د لاسرسۍ وړ لېنکونه

تازه خبر
پنجشنبه ۱۲ چنګاښ ۱۳۹۹ کابل ۱۲:۵۳

افغانستان

امریکا د کابل په شش درک سیمه کې د وژل شوي سرتېري هویت وښود

د امریکا دفاع وزارت د خپل هغه سرتېري هویت ښودلی چې په وروستۍ پېښه کې په افغانستان کې ووژل شو.

د یاد وزارت د جمعې د ورځې په اعلامیې کې د دغه سرتېري نوم الیس اې باریتو اورتیز ښودل شوی چې د پورتو ریکو دی.

دغه ۳۴ کلن سرتېری چې د شمالي کارولینا د فورت براګ پوځي مرکز غړی و، د پنجشنبې په ورځ د کابل په شش درک سیمه کې په ځانمرګي برید کې ووژل شو.

په هغه برید کې یو رومانیایي سرتېری او لږترلږه ۱۰ افغان ملکي وګړي هم وژل شوي دي.

د امریکا دفاع وزارت وایي چې د دې پېښې په اړه پلټنې کوي.

طالبانو د یاد برید مسؤلیت منلی دی.

دا برید داسې مهال وشو چې د امریکا او طالبانو ترمنځ د یوې موافقې د لاسلیک په هدف ډیپلوماتیکې هڅې روانې دي.

تر اوسه معلومه نه ده چې دا توافق به چېرې او څه وخت لاسلیک شي.

د ورځې تازه خبرونه دلته ولولئ

یوناما: ښکېلې خواوې دې تر بین‌الافغاني خبرو مخکې جګړه سړه کړي

د یوناما لوګو

په افغانستان کې د ملګرو ملتونو مرستندوی مأموریت یوناما د جګړې له ښکېلو خواو غوښتي چې دوحه کې تر بین‌الافغاني خبرو مخکې جګړه سړه کړي.

یوناما نن په یوه خبرپاڼه کې وویل چې د جګړې له کموالي سره به ملکیان خوندي او د سولې خبرو ته به چې د دوی په ټکو همدې میاشت کې پيلېږي، ښه فضا برابره شي.

په خبرپاڼه کې د افغانستان لپاره د ملګرو ملتونو د ځانګړې استازې دیبرا لاینز په حواله ویل شوي، دغه هېواد کې سولې ته زړورې پرېکړې او لوی کارونه شوي.

دې زیاته کړې، د دې لپاره چې سولې ته عملي ګامونه اوچت شي د جګړې دواړه خواوې باید ژر تر ژره تاوتریخوالی کم کړي.

یوناما ویلي، افغانستان کې د تاوتریخوالي وروستیو پېښو په ځانګړې توګه د مدني فعالانو وژنو اندېښمن کړي دي.

کونړ کې د هندواڼې حاصلات سږ کال ښه بازار لري

ارشیف

د کونړ چارواکي وایي، د دغه ولایت هندواڼې په ګاونډیو ولایتونو کې سږ کال ښه بازار لري چې له دې امله به بزګران په لسګونه میلیونه افغانۍ ګټه وکړي.

د کونړ د کرنې رئیس نجیب‌الله عادل د چهارشنبې په ورځ ازادي راډیو ته وویل: "سږ کال په کونړ کې پر نږدې زر جریبه ځمکه هندواڼې کرل شوې دي چې حاصلات‌یې له ۱۰ تر ۱۲ زره ټنو ته رسېږي او مجموع عواید یې ۴۰ میلیونه افغانۍ اټکل کېږي."

د چارواکو په وینا کونړ ته د کرنې نوي ماشین الات وارد شوي او په وروستیو کلونو کې بڼوالۍ ته پاملرنه زیاته شوې ده چې د نارنج، مالټې او لیمو ترڅنګ په میلیونونو افغانۍ د چهارمغزو او شفالتو پر باغونو پانګونه شوې ده.

پنټاګون: طالبانو د القاعده سیمه‌ییزې شبکې سره خپلې اړیکې ساتلي

طالبان

د امریکا متحده ایالاتو دفاع وزارت (پنټاګون) وایي، په افغانستان کې د القاعده سیمه‌ییزې شبکې له طالبانو سره خپل اړیکې ساتلې دي.

د هغې موافقې له مخې چې د فبرورۍ په ۲۹مه، د قطر په پلازمېنه دوحه کې طالبانو له امریکایانو سره وکړه، طالبانو دا منلې وه چې دوی له القاعده سره اړیکې قطع کوي.

خو د امریکا دفاع وزارت پرون په هغه راپور کې چې د کانګرس لپاره‌یې چمتو کړی دی، وویل چې د سولې تر موافقې راوروسته هم طالبانو د القاعده شبکې له دې ډلې سره چې د هند د نیمې وچې لپاره کار کوي، اړیکې ساتلې دي.

ملګرو ملتونو هم تېره میاشت په یوه راپور کې ویلي و چې طالبان لاهم له القاعده سره نږدې اړیکې لري، طالبانو د ملګرو ملتونو راپور رد کړ، خو د امریکا دفاع وزارت د راپور په اړه‌یې تر اوسه څه نه‌دي ویلي.

د لوګر امنیتي مسؤلینو ته د ولسمشر غني امر

افغان ولسمشر او ورسره پلاوی په لوګر کې د غونډې پر مهال

افغان ولسمشر محمد اشرف غني امنیتي مسؤلینو ته امر وکړ چې په لوګر ولایت کې د امنیت ټينګولو او حملو پر شا تمبولو په خاطر دې ژر تر ژره اقدامات وکړي.

دا خبره نن د ارګ څخه په خپره شوې اعلامیه کې راغلې ده.

ولسمشر غني نن د لوګر د امنیتي وضعیت ارزولو په هدف دې ولایت ته سفر کړی و.

د لوګر والي اجمل شاه‌پور له ولسمشر څخه د لوګر ولایت د امنیتي او دفاعي ځواکونو د لا زیات تجهیز، د ځانګړو عملیاتو ترسره کېدو، هوایي بریدونو، د اردو او پولیسو او همداراز د ولسي پاڅونونو د پرسونل د لا زیات اکمال غوښتنه وکړه.

له ولسمشر سره د جمهوري ریاست لومړی مرستیال امرالله صالح، د ملي امنیت سلاکار حمدالله محب، د ملي دفاع وزارت لوی درستیز بسم‌الله وزیري او یو شمېر نور لوړپوړي چارواکي هم تللي وو.

ولسمشر داسې مهال لوګر ته سفر کړی چې په دې وروستیو کې د لوګر ولایت امنیتي وضعیت خراب شوی.

لوګر ولایت د پلازمېنې کابل ترڅنګ موقعیت لري چې تر ډېره په‌کې وسله‌وال طالبان فعال دي.

هلمند کې روانه اوونۍ ۳۸ ملکیان وژل شوي او ۳۷ نور ټپيان دي

د هلمند سنګین ولسوالۍ کې وژل شوی کس

په هلمند کې په روانه اوونۍ کې ۳۸ ملکيان وژل شوي او ۳۷ نور ټپیان شوي دي.

په یاد ولایت کې د بشر حقونو کمېسیون ساحوي دفتر د اړیکو او معلوماتو مسؤل مقیم علیزي ازادي راډیو ته وویل چې یاده مرګ‌ژوبله تر ډېره د جګړو له امله اوښتې ده.

ښاغلي علیزي وویل د جګړې دواړه لوري د ملکیانو ژوند او مال ته هېڅ ډول پاملرنه نه‌کوي.

په هلمند کې تر ټولو ډېر ملکي تلفات په سنګین ولسوالۍ کې ثبت شوي. د تېرې دوشنبې په ورځ د عامو خلکو په یوه مېله بازار کې د غبرګو چاودنو په نتیجه کې ۳۰ ملکیان ووژل شول او ۲۵ نور ټپیان شول. حکومت او طالبانو پر یو بل د دې پېښې مسؤلیت واچاوه.

دغه‌راز تېره اوونۍ د هلمند په واشیر ولسوالۍ کې د ماین په یوه چاودنه کې ۸ ملکي وګړي ووژل شول او ۴ نور ټپیان شول.

حکومت هغه مهال رسنیو ته ویلي وو چې وسله‌والو طالبانو دا ماین ځای پر ځای کړی وو.

په هلمند کې د بشري حقونو د ځايي څانګې مسؤلینو د جګړې پر دواړو غاړو غږ کړی چې د جګړې پر مهال باید د ملکيانو ژوند ته پام وکړي.

تندر قول اردو: پکتیکا کې ۱۳ وسله‌وال طالبان ووژل شول

ارشیف، پکتیکا کې افغان سرتېری

له امنیتي ځواکونو سره په نښتو کې ۱۳ تنه وسله‌وال طالبان وژل شوي.

د ۲۰۳ تندر قول اردو ویاند ایمل مومند ازادي راډیو ته وویل چې تېره شپه ناوخته وسله‌والو طالبانو د پکتيکا ولايت د ګومل ولسوالۍ اړوند سيمه کې د سروبي ولسوالۍ د تور تنګي او د یحیی‌خېلو ولسوالۍ د اته خونې په سیمو کې د افغان ځواکونو پر پوستو بریدونه وکړل چې د ده په وینا په ځوابي ډزو کې ۱۳ وسله‌وال طالبان وژل شوي او ۳ نور ټپيان شوي دي.

دی وایي، په دې نښتو کې یو افغان سرتېری وژل شوی او دوه نور ټپیان شوي دي.

تر اوسه وسله‌والو طالبانو په دې اړه څه نه‌دي ویلي.

ارغنديوال او دیبرا لاینز د ۲۰۲۰ پراختیايي کنفرانس په اړه خبرې وکړې

د افغانستان مالیې سرپرست وزیر او د ملګرو ملتونو استازې لیدنه

د مالیې سرپرست وزیر د افغانستان لپاره د ملګرو ملتونو له ځانګړې استازې دیبرا لاینز سره د افغانستان لپاره د ۲۰۲۰ کال پراختیایي کنفرانس په اړه خبرې وکړې.

د مالیې وزارت ویاند شمعروز مسجدي نن ازادي راډیو ته وویل چې په دې لیدنه کې دواړو لورو د افغانستان لپاره په جنوا کې د ۲۰۲۰ پراختیایي کنفرانس، د لوړپوړي دولتي پلاوي ناستې ترسره کېدو ته د حکومت په چمتووالي او د سام ناستې لپاره د افغانستان حکومت د کلیدي سندونو وړاندې کولو په تړاو بحث وکړ.

د نوموړي په وینا، د مالیې وزارت سرپرست عبدالهادي ارغندیوال وویل چې د افغانستان حکومت د سام ناستې بریالي ترسره کېدو لپاره خپل چمتووالی نیولی دی او په دې برخه کې ناستې په منظم ډول روانې دي.

ښاغلی مسجدي وايي چې د مشرتابه په کچه هره اوونۍ دوه ناستې ترسره کېږي او زموږ هڅې روانې دي، څو د سام ناستې له ترسره کېدو مخکې ژر تر ژره د اړتیا وړ سندونه نهایي او له تمویلوونکو سره‌یې شریک کړي.

نوموړي وویل هڅه دا ده څو په یاده ناسته کې د ۲۰۲۰ پراختیایي ناستې په څرنګوالي چې ټاکل شوې ده د جنوا په ښار کې د افغانستان او فنلند په ګډ کوربه‌توب ترسره شي خبرې او بحثونه وشي.

د شاغلي مسجدي په وینا، د افغانستان لپاره د ملګرو ملتونو ځانګړې استازې وویل چې د افغانستان تمویلوونکي هم له افغانستان څخه تمه لري، څو د حکومت ستراتېژیک سندونه نهایي او د دوی په واک کې ورکړل شي او له هغه سره سم د نړیوالې ټولنې د ژمنو په تړاو پرېکړه وشي.

په هلمند کې د کب او هېلیو د روزنې فارمونه مخ پر ودې دي

ارشیف

د هلمند د کرنې، اوبو لګولو او مالدارۍ ریاست وایي چې په دې ولایت کې د کب او هېلیو د روزنې فارمونه ورځ تر بلې مخ په پراخېدو دي او په دې برخه کې د خلکو لېوالتیا ډېرېږي.

د هلمند د کرنې او مالدارۍ رئیس زلمی الکو نن ازادي راډیو ته وویل چې د هلمند د کرنې ریاست له‌خوا تېر کال د دې ولایت په څېړنیز فارم کې د کب روزنې دوه ستر فارمونه ورغول شول چې دمګړۍ په‌کې نږدې اووه زره کبان روزل کېږي.

نوموړي وویل چې په هلمند ولایت کې د کبانو د صنعت د پراختیا په پار یې ډېرې هلې ځلې کړي او یو شمېر کسانو ته‌یې په دې برخه کې د روزنې زمینه هم برابره کړې ده.

د هلمند د کرنې او مالدارۍ رئیس دغه‌شان وویل چې په دې ولایت کې د کب روزنې د فارمونو د تنظیم او انسجام په پار یې د کب روزنې یوه ټولنه هم جوړه کړې ده.

د نوموړي په خبره چې د هلمند په څېړنیز فارم کې د کب روزنې د فارم سره جوخت د کورنیو هېلیو یو نوی فارم چې د کب روزنې لپاره‌یې شتون اغېزناک دی هم جوړ کړی دی.

د هلمند د کرنې او مالدارۍ رئیس د کرنې ریاست وايي، پام کې لري چې د دې ولایت د کب روزنې برخه پیاوړې کړي، ترڅو یاد ولایت د کبانو په برخه کې صادراتي حالت ځان ته غوره کړي.

د چارواکو په خبره د دغو فارمونو د جوړولو موخه دا ده چې هلمندیان د کب روزنې فارمونو جوړولو ته وهڅېږي او له یادو فارمونو څخه د زده‌کړې ترڅنګ د کبانو اصلاح شوي نسلونه هم ترلاسه کړي.

د هلمند د کرنې او مالدارۍ د رئیس په وینا د کبانو د فارمونو جوړولو لړۍ همداسې چټکه روانه وي، نو په نږدې راتلونکي کې به هلمند د کبانو په يو لوى توليدوونکي ولايت بدل شي.

په افغانستان کې د کب روزنې ډېر شمېر فارمونه په کندهار، هلمند، ارزګان، ننګرهار، لغمان، بلخ او نیمروز ولایتونو کې دي.

'هرات کې د پولیسو او طالبانو نښته کې د پولیسو ۸ سرتېري ټپیان شوي'

ارشیف

یوې سرچینې ویلي، د هرات په پښتون زرغون ولسوالۍ کې نن سهار د پولیسو او وسله‌والو طالبانو ترمنځ نښته کې یو ملکي وګړی وژل شوی او د پولیسو اته سرتېري ټپیان شوي دي.

د پښتون زرغون ولسوالۍ يوې دولتي سرچینې چې نه‌یې غوښتل نوم‌یې خپور شي، ازادي راډيو ته وویل چې په ټپي شویو کې یوه ښځه او یو کوچنی هم شامل دي.

سرچینه زیاتوي، نښته هغه مهال پیل شوه چې ۴۰ هاموې موټر له هرات ښار څخه د پښتون زرغون ولسوالۍ د کلیو پر لور د اکمالاتو د انتقال لپاره روان وو او د ولسوالۍ په ۴۰ کیلومترۍ کې وسله‌والو طالبانو ورباندې حمله وکړه.

د سرچينې د معلوماتو له مخې د دې ولسوالۍ ډېری برخه د طالبانو په کنټرول کې ده او هغوی هڅه کوي چې د خپل نفوذ ساحه پراخه کړي.

وسله‌والو طالبانو تر اوسه په دې اړه څه نه‌دي ویلي.

ولسمشر غني د امنیتي وضعیت د ارزونې په هدف لوګر ته تللی

ارشیف، افغان ولسمشر محمد اشرف غني

افغان ولسمشر محمد اشرف غني د لوګر د امنیتي وضعیت د ارزونې په هدف هغه ولایت ته تللی.

د لوګر د والي ویاند دیدار لونګ ازادي راډیو ته وویل چې ښاغلی غني به د لوګر له سیمه‌ییزو چارواکو سره له لیدنې وروسته یوې ولسي غونډې ته هم وینا وکړي.

ولسمشر داسې مهال لوګر ته سفر کوي چې په دې وروستیو کې د دغه ولایت امنیتي وضعیت خراب شوی.

د راپورونو له مخې وسله‌وال طالبان د لوګر-کابل عمومي سړک ته راوځي او په رڼا ورځ تلاشي کوي چې دې چارې د سیمې اوسېدونکي اندېښمن کړي.

لوګر ولایت د پلازمېنې کابل ګاونډ ولایت دی چې تر ډېره په‌کې وسله‌وال طالبان فعال دي.

خلیل‌زاد د منځنۍ اسیا هېوادونو له بهرنیو چارو وزیرانو سره خبرې کړي

د افغانستان سولې لپاره د امریکا خاص استازی زلمی خلیل‌زاد

د افغانستان سولې لپاره د امریکا خاص استازي زلمي خلیل‌زاد د منځنۍ اسیا هېوادونو د بهرنیو چارو له وزیرانو سره د افغانستان د سولې او ثبات پر موضوع خبرې کړي.

ښاغلي خلیل‌زاد نن په خپله ټویټرپاڼه لیکلي چې د ازبکستان په پلازمېنه تاشکند کې یې د ازبکستان، تاجکستان، ترکمنستان، قزاقستان او قرغزستان د بهرنیو چارو له وزیرانو سره په غونډه کې د سولې د پروسې په تازه مسئلو او په دې پروسه کې د منځنۍ اسیا له‌خوا په لوبول شوي او لوبېدونکي حیاتي رول بحث وکړ.

هغه زیاته کړې چې یو باثباته او سوکاله افغانستان د سیمې د سولې او د منځنۍ اسیا د سوکالۍ لپاره مهمه دی.

د خلیل‌زاد په خبره داسې منځنۍ اسیا چې په‌کې خپلواکه دولتونه په ګډه له افغانستان سره کار وکړي څو له جَنوبي اسیا سره وصل شي هغه څه چې هم د سیمې او هم د امریکا په ګټه ده.

د افغانستان د سولې لپاره د امریکا خاص استازي خپل تازه سفر څو ورځې مخکې پیل کړی او ویل کېږي چې له منځنۍ اسیا وروسته اسلام‌اباد یا دوحې ته ځي او له افغان چارواکو سره به هم د وېډیو کنفرانس له لارې خبرې کوي.

د امریکا استخباراتو ټرمپ ته پر روسیې د تورونو په اړه معلومات ورکړل

د امریکا ولسمشر ډونالد ټرمپ

سپینې ماڼۍ ویلي چې د امریکا استخباراتو ولسمشر ډونالد ټرمپ ته پر روسیه د تازه لګېدلو تورونو په اړه معلومات ورکړي دي.

نیویارک ټايمز ورځپاڼې د جون په ۲۶مه، په یوه راپور کې وویل چې روسیې په افغانستان کې د امریکايي ځواکونو د وژلو لپاره طالبانو ته جایزې ورکړې دي.

تر دې راپور دوه ورځې وروسته واشنګټن پوسټ وویل چې داسې شواهد شته چې د روسیې د انعام لپاره پر امریکايي ځواکونو حمله شوې او ځيني کسان وژل شوي دي.

د سپینې ماڼۍ ویاندې، کایلي مک ایناني پرون (د جون په ۳۰مه) وویل چې استخباراتو ولسمشر ډونالد ټرمپ ته د دې مسئلې په اړه وضاحت ورکړی دی.

د امریکا د استخباراتو د ملي ادارې مشر، د سپینې ماڼۍ د چارو د ادارې مشر او د ملي امنیت مشر پرون په دې اړه د کانګرس جمهوري غوښتونکو غړو ته هم معلومات ورکړل.

خو په کانګرس کې د دواړو ګوندونو استازو د امریکا له استخباراتي ادارو غوښتنه کړې چې ټولو ته دې په عمومي غونډه کې معلومات ورکړي او باید دا پرېکړه وشي چې د روسیې لپاره به د دې کار عواقب څه وي.

د روسیې حکومت او طالبانو د واشنګټن پوسټ او نیویارک ټایمز معلومات رد کړي دي.

'پر ملا برادر د پومپیو فشار': طالبان دې موافقه کې ټول شرایط پر ځای کړي

د امریکا د بهرنیو چارو وزیر، مایک پومپیو

د امریکا د بهرنیو چارو وزیر، مایک پومپیو پرون (د جون په ۳۰مه) پر ټویټر ولیکل چې د طالبانو له مشر مرکچي سره غږېدلی او پر هغه‌یې فشار راوستی چې پر امریکایانو د حملو د بندولو په ګډون ټول هغه شرایط چې له امریکا سره په موافقه کې یې منلي، پر ځای کړي.

د پومپیو له ټویټه څرګندېږي چې دا خبرې د دوشنبې په ورځ شوې دي.

مايک پومپیو په دې اړه نور جزئیات نه‌دي ورکړي.

په قطر کې د وسله‌والو طالبانو د سیاسي دفتر ویاند سهیل شاهین پرون ازادي راډیو ته وویل چې پومپیو له ملا عبدالغني برادر سره په وېډیو کنفرانس کې په افغانستان کې پر امنیت او په امریکا کې د بندي بشر نورزي پر برخلیک خبرې کړې دي.

شاهین پرته له دې چې نور جزئیات ورکړي ویلي چې برادر د بشر نورزي او په ګوانتانامو کې د ټولو افغان بندیانو د خوشې کېدو غوښتنه کړې ده.

بشر نورزی په ۲۰۰۸ میلادي کال کې امریکا ته د مخدره موادو د قاچاق، له طالبانو او القاعده سره د ارتباط په جرم په عمري قید محکوم شوی دی.

دفاع وزارت: په فاریاب کې د وسله‌والو طالبانو ۲ مشران وژل شوي

په فاریاب ولایت کې د افغان ځواکونو عملیات

د افغانستان دفاع وزارت ویلي چې په فاریاب کې د وسله‌والو طالبانو دوه مشران وژل شوي دي.

د وزارت مرستیال ویاند فواد امان پرون (د جون په ۳۰مه) ازادي راډیو ته وویل چې وسله‌والو طالبانو د دوشنبې په ماښام د امنیتي ځواکونو پر پوستو حمله کړې وه.

فواد امان وویل: "وسله‌والو طالبانو په قیصار کې پر امنیتي ځواکونو حمله کړې وه. په دې پېښه کې د طالبانو دوه قوماندانان قاري عبدالله او قاري عابد ووژل شوو او یو وسله‌وال زخمي شوی دی."

په قیصار کې د حملې په اړه وسله‌والو طالبانو لا څه نه‌دي ویلي.

د افغانستان حکومت ادعا کوي چې وسله‌والو طالبانو په وروستیو کې حملو ته زور ورکړی دی.

د ناټو استازی: د سولې هڅو کې د ټولو اړخونو ګډون پایه‌داره سوله راولي

په افغانستان کې د ناټو ملکي استازی سټېفانو پونته کورفو

په افغانستان کې د ناټو ملکي استازي سټېفانو پونته کورفو ویلي چې د سولې لپاره په روانو هڅو کې باید د ښځو، د قومي او مذهبي لږکیو او د جګړې د قربانیانو غږ واورېدل شي.

هغه پرون (د جون په ۳۰مه) پر ټویټر ولیکل چې د افغانستان د بشري حقونو خپلواک کمېسیون له پخوانۍ مشرې، سیما سمر سره‌یې په دې اړه ټیلیفوني خبرې کړې دي.

د ناټو ملکي استازي لیکلي چې د سولې لپاره په هڅو کې د ټولو اړخونو ګډون به پایه‌داره سوله راولي.

په افغانستان کې د ښځو د حقونو یو شمېر مدافعانې او د مدني ټولنې یو شمېر فعالانې شکایت کوي چې د سولې لپاره په روانو هڅو کې د ښځو برخه کمزورې ده.

د افغانستان حکومت له طالبانو سره د سولې د مذاکرو په ۲۱ کسیز پلاوي کې ۵ ښځې شاملې کړې دي.

نور راوښيه

XS
SM
MD
LG