د لاسرسۍ وړ لېنکونه

تازه خبر
سه شنبه ۶ غبرګولی ۱۳۹۹ کابل ۰۵:۳۶

افغانستان

د سولې ولسي حرکت په کابل کې پرلت وهي

په کابل کې د سولې ولسي حرکت یو شمېر غړي

د سولې ولسي حرکت نن "چهارشنبه" په کابل کې د ملګرو ملتونو د دفتر مخې ته پرلت وهي.

د سولې ولسي حرکت په یو بیان کې ویلي، هدف‌یې دا دی چې دا سازمان په افغانستان کې خپلو مسؤلیتونو ته متوجې کړي.

د سولې د ولسي حرکت ویاند بسم‌الله وطندوست تېره شپه ازادي راډیو ته وویل، د کړکېچونو حل د ملګرو ملتونو له مسؤلیتونو څخه دی، خو دې سازمان له بده مرغه د افغانستان د کړکېچ په هواري کې تر اوسه هېڅ کار نه‌دی ترسره کړی.

بسم‌الله وطندوست وايي: "له دوی څخه غواړو چې ولې د روانو وژنو په اړه چپ پاتې دي. ایا د ملګرو ملتونو دنده یوازې د مړو شمېرل دي. ولې د سولې په پروسه کې ولس نه‌شته. موږ په همدې خاطر لاریون کوو او بیا د دوی د دفتر مخې ته د اعتراض په توګه کېنو."

د سولې ولسي حرکت تېر کال په هلمند کې له یوې خونړۍ حملې راهیسې پیل شو او له هغې راوروسته‌یې بېلابېلو ولایتونو او سیمو ته د سولې له پیغام سره سفرونه کړي چې د جګړې ښکېل لوري یې سولې او اوربند ته رابللي دي.

د ورځې تازه خبرونه دلته ولولئ

افغانستان کې د کرونا ویروس د مثبتو پېښو شمېر ۱۱،۱۷۳ ته ورسېد

ارشیف

د افغانستان عامې روغتیا وزارت وایي په تېرو ۲۴ ساعتونو کې په دې هېواد کې ۵۹۱ کسان په کرونا ویروس اخته شوي دي.

د دغه وزارت د معلوماتو له مخې په دې سره په افغانستان کې د کرونا ویروس د مثبتو پېښو شمېر ۱۱ زره او ۱۷۳ تنو ته ورسېد.

په هغه پیغام کې چې د افغانستان عامي روغتیا وزارت نن دوشنبه رسنیو ته استولی راغلي چې تېره ورځ ۱،۰۹۵ لابراتوار ټسټونه ترسره شول چې په همدې تېرو ۲۴ ساعتونو کې یو کس له 'کووېډ-۱۹' ناروغۍ څخه مړ شوی دی.

له دې ناروغۍ څخه په افغانستان کې ۲۱۹ تنه مړه شوي دي.

په داسې حال کې چې دا ویروس په چټکۍ په افغانستان کې د خورېدو په حال کې دی د عامې روغتیا وزیر فېروزالدین فېروز ټینګار کوي چې که هېوادوال د کرونا ناروغي جدي ونه‌ګڼي، انساني ناورین به رامنځته شي.

اشرف غني: پومپيو وويل چې د طالبانو د اوربند په اوږدولو به فشار راوړي

افغان ولسمشر محمد اشرف غني

افغان ولسمشر محمد اشرف غني وايي د امریکا بهرنيو چارو وزیر مايک پومپيو ورته ويلي چې د طالبانو د اوربند په اوږدولو به فشار راوړي.

ولسمشر غني نن د مې په ۲۵مه، پر ټويټر ليکلي چې پومپيو ده او د ملي پخلاینې شورا مشر ډاکتر عبدالله سره په ټيليفوني خبرو کې وويل چې امريکا به د تشدد کمولو او د بین‌الافغاني خبرو په ترسره کېدو ټينګار وکړي.

د دې دمخه د امریکا د بهرنیو چارو وزیر د افغان حکومت له‌خوا د ۲،۰۰۰ طالب بندیانو د خوشې کولو اعلان ستايلی دی.

د دغه دوه زرو بنديانو د خوشې کېدو لړۍ نن د ۱۰۰ طالبانو په خلاصولو پیل شوه.

په همدې حال کې د امریکا د ملي امنیت شورا ویلي چې د سیاسي روغې جوړې لپاره د افغانانو ترمنځ مخامخ خبرې د سولې پر لور تر ټولو غوره لاره ده.

دغې شورا پر خپله ټویټر پاڼه نن دوشنبه د بین‌الافغاني خبرو د پیلېدو په نیت د ولسمشر غني له‌خوا د طالب بندیانو د خوشې کېدو پرېکړه ستایلې ده.

تر دې مخکې افغان حکومت ۱،۰۰۰ او طالبانو نږدې ۲۵۰ بنديان خوشې کړي دي. افغان حکومت او طالبانو د اختر لومړۍ درې ورځې د مې له ۲۴مې څخه د مې تر ۲۶مې پورې اوربند اعلان کړی دی.

د امريکا او طالبانو ترمنځ د سولې په تړون کې راغلي وو چې افغان حکومت به ۵،۰۰۰ او طالبان به ۱۰۰۰ بنديان خوشې کوي. د طالبانو وياند سهیل شاهين د مې په ۲۴مه پر ټويټر د ۲،۰۰۰ نورو بنديانو خوشې کېدو هرکلی کړی او غوښتنه‌یې کړې چې د شوې موافقې ترمخه دې ټول پنځه زره بنديان خوشې شي.

جلال‌اباد کې د تېلو په یو پمپ کې اور لګېدو ۲ تنه وژلي او ۸ ټپیان دي

د ننګرهار نقشه

د جلال‌اباد ښار د څلورمې ناحیې اړوند د شیشم باغ په سیمه کې نن له غرمې وړاندې د تېلو په یوه پمپ سټېشن کې اور لګېدنې دوه تنه ووژل او اته نور ټپیان کړل.

د ننګرهار د والي ویاند عطاالله خوګیاڼي ازادي راډيو ته وویل د پېښې له ځایه د ننګرهار سیمه‌ییز روغتون ته ۱۰ ټپیان وروړل شوي وو چې په خبره یې دوو تنو یې د سختو ټپونو له امله ساه ورکړه.

ښاغلی خوګیاڼی وایي چې ټپیان په روغتون کې تر درملنې لاندې دي، خو په خبره‌یې چې وضعیت‌یې د اندېښنې وړ دی.

خوګیاڼی زیاتوي چې پېښه په یوه موټر کې د ګازو د اچولو پر مهال رامنځته شوې ده.

کورنیو چارو وزارت: خلک د اختر په ورځو کې هم بشپړ قرنطین نه‌مراعتوي

د اختر په لومړۍ ورځ د کابل یوې سیمه ولاړ امنیتي ځواکونه.

د کابل ښار یو شمېر اوسېدونکي وايي، د اختر په ورځو کې يې قرنطین مراعات کړی او خپلو خپلوانو او دوستانو ته‌یې د ټیلیفون او ټولنیزو رسنیو له لارې اختر مبارکي ویلې.

خو د افغانستان کورنیو چارو وزارت وايي، خلک لا هم په دې برخه کې مرسته نه‌کوي او قرنطین‌يې به بشپړ ډول نه‌دی مراعت کړی.

د دغه وزارت ویاند طارق ارین په دې برخه کې خلک پړ ګني او وايي: "دا یوازې د پولیسو دنده نه‌ده دا د ټولو مسؤلیت دی ځکه لا هم کرونا ویروس له‌منځه نه‌دی تللی، نو ځکه خو د کرونا ویروس د لا خپرېدو د مخنیوي په برخه کې د خلکو مرسته ډېره زیاته مهمه ده او له دې غیر که دا مسئله عادي ونیول شي، نو زه په ډاډ سره ویلی شم چې یو انساني ناورین به رامنځته شي او بیا به‌يې مسؤلیت د هغه خلکو په غاړه وي چې دا مسئله ورته عادي ښکاري."

د افغانستان د عامې روغتیا وزارت د معلوماتو مخې په تېرو ۲۴ ساعتونو کې د ۱،۰۹۵ کسانو ټسټونه شوي چې له نیمايي زیات ۵۹۱ په کرونا ویروس اخته پېژندل شوي دي.

په دې سره په ټول افغانستان کې په کرونا ویروس د اخته شویو کسانو شمېر ۱۱،۱۷۳ تنو ته ورسېد چې له دې شمېر تر اوسه ۱،۰۹۷ بېرته روغ شوي او ۲۲۰ بیا مړه شوي دي.

د افغانستان عامې روغتیا وزارت له اختر مخکې له خلکو غوښتي و چې د کرونا ویروس د لا خپرېدو د مخنیوي په هدف د اختر په ورځو کې بشپړ قرنطین په جدي ډول په پام کې ونیسي او خپلو خپلوانو او دوستانو کره له تګ ډده وکړي.

د افغانستان د کورنیو چارو وزارت هم اعلان کړی و چې په دې برخه کې جدي دي.

مسعود اندرابي: د طالبانو هر عمل ته عکس‌العمل ښیو

د افغانستان کورنیو چارو سرپرست وزیر مسعود اندرابي لوګر کې ځانګړو پولیسو ته د وینا پر مهال.

د افغانستان د کورنیو چارو سرپرست وزیر محمد مسعود اندرابي وايي که وسله‌وال مخالفین سوله غواړي افغان امنیتي ارګانونه‌یې چمتووالی لري او که د جنګ لار مخته وړي دوی یې هم په وړاندې درېږي.

هغه دا خبرې پرون په لوګر کې د ځانګړو پولیسو د قطعې له سرتېرو سره په لیدنه کې وکړې.

هغه زیاته کړه: "که دوی سوله غواړي نو موږ یې مراعات کوو او که د افغانستان د خلکو دښمنان جنګ کوي، نو موږ یې مقابله کوو او کلک ځواب ورکوو. لکه څنګه مو چې په تېرو ۱۸ کلونو په تېره بیا به په همدې وروستۍ روژه کې چې دوی خپلې حملې ډېرې کړې وې ځواب ورکړ او موږ کلکه مرګ‌ژوبله ورته واړوله. له دې وطن، خلکو او ملکي تأسیساتو موږ دفاع وکړه او ان‌شاءالله دا به ادامه کوي."

افغان حکومت وايي چې طالبانو ته د دوی د سولې او خبرو وړاندیز له کمزوري نه، بلکې له یوه پياوړي دریځه کوي او هدف‌یې یوې دایمي سولې او اوربند ته رسېدل دي.

د افغانستان د کورنیو چارو وزیر دا څرګندونې داسې وخت وکړې چې لومړی طالبانو او بیا افغان حکومت د همدې کوچني اختر په ورځو د اوربند اعلان کړی دی.

لوګر کې وسله‌والو طالبانو یو شمېر خلک وهلي او ټپیان کړي

د لوګر ولایت نقشه

د لوګر ولایت په سرخاب کې پرون وسله‌والو طالبانو یو زیات شمېر ولسي خلک وهلي چې له ډلې یې اووه کسان سخت ټپيان شوي.

سرخاب د افغانستان د جمهور رئیس محمد اشرف غني پلارنی ټاټوبی دی چې ډېره برخه‌یې د وسله‌والو طالبانو په کنټرول کې ده.

د سرخاب د کلي ځینو اوسېدونکو چې نه‌غواړي نومونه‌یې واخیستل شي ازادي راډیو ته وویل د دوی کلیوال د درې په نوم د طالبانو تر کنټرول لاندې سیمې ته ورغلي و څو له طالبانو وغواړي چې د دوی ملا امام ورخوشې کړي، خو هغوی یې ووهل او ټپیان‌یې کړل.

د طالبانو ویاند ذبیح‌الله مجاهد هم ازادي راډیو ته په یوه پيغام کې پېښه تأیید کړې، خو ویلي یې دي چې ځینو اربکیانو (محلي پولیسو) د پوستو د جوړولو هڅه کوله او د دوی تر کنټرول لاندې سیمې ته ورغلي و چې تر لنډې نښتې وروسته بېرته په شا شول.

تخار کې د ۲ قوماندانانو ټوپکوالو نښته کې ۱۰ تنه کسان وژل شوي

د تخار نقشه

د تخار سیمه‌ییز چارواکي وايي چې یکشنبه په کلفګان ولسوالۍ کې د دوو غیر مسؤله قوماندانانو ټوپکوالو نښته کړې او د یو بل لس کسان‌یې سره وژلي دي.

د تخار د والي ویاند محمد جواد هجري په دې اړه ازادي راډیو ته وویل: "د شیر علي او مهدي په نوم دوو غیر مسؤله وسله‌والو قوماندانانو سره نښته کړې. په ډزو کې د دواړو خواو ۱۰ کسان وژل شوي چې قوماندان مهدي هم په‌کې شامل دی. پنځه نور کسان ټپیان دي."

ښاغلي هجري وویل چې پولیسو ځانونه د پېښې ځای ته ورسول او نښته‌یې غلې کړه او هڅه کوي چې مجرمین ونیسي.

د دې پېښې اصلي علت لا نه‌دی په ډاګه، خو د راپورونو په اساس په شمال کې اکثر غیر مسؤل قوماندانان داسې نښتې په سیمه کې په یو بل د برترۍ او په قاچاق او غلاوو کې په نه‌جوړ راتلو سره کوي چې په‌کې تر دوی زیات ملکیانو ته تاوان اوړي.

پر بګرام هوايي اډه د توغندیو برید شوی

هغه موټر چې توغندي په کې ځای پرځای شوي وو او بګرام اډه یې هدف ګرځولې وه.

د بګرام پر هوايي اډې نن له غرمې مخکې د توغندیو برید وشو.

د راپورونو له مخې دوه بي ام یو ډوله توغندي چې په یوه موټر کې ځای پرځای شوي وو، شاوخوا یوولس بجې د بګرام پر هوايي اډې چې د نړیوالو ځواکونو لوی مرکز پکې دی، وتوغول شول.

په پروان ولایت کې د امنیتي ځواکونو د همغږۍ د مرکز قوماندان الوزي احمدي د دې خبر د تایید ترڅنګ آزادۍ راډیو ته وویل چې دا توغندني بګرام اډې ته نژدې راپرېوتي دي او تلفات نه لري.

د دې حملې مسوولیت تر اوسه کومې ډلې نه دی منلی.

چارواکي: غزني کې دوو پېښو ۷ تنو ملکیانو ته مرګ ژوبله اړولې

ارشیف

چارواکي وايي، په غزني کې دوو پېښو کې ۷ تنه ملکیانو ته مرګ ژوبله اوښتې ده.

د غزني ولایت په قره باغ ولسوالۍ کې په یو کور د هاوان د مرمۍ د لګېدو په ترڅ کې ۵ ماشومانو ته مرګ ژوبله اوښتې.

د ولایت ویاند وحیدالله جمعه زاده د یکشبې په ورځ ازادي راډیو ته وویل: "د غزني ولایت قره باغ ولسوالۍ د موشکي په سیمه کې پر یو کور د هاوان مرمۍ د لګيدو له امله یو ماشوم وژل شوی او ۴ نور ټپیان دي، په ټپیانو کې هم د دوو تنو حالت د اندېښنې وړ دی."

ښاغلي جمعه زاده زیاتوي، د غه پېښه تېره شپه ناوخته هغه مهال رامنځته شوې ده.

جمعه وویل، د دې ترڅنګ نن سهار د غزني په مقر ولسوالۍ کې د امنيتي سرتېرو په یوه هدیره کې وسله والو درې کړۍ ماینونه ځای پر ځای کړي وو چې یوه یې چاودنه کړې او دوه ملکي کسان یې ټپیان کړي دي.

د هغه په خبره، دوه نور یې د امنیتي ځواکونو له لوري شنډ شوي دي.

وسله والو طالبانو تر دې مهاله په دې اړه څه نه دي ویلي.

جمعه زاده وایي، د دغه ولایت د مقر ولسوالۍ په لړمه سیمه کې وسله والو طالبانو د دولت په اکمالاتي موټریز کاروان برید کړی، چې له کلک غبرګون سره مخ شوي.

هغه زیاتوي، په دغه برید کې کوم لوري ته زیان نه دی اوښتی.

سرپل کې یو شمېر ښځو د اختر لمونځ ادا کړ

دوی د اختر په لمانځه کې په هېواد کې د سولې او ثبات د ټینګښت لپاره دعا وکړه.

په سرپل ولایت کې نن یو شمیر مېرمنو د اختر په لمانځه کې ګډون وکړ.

د سرپل د ښځو د چارو رییسې نبیلا حبیبي آزادۍ راډیو ته وویل چې د سرپل د امام خرد سیمې په جامع جومات کې نن شاوخوا سلو مېرمنو د اختر لمونځ په جماعت ادا کړ خو نوموړې زیاته کړه چې دوی د عامې روغتیا وزارت ټولې روغتیايي سپارښتنې په پام کې نیولې وې.

مېرمن حبیبي زیاته کړه چې دوی د اختر په لمانځه کې په هېواد کې د سولې او ثبات د ټینګښت لپاره دعا وکړه.

چارواکي: د هاوان مرمۍ لګېدو لغمان کې ۴ ماشومان وژلي

ارشیف

تېره شپه د لغمان د علیشنګ ولسوالي د سالاب ګردي په سیمه کې پر یوه کور د هاوان مرمۍ د لګېدو په پېښه کې ۴ ماشومان ووژل شول.

د لغمان د والي ویاند اسدالله دولتزي شېبه وړاندې ازادي راډيو ته تایید کړه چې تېره شپه شااوخوا نهه بجې د قدیر په نامه د یوه کس پر کور د هاوان مرمۍ لګېدلې چې له امله یې د دې کورنۍ ۴ تنه وژل شوي دي.

د ښاغلي دولتزي په خبره چې په پېښه کې همداشان د یادې کورنۍ ۷ نور غړي ټپیان شوي چې اوس تر درملنې لاندې دي.

دا په داسې حال کې د چې د پېښې د ځای اوسېدونکي نن د لغمان مرکز مهترلام کې د اعتراض په ډول راټول شوي وو او له مسؤلینو یې غوښتنه کوله چې د پېښې عاملین پیدا او د قانون منګلو ته وسپاري.

خو د لغمان د والي ویاند وایي چې نن مسؤلینو ته دنده سپارل شوې څو معلومه کړي چې هاوان چا او له کوم لوري توغولی دی.

په دې اړه نور تفصیل نه دی ورکړی شوی خو مهترلام کې راټول شوي معترضین وایي، د جنګ لوري د عامو خلکو د د سر او مال ساتنې په اړه جدي نه دي او په جګړو کې تل عام خلک زیانمنېږي.

د افغانستان د عالمانو د شورا مشر مولوي قیام الدین کشاف ومړ

مولوي قیام الدین کشاف

د افغانستان د عالمانو د شورا مشر او مخکښ دیني عالم مولوي قیام الدین کشاف په حق ورسيد.

د افغانستان د ارشاد حج او اوقافو وزارت ویاند فضل محمد حسیني ازادۍ راډيو ته وویل چې کشاف د ناروغۍ له کبله په حق رسېدلی دی.

کشاف له څو کلونو راهیسې د افغانستان د عالمانو د سراسري شورا مشر و.

هغه د افغانستان د جګړې د مذهبي توجیهاتو په برخه کې د طالبانو او افراطي عالمانو پر وړاندې د غوڅ دریځ په نیولو مشهور و.

بغلان چارواکي: وسله واله نښته کې ۶ کسان وژل شوي

ارشیف

د بغلان ولایت په بنوی اندراب ولسوالۍ کې نن د اختر له لمانځه وروسته په یوه وسله واله نښته کې ۶ کسان وژل شوي دي.

د اندراب ولسوال محمدمنصور عزیزي آزادۍ راډیو ته وویل چې نښته د اختر له لمانځه یو ساعت وروسته په خوشدرې سیمه کې دوو کورنیو د دښمنۍ په نتیجه کې شوې.

ښاغلي عزیزي په دې اړه نور جزییات ورنه کړل خو ویې ویل چې پولیس سیمې ته استول شوي او موضوع به له څېړنو وروسته روښانه شي.

د ملګري ملتونو سرمنشي افغانستان کې د اختر پر مهال د اوربند هرکلی وکړ

د ملګرو ملتونو سرمنشي انټونیو ګوټیریش

د ملګرو ملتونو سرمنشي په افغانستان کې د حکومت او طالبانو له خوا د اوربند هرکلی کړی.

د ملګروملتونو ویاند نن په یوه خبرپاڼه کې د انټونیو ګوټیریش له قوله لیکي چې نوموړی د افغانستان د جګړې پر ټولو ښکېلو غږ کوي چې له دې فرصت څخه ګټه واخلي او د افغانانو په مشرۍ د سولې په بهیر کې برخه واخلي.

د بیان له مخې سرمنشي ویلي چې یوازې سوله ییز حل د افغانستان جګړه پای ته رسولی شي.

ښاغلي ګوټیریش ویلي چې ملګري ملتونه په دې مهمه پروسه کې د افغانستان د خلکو او حکومت ملاتړ ته ژمن دی.

طالبانو پرون خپلو جنګیالیو ته اعلان وکړ چې د دولتي ځواکونو پرضد دې عملیات نه کوي او که برید پرې کېږي نو یوازې د ځان دفاع دې وکړي.

افغان حکومت هم سمدستي د دې اعلان هرکلی وکړ او وسله والو ځواکونو ته یې امر وکړ چې پر طالبانو دې حملې نه کوي.

ولسمشر اشرف غني نن په ارګ کې د کوچني اختر په مناسبت د وینا پر مهال د بندیانو د خوشې کولو د بهیر د چټکولو غوښتنه وکړه.

د بندیانو د خوشې کولو بهیر وروسته له هغه وځنډېده چې د افغانستان د ملي امنیت شورا د غويي په ۲۲مه نېټه وویل د حکومت له خوا د ۱۰۰۰ تنو طالب بندیانو د خوشې کولو په بدل کې طالبانو هم باید ۲۰۰ افغان سرتېري ازاد کړي وای خو دا کار یې نه دی کړی.

د افغانستان د سولې لپاره د متحدایالاتو ځانګړي استازي زلمي خلیلزاد او د امریکايي ځواکونو ویاند هم د دې اوربند هرکلی کړی دی.

نن د افغانستان په ګډون په اسلامي هېوادونو کې اختر لمانځل کېږي

د افغانستان د حج او اوقافو وزارت د اختر په ورځو کې خلکو ته جوماتونو ته د تګ په اړه ځانګړی اعلان نه دی کړی خو له خلکو یې غوښتنه کړې چې د اختر په درېیو ورځو کې دي له کورونو نه وځي.

د افغانستان په ګډون د نړۍ د اسلامي هېوادونو خلک نن، یک شنبه د مې ۲۴مه، د کوچني اختر لومړۍ ورځ لمانځي.

په داسې حال کې چې په افغانستان کې د کرونا ویروس مثبتې پېښې لس زرو ته رسېدلې دې.

د افغانستان د عامې روغتیا وزارت پرون پر خلکو غږ وکړ چې د اختر په درېیو ورځو کې دې په کورونو کې پاتې شي.

د افغانستان د حج او اوقافو وزارت د اختر په ورځو کې خلکو ته جوماتونو ته د تګ په اړه ځانګړی اعلان نه دی کړی خو له خلکو یې غوښتنه کړې چې د اختر په درېیو ورځو کې دي له کورونو نه وځي.

په پاکستان کې خلکو ته اجازه ورکړ شوې چې جوماتونو ته ولاړ شي او په ایران کې له مسلمانانو غوښتنه شوې چې تر دېرش دقیقې زیات وخت دي په جومات کې نه تېروي.

اخوا په هند او بنګله دېش کې تر ۱۰۰ زیات وګړي د سخت طوفان له امله مړه شوي او میلیونونه وګړي بې کوره شوي دي.

چارواکو پرون، د مې په ۲۳مه، وویل چې د امفان په نوم دې سخت طوفان په بنګله دېش او د هند په ختيځو سیموکې زرګونه انسانانو ته مالي تاوان رسولی دی.

ویل کېږي چې داسې سخت طوفان په وروستۍ یوه لسیزه کې پر سیمه نه دی راغلی.

سخت باد، باران او تالندې د هند په لویدیز بنګال کې اته تنه مړه کړي او په بنګله دېش کې ۲۲ تنه مړه شوي دي.

په بنګله دېش او هند په ختیځو سیموکې د برېښنا مزي پرې شوي، د پاکو اوبو کانالونه یې بند کړي او دخلکو کرنیزې ځمکې او کورونه یې تخریب کړي دي.

د هند د لویدیز بنګال ایالتي وزیرې ممتا بنرجي پرون وویل چې دا یو لوی ملي بحران دی او فدرالي حکومت باید مرسته وکړي.

ویل کېږي چې تر یو میلیون زیات کورونه ویجاړ شوي او پینځلس میلیونه انسانو ته زیان رسېدلی دی.

ویل کېږي چې په سیمه کې د دریالس میلیارد ډالرو تاوان پېښ شوی دی.

نور راوښيه

XS
SM
MD
LG