د لاسرسي لېنکونه

تازه خبر
جمعه ۱ لیندۍ ۱۳۹۸ کابل ۰۱:۰۳

نړۍ

د ملګرو ملتونو امنیت شورا د امریکا د کروز ازمویلو په اړه غونډه کوي

ارشیف، د ملګرو ملتونو د امنیت شورا غونډه. د ۲۰۱۹ کال د اګسټ ۲۰مه.

د ملګرو ملتونو امنیت شورا نن (پنجشنبه ) د چین او روسیې په غوښتنه یوه پرانیستې غونډه کوي چې په‌کې به د امریکا د متحده ایالاتونو له‌خوا د یو کروز توغندي په ازمایښتي توغولو بحث وشي. امریکا دا ازموینه د اګسټ په ۱۹مه نېټه وکړه.

د روېټرز خبري اژانس وايي، د روسیې په غوښتنه کې راغلي چې دا غونډه "د امریکايي چارواکو د هغو بیانونو په اړه ده چې وايي پلان لري د منځني واټن ویشتونکو توغنديو ته پراختیا ورکړي او ځای پر ځای یې کړي."

په دې اړه د امریکا او روسیې ترمنځ د درې لسیزو زوړ تړون د دې میاشتې په لومړیو کې مات شو. د امریکا د اګسټ په دوهمه نېټه په رسمي توګه د منځني واټن ویشتونکو اټمي وسلو له هغه تړون ووته چې په ۱۹۸۷ م کال کې لاسلیک شوی و.

دا تړون له ځمکې څخه په ویشتل کېدونکو هغو کروز او بالیستیک توغندیو چې له ۵۰۰ کیلومترو تر پنځه نیم زره کیلو مترو پورې واټن ویشتلی شي، بندیز لګوي.

په ملګرو ملتونو کې د روسیې د سفیر مرستیال دمیتري پولینسکي ویلي "بېره له دې کبله ده چې ډېر ګواښونه شته. موږ د وسلو د یوې نوې سیالۍ په درشل کې یوو او غواړو چې پر دې موضوع بحث وکړو."

د امریکا د دفاع وزارت د دې اوونۍ پیل کې وویل، یو داسې توغندی یې توغولی چې په ۵۰۰ کیلومتره واټن کې هدف ویشتلی شي.

د ورځې تازه خبرونه دلته ولولئ

د امریکا د بهرنیو چارو وزیر له ایرانیانو غوښتي د معترضانو د ځپلو ویډیوګانې ورواستوي

د امریکا د بهرنیو چارو وزیر ناوخته پر ټویټر لیکلي، ما له ایراني معترضانو غوښتي چې موږ ته خپلې ویډیوګانې او هغه معلومات واستوي چې د معترضانو په وړاندې د رژیم ځپونکي اقدامات مستندوي. 

د امریکا د بهرنیو چارو وزیر مایک پامپیو له ایرانیانو غوښتي چې په دې هېواد کې د معترضانو په وړاندې د حکومت ځپونکي اقدامات دې د ویډیو ګانو او نورو اسنادو په وراستولو مستند کړي او دا چې واشنګټن به ددې "ځورونو" په اړه اقدام وکړي.

د امریکا د بهرنیو چارو وزیر ناوخته پر ټویټر لیکلي، ما له ایراني معترضانو غوښتي چې موږ ته خپلې ویډیوګانې او هغه معلومات واستوي چې د معترضانو په وړاندې د رژیم ځپونکي اقدامات مستندوي.

د نوموړې په وینا امریکا به دا ډول ځورونې په ډاګه کړی او وغندي. د پامپیو دا ټویټ په انګلیسي او فارسي دواړو خپور شوی دی.

د هغو معترضانو په وړاندې چې د تېلو په ځېره کېدو او د بیو پر لوړېدو د اعتراضونو لپاره راوتلي، د ایران د رژیم د ځپونکو اقداماتو له کبله دا هېواد د نړیوالې ټولنې له خوا له زیاتېدونکو انتقادونو او غندنو سره مخ دی.

د بشري حقونو لپاره د ملګرو ملتونو د عالي کمېشنر دفتر د هغو راپورونو یادونه کړې چې وايي د معترضانو په وړاندې د ایران په ځپوونکو اقداماتو کې "ښايي لسګونه کسانو وژل شوي او ډېر نور ټپیان شوې وي."

د بخښنې نړیوال سازمان ویلي، ګومان کیږي چې لږ تر لږه ۱۰۶ اعتراض کوونکي وژل شوي دي.

ټرمپ په افغانستان کې د دوو وژل شویو امریکايي سرتېرو جسدونو ته درناوی وکړ

د امریکا ولسمشر ډونالد ټرمپ پرون ډیلاور ایالت کې د ډوور پوځي هوايي اډې ته ورغی، تر څو د هغو دوو امریکايي سرتېرو جسدونو ته درناوی وکړي چې په دې اونۍ کې په افغانستان کې د هلیکوپټر د نسکورېدو په پېښه کې وژل شوي دي.

ولسمشر ټرمپ چې د وژل شویو سرتېرو له کورنیو سره یې وکتل، په دې هوايي اډې کې ورسره لومړۍ میرمن ملانیا ټرمپ، د امریکا د لوی درستیزانو د کمېټې مشر مارک میلې او د ملي امنیت سلاکار رابرټ اوبراین ملاتیا کوله.

پنتاګون د پنجشنبې په ورځ په لوګر ولایت کې ددې دوو امریکایي وژل شویو سرتېرو د هویت په اړه ویلي چې ډېوېډ کناډل د تکزاس ایالت او کریک پوچيګامي د هاوايي ایالت اوسیدونکي وو.

د امریکا پوځ وايي، دا دواړه د چهارشنبې په ورځ لوګر ولایت کې د هلیکوپټرې د نسکورېدو پېښه کې وژل شوي.

پوځ وايي، ددې پېښې په اړه څېړنې کوي خو په وینا یې لومړني راپورونه داسې نه ښيي چې ګوندې دا هلیکوپټر دې د دښمن په ډزو نسکور شوی وي.

طالبانو ادعا کړې چې امریکايي الوتکه دوی غورځولې او په کې سپاره سرتېري یې وژلي دي.

سربیا د روسي جاسوسانو له فعالیتونو پرده پورته کړه

پر یوټیوب یوه ویډیو خپره شوه چې په پلازمېنه بلګراد کې د روسیې د سفارت پوځي اتشه یوه سړي ته د پیسو د ورکولو په حال کې ښيي.

د سربیا ولسمشر وايي، د دې هېواد استخباراتي ادارې د روسي جاسوسانو او د سربیا د اوسنیو او پخوانیو پوځیانو ترمنځ له استخباراتي عملیاتو پرده پورته کړې ده.

الکساندر ووجیچ پرون (نومبر ۲۱مه) د ملي امنیت شورا له غونډې وروسته په یوه خبري کنفرانس کې په دې اړه څرګندونې وکړې.

دا غونډه پر یوټیوب د هغې ویډیو له خپرېدو وروسته راوبلل شوه چې په پلازمېنه بلګراد کې د روسیې د سفارت پوځي اتشه یوه سړي ته د پیسو د ورکولو په حال کې ښيي.

ولسمشر ووجیچ وویل، هغه سړی چې پیسې اخلي د سربیا د پوځ متقاعد افسر و، خو ده یې نوم یوازې "ز.ک" یاد کړ.

د هغه په خبره، دې کسانو په ډسمبر میاشت کې سره کتلي و. هغه ونه ویل چې دا ویډیو چا جوړه کړې ده خو دومره یې وویل چې سربي اجنټانو اخیستې.

ولسمشر ووجیچ زیاته کړه چې مشکوک روسی جاسوس له درېیو نورو کسانو سره هم لس ځلې تماسونه نیولي او هغو ته یې درې ځلې پیسې هم ورکړي.

هغه زیاته کړه چې پر دې سربیره د روسیې د استخباراتي ادارو د هغو غړو فعالیتونه هم مستند شوي چې د سربیا له نهو پوځیانو سره تماسونه لري.

ولسمشر ووجیچ دا ادعا هم وکړه چې د ځینو لویدیځو هېوادونو پوځي استازي هم په سربیا کې د جاسوسۍ فعالیتونه کوي.

اوکراین کې پولیسو د داعش ډلې غړیتوب په ګومان یو روسی نیولی

د اوکراین پولیس

د اوکراین پولیسو د اسلامي دولت یا داعش ډلې په غړیتوب یو مشکوک سړی نیولی دی.

دغه دېرش کلن سړی د اوکراین د پلازمېنې کییف په لویدیځ کې د ژیتومیر په سیمه کې د عملیاتو پرمهال نیول شوی دی.

د اوکراین پولیسو پرون پنجشنبې (نومبر ۲۱مه) په یوه بیان کې وویل، تورن چې د روسیې وګړی دی او په اوکراین کې پټ شوی و د انټرپول یا نړیوالو پولیسو د غوښتنې په اساس نیول شوی دی.

په راپورونو کې د پولیسو له قوله ویل شوي دي چې وايي نوموړی له داعش سره د یوې اړوندې ډلې مشر ګڼل کېږي.

ایران کې محکمې ۶ دولتي کارکوونکي د جاسوسۍ په تور په زندان محکوم کړل

د تهران انقلابي محکمې نن د نومبر په ۲۱مه، د چاپيریال ساتنې د یوې سیمه ییزې ادارې ۶ غړي له شپږو تر لسو کلونو زندان محکوم کړي دي.

هغوی د جاسوسۍ په تور چې په نړیواله کچه يې بحثونه پارولي او انتقادونه پرې شوي، محاکمه او په زندان محکوم شوي دي.

دا خبر د هغوی کورنیو او مدني فعالانو خپور کړی دی.

د ایران د بشري حقونو ځانګړي مرکز چې له نیویارکه فعالیت کوي، ویلي چې هغوی تقریباً ۲۲ میاشتې په دې تور په توقیف کې تېرې کړې چې د امریکا له دولت سره چې د ایران رژیم یې دښمن ګڼي، په تماس کې وو.

د ایران د قضائیه قوې یوه ویاند غلام حسین اسماعیلي ویلي چې د چاپېریال ساتنې محکوم شوي فعالان د استیناف غوښتنه کولای شي.

"اوکراین د ټرمپ او زېلېنسکي د خبرو په ورځ د امریکا د مرستې پر بندېدو اندېښنه ښوولې وه"

د روسیې او اوکراین لپاره د امریکا د دفاع وزارت مرستیاله لاورا کوپر

اوکراین، له دغه هېواد سره د امریکا د ۳۹۰ میلیون ډالره پوځي مرستې پر بندیدو د جولای په ۲۵ نېټه اندېښنه ښودلې وه، هماغه ورځ چې ولسمشر ټرمپ له خپل اوکرایني سیال ولادیمیر زېلېنسکي سره جنجال پاروونکې ټیلفونې خبرې کړي دي.

دا خبره د روسیې او اوکراین لپاره د امریکا د دفاع وزارت مرستیالې لاورا کوپر د چهارشنبې په ورځ (نومبر ۲۰مه) د امریکا د کانګرس غړیو ته چې د ولسمشر ټرمپ د استیضاح په اړه څېړنې کوي وکړه.

هغې زیاته کړه، دا خپله اوکراین ته د امریکا د مالي مرستو د ځنډېدو په اړه د هغو ایمیلونو له لارې خبره شوه چې ددې همکارانو د اوکراین له سفارت څخه تر لاسه کړي وو.

میرمن کوپر د ډیموکراتانو په مشرۍ د امریکا د استازو مجلس هغه هیئت ته چې له اوکراین سره د ولسمشر ټرمپ چلند څیړي، وویل: "د اوکراین د سفارت کارکونکو پوښتلي وو، له اوکراین سره امنیتي مرستو په اړه څه روان دي."

دا ایمیلونه په ورستیو کې هغې ته ښودل شوي دي او تېره میاشت یې د تړلو دروازو تر شا له غونډې وروسته د کانګرس غړو ته ورکړي دي.

د استازو د مجلس د بهرنیو اړیکو کمیټې په همدې ورځ د لاورا له همکارانو هم د امنیتي مرستو په اړه پوښتلي دي.

خو له دې سره د امریکا د دفاع وزارت دې مرستیالې ویلي، نه شي ویلی چې په کییف کې اوکرایني چارواکي به هم ددې مرستو په بندېدو خبر وو کنه، خو وايي، د همکارانو نظر یې دا دی چې "په غالب ګومان هغوی هم خبر وو".

روسیې یو پوځي افسر اوکراین ته د جاسوسۍ په تور نیولی

ارشیف

د روسیې د امنیتي خدمتونو اداره وايي، په روستوف سیمه کې یې یو پوځي افسر پرون اوکراین ته د جاسوسۍ په تور نیولی دی.

که چېرې پر دغه پوځي افسر د جاسوسۍ تورونه ثابت شي، له ۱۲ تر ۲۰ کلونو بند باندې محکومیږي.

د روسیې د امنیتي خدمتونو د اداري په وینا د پولیسو دغه افسر د دندې پر مهال د روسي ځواکونو په اړه داسې پټ معلومات راټول کړي وو چې کولی شي له هېواد څخه بهر د روسي دفاعي وړتیا ته زیان ورسوي.

د نیول شوي پوځي افسر نوم روسلان ارتیکوف بلل شوی چې په ۱۹۹۱ میلادي کال کې زیږیدلی دی. د اوکراین حکومت تر اوسه په دې اړه تبصره نه ده کړې.

بیني ګانتز پر ټاکلي وخت د اسرائیل نوي حکومت پر جوړولو بریالی نه شو

بیني ګاتز په اسرائیل کې د سپین او ابي ګوند مشر دی.

په اسرائیل کې د صدراعظم بنیامین نتانیاهو اساسي رقیب بیني ګانتز بریالی نه شو چې له مهالوېش سره سم، یو ائتلافي حکومت جوړ کړي.

پر دې اساس، داسې ګڼل کېږي چې په اسرائیل کې یو وار بیا د پارلماني ټاکنو امکان شته دی.

بیني ګاتز په اسرائیل کې د سپین او ابي ګوند مشر دی.

د هغه ګوند پرون ماښام د نومبر په ۲۰مه، اعلان وکړ چې د نوي حکومت په تشکیل نه دي بریالي شوي.

په اسرائيل کې پارلماني انتخابات د سپټمبر په میاشت کې وشول. د نتانیاهو ګوند هم د نوي حکومت په جوړولو کې پاتې راغلی و. دواړو لویو ګوندونو د ستر ائتلاف په کولو هم موافقه نه ده کړې.

که چېرې هېڅ موافقه ونه شي، باید په مارچ کې له سره انتخابات وشي.

د پاکستان د بشري حقونو کمېسیون د بشري حقونو د یوه فعال پر برخلیک اندېښنه ښوولې

پاکستان کې د بشري حقونو فعال ادریس خټک تېره اونۍ صوابۍ ته پر لاره له خپل موټرچلوونکي سره یوځای بې درکه شو.

په پاکستان کې د بشري حقونو کمېسیون د بشري حقونو د فعال ادریس خټک د برخلیک په اړه اندېښنه څرګنده کړې ده.

د ادریس خټک کورنۍ ویلي چې د هغه په اړه هېڅ معلومات نه لري.

نوموړی تېره اونۍ صوابۍ ته په لاره کې له خپل موټرچلوونکي سره یوځاي بې درکه شو.

د پاکستان د بشري حقونو کمېسون پرون، د نومبر په ۲۰مه وویل، دا ښايي په پاکستان کې د روانو جبري بې درکیو یوه بله پېښه وي.

ادریس خټک د نوښار (نوشهره) اوسېدونکی دی او په پاکستان کې یې د بشري حقونو د څارنې نړیوالې ادارې او د عفوې نړیوال سازمان ته کار کړی و.

د پاکستان حکومت تر اوسه پر دې پېښه هېڅ خبره نه ده کړې.

ټرمپ هیله ښوولې د بندیانو تبادله د افغانستان سوله کې پرمختګونو ته لاره هواره کړي

د امریکا ولسمشر ډونالد ټرمپ

د امریکا ولسمشر ډونالد ټرمپ هېله څرګنده کړې چې په په افغانستان کې د بندیانو وروستۍ تبادله به د سولې په برخه کې د اوربند په څېر ښو پرمختګونو ته لاره هواره کړي.

ولسمشر ټرمپ پرون (نومبر ۲۰مه) پر خپل ټویټر ولیکل، د طالبانو له برمتې څخه د کیون کینګ او ټیموټي ویکس د خوشې کېدو په خوښۍ کې د دوی له کورنیو سره شریک دی.

په افغانستان کې د امریکايي پوهنتون دا دوه استادان چې یو امریکایی او بل استرالیایی دی، وروسته له هغې طالبانو امریکايي لوري ته وسپارل چې د افغانستان حکومت له بګرام زندان څخه د انس حقاني په شمول درې مهم طالب بندیان خوشې کړل.

ولسمشر ټرمپ پر خپل ټویټر د ولسمشر اشرف غني مننه کړې او د هغه ملاتړ یې شجاعانه بللی. ټرمپ زیاته کړې "په دې هېله چې دا ګام د سولې په برخه کې د اوربند په څېر نورو ښو پرمختګونو ته لاره پرانیزې، څو دا اوږده جګړه پای ته ورسیږي."

طالبانو او د افغانستان حکومت دواړو ویلي چې دواړو لورو ته د یو شمېر بندیانو وروستي خوشې کېدل به د سولې پر بهیر مثبت اغیز ولري.

د نړۍ د کاتولیکانو مشر پاپ فرانسس تایلنډ ته رسېدلی

تمه ده چې نوموړی به په جاپان کې هم تم شي.

د نړۍ د کاتولیکانو مشر پاپ فرانسس تایلنډ ته ورسېد.

دی به آسیا ته په دې یو اونیز سفر کې په تایلنډ کې د کاتولیکانو له یوه کوچني اقلیت سره وګوري.

تمه ده چې نوموړی به په جاپان کې هم تم شي.

بنکاک ته له رسېدو سره پاپ فرانسس له عیسوۍ مبلغې آنا روزا سیفوري سره چې له څه باندي پنځوسو کلونو راهیسې په تایلنډ کې اوسیږي، ولیدل.

کاتولیک عیسویان د تایلنډ د نفوس یوه سلنه جوړوي.

اسرائیل په سوریه کې د سوریې او ایران پوځي اهداف ویشتلي

ارشیف

د اسرائیل پوځ وایې په سوریې کې ېې لسګونه ایراني او سوریه یې پوځي اهداف ویشتلي دي.

دوی وایې په دې سره یې د اسرائیل تر واک لاندې جولان پر لوړو د راکټي بریدونو غچ واخیست.

د اسرائیل د پوځ په خبره د دې هېواد جنګي جټ الوتکو نن د نومبر ۲۰ د ایران د سپاه پاسداران قدس اړوند اهداف چې له ځمکې هوا ویشتونکي توغندي، د وسلو زیرمې او نورې پوځي اډې پکي شاملې دي، ویشتلي.

د جګړو د حالاتو یوه څارونکې ډله وایي، په دې هوایې بریدونو کې ۱۱ پوځیان وژل شوي دي چې ۷ کسه یې د سوریې نه دي.

د سوریې دولتي رسنیو وړاندې راپور ورکړ چې پلازمینې دمشق ته څېرمه د اسرائیل په بریدونو کې دوه ملکي وګړي وژل شوي او یو شمېر نور ټپیان دي.

ایراني چارواکو تر اوسه په دې اړه څه نه دي ویلي خو روسیې د اسرائیلو دا بریدونه یو ناسم اقدام بللی دی.

اسرائیلو په تکرار په سوریې کې د ایران ګټي په نښه کړي او غواړي په دې ډول په سیمه کې د ایران د دایمي پوځي حضور مخه ونیسي.

د پاکستان حکومت سیاسي مخالفینو د لارو د بندېدا پای وغوښت

د پاکستان د جمعیت علمای اسلام ګوند د مشر مولانا فضل الرحمن په مشرۍ دغه حکومت ضد اعتراضونه تیره میاشت د آزادۍ مارش په نوم پیل شول.

د پاکستان د حکومت مخالفو مشرانو پر خپلو پلویانو غږ کړی چې د هغه هیواد په لویو ښارونو کې د لارو بندول ختم کړي.

دوی وایې دا اعتراضونه عام خلک زیانمنوي.

دغو مخالفو مشرانو د نومبر پر ۱۹مه اسلام آباد کې یوې خبري غونډې ته دا هم وویل چې د صدراعظم عمران خان تر استعفی پورې به خپلو نورو فشارونو ته دوام ورکوي.

دوی ادعا کوي چې خان د ۲۰۱۸ میلادي کال په ټاکنو کې په درغلیو د پاکستان د پوځ له خوا واک ته رسیدلی دی.

د پاکستان د جمعیت علمای اسلام ګوند د مشر مولانا فضل الرحمن په مشرۍ دغه حکومت ضد اعتراضونه تیره میاشت د آزادۍ مارش په نوم پیل شول.

لسګونه زره لاریون کوونکو له کراچۍ څخه اعتراضونه پیل کړل او د اکټوبر پر یو دېرشمه پلازمېنه اسلام آباد ته ورسېدل.

دوی په پلازمینه کې پر عمده لویو لارو تحصن پیل کړ او د نویو تروخت مخکي ټاکنو غوښتنه یې کوله.

د نومبر پر ۱۳مه مولانا فضل الرحمن په پلازمېنه کې دوه اوونیز تحصن ختم او خپلو پلویانو ته یې وویل چې په ټول هېواد کې لویې لارې وتړي.

په پاکستان کې پوځ ډېر کلونه واکمن پاتې شوی او د دولتونو په جوړولو کې لوی لاس لري.

په تېرو ۷۰ کلونو کې هیڅ پاکستانی صدراعظم نه دی توانېدلی خپله کاري موده بشپړه کړي.

پنټاګون: د ایران د توغندیو زیرمې په منځني ختیځ کې تر ټولو زیاتې دي

د ایران د توغندیو زیرمې په منځني ختیځ کې بې سارې ان د اسراییل له زیرمو هم زیاتې دي.

د ایران د توغندیو زیرمې په منځني ختیځ کې بې سارې ان د اسراییل له زیرمو هم زیاتې دي.

دا خبره د امریکا د دفاعي استخباراتو ادارې په نوي راپور کې چې پرون سې شنبې یې خپور کړی، کړې ده.

پنټاګون په دغه څیړنیز راپور کې ویلي چې په تېرو څلویښتو کلونو کې ایران د توغندیو پراخ پروګرام، د توغندیو اندازه او د پرمختللو توغندیو د ځواک پراختیا ته له دې سره سره دوام ورکړی چې د توغندیو د پراختیا د مخنیوي لپاره له لسیزو راهیسې هڅه کیږي.

پر ایران له لسیزې راهیسې د لګول شویو بندیزونو سره سره تهران د لرې واټن ویشتونکو توغندیو په ګډون دغو وسلو ته چې د توغندیو واټن یې تر۲۰۰۰ کیلومټره واټن چې اسرائیل هم په نښه کولی شي، ویشتلی شي.

په راپورکې ویل شوي چې دوه کاله مخکې ایران د ۱۲۵۰ کیلومټرو واټن ویشتونکی توغندی وښود چې مختلف سروکې لیږدولی شي او داسې ښکاري چې په تولید کې یې د شمالي کوریا له تکنالوجۍ کاراخیستل شوی دی.

په راپور کې دا هم ویل شوي چې دې ته په پام سره چې ایران پرمختللی هوایي ځواک نه لري، د لرې واټن ویشتونکو توغندیو ته یې ځکه پراختیا ورکړې چې په سیمه کې د خپلو دښمنانو په تېره بیا د متحدو ایالتونو، اسرائیل او سعودي عربستان د ممکنه برید مخه ونیسي.

امریکايي متخصص ته د اوکراين د دفاع وزارت وړاندیز شوی

ډګرمن الکساندر ويندمن وايي، د اوکراين د ملي امنيت ادارې مشر ورته د دفاع وزارت د څوکۍ پېشنهاد کړی.

د اوکراين په چارو کې د امريکا د متحدو ايالتونو د ملي امنيت شورا يو متخصص وايي، چې درې ځله د اوکراين د دفاع وزارت د څوکۍ پېشنهاد ورته شوى دى.

ډګر جنرال الکساندر ويندمن د استازو جرګې ته چې ډيموکراتان په کې اکثريت دي دا خبره وکړه.

دا استماعيه غونډه د ولسمشر ټرمپ د استيضاح په تړاو رابلل شوې وه.

جمهوريت غوښتونکي ښايي هڅه وکړي چې د دغو څرګندونو اهمیت کم کړي.

الکساندر ويندمن چې په اوکراين کې زېږېدلى، استماعيه غونډې ته وويل، کله چې د ولسمشر ولادمير زيلينسکي د لوړې په مراسمو کې د ګډون لپاره له امريکايي پلاوي سره کييف ته تللى و، د اوکراين د ملي امنيت ادارې مشر ورته د دفاع وزارت د څوکۍ پېشنهاد وکړ.

هغه زیاته کړه: "له ما غوښتنه وشوه چې پر دې غور وکړم چې ايا غواړم د اوکراين د دفاع وزير شم؟ خو ما ونه منله، دا ډېره خندوونکې ده، که د امريکا د پوځ يو ټيټ رتبه چارواکي ته د داسې مهمې څوکۍ پېشنهاد وشي."

الکساندر ويندمن د ولسمشر د استيضاح په استماعيه غونډه کې مهم شاهد ګڼل کېږي.

د استيضاح په تړاو په استماعيه غونډو کې پر دې خبرې کېږي، چې ايا ولسمشر ډونالډ ټرمپ اوکراين ته د پوځي مرستې په بدل کې له اوکراين څخه د پخواني مرستيال ولسمشر جو بايډن په اړه د څېړنو په غوښتنې سره له خپل موقف څخه ناوړه استفاده کړې ده که څنګه؟

جوبايډن د امريکا د ٢٠٢٠میلادي کال د ولسمشرۍ په ټاکنو کې د ډيموکرات ګوند یو کانديد دى.

اوکراين: کييف تيار دى يو "معقول جوړجاړى" ومني

د اوکراين د بهرنيو چارو وزير وادېم پريستايکو

د اوکراين د بهرنيو چارو وزير وايي کييف تيار دى د راتلونکې مياشتې په غونډه کې يو "معقول جوړجاړى" ومني.

په پام کې ده، د اوکراين په ختيځ کې د پنځه کلنې خونړۍ شخړې په اړه د نورماندې د پروسې د مذاکرو پر مهال خبرې وشي.

د اوکراين د بهرنيو چارو وزير وادېم پريستايکو پرون په کييف کې په يوه کنفرانس کې چې د جرمني د بهرنيو چارو وزير هايکو ماس هم په کې حاضر و، خبريالانو ته وويل: "موږ د نورماندې غونډې ته په پرانيستو نظرياتو او پرانيستي ذهن سره ورځو، تيار يو چې يو معقول جوړجاړى ومنو او خپل هېواد ته داسې پرمختګ راولو چې اوکراينيان يې له اوږدې مودې راهيسې تمه لري.“

په پام کې د اوکراين، روسيې، جرمني او فرانسې رهبران د اوکراين په ختيځ کې د روانې شخړې د حل لپاره راتلونکې مياشت سره وګوري.

دوى هڅه کوي په دونباس او لوهانسک سيمو کې د اوکراين د دولتي ځواکونو او روس پلوه بېلتون غوښتونکو ترمنځ روانه شخړه پاى ته ورسوي.

له ٢٠١٤میلادي کال راهيسې په دې شخړه کې تر ١٣زرو ډېر کسان وژل شوي دي.

مسکو کې محکمې د یوه امریکايي وګړي د توقیف موده غځولې

پاول وېلن په روسیه کې د جاسوسۍ په تور نیول شوی دی او که مجرم وپېژندل شي، په روسیه کې په لږترلږه ۲۰ کاله بند محکومېدلائ شي.

د مسکو یوې ښاري محکمې نن د نومبر په ۱۹مه تائید کړه چې د پاول وېلن په نوم د یوه امریکايي وګړي تر محاکمې د مخکې توقیف موده یې تمدید کړې.

پاول وېلن په روسیه کې د جاسوسۍ په تور نیول شوی دی او که مجرم وپېژندل شي، په روسیه کې په لږترلږه ۲۰ کاله بند محکومېدلائ شي.

هغه په ۲۰۱۸ میلادي کال کې د مسکو په یوه هوټل کې ونیول شو او تور ورپورې شو چې معتبر پټ معلومات یې ترلاسه کړي دي.

د هغه تر محاکمې مخکې د توقیف موده د ډسمبر تر ۲۹مې تمدید شوې ده.

د امریکا د سمندري ځواکونو د دغه مخکیني مامور وکیلانو پر هغه لګېدلي تورونه رد کړي او نن يې د هغه لپاره د استنیاف غوښتنې په غونډه کې محکمې ته وویل چې د ویلن په برخه کې پرېکړه باید نرمه شي او د توقیف پرځای په کور کې نظر بند شي.

په مسکو کې د امریکا سفارت د جولای په لومړۍ نېټه غوښتنه وکړه چې خپلواک ډاکتران دې ۴۹ کلن ویلن معاینه کړي.

خو سفارت وویل چې غوښتنه یې رد شوې او له هغه راهیسې د وېلن صحت لا خراب شوی دی.

د پاکستان پخوانی صدراعظم نوازشریف د درملنې لپاره لندن ته لاړ

د پاکستان پخوانی صدراعظم نوازشریف

د پاکستان پخوانی صدراعظم نواز شریف د درملنې لپاره نن د نومبر په ۱۹مه، له لاهوره لندن ته ولاړ.

نواز شریف په ځانګړې الوتکه کې چې هوايي امبولانس او د عملیات او بېړنۍ څارنې خونه لري، ولېږدول شو.

لندن ته له هغه سره یې ورور، شهباز شریف او د ډاکترانو او نرسانو یوه ډله هم ملګرې وه.

شهباز شریف د پاکستان دحکومت د اپوزېسیون ګوند مسلم لیګ ن مشري کوي.

د مسلم لیګ ن ګوند ویاند ویلي چې نواز شریف ته تر پرواز مخکې ټولې ضروري دواوې ورکړ شوې وې او د ډاکترانو او نرسانو تر کلکې څارنې لاندې و.

هغه لومړی د قطر پلازمېنې دوحې ته لېږدول کېږي او له هغه ځایه لندن ته ځي.

د اسلام اباد سترې محکمې د اکټوبر په ۲۹مه نېټه د روغتیايي دلایلو له مخې د هغه د محاکمې پروسه دوه میاشتې وځنډوله.

پومپیو پر اوکراین د پوځي مرستو له بندېدا ملاتړ وکړ

د امریکا د بهرنیو چارو وزیر مایک پومپیو

د امریکا د بهرنیو چارو وزیر مایک پومپیو پر اوکراین د پوځي مرستو د بندولو په قضیه کې د ولسمشر ډونالډټرمپ د پالیسۍ ملاتړ کړی.

دا په داسې حال کې ده چې د ولسمشر ټرمپ د استیضاح د هڅو په ترڅ کې په دې اړه چې آیا هغه پر اوکراین د پوځي مرستې د بندولو په قضیه کې له خپل واک څخه ناوړه کار اخیستی کنه، په کانګرس کې د اظهاراتو د اورېدو د لړۍ دوهمه اونۍ پیل شوې.

ښاغلي پومپیو د ټرمپ د پالیسۍ د دفاع په ترڅ کې پرون د نوامبر په ۱۸مه په واشنګټن کې په یو خبري غونډه کې وویل ټرمپ اوکراین ته چې په خپلو دوو ختیځو سیمو کې د روس پلوو بیلتونپالو پرضد جګړه کوي، د وژونکو وسلو د ورکولو په برخه کې د بارک اوباما د ادارې د لویو غلطیو مخه ونیوله.

ټاکل شوې چې په روانه اوونۍ کې د ملي امنیت شورا او د دفاع او بهرنیو چارو وزارتونو د چارواکو په ګډون نهه کسان چې د اوکراین لپاره د ټرمپ له پالیسیو خبر دي په کانګرس کې څرګندونې وکړي.

مسکو د "مارګایتاایګناتووا" نوم د ورکو کسانو په لیست کې شامل کړی

ارشیف

د مسکو پولیسو هغه راپورونه تائید کړي چې د روسیې د انټرفکس خبري اژانس د اډیټرې مارګاریتا ایګناتووا نوم یې د ورکو کسانو په لیست کې شامل کړی دی.

د مسکو د پولیسو یوه ویاند پرون دوشنبې دولتي خبري آژانس تاس ته وویل، د دې ځوانې ژورنالیستې مور د پولیسو په دفتر کې د خپلې لور د تري تم کېدو راپور ثبت کړی او پولیسو هم هڅې پیل کړې دي چې پته یې معلومه کړي.

روسي رسنیو د ۲۹ کلنې ایګناتووا د مور له قوله راپور ورکړی چې وايي، دې خپله لور وروستۍ ځل د یکشنبې په ورځ د سهار په نهو بجو په داسې حال کې چې کلیسا ته تلله ولیده خو هغه وايي چې د هویت کارت، موبایل ټېلفون او پیسې یې نه دي ورسره وړي.

روسۍ څارنواله څلورو کسانو ته د عمري بند سزا ورکولو هڅه کوي

ارشیف

یوه روسۍ څارنواله د هغو څلورو کسانو لپاره د عمري بند د سزا هڅه کوي چې په 2017 میلادي کال کې د روسیې په دویم لوی ښار سینټ پیټرزبورګ په میټرو کې کې په خونړۍ چاودنه کې مشکوک دي.

څیړونکي وايي، د اکبرجان جلیلوف په نوم ۲۲ کلن ازبک ټبري روسي چې قرغزستان کې زیږیدلی د 2017 میلادي کال د اپریل په 3 مه نېټه په ځان پورې تړلي چاودیدونکی بم د میټرو په یو ډبه کې وچوه چې 15 کسان یې ووژل او 67 نور یې ټپیان کړل.

دویم بم د میټرو په تم ځای کې اېښودل شوی و چې په خوندي توګه شنډ کړی شو.

څارنوالې نادیژدا تيښونوا د دوشنبې په ورځ له قاضي وغوښتل تورن ابرار عظیموف چې د چارواکو په وینا ددې بریدونو طراح دی او همدارنګه د اکرام عظیموف، محمد یوسف ایرمتوف او ابراهیم جان ایرمتوف په نومونو درې نورو ته دې د عمري بند سزا ورکړي.

تېښونوا همدارنګه له قاضي وغوښتل چې د دې قضيې سره تړلي پنځه نور کسان دې له 27 کلونو څخه تر 28 کلونو پورې په بند محکوم کړي.

د محکمې قاضي وروسته له هغې دا محاکمه وځنډوله چې په تورونو کې د یوازینۍ ښځې روغتیايي وضیعت خراب شو او روغتون ته د رسولو لپاره یې امبولانس راوبلل شو.

فرانسې د روسیې له خوا د اوکراین د کښتیو بېرته سپارلو هرکلی کړی

روسیې دا کښتۍ د دوشنبې په ورځ اوکراین ته سپارلي.

فرانسې د روسیې له خوا د اوکراین د هغو دریو کښتیو د بېرته ورسپارلو د اقدام هرکلی کړی چې تېر کال د روسیې سمندري ځواکونو په تور سمندرګي کې نېولې وې.

فرانسې ویلي، دا به د ډیسمبر په میاشت کې په پاریس کې هغه جوړیدونکې سرمشریزې ته اسانیتا رامنځته کړي چې د روسي او اوکراین د کړکیچ د هواري په هدف جوړیږي.

د دوشنبې په ورځ د فرانسې د ولسمشر ایمانویل مکرون او د روسیې د ولسمشر ویلادیمیر پوتین ترمنځ له ټیلفوني خبرو وروسته د فرانسې د ولسمشرۍ دفتر په یو بیان کې دا ویلي چې "دا چلند به د روسي او اوکراین ترمنځ ډیالوګ کې باور زیات کړي."

روسیې دا کښتۍ د دوشنبې په ورځ اوکراین ته سپارلي.

د فرانسې د ولسمشرۍ دفتر په خپله اعلامیه کې زیاته کړې دواړو مشرانو د د ډیسمبر په 9 مه نېټه په پاریس کې د اوکراین د ولسمشر ویلادیمیر ځیلینسکي، او د روسیې د ولسمشر ویلادیمیر پوتین ترمنځ د جوړیدونکې غونډې پر چمتوالي خبرې وکړې.

په دې غونډه کې به د فرانسې ولسمشر ایمانویل مکرون او د جرمني صدراعظمه انګیلا میرکل هم برخه ولري.

ګورجستاني پولیسو د اعتراض کونکو پر ضد اوبه شیندونکې کارولي

ګورجستاني پولیسو یو شمېر کسان نېولې هم دي.

د ګورجستان په پلازمېنه تېبلیسي کې د بلوا ضد پولیسو د هغو اعتراض کونکو په وړاندې اوبه شیندونکې کارولي چې پارلمان ته د دننه کېدو لارې یې تړلې وې او تر وخت مخکې د ټاکنو غوښتنه کوي.

پولیسو همدارنګه یو شمېر کسان نېولې هم دي.

تاوتریخوالي هغه مهال رامنځته شو چې د متناسب ټاکنیز سیستم غوښتونکي سلګونه معترضان پرون دوشنبه د څلورمې ورځې لپاره پارلمان ته نږدې په څلورو ځایونو کې راټول شوي وو او د "ژوندی دې وي ګرجستان" شعارونه یې ورکول.

دوی په اساسي قانون کې د ګرجستان د پارلمان له خوا د هغه تعدیل په ردېدو اعتراض لري چې په دې هېواد کې د متناسبې انتخاباتي استازولۍ سیستم ته لاره پرانیزي.

د ګورجستان د کورنیو چارو وزارت وايي، پولیسو 37 اعتراض کوونکي نیولي دي.

دې وزارت زیاته کړې د اعتراض کوونکو د خورولو په عملیاتو کې د دوو پولیسو په شمول شپږ تنه ټپیان شوې دي.

وروسته له هغې چې د یکشنبې په ورځ تر شل زرو زیاتو کسانو په تیبلیسي کې لاریون وکړ، متحده ایالاتو او اروپايي ټولنې د ګورجستان له حکومت، سیاسي ګوندنو او مدنې ټولنې غوښتې چې خپلو کې د تر وخت مخکې ټاکنو په اړه ارامې او په درنښت خبرې وکړي.

هانګ کانګ کې پولیسو د حکومت ضد مظاهره کوونکي محاصره کړي

هانګ کانک کې اعتراضونه

د هانګ کانګ د پولیتخنیک پوهنتون انګړ اوس هم د پولیسو په محاصره کې دی .

پولیس د شپې مهال له سلګونو حکومت ضد مظاهره کوونکو سره لاس او ګریوان وو .

پولیس افسرانو نن سهار وویل، د لسګونو هغو اعتراض کوونکو پر ضد چې د تېښتي هڅه یې کوله، اوښکې بهوونکی ګاز، ربړي مرمۍ او لرګي کارولي دي.

معترضانو له څو ورځو راهیسي د دغه پوهنتون انګړ په خپل کنټرول کې نیولی دی .

یو شمیر اعتراض کوونکي نیول شوي هم دي.

پولیسو ویلي، اعتراض کوونکي کولی شي د پوهنتون له انګړه ووځي، خو له هغوی څخه یې غوښتي چې وسلې پر ځمکه کیږدي او ماسکونه لیري کړي.

هانګ کانګ له شپږو میاشتو راهیسي د حکومت ضد مظاهرو شاهد دی .

معترضان پر هغه څه غوصه دي چې دوی یې د پیکنګ لخوا د هانګ کانګ محدودیت بولي .

ګرجستان کې د پارلمان د پرېکړې پر خلاف لاریونونو دوام

ګرجستان کې مظاهرې

اعتراض کوونکو نن د ګرجستان په پلازمینه تبلیسي کې پارلمان ته ورتلونکې لاره وتړله. دوی وایې تر هغو به د پارلمان غړي دننه ورپرې نږدې چې د تر وخت مخکي انتخاباتو غږ ونه شي.

نن د نومبر په ۱۸مه په تبلیسي کې د روانو اعتراضونو څلورمه ورځ ده .اعتراضونه وروسته له هغه پیل شول چې پارلمان له مختلط څخه متناسب سیسټم ته د انتخاباتي نظام د اړولو په برخه کې د اساسي قانون تعدیل رد کړ.

د ګرجستان د کورنیو چارو وزارت په یوې اعلامیې کې ویلي چې دا مظاهرې د قوانینو تر محدودې اوښتې دي. په اعلامیې کې دا نه دي ویل شوي چې د پارلمان ودانۍ له مخې د دغو اعتراض کوونکو د لیري کیدو له پاره به اقدام وشي که څنګه.

غربي دیپلوماتانو اندېښنه ښودلې چې ښایې دا اعتراضونه په تاوتریخوالي واوړي.

د امریکا متحده ایالاتو او اروپایې ټولني د نومبر پر ۱۷مه د ګرجستان له حکومت ، سیاسي ګوندونو او مدني ټولنو غوښتي چې آرامې او د درناوي وړ مذاکرات پیل کړي.

په ګرجستان کې د اروپایې ټولني پلاوي او هم د امریکا متحده ایالاتو سفارت په یوې ګډې اعلامیې کې ویلي، په اساسي قانون کې د تعدیلاتو د تصویب په اړه د پارلمان د ناکامۍ له کبله د ګرجستان ټولنې د لویې برخې ژوره مایوسي مني.

معترضان ادعا کوي چې مختلط انتخاباتي نظام د ګرجستان د واکمن ګوند په ګټه دی.

نور راوښيه

XS
SM
MD
LG