د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۱۱:۱۶

نړۍ

محمد بن سلمان: د سعودي ګټو ته د ګواښ په صورت کې به بې ځوابه نه شو

د سعودي عربستان ولیعهد شهزاده محمد بن سلمان

د سعودي عربستان ولیعهد ایران په مستقیم ډول په عمان خلیج کې د تېلو پر ټانکرونو پر حملې تورن کړ او ویې ویل چې هېواد به یې د خپلو خلکو د ګټو پر ضد د هېڅ ګواښ په وړاندې بې ځوابه پاتې نه شي.

شهزاده محمد بن سلمان په یوه مرکه کې چې نن یکشنبه په پان عرب شرق الاوسط ورځپاڼه کې خپره شوې، ویلي چې د ایران رژیم د جاپان د صدراعظم د سفر پروا ونه کړه او په داسې حال کې چې شنزو ابې په تهران کې و، د هغه هڅو ته یې پر دوو ټانکرونو چې یو یې جاپانی و، په حملې ځواب ورکړ.

د سعودي ولیعهد په عین حال کې وویل چې په سیمه کې جګړه نه غواړي، خو که یې د خلکو ګټې له خطر سره مخامخ شي، نو له متقابل اقدامه به ډډه ونه کړي.

د ورځې تازه خبرونه دلته ولولئ

د پاکستان محکمې د درملنې له پاره د پخواني ولسمشر زرداري خوشي کولو امر کړی

ښاغلی زرداري د مالي فساد په تور بندي دی

د پاکستان یوې محکمې نن پرېکړه وکړه چې پخوانی ولسمشر اصف علي زرداري په ضمانت له زندانه خوشي کړي، ترڅو خپله درملنه د هېواد دننه په هر روغتون کې چې غواړي، وکړي.

زرداري د پاکستان د پخوانۍ وژل شوې صدراعظمې بېنظر بوټو میړه دی چې د جون په میاشت کې د پاکستان د فساد ضد کمیټې له لورې د میلیونونو ډالرو سپینولو په تور بندي شو.

تمه ده چې دی نن ناوخته له زندانه خوشي شي.

ټرمپ مسکو ته د امریکا په انتخاباتو کې د نه لاسوهنې خبرداری ورکړی

د امریکا متحده ایالتونو ولسمشر ډونالد ټرمپ او د روسیې د بهرنیو چارو وزیر سرګي لاوروف

د امریکا متحده ایالتونو د ولسمشر ډونالد ټرمپ او د روسیې د بهرنیو چارو وزیر سرګي لاوروف تر پرونۍ کتنې وروسته سپینې ماڼۍ څرګنده کړه چې ښاغلي ټرمپ ښاغلي لاوروف ته خبرداری ورکړ چې په هېڅ ډول د امریکا په انتخاباتو کې مداخله ونه کړي.

ښاغلي ټرمپ په ورته وخت کې مسکو وهڅاوه چې د اوکراین شخړې حل کړي.

ولسمشر ټرمپ ټینګار وکړ چې دی په نړیواله کچه د وسلو د اغېزناک کنټرول ملاتړ کوي چې په هغه کې یوازې روسیه شامله نه وي، چین هم پکې وي.

د امریکا ولسمشر همداراز له روسیې وغوښتل چې ایران د اټمي وسلو له جوړولو وګرځوي او شمالي کوریا له اټمي وسلو خالي کړي.

سرګي لاوروف یوه ورځ وروسته تر هغه واشنګتن ته ولاړ چې په پاریس کې د روسیې، فرانسې، جرمني او د اوکراین استازیو غونډه وکړه. دا غونډه د اوکراین په ختیځ کې د شخړو د هواري لپاره وه.

سږکال په چین کې ترټولو ډېر خبریالان زنداني شوي

ارشیف

د خبریالانو د ساتنې نړیوالې کمېټې ویلي چې روان کال کې چین تر بل هر هېواد ډېر خبریالان زنداني کړي دي.

د دې کمیټې په کلني راپور کې راغلې چې په چین کې سږکال لږ تر لږه ۴۸ خبریالان بندیان شوي دي.

د خبریالانو د ساتنې نړیواله کمېټه څرګندوي چې په ټوله نړۍ کې په ۲۰۱۹ کال کې لږ ترلږه ۲۵۰ خبریالان بندیان شوي او تېرکال دا شمیر ۲۵۵ ته رسېده.

له چین څخه وروسته ترکیه دوهم هېواد دی چې سږ کال یې ۴۷ خبریالان بندیان کړي خو تېرکال په ترکیه کې ۶۸ ژورنالیستان بندیان شوي وو. تر ترکیې وروسته په سعودي عربستان کې ۲۶ او همدومره خبریالان په مصر کې سږ کال زنداني شوي دي.

د خبریالانو د ساتنې د نړیوالې ټولنې په کلني راپور کې ویل شوې چې په ایران کې چې سږکال پراخې مظاهرې وشوې ۱۱ خبریالان زنداني شوي او د دې کلني راپور له مخې روسیه اووم ځای لري چې څلور خبریالان یې زندان ته استولې دي.

په دې کلني راپور کې هغه خبریالان نه دي شمېرل شوي چې نیول شوي او ژر خوشي شوي دي یا په خپلو سیمو کې وسله والو ډلو نیولې دي.

 ټرمپ او پوتین د اردوغان د علاقې وړ کسان

د ترکیې ولسمشر

د ترکیې ولسمشر رجب طیب اردوغان ویلي چې د امریکا ولسمشر ډونالډ ټرمپ او د روسیې ولسمشر ولاد یمیر پوتین یې د پام او علاقې وړ کسان دي.

هغه دا خبرې د انقرې په یوه پوهنتون کې د وینا پر مهال کړي.

اردوغان دا هم ویلي چې اروپا د رهبرۍ له جدي بحران سره مخ ده.

اردوغان ویلي چې که د چا خوښیږي یا نه خو ټرمپ یو مهمه نوم دی او هیڅ کومه پټه اجنډا نه لري.

د ترکیې ولسمشر رجب طیب اردوغان خپل روسی سیال ولادمیر پوتین هم ستایلی چې د ده په نظر د ترکیې پر وړاندې یې دریځ روښانه دی او کوم څه نه ترې پټوي.

اردوغان همداراز د اسلام له ستر پیغمر حضرت محمد او د ترکیې د بنسټګر مصطفی کمال اتاترک نومونه هم د الهام بښونکو شخصتیونو په توګه یاد کړي دي.

د ايران پارلمان ١٦٠ وکيلانو د معترضینو د ځپلو په تړاو د څېړنو غوښتنه وکړه

د ایران پارلمان

د ايران د پارلمان ١٦٠ وکيلانو په دغه هېواد کې په مرګوني ډول د اعتراض کوونکو د ځپلو په اړه د څېړنو غوښتنه وکړه.

تېره مياشت دغه اعتراضونه د ايران سلو ښارونو او ښارګوټو ته خپاره شوي وو.

په ايران کې دغه اعتراضونه وروسته له هغې پيل شول، چې حکومت د تېلو بيې لوړې کړې او د هغوى پر کارونې يې سهميه ولګوله.

وکيلانو دغه غوښتنه ولسمشر حسن روحاني ته په يوه ليکلي پرانيستي ليک کې کړې ده.

دغه ليک د اپوزيسيون په ويبپاڼه "کلمه" کې تېره دوشنبه خپور شوى دى.

په ليکه کې ويل شوي، چې د اعتراض کوونکو ځپونکي دې له دندو ليرې او مجازات شي.

ايراني چارواکو تر اوسه د اعتراضونو پر مهال د وژل شويو رسمي ارقام نه دي خپاره کړي.

خو په لندن کې دېره، د بخښنې نړيوال سازمان ويلي، چې په ايران کې د هغه څه له کبله چې دغه سازمان ”د انسان ژوند ته شرموونکې بې اعتنايي“ بللې، لږ تر لږه ٢٠٨ کسان وژل شوي دي.

امريکا پر چچنيا چارواکي، پاکستاني پوليس او ١٨ نورو کسانو بنديزونه ولګول

د امريکا د خزانې وزير سټيفن منوچين

د امريکا متحدو ايالتونو د چچنيا پر يوه چارواکي، يوه پاکستاني پوليس او ١٨ نورو کسانو بنديزونه ولګول.

دغه کسان په دې تورن دي، چې له بشري حقونو په ښکاره سرغړونو کې ښکېل دي.

د امريکا د خزانې وزير سټيفن منوچين پرون په يوه اعلاميه کې وويل: ”امريکا به د ملکيانو په وړاندې شکنجه، اختطاف، جنسي تاوتريخوالى، وژنه يا هم ظلم ونه زغمي.“

منوچين دا خبرې د بشري حقونو د نړيوالې ورځې په مناسبت کړي دي.

د خزانې وزارت وايي، د روسيې د شمالي قفقاز د چچنيا جمهوريت په پلازمېنه ګروزني کې د کورنيو چارو وزارت يو رئيس اسلان ايراسخانوف او د کورنۍ غړي يې د امريکا خاورې له ننوتلو منع اعلان شوي دي.

په اعلاميه کې ويل شوي، چې ايراسخانوف د خپلې دندې پر مهال د ٢٧ کسانو د اعدام په قضيه کې دخيل و.

د خزانې وزارت په پاکستان کې پر يوه پوليس راو انور خان هم بنديز لګولى دى.

پر ده تور پورې شوى، چې د راپورونو پر اساس، د داسې جعلي وسلوالو نښتو ډرامه يې جوړه کړې، چې په نتيجه کې يې ګڼ کسان د پوليسو له خوا وژل شوي دي.

اتلس نور کسان په ميانمار، ليبيا، سلواکيا، کانګو، جنوبي سوډان او سعودي عربستان کې چارواکي يا هم سوداګر دي.

د متحدو ایالتونو ولسمشرۍ ټاکنو کې روسیې ته د امریکا خبرداری

د امریکا او روسیې د بهرنیو چارو وزیران

د امريکا د متحدو ايالتونو د بهرنيو چارو وزير خپل روسي سيال ته خبردارى ورکړ، چې د امريکا د ولسمشرۍ په راروانو ټاکنو کې به د مسکو احتمالي مداخله ناوړه پايلې ولري.

مايک پامپيو پرون په واشنګټن کې يوه کنفرانس ته چې د هغه روسى سيال سرګي لاوروف هم په کې حاضر و، وويل: "د ډونالډ ټرمپ اداره تل هڅه کوي چې زمونږ د ټاکنو د جريان بشپړتيا خوندي وي، که روسيه يا بل بهرنى لوبغاړى زمونږ د ډيموکراتيکو پروسو د کمزوري کولو اقدامات وکړي، موږ به ځوابي اقدام کوو."

تر دې مخکې د امريکا د ولسمشر ډونالډ ټرمپ منتقدانو ويلي چې روسيې د امريکا د جمهوري رياست د ٢٠١٦ میلادي کال په ټاکنو کې د ټرمپ په پلوي مداخله کړې ده خو مسکو دا تورونه رد کړي دي.

پرون په واشنګټن کې د امريکا او روسيې د بهرنيو چارو وزيرانو دغه راز پر نورو مسايلو، له دې جملې د واشنګټن او مسکو د اړيکو پر ښه کېدو هم بحث وکړ.

د دوى په خبرو کې د ايران، اوکراين، منځني ختيځ او يمن موضوعات هم شامل وو.

چک جمهوریت کې یوه بریدګر شپږ کسان په ډزو ووژل

ډزې نن سهار شا او خوا اووه بجې د روغتون په یوه انتظار خونه کې وشوې.

د چک جمهوریت د اوستراوا ښار په یوه روغتون کې یوه بریدګر شپږ کسان په ډزو وژلي او وروسته یې ځان هم وژلی دی.

د چک جمهوریت صدراعظم اندرې ببیش دولتي تلویزیون ته وویل چې دا یوه داسي غمیزه ده چې هیڅ ورباندي نه پوهيږي.

ببیش وویل چې ډزې سهار شا او خوا اووه بجې په یوه انتظار خونه کې وشوې.

پولیس وايي دوی د مشکوک کس موټر وموند او کله چې دوی نږدې ورغلل، حمله کوونکي ځان هم په ډزو وواژه. دوی وايي حمله کوونکی دوه څلوېښت کلن وو.

دا له ۲۰۱۵ میلادي کال راهیسي د چک جمهوریت تر ټولو خونړۍ حمله ګڼل کیږي. په ۲۰۱۵ میلادي کال کې یوه سړي وروسته له هغه ځان وواژه چې اته کسان یې په ډزو ووژل.

جاپان د اټومي لانجې په اړه تهران او واشنګټن سره مرسته کوي 

د جاپان صدراعظم شینزو ابې

د جاپان صدراعظم وایي، د ایران ولسمشر ته هغه هېوادته د ورتلو بلنه ورکوي څو د ایران د اټومي پروګرام پرسر د تهران او واشنګټن ترمنځ د کړکیچ له هواري سره مرسته وکړي.

د جاپان صدراعظم شینزو ابې وایي، هېواد یې د ایران د ولسمشرحسن روحانې کتنې ته تیاری نیسي ځکه غواړي چې د هغې اټومي لانجې په هوارولو کې پراخ رول ولوبوي چې د تهران او واشنګټن ترمنځ را ولاړه شوې ده.

ابې چې په توکیو کې په یوه خبري کنفرانس کې خبرې کولې دغه راز وویل چې دا هیواد همداشان غواړي چې په منځني ختیځ کې د کړکیچ له کمولو سره مرسته وکړي.

هغه زیاتوي: "له جاپانه د ایران د ولسمشر حسن روحاني پرکتنې خبرې روانې دي، نړیواله ټولنه له جاپانه چې له متحدو ایالتونو سره شراکت لري او په عین حال کې هم له ایران سره له اوږدې مودې راهیسې ښه اړیکی لري، تمه کوي چې وضعیت ته رسیدګي وکړي."

د اسوشیتید پرس خبري آژانس د راپور له مخې جاپان چې د تېلو په برخه کې په سلو کې اتیا د ایران په تېلو متکي دي، د دې هېواد صدراعظم په تېر جون میاشت کې هم ایران ته تللی و چې ایران او متحده ایالات دواړه دې ته وهڅوي چې د کړکېچ د کمولو لپاره په خپلو کې خبرې وکړې خو دغو هڅو یې نتیجه ور نه کړه.

د جاپان صدراعظم شینزو ابې که څه هم جاپان ته د ولسمشر روحاني د ورتلو په اړه نور جزیات ورنکړل خو د دې هېواد رسنیو ویلي چې دغه سفرد روانې میاشتې په وروستیو کې تنظیم شوی.

له مالېزیا څخه د روحاني د پلان شوې کتنې مخکې یا وروسته.

ټاکل شوې چې حسن روحاني د اسلامي هیوادونو د کنفرانس په سرمشریزه کې چې مالیزیا به یې کوربنه وي، ګډون وکړي.

د تهران او واشنګټن ترمنځ کړکیچ وروسته له هغې زیات شو چې د امریکا ولسمشر ډونالډ ټرمپ د تیرکال په مې میاشت کې د ایران او د نړۍ د قدرتونو ترمنځ د ۲۰۱۵ میلادي کال له اټومي تړون ووت او له هغې راهیسې یې پر ایران بیرته بندیزونه ولګول.

د واشنګټن بندیزونو تر ډېره د ایران د تېلو صنعت ډیر اغېزمن کړی دی.

دغه بندیزونه ایران نه پرېږدي چې پر بهرنیانو اومه تېل وپلوري، هغه چې د دې هېواد د عوایدو اصلي سرچینه بلل کیږي.

دغو بندیزونو ته په پام تهران هم په تدریجې ډول له هغو ژمنو په شا شوی چې په شوي اټومي تړون کې یې کړي دي.

د جاپان صدراعظم زیاته کړه چې جاپان به تر خپلې وسې هڅه وکړي چې د دوامداره خبرو له لارې په منځني ختیځ کې کړکېچ کم او وضعیت ثبات ومومي.

ښاغلي ابې وویل، د دې ترڅنګ چې جاپان به دې هېواد ته د تېلو لېږدولو د کشتیو امنیت تامینوي، د انرژۍ خوندي کولو ته په پام دا د جاپان دنده ده چې په سیمه کې د سولې او ثبات په ټینګښت کې خپل رول ولوبوي.

ایران له امریکا سره د نورو بندیانو پر تبادلې چممتوالی ښودلی

ارشیف

ایران له امریکا سره د نورو بندیانو د تبادلې لپاره چمتو والی ښودلی.

د ایران د بهرنیو چارو وزیر محمد جواد ظریف د ډسمبر پر ۹ پر ټویټر پاڼه لیکلي: "روانه اونۍ د خپل برمته شوي وګړي ترلاسه کولو وروسته، د بندیانو تبادلې ته بشپړ چمتووالی لرو."

د ډسمبر پر ۷ دواړو هیوادونو یو د بل بندیان ژیو وانګ چې د امریکا د پرینستون پوهنتون فارغ التحصیل دی له ایراني ساینس پوه مسعود سلیماني سرهچې د امریکا په بند کې وو، د سویس په زوریخ ښار کې تبادله کړل.

دغه راز د ایران دولتي خبري آژانس ایرنا هم د حکومت د ویاند علي ربیعي په حواله راپور ورکړی چې وایې تهران تل له متحده ایالاتو سره د ټولو بندیانو د تبادلې لېواله دی.

واشنګټن له تهران څخه د ټولو هغو امریکاییانو د خوشې کېدو غوښتنه کړې چې د ایران په بند کې دي.

د ایران حکومت هم په اکتوبر کې امریکا ته د شلو ایرانیانو لست سپارلی وو چې د متحده ایالاتو سره د اقتصادي بندیزونو د سرغړاوي په تور بندیان دي.

شونې ده چې سانامارین د فنلنډ صدراعظمه شي

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

۳۴ کلنه سانامارین به نن په قوي احتمال د فنلنډ د صدراعظمې په توګه د دې هېواد د چارو مسولیت واخلي او د نړۍ تر ټولو ځوانه مشره به شي .

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

نوموړې د یکشنبې په ورځ د فنلنډ د صدراعظمۍ مقام خپل کړ.

په یوه غیر معمول بدلون سره به مارین له څلورو نورو هغو ګوندونو سره د ائتلافي حکومت مشري وکړي چې د ټولو مشرانې ښځي دي.

له هغوی څخه درې تنې شاوخوا دیرش کلنې دي.

روسیه: په نړیوال لوبو کې پر روسي ورزشکارانو بندیز ناسم او نامعقول دی

ارشیف

د روسیې د المپیک کمیټې د المپیک په نړیوالو لوبو کې پر روسي ورزشکارانو بندیز ناسم او غیر معقول اقدام ګڼلې دی.

د دې کمیټې مشر ستانیسلاف پوزد نیایکوف د دوشنبه په ورځ په مسکو کې یوې خبري غونډي ته وویل روسي ورزشکاران به د توکیو په اولمپیک کې ګډون وکړي.

هغه زیاتوي: "مونږ ډاډه یو چې د روسیې ورزشکاران به د هغې ډلې د یوې برخې په توګه چې د روسیې د اولمپیک کمیټه یې جوړوي، د توکیو المپیک لوبو ته ولاړ شي، مونږ به تر خپله وسه پورې هر هغه څه وکړو چې ډاډه شو د روسیې د المپیک ډله په جاپان کې د روسیې تر درې رنګه بیرغ لاندي سیالۍ وکړي."

نوموړي زیاته کړه چې د ډوپینګ ضد نړیوالې ادارې پریکړه د روسي لوبغاړو د برابرۍ او هم د بشري او مدني حقونو څخه سترګي پټوي.

د دوپینګ ضد نړیوالې ادارې د اجرائیوې کمیټې د ډسمبر پر نهمه د روسیې لوبغاړي او چارواکي د څلورو کلونو لپاره په المپیک لوبو او نړیوالې اتلولۍ کې له ګډونه منع کړل.

دا کمیټه وایې مسکو په هغو لابراتواري اسنادو کې مداخله کړې او جعلي اسناد یې په کې ځای پرځای کړي چې د ډوپینګ په آزموینو کې د نشه یې موادو د مثبتو پېښو په پېژندلو کې مرسته کوي.

د اسیا اتلانو لیګ د ډله ییزې پچې اچونې نېټه اعلان شوه

د اسیا فوټبال کنفدراسیون په ۲۰۲۰ میلادي کال کې د اسیا د اتلانو لیګ د ډله ییزې پچې اچونې نیټه اعلان کړه.

د اسیا اتلانو د ۲۰۲۰ لیګ پچه اچونه سبا (سه شنبه) د مالیزیا په پلازمینه کوالالامپور کې تر سره کیږي.

د د دغه سیالیو ۳۹ م پړاو دی چې د اسیایي لوبډلو ترمنځ تر سره کیږي.

بغداد کې پر پوځي اډه راکټي بریدونه شوي

د عراق د پلازمینې بغداد هوايي ډګر ته څېرمه پوځي اډه په راکټونو لګیدلې.

نن په بغداد کې په یوه پوځي اډه څو راکټونه لګیدلي دي.

د عراق د پلازمینې بغداد هوايي ډګر ته څېرمه هغه پوځي اډه په راکټونو لګیدلې چې پکې یو شمېر امریکايي پوځیان او ډپلوماټان هم مېشت دي.

د عراق پوځ په یوه بیان کې ویلي چې شپږ عراقي سرتېري په دغو راکټي بریدونو کې ټپیان دي چې له ډلې یې د دوو وضعیت ښه نه دی.

امریکايي ځواکونو ته زیان نه دی اوښتی.

ټپیان د عراق د تروریزم ضد وړې ډلګۍ غړي دي چې د امریکا له خوا جوړه او روزل شوې ده.

بیان زیاته کړې چې امنیتي ځواکونو نورې راکټ لانچرې هم پيدا کړي او دا ښيي چې د یوې لا لویې حملې پلان نیول شوی و.

دا په عراق کې په هغو پوځي اډو باندې چې په کې امریکايان دیره دي یا هم په بغداد کې د امریکا پر سفارت د بریدونو تر ټولو تازه بېلګه یادیږي.

چا سمدستي د دغو بریدونو مسوولیت په غاړه نه دی اخیستی.

د امریکا متحده ایالتونو دفاع وزارت د ایران له ملاتړ برخمنې ډلې د دغسې بریدونو په ترسره کولو تورنوي.

د شپږو اوونیو په اوږدو کې دا نهم وار دی چې په عراق کې د امریکا په مرکزونو باندې بریدونه کیږي.

امنیتي ځواکونو لږ تر لږه د یوه برید پړه د تهران له ملاتړ برخمن سختدریځي شیعه کتائب حزب الله ګروپ باندې اچوي چې د واشنګتن له خوا هم په تور لیسټ کې شامل شوی دی.

ایران په عراق کې په سختدریځو اشخاصو په تېره بیا د حشدالشعبي ملیشه ډله باندې چې دوی جوړه کړې زیات نفوذ لري.

د امریکا دفاع وزارت یوه چارواکي فرانسپرس ته ویلي چې د راکټونو وروستي برید حشدالشعبي ډله اوس د امریکا لپاره ان تر اسلامي دولت ډلې هم په یوه لوی ګواښ اړولې.

امریکا له بغداد سره ژمنه کړې چې د دې ډلې په ورکولو کې به مرسته ورسره کوي.

د جمعې په ورځ د دې ملیشه ډلې په دریو لوړپوړو مشرانو باندې د امریکا له خوا بندیزونه هم لګیدلي دي.

د عراق پوځیان یا د امریکا یا هم ایران له خوا روزل شوي او دا هېواد له دواړو سره ملګرتیا پالي.

د امریکا د سوداګریزو بندیزونو مقابلې لپاره د ایران طرحه

د ایران ولسمشر حسن روحاني

د ایران ولسمشر حسن روحاني ویلي چې د امریکا د سوداګریزو بندیزونو د مقابلې لپاره یې داسې طرحه جوړه کړې چې هېواد به یې د تیلو په عوایدو کمه اتکا وکړي.

ښاغلي روحاني پرون د دغه هېواد د پارلمان د پرانیستې په مراسمو کې وویل چې د بودیجې دا طرحه به په ایران باندې د امریکا د زیاتو فشارونو او بندیزونو په وړاندې مقاومت وکړي.

هغه وویل: "زموږ د بودیجې اساس لا هم د امریکا د حد اکثر فشار او بندیز په وړاندې دی، دا په دې معنی نه ده چې دولت دې نور ګامونه پورته نه کړي."

د امریکا ولسمشر ډونالډ ټرمپ په ۲۰۱۸ میلادي کال کې له ایران سره د نړۍ د اټومي قدرتونو له تړون ووت او په ایران یې سخت بندیزونه پیل کړل.

د بندیزونو یوه لویه برخه د ایران د تیلو په صادراتو ده.

له هماغه وخته د ایران اقتصاد مخ په ځوړ روان دی.

نور راوښيه

XS
SM
MD
LG