د لاسرسۍ وړ لېنکونه

تازه خبر
دوشنبه ۲۹ مرغومی ۱۳۹۹ کابل ۱۱:۳۲

نړۍ

روحاني: ټرمپ سره نه‌ګورم، څو پر تهران ټول بندیزونه لیرې نه‌کړي

د ایران ولسمشر حسن روحاني نن د اګسټ په ۲۷مه د یوې ټلوېزیوني وینا پر مهال.

د ایران حکومت ویلي چې له امریکا سره به تر هغه وخته چې پر تهران خپل ټول بندیزونه لیرې کوي، ونه‌ګوري.

تر دې وړاندې د امریکا د متحده ایالاتو ولسمشر ډونالد ټرمپ ویلي و چې په مناسبو شرایطو کې له روحاني سره خبرو ته تیار دی.

د ایران ولسمشر حسن روحاني نن د اګسټ په ۲۷مه، په ټلوېزیوني وینا کې وویل چې هېواد یې تیار دی چې خبرې وکړي، خو لومړی باید امریکا خپل ټول غیر قانوني، غیر عادلانه او غیر مناسب بندیزونه لیرې کړي.

روحاني ټینګار کړی چې هېواد یې هېڅکله هم اټمي وسلې نه‌دي غوښتي او که چېرې د ایران ګټې خوندي نه‌شي، له هغو مسئولیتونو به اوږه سپکه کړي چې په ۲۰۱۵ میلادي کال کې د اټمي موافقې پر اساس‌یې لري.

د ورځې تازه خبرونه دلته ولولئ

د ډونالد ټرمپ پلویانو بیا د اعتراض څو وړې غونډې وکړې

ارشیف، د ټرمپ د پلویانو اعتراض

په واشنګټن کې د سختو امنیتي تدابیرو په ترڅ کې پرون (د جنورۍ په ۱۷مه) د ډونالد ټرمپ پلویانو د اعتراض څو وړې غونډې وکړې، خو د تاوتریخوالي کوم راپور ورنه‌کړل شو.

یوه چارواکي وویل، په دغې ورځ (هېڅ ډول پېښه) نه‌ده رامنځته شوې.

واشنګټن کې وروسته تر هغه وضعیت کړکېچن شوی چې د جنورۍ په شپږمه د ټرمپ پارېدلو پلویانو د کانګرس پر ودانۍ یرغل ورووړ.

ټرمپ ادعا کوي چې د ټاکنو پایله غلا شوې او دی ګټونکی دی، خو دا ادعا یې څو ځله د امریکا په محکمو کې رد شوې ده.

په واشنګټن او د لسګونه نورو ایالتونو په مرکزونو کې د ملي ګارد سرتېري چې د مظاهرې د مخنیوي په وسایلو سمبال دي، ځای پر ځای شوي دي.

دغه ځواکونه هڅه کوي چې د جنورۍ په ۲۰مه د ټاکل شوي ولسمشر جو بایډن له لوړې مخکې د نارامۍ هر ډول هڅه شنډه کړي.

امریکا د روسیې د سیاسي مخالف الکسي ناوالني نیول وغندل

نیول شوی الکسي ناوالني

د امریکا متحده ایالاتو د روسیې د سیاسي مخالف الکسي ناوالني نیول غندلي دي.

د امریکا د بهرنیو چارو وزیر مایک پومپیو په یوه بیان کې د ناوالني د "بې‌قید او شرطه" خوشې کېدو غوښتنه کړې ده.

پومپیو د ناوالني د نیولو په اړه د امریکا اندېښنه په ډاګه کړې او دا ګام‌یې د روسیې له‌خوا د ناوالني او نورو هغو څېرو د غږونو چوپول بللي چې د روسیې منتقدین دي.

د امریکا د منتخب ولسمشر جو بایډن ادارې هم چې د چهارشنبې په ورځ کار پیلوي، د ناوالني د خوشې کېدو غوښتنه کړې.

۴۴ کلن ناوالني چې له تېرې اګسټ میاشتې راهیسې په جرمني کې تر درملنې لاندې و، پرون مسکو ته ستون شو، خو هلته له هوایي ډګره پولیسو ونیوه.

لبنان له فایزر کمپنۍ سره د کرونا ضد واکسین د رانیولو موافقه وکړه

د فایزر شرکت کرونا ضد واکسین

لبنان پرون یکشنبه له فایزر کمپنۍ سره د ۲ ملیونه او یو لک دوزه واکسین د رانیولو موافقه نهايي کړه.

لبنان د کرونا ضد دغه واکسین په داسې حال کې رانیسي چې په کرونا ویروس د اخته کسانو د شمېر زیاتېدو یې د روغتیایي څارنې سیستم اغېزمن کړی دی.

د اسوشېټډ پرس خبري اژانس په حواله، د واکسینونو دا بستې به د فبرورۍ له لومړیو لبنان ته ورسول شي.

د لبنان حکومت ویلي د فایزر کمپنۍ د واکسین ۲،۷ ملیونه نور دوزونه به د ملګرو ملتونو د ملاتړ یوه پروګرام له لارې دغه هېواد ته ورسېږي.

دا لا معلومه نه‌ده چې دا دوهمه بسته به کله لبنان ته ورسېږي، خو د حکومت د اعلامیې له مخې په دې اړه موافقه په اکټوبر میاشت کې لاسلیک شوې وه.

په لبنان کې تر اوسه نږدې دوه نیم لکه کسان په کرونا ویروس اخته شوي او د مړو شمېر په‌کې ۱،۹۰۰ ته نږدې شوی دی.

د روسیې د اپوزېسیون مشر مسکو ته له رسېدو سره سم ونيول شو

مسکو کې نیول شوی د روسیې اپوزېسیون مشر الکسي ناوالني

د روسیې د اپوزېسیون مشر الکسي ناوالني له جرمني پرون ناوخته مسکو ته له رسېدو سره سم ونيول شو.

دی له څو میاشتو په جرمني کې د مسمومېدو له کبله چې روسي چارواکي په‌کې دخیل بلل شوي وو، تداوي کېده.

په پلازمېنه مسکو کې پولیسو په لسګونه هغه کسان هم ونیول چې په یونوکوفو (Vnukovo) هوايي ډګر کې د الکسي ناوالني راتګ ته انتظار وو.

په نیول شویو کسانو کې د ناوالني د اداري فساد ضد بنسټ مدافع وکیل لیوبوف سوبول، د پروژو مدیر روسلان شاویدینوف او ځیني ژورنالېستان شامل دي.

پرون ناوخته د بلوا ضد ګڼ پولیس تر سترګو کېدل چې د راروانو مسافرو ترمینل ته‌یې د ناوالني د هغو پلویانو مخه نیوله چې شعار یې ورکاوه: فاشیستان!

ناوالني په داسې حال کې مسکو ته روان شو چې چارواکو یې د نیولو او د کلونو لپاره زندان ته د اچولو خبرداری ورکړی و.

جو بایډن د کرونا ویروس د لا خپرېدو مخنیوي لپاره بېړني اقدامات کوي

د امریکا منتخب ولسمشر جو بایډن

د امریکا متحده ایالاتو منتخب ولسمشر جو بایډن چې راروانه چهارشنبه لوړه کوي، په پام کې لري د کرونا ویروس د لا خپرېدو د مخنیوي لپاره بېړني اقدامات وکړي.

د ښاغلي بایډن د دفتر رئیس رونالډ کلېن دا خبره پرون خپلو لوړ رتبه همکارانو ته په یوه یادښت کې کړې ده.

په دغو اقداماتو کې د محصلانو د قرضو د ورکړې لپاره د وقفې تمدید او له هغو کسانو سره مرسته شامله ده چې د کرونا وبا پر مهال‌یې زیات کړاو ګاللی دی.

ټاکلی ولسمشر جو بایډن په پام کې لري چې د خپلې کاري دورې په لومړیو ۱۰۰ ورځو کې د امریکا ۱۰۰ ملیونه وګړو ته د کرونا ضد واکسین ورکړي، خو دا هغه هدف دی چې د کلېن په خبره ورته رسېدل ګران برېښي.

جو بایډن د ټاکنیزو کمپاینونو پر مهال د کرونا وبا په وړاندې د مبارزې لپاره د جدي او عملي اقداماتو ژمنه کړې وه.

د امریکا په متحده ایالاتو کې په کرونا ویروس د اخته کسانو شمېر ۲۴ ملیونه ته نږدې شوی دی.

د 'پي.ټي.اېم'مخکښه ثنا اعجاز: له بلوچستانه په زوره و ایستل شوم

د پښتون ژغورنې غورځنګ 'PTM'  مخکښه ثنا اعجاز

د پښتون ژغورنې غورځنګ 'PTM' مخکښه ثنا اعجاز وايي‌ چې د بلوچستان حکومت په زوره له دې ایالته ایستلې ده.

ثنا اعجاز د جنورۍ پر ۱۷مه د ازادې اروپا مشال راډيو ته وويل چې دا بلوچستان د پښتون مېشتې ولسوالۍ ژوب ته د یوه کتابتون پرانېستې ته ورغلې، خو پولیسو پرېنه ښوده.

نوموړې وویل: "دلته دومره ډير امنيتي کسان راغلي چې پاکستان کې ښايي په يو ترهګر پسې هم شايد ورنه شي. پولیسو او ټولو امنیتي کسانو راته ویلي چې یوه دقیقه خبرې به هم نه کوې او موږ یې را روان کړو او وايي چې د بلوچستان له حدودو به وځئ."

يو پولیس چارواکي چې رسنيو سره یې د خبرو اجازه نه درلوده، مشال راډيو ته د نوم نه خپرولو په شرط وويل چې د قانون له مخې د پښتون ژغورنې غورځنګ پر ځينو مشرانو د ورتګ بندېز دی، نو ځکه هغوی په بلوچستان کې فعاليت نه شي کولای.

مشال راډيو ته رسېدلي ويډيوز ښيي چې ثنا اعجاز د ليویز د ګڼو امنيتي اهلکارانو په منځ کې په موټر کې کښېنول کېږي.

ثنا اعجاز څو ورځې مخکې د لنډې مودې لپاره پولیسو بندي کړې هم وه.

ترکمنستان د هلیکوپټرې د سقوط پېښه ۳ پوله ساتي وژل شوي

ارشیف، عکس تئزیني بڼه لري

د ترکمنستان درې پوله ساتي ځواکونه د یوې هیليکوپټرې د سقوط په پېښه کې وژل شوي دي.

د پېښې عیني شاهدانو ویلي هليکوپټره د برېښنا له لوړ ولتاژ یوې ستنې سره ولګېده او په ځمکه ولوېده.

پېښه د پلازمېنې عشق آباد ۶۰ کیلومترۍ کې د یاشلیک کلي کې چې له ایران سره پولې ته نږدې پروت دی، څو ورځې مخکې شوې او خبر ځکه په ځنډ خپور شوی چې د ترکمنستان چارواکي اکثر د پوځیانو د مرګ ژوبلو اعلان نه کوي.

یوه پوله ساتي افسر د نوم د نه ښودلو په شرط د ازادې اروپا راډیو ترکمن سرویس ته ویلي چې پېښه کې د پیلوټ په شمول درې واړه پوله ساتي ځواکونه ځای پر ځای وژل شوي.

پېښه د خرابې او لړجنې هوا په خاطر شوې ده.

واشنګټن ډي سي کې امنیتي تدابیر زیات شوي

واشنګټن ډي سي کې د امریکا د ملي ګارد سرتېري

د امریکا متحده ایالاتو په پلازمېنه واشنګټن ډي سي کې امنیتي تدابیر زیات شوي دي.

دا تدابیر وروسته له دې ډ‌ېر شول چې تېره اوونۍ د ډونالد ټرمپ پلویان په زوره د کانګرس ودانۍ ته ننوتل او له بلې خوا د نوي ولسمشر جو بایډن د لوړې مراسم په رانږدې کېدو دي.

د جو بایډن د لوړې د مراسمو په درشل کې چې ټاکل شوې ده د روانې اوونۍ په ۲۰مه ترسره شي، د امریکا پوځ وايي چې په واشنګټن ښار کې به د ملي ګارډ ۲۵ زره ځواکونه ځای پر ځای کړي.

په همدې حال کې یوه چارواکي له سي بي اېس شبکې سره په مرکه کې تأیید کړه چې د کورني امنیت وزارت په یوه راپور کې ویلي چې کورني سختدریځي د چهارشنبې په ورځ د جو بایډن د لوړې د مراسمو لپاره تر ټولو لوی ګواښ دی.

په همدې حال کې ویل شوي چې جو بایډن د لوړې مراسمو ته په رېلګاډي کې واشنګټن ته خپل سفر لغوه کړی دی.

بوسنیا هرزګوېنا کې د پناه غوښتونکو پر وضعیت د اروپايي اتحادیې اندېښنه

بوسنیا هرزګوېنا کې پناه غوښتونکي

د اروپايي اتحادیې د بهرنۍ پالېسۍ ویاند د بوسنیا هرزګوېنا په کمپونو کې د پناه غوښتونکو پر وضعیت اندېښنه ښکاره کړه، ویې‌ویل چې دا حالت د منلو نه‌دی او باید د پناه غوښتونکو ستونزه هواره شي.

د بوسنیا په کمپونو کې زرګونه پناه غوښتونکي مېشت دي، خو د تېر کال د ډسمبر په ۲۲مه په لیپا کمپ کې له اور لګېدو وروسته ۹۰۰ پناه غوښتونکي په منفي صفر درجه هوا او تر باران او واورو لاندې بې‌سرپناه پاتې دي.

د لیپا کمپ له سوځېدو وروسته بوسنیايي چارواکو ویلي چې پناه غوښتونکي به بل ځای ته ولېږدوي، خو د سیمې د اوسېدونکو د مخالفت له کبله دا پرېکړه لغوه شوه او حکومت د پناه غوښتونکو د مېشتولو لپاره پوځي خېمې ودرولې.

کابو ۹ زره پناه غوښتونکو اروپا ته د رسېدو په هیله په بوسنیا کې اړولي او اکثره د پاکستان، افغانستان او سوریې وګړي دي.

اروپايي اتحادیې د بوسنیا حکومت ته له پناه غوښتونکو سره د مرستې لپاره ۱۰۷ ملیونه ډالره ورکړي او ویلي یې دي چې د بوسنیا حکومت باید پر خپلو هغو ژمنو ودرېږي چې بشري حقونو، د اروپايي اتحادیې قوانینو او د پناه غوښتونکو د ستونزو حل کولو ته‌یې لري.

فرانسه: تهران او واشنګټن دې اټمي تړون ته بېرته راوګرځي

ارشیف، د امریکا او ایران بیرغونه

د فرانسې د بهرنیو چارو وزیر وايي، د ایران له لوري د اټمي تړون بیا بیا سرغړونې دا ضروري کړې چې تهران او واشنګټن بېرته دې موافقې ته راوګرځي.

د فرانسې د بهرنیو چارو وزیر ژان ایو لودریان دا څرګندونې د ډونالد ټرمپ د ولسمشرۍ د دورې له پای ته رسېدو څو ورځې مخکې په هغه مرکه کې وکړې چې پرون (شنبه) خپره شوه.

ایران په وروستیو کې وویل چې په فردو کې یې تر ۲۰ فیصدو پورې د یورانیمو تولید بیا پیل کړی او پرمختللي سنتریفیوژنونه‌یې نصب کړي دي.

ژان ایو لودریان ویلي، باید دا کار نه‌وی شوی ځکه ښيي چې ایران د اټمي وسلې د ترلاسه کولو هڅه کوي.

په نړۍ کې د ګلتوني ګازونو تولید کم شوی

ارشیف

د انرژۍ نړیوالې ادارې په یوه راپور کې ویلي، په نړۍ کې د ګلتوني ګازونو تولید کم شوی دی.

د کرونا ویروس له خپرېدو او د نړۍ په ګڼو سیمو کې پر تګ راتګ له بندیزونو او ټولبندیو وروسته، له فوسیلي سونګ موادو لکه تېلو څخه استفاده خورا کمه شوې او په نتیجه کې یې د ۲۰۱۹ کال په پرتله په ۲۰۲۰ کې ګلتوني ګازونه په سلو کې کابو ۷ کم شوي دي.

د انرژۍ نړیوالې ادارې دې حد ته د ګلتوني ګازونو کمېدل یو تاریخي ریکارډ بللی دی.

ګلتوني ګازونه د ځمکې د تودېدا یو تر ټولو مهم سبب بلل کېږي.

جو بایډن، شرمن او نیولنډ د امریکا بهرنیو چارو وزارت لوړو پوستونو ته ونومول

د ایران د ۲۰۱۵ کال اټمي تړون کې ستره مرکچي ویندي شرمن

د امریکا منتخب ولسمشر جو بایډن د ایران د ۲۰۱۵ کال اټمي تړون کې خپله ستره مرکچي ویندي شرمن په بهرنیو چارو وزارت کې د دوهم لوړپوړي کس په توګه وګمارله.

مېرمن شرمن د بارک اوباما د ولسمشرۍ پر مهال په سیاسي چارو کې د بهرنیو چارو وزارت مرستیاله وه او له ایران سره‌یې په اټمي تړون کې د خپل هېواد د مرکچیانو مشري کوله.

بایډن دغه‌راز تجربه کاره او متقاعده ډیپلوماته ویکتوریا نیولنډ د بهرنیو چارو وزارت د درېیم لوړپوړي پوست لپاره ټاکلې ده.

نیولنډ هغه مېرمن ده چې ۲۰۱۴ کال کې یې په اوکراین کې د خلکو له هغو اعتراضونو ملاتړ کاوه چې پایله کې یې پخوانی ولسمشر ویکتور یانکوېچ له دندې لیرې شو.

جو بایډن انتوني بلېنکن د بهرنیو چارو د وزیر په توګه ټاکلی او دوه ورځې وروسته‌یې د سنا د بهرنیو اړیکو کمېټه د تأییدۍ په اړه غونډه جوړوي.

که نوموړی د بهرنیو چارو وزیر شي، شرمن او نیولنډ به‌یې تر مدیریت لاندې کار کوي.

د سیاسي مطالعاتو د مکتبونو په اړه د روسیې پر اقدام د اروپايي شورا اندېښنه

د اروپایي شورا سکرتر جنراله ماریجا پیچینووېچ

د اروپا د شورا رئیسې د روسیې پر هغه اقدام جدي اندېښنه وښوده چې د دغې شورا د سیاسي مطالعاتو د مکتبونو ټولنه‌یې د نامطلوبه سازمانونو په ډله کې شامله کړه.

د اروپا شورا د جنورۍ په ۱۴مه یوه لیک کې چې یوه کاپي یې د ازادې اروپا/ ازادي راډیو ته رارسېدلې، له مسکو نه غوښتنه وکړه چې د دغې پرېکړې د دلایلو په اړه وضاحت ورکړي.

لیک د اروپایي شورا د سکرتر جنرالې ماریجا پیچینووېچ (Marija Pejcinovic) له‌خوا لیکل شوی او نوموړې د مسکو دغه پرېکړه د نه‌منلو وړ یاده کړې ده.

د روسیې لویې څارنوالۍ تېره ډسمبر میاشت کې د اروپایي شورا د سیاسي مطالعاتو مکتبونه چې د فرانسې په ستراتسبورګ ښار کې موقعیت لري، نامطلوبه وبلل او له عدلیې وزارته‌یې وغوښتل چې هغه په تور لېست کې شامل کړي.

په روسیه کې د ۲۰۱۵ کال د یوه قانون له مخې، د دغه هېواد لویه څارنوالي کولای شي هر هغه بنسټ نامطلوبه اعلان کړي چې د دغه هېواد امنیت ته ګواښوونکی وبلل شي.

د بشري حقونو ملاتړو بنسټونو بیا روسیه تورنه کړې چې د دغه قانون له لارې غواړي د روسیې ضد غږونه چوپ کړي او د مدني فعالیتونو مخه ونیسي.

عربستان په قطر کې خپل سفارت بېرته پرانېزي

د سعودي عربستان د بهرنیو چارو وزیر فيصل بن فرحان

د سعودی عربستان د بهرنیو چارو وزیر، فیصل بن فرحان وايي، تمه کېږي هېواد یې په راروانو ورځو کې په قطر کې خپل سفارت بېرته پرانېزي.

په ۲۰۱۷م کال کې د سعودي عربستان تر څنګ متحده عرب اماراتو، بحرین او مصر د ټروریزم د ملاتړ په تور له قطر سره خپلې ډیپلوماتیکې اړیکې وځنډولې.

قطر چې دغه ډول تورونه رد کړي- ویلي وو، دا اقدام یې د ملي حاکمیت د کمزوري کولو لپاره شوی دی.

سعودي عربستان ۱۱ ورځې مخکې ویلي وو، د امریکا د متحدو ایالتونو په ملاتړ یې د عربي ټولنې د پیاوړتیا او د اختلافاتو د حل لپاره قطر ته یو هیئت لېږلی دی.

سعودي عربستان او قطر اوس د یو بل په وړاندې خپل هوايي حریمونه پرانیستي او ځینې الوتنې له سره پیل شوې دي.

سپاه پاسداران انقلاب د بالستیک توغندیو د توغولو وروستۍ مرحله عملي کړه

آرشیف

د ایران سپاه پاسداران انقلاب نن د جنګي کښتیو-ضد بالستیک توغندیو د توغولو لپاره د خپلو پوځي تمریناتو دویمه او وروستۍ مرحله عملي کړه.

د ایران دولتي نن راپور ورکړی، چې دغه توغندي د هند په سمندر کې پر یوه فرضي هدف ویشتل شوي دي.

په ویډیويي تصاویرو کې ښکاري دوه توغندي پر یوه هدف چې دولتي ټلویزیون د «دښمن فرضي جنګي کښتۍ» بللي، د یو زر او اته سوه کیلومتره په فاصله کې ویشتل شوي دي.

د ایران د دغو پوځي تمریناتو لومړۍ مرحله پرون عملي شوه او دا تمرینات په داسې حال کې کېږي چې د تهران د لانجمن اټومي پروګرام له کبله پر ایران د امریکا فشارونه زیات شوي دي.

نور راوښيه

XS
SM
MD
LG