د لاسرسۍ وړ لېنکونه

تازه خبر
شنبه ۱۰ غبرګولی ۱۳۹۹ کابل ۰۶:۱۷

خبرونه

د بلک واټر یو پخوانی غړی په عمري بند محکوم شو

(کین-ښی) نیکولاس سلاټن او نور محکوم شوي ملګري یې

د بلک واټر په نوم د یو امریکايي خصوصي امنیتي شرکت یو پخوانی غړی په عراق کې پر ملکیانو د ډزو په جرم په عمري بند محکوم شو.

په ۲۰۰۷ م کال کې د نیکولاس سلاټن او ملګرو پر ډزو یې ۱۴ کسان وژل شوي وو.

دوه مېرمنې او د ۹ او ۱۱ کلونو په عمرونو دوه ماشومان هم په وژل شویو کې شامل وو.

په واشنګټن کې د فدرالي محکمې یو منصفه هیئت د لومړي ځل لپاره په ۲۰۱۸ م کال کې نیکولاس سلاټن مجرم بللی و.

تر دې مخکې د سلاټن دوه محکمې بې‌نتیجې پای ته رسېدلې وې.

سره د دې چې د سلاټن کورنۍ او دوستانو د واشنګټن له محکمې غوښتي وو چې نوموړي ته بخښنه وکړي، دې محکمې نوموړی مجرم وباله او په عمري بند یې محکوم کړ.

د بلک واټر درې نور غړي چې له سلاټن سره په دې ډزو کې مل وو، هر یو په ۳۰ کاله بند محکوم شول.

د ورځې تازه خبرونه دلته ولولئ

کابل پولیسو څه د پاسه ۷۰ کیلوګرامه چرس نیولي

ارشیف

په کابل ولایت کې څه د پاسه اویا کیلوګرامه چرس ونیول شول.

د کابل ولایت د امنیه قومندانۍ ویاند فردوس فرامرز ازادۍ راډیو ته وویل، له نشه يي موادو سره د مبارزې ځانګړو پولیسو د دې ولایت په بګرامیو ولسوالۍ کې (۷۴) کیلوګرامه چرس ونیول چې د ګازو په ډبو کې پټ کړای شوي او په یوه موټر کې له پکتیا ولایت څخه کابل ته قاچاق کېدل.

د دې موادو د قاچاقو په تور دوه تنه هم نیول شوي دي.

ننګرهار پولیسو د ۳۰ کیلو ګرامه نشه يي موادو د قاچاقو مخه نیولې

ارشیف

د ننګرهار پولیسو د نږدې دېرش کیلوګرامه نشه يي موادو د قاچاقو مخه ونیوله.

د کورنیو چارو وزارت ویاند طارق آرین ازادۍ راډیو ته وویل، په لومړۍ پېښه کې پولیسو د دې ولایت په غني خېلو ولسوالۍ کې پنځلس نیم کیلوګرامه چرس نیولي چې په یوه موټر کې یې یوې ګاونډۍ ولسوالۍ ته قاچاق کول.

پولیسو په دوهمو عملیاتو کې چې د نشه يي موادو د پرچون خرڅوونکو د نیولو په هدف ترسره شول، (۱۳) کیلوګرامه چرس د خرڅلاو پر مهال ونیول.

د نشه يي موادو د قاچاقو او خرڅلاو د دی دوو قضیو په تور څلور کسان هم نیول شوي دي.

چارواکي: فاریاب کې ۴ تنه د نشه يي موادو د قاچاق په تور نیول شوي

ارشیف

په فاریاب ولایت کې ۴ کسان د نشه يي موادو د خرڅلاو پر مهال ونیول شول.

د فاریاب ولایت د امنیه قومندانۍ په خبرپاڼه کې راغلي چې له نشه يي موادو سره د مبارزې ځانګړو پولیسو څلور تنه هغه مهال ونیول چې شراب یې جوړول او په قیصار ولسوالۍ کې یې پر خلکو باندې خرڅول.

له نیول شویو کسانو څخه (۱۳۰) لېټره شراب، دوه نیم کیلوګرامه تاریاک، یو کیلوګرام ښیښه او نیم کیلوګرام هیرویین نیول شوي دي.

نیول شوي کسان له لومړنیو څېړنو وروسته له نشه يي موادو سره د مبارزې عدلي او قضايي ادارو ته معرفي شوي دي.

اروپايي ټولنې د طالبانو لخوا د تاوتریخوالو په دوام خواشينې ښودلې

د اروپايي ټولنې د بهرنۍ پالیسۍ مشر جوزیپ بوریل 

د اروپايي ټولنې د بهرنۍ پالیسۍ مشر جوزیپ بوریل د طالبانو له خوا د تاوتریخوالي په دوام خواشیني ښودلې.

هغه د اروپايي ټولنې د بهرنیو چارو کمېسیون غونډې ته په وینا کې د افغانستان اړوند مسایل هم یاد کړل چې یو یې د تاوتریخوالي او بریدونو دوام و.

هغه زیاته کړه: "په خواشیني سره چې د طالبانو له خوا تاوتریخوالی دوام لري، د تاوتریخوالي د کمولو لپاره تر بل هر وخت ډېره سخته اړتیا شته، افغانستان او خلک یي دایمي اوربند ته اړتیا لري."

هغه زیاته کړه چې له افغانستان سره د اروپايي ټولنې راتلونکې مرستې او همکارۍ په دې تړلي دي چې له دغه هېواد سره د مرستو د تجدید تر غونډې پورې چې تمه ده نومبر میاشت په جینیوا کې وشي ښکېلې خواوې څومره د تاوتریخوالي کمولو او د ښځو او ماشومانو په برخه کې د شته لاسته راوړنو خوندي کولو ته ژمن پاتې کېږي.

نن د پښتو ژبې نړیواله ورځ ده

ارشیف

نن د مې ۲۹ چې د غبرګولی نهمه کېږي د پښتو ژبې نړیواله ورځ ده.

دا ورځ هر کال همدا وخت په افغانستان، پاکستان او ځینو نورو هېوادونو کې پښتانه فرهنګیان او عام خلک لمانځي.

سږ کال د کرونا ویروس وبا فرهنګیان او پښتانه اړ کړي چې له لویو غونډو تېر شي خو په خواله رسنیو یې د دې ژبې په مناسبت مبارکي ورکړې او ټینګار یې کړی چې د ودې لپاره یې باید زیات کار وشي.

د کابل پوهنتون د پښتو ادبیاتو استاد او د ازادي راډیو د پښتو تعلیمي پروګرامونو مسوول محبوب شاه محبوب د دې ورځې په مناسبت وايي: "موږ همدا نن یو انلاین سیمینار لرو د پښتو ژبې د پرمختګونو او د خنډونو په اړه چې د پښتو ژبې په وړاندې کوم کوم خنډونه موجود دي، دا البته په اروپا کې دایر شوی خو موږ ټول پکې انلاین برخه لرو، همدارنګه موږ یو شمېر ځوانان نن مازیګر یوه غونډه لرو په دې تړاو، یو کیک پرې کوو او غواړو خلکو ته وښیو په خواله رسنیو کې چې د پښتو ورځ باید ونمانځو او د پښتو ژبې د ژوندي پاتې کېدو لپاره کار وکړو."

افغان سیاستوالو هم په خواله رسنیو د دې ورځې په مناسبت د مبارکۍ پیغامونه لیکلي.

له هغې ډلې د افغانستان د افغانستان د ملي مصالحې عالي شورا رییس عبدالله عبدالله په خپل فیسبوک د پښتو ژبې د ورځ مبارکي لیکلې.

د بهرنیو چارو سرپرست وزیر حنیف اتمر په خپل ټوېټر لیکلي چې د پښتو ژبې ټولو ویونکو ته مبارکي وایي او د ده په خبره د افغانستان هره ژبه د دغه هېواد د فرهنګ او تمدن په بډاینه کې خورا مهم رول لري.

تاجکستان کې پر یوه خبریال بریدونه شوي

عبدالله غربتي

په تاجکستان کې په یوه خبریال باندې دوه وار په وروستیو څو ورځو کې بریدونه شوي.

عبدالله غربتي د اشیا پلس په نوم یوه ازاد خبري اژانس ته کار کوي چې وروستي کارونه یې په تاجکستان کې د ځمکې د ښووېدو په پېښه باندې د راپورونو جوړول و.

عبدالله غربتي ازادي راډیو ته ویلي چې دریو کسانو نن جمعه پرې لاس پورته کړی او تورن کړی یې دی چې دی خلک پاروي.

غربتي په ختلون سیمه کې د ځمکې ښوویدو په هغې پېښه راپور جوړ کړی و چې پکې دوه کسان مړه شوي و.

دری اوونۍ مخکې هم عبدالله غربتي په پلازمینه دوشنبه کې وهل شوی و او وايي چې له بېلابېلو ځایونو ورته ګواښوونکي پیغامونه لېږل کېږي.

په تاجکستان او په ټوله منځنۍ اسیا کې خبریالان په خپلواکه توګه خبرونه او راپورونه نه شي جوړولای او تل په داسې چارو کې له خنډونو سره مخ کېږي چې په خرابه وضعه کې ان د خبریال په وهل ټکولو، شکنجې، حبس او وژلو تمامېږي.

د ازادې اروپا راډیو تاجکي سرویس څانګې خبریالان هم له ځینو کاري محدودیتونو سره مخ وي او دولت یې وخت په وخت د کار جوازونه په یوه او بله پلمه نه تمدیدوي.

عامې روغتیا وزارت: د محدویتونه او سپارښتنو نه مراعتول به ناورین رامنځته کړي

وحیدالله مجروح

د افغانستان د عامې روغتیا وزارت ګواښ کوي که خلک طبي سپارښتنې او لګیدلي محدودیتونه مراعات نه کړي کرونا ویروس به انساني ناورین رامنځته کړي.

دا خبره د یاد وزارت مرستیال ډاکتر وحیدالله مجروح نن په یوه ویډیويي پیغام کې کړې ده.

هغه ویلي چې هره ورځ سلګونه مثبتې قضیې ثبتیږي خو مهمه ده چې خلک د کرونا ویروس د مخنیوي لپاره له روغتیاپالانو سره همکاري وکړي.

هغه زیاته کړه: "په تېر ۲۴ ساعتونو کې په افغانستان کې ۹۸۵ سمپلونو ټیسټ شوي چې له منځه یې ۶۲۳ مثبت واقعات تثبیت شوي، ۱۱ کسان له کرونا مړه شوي، ۵۰ کسان روغ شوي، په دې سره مجموع په افغانستان کې ۱۳۶۵۹ مثبت واقعا تر اوسه ثبت شوي، د خلکو په همکاري موږ کولای شو چې کرونا ماته کړو که د خلکو مرسته نه وي له ټولو هڅو سره سره به له یوه انساني ناورین سره مخ شو."

په افغانستان کې د کرونا ویروس څه باندې دولس نیم سوه ناروغان بېرته ښه شوي هم دي.

د عامې روغتیا وزارت وایي چې خلک باید ماسکونه وکاروي، ټولنیزه فاصله رعایت کړي او له غونډو او مجلسونو ډډه وکړي.

افغانستان کې پر کرونا ویروس د اخته کسانو شمېر ۱۳۶۵۹ ته لوړ شو

په تازه ثبت شوو پېښو کې ۲۷۱ په کابل، ۱۷۹ په هرات، ۶۷ ننګرهار، ۲۳ بلخ او ۱۳ لغمان کې ثبت شوې دي.

د افغانستان د عامې روغتيا وزارت وايي، په تېرو ۲۴ ساعتونو کې په هېواد کې د کرونا ۶۲۳ نورې مثبتې پېښې ثبت شوې دي چې ډېرې یې په کابل کې دي.

د عامې روغتيا وزارت له خوا رسنیو ته نن په استول شوي پيغام کې ويل شوي چې له نوېو مثبتو پېښو ثبت سره په هېواد کې پر کرونا ویروس د اخته کسانو شمېر ۱۳۶۵۹ ته لوړ شو.

تر اوسه له دې ناروغۍ ۱۲۵۹ کسان بېرته روغېدلي او ۲۴۶ نور یې مړه کړي دي.

په تازه ثبت شوو پېښو کې ۲۷۱ په کابل، ۱۷۹ په هرات، ۶۷ ننګرهار، ۲۳ بلخ او ۱۳ لغمان کې ثبت شوې دي.

چارواکي: د اختر په مناسبت برقراره شوې ارامه وضعه دوام لري

ارشیف

د افغانستان د ملي امنیت شورا وايي، له ځینو سیمو د نا امنیو له راپورونو سره سره د اختر په مناسبت برقراره شوې ارامه وضعه لا هم دوام لري.

دا خبره د امنیت شورا ویاند جاوید فیصل نن په خپله ټوېټر پاڼه لیکلې ده.

جاوید فیصل ویلي اوربند یو پېچلی عملیاتي مسئولیت دی چې د پېښو د مخنیوي په خاطر ډېرو مثمرو او مداومو همغږیو ته اړتیا لري او دا هڅې به روانې وي.

طالبانو د اختر په مناسبت دری ورځنی اوربند اعلان کړی و او افغان ولسمشر اشرف غني هم د طالبانو د دغه اقدام په غبرګون د اوربند د اعلان تر څنګ د ۲۰۰۰ طالب بندیانو د خلاصولو امر وکړ.

ملي دفاع وزارت: پکتیا کې طالبانو او افغان ځواکونو ته مرګ ژوبله اوښتې

ارشیف

د افغانستان د ملي دفاع وزارت تایید کړه چې په پکتیا کې د وسله والو طالبانو په برید سره ۱۴ افغان سرحدي ځواکونه وژل شوي او ۳ نور ټپیان دي.

د دغه وزارت په یوه اعلامیه کې راغلي چې وسله والو طالبانو بېګاه شپه په ډنډ پټان ولسوالۍ کې د افغان سرحدي ځواکونو پر پوسته برېد کړی و.

دفاع وزارت وايي چې طالبانو ته هم مرګژوبله اوښتې.

د طالبانو د مرګ ژوبلې په اړه د ۲۰۳ تندر قول اردو ویاند ایمل مومند نن جمعه ازادي راډیو ته وویل: "پکتیا ولایت د ډنډ پټان ولسوالۍ اړوند د سیف الله په نوم زموږ د ملي امنیتي ځواکونو یوه پوسته ده سرحد ته نږدې چې په دې باندې وسله والو طالبانو ډله ییز برید کړی، ۱۸ تنه وسله وال طالبان د سره صلیب د وینا په اساس وژل شوي او همدارنګه ۹ نور ټپیان شوي دي خو بدبختانه زموږ ملي امنیتي ځواکونو ته هم مرګ ژوبله اوښتې ده."

وسله والو طالبانو د دغه برید په اړه کومه تبصره نه ده کړې.

تر دې مخکې هم د پروان په غوربند کې وړمه شپه د طالبانو په برید سره ۷ افغان سرتېري وژل شوي او اخوا په لویدیځ ولایت فراه کې د افغان پولیسو په پوستې باندې د طالبانو په برید سره ۷ تنه پولیس افسر وژل شوي.

افغان چارواکو بیا ویلي چې په زابل کې یې ۱۸ وسله وال طالبان او په فراه کې یې اته وسله وال طالبان وژلي.

د افغان پوځیانو او وسله والو طالبانو تر منځ په وروستیو دوو ورځو کې دا نښتې داسې وخت شوي چې د اوربند د تمدید هڅې کیږي او هم وسله والو طالبانو د بندیانو د خلاصون لپاره یو پلاوی کابل ته استولی.

د اروپايي ټولنې او منځنۍ اسیا چارواکو ترمنځ ویډیويي کنفرانس

اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

د اروپايي ټولنې چارواکو پرون د منځنۍ اسیا او افغانستان د بهرنیو چارو د وزارتونو له مرستیالانو سره په سیمه کې د کرونا ویروس د خپرېدو په وضیعت او یو لړ نورو مسئلو د ویډیويي کنفرانس له لارې خبرې کړي دي.

د افغانستان د بهرنیو چارو وزارت په یو بیان کې ویلي چې د پنجشنبې په ورځ په دې کنفرانس کې په سیمه کې د کرونا ویروس پر ضد د شریکې مبارزې او د منځنۍ اسیا هېوادونو او افغانستان سره د اروپايي ټولنې د اړیکو په لرلید تفصیلي بحث وشو.

له بلې خوا د اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

نوموړې زیاته کړې، اړتیا ده چې د سیمه ایزو او نړیوالو ننګونو او افغانستان کې د سولې په اړه ګډ کار دوام وکړي.

په دې کنفرانس کې د اروپايي ټولنې د یو شمیر لوړپوړو ډیپلوماټانو سربېره د افغانستان او منځنۍ اسیا د پنځو نورو هېوادونو د بهرنیو چارو د وزارتونو مرستیالانو برخه درلوده.

د افغانستان او استرالیا کرکټ ملي لوبډلې ټېسټ لوبه کوي

افغان ملي لوبډله

ټاکل شوې چې د افغانستان د کرکټ ملي لوبډله به د روان کال په نومبر میاشت کې د استرالیا د ملي لوبډلې پر وړاندې ټېسټ لوبه ترسره کړي.

د افغانستان کرکټ بورډ په یوې خبرپاڼې کې ویلي چې دا ټېسټ لوبه به د اسټرالیا په کوربه توب د نومبر په ۲۱مه نېټه پیل او د همدې میاشتې تر ۲۵مې نېټې پورې به دوام وکړي.

د افغانستان د کرکټ بورډ اجراییه رییس لطف الله ستانکزي هیله ښودلې چې تر هغې به د کرونا ناروغۍ خطر کم شي او دا لوبه به ترسره شي.

د ستانکزي په وینا دا ټېسټ لوبه به د افغانستان د کرکټ ټیم لپاره یوه ښه تجربه وي.

افغانستان تر اوسه په ټېسټ سیالیو کې له بنګله دېش، ایرلنډ، هندوستان او ویسټ انډيز سره مخ شوی دی چې له لومړیو دوه لوبډلو یې بریا خپله کړې، خو له وروستیو دوو یې بیا ماتې منلې ده.

د مسکو یوې محکمې یو مخکښ ژورنالیست په بند محکوم کړی

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د مسکو یوې محکمې یو مخکښ ژورنالیست په ۱۵ ورځې بند محکوم کړ.

له بلې خوا پولیسو یو شمېر هغه کسان نېولي چې د دې ژورنالیست په ملاتړ یې اعتراض کړی و.

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د او وي ډي-انفو په نوم د یوې خپلواکې ویبپاڼې د معلوماتو پر بنسټ چې د سیاسي اعتراضونه پر مهال نیونې څاري، ۶ هغه ژورنالیستان هم نیول شوي چې د ازر سره د یو والي د ښودلو په خاطر د پولیسو د مرکزي دفتر مخې ته راټول شوي وو.

ازر د سه شنبې په ورځ د ویلادیمیر ورونڅوف څخه د ملاتړ په خاطر د یو کسیز اعتراض پر مهال نیول شوی و.

ورونڅوف د روسیې د قانون پلي کونکو ادارو د سرغړاویو د افشا هڅه کوله.

نوموړی چې د پولیسو پخوانی افسر دی، د مې د میاشتې لومړیو کې د باج اخیستلو په تور ونیول شو او وروسته پرې نور تورونه هم ولګول شول.

نوموړې پر ده لګیدلي تورونه رد کړي دي.

د بخښنې نړیوال سازمان د ازر نیونه د منتقدانو د غلي کولو یوه بزدلانه هڅه بللې ده.

د کاسوو اساسي قانون محکمې د نوي صدراعظم د ګمارلو فرمان قانوني وباله

د کورتي او ملاتړې یې د نویو پارلماني انتخاباتو غوښتنه کوي.

د کاسوو د اساسي قانون محکمې د ولسمشر هاشم تاچي هغه فرمان قانوني وباله چې د سرپرست صدراعظم البین کورتي پر ځای یې نوی صدراعظم ګمارلی دی.

تمه کېږي چې د پنجشنبې په ورځ ناوخته د محکمې دا پرېکړه به د کیڼ اړخي نیشنلیست ګوند ویتیویندوسۍ په ملاتړ مظاهرې راوپاروي.

دا ګوند تر وخت مخکې د عمومي انتخاباتو د ترسره کېدو غوښتنه کوي.

د محکمې تر پریکړې مخکې، د دې ګوند څو زره ملاتړو د پلازمېنې پریستینا په مرکزي سیمه کې په باران کې (تمریني) اعتراض جوړ کړی و او ویل یې دوی په دې اعتراض کې ځکه برخه اخیستې څو په هغه صورت کې چې د محکمې پرېکړه د دوی په خوښه نه وي لویو مظاهرو ته چمتو اوسي.

د دې لپاره چې د کرونا ویروس محدودیتونه یې مراعت کړي وي، اعتراض کونکو له یو بل د واټن ساتلو، ماسکونو او دستکشونو اغوستو اصول په پام کې نیولي وو.

تاچي د اپریل په ۳۰ مه د کاسوو د منځني ښي اړخي ډیموکرات لیګ عبدالله هوتي د کورتي پر ځای صدراعظم ونوموه.

خو د کورتي د ویتیویندوسۍ ګوند دا فرمان غیرې قانونې وباله او د اساسي قانون په محکمه کې یې ددې فرمان د ننګولو لپاره شکایت ثبت کړ.

د کورتي او ملاتړې یې د نویو پارلماني انتخاباتو غوښتنه کوي.

د بې سرحده ژورنالیستانو سازمان: پاکستان دې د وژل شوي خبریال په اړه څېړنې وکړي

ذولفقار مندراني

د بې سرحده ژورنالیستانو نړیوال سازمان د پاکستان په سند ایالت کې د یو وژل شوي ژورنالیست د قتل د قضیې د څېړنې لپاره د ځانګړې او خپلواکې ډلې د څېړنې غوښتنه کړې ده.

د کاوش او کوشش په نوم د سندي ژبې د ورځپانو د خبریال ذولفقار مندراني مړی د مې په ۲۶ مه نېټه د پاکستان د سند ایالت په دوداپور ښارګوټي کې وموندل شو چې شکنجه شوی او په سر په ‌ډزو وژل شوی و.

په همدې ورځ په نژدې ښار لړکانه کې پولیسو ددې قتل په تور د دوو کسو د نیولو اعلان وکړ او د نوموړې وژنه یې یوه ناموسي قضیه وبلله.

خو د بې سرحده ژورنالیستانو سازمان د اسیا پاسفیک د برخې مشر ډانیل باسټارډ ویلي، د ځايي پولیسو ددې ادعا په اړه چې د مندراني وژنه یې د غیرت په نوم وژنه بللېد شک ډیر دلایل شته.

د دې ژورنالیست پلار د خپل زوی د قتل په اړه له پولیسو سره شکایت درج کړې چې په کې د یو پولیس افسر په ګډون څو نور مشکوک کسان په ګوته شوې دي چې د نشه يي موادو د یو سیمه ییز قاچاقبر سره یې تړاو درلود.

د وژل شوي ژورنالیست پلار وايي، زوی د دې قاچاقبر د فعالیتونو په اړه څېړنې کولې.

د بې سرحده ژورنالیستانو د سازمان د اسیا پاسفیک د برخې مشر د پاکستان د سند ایالت له اعلی وزیر غوښتي چې ددې قضیې د څیړنې لپاره دې سېمې ته یو خپلواک څیړونکی پلاوی واستوي.

دا د روان میلادي کال د پیل راهېسې دویم ژورنالیست دی چې د پاکستان په سند ایالت کې وژل کېږي.

نور راوښيه

XS
SM
MD
LG