د لاسرسۍ وړ لېنکونه

تازه خبر
پنجشنبه ۳ سلواغه ۱۳۹۸ کابل ۰۰:۵۱

افغانستان

راپورونه: لويې څارنوالۍ د کرام الدين کريم د نيولو حکم صادر کړ

د افغانستان د فوټبال فدراسيون پخوانی مشر کرام الدين کریم

ځينو رسنيو راپور ورکړى چې د افغانستان لويې څارنوالۍ د هېواد د فوټبال فدراسيون د پخواني مشر کرام الدين کريم د نيولو حکم صادر کړ.

دا حکم په داسې حال کې صادرېږي چې پرون د فوټبال نړيوال فدراسيون ښاغلى کریم په نړیواله کچه د تل لپاره له فوټبال سره له تړلو فعالیتونو منعه کړ.

د فیفا د اخلاقي کمېټې قضايي څانګې پرون کرام الدين کریم د خپلې دندې له واکونو څخه په ناوړه استفادې او د افغانستان د فوټبال د ښځينه ټيم د څو لوبغاړو په جنسي ځورونې مقصر وباله او نوموړی یې یو میليون ډالر جریمه هم کړ.

د فیفا په بیان کې راغلي چې دغو ښځینه لوبغاړو کرام الدین کریم له ۲۰۱۳ میلادي کاله تر ۲۰۱۸ میلادي پورې موده کې څو وارې په جنسي ځورونې تورن کړی و.

د ورځې تازه خبرونه دلته ولولئ

نامعلومو وسله والو ننګرهار کې یو قاضي وواژه

ارشیف

نامعلومو وسله والو په ننګرهار کې یو تن قاضي په ډزو وواژه.

د ننګرهار چارواکي وایي، نامعلومو وسله والو نن مازیګر شاوخوا ۴ بجې د ننګرهار د استېناف محکمې یو قاضي په ډزو وواژه.

د ننګرهار د والي ویاند عطاالله خوګیاڼي رسنیو ته وویل چې وژل شوی قاضي رفیع الدین اشنا نومېږي چې د بهسودو ولسوالۍ د اکمالاتي بېز په سیمه کې وژل شوی دی.

ښاغلي خوګیاڼي که څه هم په دې اړه نور وضاحت ورنه کړ خو ویې ویل چې رفیع الدین د استناف محکمې برحاله قاضي و.

د دغې پېښې مسؤلیت تر دې دمه چا نه دی منلی.

د توکیو پارالمپیک سهمیه‌بندۍ سیالیو ته ۲ افغان لوبغاړي غوره شوي

ارشیف، انځور تزئیني بڼه لري.

د افغانستان د پارا المپیک دوه لوبغاړي د توکیو ۲۰۲۰ میلادي کال د سهمیه‌بندۍ سیالیو ته غوره شول.

د افغانستان د پارا المپیک د کمېټې مطبوعاتي مسؤل کبیر خوشبین نن ازادي راډيو ته وویل چې په دغو دوو لوبغاړو کې یوه نجلۍ او یو هلک شامل دي.

هغه زیاتوي: "دغه لوبغاړي دبۍ ته سفر لري او فعلاً تمریناتو باندې بوخت دي، دوی له ښه چمتووالي برخه‌من دي."

په پارا المپیک لوبو کې تر ډېره معلول لوبغاړي لوبېږي.

ښاغلی خوشبین وايي، ټاکل شوې ده چې دغه لوبغاړي په نږدې راتلونکي کې دبۍ ته سفر وکړي.

ښاغلي خوشبین هیله وښوده څو یاد لوبغاړي وکولای شي چې افغانستان ته ښې لاسته راوړنې ولري.

کندهار کې د فوټسال سیالۍ پیل شوي

ارشیف، تصویر تزئیني بڼه لري.

د هېواد په جنوب کندهار ولایت کې د فوټسال سیالۍ پیل شوي.

د افغانستان د فوټبال فدراسیون وايي، دغه سیالۍ د کندهار په مرکز کې د "ښوونځي کپ" په نوم د ۱۶ لوبډلو ترمنځ پیل شوې دي.

د افغانستان د فوټبال فدراسیون ویاند شفیع شاداب وايي، یادې سیالۍ د کندهار په وطن لوبغالي کې ترسره کېږي.

د یادو لوبو هدف د غوره لوبغاړو ټاکل یاد شوي دي.

لوبې نن پیل شوي او درې ورځې به دوام وکړي.

د کندز سرحدي سیمو کې ۲ سوداګریز مرکزونه جوړېږي

د کندز ښار یوه څنډه-ارشیف

په کندز کې د کلیو د بیارغونې او پراختیا ریاست چارواکي وايي چې د جاپان او نړیوال بانک په مالي مرسته د لیتاکا یا د معیشت ودې پروژې په چوکاټ کې د دې ولایت په سرحدې سیمو کې دوه سوداګریز مرکزونه جوړېږي.

چارواکي وايي، دغه مرکزونه په کندز ښار او امام صاحب ولسوالۍ کې جوړېږي.

د نوموړې ادارې د چارواکو په وینا، د دې پروژې د پلان له مخې د شمال ختیځ ولایتونو په سرحدي ولسوالیو کې بنسټیزې او تولیدي پروژې پلې کېږي ترڅو د کلیوالو اقتصاد وده وکړي او شته ستونزې هوارې شي.

د کندز د کلیو د بیارغونې او پراختیا ریاست رئیس دوست محمد ریحان په دې اړه وویل: "د لیتاکا د پروژې له مخې د ۴۰ میلیونه افغانیو په لګښت یو سوداګریز مرکز د کندز ښار کې او د څه باندې ۱۰ میلیونه افغانیو په ارزښت یو سوداګریز مرکز په امام صاحب ولسوالۍ کې جوړېږي څو د کلیوالو لاسي صنایعو او سیمه‌ییزو تولیداتو ته د پلورلو زمینه برابره شي."

له دې سره سم، په کندز کې د پانګونې او سوداګرۍ خونې چارواکي بیا وايي چې د دغې پروژې په پلي کېدو سره به د کلیوالو لاسي صنایعو او نورو تولیداتو ته په سیمه کې نږدې د پلورلو زمینه برابره شي.

د کندز په امام صاحب ولسوالۍ کې هغه شمېر خلک چې په دې پروژه کې شامل شوي، دغه پروژه د کلیوالو د اقتصاد د پیاوړتیا په برخه کې ګټوره بولي.

ولسي جرګې د ۱۳۹۹ مالي کال ملي بودجه تصویب کړه

د افغانستان ولسي جرګه

د ۱۳۹۹ مالي کال ملي بودجې سند نن د ولسي جرګې له لوري تصویب شوه.

د افغانستان د ۱۳۹۹ کال ملي بودجه ۴۲۸ میلیارده افغانۍ ده چې ۲۸۹ یې عادي او ۱۳۹ میلیارده‌یې پراختیايي بودجه ده.

همدارنګه د دې ترڅنګ‌یې (۶۴ میلیارده افغانۍ اختیاري او ۷۵ میلیارده افغانۍ غیر اختیاري) بودجه په پام کې نیول شوې ده.

تر دې وړاندې د ولسي جرګې غړو انتقاد کړی و چې دغه بودجه متوازنه نه‌ده.

چخانسوري: د بهرنیو چارو وزارت د اصلاحاتو اجنډا به مخته وړم

چخانسوري چې تر دې مخکې په څو مهمو څوکیو دندې ترسره کړي پرون د ولسمشر غني له‌خوا د بهرنیو چارو وزارت د سرپرست او سیاسي معین په توګه وګمارل شو.

د افغانستان د بهرنیو چارو نوي سرپرست وزیر محمد هارون چخانسوري ویلي چې په دغه وزارت کې به د اصلاحاتو اجنډا مخته وړي.

هغه دا خبره په ټویټر باندې کړې ده.

چخانسوري چې تر دې مخکې په څو مهمو څوکیو دندې ترسره کړي پرون د ولسمشر غني له‌خوا د بهرنیو چارو وزارت د سرپرست او سیاسي معین په توګه وګمارل شو.

چخانسوري په خپل ټویټ کې د بهرنیو چارو پخوانی سرپرست وزیر ادریس زمان ستایلی چې په خبره‌یې په بهرنیو چارو وزارت کې یې د اصلاحاتو لپاره بنسټ پوخ کړ.

ادریس زمان د ۲۰۱۸ کال په اکټوبر کې د بهرنیو چارو وزارت سیاسي مرستیال شو او د ۲۰۱۹ کال په اکټوبر کې د صلاح‌الدین رباني تر استعفا وروسته د دغه وزارت سرپرستي ور له غاړې شوه.

زمان په خپلې سرپرستۍ کې د بهرنیو چارو وزارت په چوکاټ کې د اصلاحاتو طرحې جوړې کړې وې او په مهمو کور دننه او بهرنیو ډپلوماتیکي څوکیو کې یې ځیني تغییرات راوستي و.

اجرائیه رئیس عبدالله عبدالله چې له ولسمشر سره په ګډه ملي یووالي حکومت مخته وړي وړمه ورځ د ولسمشر له‌خوا د ځینو نورو ګمارنو په اړه انتقاد کړی و او ویلي یې و چې خپل‌سرې ګمارنې به هېواد د بې‌ثباتۍ له خطر سره مخ کړي.

افغانستان کې د پوهنې ملاتړ لپاره خلکو ۷۷۰ میلیونه افغانۍ راټولې کړي

په افغانستان کې د یو ښوونځي زده‌کوونکي د زده‌کړې پر مهال.

د پوهنې وزارت وايي د افغانستان په ٣٠ ولايتونو کې خلکو د پوهنې د ملاتړ لپاره تر ٧٧٠ میليونو افغانيو زياته بسپنه ټوله کړې ده.

د دغه وزارت وياندې نوريې نزهت تېر ماښام ازادي راډيو ته وويل، دغه پيسې د ښوونځيو د شوراګانو له لارې راټولې شوي او لګول شوې دي.

مېرمن نزهت زياته کړه: "په روان ښوونيز کال کې د افغانستان د ٣٠ ولايتونو خلکو او اوسېدونکو د پوهنې له وزارت سره د ٧٧١ میليونه افغانيو په ارزښت مرسته کړې ده."

اغلې نزهت وايي دغه پيسې د ټولګيو پر جوړولو، د درسي موادو پر برابرولو او ښوونځيو ته د ځمکې پر ورکولو لګول شوې دي.

ارزګان، کندز، غور او نورستان هغه ولايتونه دي چې د پوهنې د ملاتړ لپاره بسپنه په‌کې نه‌ده ټوله شوې.

محب: افغان بلوڅان دې خپل ځوانان په امنیتي ځواکونو کې شامل کړي

ښاغلي محب پرون په کابل کې د بلوڅانو شورا له استازو سره په کتنه کې دا موضوع مطرح کړه.

د افغانستان د ملي امنيت سلاکار حمد الله محب د افغان بلوڅانو له عمومي شورا غوښتنه وکړه چې خپل ځوانان په امنيتي ځواکونو کې شامل کړي.

ښاغلي محب پرون په کابل کې د دې شورا له استازو سره په کتنه کې دا موضوع مطرح کړه.

د ملي امنيت شورا وياند جاوېد فيصل تېره شپه ازادي راډيو ته وويل: "د ملي امنيت سلاکار د بلوڅو سرتاسري شورا سره په غونډه کې وويل، د خاورې د دفاع لپاره لکه څنګه چې دغه قوم پخوا برخه اخيستې ده، اوس دې هم له دغه ادرس څخه ډېر ځوانان وهڅوي چې د امنيتي او دفاعي ځواکونو په ليکو کې خلکو ته خدمت وکړي."

د ښاغلي فيصل په خبره په دې کتنه کې د بلوڅانو استازو غوښتنه وکړه چې د دوى له بې‌ځايه شويو کورنيو سره دې مرستې وشي.

د وسله‌والو ضد مبارزې لپاره د افغان ځواکونو پر پياوړتیا د ناټو ټینګار

ښاغلي سټولټنبرګ پرون په بروکسل کې د اروپايي پارلمان د بهرنيو چارو کمېټې ته په وينا کې دا خبره وکړه.

د ناټو سرمنشي ينس سټولټنبرګ​ د افراطي وسله‌والو پر ضد د مبارزې لپاره د افغانستان د امنيتي او دفاعي ځواکونو پياوړتيا مهمه وبلله.

ښاغلي سټولټنبرګ پرون په بروکسل کې د اروپايي پارلمان د بهرنيو چارو کمېټې ته په وينا کې په افغانستان، عراق او نورو ځايونو کې د ناټو د ترورېزم ضد مأموريتونو ته په اشارې وويل: "زما په باور ناټو بايد د جنګي عملياتو وړتيا ولري، لکه څنګه چې مو له اړتيا سره سم د بالکان حوزې په هېوادونو، افغانستان او نورو ځايونو کې کړي دي، خو په اوږد مهال کې دا به غوره وي که موږ محلي ځواکونه تقويه کړو چې په خپله په خپلو هېوادونو کې د ترورېزم پر ضد وجنګېږي. ځکه تل به موږ ته د بهرنيانو په سترګه کتل کېږي. په ناټو کې اوس سوچ دا دى چې يوازې دې جنګي عمليات نه‌کېږي، بلکې پر دې فکر کېږي چې موږ محلي ظرفيتونه څنګه زيات کړو، لکه څنګه چې په افغانستان او عراق کې دا کار کوو."

په افغانستان کې جنګي مأموريت په ٢٠١٤ میلادي کال کې پاى ته ورسېد، خو په دغه هېواد کې د ٢٠١٥ میلادي کال له جنورۍ مياشتې د ناټو قاطع ملاتړ مأموريت روان دى.

دغه مأموريت د افغانستان د امنيتي او دفاعي ځواکونو او ادارو پر روزنه، سلا مشوره او همکارۍ متمرکز دى.

د بشري حقونو کمېسیون: شینډنډ کې د ناټو برید ۱۵ ملکیان وژلي وو

ارشیف

د افغانستان د بشري حقونو خپلواک کمېسیون ویلي چې د هرات په شینډنډ ولسوالۍ کې د ناټو په مشرۍ د غوڅ ملاتړ مأموریت د ځواکونو په هوايي حمله کې ۱۵ ملکي وګړي وژل شوي او زخمیان شوي ول چې درې کوچنیان او درې ښځې هم په‌کې وو.

حمله د جنورۍ په اتمه، د شینډنډ ولسوالۍ په پایکش سیمه کې د وسله‌والو طالبانو پر یوه پناه ځاي شوې وه.

د افغانستان د بشري حقونو خپلواک کمېسون په افغانستان کې پر حکومت او بهرنیو ځواکونو غږ کړی چې په پوځي عملیاتو کې د ملکي وګړو مصونیت ته پام وکړي.

په افغانستان کې د ناټو د غوڅ ملاتړ مأموریت تر اوسه په دې اړه غبرګون نه‌دی څرګند کړی.

په هرات کې سیمه‌ییزو چارواکو دوه اوونۍ وړاندې تأیید کړې وه چې په شینډنډ کې د بې‌پيلوټه الوتکې په برید کې د وسله‌والو طالبانو یو مشر ننګیالی وژل شوی و.

د منځنۍ اسیا د فوټسال په سیالیو کې د افغان ښځینه لوبډلې ګډون

د افغانستان د فوټسال ښځینه لوبډله

د افغانستان د فوټسال ښځینه ۱۹ کلنه لوبډله د منځنۍ اسیا د فوټسال د ۱۹ کلنو د ښځینه لوبډلو په سیالیو کې، د ګډون په هدف سبا د تاجکستان پلازمېنې دوشنبې ښار ته ځي.

د افغانستان د فوټبال فدراسیون د خپرونو مرستیال شمس امیني نن ازادي راډيو ته وویل چې د دوی تمرینات نن پای ته ورسېدل.

دا لومړی ځل دی چې د افغانستان د فوټسال د ۱۹ کلنو ښځينه لوبډله بهرنیو سیالیو ته ځي.

دغه سیالۍ د روانې جنورۍ میاشتې په ۲۴مه نېټه پیلېږي او د همدې میاشتې تر ۲۹مې نېټې پورې دوام کوي.

د افغانستان د فوټبال فدراسیون د معلوماتو له مخې، په دغه سیالیو کې د افغانستان په ګډون د ایران، ترکمنستان، ازبکستان، قرغزستان او کوربه هېواد تاجکستان لوبډلې ګډون لري.

سبا افغان کرکټ ۱۹ کلنو لوبډله له اماراتو سره سیالي کوي

د افغانستان د ۱۹ کلنو کرکټ ملي لوبډله

ټاکل شوې چې سبا "چهارشنبه" د افغانستان د کرکټ ۱۹ کلنه لوبډله له متحده عربي اماراتو سره په سوېلي افریقا کې د لوبې ډګر ته ووځي.

د افغانستان کرکټ بورډ ویاند فرید هوتک وایي، افغان کرکټ لوبډله یادې لوبې لپاره بشپړ چمتووالی لري او هېله‌من دي چې دغه لوبه هم وګټي.

ښاغلي هوتک زیاته کړه: "ټاکل شوې ده چې د افغانستان د کرکټ ۱۹ کلنه لوبډله په نړیوال جام کې خپله دوهمه لوبه په ډې ګروپ کې د متحده عربي اماراتو په وړاندې پیل کړي."

دغه لوبه به د کابل پر وخت ۱۲ بجې او ۳۰ دقیقې پیل شي.

افغانستان تر دې وړاندې کوربه هېواد سوېلې افریقا ته ماتې ورکړې وه.

افغانستان به د جمعې په ورځ د کاناډا له کرکټ لوبډلې سره سیالي ولري.

د ټاکنیزو شکایتونو کمېسیون شکایتونو ته د رسېدنې پړاو پیل کړ

د ټاکنیزو شکایتونو کمېسیون غړي

د ټاکنیزو شکایتونو کمېسیون وايي نن سه شنبه په رسمي ډول د استېناف غوښتنې شکایتونو ته د رسېدنې پړاو پیل شو.

د ټاکنیزو شکایتونو کمېسیون وايي چې د استېناف غوښتنې لپاره د شکایتونو د ثبت پړاو تېره ورځ بشپړ شوی او په دغه مرحله کې ۶۲۹۲ شکایتونه ثبت شوي دي.

د دغه کمېسیون رئیسې زهره بیان شینوارې د سې شنبې په ورځ «۱۳۹۸ کال د سلواغې ۰۱» په کابل کې خبریالانو ته وویل چې نن په رسمي توګه شکایتونو ته د رسېدنې پړاو پیل شو چې دا بهیر به ۱۵ ورځې دوام وکړي.

شینوارې زیاته کړه: "د شکایتونو د ثبت له مرحلې وروسته د شکایتونو کمېسیون په مرکزي دفتر کې شکایتونو ته د رسېدنې د طرزالعمل له مخې چې په هغه کې تصنیف، څېړنه، تحلیل، تدقیق، ابلاغ او تطبیق پړاوونه شامل دي زموږ د تخنیکي ټیم له لوري یې کار پیل شوی چې اوس د پروسس په حال کې دي."

د ټانیزو شکایتونو کمېسیون وايي، په پروان، میدان وردګو، تخار او جوزجان ولایتونو کې د استېناف غوښتنې لپاره هېڅ شکایت نه‌دی ثبت شوی.

د دغه کمېسیون چارواکي زیاتوي چې ډېری ثبت شوي شکایتونه په ترتیب د "ثبات او هم‌پالنې"، د "دولت جوړوونکي" او د "سولې او اسلامي عدالت" ټاکنیزو ټیمونو له لوري ثبت شوي.

د شکایتونو کمېسیون له دې وړاندې په مرکز او ولایتونو کې شااوخوا ۱۶۵۰۰ زره ټاکنیز شکایتونه څېړلي و چې د پرېکړې له مخې یې ۴۷ محلونه باطل اعلان شوي او ۵۳۷۸ محلونه بیا شمېرنې ته تللي دي.

د افغانستان د ازادو او عادلانه ټاکنو بنسټ اجرائیوي رئیس یوسف رشید وویل: "د شکایتونو مرکزي کمېسیون او د شکایاتو ولایتي دفترونه دې په دغه څېړنه کې سره همغږي شي او دوی دې په دې اړه یوه واحده پرېکړه وکړي، څو قضیه په متعادل ډول سره حل او فصل شي."

د افغانستان د ولسمشرۍ ټاکنې د میزان یا تلې میاشتې په شپږمه وشوې، خو تر اوسه‌یې یوازې لومړنۍ پایله اعلان شوې ده.

د ټاکنیزو شکایتونو کمېسیون له‌‌خوا د استېناف غوښتنې شکایتونو ته له رسېدنې او د پرېکړې تر اعلان وروسته به، د ولسمشرۍ ټاکنو وروستۍ پایله اعلان شي.

د افغانستان د روڼتیا څار بنسټ: د ملي بودجې طرحه نیمکړې ده

د افغانستان د روڼتیا څار بنسټ د دغه څېړنیز راپور د خپرولو پر مهال.

د افغانستان د روڼتیا څار بنسټ په یوه څېړنیز راپور کې د دې هېواد د ۱۳۹۹ لمریز کال د ملي بودجې طرحه نیمکړې وبلله.

په داسې حال کې چې په پام کې ده ولسي جرګه سبا د ۱۳۹۹ کال د ملي بودجې طرحه رأی‌ګیرۍ ته وړاندې کړي، د افغانستان د روڼتیا څار بنسټ وايي، دغه طرحه بشپړه نه‌ده او بیا کتنه غواړي.

د دغه بنسټ د اړیکو او عدالت غوښتنې د څانګې مسؤل محمد ناصر تیموري وايي، د ملي بودجې د طرحې په ترتیبولو کې له خلکو، مدني بنسټونو او متخصصینو سره مشوره شوې ده.

ښاغلي تیموري د سې شنبې په ورځ «۱۳۹۸ د سلواغې ۰۱» د ملي بودجې د طرحې په اړه د خپلو موندنو د راپور د خپرولو پر مهال وویل، د ملي بودجې ډېره برخه امنیتي سکټور ته ځانګړي کول او په‌کې احتیاطي کوډونه، د یادې بودجې د طرحې جدي ستونزې دي.

هغه زیاته کړه: "د افغانستان له حکومت نه مو غوښتنه دا ده چې د دفاعي او امنیتي بودجې کمولو ته پام وکړي او په دې اړه دې بحثونه پیل کړي. همدارنګه احتیاطي کوډونو ته دې هم جدي بیا کتنه وشي چې ملي بودجه په ښه توګه ترتیب شي."

د افغانستان د روڼتیا څار بنسټ ټینګار کوي چې د ۱۳۹۹ لمریز کال د بودجې طرحه په ټوله کې نیمګړتیاوې لري او ولسي جرګه‌یې باید له تصویبولو دمخه بیا وویني.

دا په داسې حال کې ده چې د افغانستان د مالیې وزارت د مسؤلینو په خبره، په پام کې ده ولسي جرګه پر دغې بودجې تر یو میاشتنیو بحثونو وروسته د چهارشنبې په ورځ په عمومي ناسته کې رأی‌ګیري وکړي.

د افغانستان د ۱۳۹۹ کال ملي بودجه ۴۲۸ میلیارده افغانۍ ده چې ۲۸۹ یې عادي او ۱۳۹ میلیارده‌یې پراختیايي بودجه ده.

د افغانستان د مالیې وزارت ټینګار کوي چې اوس هم د هېواد ۵۰ سلنه بودجه له بهرنیو مرستو تمویلېږي.

د سوداګرۍ او پانګونې خونه: د ګازو بیې راټیټې شوي

ارشیف

د سوداګرۍ او پانګونې خونه وايي، د روانې اوونۍ له پیله د ګازو بیو کې د پام وړ کموالی راغلی.

د دې خونې ویاند جان اقا نوید نن ازادي راډيو ته وویل، اوس‌مهال په عمده ډول د یو کیلو ګازو بیه په ۵۲ او په پرچون ډول بیا ۶۰ افغانۍ ده.

نوموړي وویل چې کابل ته په لاره د ګازو د ټانکرونو په رارسېدو سره به د ګازو په بیو کې نور هم د پام وړ کموالی هم راشي.

خو یو شمېر کابل ښاریان شکایت کوي چې لا هم یو کیلو ګاز له ۸۰ تر ۱۱۰ افغانیو پېري او په بازار کې د ګازو بیې نه‌کنټرولېږي.

نور راوښيه

XS
SM
MD
LG