- واشنګټن پوسټ
واشنګټن پوسټ ورځپاڼې په کابل کې د روحاني شخصیت مولوي سمیع الله ریحان د ترور په اړه يو مطلب خپور کړی او لیکي چې د دې مخکښ دیني عالم وژنې افغانانو ته سخت ټکان ورکړ.
مولوي ریحان د جمعې په ورځ د کابل د نهمې ناحیې په التقوی جومات کې د جمعې د لمانځه پر مهال په منبر کې د ایښودل شویو چاودېدونکو موادو په چاودنه کې ووژل شو.
د مطلب لیکواله- پامېلا کانسټیبل «Pamela Constable» لیکي چې دې پېښې په افغانستان کې د ملګرو ملتونو مرستندویه دفتر یا یوناما دې ته اړ کړ چې د روژې په مبارکه میاشت کې د ملکي وګړو مرګ ژوبله وغندي.
لیکواله زیاتوي، مولوي ریحان یو څېړونکی و چې پر ټلوېزیون به راڅرګندېده او په خپلو خبرو کې به یې تشدد د اسلام ضد عمل په توګه غانده.
واشنګټن پوسټ زیاتوي دا چاودنه د تشدد د هغې څپې دوام دی چې په ترڅ کې یې ملکي وګړي او افغان امنیتي ځواکونه په نښه کېږي، خو د ریحان وژنه د ورځپاڼې په وینا اکثرو افغانانو ته چې د ترور او تشدد پر وړاندې یې د ده د دریځ ستایه، له شخصي پلوه ټکان ورکړی دی.
په مطلب کې د افغان حکومت د اجرائیه ریاست د پخواني ویاند جاوېد فیصل له قوله لیکل شوي دي چې نوموړی وايي، مولوي ریحان د افراطیت، نه زغم او د تروریستي ډلو لهخوا د اسلام له نامه د ناوړه استفادې پر وړاندې په زړورتیا سره ولاړ و.
د یادونې وړ ده چې پر دیني عالمانو د حملو په لړۍ کې د یکشنبې په ورځ هم د مولوي شبیر احمد کاموي په نوم دیني عالم په کابل کې د وسلهوالو کسانو په ډزو ووژل شو.
- ټیلیګراف
د لندن چاپ ټیلیګراف ورځپاڼې د یوې جلا مسئلې په اړه یو مطلب خپور کړی.
ټاکل شوې چې د افغانستان د کرکټ ملي لوبډله نن دوشنبې د انګلستان له لوبډلې سره د لوبې ډګر ته ووځي.
دا لوبه د کرکټ د نړیوال جام د لوبو په درشل کې چې د را روانې اوونۍ د شنبې په ورځ په انګلستان او ولز کې پیلېږي پلان شوې ده.
ټیلیګراف لیکي:
انګلستان باید د نړیوال جام په تمریناتي لوبو کې د افغانستان د بېباکه هجوم پر وړاندې هوښیار وي.
ورځپاڼه زیاتوي ټول ټیمونه خو په تېره د انګلستان ټیم به د افغان لوبډلې د ځانګړي سټایل پر وړاندې د مقابلې پرمهال کمزورتیاوې ولري، ځکه د انګلستان څو لوبغاړي ټپیان دي او خپله دوهمه تمریناتي لوبه به په ټول ځواک ونهشي کړای.
ټیلیګراف د افغانستان او پاکستان ترمنځ وروستۍ لوبې ته چې افغانستان په ښه توپیر وګټله اشاره کوي او لیکي چې د پاکستان بریا په ۱۹۹۲ میلادي کال کې د اوسني صدراعظم عمران خان د کپټانۍ پر مهال چې د کرکټ نړیوال جام یې وګاټه، د سپورت د کلتور یوه برخه ده، خو له افغانستان پرته بل هېڅ یو هېواد نشته چې په دومره لنډ وخت کې مستقیماً دې ځای ته رسېدلی وي.