د لاسرسۍ وړ لېنکونه

تازه خبر
سه شنبه ۶ کب ۱۳۹۸ کابل ۰۴:۲۰

نړۍ

د شمالي کوريا مشر خپل استازی او یو چارواکی اعدام کړی

د شمالي کوريا مشر

د راپورونو له مخې د شمالي کوريا مشر کېم جونګ اون خپل ځانګړی استازی او د بهرنيو چارو وزارت هغه چارواکي اعدام کړي چې د ده او امريکا د ولسمشر ډونالډ ټرمپ تر منځ د فبرورۍ مياشتې په خبرو کې يې رول درلود.

دا خبر د جنوبي کوريا ورځپاڼې چوسن ایلبو خپور کړی دی.

د کېم جونګ اون خاص استازی کیم یونګ چال چې ویل کېږي په اعدام شویو کې شامل دی د امریکا د بهرنیو چارو له وزیر مایک پامپيو سره هم کتلي و.

هغه د شمالي کوریا د اټمي لانجې د مرکچي پلاوي مشر و.

دی او درې نور کسان په مارچ میاشت کې امریکا ته د جاسوسۍ په تور په میریم هوايي ډګر کې اعدام شوي.

شمالي کوريا له ټرمپ سره د فبرورۍ مياشتې د خبرو د ناکامه کېدو په خاطر دوی مسئول ګڼل.

د شمالي کوریا د مشر کېم جونګ اون ترجمانه هم له ستونزو سره مخامخ ده.

د راپور له مخې دې په ژباړه کې غلطي کړې وه او اوس د سياسي زندانيانو په کمپ کې بندي ده.

پر دې د شمالي کوريا د مشر حیثیت ته د زیان اړولو تور دی.

د ورځې تازه خبرونه دلته ولولئ

د ایراني لاریون کوونکو د ځپلو په تړاو د بشري حقونو څار سازمان غوښتنه

تېر کال د نومبر په میاشت کې په تهران او د ایران په تر ۱۰۰ زیاتو ښارونو کې خلک لارو او کوڅو ته راووتل.

د بشري حقونو د څار نړیوال سازمان د ملګرو ملتونو د سازمان د بشري حقونو پر کمېسون غږ کړی چې د هغه بندیز په اړه چې تېر کال د ایران حکومت پر سوله‌ییزو لاریون کوونکو ولګاوه او هغوي یې وځپل، جدي دریځ خپل کړي.

تېر کال د نومبر په میاشت کې په تهران او د ایران په تر ۱۰۰ زیاتو ښارونو کې خلک لارو او کوڅو ته راووتل.

هغوی په لومړیو کې د تېلو د نرخ د لوړېدو او اقتصادي کمزورۍ پر ضد یې اعتراضونه پیل کړي و، خو کله چې ځوانو لاریون کوونکو د اسلامي جمهوري د مشرانو د له واکه لیرې کېدو نارې پیل کړې، نو امنیتي ځواکونه ورغلل او هغوی یې وځپل.

د بشري حقونو د څار نړیوال سازمان ویلي چې له هغې پېښې درې میاشتې تېرې شوي، خو د ایران چارواکو لا رسماً نه‌ده اعلان کړې چې څومره کسان وژل شوي، نیول شوي او ټپیان دي.

فرانسه اسیې بي بي ته افتخاري تابعیت ورکوي

اسیه بي بي په ۲۰۱۰ کال کې له څو مسلمانو ښځو سره تر لانجې وروسته د پنجاب د یوې محکمې له‌خوا په ارتداد محکومه شوه.

په پام کې ده چې د پاریس ښارواله اني هیدالګو پاکستانۍ عیسوۍ مېرمنې اسیې بي بي ته د فرانسې د افتخاري تابعیت سند ورکړي.

مېرمن هیدالګو به دا سند چې په ۲۰۱۴ کال کې چمتو شوی و، نن رسماً نوموړې ته وسپاري.

۴۹ کلنې اسیې بي بي چې د ارتداد په تور یې څو کاله د پاکستان په زندان کې تېر کړل پرون د فبرورۍ په ۲۴مه وویل په فرانسه کې د سیاسي پناه په لټه کې ده.

هغې د فرانسې له راډیو سره په مرکه کې وویل، په فرانسه کې ژوند کول‌یې ستر ارمان و.

اسیه بي بي په ۲۰۱۰ کال کې له څو مسلمانو ښځو سره تر لانجې وروسته د پنجاب د یوې محکمې له‌خوا په ارتداد محکومه شوه او تر ۲۰۱۸ کال پورې چې د نړۍ په کچه د هغې د خوشې کېدو لپاره غږونه اوچت شول، په زندان کې وه.

اذربایجان او ارمنیا یو بل د اوربند پر ماتولو تورن کړي

ارشیف

اذربایجان او ارمنیا د دواړو هېوادونو ترمنځ پر پوله یو بل د اوربند پر ماتولو تورن کړي دي.

د اذربایجان د پوله‌ساتنې دولتي ادارې د دوشنبې په ورځ وویل د ګزاخ په سیمه کې یو اذربایجاني سرتېری د ارمنیانو په ډزو وژل شوی دی.

د ارمنیا د دفاع وزارت یو ویاند بیا ویلي یو سرتېری یې په جګړه کې برسېرن ټپي شوی دی.

باکو او یرېوان له کلونو راهیسې د اذربایجان څخه د جلا شوې نه‌ګورنو قره‌باغ د سیمې پر سر خپلو کې په کړکېچ کې دي.

د ارمنیا ملاتړ لرونکو بېلتون غوښتونکو دا سیمه چې اکثریت وګړي یې ارمنیان دي د ۱۹۹۰ کلونو په جګړه کې ونیوله. په دې جګړه کې تر ۳۰ زرو زیات کسان ووژل شول.

تر اوسه پورې د دې کړکېچ د هواري لپاره ډیپلوماتیکو هڅو کې ډېر پرمختګ نه‌دی شوی.

نړۍ کې د کرونا وایروس د خپرېدو وېره په زیاتېدو ده

کرونا وایروس په چین کې تر اوسه له ۲۶۰۰ زیات کسان وژلي.

په نړۍ کې د کرونا وایروس د خپرېدو په اړه وېره مخ په زیاتېدو ده.

دا په داسې حال کې ده چې د ایران، ایټالیا او جنوبي کوریا په شمول یو شمېر هېوادونه د دې ناروغۍ چې په چین کې یې تر اوسه له ۲۶۰۰ زیات کسان وژلي د مهارولو هڅې کوي.

افغانستان، عراق، بحرین، کوېټ او عمان د دوشنبې په ورځ په دې هېوادونو کې د کرونا وایروس د لومړنیو مثبتو پېښو راپور ورکړ.

په دې ټولو پېښو کې هغه کسان ښکېل دي چې په وروستیو کې له ایران څخه دغلته ورغلي دي.

ایران له چین وروسته دوهم هېواد دی چې تر اوسه پورې په‌کې د کرونا وایروس له کبله تر نورو هېوادونو د ډېرو کسانو مړینه تأیید شوې ده.

د نړیوال روغتیايي سازمان رئیس تدروز ادهانوم ګبریاسوس د وایروس دې خپرېدو ته د نړیوالې وبا یا پنډمیک (pandemic) د اصطلاح د کارولو په وړاندې د احتیاط ټینګار کړی او ویلي دا ناروغي لا د نړیوالې وبا حد ته نه‌ده رسېدلې، خو په وینا یې باید ممکنې نړیوالې وبا لپاره د چمتووالي په اقداماتو لاس پورې شي.

د روغتیا نړیوال سازمان رئیس په جنوا کې خبریالانو ته څرګندونو کې زیاته کړه، نړۍ په زیاته اندازه د نه‌کنټرولېدونکو مړینو له ګواښ سره مخ نه‌ده.

د روغتیا نړیوال سازمان رئیس وايي، په چین کې د کرونا وایروس خپرېدل د جنورۍ له ۲۳مې نېټې د فبرورۍ تر دوهمې نېټې اوج ته ورسېدل، خو له هغې راوروسته په کمېدو دی.

د کرونا ویروس له امله ایټالیا کې د فوټبال سیالۍ لغوه شوي

ارشیف

په ایټالیا کې د یوونتوس او اینټر لوبډلو تر منځ د فوټبال سیالۍ د کرونا ویروس له امله لغوه شوې.

د نړیوالو ورزشي وېب سایټونو د راپورنو له مخې، په ایټالیا کې پرون یکشنبه هم د فوټبال د لیګ سیالۍ لغوه شوې او د دغه هېواد لومړي وزیر په راتلونکي اونۍ کې د یوونتوس او اینټر ترمنځ د فوټبال د سیالیو د لغوه کېدو خبره کړې.

د دغو وېب پاڼو د راپورنو له مخې، د ایټالیا لومړي وزیر جوزپه کونته ویلي چې فکر نه کوي په یوه اونۍ کې دې دغې خطرناکه ناورغۍ د ویروس مخنیوی وکړای شي او احتمال یې یې شته چې ټولې ورزشي سیالۍ به لغوه شي.

امریکا ته د ویکيلیکس د زنداني بنسټګر ژولیان اسانژ د سپارلو بحثونه

د ویکيلیکس زنداني بنسټګر ژولیان اسانژ

د لندن په یوه محکمه کې په دې اړه بحثونه پيل شوي چې د ویکيلیکس زنداني بنسټګر ژولیان اسانژ امریکا ته وسپاري او که نه.

اسانژ د جاسوسۍ په ګډون د ١٨ تورونو له کبله د امريکا لپاره مطلوب دى، که چېرې مجرم وګڼل شي، په څه باندې ١٧٥ کلونو بند به محکوم شي.

اته څلویښت کلن اسانژ چې په اپرېل مياشت کې ونيول شو، د هغه مدافع وکيلانو او ملاتړو امريکا ته د هغه له سپارلو سره مخالفت څرګند کړ او ويې ويل په امريکا کې به يې محاکمه عادلانه نه وي.

پر اسانژ لګېدلي تورونه په ٢٠١٠ میلادي کال کې د هغه د ډلې له اقداماتو سره تړاو لري، چې د امريکا ګڼ پټ نظامي اسناد يې خپاره کړي وو.

ویکيلیکس په ٢٠١٦ میلادي کال کې هم د امريکا د ډيموکرات ګوند د ملي کمېټې ايمېلونه خپاره کړل، چې د امريکا د تحقيقاتو پر اساس د روسيې پوځي هککرانو هک يا غلا کړي وو.

دا ايميلونه د امريکا د ولسمشرۍ انتخاباتو د کمپاينونو پر مهال هک شوي وو، چې د تحقيق کوونکو په باور هدف يې د اختلاف ايجاد او د ډونالډ ټرمپ د کانديداتورۍ له پياوړتيا سره مرسته وه.

انتونیوګوتیریش: حکومتونه دې د بشري حقونو ساتنې ته لومړیتوب ورکړي

د ملګرو ملتونو عمومي منشي انتونیوګوتیریش

د ملګرو ملتونو عمومي منشي انتونیوګوتیریش وایي، که حکومتونه د ثبات، اقتصادي ودې او په نړۍ کې د ښې راتلونکې غوښتونکي وي، باید د بشري حقونو ساتنه د لومړیتوبونو په سر کې راولي.

ګوتیریش په جینوا کې د څو هېوادونو د بهرنیو چارو وزیرانو په غونډه کې وویل، دا مهال بشري حقونه تر پښو لاندې دي.

ده ویلي، دا مهال د نړۍ په کچه اقلیمي بدلون او نوې ټکنالوجۍ ،چې تر ډېره د خلکو شخصي ژوند ګواښي، نړۍ ته لویې ننګونې دي.

ګوتیریش د نړۍ له هېوادونو وغوښتل چې خپلې اقتصادي هڅې تر ډېره په بشري حقونو وڅرخوي.

چین کې د کرونا وایروس له امله ۱۵۰ نور کسان مړه شوي

په چین کې یو روغتیايي مرکز

د چین د روغتیا ملي کمېسیون، په دغه هېواد کې په کرونا وایروس د ۱۵۰ نورو کسانو د مړینې خبر ورکړی دی.

دغه کمېسیون ویلي، په دغه وایروس تازه ۴۰۹ نور کسان اخته شوي دي.

له دې سره په چین کې په دغه وایروس د اخته شویو کسانو شمېر ۷۷۱۵۰ ته ورسېد او د مړو شویو شمېر ۲۵۹۲ ته پورته شو.

له چین وروسته ایران هغه هېواد دی چې د کرونا وایروس له امله د مړینې لوړه شمېره لري.

د ایران ایسنا نیمه دولتي خبري اژانس ویلي، دغه هېواد کې کرونا وایروس ۵۰ تنه مړه کړي، خو د دغه هېواد د روغتیا وزارت یوازې د ۱۲ کسانو مړېنه تأیيد کړې ده.

افغانستان، پاکستان، ترکیې او ارمنستان له ایران سره خپلې پولې تړلې دي.

ډونالد ټرمپ د هند احمد اباد ښار ته رسېدلی

ولسمشر ټرمپ او د هند صدراعظم نرېندرا مودي

د امریکا ولسمشر ډونالد ټرمپ د هند لوېدیځ کې پراته احمد اباد ښار ته رسېدلی دی.

هند چې د نړۍ په کچه پنځم لوی اقتصادي هېواد دی، د امریکا د ولسمشر ډونالد ټرمپ او د هغه د مېرمنې ملانیا ټرمپ کوربه دی.

ښاغلی ټرمپ او د هند صدراعظم نرېندرا مودي د هند په یوه ستډیوم کې چې د نړۍ په کچه دوهم لوی ستډیوم دی، د یو لکو کسانو غونډې ته وینا وکړه.

ټرمپ وویل: "هند به ډېر ژر د نړۍ په کچه د متوسطې طبقې تر ټولو لوی میشت ځای شي، اټکل دا دی چې هند کې به بې وزلي په نژدې لس کلنه موده کې په بشپړ ډول له منځه ولاړه شي."

له دې وینا وروسته به ښاغلی ټرمپ او مېرمن‌یې د هند شمال کې تاج محل ماڼۍ ته روان شوي دي.

ټرمپ به هند کې د خپل ۳۶ ساعته سفر پر مهال له دغه هېواد سره د پوځي هليکوپټرو او ممکن د میزائیلو د دفاعي سیستم د پلور تړون چې څو میلیارده ډالره ارزښت لري، اعلان کړي.

'فلسطیني تندلارو پر اسرائیل ۲۰ راکټونه توغولي'

دا په وروستیو څو میاشتو کې د اسرائیل په خاوره تر ټولو سختې حملې یادې شوي.

د اسرائیل پوځ ویلي فلسطیني تُندلارو پرون د اسرائیل پر جنوب شااوخوا ۲۰ راکټونه توغولي دي.

د اسرائیل پوځ زیاته کړې تُندلارو وروسته له هغه دا کار کړی چې سرتېرو یې د اسرائیل غزې سرحدي دېوال ته نږدې یو مشکوک کس چې غوښتل‌یې بم کېږدي، هدف وګرځاوه.

پرته له دې چې د فلسطیني تُندلارو له‌خوا د توغول شویو راکټونو له امله د مرګ‌ژوبلو جزئیات خپور شي د اسرائیل پوځ ویلي چې ۱۰ راکټونه‌یې په هوا کې د راکټ ضد سیستم په واسطه شنډ کړي دي.

دا په وروستیو څو میاشتو کې د اسرائیل په خاوره تر ټولو سختې حملې یادې شوي.

د ایران په پارلماني ټاکنو کې د تهران ۳۰ واړه څوکۍ تندلارو ګټلي

ایران کې د رأی ورکونې یو محل.

د ایران په پارلماني ټاکنو کې د تهران د برخې ۳۰ واړه څوکۍ تُندلارو کاندیدانو ګټلې دي.

د ایران د ۲۹۰ پارلماني څوکیو ټاکنې جمعه وشوې چې په‌کې اکثر کاندیدان د رژیم په تېره بیا د ایران د رهبر ایت‌الله علي خامنه‌اي له ملاتړ برخه‌من و.

د ایران د کورنیو چارو وزیر عبدالرضا فضلي پرون وویل د هغو خلکو له ډلې چې د رأی ورکولو په شرایطو برابر و ۴۳ فیصدو یې رایه ورکړې او دا له اسلامي انقلاب ۱۹۷۹ راوروسته په ټاکنو کې د خلکو تر ټولو کم ګډون و.

فضلي د ایران شته ستونزو ته په پام په ټاکنو کې بیا هم د خلکو ګډون مناسب وباله.

هغه زیاته کړه: "موږ په کوم حالت کې چې دا انتخابات ترسره کړل په هېواد کې مو ډېرې پېښې شوي. په دې ورځو کې مو اقلیمي شرایط نامناسبه و، د کرونا وایروس بحث هم مطرح و."

په ایران کې په ټاکنو باندې د خلکو بې‌باوري د دې لامل شوې چې ډېر کم شمېر خلک رایه ورکړي.

زرګونه اصلاح غوښتونکي او منځلاري سږ کال پارلماني ټاکنو ته له کاندیداتورۍ منع کړای شوي و.

خلک تېر لړم میاشت کې د مظاهرو پر مهال د رژیم او رژیم‌پلوه ځواکونو له‌خوا د ملکیانو د وژلو، اقتصادي فشارونو او د رژيم د سرسخته چلند په خاطر په ټاکنو کې کم ګډون کړی و.

له چین وروسته ایران د کرونا وایروس له امله د وژل شویو ډېر شمېر لري

په ایران کې د کرونا وایروس د پېښو په زیاتېدو د دغه هېواد لرې او نږدې ګاونډیانو د خلکو په تګ راتګ بندیزونه لګولي.

له چین بهر د کرونا وایروس له امله د وژل شویو کسانو تر ټولو لوړ شمېر په ایران کې ثبت شوی.

اته ایرانیان د دې وایروس له لاسه مړه شوي.

د ایران د روغتیا وزارت ویاند کیانوش جهانپور پرون د دغه هېواد دولتي ټلوېزیون ته وویل چې په کرونا وایروس باندې د اخته خلکو شمېر په ایران کې ۴۳ ته رسېدلی او په ۷۹۰ تنو نورو کسانو شک دی چې وایروس به نیولي وي.

په ایران کې د کرونا وایروس د پېښو په زیاتېدو د دغه هېواد لیرې او نږدې ګاونډیانو د خلکو په تګ راتګ بندیزونه لګولي.

افغانستان، پاکستان، ارمنستان له ایران سره خپلې پولې تړلي او ترکیې، اردن، عراق او ځینو نورو هېوادونو هم له ایرانه د مسافرو په تګ راتګ بندیزونه لګولي دي.

کرونا وایروس چې له چین څخه نورې نړۍ ته خپور شوی تر اوسه ۲۳۰۰ کسان وژلی او پرې د اخته خلکو شمېر ۷۹ زره کسانو ته رسېدلی دی.

'اسلامي همکارۍ سازمان' افغانستان کې د تاوتریخوالي د کمښت هرکلی وکړ

ارشیف، په بنګله‌دېش کې د اسلامي همکارۍ سازمان د بهرنیو چارو وزیرانو یوه غونډه.

د اسلامي همکارۍ سازمان "او ای سي" په افغانستان کې د تاوتریخوالي د کمښت له پیله هرکلی کړی دی.

د دغه سازمان په اعلامیه کې چې پرون یکشنبه خپره شوې راغلي د امریکا او طالبانو ترمنځ د تاوتریخوالي د کمښت موافقه چې د افغان حکومت په مشوره شوې په افغانستان کې به د با ثباته سولې د راتلو لپاره لار هواره کړي.

د اسلامي همکارۍ سازمان سکرتر جنرال ډاکتر یوسف بن احمد العثیمین ویلي چې د افغانستان د سولې له پروسې سره هرې ممکنه مرستې ته چمتو دی.

د دغه سازمان په نوښت تېر ۲۰۱۹ او وړم ۲۰۱۸ میلادي کال د سعودي عربستان په مکه ښار کې د اسلامي نړۍ د عالمانو کنفرانسونه نیول شوي و چې په‌کې د افغان جګړې په بندېدو ټینګار وشو.

ټرمپ: که طالبان په خپله ژمنه عمل وکړي تړون به ورسره لاسلیک شي

د امریکا ولسمشر ډونالد ټرمپ

د امریکا ولسمشر ډونالد ټرمپ ویلي که د تاوتریخوالي د کمښت موده سمه کار ورکړي له طالبانو سره به تړون لاسلیک شي.

هغه ویلي خپل نوم به د دې تړون لاندې ولیکي.

ټرمپ یکشنبه هند ته تر سفر مخکې د ګڼو نورو موضوع‌ګانو ترڅنګ د افغانستان په اړه هم د خبریالانو پوښتنې ځواب کړې او له طالبانو سره د تړون یادونه‌یې وکړه.

ښاغلي ټرمپ وویل چې طالبان له جګړو ستړي دي، تړون غواړي او امریکا هم د تړون په لټه کې ده.

د تاوتریخوالي د کمښت ۷ ورځنۍ پروسه له شنبې پيل شوې او نن‌یې درېیمه ورځ ده.

طالبانو ژمنه کړې چې په دې موده کې خپل بریدونه د پام وړ کموي.

د کورنیو چارو وزارت ویلي چې شنبه او یکشنبه طالبانو په ارزګان، کندهار، بلخ، هلمند او کاپیسا کې پر افغان پوځیانو بریدونه کړي چې په‌کې پنځه افغان عسکر وژل شوي دي.

ایران کې د کرونا ویروس له امله د مړو شمېر ۸ کسانو ته ورسېد

د ايران د روغتيا وزارت پرون ويلي وو، چې په دغه هېواد کې د کرونا ويروس ٧٨٥ مشکوکې پېښې شته.

ايراني چارواکو په وژونکي ويروس کرونا د دوو نورو کسانو د مړينې خبر ورکړ، چې په دغه هېواد کې ورسره د مړو شمېر ٨ ته ورسېد.

دا له چين څخه بهر په دې ويروس چې رسماً کاويډ-١٩ بلل کېږي، د خلکو د مړينې تر ټولو لوړ شمېر ګڼل شوى دى.

د روغتيا وزارت وياند کيانوش جهانپور نن په دولتي ټلويزيون کې په خبرو کې وويل، په ايران کې په کرونا ويروس ١٥ نور کسان هم اخته شوي، چې ورسره دغه شمېر ٤٣ ته ورسېد.

تر دې مخکې د مازندران ولايت د طبي علومو د پوهنتون رئيس عباس موسوي ويلي وو، په مړو کې هغه شخص هم شامل دى، چې په وروستيو کې له تهران څخه د مازندران ولايت مرکز تُنکابن ته په سفر تللى و.

د ايران د روغتيا وزارت پرون ويلي وو، چې په دغه هېواد کې د کرونا ويروس ٧٨٥ مشکوکې پېښې شته.

په چين کې چې اول دغه ويروس په کې خپور شو، تر اوسه تر ٢٣٠٠ زيات کسان مړه شوي دي.

نور راوښيه

XS
SM
MD
LG