د لاسرسۍ وړ لېنکونه

تازه خبر
یکشنبه ۱۷ لیندۍ ۱۳۹۸ کابل ۱۱:۰۰

افغانستان

شاه دو شمشېره جومات په څه باندې ۲۳ میلیونه افغانیو بیا رغول کېږي

په کابل کې شاه دو شمشېره جومات

د کابل ښار په زړه کې د شاه دو شمشېره جومات د بیا رغولو کار پرون د اګسټ په ۱۶ مه، پیل شو.

د افغانستان د ښار جوړولو او ځمکو وزارت ویلي چې دا تاریخي جومات په څه باندې ۲۳ میلیونه افغانیو رغول کېږي او د بیارغونې کار به‌یې په تقریباً، دوو میاشتو کې پای ته ورسېږي.

د ارګ د خبرپاڼې په حواله، د شاه دو شمشېره جومات د بیارغونې د کار د پیل رسمي مراسمو ته د افغانستان د پخواني پاچا، امان‌الله خان لورګانې [پخوانۍ شاهزادګۍ] هندیه او ناجیه هم ورغلې وې.

پخواني پاچا، امان‌الله خان د ۱۹۱۹ میلادي کال د اسد په ۲۸مه د افغانستان خپلواکي رسماً اعلان کړه.

د افغانستان حکومت د ازادۍ د سلمې کلیزې د لمانځلو لپاره ترتیبات چټک کړي دي.

د ورځې تازه خبرونه دلته ولولئ

ولسمشر غني نن ترکیې ته لاړ

د ارګ له یوې خبرپاڼې سره سم، ولسمشر غني به د دې سفر په لړ کې د بېلابېلو هېوادونو له چارواکو سره هم وویني.

ولسمشر محمداشرف غني نن سهار د یوه پلاوي په مشرۍ ترکیې ته لاړ چې د اسیا زړه په کنفرانس کې ګډون وکړي.

د ارګ له یوې خبرپاڼې سره سم، ولسمشر غني به د دې سفر په لړ کې د بېلابېلو هېوادونو له چارواکو سره هم وویني.

د اسیا زړه کنفرانس یا د استانبول پروسه د ۲۰۱۱ میلادي کال په جون کې د ۶ هېوادونو د بهرنیو چارو وزیرانو له لوري د دې پروسې د غړیو هیوادونو ترمنځ د اعتماد رامنځته کولو په هدف جوړه شوه.

غني ښارجوړولو او ځمکو وزارت کې دندو ته د اساسي کتنې غوښتنه کړې

افغان ولسمشر محمد اشرف غني

د افغانستان ولسمشر محمد اشرف غني ویلي چې د ښار جوړولو او ځمکو وزارت کې دندو ته باید اساسي بیا کتنه وشي.

ښاغلي غني پرون، د نومبر په ۷مه، ماښام د هغه وزارت له سرپرست سره خبرې کړې او لس ورځې وخت یې ورکړی چې د خپلو پروژو د اغېزمنتیا په اړه رپوټ ورته وړاندې کړي.

ولسمشر غني ویلي چې داقتصادي برخې لپاره ښار پلان د درک وړ نه دی او په انکشافي چوکاټ کې د ښاري لید رامنځ ته کولو ته اړتیا ده.

په افغانستان کې د یوشمېر زور واکو له خوا د دولتي ځمکو او شخصي جایدادونو غصب ، د حکومتي ادارو له لوري د ځمکو غیر متناسب وېش، غیرمتناسبه ښاري پراختیا له اساسي ستونزو بلل کېږي.

فراه کې د جګړو له امله ۲۰۰۰ کورنیو خپل کورونه پریښي

پشت کوه ولسوالي له ایران سره پوله لري.

د فراه د پشت کوه ولسوالۍ یوشمېر خلک وايي چې د حکومتي ځواکونو او وسله والو طالبانو ترمنځ د نښتو او خراب امنیت له امله ۲۰۰۰ کورنۍ له خپلو کلیو تښتېدلي دي.

هغوي ویلي چې په نږدې دښتوکې په سخت بد وضعیت کې پراته دي.

د دې ولسوالۍ یو شمېر خلک پرون، د نومبر په ۷مه، د اعتراض لپاره د فراه د والي دفتر ته ورغلل.

د پشت کوه اوسېدونکي، عبدالسلام د ازادي راډیو خبریال ته وویل چې که حکومت د هغوي وضعیت ته پام ونه کړي، د ولایت مخې ته به ځان ته اور واچوي.

عبدالسلام: "څلور میاشتې کېږي چې په لسو کلیو کې وضعیت سخت خراب دی، مالونه یې را چور کړل، کښتونه یې را وچ کړل، ښځې او کوچنیان مو په تېښته کې دي. په خداي قسم ځان سوځوم!"

د فراه د والي مرستیال مسعود بختور تائید کړه چې په پشت کوه چې خلکو ته تاوان رسېدلی او بازار یې چور شوی دی.

خو بختور د دې کار پړه پر وسله والو طالبانو ور واچوله او ویې ویل چې په سیمه کې به ډېر ژر عملیات وشي.

پشت کوه ولسوالي له ایران سره پوله لري.

وسله والو طالبانو په دې اړه څه نه دي ویلي.

د خراسان فوټبال لوبډله د شمال زون اتلانو د لیګ اتله شوه

ارشیف

د خراسان د فوټبال لوبډله د افغانستان د شمال زون د اتلانو د لیګ اتله شوه.

د افغانستان د فوټبال فدارسیون د لوبو مسوول حلیم شیرزاد نن ازادي راډيو ته وویل، دغه لوبې د جوزجان په ولایت کې د سمنګان، فاریاب، بلخ، جوزجان او سرپل ولایتونو د اتلو لوبډولو ترمنځ په پیل شوې وې، چې د فاریاب ولایت د خراسان لوبډلې پرته له کومې ماتې د ۱۲ امتیازو په ترلاسه کوولو سره ددې لیک اتلولۍ خپله کړه.

د ښاغلي شیزاد په خبره د اتلانو لیک دوهم پړاو لوبې د عقرب میاشتې په ۲۱ نېټه د کابل په ګډون په اوه زونونو کې پیل شوې وې.

د دې لیک وروستی او دریم پړاو لوبې به د زونونو د اتلانو تر منځ لس ورځې ورسته په کابل کې پیلېږي.

د غلام حیدر جیلاني لوبډلې په والیبال کې کام ایر ته ماتې ورکړه

ارشیف

د غلام حیدر جیلانی د والیبال لوبډلې د کام ایر لوبډلې پر وړاندې دوه د صفرپه وړاندې بریا خپله کړه.

د افغانستان د بدني روزنې ریاست د مطبوعاتو برخې غړي مجیب الرحمن قاري زاده نن ازادي راډیو ته وویل، د افغانستان د والیبال د منتخبو لوبډلو او کلبونو په لوبو کې چې اوونۍ مخکې پیل شوې وې د غلام حیدر جیلاني د والیبال لوبډلې نن په نیمه پایلوبه کې د کام ایر لوبډلې ته ماته ورکړه او پایلوبې ته یې لاره پیدا کړه.

د ښاغلي قاری زاده په خبره، دغه سیالۍ، د روانې لمریزې میاشتې په اومه نېټه د ننګرهار، بلخ، دایکندي، میدان وردګ، او لغمان ولایتونو د ۱۳ کلپونو ترمنځ پیل شوې دي.

سوداګرۍ وزارت: د پانګونې د جواز ورکړې بهیر کې زیاتوالی راغلی

ډيری سوداګرو د اوبو، ساختماني او د کثافاتو د مدیریت په برخو کې جوازونه اخیستي او غواړي پانګونه وکړي.

د افغانستان د صنعت او سوداګرۍ وزارت وايي، د پانګونې د جواز ورکړې په بهیر کې د تېر کال په پرتله دو برابره زیاتوالی راغلی.

د دې وزارت د رسنیو برخې مسوول جواد دبیر نن ازادي راډيو ته وویل، تېر کال شاوخوا ۶ زره د پانګونې جوازونه ویشل شوي وه چې، دغه شمېر سږکال شاوخوا ۱۲ زرو ته پورته شوی.

هغه زیاتوي: "د جواز ورکړې او اخیستنې پروسه په چټکۍ سره پر مخ روانه ده، له نیکه مرغه د جواز د ورکړې پروسه هم د قیمت له اړخه او هم د طی مراحلو له اړخه اسانه شوې او پانګه وال کولای شي په اسانۍ سره جواز تر لاسه کړي."

د ښاغلي دبیر په خبره، په افغانستان کې د سوداګرۍ روان حالت هیله بښونکی دی او ډيری سوداګر د اوبو، ساختماني او د کثافاتو د مدیریت په برخو کې یې جواز اخیستی او غواړي پانګه وکړي.

تمه ده نن د ناکامورا مړی جاپان ته ولېږدول شي

ناپیژانده وسله والو د تیرې چهارشنبې په ورځ په جلال اباد ښار کې د ناکامورا پر موتر برید وکړ، په دې حمله کې دی ټپي شو او بیا یې ساه ورکړه.

تمه ده چې نن د ( پي ایم ایس) جاپانۍ خیریه مووسې د مشر تیستو ناکامورا جسد خپل هیواد ته انتقال شي.

د ناکامورا میرمن او لور د همدې لپاره کابل ته راغلې دي.

دوی تیره شپه له ولسمشر اشرف غني او د افغانستان له لومړۍ میرمن رولا غني سره په ارګ کې وکتل.

د جمهوري ریاست د خبرپاڼې له مخې جمهوررییس غني ویلي دي چې د ناکامورا د مړي ویر به د ځانګړیو مراسمو په ترڅ کې وشي.

افغان ولسمشر زیاته کړه چې په ننګرهار او کونړ کې به د ناکامورا پروژې د ده په نوم شي.

ناپیژانده وسله والو د تیرې چهارشنبې په ورځ په جلال اباد ښار کې د ناکامورا پر موتر برید وکړ، په دې حمله کې دی ټپي شو او بیا یې ساه ورکړه.

ناکامورا د افغانستان په ختیځ کې په تیرو شاوخوا دوو لسیزو کې د کرهڼې په ګډون یوشمیر اغیزمنې پروژې ترسره کړې دي.

چارواکي: پکتیا کې ۶طالبان وژل شوي

ارشیف

د پکتیا امنيتي چارواکي وایي، چې د تېرې جمعې په ورځ د ګډو ځواکونو په دوو بېلا بېلو هوایي بریدونو کې شپږ وسله وال طالبان وژل شوي دي.

د پکتیا د ولایت مقام ویاند عبدالله حسرت نن د شنبې په سهار ازادي راډيو ته وویل، چې یاد بریدونه د دې ولایت د زرمت ولسوالۍ په کلالګو او هزار خېلو سیمو کې ترسره شوي دي.

د ده په وینا په دې بریدونو کې وژل شوي ټول کسان د طالبانو په لیکو پورې اړوند دي.

تر اوسه وسله والو طالبانو ددې بریدونو په اړه غبرګون ندی ښودلی.

پاکستان سيمه کې سوله د افغانستان د سولې له دوام سره تړلې بولي

د پاکستان د بهرنیو چارو وزیر

د پاکستان د بهرنيو چارو وزير د اسلام اباد لپاره د امريکا د متحدو ايالتونو له سفير سر د افغانستان د سولې پر پروسه خبرې وکړې.

د پاکستاني رسنيو د راپورونو له مخې شاه محمود قريشي پرون له پاول جونز سره په کتنه کې ويلي: ”په سيمه کې پايداره سوله د افغانستان د سولې پروسې له دوام سره تړلى دى.“

ښاغلي قريشي د امريکا هغه هڅې هم ستايلي، چې د افغانستان د سولې پروسې د بياپيلولو لپاره يې کړې دي.

د امريکا ولسمشر ډونالډ ټرمپ د ليندۍ/قوس پر اوومه افغانستان ته د ناڅاپي سفر پر مهالي ويلي وو، چې امريکا له طالبانو سره د سولې مذاکرې بېرته پيل کړې دي.

ولسمشر ټرمپ د سولې مذاکرې څه کم درې مياشتې مخکې، وروسته له هغې لغوه کړې، چې طالبانو په کابل کې د يوې حملې مسووليت واخيست.

په هغه حمله کې د يوه امريکايي سرتېري په ګډون ١٢ کسان وژل شوي دي.

د افغانستان د سولې لپاره د امريکا د بهرنيو چارو وزارت د ځانګړي استازي زلمي خليلزاد په مشرۍ هيئت له طالبانو سره د سولې نهه پړاو خبرې کړې دي.

دفاع وزارت: د هوايي ځواک منسوبينو ته پر وخت معاشونه ورکول کېږي

د افغان هوايي ځواک یو انځور

د افغانستان د دفاع وزارت يوه چارواکي هغه راپورونه رد کړل، چې ګواکې د هوايي ځواک د ګڼو منسوبينو معاشونه له مياشتو راهيسې نه دي ورکړل شوي.

تر دې مخکې د مشرانو جرګې د شکايتونو کميسيون مشر زلمي زابلي ازادۍ راډيو ته ويلي وو، چې تر ډېره د هوايي ځواک غړو ته چې په هغوى کې پيلوټان هم شامل دي، معاشونه نه دي ورکړل شوي.

ښاغلي زابلي ويلي، دوى د همدغو شکايتونو پر اساس د دفاع وزارت مقامات هم خپلې غونډې ته وربللي وو.

خو د دفاع وزارت د هوايي ځواک په برخه کې د لوى درستيز مرستيال ډګر جنرال محمد شعيب تېره شپه ازادۍ راديو ته وويل، هوايي ځواک ته پر وخت معاش ورکړل کېږي.

هغه زیاته کړه: ”معاشونه خو يوه اوونۍ يا لس ورځې شا ته يا مخ ته کېږي خو هوايي ځواک خپل معاش اخلي. هوايي ځواک ته امتياز هم ورکول کېږي. په دې برخه کې مې کومه ستونزه نه ده اورېدلې. “

دفاع وزارت وايي څه باندې ٩٩ فيصده منسوبين يې د بايومټريک سيسټم له لارې معاشونه اخلي.

له دې سره به د وزارت په حواله هم د خيالي سرتېرو مخه نيول کېږي او هم په دې برخه کې د اداري فساد اندازه راټيټېږي.

چارواکي: د طالبانو لخوا پر عامه لارو د ماينونو په ايښودلو ملکيانو ته مرګ ژوبله اوړي

ارشیف

د غزني ولايت چارواکي وايي وسله وال طالبان پر عامو لارو د ماينونو په ايښودلو سره ملکيانو ته مرګ ژوبله اړوي.

پرون ماسپښين هم د غزني ښار روضې سيمې ته نږدې د ملکيانو پر يوه موتر د يوه ماين په چاودنه کې يو ملکي تن ووژل شو او دوه تنه نور ټپيان شول.

د والي وياند محمد عارف نوري پرون ازادۍ راډيو ته وويل، وسلوال طالبان تل د ملکيانو د مرګ ژوبلې سبب کېږي.

هغه وویل: ”له بده مرغه وسله وال طالبان تل پر عامه لارو د ماينونو په ښخولو سره ملکي کسانو ته د تلفاتو اوښتو سبب کېږي، چې د سې شنبې پېښه يې هم يوه بېلګه ده.“

وسله والو طالبانو د پرونۍ پېښې په اړه څه نه دي ويلي.

د ملګرو ملتونو مرستندوى ماموريت يا يوناما دوې مياشتې مخکې په يوه راپور کې ويلي وو، چې د ٢٠١٩ میلادي کال په لومړيو نهو مياشتو کې تر دوه زره پنځه سوه درې شپته (٢٥٦٣) زيات ملکيان وژل شوي او تر پنځه زره شپږ سوه شپږاويا (٥٦٧٦) زيات نور ټپيان شوي دي.

د جاپاني مرستندوی تیتسو ناکامورا په ویر غونډې او غبرګونونه

پرون په کابل، خوست، جلال اباد، پروان، پېښور او ځینو نورو سیمو او ښارونو کې یو شمېر مدني فعالانو د غونډو په جوړولو ددغه بشري کارکونکې وژنه وغندله او دده په یاد یې ډیوې روښانه کړې.

په ننګرهار کې د وژل شوي جاپاني بشري کارکوونکي ډاکټر تیتسو ناکامورا په ویر غونډي او عکس العملونه لا هم دوام لري.

پرون په کابل، خوست، جلال اباد، پروان، پېښور او ځینو نورو سیمو او ښارونو کې یو شمېر مدني فعالانو د غونډو په جوړولو ددغه بشري کارکونکې وژنه وغندله او دده په یاد یې ډیوې روښانه کړې.

د خوست والي محمد حلیم فدايي پر خپل ټویټر لیکلي چې د خوست ښار د زړې سبزۍ منډيي څلور لارې یې د ډاکټر تیتسو ناکامورا په نوم نومولی دی.

په افغانستان کې د کام ایر خصوصي هوايي شرکت پر خپله رسمي فیس بوک پاڼه د خپلې یو الوتکې هغه تصویر خپور کړی چې پر وروستي وزر یې د ډاکتر ناکامورا ستر تصویر انځور شوی دی. کام ایر له دغه عکس سره لیکلي چې د افغانستان خلک به تل د ناکامورا د خدمتونو منندوی وي.

جاپان ټایمز ورځپاڼې د ډاکتر ناکامورا د خیریه بنسټ د یوه استازي له خولې ویلي چې د ناکامورا میرمن، مشره لور او د هغه مرستندویه ټولنې چې ناکامورا ورته کار کاوه درې غړي د جمعې په سهار کابل ته تللي، ترڅو ددې وژل شوي جاپاني ډاکتر مړی ترلاسه کړي.

جاپاني ناکامورا ته د افغانستان حکومت په دې وروستیو کې د افغانستان افتخاري تابیعت ورکړی و.

هغه له دوو لسیزو د زیاتې مودې راهېسې له افغانانو سره د روغتیا او کرنې په پروژو کې له نژدې همکاري کوله.

په وروستیو څو کلونو کې د نوموړي ډېر کارونه په ختیځ کې د کونړ د سیند پر غاړه پرتو سیمو کې د اوبو لګونې په شمول په یو شمېر رغنیزو او روغتیايي خدمتونو راڅرخیدل.

هغه د چهارشنبې په ورځ د جلال اباد څخه خپل کار ته پر لاره له خپلو څو افغان ساتونکو او همکارانو سره د ناڅرګندو وسله والو په ډزو ووژل شو.

یوه اوونۍ کې له ایران او پاکستانه شاوخوا ۱۲ زره افغانان خپل هېواد ته ستانه شوي

ارشیف

د مهاجرت نړیوال سازمان (ای او ام) له ایران او پاکستان څخه د شاوخوا ۱۲ زره افغان کډوالو د راستنېدو خبر ورکوي.

دغې نړیوالې ادارې پرون پنجشنبې (نومبر ۵مه) په یوه خبرپاڼه کې وویل، له تېرې یکشنبې څخه د دې اونۍ تر شنبې ورځې پورې ۱۱۵۵۴ افغانان له ایران او ۲۳۳ تنه له پاکستان څخه خپل هېواد ته ستانه شوي دي.

خبرپاڼه زیاتوي چې له دې ډلې ۶۳۹۱ افغان کډوال له ایران او ۱۰ تنه له پاکستان څخه په جبري ډول او نور په خپله خوښه هېواد ته ستانه شوي دي.

د ای او ام په وینا، د روان کال له پیله له ۴۶۰ زرو زیات افغانان له ایران او له ۱۸ زرو زیات له پاکستان څخه هېواد ته ستانه شوي.

خبرپاڼه زیاتوي چې له دې ډلې څخه ۱۹۳ زره افغانان له ایران او له ۲۵۵۰ زیات نور له پاکستان څخه په جبري ډول ایستل شوي دي.

د کندز په امام صاحب ولسوالۍ کې د طالبانو برید کې پولیس وژل شوي

سیمه ییز چارواکي دولتي سرتېرو ته د اوښتې مرګ ژوبلې په اړه بېلابېلې شمېرې وړاندې کوي.

د افغانستان په شمال کې د کندز سیمه ییز چارواکي وايي، په امام صاحب ولسوالۍ کې تېره شپه طالبانو د پولیسو پر پوستو بریدونه کړي، خو د اوښتې مرګ ژوبلې په اړه بېلابېلې شمېرې وړاندې کوي.

د کندز د ولایتي شورا رئیس محمدیوسف ایوبي نن جمعه (قوس ۱۵مه) ازادي راډيو ته وویل، په جوی بیګم او قرغز سیمو کې د امنیتي ځواکونو پر پوستو د طالبانو په برید کې ۱۰ پولیس وژل شوي.

په وژل شویو کې د امام صاحب ولسوالۍ د امنیې قوماندانۍ د یوه ټولي قوماندان هم شامل دی.

خو د امام صاحب ولسوال محبوب الله سعیدي بیا په دې جګړه کې د دوو پولیسو وژل کېدل او درېیو نورو ټپي کېدل تائیدوي.

د کندز د امنیې قوماندانۍ ویاند انعام الدین رحماني ازادي راډیو ته وویل، په جګړه کې دواړو خواوو ته مرګ ژوبله اوښتې، خو دقیق شمېر یې نه دی معلوم.

ذبیح الله مجاهد چې ځان د طالبانو ویاند معرفي کوي ادعا کوي چې ددوی وسله والو د دوه تنو قومندانانو په ګډون ۱۴ پولیس وژلي او دغه راز یو قومندان یې له دوه ساتونکو سره ژوندي نیولي دي.

د افغانستان پوځ غواړي په شمالي او شمال ختیځو ولایتونو کې عملیات وکړي

ارشیف

د افغانستان پوځ په پام کې لري چې د دغه هېواد په شمال او شمال ختیځ کې د وسله والو مخالفینو پرضد پوځي عملیات پیل کړي.

د ولسمشر د لومړي مرستیال جنرال عبدالرشید دوستم ویاند بشیراحمد ته‌ینج تېره شپه آزادۍ راډیو ته وویل، په دې اړه پرون له افغان پوځي چارواکو سره د نړیوالو ځواکونو د قوماندانانو په کتنه کې خبرې وشوې.

د افغانستان په شمال کې د ناټو ځواکونو امریکايي قوماندان جنرال برونس پرون پنجشنبه (نومبر ۵مه) له ښاغلي دوستم د سره د جوزجان په مرکز شبرغان ښار کې ولیدل.

له دې مخکې د دوشنبې په ورځ په افغانستان کې د امریکا او ناټو د ځواکونو عمومي قوماندان جنرال سکاټ میلر هم له جنرال دوستم سره ولیدل. ته‌ینج په شمال کې د پوځي عملیاتو د هدف په اړه وویل: "د دې عملیاتو اصلي هدف د لومړۍ نمبر لویې لارې خلاصول، د ولسوالیو د کلابندۍ ماتول او د لویو لارو د ګواښونو کمول دي."

ښاغلي ته ته‌ینج زیاته کړه چې نړیوال ځواکونه به په دې عملیاتو کې د افغانستان د دولتي ځواکونو هوايي ملاتړ کوي.

په همدې حال کې ولسمشر اشرف غني وايي، د لویو لارو، په تېره د دره صوف – مزارشریف، بامیان – میدان وردګ او د جاغوري – قره باغ د لویو لارو د امنیت د خوندي کولو لپاره امنیتي تدابیر ترلاس لاندې دي.

جمهوري ریاست په یوه خبرپاڼه کې ویلي چې ولسمشر غني دا څرګندونې تېرماښام په ارګ کې په یوه غونډه کې وکړې.

نور راوښيه

XS
SM
MD
LG