د لاسرسۍ وړ لېنکونه

تازه خبر
دوشنبه ۵ غبرګولی ۱۳۹۹ کابل ۰۲:۲۵

افغانستان

د پکتیا ولایتي شورا: طالبانو له لویې لارې له بیولو کسانو ۷ تنه وژلي

د افغانستان په عمومي نقشه کې پکتیا ولایت

د پکتیا ولایتي شورا وایي د مرکز ګردېز او ډنډ پټان ولسوالۍ په لویه لاره وسله‌والو طالبانو د تلاشیو پر مهال یو شمېر کسان له ځان سره بیولي چې له جملې یې اووه تنه وژل شوي دي.

د پکتیا ولایتي شورا غړي تاج محمد منګل ازادي راډیو ته وویل چې وسله‌والو یاد کسان د کړکین په سیمه کې له موټرو ښکته کړي او وروسته‌یې وژلي دي.

یوې بلې سرچینې چې نه‌یې غوښتل نوم‌یې واخیستل شي، ازادي راډیو ته وویل چې وژل شوي ټول کسان د ملي اردو سرتېري دي چې کورونو ته په رخصتۍ روان و.

خو په پکتیا کې د ۲۰۳ تندر قول اردو عمومي قوماندان او مطبوعاتي ټیم تر اوسه د دې پېښې او د وژل شویو کسانو د هویت په اړه رسنیو ته څه نه‌دي ویلي.

بل‌خوا وسله‌والو طالبانو هم تر اوسه رسمي نه‌ده تأیید کړې چې یاد کسان دې دوی له موټرو ښکته کړي او وژلي وي.

د ورځې تازه خبرونه دلته ولولئ

مسعود اندرابي: د طالبانو هر عمل ته عکس‌العمل ښیو

د افغانستان کورنیو چارو سرپرست وزیر مسعود اندرابي لوګر کې ځانګړو پولیسو ته د وینا پر مهال.

د افغانستان د کورنیو چارو سرپرست وزیر محمد مسعود اندرابي وايي که وسله‌وال مخالفین سوله غواړي افغان امنیتي ارګانونه‌یې چمتووالی لري او که د جنګ لار مخته وړي دوی یې هم په وړاندې درېږي.

هغه دا خبرې پرون په لوګر کې د ځانګړو پولیسو د قطعې له سرتېرو سره په لیدنه کې وکړې.

هغه زیاته کړه: "که دوی سوله غواړي نو موږ یې مراعات کوو او که د افغانستان د خلکو دښمنان جنګ کوي، نو موږ یې مقابله کوو او کلک ځواب ورکوو. لکه څنګه مو چې په تېرو ۱۸ کلونو په تېره بیا به په همدې وروستۍ روژه کې چې دوی خپلې حملې ډېرې کړې وې ځواب ورکړ او موږ کلکه مرګ‌ژوبله ورته واړوله. له دې وطن، خلکو او ملکي تأسیساتو موږ دفاع وکړه او ان‌شاءالله دا به ادامه کوي."

افغان حکومت وايي چې طالبانو ته د دوی د سولې او خبرو وړاندیز له کمزوري نه، بلکې له یوه پياوړي دریځه کوي او هدف‌یې یوې دایمي سولې او اوربند ته رسېدل دي.

د افغانستان د کورنیو چارو وزیر دا څرګندونې داسې وخت وکړې چې لومړی طالبانو او بیا افغان حکومت د همدې کوچني اختر په ورځو د اوربند اعلان کړی دی.

لوګر کې وسله‌والو طالبانو یو شمېر خلک وهلي او ټپیان کړي

د لوګر ولایت نقشه

د لوګر ولایت په سرخاب کې پرون وسله‌والو طالبانو یو زیات شمېر ولسي خلک وهلي چې له ډلې یې اووه کسان سخت ټپيان شوي.

سرخاب د افغانستان د جمهور رئیس محمد اشرف غني پلارنی ټاټوبی دی چې ډېره برخه‌یې د وسله‌والو طالبانو په کنټرول کې ده.

د سرخاب د کلي ځینو اوسېدونکو چې نه‌غواړي نومونه‌یې واخیستل شي ازادي راډیو ته وویل د دوی کلیوال د درې په نوم د طالبانو تر کنټرول لاندې سیمې ته ورغلي و څو له طالبانو وغواړي چې د دوی ملا امام ورخوشې کړي، خو هغوی یې ووهل او ټپیان‌یې کړل.

د طالبانو ویاند ذبیح‌الله مجاهد هم ازادي راډیو ته په یوه پيغام کې پېښه تأیید کړې، خو ویلي یې دي چې ځینو اربکیانو (محلي پولیسو) د پوستو د جوړولو هڅه کوله او د دوی تر کنټرول لاندې سیمې ته ورغلي و چې تر لنډې نښتې وروسته بېرته په شا شول.

تخار کې د ۲ قوماندانانو ټوپکوالو نښته کې ۱۰ تنه کسان وژل شوي

د تخار نقشه

د تخار سیمه‌ییز چارواکي وايي چې یکشنبه په کلفګان ولسوالۍ کې د دوو غیر مسؤله قوماندانانو ټوپکوالو نښته کړې او د یو بل لس کسان‌یې سره وژلي دي.

د تخار د والي ویاند محمد جواد هجري په دې اړه ازادي راډیو ته وویل: "د شیر علي او مهدي په نوم دوو غیر مسؤله وسله‌والو قوماندانانو سره نښته کړې. په ډزو کې د دواړو خواو ۱۰ کسان وژل شوي چې قوماندان مهدي هم په‌کې شامل دی. پنځه نور کسان ټپیان دي."

ښاغلي هجري وویل چې پولیسو ځانونه د پېښې ځای ته ورسول او نښته‌یې غلې کړه او هڅه کوي چې مجرمین ونیسي.

د دې پېښې اصلي علت لا نه‌دی په ډاګه، خو د راپورونو په اساس په شمال کې اکثر غیر مسؤل قوماندانان داسې نښتې په سیمه کې په یو بل د برترۍ او په قاچاق او غلاوو کې په نه‌جوړ راتلو سره کوي چې په‌کې تر دوی زیات ملکیانو ته تاوان اوړي.

پر بګرام هوايي اډه د توغندیو برید شوی

هغه موټر چې توغندي په کې ځای پرځای شوي وو او بګرام اډه یې هدف ګرځولې وه.

د بګرام پر هوايي اډې نن له غرمې مخکې د توغندیو برید وشو.

د راپورونو له مخې دوه بي ام یو ډوله توغندي چې په یوه موټر کې ځای پرځای شوي وو، شاوخوا یوولس بجې د بګرام پر هوايي اډې چې د نړیوالو ځواکونو لوی مرکز پکې دی، وتوغول شول.

په پروان ولایت کې د امنیتي ځواکونو د همغږۍ د مرکز قوماندان الوزي احمدي د دې خبر د تایید ترڅنګ آزادۍ راډیو ته وویل چې دا توغندني بګرام اډې ته نژدې راپرېوتي دي او تلفات نه لري.

د دې حملې مسوولیت تر اوسه کومې ډلې نه دی منلی.

چارواکي: غزني کې دوو پېښو ۷ تنو ملکیانو ته مرګ ژوبله اړولې

ارشیف

چارواکي وايي، په غزني کې دوو پېښو کې ۷ تنه ملکیانو ته مرګ ژوبله اوښتې ده.

د غزني ولایت په قره باغ ولسوالۍ کې په یو کور د هاوان د مرمۍ د لګېدو په ترڅ کې ۵ ماشومانو ته مرګ ژوبله اوښتې.

د ولایت ویاند وحیدالله جمعه زاده د یکشبې په ورځ ازادي راډیو ته وویل: "د غزني ولایت قره باغ ولسوالۍ د موشکي په سیمه کې پر یو کور د هاوان مرمۍ د لګيدو له امله یو ماشوم وژل شوی او ۴ نور ټپیان دي، په ټپیانو کې هم د دوو تنو حالت د اندېښنې وړ دی."

ښاغلي جمعه زاده زیاتوي، د غه پېښه تېره شپه ناوخته هغه مهال رامنځته شوې ده.

جمعه وویل، د دې ترڅنګ نن سهار د غزني په مقر ولسوالۍ کې د امنيتي سرتېرو په یوه هدیره کې وسله والو درې کړۍ ماینونه ځای پر ځای کړي وو چې یوه یې چاودنه کړې او دوه ملکي کسان یې ټپیان کړي دي.

د هغه په خبره، دوه نور یې د امنیتي ځواکونو له لوري شنډ شوي دي.

وسله والو طالبانو تر دې مهاله په دې اړه څه نه دي ویلي.

جمعه زاده وایي، د دغه ولایت د مقر ولسوالۍ په لړمه سیمه کې وسله والو طالبانو د دولت په اکمالاتي موټریز کاروان برید کړی، چې له کلک غبرګون سره مخ شوي.

هغه زیاتوي، په دغه برید کې کوم لوري ته زیان نه دی اوښتی.

سرپل کې یو شمېر ښځو د اختر لمونځ ادا کړ

دوی د اختر په لمانځه کې په هېواد کې د سولې او ثبات د ټینګښت لپاره دعا وکړه.

په سرپل ولایت کې نن یو شمیر مېرمنو د اختر په لمانځه کې ګډون وکړ.

د سرپل د ښځو د چارو رییسې نبیلا حبیبي آزادۍ راډیو ته وویل چې د سرپل د امام خرد سیمې په جامع جومات کې نن شاوخوا سلو مېرمنو د اختر لمونځ په جماعت ادا کړ خو نوموړې زیاته کړه چې دوی د عامې روغتیا وزارت ټولې روغتیايي سپارښتنې په پام کې نیولې وې.

مېرمن حبیبي زیاته کړه چې دوی د اختر په لمانځه کې په هېواد کې د سولې او ثبات د ټینګښت لپاره دعا وکړه.

چارواکي: د هاوان مرمۍ لګېدو لغمان کې ۴ ماشومان وژلي

ارشیف

تېره شپه د لغمان د علیشنګ ولسوالي د سالاب ګردي په سیمه کې پر یوه کور د هاوان مرمۍ د لګېدو په پېښه کې ۴ ماشومان ووژل شول.

د لغمان د والي ویاند اسدالله دولتزي شېبه وړاندې ازادي راډيو ته تایید کړه چې تېره شپه شااوخوا نهه بجې د قدیر په نامه د یوه کس پر کور د هاوان مرمۍ لګېدلې چې له امله یې د دې کورنۍ ۴ تنه وژل شوي دي.

د ښاغلي دولتزي په خبره چې په پېښه کې همداشان د یادې کورنۍ ۷ نور غړي ټپیان شوي چې اوس تر درملنې لاندې دي.

دا په داسې حال کې د چې د پېښې د ځای اوسېدونکي نن د لغمان مرکز مهترلام کې د اعتراض په ډول راټول شوي وو او له مسؤلینو یې غوښتنه کوله چې د پېښې عاملین پیدا او د قانون منګلو ته وسپاري.

خو د لغمان د والي ویاند وایي چې نن مسؤلینو ته دنده سپارل شوې څو معلومه کړي چې هاوان چا او له کوم لوري توغولی دی.

په دې اړه نور تفصیل نه دی ورکړی شوی خو مهترلام کې راټول شوي معترضین وایي، د جنګ لوري د عامو خلکو د د سر او مال ساتنې په اړه جدي نه دي او په جګړو کې تل عام خلک زیانمنېږي.

د افغانستان د عالمانو د شورا مشر مولوي قیام الدین کشاف ومړ

مولوي قیام الدین کشاف

د افغانستان د عالمانو د شورا مشر او مخکښ دیني عالم مولوي قیام الدین کشاف په حق ورسيد.

د افغانستان د ارشاد حج او اوقافو وزارت ویاند فضل محمد حسیني ازادۍ راډيو ته وویل چې کشاف د ناروغۍ له کبله په حق رسېدلی دی.

کشاف له څو کلونو راهیسې د افغانستان د عالمانو د سراسري شورا مشر و.

هغه د افغانستان د جګړې د مذهبي توجیهاتو په برخه کې د طالبانو او افراطي عالمانو پر وړاندې د غوڅ دریځ په نیولو مشهور و.

بغلان چارواکي: وسله واله نښته کې ۶ کسان وژل شوي

ارشیف

د بغلان ولایت په بنوی اندراب ولسوالۍ کې نن د اختر له لمانځه وروسته په یوه وسله واله نښته کې ۶ کسان وژل شوي دي.

د اندراب ولسوال محمدمنصور عزیزي آزادۍ راډیو ته وویل چې نښته د اختر له لمانځه یو ساعت وروسته په خوشدرې سیمه کې دوو کورنیو د دښمنۍ په نتیجه کې شوې.

ښاغلي عزیزي په دې اړه نور جزییات ورنه کړل خو ویې ویل چې پولیس سیمې ته استول شوي او موضوع به له څېړنو وروسته روښانه شي.

د ملګري ملتونو سرمنشي افغانستان کې د اختر پر مهال د اوربند هرکلی وکړ

د ملګرو ملتونو سرمنشي انټونیو ګوټیریش

د ملګرو ملتونو سرمنشي په افغانستان کې د حکومت او طالبانو له خوا د اوربند هرکلی کړی.

د ملګروملتونو ویاند نن په یوه خبرپاڼه کې د انټونیو ګوټیریش له قوله لیکي چې نوموړی د افغانستان د جګړې پر ټولو ښکېلو غږ کوي چې له دې فرصت څخه ګټه واخلي او د افغانانو په مشرۍ د سولې په بهیر کې برخه واخلي.

د بیان له مخې سرمنشي ویلي چې یوازې سوله ییز حل د افغانستان جګړه پای ته رسولی شي.

ښاغلي ګوټیریش ویلي چې ملګري ملتونه په دې مهمه پروسه کې د افغانستان د خلکو او حکومت ملاتړ ته ژمن دی.

طالبانو پرون خپلو جنګیالیو ته اعلان وکړ چې د دولتي ځواکونو پرضد دې عملیات نه کوي او که برید پرې کېږي نو یوازې د ځان دفاع دې وکړي.

افغان حکومت هم سمدستي د دې اعلان هرکلی وکړ او وسله والو ځواکونو ته یې امر وکړ چې پر طالبانو دې حملې نه کوي.

ولسمشر اشرف غني نن په ارګ کې د کوچني اختر په مناسبت د وینا پر مهال د بندیانو د خوشې کولو د بهیر د چټکولو غوښتنه وکړه.

د بندیانو د خوشې کولو بهیر وروسته له هغه وځنډېده چې د افغانستان د ملي امنیت شورا د غويي په ۲۲مه نېټه وویل د حکومت له خوا د ۱۰۰۰ تنو طالب بندیانو د خوشې کولو په بدل کې طالبانو هم باید ۲۰۰ افغان سرتېري ازاد کړي وای خو دا کار یې نه دی کړی.

د افغانستان د سولې لپاره د متحدایالاتو ځانګړي استازي زلمي خلیلزاد او د امریکايي ځواکونو ویاند هم د دې اوربند هرکلی کړی دی.

نن د افغانستان په ګډون په اسلامي هېوادونو کې اختر لمانځل کېږي

د افغانستان د حج او اوقافو وزارت د اختر په ورځو کې خلکو ته جوماتونو ته د تګ په اړه ځانګړی اعلان نه دی کړی خو له خلکو یې غوښتنه کړې چې د اختر په درېیو ورځو کې دي له کورونو نه وځي.

د افغانستان په ګډون د نړۍ د اسلامي هېوادونو خلک نن، یک شنبه د مې ۲۴مه، د کوچني اختر لومړۍ ورځ لمانځي.

په داسې حال کې چې په افغانستان کې د کرونا ویروس مثبتې پېښې لس زرو ته رسېدلې دې.

د افغانستان د عامې روغتیا وزارت پرون پر خلکو غږ وکړ چې د اختر په درېیو ورځو کې دې په کورونو کې پاتې شي.

د افغانستان د حج او اوقافو وزارت د اختر په ورځو کې خلکو ته جوماتونو ته د تګ په اړه ځانګړی اعلان نه دی کړی خو له خلکو یې غوښتنه کړې چې د اختر په درېیو ورځو کې دي له کورونو نه وځي.

په پاکستان کې خلکو ته اجازه ورکړ شوې چې جوماتونو ته ولاړ شي او په ایران کې له مسلمانانو غوښتنه شوې چې تر دېرش دقیقې زیات وخت دي په جومات کې نه تېروي.

اخوا په هند او بنګله دېش کې تر ۱۰۰ زیات وګړي د سخت طوفان له امله مړه شوي او میلیونونه وګړي بې کوره شوي دي.

چارواکو پرون، د مې په ۲۳مه، وویل چې د امفان په نوم دې سخت طوفان په بنګله دېش او د هند په ختيځو سیموکې زرګونه انسانانو ته مالي تاوان رسولی دی.

ویل کېږي چې داسې سخت طوفان په وروستۍ یوه لسیزه کې پر سیمه نه دی راغلی.

سخت باد، باران او تالندې د هند په لویدیز بنګال کې اته تنه مړه کړي او په بنګله دېش کې ۲۲ تنه مړه شوي دي.

په بنګله دېش او هند په ختیځو سیموکې د برېښنا مزي پرې شوي، د پاکو اوبو کانالونه یې بند کړي او دخلکو کرنیزې ځمکې او کورونه یې تخریب کړي دي.

د هند د لویدیز بنګال ایالتي وزیرې ممتا بنرجي پرون وویل چې دا یو لوی ملي بحران دی او فدرالي حکومت باید مرسته وکړي.

ویل کېږي چې تر یو میلیون زیات کورونه ویجاړ شوي او پینځلس میلیونه انسانو ته زیان رسېدلی دی.

ویل کېږي چې په سیمه کې د دریالس میلیارد ډالرو تاوان پېښ شوی دی.

افغان حکومت: طالبانو ټوله روژه کې له ۵۰۰ زیاتو ملکیانو ته مرګ ژوبله اړولې

خوست کې د بمي چاودنې وروسته د سیمې انځور- 12.5.2020

د افغانستان د ملي امنیت شورا وایي، طالبانو په ټوله روژه کې څه باندې ۵ سوه ملکي افغانان وژلي او ټپیان کړي دي.

د دغې شورا ویاند جاوید فیصل رسنیو ته په استول شوي پيغام کې ویلي، د روژې په میاشته کې د افغانستان نژدې ټول ولایتونه د طالبانو د بریدونو شاهدان وو.

هغه زیاته کړه: "طالبانو د ټولو اسلامي او انساني ارزښتونو خلاف، په روژه کې هم وینه تویدنه جاري وساتله، دوی په ۳۰ ولایتونو کې بریدونه وکړل چې ترڅ کې یې ۵۷۶ ملکیان وژل او ټپيان شوي دي."

د طالبانو ویاند ذبیح الله مجاهد بیا ویلي، د دوی له خوا د ملکیانو د مرګ ژوبلې ادعا حقیقت نه لري.

مجاهد زیاته کړې ملکیان د حکومت پلوه ځواکونو په هوایي بریدونو کې وژل کېږي.

د یوناما راپور بیا ښيي چې د ۲۰۲۰ کال لومړۍ ربعه کې نژدې ۱۳ سوه ملکي افغانان جګړو کې وژل یا ټپیان شوي دي چې د راپور پر بنسټ د ۳۹ فیصده مرګ ژوبلې عاملین طالبان ،د ۳۲ فیصده حکومت پلوه ځواکونه او د ۱۳ فیصده هغو داعش جنګیالي یاد شوي دي.

عامې روغتیا وزارت: تېرو ۲۴ ساعتونو کې د کرونا ویروس ۷۸۲ مثبتې پېښې ثبت شوي

چارواکي وایي، که د ګرځبندیز او روغتیایي سپارښتنو په اړه د خلکو بې پروایي همداسې دوام ولري، دا وبا نوره هم زیاتېدای شي.

د افغانستان د عامې روغتیا وزارت شمېرې ښيي چې دغه هېواد کې ورځ تر بلې د کرونا ویروس پېښې زیاتېږي.

د دغه وزارت مرستیال وحیدالله مجروح نن خبریالانو ته وویل، تېرو ۲۴ ساعتونو کې یې ۱۵۶۲ مشکوک کسان معاینه کړي چې د ۷۸۲ هغو پایله مثبته راوتلې.

هغه وویل: "تېرو ۲۴ ساعتونو کې د کرونا ۷۸۲ پېښې لرو، ۱۱ تنه مړه شوي دي، ۴۴ روغ شوي دي، له دې سره په افغانستان کې په کرونا د اخته شویو کسانو شمېر ۹۹۹۸ ته ورسېد، ۲۱۶ کسان مړه شوي او ۱۰۴۰ تنه روغ شوي دي."

له دې سره په ټول افغانستان کې د کرونا پېښې نژدې لس زرو ته ورسېدې.

د عامې روغتیا وزارت وایي، که د ګرځبندیز او روغتیایي سپارښتنو په اړه د خلکو بې پروایي همداسې دوام ولري، دا وبا نوره هم زیاتېدای شي.

د لوګر ولایتي شورا: پل علم زندان کې یو کس د کرونا ویروس له امله مړ شوی

ارشیف

د لوګر ولسي استازي وایي، د پل علم ښار په زندان کې یو سپین ږیری بندي د کرونا ویروس له کبله مړ شوی دی.

د لوګر د ولایتي شورا مشر حسیب الله ستانکزي ازادي راډیو ته وویل، زندان کې مشکوک یو شمېر کسان معاینه شوي چې د ځینو هغوی نتیجې مثبتې راوتلي.

هغه زیاته کړه: "یو تن چې محبس کې کرونا نیولی و، سپین ږیری و او مړ شوی دی، پر دې سربېره څلور نور زندانیان هم کرونا نیولي دي."

ښاغلی ستانکزی وایي، تر دې پېښې وروسته زندانیانو د دې لپاره د نه خوړو اعتراض کړی چې د ولسمشر د بخښنې ځانګړی فرمان سم نه دی عملی شوی.

د لوګر امنیه قومندانۍ وایي، زندانیانو اوس خپل اعتصاب پای ته رسولی دی.

خوست چارواکي: په لکڼو سیمه کې ۴ ماین خښوونکي نیول شوي

ارشیف

د خوست چارواکي وایي، د مرکز اړوند لکڼو سېمه کې یې ۴ ماین خښوونکي نیولي دي.

د خوست د پولیسو ویاند عادل حیدر ازادي راډیو ته وویل، دغه کسان تېره شپه د پولیسو له خوا هغه مهال لاس په لاس ونیول شول چې د ماین په ایښودو لګیا وو.

دغه کسان له هغه وروسته نیول کېږي چې خوست کې دې وروستیو کې د ماین چاودنو او ځان مرګو څو پېښې وشوې.

د دغه ولایت امنیه قومندان سید احمد بابازی هم دوه اوونۍ وړاندې د ماین چاودنې وواژه.

د خوست د امنیه قوماندانۍ ویاند زیاتوي، یوازې په تېره یوه اوونۍ کې ۱۵ کړۍ ماینونه چې د حکومت د وسله والو مخالفینو لخوا د دې ولایت د بېلابېلو سیمو په عمومي لارو کې ځای پر ځای شوي وو، د پولیسو لخوا شنډ شوي دي.

نور راوښيه

XS
SM
MD
LG