د لاسرسۍ وړ لېنکونه

تازه خبر
یکشنبه ۱۱ غبرګولی ۱۳۹۹ کابل ۰۲:۲۱

افغانستان

چارواکي په بادغیس کې د وژل شویو کومانډویانو بېلابېل ارقام ورکوي

ارشیف، په بادغیس کې یو افغان سرتېری

د افغانستان دفاع وزارت د بادغیس په اب کمري کې د افغان کومانډو ځواکونو وژل کېدل تأیيدي، خو شمېر یې له هغه چې مخکې د بادغیس والي شااوخوا ۲۵ تنه یاد کړی و، کم بولي.

د دفاع وزارت مرستیال ویاند فواد امان مخکې ازادي راډيو ته وویل چې په دغو تهاجمي عملیاتو کې چې افغان ځواکونو دوه ورځې مخکې د بادغیس په اب کمري کې پیل کړي، لسګونه وسله والو طالبانو ته مرګ ژوبله اوښتې.

نوموړي افغان ځواکونو ته د اوښتو تلفاتو په اړه وویل: د تلفاتو دقیق شمېر نشم ویلی خو د تلفاتو شمېر ډېر محدود دی، ښایي له لسو کم د افغانستان د دفاعي ځواکونو غړي شهیدان شوي وي، خو د دښمن تلفات ډېر زیات دي، د دښمن جسدونه په سیمه کې پاتې دي، موږ د دښمن د تلفاتو تصاویر له رسنیو سره شریک کړي دي.

د دفاع وزارت مرستیال ویاند دغه راز وویل چې دغه عملیات به تر هغه په آب کمري کې روان وي چې سیمه له وسله والو طالبانو تصفیه شوې نه وي.

له دې مخکې د بادغیس والي عبدالغفور ملکزي ازادي راډیو ته ویلي وو چې ۲۰ یا ۲۵ کومانډو ځواکونه د تېرې دوشنبې په ورځ د دې ولایت د اب کمري ولسوالۍ په میده قل سیمه کې وروسته له هغې له وسله والو طالبانو سره په نښتو کې ووژل شول چې له الوتکو د طالبانو تر نفوذ لاندې ځای کې راکوز کړای شوي وو.

د بادغیس والي دغه راز ویلي چې په نښتو کې له شلو زیات وسله وال طالبان هم وژل شوي دي.

د طالبانو ویاند قاري یوسف احمدي ادعا کړې چې د افغان کومانډو ۳۹ غړي یې وژلي او ۱۶ تنه یې له وسلو او مهماتو سره یوځای نیولي دي.

د ورځې تازه خبرونه دلته ولولئ

د هند د مرسته شويو غنمو ۳مه بېړۍ چابهار ته ورسېده

د هند مرسته شوي غنم

د هند د مرسته شويو غنمو د لېږدونې درېيمه بېړۍ پرون ناوخته چابهار ته ورسېده.

د سوداګرۍ او پانګونې خونې مرستیال یونس مومند نن ازادي راډیو ته وویل چې له افغانستان سره د هند ٥ زره ٧٥٠ مټريک ټنه مرسته شوې غنم چابهار بندر ته ورسېدل او هېواد ته د دغو غنمو لېږدول پيل شوي دي.

د دغو غنمو په لېږدونې سره د هندوستان د مرسته شويو غنمو له جملې څخه نږدې ٢١ زره مټريک ټنه‌يې لېږدول کېږي چې په هېواد کې د کرونا ويروس د خپرېدو بېړني حالت او غنمو ته د زياتې اړتيا وضیعت کابو کړي.

دوی وایي له دې سره جوخت د پاتې غنمو د واردولو کار دوام لري او ټاکل شوې ده د پاتې غنمو د لېږدولو بهير د جون په اتمه پيل شي.

د يادونې وړ ده، د هغو ١٠ زرو ټنو غنمو لېږدول چې پخوا له کاندولا بندر څخه پيل شوي وو، بشپړ شوي او د کندهار او هرات په زېرمو کې ځاى پر ځاى شوي دي.

د ملي پرمختيا شرکت د هندوستان د ٧٥ زره مټريک ټنه غنمو د لېږدونې مسؤليت منلى دى.

د افغانستان مالیې وزارت: ملي شورا دې د کرونا بودجه ژر تصیب کړي

د مالیې وزارت

د افغانستان مالیې وزارت له ملي شورا نه غواړي چې په افغانستان کې له کرونا ویروس سره د مبارزې لپاره بودجه ژر تر ژره تصیب کړي.

د دغه وزارت ویاند شمروز مسجدي نن ازادي راډیو ته وویل چې مالیې وزارت د ثور په ١٥مه نېټه د بودجې سند ولسي جرګې ته سپارلی، خو د نږدې یوې میاشتې په تېرېدو سره لاهم دغه سند نه‌دی تصویب او بې‌پرخلیکه پاتې دی.

دی وایي چې په عادي بودجه کې د کرونا ویروس سره د مبارزې لپاره نږدې ۱۰ میلیارده او ۱۶۹ میلیونه افغانۍ تعدیلات راغلي چې باید ملي شورا یې له ارزونو وروسته تصویب کړي.

دا په داسې حال کې ده چې د ١٣٩٩ مالي کال بودجه ۴۲۸ میلیارده افغانۍ ده چې له دې ۲۸۹ میلیارده عادي او ۱۳۹ میلیارده‌یې پراختیایي بودجه ده، خو ولسي جرګه وایي دغه بودجه متوازنه نه‌ده.

ملي امنیت شورا: په ۲ ورځو کې د طالبانو ۷۱۰ تنه بندیان خوشې شوي

د ازاد شويو طالب بندیان یوه ډله

د افغانستان د ملي امنیت شورا وايي چې په وروستیو دوو ورځو کې د وسله‌والو طالبانو ۷۱۰ تنه بندیان خوشې شوي دي.

د ملي امنیت شورا ویاند، جاوېد فیصل بېګا ازادي راډیو ته وویل چې دا کسان له پلچرخي، د پروان له مرکزي توقیف ځایه او نورو ولایتي زندانونو خوشې شوي دي.

جاوېد فیصل زیاته کړه: "دا لړۍ به نن یکشنبه هم دوام لري تر څو د جمهور رئیس له فرمان سره سم د طالبانو ۲۰۰۰ بندیان له زندانه خوشې شي.

هغه نه‌دي ویلي چې نن به څو زندانیان خوشې کېږي.

د افغانستان حکومت تېره اوونۍ وویل چې د طالبانو ۲۰۰۰ بندیان له زندانه خوشي شوي خو دا لړۍ لا هم روانه ده.

وسله‌والو طالبانو له حکومت سر د سولې د خبرو د پیل لپاره د خپلو ۵۰۰۰ بندیانو د خوشې کېدو غوښتنه کړې ده.

د وسله‌والو طالبانو یو ۵ کسیز پلاوی د دې بهیر د تخنیکي اړخ د څارنې لپاره کابل ته تللی دی.

په قطر کې د وسله‌والو طالبانو د سیاسي دفتر ویاند سهېل شاهین په یوه پیغام کې چې بېګا د ازادي راډیو خبریال ته رسېدلی ویلي چې تر اوسه یې د افغانستان د امنیتي ځواکونو ۴۲۰ غړي خوشي کړي دي.

خو د افغانستان حکومتي چارواکو په دې اړه لا څه نه‌دي ویلي.

مخکې په ځیني مواردو کې چارواکو ادعا کړې وه چې وسله‌والو طالبانو ملکي خلک هم د امنیتي ځواکونو په ګڼه کې شمېرلي او خوشې کړي دي.

روغتیا وزارت: تېره یوه میاشت کې د کرونا ویروس پېښې څو چنده زیاتې شوي

ارشیف

په افغانستان کې روغتیايي چارواکي وايي چې د کرونا ویروس د مثبتو پېښو شمېر په یوه وروستي میاشت کې څو برابره زیات شوی دی.

د عامې روغتیا وزارت مرستیال وحیدالله مجروح پرون، د مې په ۳۰مه، په کابل کې خبریالانو ته وویل چې د کرونا ویروس لا هم د زیاتېدو په حال کې دی او که ډېر خلک په دې ویروس اخته شي، د افغانستان پر روغتیايي سکټور به ډېر فشار راشي او د یوې فاجعې د پېښېدو امکان شته.

مجروح وویل چې د کرونا ویروس مثبتې پېښې له ۱۴۵۰۰ اوښتې دي.

مجروح وویل چې د کرونا ویروس له کبله ۲۴۹ تنه مړه شوي دي.

د افغانستان د عامې روغتیا وزارت له خلکو غواړي چې له لویو غونډو ډډه وکړي، که کولای شي په کورونو کې دي کېني او مکررا دي لاسونه پرېمینځي.

چارواکي: پروان کې وسله ‌والو طالبانو ۳ ملکيان وژلي

د پروان ولایت یوه څنډه

په پروان کې چارواکو ویلي چې پر یوه امنیتي پوسته د وسله‌والو طالبانو په برید کې درې ملکي کسان وژل شوي دي.

د پروان د والي ویاندې وحیدې شهکار پرون، د مې په ۳۰مه، ازادي راډیوته وویل چې پېښه د جوي دختر په سیمه کې شوې ده.

وحیده شهکار زیاته وویل: "وسله‌والو طالبانو د سیاه ګرد ولسوالۍ په جوي دختر سیمه کې د هاوان د ګولۍ ډز کړی چې هدف‌یې د امنیتي ځواکونو پوسته وه خو پر یوه کور لګېدلی او د یوې کورنۍ درې ځوانان په کې وژل شوي دي.

خو د وسله‌والو طالبانو یوه ویاند ذبیح‌الله مجاهد ازادي راډیو ته په استولي پيغام کې ویلي چې دا کار دوی نه‌دی کړی.

طالبانو په ۶ ولایتونو کې ۷۳ تنه زندانیان ازاد کړل

ارشیف

طالبان وایي، نن‌یې په بلخ، کندز، لوګر، پکتیا، خوست او پکتیکا کې ۷۳ تنه زندانیان ازاد کړي دي.

د طالبانو د قطر دفتر ویاند سهیل شاهین پر خپله ټویټرپاڼه لیکلي، ازادو شویو کسانو ته جامې او پنځه پنځه زره افغانۍ ورکول شوي او خپلو کورنیو ته لېږدول شوي دي.

طالبان وایي، تر اوسه‌یې له بېلابېلو زندانونو ۴۲۰ افغان سرتېري ازاد کړي دي.

بل لور ته د افغانستان د ملي امنیت شورا ویلي چې نن به یو شمېر نور طالب زندانیان هم ازاد کړي، حکومت تر اوسه د طالبانو دوه زره بندیان ازاد کړي دي.

افغانستان کې د کرونا ویروس د مثتبو پېښو شمېر ۱،۴۵۲۵ ته ورسېد

ارشیف

د افغانستان عامې روغتیا وزارت وایي، تېرو ۲۴ ساعتونو کې یې د کرونا ویروس څه باندې ۸۵۰ مثبتې پېښې ثبت کړې دي.

د دغه وزارت مرستیال وحیدالله مجروح رسنیو ته په یوه پیغام کې ویلي، دغه هېواد کې روغتونونه په ډکېدو دي او د ویروس خپرېدا هم ورځ تر بلې زیاتېږي.

ښاغلی مجروح زیاتوي: "کرونا ورځ تر بلې په زیاتېدو ده، تېرو ۲۴ ساعتونو کې ۱،۴۲۵ سمپلونه ټسټ شوي، له دې ډلې ۸۶۶ مثبت دي، ۳ تنه وفات شوي او ۴۴ نور روغ شوي دي، ټولې پېښې ۱،۴۵۲۵ شوې، ۲۴۹ تنه مړه شوي او ۱،۳۰۳ تنه روغ شوي دي."

نوموړي وویل، حکومت د نویو روغتیایي مرکزونو د جوړولو هوډ لري، خو له خلکو یې یو ځل بیا وغوښتل چې روغتیایي سپارښتنې او ټولنیز واټنونه په پام کې ونیسي.

محمد نبي د انګلستان سږني کنټ لیګ کې نه‌لوبېږي

محمد نبي

د افغانستان کرکټ ملي لوبډلې الرونډر غړی محمد نبي سږ کال د انګلستان په کنټ لیګ کې نه‌لوبېږي.

نوموړي د کرونا ویروس د خپرېدو له کبله له دغه لیګ سره د سږنیو لوبو تړون لغوه کړی دی.

محمد نبي تېر کال په دغه لیګ کې نهه لوبې کړي چې په ۱۴۷ منډو او اته وېکټو ښه ځلېدلی دی.

د کنټ لیګ مشر پاول ډاونټون ویلي، لیګ ته د نبي د ورتګ په اړه لېوالتیا زیاته وه، خو ده تأیید کړې چې د کرونا له کبله د لوبو مهال‌وېش ګډوډ شوی او نبي سږ کال دې لیګ کې نه‌شي لوبېدلی.

عبدالله: د اورکم یا اوربند په صورت کې طالبانو سره مذاکرات پیلوو

عبدالله عبدالله

د افغانستان د پخلاینې عالي شورا وایي، مرکچي پلاوی خبرو ته چمتو دی خو وایي، له طالبانو سره خبرې داسې مهال پيلوي چې د اورکم یا اوربند فضا حاکمه وي.

د دغې شورا مشر عبدالله عبدالله نن کابل کې خبریالانو ته وویل، اوس په افغانستان کې جګړه د اختر نه مخکې مودې په تناسب کمه شوې او ده دا موقع د سولې د خبرو پېل لپاره ګټوره وبلله.

ښاغلي عبدالله وویل، ډېر ژر به د پخلاینې شورا اداري جوړښت هم بشپړ چې ورسره به د ده په باور، د سولې پیل شوې هڅې نورې هم ګړندۍ او همغږې شي.

له اختر وروسته که څه هم په نا مستقیم ډول د اورکم فضا حاکمه ده، خو په ځینو ولایتونو کې طالبانو او افغان ځواکونو جګړې کړي.

طالبانو د اروپايي شورا له وروستۍ اعلامیې هرکلی وکړ

قطر کې د طالب استازو یو انځور

طالبانو د اروپایي شورا له وروستۍ اعلامیې هرکلی کړی خو ویلي یې دي، دې اعلامیه کې ځینې داسې ټکي دي چې د دوی په باور د افغانانو د خپلواکۍ له حق سره په ټکر کې دي.

د طالبانو یاند ذبیح الله مجاهد رسنیو ته په یوه خبرپاڼه کې لیکلي، لکه څنګه چې افغانان د نورو په چارو کې لاسوهنه نه کوي، باید نور هېوادونه هم د افغانستان په اړه دا اصل په پام کې ونیسي.

د طالبانو په خبرپاڼه کې راغلي، د دوی او امریکا د هوکړې له مخې به بین الافغاني خبرو کې د افغانستان د راتلونکي نظام په اړه پرېکړه کېږي.

پرون د اروپایي ټولنې شورا د افغانستان په اړه یوه اعلامیه تصویب کړه چې په کې په مشروط ډول له دغه هېواد سره د سیاسي او مالي ملاتړ ډاډ ورکول شو.

په اعلامیه کې راغلي، اروپایي ټولنه به په دې شرط افغانستان سره مرستو ته دوام ورکړي چې دغلته د تېرو ۱۸ کلونو لاسته راوړنې، ولسواکي، ډیموکراسي او بشري حقونه خوندي او تاوتریخوالی را کم شي.

افغان پوځ: طالبانو لوګر کې د ملي اردو ۶ سرتېري خوشې کړي

ارشیف

لوګر کې د پوځ مسئولین وایي چې وسله والو طالبانو تېره شپه د ملي اردو ۶ سرتېري له بنده ازاد کړي دي.

په لوګر کې د ۲۰۳ تندر قل اردو د څلورمې لوا ویاند احمد شکیل تسل خبریالانو ته ویلي چې دغه خوشې شوې سرتېري د پوښتنو ګروېږنو په هدف د ملي امنیت مسئولینو ته سپارل شوي دي.

ښاغلي شکیل دا ونه ویل چې دغه سرتېري څومره وخت د طالبانو په بند کې وو او په څه ډول او چېرته بېرته خلاص شول.

د اختر په ورځو کې د افغان حکومت له خوا د شاوخوا زرو طالب زندانیانو له ازادېدو وروسته طالبانو هم ژمنه وکړه چې ګڼ شمېر زندانیان به ازاد کړي.

د کونړ کرنې ریاست: نږدې ۴۰۰ ټنه شفتالو تولید شوي

د شفتالو بڼونو له درکه خلکو ته د کاري اسانتیاوو ترڅنګ بڼوالو په سږني فصل کې ۸.۲ میلیونه افغانۍ عاید کړی دی.

د کونړ د کرنې، اوبولګولو او مالدارۍ ریاست چارواکي وایي، سږکال په دې ولایت کې څه کم څلور سوه ټنه شفتالو تولید او بڼوالو ته میلیونه افغانۍ عاید ور په برخه شو.

د کونړ د کرنې ریاست وایي، چې په دې ولایت کې د خصوصي پانګوالو له لوري د بڼوالۍ په برخه کې د پانګونې لېوالتیا ورځ تربلې په پراخېدو ده.

د کونړ د کرنې رییس نجیب الله عادل نن ازادي اډیو ته وویل، چې د مالټې، لیمو او نارنجو ترڅنګ د کرنې ریاست په تخنیکي همکاریو د پانګوالو له لوري په ۹۵۰ جرېبه ځمکه کې د شفتالوانو بڼونه هم جوړ شوي، چې سږکال د ۲۷۰ جرېبه ځمکې باغونه په حاصلاتو راغلي.

نوموړی وایي چې د شفتالو بڼونو له درکه خلکو ته د کاري اسانتیاوو ترڅنګ بڼوالو په سږني فصل کې ۸.۲ میلیونه افغانۍ عاید کړی دی.

ځایي اوسېدونکي بیا د مېوو د ښه کېفیت ترڅنګ د بنوالۍ سکتور وده د هېواد د ملي اقتصاد او کورنیو تولیداتو د پیاوړتیا په برخه کې هم اغېزمن بولي او د دې ولایت د شاړو دښتو ابادولو په برخه کې د حکومت او خصوصي سکټور په ګډو همکاریو ټینګار کوي.

د کونړ د کرنې ریاست چارواکي وایي دوی هلې ځلې کوی، چې په دې ولایت کې د بڼوالۍ لمن پراخ او د بېلابېلو مېوو نوي بڼونه جوړ کړي.

د هرات صرافانو ټولنه: د پیسو د راکړې ورکړي بازار وتړل شو

د هرات ښار یوه څنډه

په هرات کې د پیسو د راکړې ورکړي بازار وتړل شو.

دا کار وروسته له هغې وشو چې په تېرو ۴۸ ساعتونو کې دوه صرافان د نامعلومو وسله والو له لوري وتښتول شول.

د هرات د صرافانو ټولنې وايي، دا کار یې د خپلو صرافانو د برمته کېدو په غبرګون کړی دی.

د دغې ټولنې مشر بهاءالدین رحیمي نن رسنیو ته وویل، چې په تېرو نږدې ٧ میاشتو کې پنځه صرافان او یو شمېر سوداګر په دغه ولایت کې د سړي تښتونکو له لوري تښتول شوي دي.

نوموړي وویل، په هرات کې د انسان تښتونکو او وسله والو غلاوو له امله د دوی کار په ټپه درېدلی دی.

دوی ګواښ کوي چې تر هغه به کاري اعتصاب ته دوام ورکړي چې یاد صرافان بېرته خوشې نه شي.

د هرات امنیې قومندانۍ هم دغه ستونزې منلي او ټینګار کړی چې د انسان تښتوونکو د نیولو لپاره به جدۍ ګامونه پورته کړي.

سیمه ییز چارواکي: کندهار کې بمي چاودنې ۷ ملکیانو ته مرګ ژوبله اړولې

ارشیف

د کندهار سیمه ییز چارواکي وايي، پرون ماښام د کندهار ښار په پنځمه ناحیه کې یوې بمي چاودنې ۲ ماشومان وژلي دي.

په پېښه کې پنځه نور ملکیان ټپیان شوې هم دي.

د کندهار د امنیې قومندانۍ ویاند جمال ناصر بارکزي د ازادي راډیو خبریال ته وویل، چاودېدونکي توکي په یو موټر سایکل ځای پرځای شوي او په یو بازار کې چاودلی دی.

د بارکزي په وینا د چاودنې هدف معلوم نه دی.

د دې برید مسئولیت چا پر غاړه نه دی اخیستی.

چارواکي: تخار کې د یوې نامسئوله وسله والې ډلې څو تنه غړي نیول شوي

ارشیف

د تخار چارواکي وايي، دې ولایت کې د یوې نامسئولې وسله والې ډلې څو غړي نیول شوي دي.

د تخار د والي ویاند محمد جواد هجري ازادي راډیو ته وویل، د دې کسانو د نیولو لپاره په فرخار ولسوالۍ کې عملیات ترسره شوي دي.

هغه زیاته کړه: "شپږ تنه نامسئول ټوپکوال نیول شوي دي، یو تن هم وژل شوی دی، یو اندازه وسلې او او مهمات هم له دې ډلې سره چې تل د خلکو د ازار او ځورونې سبب کېدل نیول شوي."

تخار په افغانستان کې به نسبي توګه له امنو ولایتونو څخه دی، خو په کې د نامسئولو وسله والو ډلو موجودیت خلک اندېښمن کړي دي.

نور راوښيه

XS
SM
MD
LG