د لاسرسي لېنکونه

سه شنبه ۲۹ زمری ۱۳۹۸ کابل ۰۵:۰۴

د اسرائیل صدراعظم راتلونکې اوونۍ اوکراین ته په رسمي سفر ځي


د اسرائیل صدراعظم بنیامین نتانیاهو

د اسرائیل صدراعظم بنیامین نتانیاهو د راتلونکې اوونۍ په پای کې اوکراین ته په رسمي سفر ځي.

دا به وروسته له هغې چې ولادیمیر زیلینسکي د اوکراین د ولسمشر په توګه دنده پیل کړې، د یوه بهرني هېواد لومړنی مشر وي چې له دې هېواد څخه کتنه ترسره کوي.

نتانیاهو به د اسرائیل لومړنی صدراعظم وي چې په شلو کلونو کې کییف ته ځي.

له اوکراین څخه مخکنۍ کتنه هم نوموړي د ۱۹۹۹ کال په مارچ کې چې هغه مهال هم د اسرائیل صدراعظم و، ترسره کړې وه.

نتانیاهو به په دغه درې ورځنۍ کتنه کې چې د اګست له اتلسمې ترشلمې یې ترسره کوي، د اوکراین له ولسمشر زیلینسکي سره وګوري او په کییف کې به د بابیان یار له یادګاري څلي څخه لیدنه وکړي.

دغه څلی د هغو له ۳۳ زرو زیاتو یهودانو، اوکرایني ملتپالو، روما ټبرو، همجنسپالانو او د نورو په یاد جوړ شوی چې په ۱۹۴۱ کال د جرمني نازیانو له خوا وژل شوي دي.

د اوکراین ولسمشر زیلنسکي د اګست په اوومه له اسرائیل سره د ازادې سوداګرۍ یو تړون چې یوه میاشت مخکې د دې هېواد پارلمان تصویب کړی و، لاسلیک کړ.

د دواړو هېوادونو ترمنځ د سوداګرۍ راکړه ورکړه تېرکال یو ميلیارډ او ۳۴۰ ميلیون ډالرو ته رسېده.

XS
SM
MD
LG