د لاسرسۍ وړ لېنکونه

تازه خبر
یکشنبه ۱۷ وری ۱۳۹۹ کابل ۰۸:۳۵

نړۍ

هانګ کانګ کې حکومت ضد مظاهرې له پولیسو سره په نښتې اوښتي

په هانګ کانګ کې د پولیسو او مظاهره کوونکو ترمنځ نښته

په داسې حال کې چې په هانګ کانګ کې د حکومت ضد مظاهرې روانې دي، د هانګ کانګ په نړیوال هوايي ډګر کې اعتراض کوونکو له بلوا ضد پولیسو سره نښتې کړي او د ودانۍ دننه او بهر د ګډوډۍ ډکې صحنې رامنځته شوې دي.

چارواکو د سې شنبې په ورځ د پرله‌پسې دوهمې ورځې لپاره دې هوايي ډګر ته چې د نړۍ یو له ډېرو بوختو هوايي ډګرونو څخه دی الوتنې لغوه کړې.

د اسیا دې مهم اقتصادي مرکز ته د الوتنو لغوه کول د هغو ويرې سره په یو وخت کې دي چې ښايي پيکېنګ دغلته د مظاهرو د ارامولو لپاره چینايي پوځیان واستوي.

د امریکا ولسمشر ډونالد ټرمپ پر خپل ټویټر ویلي "زموږ استخباراتو موږ خبر کړي یوو چې د چین حکومت هانګ کانګ سره پولې ته ځواکونه استوي. ټول باید ارام او خوندي واوسي!"

د نړیوالو رسنیو تصویرونه د هانګ کانګ په هوايي ډګر کې دننه او بهر د بلواګانو او د اعتراض کوونکو او پولیسو ترمنځ د فزیکي شخړو صحنې ښيي.

په داسې حال کې چې دغلته وروستۍ مظاهرې ۱۰مې اوونۍ ته غځېدلي، د هانګ کانګ مشرې کاري لام خبرداری ورکړی چې چینايي خاوره یو "خطرناک وضعیت" ته رسېدلې ده.

اعتراضونه د هغې لایحې وروسته راپورته شول چې اجازه ورکوي، مشکوک کسان په چین کې محاکمه شي چې منتقدان، دا د مشکوکو مجرمانو حقونو باندې جوړجاړی بولي.

د هانګ کانګ مشرې لام تر اوسه ډموکراسي پلویو اعتراض کوونکو ته د هر ډول امتیاز ورکول رد کړي دي.

هانګ کانګ چې پخوا د بریتانیا مستعمره وه، په ۱۹۹۷ م کال کې د کورواکۍ او ازادیو په تضمین چین ته وسپارل شو.

د ورځې تازه خبرونه دلته ولولئ

اوکراین کې د اور لګېدنې هېڅ‌راز نښې نښانې نه‌دي پاتې

ارشیف، انځور تزئیني بڼه لري.

اوکرایني چارواکي وايي د چیرنوبل د اټمي بټۍ د شاوخوا په ممنوعه سیمه کې د اور لګېدنې هېڅ‌راز نښې نښانې نه‌دي پاتې.

پرون ۱۳۰ تنه د اطفائیې مأمورین چې درې الوتکې او ۲۱ ځانګړي وسایط ورسره وو، د اور وژنې د مأموریت لپاره دې سیمې ته استول شوي وو.

د اوکراین د بېړنیو خدماتو دولتي ادارې نن سهار وویل چې په سیمه کې د اور کچه اوس عادي ده.

د پخواني شوروي اتحاد پر مهال د چیرنوبل اټومي بټۍ کې په ۱۹۸۶ کال کې یوه خطرناکه چاودنه وشوه چې اټمي تشعشعات‌یې هوا ته اوچت او د اروپا په ډېر شمېر هېوادونو کې خپاره شول.

روسيې له بهره د خپلو وګړو ستنول ځنډولي

ارشیف، روسي مسافر

روسیې له نورو هېوادونو د خپلو هغو زرګونه وګړو د راستنولو بهیر ځنډولی چې په نړۍ کې د کرونا ویروس له خپرېدو وروسته د الوتنو د فسخ کېدو له کبله ګیر پاتې دي.

د روسي رسنیو د راپورونو له مخې چارواکو پرون د اپریل په ۴ نېټه اعلان وکړ چې د کرونا ویروس د خپرېدو له وېرې ټولې هغه الوتنې د اوس لپاره ځنډېدلي چې له بهره د دې هېواد وګړي په‌کې راتلل، خو د صدراعظم مرستیالې تاتیانا ګوليکووا وروسته وویل چې حکومت د خپلو وګړو د راوستو د چارې د ښه سمون لپاره په دې برخه کې لنډه وقفه اخیستې ده.

مېرمن ګولیکووا وویل، حکومت به د اپرېل تر شپږمې پورې د الوتنو د لاښه تنظیم لپاره یو نوی مهالوېش جوړ کړي، خو نوموړي دا په ډاګه نه‌کړه چې نورو هېوادونو کې دېره روسان به څه وخت خپل هېواد ته ولېږدول شي.

د روسيې د بهرنیو چارو وزارت مخکې ویلي و چې اوس‌مهال له ۳۰ زرو زیات روسان په بهر کې دېره دي، خو د صدراعظم مرستیالې په خپلو بېګانیو څرګندونو کې وویل ۲۶ کسان روسیې ته د ستنېدو هڅه کوي.

ټرمپ: امریکا کې د کرونا ویروس له امله د مړو شمېر کې زياتوالى راځي

د امریکا ولسمشر ډونالد ټرمپ

ولسمشر ډونالډ ټرمپ خبرداری ورکړی چې په متحده ایالاتو کې به د کرونا ویروس د نوې بڼې له کبله د مړو په شمېر کې زیاتوالی راشي.

ښاغلی ټرمپ وايي چې پوځ به بېلابېلو ایالتونو ته له خلکو سره د مرستې لپاره په زیات شمېر پوځي پرسونل واستوي.

ښاغلي ټرمپ چې پرون‌یې له سپینې ماڼۍ څخه د کرونا ویروس د وروستیو پرمختګونو پر اړوندو مسایلو خبرې کولې همداراز وویل چې له بده مرغه په راتلونکو دوو اوونیو کې ښايي ډېر خلک مړه شي.

هغه زیاته کړه چې د نیویارک او ایلینوی په څېر په ځینو ایالتونو کې ښايي ډېر خلک زیانمن شي.

ټرمپ وویل، فدرال حکومت هڅه کوي په هر ایالت کې د اړتیا وړ وسایلو لکه د مصنوعي تنفس د وسیلې او نورو تجهیزاتو دقیقه اندازه معلومه کړي څو دا خبره یقیني شي چې متحده ایالات د مثبتو مواردو له زیاتېدو سره مقابلې ته چمتو دی.

د وروستیو شمېرو له مخې په متحده ایالاتو کې په کرونا ویروس د اخته کسانو ټوله شمېره ۳۱۱۶۳۷ ته لوړه شوې او د دې ناروغۍ له کبله تر اوسه ۸۴۵۴ کسان مړه شوي دي.

چین کې د کرونا ویروس له امله د زرګونه قربانیانو د ویر مراسم

په چین کې خلک له دود سره سم هر کال د اپرېل په ۴مه د ګینګ مینګ په نوم ځانګړي مراسم ترسره کوي.

چین پرون د اپرېل په ۴مه، په هغه هېواد کې د کرونا ویروس له امله د زرګونه کسانو په مړینه د ملي ویر مراسم ترسره کړل.

خو د نړۍ په نورو برخو کې لا هم دا خطرناک ویروس د خپرېدو په حال کې دی، په ځیني هېوادونو کې باید اوج ته ورسېږي، د ډېرو خلکو د مرګ وېره خوره ده او سخت اقتصادي تاوان‌یې رسولی دی.

په چین کې خلک له دود سره سم هر کال د اپرېل په ۴ مه د ګینګ مینګ په نوم ځانګړي مراسم ترسره کوي او د خپلو مړو عزیزانو د درناوي لپاره هدیرو ته ځي.

په دې ورځ، باید له دود سره سم، خلک د خپلو عزیزانو قبرونه پاک کړي.

خو د چین حکومت پر خلکو غږ کړی چې لږترلږه د اپرېل د میاشتې تر پایه دې دا مراسم نه‌ترسره کوي.

کرونا ویروس تنفسي ناروغي پيدا کوي.

دا ویروس د چین له ووهان ښاره راپیدا او تقریباً ټولې نړۍ ته خپور شو.

په ووهان کې خلکو ته ویل شوي و چې د دودیزو مراسمو د پر ځای کولو لپاره د هدیرو له کارکوونکو مرسته وغواړي او خپله دې هدیرو ته له تګه ډډه وکړي.

د چین حکومت پرون وویل چې په هغه هېواد کې ټولې ۸۲۵۰۰ مثبتې پېښې ثبت شوې وې او ۳۳۳۰ تنه مړه شوي دي.

خو څارونکي ګومان کوي چې د چین حکومت د قربانیانو اصلي شمېر پټ کړی دی.

دا په داسې حال کې ده چې د امریکا جانز هاپکنز پوهنتون پرون وویل چې په نړۍ کې په کرونا ویروس د اخته وګړو شمېر له ۱،۱ میلیون اوښتی او نږدې ۶۱ زره وګړي مړه شوي دي.

نړۍ کې د کرونا ویروس د پېښو زیاتېدل؛ تاجکستان کې فوټبال لوبه شوې

د تاجکستان حکومت پرون د استقلال دوشنبې او خوجند د فوټبال لوبډلو ته د سیالۍ اجازه ورکړه.

د تاجکستان حکومت پرون د اپرېل په ۴مه، د فوټبال سیالۍ ته اجازه ورکړه.

په تاجکستان کې چې نهه میلیونه وګړي لري، د کرونا ویروس یوه مثبته پېښه هم نه‌ده اعلان شوې.

له دې کبله، د تاجکستان پر چارواکو شک کېږي چې د دې وبا په اړه دقیق معلومات نه‌خپروي.

د تاجکستان حکومت پرون د استقلال دوشنبې او خوجند د فوټبال لوبډلو ته د سیالۍ اجازه ورکړه.

د سیالۍ د کتلو لپاره هېڅ‌څوک هم په سټډیوم کې نه‌و.

د ۱۰ لوبډلو په دې لیګ کې به نن شنبه هم سیالي وي.

په پرونۍ سیالۍ کې استقلال دوشنبې د یوه په وړاندې په دوو ګولونو خوجند ته ماته ورکړه.

د کرونا ویروس د وبا په اوج کې، یوازې ځيني هېوادونه لکه بلاروس، بروندای او نیکاراګوا کې فوټبال لا هم اجازه لري.

د امریکا تفتیش عالي اداره: په خپلواکۍ د حکومتي ادارو فعالیتونه څارو

 مایکل هورویتز

په امریکا کې د تفتیش عالي فدرالي اداره وايي چې په شدت او په پوره خپلواکۍ به د حکومتي ادارو د فعالیت څارنې ته دوام ورکړي.

د خپلواکۍ او کفایت د څارنې د عالي شورا په نوم د خپلواکې ادارې مشر مایکل هورویتز پرون د اپرېل په ۴مه دا بیان خپور کړ.

هورویتز له ۲۰۱۲ میلادي کال راهیسې د امریکا د عدلیې وزارت د سرمفتش دنده ترسره کوي.

هغه ویلي چې اټکنسن د مسلکي، خپلواک او د قانون حاکمیت ته د متعهد وګړي په توګه پېژني او په خپلواکۍ د څارنې او تفیش په کار کې مخکې و.

تر دې یوه ورځ مخکې، د امریکا ولسمشر ډونالد ټرمپ د ټولو استخباراتي کړیو سرمفتش له دندې لیرې کړ.

ټرمپ د امریکا د سنا د استخباراتو کمېټې ته په لیک کې ویلي و چې د استخباراتي ادارو د مفتش مایکل اټکنسن پر کار باور نه‌لري ځکه‌یې له دې څوکۍ لیرې کوي.

اټکنسن هغه څوک و چې د اوکراین له ولسمشر سره د ولسمشر ټرمپ د ټیلیفوني مرکې په اړه افشا شوي معلومات‌یې اول وار د کانګرس له استازو مجلس سره شریک کړل او ویې‌ویل چې دا معلومات د اعتبار وړ ګڼي.

تاجکستان کې د فوټبال لیګ پیلېږي

د تاجکستان فوټبال لیګ کپ

ټاکل شوې د تاجکستان د فوټبال لیګ داسې مهال پیل شي چې په ټوله نړۍ کې د کرونا ویروس د خپرېدو له کبله ورزشي سیالۍ ځنډېدلي دي.

د مرکزي اسیا دغه هېواد نهه میلیونه وګړي لري، خو تر اوسه‌یې د کرونا د کومې مثبتې پېښې راپور نه‌دی ورکړی.

د تاجکستان د فوټبال لیګ کې ۱۰ لوبډلې لوبېږي او سبا یکشنبه د نندارچیانو له حضور پرته پيلېږي.

له دې وړاندې پر تاجکستان له دې کبله سختې نیوکې شوې وې چې د نوي کال د رارسېدو جشن په اړه‌یې کنسرتونه او ورزشي پروګرامونه ترسره کړل.

د تاجکستان د روغتیا وزارت تأیید کړې چې دغه هېواد کې تر اوسه د کرونا هېڅ پېښه نه‌ده رامنځ ته شوې.

دغه هېواد کې ټول هغه کسان د دوو اوونیو لپاره قرنطین شوي وو چې تېره یوه میاشت کې له نورو هېوادونو تاجکستان ته ستانه شوي دي.

د ترکمنستان ولسمشر د کرونا ویروس په اړه خپله خاموشي پای ته ورسوله

د ترکمنستان ولسمشر قربانقلي بیردي محمدوف

د ترکمنستان ولسمشر قربانقلي بیردي محمدوف د جمعې په ورځ د کابینې په غونډه کې لومړی ځل په علني توګه د کرونا ویروس ټکی یاد کړ.

ده وویل چې کرونا ویروس په ټوله نړۍ کې د خپرېدو په حال کې دی او د ترکمنستان اقتصاد ته یې زیان اړولی دی.

ده امر وکړ چې د کرونا ویروس د خپرېدو د مخنیوي لپاره باید اقدامات وشي.

د شوري اتحاد دغه پخواني هېواد له ډيرې مودې راهیسي د کرونا ویروس په اړه څه نه دي ویلي او د دې ناروغۍ له کبله یې هيڅ ډول پېښې یا تلفات نه دي راپور کړي.

د بې پولې خبریالانو د معلوماتو له مخې د دې هېواد چارواکي د کرونا ویروس له ټکي یادولو ډډه کوي ځکه نه غواړي په دې اړه هیڅ ډول معلومات ورکړي.

بخښنې نړیوال سازمان: د روسیې د ډاکترانو ټولنې د رییسې نیول غندو

انستیسیا واسیلیوا

د بخښنې نړیوال سازمان د روسیې د ډاکټرانو ټولنې د رییسې انستیسیا واسیلیوا نیول کېدل غندلي دي.

دې سازمان پرون په یوه اعلامیه کې د روسیې د حکومت پر اقدام انتقاد وکړ.

واسیلیوا د کرونا ویروس د خپرېدو پر وړاندي د روسیې د حکومت پر غبرګون انتقاد کړی وو.

د دې په وینا، حکومت په دې ویروس د اخته کسانو شمېر کم اعلان کړی دی.

مېرمن واسیلیوا پرون د روسیې د ایالتي روغتونو د چمتووالي د ارزونې پر مهال ونیول شوه او تر لنډې محاکمې وروسته د ۱۶۰۰ روبل جریمې په بدل کې راخوشې شوه.

د روسیې د ډاکټرانو ټولنې په وینا ډاکټر واسیلیوا د پولیسو له لارښوونې او د هغوی له خوا له محدودیته په سرغړونه تورنه شوې.

د ورلډومیټر پاڼې د معلوماتو له مخې، په روسیه کې په کرونا ویروس د اخته شویو شمېر تر څلور زره او سلو کسانو زیات دی او همداراز څلوردېرش کسان مړه شوي دي.

روحاني: د امریکا بندیزونو له کرونا ویرس سره د ایران مبارزه زیانمنه کړې

حسن روحاني

د ایران ولسمشر حسن روحاني وايي، د دې هیواد پر وړاندي د امریکا اقتصادي بندیزونو د کرونا ویروس پر ضد د ایران د مبارزې توان زیانمن کړی دی.

روحاني د خپل هېواد د کابینې په غونډه کې وویل، یووالی، ښه مدریت او د روغتیايي کارکوونکو حضور ټول د دې لامل شول چې دوی له ستونزو سره مخامخ نشي.

ده همداراز وویل: "د ایران مرکزي بانک به د روان کال تر پایه د بهرنیو اسعارو د توزیع په برخه کې هیڅ ستونزه ونلري."

د امریکا د بندیزونو له کبله د ایران د تيلو عواید کم شوي دي او د دې هيواد اقتصاد ته یې زیان رسولی دی.

د دې وضعیت په نتیجه کې د ایراني ریال ارزښت کم شوی دی.

چک جمهوریت کې په کرونا ویروس د اخته کسانو شمېر ۳۸۰۰ ته ورسېد

په چک جمهوريت کې د اپرېل تر ۱۱مې د خلکو پر تګ راتګ بندیز لګېدلی و خو حکومت غوښتنه کړې چې دا وخت زیات شي.

د چک جمهوریت د عامې روغتیا وزارت نن د اپرېل په ۳مه، وویل چې په دې هېواد کې په کرونا ویروس د اخته کسانو شمېر ۳۸۰۰ ته رسېدلی دی.

په چک جمهوریت کې له دې امله د مړو شمېر ۴۶ ته لوړ شوی دی.

د دې هېواد حکومت نن وړاندیز وکړ چې د کرونا ویروس د لا خپرېدو د مخنیوي لپاره لګول شوی بندیز ۳۰ ورځې تمدید شي.

په چک جمهوريت کې د اپرېل تر ۱۱مې د خلکو پر تګ راتګ بندیز لګېدلی و خو حکومت غوښتنه کړې چې دا وخت زیات شي.

د چک جمهوریت حکومت د اضطراري حالت د تمدید پرېکړه پارلمان ته د تصویب لپاره استولې ده.

د چک پارلمان باید د حکومت دا پرېکړه تصویب کړي.

د کرونا ویروس سره د مبارزې لپاره د ملګرو ملتونو پرېکړه لیک

ارشیف

د ملګرو ملتونو عمومي اسمبلۍ د کرونا ویروس یا کوویډـ۱۹ په وړاندې د مبارزې لپاره دا تازه پرېکړه لیک په داسې حال کې تصویب کړ، چې په نړۍ کې په کرونا ویروس د اخته کسانو شمېر تر یو میلیون اوښتی دی.

د امریکا د جانز هاپکینز پوهنتون د معلوماتو له مخې، په دې ویروس په نړۍ کې د مړو شمېر تر ۵۳۰۰۰ کسانو زیات شوی دی.

دغه پرېکړه لیک په نړیوال روغتيايي او اقتصادي بحران کې د ملګرو ملتونو پر مرکزي رول ټینګار کوي او له سرمنشي انتونیو ګوتیریش غواړي چې د دې ویروس په وړاندې د نړيوال اقدام د متحرک او همږغي کولو هڅې رهبري کړي.

دغه پرېکړه لیک د سویس، اندونیزیا، سینګاپور، ناروې، لیختن شټاین او ګانه له خوا پېشنهاد شوی و، چې د رایو په اتفاق سره تصویب شو.

په یوه بل سیال پرېکړه لیک کې چې د روسیې له خوا پېشنهاد شوی و، د کرونا ویروس د چلنجونو په وړاندې د همکاري او د پیوستون پر اړتیا بحث شوی دی.

خو په دغه پرېکړه لیک کې د نړيوالو بندیزونو د عمومي لیرې کولو ضمني غوښتنه، د تجارتي جګړو او د داخلي تولیداتو د ملاتړ یا پروټکشنیزم د هڅو د ختمولو غوښتنه شوې ده.

خو یوازې څلورو هېوادونو د مرکزي افریقا جمهوریت، کیوبا، نیکاراګوا او وینزویلا د روسیې د پېشنهاد شوي پرېکړه لیک د متن ملاتړ وکړ.

خو اسوشېتېډ پرېس اژانس د ځینو ډیپلوماتانو وینا را اخیستې چې ویلي یې دي، اروپايي ټولنې، بریتانیا، د امریکا متحدو ایالتونو او اوکراین د روسیې پر پېشنهاد انتقاد وکړ.

د کرونا وایروس د خپرېدو د مخنیوي په هدف، عمومي اسمبلۍ غونډې نه کوي، بلکې د رایې ورکولو لپاره نوي اصول ټاکل شوي دي.

که یو هېواد هم انتقاد ولري، یو پرېکړه لیک ناکامه کېږي.

د عمومي اسمبلۍ له خوا تصویب شوي پرېکړه لیکونه لازم الاجرا نه دي، خو څومره چې یې ملاتړ کېږي، هغومره پیاوړی سیاسي اهمیت لرلای شي.

ټوله نړۍ کې په کرونا ویروس د اخته کسانو شمېر له یو میلیونه واوښت

ارشیف

په نړۍ کې په کرونا ویروس د اخته کسانو شمېر تېره شپه له یو میلیون لوړ شو.

د امریکا د جانز هاپکینز پوهنتون له خوا د ورکړل شویو ارقامو له مخې د اپریل تر دوهمې نېټې پورې د دې ناروغۍ له کبله له ۵۱۴۰۰ زیات کسان مړه شوي دي.

د دې پوهنتون څېړونکي باور لري چې په کرونا ویروس د اخته خلکو او د دې ناروغۍ له کبله د مړو اصلي شمېره ښايي تر ډېره لوړه وي ځکه له یوې خوا بېلابېل هېوادونه د احصاییو لپاره بېلابېلې طریقې لري او له بلې خوا هغه کېسونه چې په ناروغ کې خفیف علایم ښکارېږي نه شمېرل کېږي، د دې ناروغۍ د ټسټ امکانات کم دي او په ځینو هېوادونو کې یې خلک پټوي.

د جانز هاپکنیز پوهنتون د احصاییو له مخې د کرونا ویروس تر ټولو زیات مثبت موارد په امریکا کې دي چې شمېر یې پرون له ۲۳۶ زرو واوښت خو له دې کبله د مړو تر ټولو لوړه شمېره چې څوارلس زرو ته نژدې شوې ده په ایټالیا کې ده.

ناټو له کرونا ویروس سره د مبارزې لپاره مرسته وغوښته

د ناټو عمومي منشي ینس سټولټنبرګ

د ناټو د غړو هېوادونو د بهرنیو چارو وزیرانو پرون پنجشنبې د دې ټلوالې له جګپوړي پوځي افسر څخه وغوښتل چې د کرونا ویروس پرضد مبارزه کې له دوی سره مرسته وکړي.

د ناټو عمومي منشي ینس سټولټنبرګ د ویډیو کنفرانس له لارې د ناټو د بهرنیو چارو د وزیرانو غونډې وروسته دا اعلان وکړ.

د کرونا ویروس د خپرېدو د مخنیوي لپاره د محدودیتونو په لړ کې د ناټو په اویا کلن تاریخ کې د لومړي ځل د دې ټلوالې غونډه د ویډیو کنفرانس له لارې جوړېږي.

سټولټنبرګ وویل د غونډې ګډونوالو د امریکايي قواوو له جنرال ټاډ والټرز څخه چې اوس مهال د ناټو د هوايي ځواک د قرارګاه قوماندان دی وغوښتل چې د کرونا ویروس پرضد د مبارزې هڅې تنظیم کړي.

هغه زیاته کړه: "موږ پرېکړه وکړه چې خپل لوړرتبه قوماندان جنرال والټرز ته دنده ورکړو څو د کرونا ویروس پرضد د مبارزې لپاره لازم پوځي ملاتړ چمتو او د مرستو د رسولو چارې تنظیم او چټکې کړي."

د ناټو عمومي منشي زیاته کړه چې جنرال والټرز به د غړو هېوادونو او متحدانو له خوا په بېړنیو حالاتو کې اړو سیمو ته د هوا له لارې د روغتیايي تجهیزاتو رسول تنظیموي او همداراز د هوا له لارې د مرستو د رسولو په چارو کې به اسانتیا راولي.

پاکستان د امریکايي خبریال په وژنې تورن کس د مرګ سزا ختمه کړه

احمد عمر سعيد شېخ

د پاکستان يوې محکمې د امريکايي خبريال ډېنيېل پرل د وژنې په تور د نيول شوي کس د مرګ سزا ختمه کړې ده.

پر احمد عمر سعيد شېخ تور و چې په ۲۰۰۲م کال کې يې په کراچۍ کې د وال سټريټ ژورنال ورځپاڼې خبريال ډېنيېل پرل تر تښتولو وروسته وژلی و، خو د سند ایالت سترې محکمې د اپرېل په دوهمه عمر شېخ يوازې د تښتونې په جرم محکوم کړ او د هغه د مرګ سزا يې په اووه کاله بند واړوله.

بل‌خوا محکمې د پرل په وژنه د درېیو نورو تورنو کسانو د خوشې کولو امر هم وکړ.

۳۸ کلن ډېنيېل پرل د امريکايي ورځپاڼې وال سټريټ ژورنال د سوېلي اسيا څانګې مشر خبريال و.

ډېنيېل پرل
ډېنيېل پرل

نوموړی په امريکا کې د ۲۰۰۱م کال د سپټمبر ۱۱مې تر ترهګریزو بريدونو وروسته کراچۍ ته تللی و. هلته د ۲۰۰۲م کال د جنورۍ پر ۲۳مه وتښتول شو.

تر دې څلور ورځې وروسته "د پاکستان د خپلواکۍ د بحالۍ لپاره ملي خوځښت" په نوم يو تنظيم پيغام خپور کړ چې که په ۲۴ ساعتونو کې په ګوانتانامو کې بند پاکستانيان خوشې نه‌شول او پاکستان ته «اېف-۱۶» ډوله جنګي الوتکې ورنه‌کړل شوې، نو ډېنيېل پرل به ووژني.

تر دې وروسته د ۲۰۰۲م کال د فبرورۍ پر ۲۱مه پاکستاني چارواکو يوه وېډيو تر لاسه کړه چې د پرل وژل په‌کې ريکارډ شوي و.

نور راوښيه

XS
SM
MD
LG