د لاسرسۍ وړ لېنکونه

تازه خبر
شنبه ۲۸ مرغومی ۱۳۹۸ کابل ۰۸:۳۸

افغانستان

د جوزجان په قرقین کې د طالبانو او امنیتي ځواکونو ترمنځ نښته شوې

د جوزجان یو انځور

د جوزجان په قرقین ولسوالۍ کې د وسله والو طالبانو او امنیتي ځواکونو ترمنځ نښته شوې ده.

د ۲۰۹ شاهین قول اردو په بیان کې چې پرون د اګست په نهمه خپور شوی، ادعا شوې چې په جوزجان کې شپږ وسله وال طالبان وژل شوي او ۲۵ تنه زخمیان شوي دي.

په بیان کې ویل شوي چې په دې نښته کې د فاریاب لپاره د وسله والو طالبانو د استخباراتو مشر مولوي عبادالله هم وژل شوی دی.

خو وسله والو طالبانو په دې اړه خبرې نه دي کړي.

د ورځې تازه خبرونه دلته ولولئ

کابل کې د امریکا سفارت د افغانستان برښنا شرکت پر کارکوونکو برید غندلی

په کابل کې د امریکا سفارت د افغانستان برښنا شرکت پر قردادي کارکونکو وروستۍ حمله په شدت غندلې ده.

د امریکا سفارت په دې اړه پر تویټر په یوه پیغام کې پرون، د جنورۍ په ۱۷مه لیکلي چې د برښنا شرکت کارکوونکو د افغانستان د حکومت او د امریکا د نړیوالو پراختیايي مرستو ادارې په ګډه پروژه کې د میلیونونه انسانو د ژوند د ښه کولو لپاره کار کاوه.

د افغانستان د برښنا شرکت تائید کړې چې د پنج شنبې په ورځ یې پنځه کارکونکي په زابل کې د برېښنا د مزو د ترمیم لپاره د کار په وخت د ماین په چاودنه کې ووژل شول.

په چاودنه کې د برښنا شرکت یو کارکونکی زخمي شوی دی.

د هغوي موټر د کلات او کندهار پر سرک، د شهر صفا ولسوالۍ په سوخت پل سیمه کې په ماین الوتی و.

په افغانستان کې د امریکا سفارت ټويټ کړی چې د برېښنا شرکت کارکونکي په داسې وخت کې وژل شوي چې خلکو ته یې د برق رسولو او د هغوی د ژوند د ښه کولوهڅه کوله.

د افغانستان تر ۱۹ کلنو کم عمره لوبډلې افریقا ته ماتې ورکړه

افغان لوبډله د راتلونکي چارشنبې او جمعې په ورځو د متحده عربي اماراتو او کاناډا له ټیمونو سره لوبې کوي

تر نولسو کلونو کم عمر کرکټ ټیمونو ترمنځ د یو ورځنیو نړیوالو سیالیو په لړ کې افغانستان خپلې سیالې د سویلي افریقا لوبډلې ته ماتې ورکړه.

لوبه افریقا پیل کړه او په دېرشم اور کې د ټولو لوبغاړو په سوځېدو ۱۲۹ منډې وکړې او افغانستان ته یې د ۱۳۰ منډو هدف وټاکه.

په ځواب کې افغانستان دغه هدف په پنځه ویشتم اور کې د دریو لوبغاړو په سوځېدو پوره کړ.

افغان لوبغاړو ابراهیم ځدران او عمران نیمه سلیزې ووهلې او شفیق الله غفاري بیا په توپ اچونه کې ښه وځلېد او د افریقا شپږ لوبغاړي یې وسوځول.

د افغانستان د کرکټ بورډ ویاند نن ازادي راډیو ته وویل چې افغان ټیم د لوبې لپاره بشپړه چمتووالی لري.

د افغانستان تر نولسو کلونو کم عمره ټيم بشپړه چمتووالی لري او شپږم ځل په نړیوال جام سیالیو کې ګډون کوي.

د هوتک په وینا، د افغانستان تر نولس کلنو کم عمره کرکټ ټیم د راتلونکي چارشنبې او جمعې په ورځو د متحده عربي اماراتو او کاناډا له ټیمونو سره لوبه کوي.

د جنوبي افریقا په کوربه توب د نولس کلنو کم عمر کرکټ نړیوال جام سیالۍ د شپاړسو هېوادونو په ګډون کیږي.

چارواکي: د عملیاتو پرمهال هلمند او بلخ کې ۸ طالبان وژل شوي

ارشیف

چاراکي وايي، په هلمند او بلخ کې د عملیاتو پرمهال ۸ طالبان وژل شوي دي.

د دفاع وزارت څخه په خپره شوې اعلامیه کې راغلي چې په هلمند کې په نهر سراج ولسوالي کې هوايي حمله شوې او شپږ طالبان يې وژلي.

اعلامیه لیکي چې د دغو عملیاتو پر مهال له طالبانو یې د وسلو یوه ډیپو او مهمات هم ترلاسه کړي دي.

وسله والو طالبانو تر اوسه په دې اړه رسنیو ته څه نه دي ویلي.

په همدې حال کې د ۲۰۹ شاهین قول اردو په اعلامیه کې راغلي چې په بلخ ولایت کې د چاربولک ولسوالۍ په رحمت اباد او نوارید کلیو کې د طالبانو او امنیتي ځواکونو تر منځ نښته شوې ده.

د خبرپاڼې په وینا په دې نښته کې دوه طالبان وژل شوي او د ملي اردو یو سرتېری ټپي شوی دی.

طالبانو په دې اړه هم تر اوسه رسنیو ته څه نه دي ویلي.

چارواکي: لوګر کې د طالبانو ۲ مشران وژل شوي

د لوګر مرکز پل علم

په لوګر کې د طالبانو دوه ډلمشران وژل شوي او دوه نور ژوندي نیول شوي.

د لوګر امنیتي چارواکي وایي، چې تېره شپه ګډو ځواکونو د دې ولایت د څرخ ولسوالۍ اړوند په نوې کلا سيمه کې عمليات ترسره کړي چې په وینا یې د وسله والو طالبانو دوه مهم ډلمشران وژل شوي دي..

د لوګر امنیه قوماندانۍ ویاند شاپور احمدزي نن د جمعې په ورځ له غرمې مخکې ازادي راډیو ته وویل، چې په يادو عملياتو کې د وسله والو طالبانو دوه مهم کسان هم نیول شوي دي.

دی وایي، په علمیاتو کې د وسله والو طالبانو یو پټنځای چې چاودېدونکي توکي او وسلې په کې ساتل کېدل هم په بشپړه توګه له منځه وړل شوی دی

تر اوسه وسله والو طالبانو ددې پېښې په اړه تبصره نه ده کړې.

غني: کابل ښاروالۍ دې ژر تر ژره د عامه ملکیتونو د غاصبانو نوملړ خپور کړي

افغان ولسمشر محمد اشرف غني

ولسمشر اشرف غني کابل ښاروالۍ ته امر کړی د عامه ملکیتونو د غاصبانو نوملړ ژرترژره خپور کړي.

د ولسمشرۍ ماڼۍ په یوه خبرپاڼه کې وايي ولسمشر غني پرون- پنجشنبې په ارګ کې د کابل ښار له یو شمېر استازو سره په کتنه کې وویل، هغه کسان چې د دې پرېکړې پر وړاندې خنډ جوړوي باید ممنوع الخروج اعلان او د قانون پنجو ته وسپارل شي.

د ارګ په خبرپاڼه کې راغلي چې په غونډه کې د کابل ښار د بېلابېلو ناحیو اوسېدونکو ولسمشر غني ته خپلې ستونزې او وړاندیزونه واورول.

خبرپاڼه زیاتوي، د ځمکو غصب او د زده کوونکو نجونو ځورول هغه ستونزې وې چې کابل ښاریانو یې د جدي مخنیوي غوښتنه وکړه.

د خبرپاڼې له مخې ولسمشر د کابل امنیه قوماندان ته امر وکړ چې د پلازمېنې- کابل د نجونو د ښوونځیو په شاوخوا او نورو عامه ځایونو کې د نجونو زده کوونکو د ځورولو د مخنیوي لپاره لازم اقدامات ترلاس لاندې ونیسي.

قریشي: طالبانو د تاوتریخوالي کمولو ته لېوالتیا ښودلې

د پاکستان د بهرنیو چارو وزیر، شاه محمود قریشي

د پاکستان د بهرنیو چارو وزیر شاه محمود قریشي نن د جنورۍ په ۱۶مه وویل چې طالبانو د تشدد کمولو ته لېوالتیا ښودلې او دا یو مثبت پرمختګ دی.

قریشي په یوه وېډیويي پیغام کې چې د پاکستان د بهرنیو چارو وزارت پر وېب‌پاڼه خپور شوی، ویلي چې له طالبانو دا غوښتنه کېده چې تاوتریخوالی راکم کړي او دا د امریکا او طالبانو د استازو ترمنځ د موافقې لپاره یو ګام و.

شاه محمود قریشي زیاتوي: "د امریکا او طالبانو خبرې له یوې مودې راهیسې روانې دي، پاکستان غوښتل چې د امن پر لور حرکت وشي، افغانستان او پاکستان امن ته اړتیا لري، نن یو ښه پرمختګ شوی، طالبانو څرګنده کړې چې د تاوتریخوالي د کمولو د غوښتنې منلو ته تیار دي."

په دوحه کې د وسله‌والو طالبانو یوې سرچینې د خپل هویت د پټ پاتې کېدو په شرط ازادي راډیو ته وویل چې د تاوتریخوالي د کمولو پر موافقه کار کېږي.

وروسته، اسوشیټډ پرس خبري اژانس د وسله‌والو طالبانو د سرچینو په حواله وویل چې هغوی په دې اړه د خپل وړاندیز سند پرون د امریکا پلاوي ته سپارلی دی.

خو د سولې په چارو کې د افغانستان د دولت وزیر سلام رحیمي نن په کابل کې خبریالانو ته وویل چې د تاوتریخوالي کمول بې‌مفهومه خبره ده او دوی اوربند غواړي.

زابل کې ماین چاودنې د برېښنا شرکت ۵ کارکوونکي وژلي

ارشیف

د زابل چارواکي وايي، د ماین چاودنې د برېښنا شرکت ۵ کارکوونکي وژلي دي.

دغه چارواکي زیاتوي دا ماین د کندهار-زابل پر لویه لار د زابل د شهر صفا ولسوالۍ په مربوطاتو کې د کندهار برېښنا شرکت د کارکوونکو پر مازدا موټر چاودېدلی دی.

د زابل د والي ویاند ګل اسلام سیال ازادي رادیو ته وویل چې دغه پېښه نن غرمه هغه مهال رامنځته شوې کله چې د برېښنا شرکت د قراردادي کارکوونکو موټر د عمومي سړک څخه فرعي سړک ته اوښتی او پر خښ شوي ماین برابر شوی دی.

تر اوسه د دې پېښې مسؤلیت چا پر غاړه نه‌دی اخیستی.

تنکیو ځوانانو ته د والیبال فني زده‌کړې ورکول کېږي

ارشیف

په کابل کې د والیبال تنکیو ځوانانو ته د والیبال لوبې د فني زده‌کړې یو ورځنی سمینار پیل شو.

په دغه سمینار کې به د والیبال لوبغاړو ته د دې لوبې د فني زده‌کړې ترڅنګ په دې لوبه کې د نړېوالو قوانینو په اړه هم معلومات ورکړل شي.

د افغانستان د ملي المپیک کمېټې ویاند مجیب قاري‌زاده له ازادي راډيو سره په خبرو کې وویل، د دې سمینار د جوړېدو هدف ځوانو او نویو ښځینه لوبغاړو ته د والیبال لوبې په اړه د یو شمېر طرزالعملونو ترڅنګ نړیوال معیارونه او قوانین هم په عملي بڼه وروښودل شي.

د ښاغلي قاري‌زاده په خبره، د افغانستان د المپیک ملي کمېټه نه‌یوازې والیبال، بلکې په یو شمېر نورو لوبو کې هم د لوبغاړو د استعداد لوړونې په برخه کې ورته سمینارونه په نظر کې لري.

د افغانستان ۱۹ کلنو کرکټ لوبډله سبا افریقا سره سیالي کوي

ارشیف

د افغانستان د ۱۹ کلنو کرکټ ملي لوبډله سبا ته د ۱۹ کلنو ۵۰ اوریز نړیوال جام سیالیو کې لومړۍ لوبه د سویلي افریقا سره ترسره کوي.

د افغانستان د کرکټ بورډ ویاند فرید هوتک له ازادي راډیو سره په خبرو کې وویل چې دغه لوبه به د افغانستان په وخت سبا د جمعې په ورځ ۱۲:۳۰ بجې پیل شي.

هېره دې نه‌وي چې د ۱۹ کلنو ترمنځ د کرکټ نړیوال جام سیالۍ راتلونکې جمعې ورځ د سویلي افریقا په کوربه‌توب د ۱۶ هېوادونو ترمنځ پيلېږي او د فبرورۍ میاشتې تر نهمې نېټې پورې دوام کوي.

افغان ۱۹ کلنه لوبډله د نړیوال جام په څلورم ګروپ کې د کوربه هېواد سویلي افریقا، متحده عربي اماراتو او کاناډا سره یوځای ده.

چارواکي: کندز کې ۷ پولیس وژل شوي

د کندز ښار یوه څنډه- ارشیف

په کندز کې چارواکي وايي، خان‌اباد ولسوالۍ کې ۷ افغان پولیس وژل شوي دي.

په کندز کې د افغان ملي پولیسو او وسله‌والو طالبانو په نښتو کې دواړو لورو ته مرګ‌ژوبله اوښتې ده.

د کندز ولایت امنیه قوماندان جنرال عبدالرشید بشیر نن سهار ازادي راډیو ته تأیید کړه چې ۷ پولیس تېره شپه د خان‌اباد ولسوالۍ په ګدام سیمه کې د وسله‌والو طالبانو په برید کې وژل شوي.

هغه وویل چې د پولیسو په ځوابي ډزو کې ۱۰ وسله‌وال طالبان هم مړه او ټپیان شوي دي.

د وسله‌والو طالبانو ویاند ذبیح‌الله مجاهد بیا ادعا کوي چې اوه پولیس‌یې وژلي او د هغوی یو ټانک‌یې تخریب کړی دی.

دی نه‌تأییدوي چې کوم طالب وسله‌وال دې وژل شوی وي، خو یوازې د یوه تن ټپي کېدل مني.

ناپېژانده وسله‌والو فاریاب کې د استېناف محکمې یو قاضي وژلی

ارشیف

په فاریاب کې د استېناف محکمې یو قاضي نن سهار په ډزو ووژل شو.

د دې ولایت د امنیه قومندانۍ ویاند کریم یورش ازادي راډیو ته وویل چې د استېناف د محکمې د جزا د دیوان قاضي غلام فاروق نن سهار د لمانځه د ادا کولو لپاره جومات ته روان و چې ناپېژانده وسله‌والو پرې ډزې وکړې او هغه‌یې وواژه.

ښاغلي یورش وویل، وسله‌وال په تېښته بریالي شوي او د پېښې په اړه پلټنې پیل شوې دي.

تر اوسه چا یا کومې ډلې د دې قاضي د وژلو مسئولیت پر غاړه نه‌دی اخیستی.

روان کال له کندهاره ۱۶۷ زره ټنه سبزیجات پاکستان ته صادر شوي

ارشیف

د کندهار ولایت د سوداګرۍ او صنایع خونې چارواکي وايي، د روان لمریز کال په لومړیو ۹ میاشتو کې له دې ولایت څخه پاکستان ته ۱ لکو ۶۷ زره ټنه سبزیجات صادر شوي.

د دې خونې مرستیال انجینیر عبدالباقي د پنجشنبې په ورځ له ازادي راډيو سره په خبرو کې وویل، په دې صادر شويو سبزیجاتو کې پیاز، بادرنګ او ګلپي شامل دي.

د ښاغلي عبدالباقي په خبره، د دې صادر شویو سبزیجاتو مجموعي قیمت ۲۱۳ میلیونه ډالره دی.

د کندهار ولایت د سوداګرۍ او صنایع خونې مرستیال همدا شان وايي چې د تېر کال په پرتله سږ کال د سبزیجاتو په صادراتو کې د پام وړ زیاتوالی راغلی.

'راتلونکې اوونۍ کابل کې د ګازو بیې ټیټېږي'

په کابل ښار کې د هوا په سړېدو سره د یو کیلو ګازو بیه ۱۱۵ افغانیو ته پورته شوې.

د افغانستان د سوداګرۍ او صنایعو خونه وايي، راتلونکې اوونۍ به په کابل ښار کې د ګازو قیمت د پام وړ راښکته شي.

د دې خونې ویاند جان اقا نوید د پنجشنبې په ورځ له ازادي راډيو سره په خبرو کې وویل، د افغانستان د سوداګرۍ او صنایع خونې چارواکو د نفتي توکو له یو شمېر سوداګرو سره په دې توافق رسېدلي چې د هرات او شمالي ولایتونو څخه یو شمېر د ګازو لوی ټانکرونه کابل ته انتقال کړي.

د ښاغلي نوید په خبره، له یادو ولایتونو څخه د ګازو یو شمېر ټانکرونو د کابل په لوري حرکت کړی چې تر راتلونکې دوه درې ورځو پورې به کابل ته راورسېږي.

د افغانستان د سوداګرۍ او صنایع خونې چارواکي، په داسې حال کې دا څرګندونې کوي چې په کابل ښار کې د هوا په سړېدو سره د یو کیلو ګازو بیه ۱۱۵ افغانیو ته پورته شوې چې د کابل ښاریانو اندېښنې یې زیاتې کړې دي.

افغانستان کې وروستیو ورښتونو ۴۰ کسانو ته مرګ ژوبله اړولې

ارشیف

په افغانستان کې د وروستیو ورښتونو تلفات شمېر ۴۰ کسانو ته ورسېد.

طبیعي پېښو ته د رسېدو د چاور وزارت ویاند احمد تمیم عظیمي وایي چې ۶۰ تنه نور ټپيان شوي دي.

ښاغلی عظیمي زیاتوي: "تر ۳۰۰ ډېر کورونه زیانمن شوي، ۲۰ کورونه بېخي یو مخ نړېدلي. د سر او مال ډېر زیان په کندهار، هلمند، زابل، ارزګان، هرات او غزني کې اوښتی."

ښاغلي عظیمي زیاته کړه چې د هوا پېژندنې د ادارو له اټکل سره سم به سر له نننه د افغانستان په شمال او شمال ختیځ کې ورښتونه کم شي او په یو شمېر جنوبي او جنوب ختیځو ولایتونو کې به اسمان وریځ وي.

سیګار د افغان ځواکونو پر روزنه نیوکه وکړه

یو شمېر امریکايي سرتېري په افغانستان کې د امنیتي ځواکونو د روزنې پر مهال

د افغانستان د بیارغونې لپاره د امریکا متحده ایالاتو سرمفتش یا سیګار د افغان ځواکونو پر روزنه نیوکه وکړه.

جان سوپکو په واشنګټن کې د استازو جرګې د بهرنیو اړیکو کمېټې ته پرون وویل: "افغان پولیس له شپږو نیولې تر نهه میاشتو پورې روزل کېږي او په دې برخه کې باید پوځ ملامته نه‌شي، خو څرنګه کېدای شي چې د بلک هاک الوتکې پیلوټ، افغان پولیس ورزوي او دا هغه څه دي چې موږ لاهم ادامه ورکوو."

جان سوپکو وویل چې په افغان ځواکونو کې اداري فساد شته او دا فساد د دوی پر مؤثریت منفي اغېز کړی دی.

نوموړي په ورته وخت کې وویل چې بهرنیانو د امنیت د ټینګښت لپاره په ګڼو مواردو کې جنګسالارانو ته پیسې ورکړې دي چې ولایتونه او ولسوالۍ اداره کړي.

د ده په وینا که څه هم متحده ایالاتو دوی ته خبرداری ورکړی و چې رشوت به نه‌اخلي او په ځینو مواردو کې له یو شمېر کسانو سره حساب شوی دی، خو دغو جنګسالارانو ډېر افغانان مجبوره کړي دي چې طالبانو ته مخه کړي.

د افغانستان د بیارغونې د سرمفتش دفتر یا سیګار په ۲۰۰۸ میلادي کال کې جوړ شو چې په افغانستان کې د امریکا د دفاع وزارت، د بهرنیو چارو وزارت او د امریکا د نړیوالې پراختیایي مرستو د کارونو څارنه وکړي.

نور راوښيه

XS
SM
MD
LG