د لاسرسۍ وړ لېنکونه

تازه خبر
پنجشنبه ۳ غبرګولی ۱۴۰۳ کابل ۰۷:۴۷

افغانستان

قطر په دوحه کې د افغانستان د سولې خبرې بریالې وبللې

قطر په دوحه کې د افغانستان د سولې خبرې بریالې وبللې.

په هغه اعلامیه کې چې په کړکیچونو کې د منځګړیتوب په چارو کې د قطر د بهرنیو چارو وزارت د ځانګړي استازي مطلق بن ماجد القحطاني له‌خوا نن خپره شوې، ویل شوي چې دوی ډېر زیات خوښ دي چې د سولې لپاره په لومړي ګام کې یې یوه ګډه اعلامیه خپره کړه.

په‌دغو دوه ورځنیو خبرو کې چې د قطر او جرمني په ګډ کوربه‌توب تنظیم شوې، افغان سیاستوالو، مدني ټولنې، ښځو او د طالبانو استازیو ګډون کړی وو.

ګډ پریکړه‌لیک چې تېره شپه ناوخته خپره شوه:

  • په عام المنفعه تأسیساتو د بریدونو بندېدل.
  • د خلکو د سر او مال د ساتنې تضمین.
  • د سولې د خبرو دوام.
  • او د معیوبو او ناروغو بندیانو خوشې کېدل مهم موارد دي.

د افغانستان د سولې لپاره د امریکا ځانګړي استازي زلمي خلیل‌زاد چې له طالبانو سره په دوحه کې اووم پړاو خبرې مخته وړي، هم دغه خبرې د سولې لپاره ګټورې بللې دي.

ښاغلي خلیل‌زاد تېره شپه په یوه ټویټري پیغام کې وویل چې: "دغه خبرې اترې د افغانانو د څلوېښت کلنې جګړې او ناوړه کړاونو د پای ته رسولو لپاره د لا پرمختګ هیله وربخښي. موږ به نن سهار له طالبانو سره د خپلو خبرو په بیا پیلولو سره په خپلو هڅو ټینګار وکړو."

د طالبانو له استازیو سره د ښاغلي خلیل‌زاد روانې خبرې د بین الافغاني خبرو په خاطر پرون او وړمه ورځ ځنډول شوې وې.

د ورځې تازه خبرونه دلته ولولئ

په دوو میاشتو کې له ۲۱۶زرو زیاتو افغانانو ته روغتیایي خدمات وړاندې شوي

ارشیف: د سور صلیب د فعالیتونو یو انځور
ارشیف: د سور صلیب د فعالیتونو یو انځور

د سره صلیب نړیواله کمېټه یا "آی‌سي‌آرسي" وایي، د روان کال د جنوري تر مارچ میاشتې پورې یې په افغانستان کې له ۲۱۶زره زیاتو کسانو ته روغتیایي خدمات وړاندې کړي دي.

د دې کمېټې د افغانستان څانګې پرون چهارشنبې په خپله ایکس‌پاڼه یا پخواني ټویټر کې لیکلي چې په دې موده کې له ۷۳زره زیات کسان د دې کمېټې په ملاتړ روغتیایي کلینیکونو کې واکسین شوي او له ۱۶۰۰ څخه د زیاتو ماشومانو درملنه شوې چې پرسختې خوارځواکۍ اخته و.

د سره صلیب نړیواله کمېټې همدارنګه ویلي چې له نورو شریکانوسره به د افغانستان د خلکو لاسنیوي ته دوام ورکړي.

چارواکي: په بدخشان کې د تېر کال په پرتله ترافیکي پېښې کمې شوي

ارشیف
ارشیف

د بدخشان سیمه‌ییز چارواکي د تېر کال پرتله په دې ولایت کې د ترافیکي پېښو د کموالي خبر ورکوي.

په بدخشان کې کې د طالبانو امنیې قومندانۍ پرون چهارشنبې په یوه خبرپاڼه کې ویلي چې د ثور د میاشتې له لومړۍ نېټې راهیسې دولس ترافیکي پېښې شوي چې په نتیجه کې یې د ښځو او ماشومانو په ګډون یولس کسان مړه شوي او ۱۴ نور ټپیان شوي دي.

د امنیې قومندانۍ په خبره، په حمل میاشت کې شل ترافیکې پېښې شوي چې له امله یې ۲۲ تنه مړه او ۲۸ تنه ټپیان شوي وو.

په دې اړه چې په دې ولایت کې د ترافیکي پېښو د کموالي لاملونه څه و، څه نه‌دي ویل شوي.

خراب سړکونه او د موټر چلوونکوبې احتیاطي معمولاً په افغانستان کې د ترافیکي پېښو مهم لاملونه بلل کېږي.

برادر او متقي د رییسي د جنازې په مراسمو کې د ګډون لپاره تهران ته رسېدلي

د ایران ستر مذهبي مشرایت‌الله علي خامنه‌یي نن د تهران په پوهنتون کې د رییسي او نورو ایراني چارواکو د جنازې لمونځ ورکړ.
د ایران ستر مذهبي مشرایت‌الله علي خامنه‌یي نن د تهران په پوهنتون کې د رییسي او نورو ایراني چارواکو د جنازې لمونځ ورکړ.

د طالبانو د رییس الوزرا اقتصادي مرستیال ملا عبدالغني برادر او د طالبانو د بهرنیو چارو وزیر امیر خان متقي د ایران د ولسمشر ابراهیم رییسي د جنازې په مراسمو کې د ګډون په موخه تهران ته رسېدلي دي.

د طالبانو د رییس الوزرا اقتصادي مرستیالۍ دغه خبر نن چهارشنبه پر خپله ایکس‌پاڼه یا پخواني ټویټر خپور کړی دی.

د پاکستان صدر اعظم شهباز شریف هم دغو مراسمو کې ګډون کړی دی.

د ایران د ولسمشر ابراهیم رییسي، د بهرنیو چارو وزیر حسین امیر عبداللهیان او یو شمېر نورو چارواکو د جنازې د دویمې ورځې مراسم په ژوندۍ بڼه د ایران له دولتي تلوېزیونه خپاره شول.

په دغو تصویرونو کې د حماس ډلې چې امریکا او اروپايي ټولنه یې د ترهګرو په توګه پېژني، مشر اسماعیل هنیه هم لیدل شوی دی.

د لبنان د حزب‌الله ډلې مرستیال شیخ نعیم قاسم هم د جنازې مراسمو کې ګډون کړی دی.

د ازادي راډیو د خبر مرکزي څانګې لیکلي چې مراسمو کې "مرګ پر اسراییلو" شعارونه ورکړل شوي دي.

د ایران ستر مذهبي مشرایت‌الله علي خامنه‌یي نن د تهران په پوهنتون کې د رییسي او نورو ایراني چارواکو د جنازې لمونځ ورکړ.

د ایران ولسمشر ابراهیم رییسي، د بهرنیو چارو وزیر حسین امیر عبداللهیان او شپږ نور چارواکي د تېرې یکشنبې په ورځ د هغوی د هیليکوپټرې د سقوط په پېښه کې مړه شول.

د افغانستان او تاجکستان ترمنځ د "شنبې مارکېټ" په نوم ګډ بازار بېرته پرانیستل شوی

دغه بازار د تاجکستان د ګورنو بدخشان سیمې په کلی خومب ښار کې پروت دی چې له مرکز دوشنبې سره شاوخوا شپږ ساعته د موټر د مزله واټن لري.
دغه بازار د تاجکستان د ګورنو بدخشان سیمې په کلی خومب ښار کې پروت دی چې له مرکز دوشنبې سره شاوخوا شپږ ساعته د موټر د مزله واټن لري.

د افغانستان او تاجکستان ترمنځ د شنبې مارکېټ په نوم ګډ بازار بېرته پرانیستل شوی دی.

د تاجکستان په خاوره کې پروت دغه بازار له کرونا وبا او بیا د طالبانو د حکومت له بیا واکمنۍ وروسته تړلی پاتې و.

فرانس پرېس خبري اژانس نن چهارشنبه لیکلي، که څه هم پر افغانستان واکمن طالبان د تاجکستان له خوا د" ترهګرو" په لېست کې شامل دي، خو په خبره یې دغه بازار افغانانو ته فرصت ورکړی چې پر پوله واوړي او له تاجکستانه د اړتیا وړ توکي وپېري.

دغه بازار د تاجکستان د ګورنو بدخشان سیمې په کلی خومب ښار کې پروت دی چې له مرکز دوشنبې سره شاوخوا شپږ ساعته د موټر د مزله واټن لري.

یوه افغان شپېته کلن حاجي قاسم اژانس ته ویلي چې دوی د تاجکستان له ګډ بازاره کالي، خواږه، چای او ان ساختماني مواد اخلي.

افغانستان او تاجکستان ۱۳۵۰ کیلو متره ګډه پوله لري او پخوا تر دې تاجکستاني چارواکو څو ځله د افغانستان له خاورې دوی ته د احتمالي ور پېښو ګواښونو په تړاو اندیښنه ښودلې ده.

د طالبانو مشر د ۱۴۰۳ مالي کال ملي بودیجه توشېح کړه

د طالبانو مشر ملاهبت الله اخندزاده
د طالبانو مشر ملاهبت الله اخندزاده

د طالبانو د حکومت ویاند ذبیح‌الله مجاهد وايي چې د دوی مشر ملاهبت الله اخندزاده د ۱۴۰۳ مالي کال ملي بودیجه توشیح کړه.

مجاهد د سه شنبې ناوخته په خپله ایکس پاڼه خبر ورکړی چې د روان مالي کال په بودیجه کې د خلکو اړتیاوې او لومړیتوبونه په پام کې نیول شوي دي.

د ۱۴۰۳ مالي کال ملي بودیجه داسې وخت توشېح شوه چې په تېرو درېیو کلونو کې په افغانستان کې اقتصادي کړکېچ ډېر شوی دی.

د پوهانو په وینا، د طالبانو د حکومت په عوایدو او لګښتونو کې روڼتیا نه شته.

نیمروز، پکتیکا او بامیان کې ۱۱ کسان د غلاوو او شراب څښلو په تور په درو وهل شوي

د افغانستان په عمومي نقشه کې د پکتیکا ولایت موقعیت
د افغانستان په عمومي نقشه کې د پکتیکا ولایت موقعیت

طالبانو پرون په نیمروز، پکتیکا او بامیانو کې ۱۱ کسان د غلاوو او شراب څښلو په تور په درو ووهل.

د طالبانو سترې محکمې لیکلي چې په نیمروز ولایت کې اته کسان د غلا په تور په تعزیري سزا محکوم او په عام محضر کې له ۱۵ تر ۳۰ درو ووهل شول.

د محکمې له‌خوا په بل بیان کې راغلي چې په پکتیکا کې هم دوه کسان د غلا په تور په تعزیري سزا محکوم وو او دېرش-دېرش دُرې ووهل شول.

د طالبانو سترې محکمې ویلي چې په بامیانو کې یو کس د شرابو د څښلو او د یوې بوشکې شرابو د لرلو په خاطر په دوه کاله بند محکوم شو او هم په عام محضر کې ۳۹ دُرې ووهل شو.

طالبانو تر دې وړاندې هم لسګونه کسان په عام محضر کې په دُرو وهلي او سزاوې یې ورکړي دي.

دوی همداراز ګڼ کسان اعدام کړي هم دي.

د طالبانو له‌خوا تورنو ته د سزاوو په ورکړه باندې ګڼو بشري حقونو فعالانو نیوکې کړي او ویلي یې دي چې د طالبانو په محاکمو کې تورن کسان عدالت ته لاسرسی نه لري.

یونېسف په بغلان او غور کې لسګونه ښځو سره نغدي مرستې کړي

د بغلان یو شمېر سېلاب ځپلي
د بغلان یو شمېر سېلاب ځپلي

د ملګرو ملتونو د ماشومانو وجهي صندوق یا یونېسف وايي په بغلان او غور کې یې له لسګونه ښځو سره نغدي مرستې کړي دي.

دې ادارې پرون په خپله ایکس‌پاڼه لیکلي چې د بېړنیو نغدي مرستو د پروګرام په مټ په دې وتوانېدل چې زیانمنو کورنیو ته عاجلې مرستې ورسوي څو اړین مواد پرې واخیستلی شي.

یونېسف افغانستان بېړنۍ نغدي مرستې مهمې بللي دي.

غور، بغلان او فاریاب هغه ولایتونه دي چې وروستیو سېلابونو په‌کې سلګونه کسانو ته مرګ‌ژوبله واړوله او لسګونه زره کورنۍ یې له سختو ستونزو سره مخ کړل.

د افغانستان کرکټ ملي لوبډلې په ویسټ اینډیز کې تمریني کمپ پیل کړی

د افغان کرکټ ملي لوبډلې لوبغاړي
د افغان کرکټ ملي لوبډلې لوبغاړي

د افغانستان د کرکټ ملي لوبډلې په ویسټ اینډیز کې خپل لس ورځنی تمریني کمپ پیل کړی دی.

کرکټ بورډ وايي، دا تمرینونه نړیوال جام ته د وروستي چمتووالي په هدف ترسره کېږي چې په ترڅ کې به یې دوه تمریني لوبې هم وکړي.

افغان لوبډله د نړیوال شل اووریز جام په ګروپي دور کې له کوربه ویسټ اینډیز، نیوزیلنډ، یوګندا او پاپوا نیو ګینې سره مخ دی.

تمه ده د نړیوال جام لومړۍ لوبه د جون په څلورمه له یوګندا سره وکړي.

طالبان: د برادر په مشرۍ لوړپوړی پلاوی د ایران د ولسمشر په جنازه کې ګډون کوي

د طالبانو د رییس الوزرا اقتصادي مرستیال ملا عبدالغني برادر
د طالبانو د رییس الوزرا اقتصادي مرستیال ملا عبدالغني برادر

د طالبانو حکومت ویلي، د ملا برادر په مشرۍ لوړپوړی پلاوی نن چهارشنبه د ایران د ولسمشر په جنازه کې ګډون کوي.

د طالبانو د حکومت ویاند ذبیح‌الله مجاهد په ایکس پاڼه کې لیکلي چې د رییس الوزرا له اقتصادي مرستیال عبدالغني برادر سربېره د بهرنیو چارو سرپرست وزیر امیرخان متقي هم تهران ته تللی دی.

د ایران د ولسمشر ابراهیم رییسي جنازه په څو ښارونو تبریز، قم، تهران او بلاخره مشهد کې ترسره کېږي.

ريیسي د یکشنبې په ورځ په ختیځ اذربایجان ولایت کې د هیليکوپټرې د لوېدو په پېښه کې له اوه نورو کسانو سره چې د بهرنیو چارو وزیر حسین امیر عبداللهیان هم په‌کې شامل وو ووژل شو.

ملا برادر د یوه پلاوي په مشرۍ د ایران د ولسمشر په جنازه کې برخه اخلي

د طالبانو د رییس الوزرا اقتصادي مرستیال ملا عبدالغني برادر
د طالبانو د رییس الوزرا اقتصادي مرستیال ملا عبدالغني برادر

ایراني رسنۍ د ایران د ولسمشر، د بهرنیو چارو د وزیر او نورو چارواکو د جنازې په مراسمو کې د ګډون لپاره هغه هېواد ته د طالبانو د حکومت د یوه جګپوړي پلاوي د ورتګ خبر ورکوي.

د ایران د محصلینو خبري آژانس ایسنا د راپورله مخې، د دغه پلاوي په ترکیب کې چې د ولسمشر ابراهیم رییسي او د ملګرو د جنازې په مراسمو کې د ګډون لپاره تهران ته ورځي، د طالبانو د رییس الوزرا اقتصادي مرستیال ملا عبدالغني برادر او د بهرنیو چارو سرپرست وزیر امیرخان متقي شامل دي.

د طالبانو د حکومت ویاند ذبیح الله مجاهد هم دغه خبر تایید کړی.

د طالبانو حکومت تېره ورځ په یوه اعلامیه کې د ایران د ولسمشر ابراهیم رییسي او د مل پلاوي د مړینې په اړه یې د ایران حکومت او ولس ته د خواخوږۍ مراتب وړاندې کړي وو.

ابراهیم ریسي او مل پلاوی یې د یکشنبې په ورځ په ختیځ آذربایجان کې د یوه بند د پرانیستلو په مراسمو کې له ګډون او د آذربایجان له ولسمشرالهام علییف سره له کتنې وروسته بیرته تبریز ته په لاره و چې هلیکوپټر یې د راپورونو له مخې، د هوا د خرابوالي له امله د دیزمار ځنګله په غرنۍ سیمه کې را ولوېده.

نور راوښيه

XS
SM
MD
LG