د لاسرسۍ وړ لېنکونه

تازه خبر
پنجشنبه ۱۴ وری ۱۳۹۹ کابل ۰۸:۱۵

نړۍ

ایران کې د بشري حقونو ۱۴ مدافعانو له خامنه‌اي د استعفا غوښتنه کړې

د ایران ستر مذهبي مشر، ایت‌الله علي خامنه‌اي

په ایران کې د بشري حقونو ۱۴ مدافعانو د هغه هېواد پر ستر مذهبي مشر، ایت‌الله علي خامنه‌اي غږ کړی چې استعفا وکړي.

هغوی چې دننه په ایران کې او له هغه هېواده بهر اوسېږي، همداراز د داسې نوي اساسي قانون د جوړېدو غوښتنه کړې چې ښځو او نارینه‌وو ته مساوي حق ورکړي.

د ۱۴ ایراني فعالانو په ګډ بیان کې چې پرون، د اګسټ په پنځمه‌یې پر انټرنټ خپور کړی، ویلي چې په ایران کې په وروستیو څلورو لسیزو کې استبداد د جنسي اپراتاید یا جنسیتي تبعیض ته داسې زمینه برابره کړې چې د ټولنې د وګړو پر نیمايي برخه، یعنې ښځو یې چلیپا ایستلې ده.

د هغوی په بیان کې لیکل شوي، هر چا چې د جنسیتي تبعیض پر ضد احتجاج کړی، توهین، تحقیر او زنداني شوي دي. په ځیني مواردو کې هغوی شکنجه، زنداني او محاکمه شوي دي.

د ښځو د حقونو مدافع فعالانو ویلي چې هغوی به د خپل حق د ترلاسه کولو لپاره سوله‌ییزه مبارزه کوي.

د ورځې تازه خبرونه دلته ولولئ

د بلغاریا پارلمان ټول غړي معاینه کېږي

د بلغاریا پارلمان

د بلغاریا پارلمان ټول غړي د دې لپاره چې معلومه کړي چې د کرونا ویروس لري که نه، معاینه کېږي.

دا پرېکړه تر هغه وروسته وشوه چې د پارلمان یو غړی په کرونا ویروس اخته وپېژندل شو.

د بلغاریا چارواکو ویلي چې د پارلمان ناروغ غړی روغتون ته لېږدول شوی دی.

د دې هېواد د پارلمان د ۲۴۰ نورو غړو معاینه به په راتلونکو ۲۴ ساعتونو کې کېږي.

د امریکا جانز هاپکنز پوهنتون ویلي چې په بلغاریا کې ۱۴۲ کسان په کرونا ویروس اخته دي.

د بین‌الافغاني خبرو پر پیل د ناټو عمومي منشي ټینګار

د ناټو عمومي منشي ینس سټولټنبرګ

د ناټو عموي منشي ینس سټولټنبرګ نن د اپرېل په لومړۍ، په افغانستان کې له ټولو سیاسي اړخونو او وسله‌والو طالبانو غوښتنه وکړه چې بین‌الافغاني خبرې پیل کړي.

سټولټنبرګ نن په بروکسل کې د ناټو د بهرنیو چارو د وزیرانو د غونډې تر پېل مخکې خبریالانو ته وویل: "اوسنی وضعیت ډېر پېچلی دی، اوس د دې وخت دی چې طالبان او ټول سیاسي اړخونه خپل رول ولوبوي. ټول باید کار وکړي یوازې د هغوی د تعهد او ډاډ په مټ بین‌الافغاني خبرې پیل کېدلائ شي."

د ناټو د بهرنیو چارو وزیران به د وېډیو له لارې خبرې کوي.

سټولټنبرګ همداراز وویل چې د دې کال تر دوبي به په افغانستان کې د بهرنیو ځواکونو شمېر ۱۲ زرو ته راکم شي. هغه وویل چې د بهرنیو ځواکونو وتل مشروط کار دی.

صربیا د کوسوو له‌خوا د ۱۰۰ فیصده تعرفې لیرې کول 'جعلي خبر' بولي

د کوسوو او صربیا بیرغونه

د کوسوو حکومت وايي چې د صربیا پر تجارتي مالونو یې ۱۰۰ فیصده تعرفه لیرې کړې، خو د صربیا چارواکو ویلي چې دا فېک‌نیوز یا جعلي خبر دی.

صربیايي چارواکو ادعا کړې چې کوسوو نه‌یوازې دا چې تعرفه‌یې نه‌ده لیرې کړې، بلکې د هغوی د تجارانو لپاره‌یې شرایط لا سخت کړي دي.

د کوسو. صدراعظم البین کورتي پرون د کوسوو په پلازمېنه، پریشتینا کې خبریالانو ته وویل چې د اپرېل له لومړۍ نېټې به ټول هغه مالونه چې له صربیا واردېږي یوازې اسنادو ته اړتیا لري، داسې اسناد چې د کوسوو له اساسي قانون او نورو قوانینو سره برابر وي.

کوسوو له صربیا هم غوښتنه وکړه چې ورته عمل وکړي. هغه وویل چې د تبعیض څخه ستړي دي او غواړي چې صربیا د سیال په توګه مساوي چلند ورسره وکړي.

کوسوو ویلي چې د صربیا پر مالونو سل فیصده تعرفه لیرې کوي، خو په مقابل کې یې له صربیا غواړي چې د هغوی خپلواکي په رسمیت وپېژني.

د امریکا د متحده ایالاتو حکومت تېره اوونۍ پر کوسوو غږ وکړ چې د صربیا پر مالونو لګولې تجارتي تعرفه لیرې کړي.

تاجکستان د ازادي راډیو خبریالانو د کار د اجازې په اړه پرېکړه کوي

د ازادې اروپا/ ازادي راډیو تاجکي څانګې خبریاله

د تاجکستان د بهرنیو چارو وزارت باید نن د اپرېل په لومړۍ نېټه دا زادې اروپا/ ازادي راډیو د تاجکي برخې خبریالانو ته د کار د اجازې ورکولو یا نه‌ورکولو په اړه پرېکړه وکړي.

د تاجکستان د بهرنیو چارو وزارت د اکټوبر له میاشتې راهیسې، د ازادې اروپا/ ازادي راډیو ۱۸ خبریالانو ته په هغه هېواد کې د کار کولو لپاره د اجازې ورکولو پرېکړه ځنډولې ده.

د ازادې اروپا/ ازادي راډیو مشر جیمي فلاي د تاجکستان پر حکومت سخت انتقاد کړی چې د هغو ژرونالېستانو هڅو ته‌یې خنډ پېښ کړی چې هڅه کوي د تاجکستان خلکو ته د کرونا ویروس په اړه معلومات ورکړي.

جیمي فلاي پرون په یوه بیان کې د تاجکستان د حکومت له دې کاره چې په هغه هېواد کې د ازادې اروپا/ ازادي راډیو د خبریالانو په کار کې لاسوهنه کوي او کار ته‌یې نه‌پرېږدي غصه او مأیوسي څرګنده کړه او پرون‌یې د تاجکستان د بهرنیو چارو وزیر، سراج‌الدین مهرالدین ته یو خط ورواستاوه.

جیمي فلاي ویلي چې په تاجکستان کې چارواکي د ازادې اروپا/ ازادي راډیو له خبریالانو سره خبرې نه‌کوي او هغو غونډو ته‌یې نه‌وربولي چې د کرونا ویروس په اړه روغتیايي معلومات په‌کې شریکېږي؟

له پاکستان څخه افغانستان ته د توکو په لېږد کې 'مېکانیزم' جوړ شو

ارشیف، افغانستان او پاکستان ترمنځ له سوداګریزو توکو ډکې لارۍ

د افغانستان د صنعت او سوداګرۍ وزارت له پاکستان څخه افغانستان ته د توکو په لېږد او ټرانزیت کې د اسانتیاوو د رامنځته کولو مېکانیزم جوړ کړ.

دغه مېکانیزم د جمهور رئیس غني په مشرۍ د اقتصاد عالي شورا د تېرې ورځې په اختصاصي غونډه کې د صنعت او سوداګرۍ وزارت سرپرست اجمل احمدي له لوري وړاندې شو.

ښاغلي احمدي وویل، د دغه مېکانیزم په تطبیق سره له پاکستان څخه افغانستان ته د توکو په لېږد کې لازمې اسانتیاوې برابرېږي.

دا په داسې حال کې ده چې دا مهال افغان سوداګر له پاکستان سره په سوداګریزو اړیکو کې له ګڼو ستونزو سره مخ دي.

له بلې‌خوا ولسمشر غني د صنعت او سوداګرۍ وزارت پېشنهادي مېکانیزم تصویب کړ او ويې‌ویل، که په چارو کې د چټکتیا او اسانتیاوو د ایجاد لپاره بودجې ته اړتیا وي، حکومت ورته چمتو دی.

امریکا کې د مړو شمېره له ۴ زرو کسانو واوښته

په ټوله نړۍ کې د مړو شمېر له ۴۲ زرو اوښتی دی.

په متحده ایالاتو کې د کرونا ویروس له امله د مړو شمېره نن چهارشنبه له څلورو زرو کسانو واوښته.

یوه ورځ دمخه امریکایي چارواکو خلکو ته وویل چې د څو "ډېرو دردناکو" اوونیو لپاره تیاری ونیسي.

د جانز هاپکنز پوهنتون شمېرو په اساس په امریکا کې یو لک او ۹۰ زره کسان کرونا ویروس لري.

په نیویارک ښار کې چې تر نورو سیمو ډېره د کرونا ویروس یا (کوویډ-۱۹) ځپلی د ناروغانو د درملنې لپاره په مرکزي پارک او د ټېنس په میدانونو کې موقتي روغتونونه جوړ شوي دي.

د امریکا د عامې روغتیا چارواکو وړاندوینه کړې چې په امریکا کې به په کرونا ویروس د اخته خلکو شمېر دوه لکه او ۴۰ زرو ته ورسېږي.

امریکا په ټوله نړۍ کې په کرونا ویروس د اخته خلکو د شمېر په لحاظ په لومړي سر کې ده.

دې ویروس په ګرده نړۍ کې تر اته لکه او ۶۰ زره کسان نیولي او د مړو شمېر له ۴۲ زرو اوښتی دی.

ډېر مړي په ایټالیا کې دي چې هلته‌یې شمېر ۱۲ نیمو زرو ته رسېدلی، ورپسې په اسپانیا کې اته نیم زره خلک د کرونا ویروس مړه کړي.

چین کې یو ځل بیا کرونا ویروس په زیاتېدو دی

یو روغتیایي کارکوونکی له یوه کس څخه نمونه اخلي چې د کرونا ویروس لپاره ازمویل کېږي.

چین د سې شنبې په ورځ د کرونا د مثبتو پېښو د زیاتېدو خبر ورکړ.

تر دې مخکې څلور ورځې سر په سر د کرونا مثبتې پېښې په دغه هېواد کې په کمېدو وې.

پیکېنګ دا خبر په داسې وخت کې ورکړی دی چې په نوره نړۍ کې د کرونا ویروس د قربانیانو شمېر په زیاتېدو دی.

د امریکا په متحده ایالاتو کې تر بل هر هېواد د کرونا مثبتې پېښې اوس زیاتې دي. په دغه هېواد کې د کرونا مثبتې پېښې تر ۱۷۵۰۰۰ واوښتې او د پرونیو شمېرو له مخې د دې ناروغۍ د قربانیانو شمېر په متحده ایالاتو کې ۳۱۷۰ ته ورسېد.

د چین د روغتیا ملي کمېسیون پرون د کرونا د نویو ۴۸ پېښو خبر ورکړ او ویې‌ویل چې دا هغه کسان دي چې له بهره چین ته راغلي دي.

دغه کمېسیون په خپل راپور کې په ووهان کې په هغه ښار کې چې د لومړي ځل لپاره کرونا ناروغي پیدا شوې ده د یوه کس د مړینې خبر ورکړ، خو وایي چې دا ښار چې پخوا بند و اوس پرانیستل شوی دی.

څېړونکي د چین د دغو راپورونو په برخه کې شک لري، ځکه چې په دغه هېواد کې سیمه‌ییزې رسنۍ سختې سانسورېږي.

د امریکا متحده ایالات له اوږدې مودې راهیسې چین کې د کرونا ویروس د مثبتو پېښو او تلفاتو په اړه شک څرګندوي.

د تاجکستان زرګونه کارګر د مسکو په یوه هوایي ډګر کې بند پاتې دي

د مسکو په هوايي ډګر کې ۲۰۰ تنه د تاجکستان کارګر دي.

د تاجکستان زرګونه کارګر د مسکو په یوه هوایي ډګر کې بند پاتې دي.

دا کډوال د دې لپاره په دومودیدوفو هوایي ډګر کې ایسار شوي چې د کرونا ناروغۍ له امله پر هوایي سفرونو بندیزونه لګېدلي دي.

په مسکو کې خبریالې ګالیا ابراګیمووا چې له څو ورځو راهیسې د کډوالو ستونزې څاري په فېس‌بوک کې پرون ولیکل چې د شپې په مخه نږدې ۳۰۰ کډوال په زوره له هوایي ډګر څخه ایستل شوي دي چې په دوی کې شاوخوا ۲۰۰ تنه د تاجکستان کارګر دي.

دا کډوال له تقریباً دوو اوونیو راهیسې چې ټولې الوتنې روسیې او تاجکستان ته د کرونا له امله لغوه شوې دي، ایسار پاتې دي.

ابراګیمووا د فرخ په نوم د یوه کډوال په وینا وایي چې روسي پولیسو له دوی غوښتي دي چې په هوایي ډګر کې دې یوځای وي، خو که چېرته دوی له دې ځایه وباسي د اوسېدو لپاره ځای هم نه‌لري.

چین د کرونا ویروس د نویو تأیيد شویو پېښو د زیاتېدو خبر ورکړ

له تېرو څلورو ورځو راهیسې په دې ویروس د اخته کسانو شمېر مخ پر کمېدو راپور شوی وو.

چین د کرونا ویروس د نویو تأیيد شویو پېښو د زیاتېدو خبر ورکړی دی.

دا وروسته له هغه چې له تېرو څلورو ورځو راهیسې په دې ویروس د اخته کسانو شمېر مخ پر کمېدو راپور شوی وو.

کرونا ویروس لومړی ځل په چین کې راپور شوی وو، خو د نړۍ په نورو هېوادونو کې هم په چټکۍ سره خپور شو.

په همدې حال کې په یو لک او ۶۴ زره امریکايان په دې ویروس اخته شوي او ۳۱۷۰ کسان مړه شوي دي.

د سې شنبې په ورځ د چین د ملي روغتیا کمېسیون وویل چې په دې ورځ په چین کې ۴۸ د کرونا مثبتې پيښې ثبت شوي چې دا کسان د کمېسیون په وینا له بهره دې هېواد ته ورغلي دي.

متخصصین د چین پر ادعاوو ډېر باور نه‌لري ځکه ځايي رسنۍ سانسور کېږي او بهرنۍ رسنۍ په دې هېواد کې معلوماتو ته ډېر لاسرسی نه‌لري.

د مړو شویو او مثبتو پېښو د شمېر په اړه امریکا له ډېره وخته د چین د معلوماتو په اړه شک څرګند کړی.

بریتانیا، فرانسې او جرمني ایران ته روغتيايي توکي لېږلي

ارشیف

بریتانیا، فرانسې او جرمني د ځانګړي سوداګریز مېکانیزم په کارولو سره ایران ته روغتيايي توکي لېږلي.

له دې اقدام سره پر ایران د امریکا له بندیزونو سرغړونه نه‌کېږي.

د جرمني د بهرنیو چارو وزیر د سې شنبې په ورځ وویل چې درې هېوادونو د انټيکس له لارې ایران ته روغتیايي توکي لېږلي.

انټيکس هغه مېکانیزم دی چې یو کال مخکې رامنځته شو چې له مخې یې پرته د امریکا له بندیزونو له سرغړونې، له ایران سره قانوني بشري سوداګري کېدای شي.

ایراني چارواکي وايي د واشنګټن پالېسۍ او بندیزونو له کرونا ویروس سره د دې هېواد د مبارزې وړتیا ته زیان رسولی دی.

ایران په نړۍ کې له هغو هېوادونو دی چې تر ټولو زیاتې د کرونا ویروس پېښې لري.

متخصصین د کرونا ویروس پر رسمي شمېرو انتقاد کوي چې د ایران حکومت خپرې کړي.

اروپايي ټولنه: طالبان دې سولې او تاوتریخوالي کمښت ته ژمنتیا وښيي

بروکسل کې د اروپايي ټولنې مرکزي دفتر

اروپايي ټولنې له طالبانو غوښتي چې د افغانستان د سولې مذاکراتو او د تاوتریخوالي کمولو ته دې رښتونې ژمنتیا وښيي او همداراز دې د دوحې له توافق سره سم د اوربند لپاره خبرې پيل کړي.

دې ټولنې همداراز د افغان سیاستوالو له‌خوا د سولې لپاره د ټول‌شموله پلاوي هرکلی کړی دی.

په کابل کې د اروپايي ټولنې مأموریت د سې شنبې په ورځ په یوه اعلامیه کې ویلي چې دا د بین‌الافغاني خبرو او د خپلمنځي سیاسي بحران د حل پر لور یو مهم ګام دی.

په اعلامیه کې له سیاسي مشرانو غوښتنه شوې چې د سولې په بهیر کې د ښځو، ځوانانو او قربانیانو د اغېزناک ګډون لپاره کار وکړي.

اروپايي ټولنې په خپله اعلامیه کې ویلي، اوس چې د بندیانو د خوشې کولو او مذاکره کوونکي ټيم د ټاکلو مسایلو پرمختګ کړی، طالبان باید د افغان حکومت له مذاکره کوونکي پلاوي سره په رغنده توګه خبرې پیل کړي، همداسې لکه حکومت چې له طالبانو سره پر دې سربېره خبرې کوي چې د طالبانو ټيم ټول‌شموله نه‌دی.

جرمني د افغانانو جبري ستنول وځنډول

ارشیف

د جرمني حکومت افغانستان ته د هغو افغانانو د جبري ستنولو بهیر ځنډولی چې له غیر قانوني لارو دې هېواد ته تللي دي.

د جرمني د کورنیو چارو وزارت ویانده وايي چې د افغان حکومت د غوښتنې له مخې او د کرونا ویروس له وجې رامنځته شوي بحران ته په پام سره‌یې د افغانانو جبري ایستل موقتاً ځنډولي دي.

د جرمني خبري اژانس «DPA» د راپور له مخې له دې هېواده د ایستل شويو افغان کډوالو وروستۍ جوپه د روانې مارچ میاشتې په ۱۲مه نېټه کابل ته واستول شوه.

جرمني ټول ۹۰۷ افغانان چې ټول نارینه دي، افغانستان ته ستانه کړي دي.

د یوه پاکستاني خبریال تښتولو په اړه د بې‌پولې خبریالانو سازمان شک

د بلوچستان ټایمز خبري وېب‌پاڼې مدیر مسئول ساجد حسین

د بې‌پولې خبريالانو اداره شک لري چې په سويډن کې شااوخوا یوه میاشت مخکې یو ورک شوی پاکستانی خبریال د دې هېواد د استخباراتي ادارې په امر تښتول شوی دی.

د بلوچستان ټایمز خبري وېب‌پاڼې مدیر مسئول ساجد حسین د مارچ میاشتې په دوهمه نېټه د سويډن په اوپسالا ښار کې ورک شو.

دا وېب‌پاڼه په پاکستان کې د بلوڅانو له بشري حقونو د سرغړونو راپورونه ورکوي.

په سويډن کې د بې‌پولې خبریالانو سازمان مسؤل ایریک هالکر پرون وویل: "په اروپا کې له پاکستاني خبریالانو سره وروستیو د ځپنو او ځورونو پېښو ته په کتو موږ د ده د کار په خاطر د ده ورکېدل له پامه نه‌شو غورځولای."

په پاریس کې د بې‌پولې خبریالانو ادارې مرکزي دفتر ویلي چې بلوچستان ټایمز وېب‌پاڼه څو ځلې له هغو سرو کرښو تېره شوې چې په اسلام‌اباد کې نظامي مؤسسې جوړې کړي.

امریکا پر ایران په لګول شویو بندیزونو معافیت وغځاوه

ایران

د امریکا حکومت پر ایران په لګول شویو بندیزونو کې معافیت د نورو ۶۰ ورځو لپاره تمدید کړ.

له دې پرېکړې سره به روسیه، چین او اروپايي هېوادونه وکولای شي چې د دې هېواد په اټمي بټیو کې د اټمي وسلو د پراختیا د مخنیوي کار ته دوام ورکړي.

د امریکا د بهرنیو چارو وزیر مایک پومپیو دا معافیت پرون دوشنبه تأیید کړ، خو هغه یادونه وکړه چې دا پرېکړه د ایران اټمي فعالیت محدودوي.

د امریکا د بهرنیو چارو وزارت ویانده مورګان اورتاګوس په یوه بیان کې وايي د ایران د اټمي فعالیتونو پراخېدل د منلو وړ نه‌دي.

مېرمن اورتاګوس زیاتوي، د ایران د رژیم له‌خوا په اټمي برخه کې اخاذي د نړۍ سولې او امنیت ته لوی ګواښ دی.

په بندیزونو کې معافیت ایران ته اجازه ورکوي چې د اټمي وسلو د نه‌پراختیا پر اساس په اراک د درنو اوبو په تحقیقي اټمي بټۍ، د بوشهر په اټمي تأسیساتو او د تهران په تحقیقاتي رېکټور او نورو ساحو کې کار ته دورام ورکړي.

د پولنډ طبیعي ګاز ادارې د روسیې ګازپروم شرکت نه دعوه‌ ګټلې

ارشیف، ګازپروم شرکت کې د نفت تصفیه

د پولنډ د طبیعي ګاز اداره وايي، د روسیې د انرژۍ له دولتي شرکت ګازپروم سره د یو نیم میلیارد ډالرو په ارزښت څو کلنه دعوه‌یې په سویډن کې په یوه نړیواله محکمه کې ګټلې ده.

د پولنډ د طبیعي ګاز د وېش دې لوی دولتي شرکت په یوه بیان کې چې پرون د مارچ په ۳۰مه نېټه خپور شو ویلي چې دا دعوه‌یې د ۱۹۹۶ کال د ګاز د خرڅلاو د یوې معاملې په تړاو ګټلې ده.

په بیان کې راغلي چې ګازپروم له دې شرکت څخه د څو کلونو لپاره د جریمې په نوم اضافه پیسې اخیستې دي چې اوس به‌یې بېرته ورکوي.

په بیان کې دا یادونه هم شوې چې سویډنۍ محکمې ګازپروم ته امر کړی دی چې په بازار کې د کوټېشن یا نرخ اخیستو اصولو ته په پام سره د ګاز د بیو د ټاکلو فورمول هم بدل کړي.

نور راوښيه

XS
SM
MD
LG