د لاسرسۍ وړ لېنکونه

تازه خبر
شنبه ۳ کب ۱۳۹۸ کابل ۰۵:۰۴

افغانستان

د افغانستان د هوايي چلند ادارې د الوتنو ۲ نوي کرښې پرانېستي

د افغانستان د هوايي چلند اداره د دې هېواد له هوایي حریم څخه د الوتنو د دوو نویو کرښو د پرانېستلو خبر ورکوي.

دغې ادارې په یوه خپاره کړي بیان کې ویلي چې دغه کرښې د افغانستان د خاورې پر سر له لویدیځ نه تر ختیځ پورې غځېږي او د تاجکستان پر سر له چین سره نښلول کېږي چې د الوتنو فاصله ډېره را لنډوي.

په بیان کې ویل شوي چې له دغو کرښو به د فلای دوبۍ، امارات، قطر او یو شمېر نور هوایي شرکتونه کار اخلي.

له دې مخکې دې ادارې ویلي چې پاکستان د الوتنو پر مخ د خپل هوایي قلمرو په بندولو سره د هغو الوتنو چې د افغانستان له هوایي قلمرو به تېرېدې، شمېر کم کړی او له دې پلوه ورته د ۱۵ میلیونه ډالرو زیان رسېدلی دی.

د ورځې تازه خبرونه دلته ولولئ

پومپیو: د امریکا او طالبانو ترمنځ د سولې هوکړه د فبرورۍ په ۲۹ لاسلیکېږي

قطر کې د طالب او امریکايي مرکچي پلاوي ګډ انځور

د امريکا د متحدو ايالتونو د بهرنيو چارو وزير مايک پامپيو وايي د واشنګټن او طالبانو ترمنځ به د سولې هوکړه د فبرورۍ پر ٢٩مه لاسليک شي.

د افغانستان حکومت د دې هوکړې د لاسليک په درشل کې د يوې اوونۍ لپاره د تاوتریخوالي د کمولو پرېکړه کړې.

د ملي امنيت شورا وياند جاويد فيصل وايي، د تاوتریخوالي د کمولو پرېکړه د نن شپې له ١٢ بجو عملي کېږي.

هغه زیاته کړه: "افغان دولت له سولې څخه د اعظمي ګټې اخیستنې په هدف بشپړ چمتوالی نیولی، د یوې اونۍ لپاره چې وسله والو طالبانو د تاوتریخوالی د کموالي په نوم نومولې، موږ له خپل ادرس بشپړ تیاری لرو او په دې هیله چې دغه یوه اونۍ د دې باعث شي، چې د تل پاتې اوربند خاوندان شو او افغانستان کې تل پاتې سوله راشي دا نېټه د شپې له دولسو بجو پیلیږي."

د طالبانو يوې سرچينې د نوم نه ښوولو په شرط ازادۍ راډيو ته ويلي، د تاوتريخوالي د کمېدو په وخت کې به د افغان قواوو د شپې عمليات او هوايي حملې بندېږي، په بدل کې به طالبان هم لويې حملې نه کوي.

د طالبانو يوې سرچينې د نوم نه ښوولو په شرط نن ازادۍ راډيو ته وويل، که ښکېل اړخونه خپلې ژمنې پرځاى کړي، د تشدد کمول به سر له سبا عملي شي.

'کندهار کې ۱۸ وسله وال مخالفین وژل شوي'

ارشیف

د کندهار په ښورابک ولسوالۍ کې د دولت ١٨ مخالف وسله وال وژل شوي دي.

امنيه قومانداني وايي افغان ګډو ځواکونو دغه ګډ پوځي عمليات تېره شپه د ولسوالۍ په سرو څاهانو سيمه کې کړي دي.

د تلفاتو په اړه يې د دې قوماندانۍ وياند جمال ناصر بارکزي نن ازادۍ راډيو ته وويل: ”دښمن ته يې غاښ ماتوونکى ځواب ورکړى دى. په دغو عملياتو کې ١٨ وسلوال وژل شوي او ٧ تنه نور يې مرګوني ټپيان شوي دي.“

د دغو عملياتو په اړه وسلوالو طالبانو کومه تبصره نه ده کړې.

چارواکي: سرپل کې ۶ وسله وال طالبان وژل شوي

ارشیف

په سرپل ولايت کې بيا ٢٠٩ شاهين قول اردو وايي، امنيتي ځواکونو د طالبانو ډله ييزه حمله په شا تمبولې ده.

دې قول اردو په يوه اعلاميه کې ويلي وسله والو طالبانو تېره شپه د ملي امنيت پر يوه پوسته حمله وکړه، چې د امنيتي ځواکونو له مقاومت سره مخامخ شول.

په اعلاميه کې ويل شوي، دغه حمله دوه ساعته روانه وه، چې طالبانو ته په نتيجه کې درنه مرګ ژوبله واوښته.

٢٠٩ شاهين قول اردو وايي، د طالبانو درې مهم قوماندانان، ابوبکر، عيسى او ملا محمود له ٦ نورو وسله والو سره وژل شوي او ١٣ تنه نور يې ټپيان شوي دي.

په دې حمله کې د افغان قواوو د مرګ ژوبلې په اړه څه نه دي ويل شوي.

امنیتي چارواکي: زابل او ارزګان کې ۱۵ وسله وال وژل شوي

ارشیف

د تاوتريخوالي د کمولو د هوکړې په درشل کې له څو ولايتونو د ناامنيو خبرونه رارسېدلي دي.

د ملي اردو مسوولان وايي په زابل او ارزګان ولايتونو کې ١٥ وسله وال طالبان وژل شوي دي.

د افغانستان په جنوب کې ٢٠٥ اتل قول اردو وايي، په پوځي عملياتو کې چې پرون شوي، ٤ نور وسلوال طالبان ټپيان شوي دي.

د دې قول اردو وياند خواجه يحيى علوي نن ازادۍ راډيو ته لومړى په زابل ولايت کې د عملياتو په اړه وويل: ”د زابل ولايت د مرکز کلات په مربوطاتو کې د دښمن ٨ کسان وژل شوي او د دغو جنايتکارانو ٣ تنه ټپيان شوي دي، د دښمن يو موټر او دوه موټرسايکلونه هم تخريب کړاى شوي دي.“

ښاغلى علوي وايي ٢ نور وسله وال طالبان د زابل په شينکۍ ولسوالۍ کې وژل شوي او يو تن ټپي دى.

دغه راز د ارزګان په مرکز ترينکوټ کې هم د پوځي عملياتو پر مهال د ٥ وسله والو طالبانو د وژل کېدو خبر ورکړل شوى دى.

ایران کې نن پارلماني ټاکنې کېږي

د ایران د نګهبان شورا په دې انتخاباتو کې د شاو او خوا ۹ زره کسانو د کاندیدو غوښتنه رد کړې ده.

ایرانیانو نن د دې هیواد د پارلمان د غړیو د ټاکلو لپاره رایې ورکول پیل کړي دي.

په دې انتخاباتو کې د ایران د پارلمان د ۲۹۰ څوکیو لپاره له ۱۶ زره زیاتو کسانو نومونه ثبت کړي وو خو د پیاوړې نګهبان شورا له خوا یوازې ۷۱۴۸ کاندیدان تایید شوې دي.

د ایران د نګهبان شورا په دې انتخاباتو کې د شاو او خوا ۹ زره کسانو د کاندیدو غوښتنه رد کړې ده.

د اوسني پارلمان ۹۰ تنه غړي هم د نګهبان شورا له خوا په ننیو انتخاباتو کې له کاندیدو محروم شوي دي.

د امریکا متحده ایالاتونو د ایران نګهبان شورا تورنه کړې چې په دې انتخاباتو کې یې د هغو کسانو د کاندیدو مخه نیولې چې د ایران د ستر مشر ایت الله علي خامنه يي د پالیسیو پیروي نه کوي.

متحده ایالتونو د ایران ددې انتخاباتو په درشل کې د احمد جنتي سربیره د انتخاباتو پر پنځو چارواکو بندیزونه لګولي دي. جنتي چې د ایران په رژیم کې ځواکمن ملا دی ددې هیواد د نګهبان شورا مشري کوي.

د ایران لپاره د امریکا ځانګړي استازی براین هوک ویلي دا بندیزونه په دې خاطر دي چې دې کسانو د یو شمیر کاندیدانو په مخنیوي د ایران د خلکو لپاره د ازادو او عادلانه انتخاباتو مخه نیولې.

د امریکا د بهرنیو چارو وزیر مایک پمپیو په یو بیان کې ویلي: ”د جنتي په څېر ملایانو په تیرو ۴۱ کلونو کې د ایران خلک د رایو ورکولو پر مهال له خپل ريښتیني انتخاب بې برخې کړي دي.“

د نوموړې په وینا د ایران خلک پرته له دې چې څنډې ته شي او یا په ډله ایزه توګه ووژل شي، د خپل نظر د څرګندولو حق لري.“

غني: د سولې خبرو ته د یوه فرصت په سترګه ګورو

افغان ولسمشر غني

ولسمشر اشرف غني وايي چې افغان حکومت د سولې خبرو ته د یوه فرصت په سترګه ګوري او د احتمالي خطرونو د مخنیوي لپاره یې لازم چمتووالی لري.

تمه ده چې د تاوتریخوالي د کمولو د یوې اونۍ له تېرېدو وروسته د امریکا او طالبانو ترمینځ د سولې موافقه لاسلیک او ورپسې د افغانانو ترمینځ د سولې خبرې پیل شي.

ارګ په یوه بیان کې چې پرون ناوخته خپور شو وايي ښاغلي غني تېر ماښام د سولې د مشورتي لویې جرګې د کمیټو له مسوولینو سره په کتنه کې وویل چې د سولې حیاتي پروسه هم فرصتونه او هم احتمالي خطرونه لري خو حکومت له فرصتونو د اعظمي استفادې او د خطرونو د مدیریت لپاره پوره چمتووالی لري.

د ارګ خبرپاڼه د ولسمشر غني په حواله زیاتوي چې وايي، د سولې مرکچي پلاوی په بین الافغاني خبرواترو کې باید موثریت او واحد دریځ ولري او صلاحیتونه به یې د افغانستان دولت ټاکي.

ولسمشرغني دا څرګندونې په داسې حال کې کوي چې تمه ده په راروانه اونۍ کې وسله وال طالبان د یوې اونۍ لپاره د تاوتریخوالي د کمولو پر ژمنه عمل وکړي.

امریکا نږدې وخت کې د افغانستان د ولسمشرۍ ټاکنو په اړه خپل دریځ روښانوي

د امریکا د بهرنیو چارو وزیر مایک پومپیو

د امریکا د بهرنیو چارو وزیر مایک پومپیو وايي چې متحدایالات به د افغانستان د ولسمشرۍ د انتخاباتو په اړه خپل دریځ په نږدې راتلونکي کې روښانه کړي.

د افغانستان د انتخاباتو د خپلواک کمیسیون له خوا د هېواد د ولسمشر په توګه د اشرف غني له اعلانېدو وروسته اجراییه رییس عبدالله عبدالله ځان قانوني ولسمشر وباله او ویې ویل چې ډېرژر به د بېلابېلو اړخونو په ګډون خپل حکومت جوړ کړي.

د امریکا د بهرنیو چارو وزیر پرون د سعودي عربستان په پلازمېنه ریاض کې د څرګندونو پرمهال وویل، د افغانستان په اړه یوازې دا خبره کولای شي چې متحدایالات د افغانستان د ولسمشرۍ د انتخاباتو نتایج ډېر، ډېر له نږدې څاري او په دې اړه به له لږ ځنډ وروسته یو بیان هم خپور کړي.

ښاغلي پومپیو ونه ویل چې دا بیان به څه وخت خپور شي.

د افغانستان د ولسمشرۍ د انتخاباتو نتایج د سه شنبې په ورځ اعلان شول او تر دې دمه د اروپايي ټولنې د بهرنیو اړیکو او امنیتي پالیسۍ جګپوړي استازي، هند، کوېټ او همداراز د امریکا د سنا یوه مخکښ غړي لیندسي ګراهام ښاغلي غني ته د هغه د بریا له کبله مبارکۍ ورکړې دي.

چارواکي: فاریاب کې ۶ طالبان وژل شوي

ارشیف

په شمال کې دېره ۲۰۹ شاهین قول اردو وايي، د فاریاب ولایت په قیصار ولسوالۍ کې د افغان ځواکونو په عملیاتو کې شپږ تنه وسله وال طالبان وژل شوي او درې نور ټپیان دي.

د شاهین قول اردو ویاند محمدحنیف رضايي پرون آزادۍ راډیو ته وویل چې دا عملیات د قیصار ولسوالۍ په صوفي کلا او نورعلي سیمو کې شوي او په ترڅ کې یې دا کلي له طالبانو څخه تصفیه شوي دي.

هغه زیاتوي: "افغان امنیتي، دفاعي ځواکونو دا سیمې تلاشي کړې او نن شپه به هم په دې دوو کلیو کې پاتې شي او پاتې تروریستان چې په دې کلیو کې دېره وو، له سیمې تښتېدلي دي."

د شاهین قول اردو ویاند همداراز یادونه وکړه چې د شاهین ۱۱۳ په نوم دا عملیات پرون پنجشنبې پیل شول او لاهم دوام لري.

خوست کې د نشه يي موادو پر کاروبار ناغه لګول شوې

ارشیف

د خوست د تڼیو ولسوالۍ اوسېدونکو د نشه يي موادو پر پلور او پېر او کارولو ناغه ولګوله.

قومي مشرانو او ځوانانو پرون پنجشنبې وویل که څوک په دې ولسوالۍ کې له دې پرېکړې سرغړونه وکړي نو یولک افغانۍ ناغه به ورکوي او ولس به هم قومي او کلیوالي اړیکې پرې کوي.

د تڼیو د ځوانانو د شورا په استازیتوب اجمل ایوبزي آزادۍ راډیو ته وویل چې دا پرېکړه د تڼیو څلور واړه قومونو کړې ده.

هغه زیاته کړه: "څلور قامه تڼیو دا پرېکړه وکړه چې که څوک په تڼیو ولسوالۍ کې مخدرمواد خرڅوي قام به یې یولک افغانۍ جریمه ترې اخلي او دا سړی به له هغه وروسته په مړي او ژوندي کې بند وي او څوک به ناسته ولاړه نه ورسره کوي."

له تڼیو مخکې د خوست د اسماعیل خېلو او مندوزیو د ولسوالۍ قومونو هم د روانې اونۍ په سر کې دې ته ورته قومي تړون وکړ او ژمنه یې وکړه چې که څوک مخدرمواد وکاروي او یا یې په پلور او پېر کې برخه واخلي نو له قومه به شړل کېږي.

په لوګر کې اوربند غږ مشاعره

شاعر مطیع الله تراب وايي، ممکن دا ډول غږونه کاڼي زړونه نرم کړي.

د پنجشنبې په ورځ د لوګر په مرکز پل علم کې د التمور د کلیوالي سیمې د ځوانانو په نووښت د اوربند غږ په نوم مشاعره جوړه شوه.

په یاده مشاعره کې چې له لوګر سربیره د خوست، پکتیا، پکتیکا، لغمان او کابل بېلابېلو ولایتونو شاعرانو او د شعر او فرهنګ مینه والو برخه اخیستې وه او تابیا کوونکو يې موخه د سولې او اوربند لپاره د عامو ولسونو د غږ اوچتول یاد کړل.

د لوګر د اطلاعاتو او فرهنګ رئیس عبدالرحمن تسل وايي، پخوا به د سولې او اوربند غږ د غونډو او ناستو د ویناوالو لخوا کېده، خو دا ځل دا غږ د هغو سره په توپیر د شاعرانو لخوا اوچتیږي.

ده وویل، پخوا خلکو د ګواښونو له کبله د سولې او اوربند خبره په احتیاط سره کوله، خو اوس په دې لاره کې ګواښونو پسې نه ګرځي او د سولې خبره په جرئت سره کوي.

د لوګر په اوربند غږ مشاعره کې له خوست میمله شاعر مطیع الله تراب هم د التمور د سیمې ځوانان وستایل، چې سوله يې په یو نوي پیغام کې نغښتې وه او ممکن دا ډول غږونه کاڼي زړونه نرم کړي.

د لوګر په اوربند غږ مشاعره کې ګڼو شاعرانو خپل او د نورو انتخابي شعرونه او غزلونه وویل.

د لوګر د اوربند غږ مشاعرې په پای کې پر یو شمېر میلمنو شاعرانو برابرې شوې ډالۍ هم وویشل شوې.

بلخي: تېرو ۵ کلونو کې شااوخوا ۴ میلیونه په هېواد کې دننه بې‌ځایه شوي

د افغانستان د کډوالو او بېرته راستنېدونکو چارو وزیر سید حسین عالمي بلخي.

د افغانستان د کډوالو او بېرته راستنېدونکو چارو وزارت وايي، په تېرو ۵ کلونو کې شااوخوا ۴ میلیونه کورنۍ د جګړې او اقتصادي ستونزو له امله بې‌ځایه شوي.

د دې وزارت وزیر سید حسین عالمي بلخي په کابل کې یوې غونډه ته وویل، د ۴ میلیونه کورني بې‌ځایه شویو څخه د شااوخوا ۲ میلیونو ستونزو ته په تېرو دوو کلنو کې رسېدنه شوې.

د ښاغلي بلخي په خبره، د افغانانو کورني بې‌ځایه کېدل او کډوالي اوس یوازې په افغانستان کې نه، بلکې د نړیوالو ډونرانو لپاره هم د پاملرنې وړ موضوع ده.

دغه وزارت د کورني بې‌ځایه شویو وګړو د ستونزو د حل لپاره په یو تګلاره کار پیل کړی.

د برابرې شوې تګلارې له مخې به د افغانستان په ټولو ولایتونو کې د بې‌ځایه شویو وګړو د بې‌ځایه کېدو څرنګوالی او د ستونزو څېړل تر بحث لاندې وي.

په ورته وخت کې اروپايي ټولنې هم تېره ورځ د افغان کډوالو سره د ۲۳ میلیونه ډالرو مرستې اعلان کړی.

د هند حکومت له‌خوا ولسمشر غني ته د بریا مبارکي

د افغانستان ولسمشر محمد اشرف غني

د هند حکومت محمد اشرف غني ته د دوهم ځل لپاره د افغانستان د ولسمشر په انتخابېدو مبارکي ویلې ده.

د هند د بهرنیو چارو وزارت په یوه اعلامیه کې ویلي چې د افغانستان د انتخاباتو د خپلواک کمېسیون له لوري د ولسمشرۍ د انتخاباتو د پایلو له اعلانه وروسته د اشرف غني پر بیا منتخب کېدو مبارکي وايي.

د هند د بهرنیو چارو وزارت په خبرپاڼه کې همداراز ویل شوي چې هند د افغانستان د خلکو د ډیموکراتیکو هیلو ملاتړ کوي او د دې هیواد له حکومت سره همکارۍ ته پر خپلې ژمنتیا ولاړ دی.

تر دې وړاندې پرون اروپايي اتحادیې ولسمشر محمد اشرف غني ته د جمهوري ریاست په ټاکنو کې د بري مبارکي ورکړه او ویې‌ویل چې د داسې حکومت د جوړولو لپاره چې د ټولو افغانانو استازیتوب وکړي، د غني د تعهد هرکلی کوي.

د انتخاباتو خپلواک کمېسیون پرون ولسمشر غني ته د انتخاباتو باورلیک وسپاره.

له نږدې پنځه میاشتې لانجې او بحث وروسته، د انتخاباتو خپلواک کمېسیون د روانې اوونۍ د سې شنبې په ورځ د انتخاباتو نهايي پایلې اعلان کړې.

د میزان د شپږمې نېټې په انتخاباتو کې د اشرف غني اصلي سیال عبدالله عبدالله د انتخاباتو پایلې رد کړې او ځان‌یې بریالی اعلان کړی دی.

وسله‌والو طالبانو هم ویلي چې ټاکنې جعلي وې او د سولې د بهیر له محتوا سره اړخ نه‌‌لګوي.

په همدې حال کې اجرائیه رئیس عبدالله عبدالله د اروپايي اتحادیې د بهرنۍ پالېسۍ رئيس ته په یوه لیک کې ویلي چې د دې اتحادیې له لوري محمد اشرف غني ته د ولسمشرۍ انتخاباتو کې د بریالیتوب مبارکي د ده د توقع خلاف وه.

په همدې حال کې له فاریاب څخه د رارسېدلو راپورونو له مخې، د جنرال دوستم او عبدالله عبدالله پلویانو نن د دې ولایت په مرکز میمنې کې لاریون وکړ.

لاریونوالو په خپلو شعارونو کې ویل چې عبدالله عبدالله د ولسمشرۍ انتخابات ګتلي دي.

د غني او خلیل‌زاد لیدنه؛ د تاوتریخوالي تر کمېدو وروسته څه کېږي؟

افغان ولسمشر محمد اشرف غني، د افغان سولې لپاره د امریکا ځانګړی استازی زلمی خلیل‌زاد او د امریکا سفارت شارژدافیر راس وېلسون.

افغان ولسمشر اشرف غني د افغانستان د سولې لپاره د امریکا له ځانګړي استازي زلمي خلیل‌زاد سره پرون په ارګ کې وکتل.

د ارګ له‌خوا په خپره شوې خبرپاڼه کې ویل شوي چې په دې کتنه کې د امریکا او طالبانو ترمنځ په افغانستان کې د تاوتریخوالي د کمېدو پر موافقې خبرې وشوې.

د خبرپاڼې له مخې ولسمشر غني او ښاغلي خلیل‌زاد د سولې د پروسې د مدیریت او په افغانستان کې د جګړې د پای ته رسېدو پر لارو چارو خبرې وکړې.

ارګ دغه‌راز وایي چې ښاغلي خلیل‌زاد په دې اړه چې د تاوتریخوالي تر کمېدو وروسته کوم ګامونه اخیستل کېږي، ولسمشر ته معلومات ورکړل.

ویل کېږي چې د امریکا او طالبانو ترمنځ یوه موافقه به د روانې فبرورۍ میاشتې په وروستیو کې لاسلیک شي او د هغې تر لاسلیک کېدو مخکې په یوه اوونۍ کې به تاوتریخوالی کمېږي.

لغمان کې تړلو کلینیکونو لسګونه زره کسانو ته روغتیايي خدمتونه درولي

د افغانستان په نقشه کې د لغمان ولایت

په افغانستان کې د ملګرو ملتونو د بشري مرستو د همغږۍ ادارې "اوچا" ویلي چې په تېره یوه اوونۍ کې په لغمان کې ۶ روغتیايي کلينیکونه بند و او لسګونه زره خلک له روغتیايي امکاناتو بې‌برخې شوي وو.

د دې ادارې په اوونیز راپور کې چې پرون د فبرورۍ په ۲۰مه، خپور شوی لیکل شوي چې په لغمان کې د کلینیکونو د بېرته فعالولو لپاره خبرې روانې دي.

د ملګرو ملتونو د دې ادارې په وینا، د جنورۍ میاشتې له لومړۍ نېټې تر ۲۷مې پورې په افغانستان کې ۲۷۵ روغتیايي مرکزونه د جګړې له امله تړل شوي، له‌منځه تللي یا تخریب شوي دي.

د جنورۍ میاشتې له پیل تر پایه تقریباً ۲۰۸ روغیتايي مرکزونه په افغانستان کې تړل شوي دي.

د ملګرو ملتونو سازمان نه‌دي ویلي چې په لغمان کې ۶ روغتیايي مرکزونه کومې ډلې او ولې تړلي دي.

ننګرهار کې سږکال ۵۰۰ ټنه شات تولید شوي

ارشیف

د ننګرهار د کرنې او مالدارۍ ریاست وایي، سږ کال په دغه ولایت کې د شاتو د تولید کچه د تېر کال په پرتله ۳۰ سلنه لوړه شوې ده.

د ننګرهار د کرنې او مالدارۍ ریاست د مسؤلینو په خبره، سږکال په ننګرهار کې ۵۰۰ ټنه شات تولید شوي چې لاملونه‌یې د شاتو د مچیو د روزنې د کاروبار ډېروالی، ښه هوا او چاپېریال دي.

د ننګرهار د کرنې او مالدارۍ ریاست د شاتو مچیو د برخې مسؤل شاه ولي ازادي راډيو ته په خپلو خبرو کې وویل چې ننګرهار د شاتو د تولید او د مچیو د روزنې لپاره مناسبه هوا او ښه چاپېریال لري چې له امله‌یې پر نورو ولایتونو سربېره ان له پېښوره هم ورته د شاتو مچۍ انتقالېږي.

د ننګرهار د کرنې او مالدارۍ ریاست چارواکي د شاتو د مچیو د روزنې کیفیت او د ظرفیتونو لوړوالی نور هغه لامولونه یادوي چې له مخې یې په سږني کال کې د تولیداتو کچه لوړه شوې ده.

تېر کال په ننګرهار کې نږدې ۳۰۰ ټنه شاته تولید شوي وو.

په ننګرهار کې د شاتو د مچیو روزونکي وایي چې د ننګرهار هوا په ځانګړې توګه د ژمي په موسم کې د شاتو د تولید لپاره مناسبه ده چې له همدې امله‌یې کاروباریان له نورو ځایونو ننګرهار ته راځي.

د ننګرهار د کرنې ریاست د مسؤلینو په خبره، په دغه ولایت کې د شاتو د مچیو ۶۰۰ لوی او واړه فارمونه د شاتو په تولید بوخت دي.

د شاتو د مچیو د کاروباریانو او روزونکو په خبره، د هېواد په کچه بهترین شات د شینشوبي بوټي د ګلونو د شیرې وي چې په ننګرهار کې ډېر پیدا کېږي.

نور راوښيه

XS
SM
MD
LG