژل شوي دي، د پکتیکا خوشامند سیمه کې هم طالبانو باندې خپل ماین چاودلی چې ۲ تنه یې وژلي او یو بل یې ټپي کړی دی."

د پکتیا امنیه قومندانۍ وایي، اریوب ځاځیو ولسوالۍ کې هم یو طالب د خپل ماین قرباني شوی دی.

طالبانو تراوسه د دغو درې واړو پیښو په اړه څه نه دي ویلي، خو په یوه خبرپاڼه کې یې امریکایي ځواکونه له دوی سره د شوې هوکړې په مکررو سرغړونو تورن کړي دي.

طالبانو ویلي، تېره شپه افغان او امریکایي ځواکونو د لوګر بابوس سیمه کې د ملکیانو په کورونو چاپه وهلې چې د خلکو کورونه یې لوټلي او یو عام کلیوال یې وژلی دی.

په دوحه کې د امریکا او طالبانو په لاسلیک شوې هوکړه کې دواړو لورو ژمنه کړې ده چې یو پر بل به بریدونه نه کوي.

نامعلومو کسانو کاپیسا کې د ملي امنیت کارکوونکی وژلی

ارشیف

نا معلومه وسله والو په کاپیسا کې د ملي امنیت یو کارکوونکی وژلی دی.

د کاپیسا د امنیه قومندانۍ ویاند شورش شایق ازادي راډیو ته وویل، د محب الرحمان په نوم دغه کس د ډنګر خېلو سیمه کې نن سهار دندې ته روان و چې موټر سایکل سپرو ډزې پرې وکړې.

په سیمه کې د ازادي راډیو د خبریال وایي، وروستیو کې کاپیسا ولایت کې هدفي وژنې زیاتې شوي دي، خو چارواکو د هدفي وژنو د شمېر په اړه څه نه دي ویلي.

کومې ډلې د دغې پېښې مسئولیت نه دی اخیستی.

د ناټو استازی: د طالبانو حملو د سولې خبرو پر وړاندې لوی خنډ جوړ کړی

ارشیف، یو شمېر طالب جنګیالي

په افغانستان کې د ناټو مأموریت ملکي استازی له طالبانو غواړي چې تشدد پای ته ورسوي څو د سولې خبرو ته لاره اواره شي.

ستیفانو پونتې کوروو په یوه وېډیويي پیغام کې چې پرون ماښام‌یې پر ټویټر خپور کړ ویلي دي چې په افغانستان کې د نړیوالو ځواکونو له عمومي قوماندان جنرال سکات مېلر سره یوځای یې د افغانستان د سولې په اړه په بروکسل کې د ناټو له عمومي منشي او نورو چارواکو سره په کتنه کې خبرې کړې دي.

ښاغلی پونتې کوروو وايي، د طالبانو حملو د سولې د روانو خبرو پر وړاندې لوی خنډ جوړ کړی دی.

ښاغلی کوروو زیاتوي: "موږ د افغانستان د وضعیت په اړه بحث وکړ. د طالبانو روان تشدد باید پای ته ورسېږي. د دوی دا کار د منلو نه‌دی ځکه دا د سولې د خبرو د پیل پر وړاندې یوه ستونزه او خنډ جوړوي."

د افغانستان لپاره د ناټو ملکي استازی وايي چې د افغانستان د روان وضعیت په اړه‌یې د شمالي اتلانتیک شورا ته هم معلومات ورکړل. ستیفانو پونتې کوروو زیاتوي چې د ناټو مشرانو یو ځل بیا د افغانستان او د دې هېواد د دفاعي-امنیتي ځواکونو د ملاتړ ډاډ ورکړ.

خلیل‌زاد: افغانستان کې د امریکا پر پانګونو طالب مشرانو سره خبرې وشوې

ارشیف، زلمی خلیل‌زاد او طالب مشران

د افغانستان د سولې لپاره د امریکا ځانګړی استازی وايي چې طالب مشرانو او امریکايي چارواکو په افغانستان کې د سولې له ټینګښت وروسته د متحده ایالاتو د پانګونو په اړه خبرې کړې دي.

زلمي خلیل‌زاد پر ټویټر په یوه بیان کې ویلي، په دې کتنه چې په قطر کې د طالبانو د سیاسي دفتر د مشر ملا عبدالغني برادر او د امریکا د نړیوال پرمختګ د مالي شرکت «USIDF» د مشر ادام بوهلېر «Adam Boehler» په ګډون په دوحه کې وشوه په افغانستان کې د امریکا او قطر د ګډو پانګونو پر احتمال خبرې وشوې.

طالبانو هم له خپلې خوا په یوه بیان کې دا کتنه تأیید کړې او ویلي یې دي چې د دوی په خبرو کې د افغانستان د راتلونکې اقتصادي ودې، بیارغونې او پرمختګ او په دې برخه کې د ښاغلي بوهلېر پر اقتصادي پلانونو او طرحو بحث وشو.

د طالبانو په بیان کې همداراز راغلي چې په پرونۍ کتنه کې د سولې د بهیر، د بندیانو د ژر تر ژره خلاصېدو، د بین‌الافغاني خبرو د پیل او نورو مسایلو په اړه هم له امریکايي لوري سره خبرې وشوې.

محمد یوسف غضنفر په 'کووېډ-۱۹' د اخته کېدو له کبله مړ شو

محمد یوسف غضنفر

د اقتصادي پرمختګ په چارو کې د افغان ولسمشر ځانګړی استازی محمد یوسف غضنفر پرون په حق ورسېد.

ولسمشر اشرف غني تېر ماښام په یوه بیان کې ویلي چې د اقتصادي-سوداګريز پرمختګ او د بې‌وزلۍ د کمولو په چارو کې د ده ځانګړی استازی په 'کووېډ-۱۹' د اخته کېدو له کبله په حق رسېدلی دی.

ښاغلي غني د نوموړي پر مړینه خواشیني څرګنده کړې او ویلي یې دي چې یوسف غضنفر د افغانستان د ابادۍ او له بې‌وزلو خلکو سره د مرستې لپاره جدي کار پیل کړی و او مړینه‌یې د هېواد او نظام لپاره لویه ضایعه ده.

یوسف غضنفر چې په ۱۳۴۴ هـ.ل کال کې په بلخ ولایت کې زېږېدلی و، د هېواد د نامتو سوداګرو له ډلې و او د ۱۳۹۸ کال په انتخاباتو کې یې د ولسمشر غني په دوهم ځل بریا کې مهم رول ولوباوه.

یوسف غضنفر د ولسي جرګې په ۱۵مه دوره کې د بلخ د خلکو استازی هم و.

ارګ: د طالبانو څو سوه نور بندیان هم خوشې کېږي

ارشیف، د افغان حکومت له لوري یو شمېر خوشې شوي طالب زندانیان

د افغانستان جمهوري ریاست، ارګ وايي چې په نن سبا کې به د طالبانو څو سوه نور بندیان هم د حکومت له زندانونو څخه خوشې شي.

د قطر د موافقې له مخې د بین‌الافغاني خبرو له پیل مخکې افغان حکومت باید د طالبانو پنځه زره او طالبان باید د حکومت زر تنه بندیان ازاد کړي.

د افغان ولسمشر ویاند صدیق صدیقي تېر ماښام ازادي راډیو ته وویل چې د یکشنبې په ورځ به سلګونه نور طالب بندیان هم خوشې شي.

ښاغلی صدیقي زیاتوي: "د یکشنبې په ورځ به څو سوه نور طالب بندیان خوشې شي. دا اقدامات د دې لپاره کېږي چې د طالبانو او امریکا د سولې له موافقې وروسته طالبان مستقیمو خبرو ته چمتو شي."

ښاغلي صدیقي د هغو بندیانو شمېر ونه‌ښود چې د حکومت له زندانونو خوشې کېږي، خو هیله‌یې څرګنده کړه چې طالبان به له دې اقدام وروسته، د سولې د بین‌الافغاني خبرو پیل ته چمتو شي.

د امریکا او طالبانو ترمنځ د سولې له موافقې سره سم افغان حکومت تر اوسه نږدې څلور زره طالب بندیان او طالبانو د حکومت له ۵۰۰ زیات بندیان خوشې کړي دي.





د خوست پولیسو تر ۱۰ کیلو ګرامه ډېر تاریاک نیولي

ارشیف

په خوست ولايت کې پولیسو ترلس کیلوګرامه ډېر تارياک ونيول.

د کورنيو چارو وزارت له نشه يي موادو سره د مبارزې معينيت وياند اسدالله يادګاري ازادۍ راډيو ته وويل، دوولس کيلوګرامه تارياک چې په يوه سراچه موټر کې پټ کړل شوي او په پام کې وه چې له يوې ولسوالۍ څخه د خوست مرکز ته قاچاق شي، پولیسو د موټرو د تلاشۍ پر مهال ونيول.

د دې نشه يي موادو د قاچاقو په تور موټر چلوونکی نيول شوی او له نشه يي موادو سره د مبارزې عدلي او قضايي مرکز ته معرفي شوی دی.

کابل پولیسو ۴ کیلو ګرامه کرسټال نیولي

ارشیف

پولیسو په کابل ښار کې څلور کيلوګرامه کرسټال ونيول.

د کابل امنيه قوماندانۍ وياند فردوس فرامرز ازادۍ راډيو ته وويل، له نشه يي موادو سره د مبارزې ځانګړو پولیسو د سرطان د مياشتې پر ۱۱ نېټه د کابل ښار په ۱۷ مه ناحيه کې د عملياتو په نتيجه کې د استوګنې په یوه کور کې څلور کيلوګرامه کرسټال ونيول.

دوه کسه چې په دې کور کې اوسېدل هم د دې نشه يي موادو د خرڅلاو په تور نيول شوي دي.

نور راوښيه

XS
SM
MD
LG