د لاسرسۍ وړ لېنکونه

تازه خبر
سه شنبه ۱۹ وری ۱۳۹۹ کابل ۱۲:۴۱

افغانستان

د سلواکیا پولیس دغلته د څو ورکو افغان نجونو د موندلو لټه کوي

د سلواکیا د پولیسو یو انځور

د سلواکیا پولیس د افغانستان د نجونو د لومړني ارکستر د هغو څلورو غړو د موندلو لټه کوي چې په یوه فیسټوال کې له ګډون وروسته له هوټله بې درکه شوي دي.

۳۵ کسیز افغاني ارکستر د شنبې په ورځ د جولای په ۱۳مه د چک جمهوریت پولې ته نږدې د سلواکیا په ترینڅین لوېدیځ ښارګوټي کې د پوهودا په نوم په فیسټوال کې موسیقي اجرا کړه.

د سلواکیا پولیس وايي، د دې ارکستر چې زهره نومېږي، ۴ غړې د یکشنبې په ورځ له خپل هوټله بې درکه شوي دي.

د ترینڅین د سیمه ییزو پولیسو ویندوی پاول کودلیڅکا وايي چې د موسیقۍ د ارکستر غړي له کنسرته وروسته خپل هوټل ته لاړې، خو په سبا سهار یې څلور تنه ورکې شوې.

ده وویل، د دې لپاره چې څېړنې روانې دي او همداراز په قانوني دلایلو د بې درکه شویو کسانو نومونه اوس نه څرګندوي.

د سلواکیا د څو سیمه ییزو رسنیو د راپور له مخې، د دې ارکستر ځینو غړو ویلي چې د یوې د تره زوی په جرمني کې اوسي.

د ورځې تازه خبرونه دلته ولولئ

غني: د داخلي محصولاتو او تولیداتو ملاتړ له لومړیتوبونو څخه دی

افغان ولسمشر محمد اشرف غني

ولسمشر غني وایي، د داخلي محصولاتو او تولیداتو ملاتړ د حکومت له لومړیتوبونو څخه دی.

ولسمشر غني چې تېره ورځ ناوخته د وېډیو کنفرانس له لارې له یو شمېر متشبثو مېرمنو سره خبرې کولې، وویل چې د کرنیزو محصولاتو د ساتنې او ملاتړ په موخه د هېواد په ۱۰ ولایتونو کې د ۱۰ سړو خونو د جوړولو کار بشپړ شوی او حکومت هڅه کوي چې متشبثو ښځو ته دوامدار او بنیادي فعالیتونه وکړي.

جمهور رئیس همداراز ټینګار وکړ چې د روغتیا د نړیوالو معیارونو مطابق د اتحادیو په تشکیل سره باید د ښځو تولیداتو ته پاملرنه وشي او متشبثې ښځې دې په دې اړه خپل وړاندیزونه له حکومت سره شریک کړي.

په دغه وېډیو کنفرانس کې یو شمېر متشبثو د کورني اقتصاد پیاوړتیا، د داخلي تولیداتو د ملاتړ، بازار موندنې، د ښځو د سوداګرۍ لپاره د ځمکو برابرولو او د سوداګرو او متشبثینو د امنیت د تأمین په اړه خبرې وکړې.

فاریاب کې د غنمو د زېرمه کولو ګدام جور شو

ارشیف

په فاریاب کې د غنمو د زېرمه کولو يو لوى ګدام ګټې اخیستنې ته وسپارل شو.

د افغانستان د کرنې او مالدارۍ وزارت ویاند اکبر رستمي نن ازادي راډیو ته وویل چې دغه ګدام د ٥ زره مټريک ټنه غنمو د زېرمه کولو ظرفيت لري.

نوموړي وویل چې دغه ګدام د کرنې وزارت د ٣٣ میلیونه افغانیو په لګښت د فاریاب په میمنې ښار کې جوړ شوی.

چارواکي وایي، د دغه ګدام په جوړېدو سره تر ډېره د غنمو د زېرمه کولو ستونزه هواره شوه.

ویل کېږي په دې سره به د افغان بزګرانو د کروندو غنمو ته هم بازار پیدا او دولت به‌يې ورنه په خپل وخت په ښه بیه وپېري چې دواړو لورو ته اقتصادي ښېګڼې لري.

د یاد ګدام کار په ۱۳۹۸ کال کې پیل او نن ګټې اخیستنې ته وسپارل شو.

بدخشان کې ۵ وسله‌وال طالبان وژل شوي

د بدخشان محلي پولیس

په بدخشان کې چارواکي وايي، د دې ولایت په وردوج ولسوالۍ کې پنځه وسله‌وال طالبان وژل شوي دي.

د بدخشان د امنیه قومنڅدانۍ ویاند ثناالله روحاني وايي، دا نښته د یکشنبې په شپه هغه مهال وشوه چې وسله‌والو طالبانو له څو خواوو د وردوج پر ولسوالۍ برید وکړ.

د ښاغلي روحاني په وینا د طالبانو دا برید د افغان امنیتي ځواکونو له‌خوا په شا تمبول شوی دی. نوموړي زیاته کړې چې د پنځو وسله‌والو پر وژل کېدو سربېره د دې ډلې اووه تنه ټپیان شوي هم دي.

طالبانو تر اوسه په دې اړه تبصره نه‌ده کړې.

کابل کې د کرونا ويروس له امله د مړ شوي ډاکتر همکاران معاينه کېږي

ارشیف

د افغانستان عامې روغتیا وزارت وايي، د هغو کسانو د کرونا ازموینې کوي چې پر دې ویروس د یو فوت شوي ډاکتر سره په تماس کې وو.

ډاکتر حنیف‌الله حنیف د یو شخصي روغتون متخصص ډاکتر و چې پر کرونا ویروس د اخته کېدو وروسته‌یې د دوشنبې په ورځ ساه ورکړه.

د عامې روغتیا وزارت ویاند وحید مایار ازادي راډیو ته وویل، څه موده مخکې هغه شخصي روغتون چې ښاغلي حنیف په‌کې کار کاوه اعلان وکړ چې د کرونا ویروس معاینات کوي.

هغه زیاته کړه: "مخکې له دې چې هر څه د عامې روغتیا له وزارت سره همغږي کړي، د کرونا د معایناتو کار يې پیل کړ چې روغتون ته‌یې د کرونا ناروغانو ورتګ زیات شو او دا ډاکتر پرې اخته شو. دا معلومه نه‌ده چې نوموړی د روغتون دننه یا بهر پر دې ویروس اخته شوی دی. خپله هغه ازموینې چې دې روغتون ترسره کړې وې، منفي وې، یوه اوونۍ وروسته چې نمونه د عامې روغتیا وزارت واخیسته، نو مثبته وه."

ډاکتر حنیف‌الله حنیف ۴۰ کلن و. ګڼو افغانانو د نوموړي پر مړینه خواشیني ښودلې ده.

هرات کې نږدې ۴۰ روغتیايي کارکوونکي په 'کوویډ-۱۹' اخته شوي

هرات کې د اخته کسانو ۲۳۰ پېښې ثبت شوې دي

په هرات کې روغتیايي چارواکي وايي، نږدې ۴۰ تنه روغتیايي کارکوونکي دغلته په کرونا ویروس اخته شوي دي.

د هرات د حوزوي روغتون سر طبیب محمد عارف جلالي ازادي راډیو ته وویل، په دې کې ډاکتران، نرسان او د بېلابېلو روغتیايي برخو کارکوونکي شامل دي.

هغه زیاته کړه: "زموږ په روغتیايي پرسونل کې رورنیز متخصصان شامل دي. له بده مرغه زموږ یو شمېر ډاکتران، نرسان، پاکوونکي، د انستیزي متتخصصان او کارمندان په کرونا ویروس اخته شوي دي."

په هرات کې روغتیايي چارواکي وايي، تر اوسه په دې ولایت کې پر کرونا د اخته کسانو ۲۳۰ پېښې ثبت شوې دي. په دې ډله کې ۷۲یې ښځې دي.

تر اوسه دغلته په 'کوویډ-۱۹' اخته کېدل لږترلږه پنځو کسانو د مړینې سبب شوی دی. هرات دا مهال د افغانستان د بل هر ولایت په مقایسه پر کرونا ویروس د اخته کسانو لوړه شمېره لري.

'پاکستان څخه د تورخم له لارې نن شااوخوا ۲۰۰۰ افغانان راستنېږي'

پاکستان څخه د افغانانو راستنېدل

په ننګرهار کې چارواکي وايي، دوی تمه لري چې نن سې شنبه به شااوخوا ۲۰۰۰ کسان له پاکستان څخه د تورخم له لارې افغانستان ته واوړي.

د ننګرهار د والي ویاند عطاالله خوګياڼي تېره شپه ازادي راډیو ته وویل، د دوشنبې په ورځ تر زرو زیات کسان د تورخم له لارې افغانستان ته وراوښتي دي چې ټول معاینه شوي او هغوی چې مشکوک وو، قرنطین شوي دي.

هغه زیاته کړه: "نن د سې شنبې په ورځ به هم دا چاره ترسره کېږي. موږ اټکل کوو چې تر دوو زرو کسان به راستانه شي. دوی به ټول معاینه کېږي. موږ په دې برخه کې هېڅ ډول ستونزه نه‌لرو."

پاکستان د کرونا ویروس د خپرېدو په اړه له څو اوونۍ اندېښنو وروسته د دوشنبې په ورځ اعلان وکړ چې د تورخم لاره په موقته توګه د افغانانو پر مخ پرانیزي.

د افغانستان د کډوالو او راستنېدونکو چارو وزیر سید حسین عالمي بلخي تېره شپه ازادي راډیو ته وویل دا مهال یوازې هغو کسانو ته د تورخم څخه د اوښتو اجازه ورکول کېږي چې د افغانستان پاسپورټ او د پاکستان ویزې ولري.

په پاکستان کې تر اوسه تر ۳۷۰۰ زیات کسان پر کرونا ویروس اخته بلل شوي او تر ۵۰ زیات د دې ویروس له کبله مړه شوي دي.

د امریکا پوځ له تړون د سرغړونې په اړه د طالبانو ادعا رد کړه

ارشیف،

د امریکا پوځ له طالبانو سره په قطر کې د تړون د سرغړونې په اړه د وسله‌والو طالبانو ادعا رد کړې ده.

دغه تړون د فبرورۍ پر ۲۹مه په دوحه کې لاسلیک شو.

د دغه پوځ ویاند ډګروال ساني لګټ د اپرېل پر ۵مه په ټویټر لیکلي چې په افغانستان کې امریکایي ځواکونو له طالبانو سره تړون مراعات کړی او په دې اړه شوې ادعاوي یې بې‌اساسه بللې دي.

نوموړي دا هم لیکلي چې دا وسله‌واله ډله یعنې طالبان باید تاوتریخوالی کم کړي او خبرداری یې ورکړی چې د قطر د موافقې سره سم دوی به د افغانستان امنیتي ځواکونو دفاع ته دوام ورکړي که چېرې د طالبانو له لوري برید ورباندې وشي.

تر دې وړاندې وسله‌والو طالبانو په یوې اعلامیه کې ادعا کړې وه چې افغان او امریکایي ځواکونه په هغو سیمو کې چې جګړه‌ییزې نه‌دي هوایي بریدونه کوي او په ملکي سیمو کې عملیات ترسره کوي.

طالبانو ویلي وو چې امریکا په دې کار سره د دوحې له تړون څخه سرغړونه کوي.

دوی افغان حکومت هم تورن کړی چې د ۵۰۰۰ طالب بندیانو په خوشې کولو کې یې ځنډ راوستی.

دا هغه اقدام دی چې په بدل کې به‌یې زر افغان امنیتي ځواکونه چې له طالبانو سره بندي دي، خوشې کېږي او وروسته به بین‌الافغاني خبري پیلېږي.

افغان حکومت په تازه راپور کې د دوشنبې په ورځ وویل چې وسله‌وال طالبان د دې ډلې د هغو ۱۵ قوماندانانو خوشې کېدل غواړي چې په لویو بریدونو او بشر ضد جنایتونو کې ښکېل بلل شوي.

افغان چارواکي وایي دا غوښتنه د منلو نه‌ده.

بشر حقونو کمېسیون: میدان وردک کې د ملکي وژنو عاملین دې محاکمه شي

ارشیف، له ٢٠٠٩ کال تر ٢٠١٩ کاله پورې له ٨٦ زرو زیات ملکي وګړي وژل شوي دي.

د افغانستان د بشر حقونو خپلواک کمېسیون په میدان وردک ولایت کې د وروستیو ملکي وژنو د عاملینو د محاکمې غوښتنه کوي.

د دې کمېسیون مرستیال ویاند ذبیح‌الله فرهنګ د دوشنبې په ورځ «۱۳۹۹ کال د وري ۱۸» ازادي راډیو ته وویل: "د میدان وردګ ولایت د خلکو بشري حقونه تر پښو لاندې شوي دي، د ژوند کولو حقوق په پام کې نه‌دي نیول شوي، خو د افغانستان له حکومته غواړو چې د دې پېښې عاملین، حتی که دا پېښه په عمدي ډول نه‌وي هم ترسره شوي، ودې نیسي او د قانون منګولو ته دې وسپارل شي."

د بشر حقونو خپلواک کمېسیون د جګړې له ښکېلو خواوو څخه غوښتي چې د ښاریانو ژوند ته په پاملرنې سره، عام خلک او عمومي او غیر پوځي ځایونه په نښه نه‌کړي.

دا په داسې حال کې ده چې د بشر حقونو د خپلواک کمېسیون د سرچینو په وینا له ٢٠٠٩ کال تر ٢٠١٩ کاله پورې له ٨٦ زرو زیات ملکي وګړي وژل شوي دي.

د دې کمېسیون د شمېرو له مخې یوازې ٢٠١٩ کال کې ٢٨١٧ ملکیان وژل شوي او ٧٩٥٥ نور ټپیان شوي دي.

فراه کې د ١٠ ممیز خونو جوړېدل

ارشیف، لوګر کې یوه ممیز خونه

په فراه کې ١٠ ممیز خونې جوړې شوې.

د کرنې او مالدارۍ وزارت ویاند اکبر رستمي نن ازادي راډیو ته وویل، په کلني ډول هره ممیز خونه د ١٠ ټنه ممیزو د تولید وړتیا لري.

نوموړي زیاته کړه چې یادې ممیز خونې د فراه په پشت رود ولسوالۍ کې جوړې شوې دي.

د ښاغلي رستمي په خبره یادې ممیز خونې د څلور میلیونه او ۸۶۳ زرو او ۹۰۰ افغانیو په مجموعي لګښت جوړې شوې چې لګښت‌یې د کرنې او مالدارۍ وزارت له لوري ورکړل شوی دی.

د کرنې او مالدارۍ وزارت وایي، له دې سره په فراه کې د جوړو شویو ممیز خونو شمېر ٣٦ ته ورسېد.

دغه ممیز خونې د فراه په پشت رود، خاک سفید کې جوړې شوې چې بڼوالو سره له اقتصادي پلوه د پام وړ مرسته کړې ده.

افغانستان ته ۴۲ زره ټنه خوراکي توکي انتقال شوي

په خوراکي توکو کې ۱۲ زره ټنه غنم دي.

د افغانستان د ټرانسپورت وزارت وایي، په تېره یوه اوونۍ کې ۴۲ زره ټنه خوراکي توکي هېواد ته انتقال شوي دي.

د ټرانسپورت وزارت مرستیال ویاند اشرف حق‌شناس د دوشنبې په ورځ ازادي راډیو ته وویل چې د خوراکي او نورو اړینو توکو انتقال په عادي ډول روان دي او تېره اوونۍ ۹۲ زره ټنه مواد هېواد ته انتقال شوي چې له دې جملې ۴۲ زره ټنه خوراکي مواد او نور نفتي او ساختماني مواد دي.

نوموړي وویل، په دغو موادو کې ۱۲ زره ټنه غنم، ۲۹ زره ټنه اوړه او ۲۴۸ ټنه غوړي دي چې د حیرتان-مزار شریف، اقینې او تورغنډۍ له لارې انتقال شوي دي.

همدارنګه دغه محمولو کې ۲۷ زره ټنه تېل، ۹ زره ټنه مایع ګاز، ۴ زره ټنه نور مواد شامل دي.

د ټرانسپورت وزارت ډاډ ورکوي چې د خوراکي موادو رالېږد په عادي ډول روان دی.

د تورخم له لارې د افغان مسافرو راستنېدنه پیل شوه

د تورخم دروازه

د تورخم له لارې له پاکستان څخه د افغان مسافرو د راستنېدو لړۍ پیل شوه.

د ننګرهار د والي ویاند عطاالله خوګیاڼي ازادي راډيو ته په را استولي پیغام کې ویلي چې دغه لړۍ نن دوشنبه سهار اووه نیمې بجې پیل شوه.

د ښاغلي خوګیاڼي په خبره چې راستنېدونکي مسافر تر طبي څېړنو وروسته ځانګړي مرکز ته لېږدول کېږي چې هلته به له ۱۴ تر ۲۱ ورځو په قرنطین کې وي.

دی وایي هغه مسافر چې د کرونا ویروس نښې په‌کې ولیدل شي، په یوه جلا او ځانګړي ځای کې به تر قرنطین لاندې ونیول شي.

ښاغلی خوګیاڼۍ وايي چې د راستنېدنې دا لړۍ به درې ورځې دوام وکړي.

د ننګرهار ولایت د سیمه‌ییزو چارواکو په خبره، په تورخم ښارګوټي کې د مسافرو د قرنطین او طبي څېړنو لپاره پوره چمتووالی نیول شوی او په دې برخه کې کومه ستونزه نه‌لیدل کېږي.

د دوی د معلوماتو له مخې، د اوس لپاره په تورخم کې د زر تنو د قرنطین لپاره تیاریانې نیول شوې دي.

د یادونې وړ ده چې په ننګرهار کې د کرونا ویروس ۱۱ پېښې ثبت شوي چې اووه یې منفي، دوه مثبتې، او د دوو نورو یې تر اوسه پایله معلومه نه‌ده.

افغانستان کې د کرونا ویروس ۳۰ نوې پېښې ثبت شوې

افغانستان کې ټولې مثبتې پېښې ۳۶۷ ته ورسېدې.

په افغانستان کې د کرونا ویروس ۳۰ نورې مثبتې پېښې ثبت شوې دي.

د افغانستان د عامې روغتیا وزارت ویاند وحیدالله مایار رسنیو ته په استولي پيغام کې ویلي چې وروستۍ مثبتې پېښې په هرات، کابل، نیمروز، کندز، فاریاب او دایکنډي کې ثبت شوې دي.

د عامې روغتیا وزارت د معلوماتو په اساس د نویو پېښو په ثبتېدو سره په دې هېواد کې د کرونا ټولې مثبتې پېښې ۳۶۷ ته ورسېدې.

امریکا له افغان مرکچي پلاوي د نړیوالې ټولنې ملاتړ وستایه

د جَنوبي او مرکزي اسیا په چارو کې د امریکا د بهرنیو چارو وزارت سرپرست مرستیاله الېس ولز

امریکا د بین‌الافغاني خبرو لپاره د افغان حکومت له لوري له ټول‌شموله پلاوي د نړیوالې ټولنې ملاتړ ستایلی دی.

د متحده ایالاتو چارواکو مخکې تر دې هم د افغان حکومت له لوري د ټیم له اعلانه هرکلی کړی و.

تازه یکشنبه ناوخته د جَنوبي او مرکزي اسیا په چارو کې د امریکا د بهرنیو چارو وزارت سرپرست مرستیالې الېس ولز په خپل ټویټر لیکلي چې د بین‌الافغاني خبرو د پيل لپاره د افغان حکومت له لوري د یوه ټول‌شموله پلاوي له اعلانه د نړیوالې ټولنې د پراخ ملاتړ هرکلی کوي.

هغې زیاته کړې چې ناټو، اروپايي ټولنه، د اسلامي همکاریو سازمان، جرمني، هند، ازبکستان، پاکستان او نورو ټولو له دې مهم اقدامه د ملاتړ غږ پورته کړی.

د انتخاباتو د نتیجې تر اعلان وروسته د بین‌الافغاني خبرو لپاره د یوه ټول‌شموله ټیم اعلان چې عبدالله عبدالله هم منلی ظاهراً د ولسمشر اشرف غني او د پخواني اجرائیه رئیس عبدالله عبدالله د سلا یوازنۍ بېلګه ده.

د افغانستان حکومت د حمل په نهمه له طالبانو سره د بین‌الافغاني خبرو لپاره د ۲۱ کسانو نومونه اعلان کړل چې مشري یې محمد معصوم ستانکزي ته ورکړې ده.

د مخابراتو وزارت: د مخابراتي شرکتونو د انټرنټ بیې راکمې شوې

ارشیف،

د افغانستان د مخابراتو او معلوماتي ټکنالوژۍ وزارت وایي چې د پرله‌پسې هڅو په لړ کې د مخابراتي شرکتونو انټرنټ بیې راکمې شوې.

دا خبره یاد وزارت پرون یکشنبه د مخابراتي شرکتونو له استازو سره تر ناستې وروسته اعلان کړه.

د افغانستان د مخابراتو او معلوماتي ټکنالوژۍ سرپرست وزیر محمد فهیم هاشمي د مخابراتي شرکتونو له استازو سره په ناسته کې د کرونا ویروس له امله په افغانستان او نړۍ کې روان وضعیت ته په اشارې ویلي چې خلک له هر وخته زیات اوس انټرنټ کاروي او په‌کار ده چې بیې‌یې راټيټې شي.

د مخابراتو او معلوماتي ټکنالوژۍ وزارت د بیان له مخې د مخابراتي شرکتونو استازو ژمنه وکړه چې په خپلو پرچون انټرنټ بیو کې په منځنۍ کچه له ۴۷نیم فیصده نیولې تر ۷۰،۷ سلنه تخفیف وړاندې کوي.

د بېلګې په توګه که پخوا د نږدې شپږ جي بي انټرنټ بیه ۶۰۰ افغانۍ وه اوس شاوخوا ۴۰۰ ته راکمه شوې.

همداراز د دوه جي بي او درې سوه ام بي انټرنټ بیه له ۳۸۰ اوس ۲۵۰ ته راښکته شوې ده.

د مخابراتو وزارت په خپله اعلامیه کې د انټرنټي کڅوړو د بیو د کمښت ټول جزئیات بیان کړي دي.

د تورخم او سپین بولدک لارې نن پرانیستل کېږي

تورخم لاره

نن د تورخم او سپین بولدک لارې دا فغانانو پر مخ پرانیستل کېږي.

په اسلام‌اباد کې د افغانستان سفارت او د پاکستان د بهرنیو چارو وزارت له اعلان سره سم به له نن دوشنبې تر پنجشنبې پورې د اپرېل له شپږمې تر نهمې د تورخم او سپین بولدک له لارو په پاکستان کې ایسار افغانانو ته اجازه ورکړل شي چې افغانستان ته دننه شي.

پاکستان د مارچ په ۱۶مه تورخم او د مارچ په لومړۍ سپین بولدک–چمن لارې د افغانانو د تګ راتګ لپاره بندې کړې چې له امله‌یې په دواړو سیمو کې زرګونه افغانان بې‌برخلیک او ایسار پاتې شول.

د لارو د بندښت اصلي علت د کرونا ویروس د خپرېدو مخنیوی یاد شوی و.

تازه د ننګرهار والي شاه محمود میاخېل یکشنبه ویلي چې د تورخم له لارې افغانستان ته ټول راتلونکي مسافر به له ۱۴ تر ۲۱ ورځو په تورخم کې قرنطین شي او هېڅوک نه‌مستثنی کېږي.

هغه زاته کړه: "زما هیله له ټولو افغانانو دا ده چې واسطه کېږئ مه، دې ته ضرورت نه‌شته دی. موږ ته هم تکلیف مه‌جوړوئ ځان ته‌یې هم مه‌جوړوئ. موږ پرېږدئ چې خپل صحیح سکریننګ وکړو. د ډاکترانو ټیمونه هلته مؤظف شوي دي هغوی خپل تدابیر لري. د ښځو لپاره جدا ځای، د نارینه‌و لپاره جدا ځای او د هغو لپاره چې ډېر مریضان دي د هغوی لپاره جدا ځای په نظر کې نیول شوی دی. هغه څه امکانات چې زموږ لاس کې و هغه مو برابر کړل."

د ننګرهار والي د دغه ولایت له ولسونو مننه کړې چې د قرنطین لپاره‌یې د ځای په جوړولو کې له دولت سره مرسته کړې ده.

نور راوښيه

XS
SM
MD
LG