د لاسرسۍ وړ لېنکونه

تازه خبر
یکشنبه ۱۵ چنګاښ ۱۳۹۹ کابل ۰۳:۰۱

افغانستان

د امریکا په اوهایو کې نن یکشنبه ۹ تنه په ډزو ووژل شول

د امریکا په اوهایو کې نن یکشنبه ۹ تنه په ډزو ووژل شول.

دا تر ۲۴ ساعتونو په کم وخت کې دوهمه ورته پېښه ده چې په متحده ایالتونو کې کېږي.

د اوهایو په (ډې ټان) کې پولیسو په خپله ټوېټرپاڼه کې ویلي چې مشکوک حمله کوونکی مړ شوی او لږترلږه ۱۶ تنه نور په دې پېښه کې ژوبل شوي دي.

په اوهایو کې دا پېښه څو ساعته وروسته له دې وشوه چې یوه زلمکي د تکزاس ایالت د ایل پاسو ښار په یوه لوی پلورنځي کې د خلکو پر ګڼې ګوڼې ډزې وکړې او ۲۰ تنه یې ووژل.

په دې پېښه کې ۲۶ نور ژوبل شوي دي.

د ټکساس چارواکو پرون وویل چې حمله کوونکی چې ۲۱کلن او د تکزاس اوسېدونکی دی، د والمارټ پلورنځي کې پر خلکو د ډزو په تور نیول شوی دی.

چارواکو د ډزو صحنه بوږنوونکې بللې ده.

د ورځې تازه خبرونه دلته ولولئ

د امریکا یو سرتېری په افغانستان کې ووژل شو

ارشیف، په افغانستان کې په ۲۰۱۹ کال کې یو وژل شوی امریکايي سرتېری

د امریکا متحده ایالاتو دفاع وزارت په افغانستان کې د خپل یوه سرتېري د وژل کېدو خبر ورکړی دی.

دغه وزارت پرون شنبه په یوه اعلامیه کې وویل، ۲۱ کلن وینسینټ سبسټیان ایباریا چې په اصل کې د امریکا د تګزاس ایالت و، تېره جمعه په فراه ولایت کې د موټر د نسکورېدو په پېښه کې مړ شوی دی.

د امریکا دفاع وزارت یا پنټاګون ویلي چې د دې پېښې په اړه څېړنې روانې دي.

د ارمي ټایمز خپرونې په حواله، دا په روان ۲۰۲۰م کال کې په افغانستان کې د امریکا نهم سرتېری دی چې وژل کېږي.

د بهرنیو چارو وزارت او افغان پست د قونسلۍ برخه کې تفاهم لاسلیک کړ

افغان پست

د افغانستان بهرنیو چارو وزارت او د افغان پست دولتي شرکت ترمنځ د قونسلي خدماتو د وړاندې کولو په برخه کې د اسانتیا د رامنځته کېدو لپاره یو تفاهم لاسلیک شو.

د یاد وزارت د قونسلۍ څانګې مشر عبدالملک قریشي د شنبې په ورځ د دې تفاهم د لاسلیک پر مهال وویل: "تر دې وروسته د بهرنیو چارو وزارت له‌خوا ټول تصدیق او ارزول شوي اسناد افغان پست ته سپارل کېږي. په لومړني پړاو یعنې لومړیو شپږو میاشتو کې دا اسناد د کابل او اتو ولایتونو ۱۵ پوسته‌خانو ته چې د بهرنیو چارو وزارت نمایندګۍ په‌کې شته، رسول کېږي."

د ښاغلي قریشي په خبره تر شپږو میاشتو وروسته د بهرنیو چارو وزارت اړوند اسناد د پروسس او تصدیق لپاره له ولایتونو څخه مرکز ته هم د افغان پست له لارې لېږل کېږي.

غزني کې یوې وسله‌والې نښتې یو پولیس وژلی او یو ټپي شوی

غزني

په غزني کې د یوې وسله‌والې نښتې په نتیجه کې یو پولیس وژل شوی او یو بل ټپي شو.

د غزني د والي ویاند واحدالله جمعه‌زاده پرون شنبه ازادي راډیو ته وویل: "دوه پولیس تر غرمې وروسته د غزني ښار په بزازۍ سیمه کې د نامعلومو وسله‌والو له‌خوا په بې‌غږه تفنګچې په نښه شوي دي."

د ښاغلي جمعه‌زاده په خبره د دې پېښې په تړاو یو کس نیول شوی دی او پلټنې ترې روانې دي.

د راپورونو له مخې د دې ډول وژنو لړۍ له کلونو راهیسې په غزنې کې روانه ده. د دې ولایت اوسېدونکو، حکومتي چارواکو او امنیتي کارپوهانو ازادي راډیو ته ویلي چې ډېری افغان سرتېري د خپل غفلت په نتیجه کې وژل کېږي.

د دوی په وینا ډېری افغان سرتېري د سیمې له خلکو سره د خبرو کولو او یا د ګرځنده ټیلیفونونو د کارولو پر مهال د وسله‌والو له‌خوا په نښه کېږي.

د یو بل خبر له مخې د غزني د والي ویاند واحدالله جمعه‌زاده شنبه ماښام ازادي راډیو ته وویل چې د مقر ولسوالۍ په قلعه ثمن سیمه کې د افغان ځواکونو په یوه کمین کې څلور تنه وسله‌وال مخالفین وژل شوي او دوه نور یې ټپیان شوي دي.

د ښاغلي جمعه‌زاده په خبره په دې پېښه کې افغان ځواکونو او ملکي وګړو ته زیان نه‌دی رسېدلی.

وسله‌والو طالبانو تر اوسه په دې اړه څه نه‌دي ویلي.

په افغانستان کې د جګړې ښکېلې خواوې په پرله‌پسې ډول یو بل په ملکي مرګ‌ژوبلي تورنوي.

قره‌باغ کې یوې ټرافیکي پېښې یو کس وژلی او ۶ تنه ټپیان شوي

د افغانستان عمومي نقشه کې پلازمېنه کابل

د کابل قره‌باغ ولسوالۍ په مربوطاتو کې د یوې ټرافیکي پېښې په نتیجه کې یو کس وژل شوی او شپږ نور ټپیان شول.

د کابل د قره‌باغ ولسوال محمد یعقوب حنیف ازادي راډیو ته وویل چې تېر ماښام د چنګاښ ۱۴مه قره‌باغ ولسوالۍ د بازار په سیمه کې دوه کرولا موټرو ټکر کړی دی چې یو تن وژل شوی او شپږ نور ټپیان دي.

ښاغلي حنیف د دوو ټپیانو روغتیایي وضعیت د ډاډ وړ وښود.

د ټرافیک مسؤلین وایي کوچني سړکونه او د موټر چلوونکو بې‌پروایي دا ډول پېښې رامنځته کوي.

غزني چارواکي: د وسله والو برید کې ۲ پولیسو ته مرګ ژوبله واوښته

ارشیف

په غزني کې یو پولیس وژل شو یو ټپي دی.

‎په غزني ښار کې په وسله وال برید کې یو پولیس وژل شوي او یو بل ټپي دي.

د غزني ولایت د والي ویاند واحدالله جمعه زاده د شنبې په ورځ ازادي راډیو ته وویل: "نن تر ماسپښین وروسته ۲ تنه پولیس د غزني ښار په بزازي سیمه کې وسله والو په بې غږه توپانچه ویشتلي، چې یو یې وژل شوی او بل ټپي دی."

ښاغلی جمعه زاده زیاتوي، د پېښې په تړاو یو تن نیول شوي چې تر پوښتنو ګروېږنو لاندې دی.

په غزني کې دغه لړۍ له کلونو کلونو روانه ده.

دا په داسې حال کې ده، چې ازادي راډیو د شنبې په روځ د غزني د یو شمیر اوسېدونکو، دولتي چارواکو او د امنیتي چارو د پوهانو له خولې په یو راپور کې ویلي وو چې په غزني کې ډېری وخت افغان سرتېري د خپلو بې غوریو له امله وژل کېږي.

دوی وايي، ډیری ځله یې لیدلي چې افغان سرتېري له خلکو سره په خبرو او یا هم په موبایلونو کې بوخت وي چې وسله وال یې ترور کړي.

چارواکي: هرات کې ماین چاودنې ۳ پولیس ووژل

آرشیف، هرات کې یو شمېر پولیس

په هرات کې چارواکي وایي، ۳ پولیس د سړک غاړې یوه چاودنه کې ووژل شول.

د هرات د کهسان ولسوال امین الله هفت بلا ازادي راډیو ته وویل، دغه چاودنه نن د هرات- اسلام قلعه ترمنځ لویه لاره کې د تیرپل سیمه کې شوې ده.

تراوسه چا د دغې چاودنې مسئولیت نه دی اخیستی.

په هرات کې د ازادي راډیو خبریال وایي، وروستیو کې د اسلام قلعه- هرات ترمنځ لویه لاره کې ناامنۍ زیاتې شوي دي.

هلته نن د هرات ګمرک کارکوونکو او کمېشنکارانو د ناامنیو پر وړاندې اعتراض وکړ او ویل یې، د ناامنیو له کبله دندو ته نه شي تلی.

‎د سویل لویدیځې حوزې استازي: حکومت باید زمونږ حقونه راکړي

ارشیف

د افغانستان د سویل لویدیځې حوزې یو شمېر استازي شکایت لري چې حقونه یې نه دي ورکړل شوي.

‎د هرات، غور، فراه، نیمروز او بادغیس ولایتونو یو شمېر استازو په کابل کې د پارلمان مخې ته د تحسن خیمه درولې او وایي چې حکومت یې باید حقونه ورکړي.

‎د دغو تحسن کوونکو یو استازي عبدالخالق فراهي ازادي را‌‌‌‌‌‌ډیو ته وویل چې ولسمشر غني او عبدالله عبدالله دې په حکومت کې د دغې حوزې خلکو ته ونډه ورکړي.

‎ښاغلی فراهي وایي، دوی د هېواد ۲۵ سلنه نفوس جوړوي او د ګمرکونو د عوایدو لوړه برخه راټولوي، خو په خبره یې د حکومت له پامه غورځول شوي دي.

‎د نوموړي په خبره د دغو تحسن کوونکو شمېر لسګونو ته رسېږي چې په کې د یادو ولایتونو قومي مشران، ځوانان، ولایتي شورا استازي مدني فعالان شامل دي او له حکومته غواړي چې په حکومتي او دولتي ادارو کې دې ونډه ورکړل شي.

‎بلخوا د ولسي جرګې لومړی مرستیال محمد میرزا کټوازی وایي حکومت باید په کابینه کې د افغانستان د ټولو وګړو استازي شامل کړي.

‎د کټوازي په خبره که د دغې حوزې خلکو په لاریونونو او یا نورو مدني غبرګونونو د خپل حق غوښتنې لپاره لاس پورې کوي ورسره ولاړ دي.

روانه اوونۍ د افغان سولې په اړه درې مهمې غونډې جوړېږي

د افغانستان د بهرنیو چارو وزارت

افغان دولت روانه اوونۍ د سولې په اړه د سیمه ییزې او نړیوالې اجماع د رامنځته کېدو په هدف د درې مهمو غونډو کوربه توب کوي.

لومړنۍ غونډه د شلو سیمه ییزو هېوادونو د استازو، دویمه هغه د افغانستان، پاکستان او چین درې اړخیزه غونډه او دريیمه د هغو هېوادونو غونډه ده چې تېرو دوه لسیزو کې د افغانستان په امنیتي او اقتصادي مسایلو کې ښکيل وو.

د بهرنیو چارو وزارت ویاند ګران هېواد رسنیو ته ویلي، دغه غونډې له دوشنبې ورځې پیليږي.

هغه زیاته کړه: "د سولې د بین الافغاني خبرو له پيله مخکې افغان دولت د سیمه ییزې او نړیوالې اجماع د پیاوړتیا او ګړندیتوب لپاره دا اوونۍ د درېیو سیمه ییزو، نړیوالو او درې اړخیزو غونډو کوربه توب لري، د درې واړو لویو غونډو هدف د اجماع پیاوړتیا ده چې بین الافغاني خبرې ژر پيل او مطلوبو نتایجو ته ورسېږو."

افغان دولت او طالبانو تراوسه د بین الافغاني خبرو پيل ته نېټه نه ده ټاکلې، خو ارګ ویلي، لومړنۍ ناسته به د قطر پلازمېنې دوحه کې ترسره کېږي.

افغان دولت غواړي چې له دغو خبرو مخکې د نړیوالو او سیمه ییزو شریکانو نظرونه واوري او د هغوی ملاتړ ورجلب کړي.

د غضنفر د جنازې او فاتحې مراسمو ترسره کېدو لپاره کمېسیون وټاکل شو

غضنفر د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

افغان ولسمشر د محمد یوسف غضنفر د جنازې او فاتحې د ځانګړو دولتي مراسمو ترسره کېدو ته یو کمېسیون وټاکه.

د ارګ یوه خبرپاڼه وایي چې د کمېسیون مشري د ولسمشر د دفتر رئیس محمد شاکر کارګر ته سپارل شوې.

د کمېسیون په جوړښت کې د کورنیو چارو، دفاع ،حج او اوقافو ، اطلاعاتو او فرهنګ وزاتونه او یو شمېر نورې دولتي ادارې شاملې دي.

ښاغلی غضنفر د اقتصادي او سوداګرۍ پراختیا او د بیوزلۍ کمولو په چارو کې د ولسمشر فوق العاده استازی و چې تېره ورځ د کویډ ۱۹ ناروغۍ له کبله مړ شو.

لغمان کې د ۴ میلیونه افغانیو په ارزښت د شیدو ټولولو مرکز جوړېږي

ارشیف

د لغمان په قرغیو کې ولسوالۍ کې د ۴ میلیونه افغانیو په ارزښت د شیدو ټولولو د یو ستر مرکز د جوړولو بنسټ کېښودل شوه.

د لغمان د کرنې، اوبو لګولو او مالدارۍ ریاست رئیس انجنیر محمد جمیل خوشحال نن ازادي راډیو ته وویل، چې د شیدې ټولولو دغه مرکزونه چې د کرنې وزارت له پراختیایي بودیجې څخه جوړېږي، د جوړولو لګښت یې څلور میلیونه افغانۍ ده.

نوموړي وویل، چې په قرغیو کې به د دغه مرکز د جوړولو چارې یې د روان کال تر پایه بشپړ او ګټې اخیستنې ته به وسپارل شي.

د شیدو ټولولو دغه مرکز چې د لسګونه لېټره شیدو د ټولولو وړتیا به ولري عصري خونې، د زېرمې خونه، او ګدام به هم ولري.

د یادو مرکزونو د جوړولو موخه د مالدارۍ د تولیداتو له لارې د خوړو خوندیتوب دی.

د لغمان د کرنې او مالدارۍ ریاست چارواکي وایي، چې د شیدې ټولولو یاد مرکز په مستقیمه توګه له کلیوالو مالدارانو شیدې راټولوي او د لبنیاتو د پروسس د فابریکو په واک کې یې ورکوي، چې هم د کلیوالو مالدارانو د اقتصادي ودې لامل کېږي او هم په هېواد کې د لبنیاتو د پروسس د پراختیا په برخه کې د پام وړ مرسته کوي.

د چارواکو په خبره د دغو مرکزونو جوړېدل د لبنیاتو د پراختیا او کاروبار په برخه کې یو مثبت ګام دی.

دوی زیاتوي، چې د شیدې ټولول او شیدو ته بازارموندنه کولای شي، چې د مالدارانو اقتصاد ته وده ورکړي.

افغان او پاکستاني چارواکو د واګه بندر پر ټرانزیټي ستونزو خبرې کړي

محمد یونس مهمند

د افغانستان د سوداګرۍ او پانګونې خونې چارواکو او یو شمېر سوداګرو نن سهار له پاکستاني چارواکو سره د واګه بندرله لارې هندوستان ته د صادراتي توکو د ټرانزیټ په ستونزو خبرې وکړې.

د دغې خونې لومړي مرستیال محمد یونس مهمند ازادي راډیو ته وویل چې دغه ناسته د ویډیو کنفرانس له لارې ترسره شوه.

ښاغلي مهمند وویل، په دغه ناسته کې له پاکستان سره په ټرانزیټ کې د افغان سوداګرو د ننګونو په خاص ډول د واګه بندر له مسیر څخه هندوستان ته د افغان سوداګرو د صادراتي توکو پر وړاندې شته ستونزې او ننګونې مطرح شوې او د پاکستان د حکومت له لوري یې پر حل ټینګار وشو.

نوموړي وویل چې په یاده ناسته کې د سوداګرۍ د پراختیا پر ضرورت ټینګار وشو او د پاکستان له حکومت یې وغوښتل چې سیاسي موضوعګانې باید پر سوداګرۍ او ټرانزیټ منفي اغېز ونه کړي.

د ښاغلي مومند په خبره، په یاده ناسته پاکستاني لوري ژمنه کړې چې د افغانستان د سوداګرو د صادراتو، ټرانزیټ او وارداتو ستونزې به د مشرتابه په کچه له اړوندو پاکستان چارواکو سره شریکې کړي او بشپړ ډاډ یې ورکړی چې د واګه بندر او کراچۍ بندر ټرانزیټي ستونزې به ژر تر ژر هوارې او د واګه بندر له لارې به صادراتو ته اجازه ورکړل شي.

امنیتي مسئولین: پکتیا او پکتیکا کې ۶ طالبان وژل شوي

ارشیف

په سویل ختیځو ولایتونو پکتیا او پکتیکا کې د ماین چاودنو ۶ طالبان وژلي او یو بل یې ټپی کړی دی.

په پکتیا کې د ۲۰۳ تندر قول اردو ویاند ایمل مومند ازادي راډیو ته وویل، د پکتیا احمد خېلو او د پکتیکا خوشامند کې طالبانو ماینونه خښول چې پرې چاودېدلي دي.

هغه زیاته کړه: "بېګا شپه ناوخته وسله والو طالبانو غوښتل چې په پکتیا کې د غونځې په سیمه کې ماین ځای پر ځای کړي، خپل ماین پرې چاودنه کړې، ۴ ماین خښوونکي هملته وژل شوي دي، د پکتیکا خوشامند سیمه کې هم طالبانو باندې خپل ماین چاودلی چې ۲ تنه یې وژلي او یو بل یې ټپي کړی دی."

د پکتیا امنیه قومندانۍ وایي، اریوب ځاځیو ولسوالۍ کې هم یو طالب د خپل ماین قرباني شوی دی.

طالبانو تراوسه د دغو درې واړو پیښو په اړه څه نه دي ویلي، خو په یوه خبرپاڼه کې یې امریکایي ځواکونه له دوی سره د شوې هوکړې په مکررو سرغړونو تورن کړي دي.

طالبانو ویلي، تېره شپه افغان او امریکایي ځواکونو د لوګر بابوس سیمه کې د ملکیانو په کورونو چاپه وهلې چې د خلکو کورونه یې لوټلي او یو عام کلیوال یې وژلی دی.

په دوحه کې د امریکا او طالبانو په لاسلیک شوې هوکړه کې دواړو لورو ژمنه کړې ده چې یو پر بل به بریدونه نه کوي.

نامعلومو کسانو کاپیسا کې د ملي امنیت کارکوونکی وژلی

ارشیف

نا معلومه وسله والو په کاپیسا کې د ملي امنیت یو کارکوونکی وژلی دی.

د کاپیسا د امنیه قومندانۍ ویاند شورش شایق ازادي راډیو ته وویل، د محب الرحمان په نوم دغه کس د ډنګر خېلو سیمه کې نن سهار دندې ته روان و چې موټر سایکل سپرو ډزې پرې وکړې.

په سیمه کې د ازادي راډیو د خبریال وایي، وروستیو کې کاپیسا ولایت کې هدفي وژنې زیاتې شوي دي، خو چارواکو د هدفي وژنو د شمېر په اړه څه نه دي ویلي.

کومې ډلې د دغې پېښې مسئولیت نه دی اخیستی.

د ناټو استازی: د طالبانو حملو د سولې خبرو پر وړاندې لوی خنډ جوړ کړی

ارشیف، یو شمېر طالب جنګیالي

په افغانستان کې د ناټو مأموریت ملکي استازی له طالبانو غواړي چې تشدد پای ته ورسوي څو د سولې خبرو ته لاره اواره شي.

ستیفانو پونتې کوروو په یوه وېډیويي پیغام کې چې پرون ماښام‌یې پر ټویټر خپور کړ ویلي دي چې په افغانستان کې د نړیوالو ځواکونو له عمومي قوماندان جنرال سکات مېلر سره یوځای یې د افغانستان د سولې په اړه په بروکسل کې د ناټو له عمومي منشي او نورو چارواکو سره په کتنه کې خبرې کړې دي.

ښاغلی پونتې کوروو وايي، د طالبانو حملو د سولې د روانو خبرو پر وړاندې لوی خنډ جوړ کړی دی.

ښاغلی کوروو زیاتوي: "موږ د افغانستان د وضعیت په اړه بحث وکړ. د طالبانو روان تشدد باید پای ته ورسېږي. د دوی دا کار د منلو نه‌دی ځکه دا د سولې د خبرو د پیل پر وړاندې یوه ستونزه او خنډ جوړوي."

د افغانستان لپاره د ناټو ملکي استازی وايي چې د افغانستان د روان وضعیت په اړه‌یې د شمالي اتلانتیک شورا ته هم معلومات ورکړل. ستیفانو پونتې کوروو زیاتوي چې د ناټو مشرانو یو ځل بیا د افغانستان او د دې هېواد د دفاعي-امنیتي ځواکونو د ملاتړ ډاډ ورکړ.

خلیل‌زاد: افغانستان کې د امریکا پر پانګونو طالب مشرانو سره خبرې وشوې

ارشیف، زلمی خلیل‌زاد او طالب مشران

د افغانستان د سولې لپاره د امریکا ځانګړی استازی وايي چې طالب مشرانو او امریکايي چارواکو په افغانستان کې د سولې له ټینګښت وروسته د متحده ایالاتو د پانګونو په اړه خبرې کړې دي.

زلمي خلیل‌زاد پر ټویټر په یوه بیان کې ویلي، په دې کتنه چې په قطر کې د طالبانو د سیاسي دفتر د مشر ملا عبدالغني برادر او د امریکا د نړیوال پرمختګ د مالي شرکت «USIDF» د مشر ادام بوهلېر «Adam Boehler» په ګډون په دوحه کې وشوه په افغانستان کې د امریکا او قطر د ګډو پانګونو پر احتمال خبرې وشوې.

طالبانو هم له خپلې خوا په یوه بیان کې دا کتنه تأیید کړې او ویلي یې دي چې د دوی په خبرو کې د افغانستان د راتلونکې اقتصادي ودې، بیارغونې او پرمختګ او په دې برخه کې د ښاغلي بوهلېر پر اقتصادي پلانونو او طرحو بحث وشو.

د طالبانو په بیان کې همداراز راغلي چې په پرونۍ کتنه کې د سولې د بهیر، د بندیانو د ژر تر ژره خلاصېدو، د بین‌الافغاني خبرو د پیل او نورو مسایلو په اړه هم له امریکايي لوري سره خبرې وشوې.

نور راوښيه

XS
SM
MD
LG