تازه خبر
شنبه ۳۰ لړم ۱۴۰۵ کابل ۱۱:۴۱

نړۍ

کېم جونګ اون به ډېر ژر روسیې ته سفر وکړي

د شمالي کوریا مشر کېم جونګ اون «ښی» او د روسیې ولسمشر پوتین
د شمالي کوریا مشر کېم جونګ اون «ښی» او د روسیې ولسمشر پوتین

شمالي کوریا نن د سې شنبې په ورځ تأیید کړه چې د دې هېواد رهبر کېم جونګ اون به ډېر ژر روسیې ته سفر وکړي.

د شمالي کوریا خبري اژانس «KCNA» راپور ورکړی چې کېم ته د مسکو د سفر بلنه د روسیې ولسمشر ولادیمیر پوتین ورکړې ده، خو اژانس‌یې دقیقه نېټه نه‌ده ښودلې.

راپور زیاتوي چې کېم او پوتین به د دې سفر پر مهال خبرې وکړي.

کرملېن د پنجشنبې په ورځ پر خپله وېب‌پاڼه خبر ورکړ چې کېم به د روانې اپرېل میاشتې په دوهمه نیمايي کې مسکو ته سفر وکړي.

د دې سفر خبر په‌داسې حال کې ورکول کېږي چې د امریکا حکومت د کوریا په ټاپو وزمه کې د اټمي وسلو د کړکېچ د ختمولو لپاره له پیونګ یانګ سره د یوې معاملې هڅه کوي.

د ټرمپ او شمالي کوریا د مشر دوه مخکېنۍ سرمشریزې بې‌نتیجې پای ته ورسېدې.

د ورځې تازه خبرونه دلته ولولئ

عراقچي: ایران لا هم له امریکا سره د دیپلوماسۍ له لارې د هوکړې هیله لري

د ایران د بهرنیو چارو وزیر عباس عراقچي وايي، تهران لا هم هیله لري چې له امریکا سره د دیپلوماسۍ له لارې یوې هوکړې ته ورسېږي او د بلې جګړې مخه ونیسي.

دا په داسې حال کې ده چې د امریکا ولسمشر ډونالډ ټرمپ د ایران د هوکړې لپاره وړاندې کړي شرطونه د منلو وړ نه بولي.

عراقچي له «ایران» ورځپاڼې سره په مرکه کې، چې د شنبې په ورځ د نومبر په ۲۱مه خپره شوې، د دواړو هېوادونو ترمنځ اوسنی «نه جګړه، نه سوله» حالت نامطلوب بللی او ویلي یې دي چې تهران یوه «ښه، باعزته او له عزته ډکه» هوکړه غواړي.

هغه ویلي، ایران د خبرو له پیل مخکې له امریکا غواړي چې د هوکړې لپاره خپل چمتووالی په څرګنده اعلان کړي او د باور جوړولو لپاره عملي ګامونه واخلي.

د عراقچي په وینا، د ایران دوه ورځنی وړاندیز لا هم پر خپل ځای دی. د دغه وړاندیز له مخې، امریکا باید لومړی د تهران غوښتنې ومني او خپلو ژمنو ته ژمنه پاتې شي؛ وروسته به ایران هرمز تنګی پرانیزي او خبرې به پیل شي.

عراقچي له ایران څخه د غني شویو یورانیمو د زېرمو ایستل د تهران سره کرښه بللې، خو ویلي یې دي چې د دغو زېرمو د برخلیک په اړه عادلانه حل ته رسېدل ممکن دي.

په مقابل کې، ډونالډ ټرمپ د جمعې په ورځ ویلي، ایران هوکړه غواړي، خو داسې هوکړه نه غواړي چې د ده په وینا، د امریکا لپاره د منلو وړ وي.

دا څرګندونې په داسې حال کې کېږي چې د سیمې د منځګړو هېوادونو هڅې روانې دي، څو کړکېچ راکم او د ایران او امریکا ترمنځ جګړه پای ته ورسوي.

د عراق په یوه برېښناکوټ کې اورلګېدنې څلور کسان وژلي او ۳۰ نور یې ټپیان کړي دي

امنیتي چارواکو د شنبې په ورځ وویل چې د عراق په جنوب کې په یوه برېښناکوټ کې د اورلګېدو له امله لږ تر لږه څلور کسان مړه شوي او ۳۰ نور ټپیان دي. د چارواکو په وینا، ښايي د قربانیانو شمېر لوړ شي.

رویټرز خبري اژانس د عراق د دولتي خبري اژانس (INA) په حواله راپور ورکړی چې د اور وژونکو ډلو له رسېدو وروسته د ملکي دفاع ځواکونو د بصرې ښار په شمال کې د حرثه برېښناکوټ اور تر کنټرول لاندې راوستی دی.

امنیتي چارواکي وايي، اور نژدې کورونو ته هم غځېدلی او د برېښناکوټ فعالیت یې درولی دی.

تر اوسه د اورلګېدو د علت او د اوښتو زیانونو په اړه رسمي معلومات نه دي خپاره شوي.

د عراق د برېښنا تاسیسات له اوږدې مودې راهیسې له ستونزو سره مخ دي. په تېرو څو لسیزو کې د پانګونې کموالی، د برېښناکوټونو او نورو تاسیساتو ناسمه ساتنه او د برېښنا د ډېر مصرف پر مهال د خلکو د اړتیاوو نه پوره کول د دغه هېواد د برېښنا له مهمو ستونزو څخه دي.

د امریکا د خزانې وزیر: ټرمپ له روسیې او چین سره د ایران د اتومي وسلو د مخنیوي په اړه هوکړې ته رسېدلی

سکاټ بسنټ
سکاټ بسنټ

د امریکا د خزانې وزیر سکاټ بسنت وايي، ولسمشر ډونالډ ټرمپ په چین کې د روسیې او چین له مشرانو سره په وروستیو لیدنو کې د اتومي وسلو له ترلاسه کولو څخه د ایران د راګرځولو او د هرمز تنګي له لارې د بېړیو د تګ راتګ د ازادۍ د تضمین پر سر له هغوی سره ګډ نظر ته رسېدلی دی.

بسنت د جمعې په ورځ، د نومبر په ۲۰مه، له سي‌اېن‌بي‌سي شبکې سره په مرکه کې وویل چې امریکا، روسیه او چین په دغو دوو موضوعاتو کې یو له بل سره موافق دي.

دا دا څرګندونې یوه ورځ وروسته له دې وکړې چې د امریکا، روسیې او چین مشرانو د نومبر په ۱۹مه په چین کې په درې‌اړخیزه غونډه کې د «سولې اعلامیې» پر سر هوکړه وکړه؛ خو په دې سند کې د ایران د جګړې د پای ته رسولو لپاره کومه مشخصه ژمنه نه وه شوې.

د امریکا د خزانې وزیر په دې مرکه کې د ایران پر وړاندې د واشنګټن اقتصادي فشارونه د یوه هېواد د اقتصادي انزوا په تاریخ کې تر ټولو لوی کمپاین بللی او ویلي یې دي چې امریکا به د ایران د سپاه پاسداران پر ضد فشارونو ته دوام ورکړي، څو له واشنګټن سره هوکړې ته غاړه کېږدي.

بسنت دا هم ویلي چې د امریکا د سمندري کلابندۍ په پایله کې اوس د ایران د اومو تېلو هېڅ بار په سمندر کې نه دی پاتې او بهرني پېرودونکي د ایران تېلو ته لاسرسی نه لري.

د «وژونکو روباټونو» د کنټرول پر سر د ملګرو ملتونو خبرې بې له لازم الاجرا هوکړې پای ته ورسېدې

د ملګرو ملتونو په کوربه‌توب په جینیوا کې د خپلواکو وسلو، چې د «وژونکو روباټونو» په نوم هم یادېږي، د کنټرول په اړه خبرې په دې هوکړه پای ته ورسېدې چې د ۲۰۲۸ کال تر پایه به نوي مقررات جوړېږي او خبرې به دوام کوي.

د امریکا، روسیې او اسراییل مخالفت د داسې یوې هوکړې مخه ونیوله چې د راتلونکو مقرراتو د عملي کېدو لپاره الزامي چوکاټ رامنځته کړي.

دا وسلې د دې وړتیا لري چې د انسان له لږې لاسوهنې یا مستقیمې څارنې پرته، هدفونه وپېژني او پرې برید وکړي. شاوخوا ۱۰۰ هېوادونو د دغو وسلو د کنټرول لپاره د الزامي قوانینو غوښتنه کړې وه.

د اوکراین، سوډان او منځني ختیځ په جګړو کې د خپلواکو وسلو د کارونې زیاتېدو د ملکي وګړو د خوندیتوب په اړه اندېښنې ډېرې کړې دي. د بشري حقونو ډلو خبرداری ورکړی چې د لازم الاجرا قوانینو په جوړولو کې ځنډ د ملکي وګړو ژوند له خطر سره مخ کوي.

د ملګرو ملتونو په عمومي غونډه کې تېره میاشت ۱۶۳ هېوادونو د خپلواکو وسلو په اړه د قانون جوړولو لپاره د خبرو اترو د اړتیا په تړاو پرېکړه‌لیک ته مثبته رایه ورکړې وه. امریکا، روسیې، بیلاروس، اسراییل او شمالي کوریا ورسره مخالفت کړی و.

یونسیف: سږ کال په اوکراین کې تر ۱۱۰۰ ډېرو ماشومانو ته مرګ ژوبله اوښتې

د ملګرو ملتونو د ماشومانو د ملاتړ ادارې (یونیسف) د جمعې په ورځ، د نومبر په ۲۰مه، اعلان وکړ چې د ۲۰۲۶ کال په لومړیو لسو میاشتو کې د اوکراین په جګړه کې لږ تر لږه ۱۱۴۴ ماشومان وژل شوي یا ټپیان شوي دي.

دا په تېرو څه باندې درېیو کلونو کې د ماشومانو د مرګ‌ژوبلې تر ټولو لوړه شمېره ده.

د یونیسف د شمېرو له مخې، د روان کال د جنورۍ له لومړۍ نېټې د اکتوبر تر پایه په اوکراین کې لږ تر لږه ۱۱۴ ماشومان وژل شوي او ۱۰۳۰ نور ټپیان شوي دي. په دې توګه، هره ورځ په منځني ډول له درېیو ډېر ماشومان د بریدونو قرباني شوي دي.

د یونیسف ویاندې، لوییز واټریج، چې له کییف څخه یې په جینیوا کې له خبریالانو سره خبرې کولې، وویل چې د روان کال په لومړیو لسو میاشتو کې د وژل شویو ماشومانو شمېر د ۲۰۲۵ کال په ټول وخت کې د وژل شویو ماشومانو پرتله څه باندې ۲۰ سلنه لوړ دی. د هغې په وینا، د ټپیانو شمېر هم نژدې ۶۰ سلنه زیات شوی دی.

دا شمېرې یوازې هغه پېښې رانغاړي چې په اوکراین کې د ملګرو ملتونو د څارنې ډلې تایید کړې دي؛ خو د ماشومانو د مرګ‌ژوبلې اصلي شمېر ښايي تر دې لوړ وي.

د یونیسف په وینا، یوازې د اکتوبر په میاشت کې د اوکراین په بېلابېلو سیمو کې لږ تر لږه ۱۴۶ ماشومان وژل شوي یا ټپیان شوي دي. دا شمېر د تېر کال د همدې میاشتې پرتله ۱۵۰ سلنه زیاتوالی ښيي.

پوتین د امریکا او چین له ولسمشرانو سره له غونډې وروسته تاجکستان ته ورسېد

د روسيې ولسمشر ولادیمیر پوتین او د تاجکستان ولسمشر امام علي رحمان
د روسيې ولسمشر ولادیمیر پوتین او د تاجکستان ولسمشر امام علي رحمان

د روسيې ولسمشر ولادیمیر پوتین چین کې د امریکا او چین له ولسمشرانو سره له درې اړخیزې غونډې وروسته د جمعې په شپه د تاجکستان پلازمېنه دوشنبې ته ورسېده او ولسمشر امام علي رحمان‌یې په هوايي ډګر کې هرکلی وکړ.

د انترفاکس د خبري اژانس د راپور په اساس، پوتین د پنجشنبې په ورځ وویل چې د تاجکستان ولسمشر امام علي رحمان سره د افغانستان په اړه د مسکو او دوشنبې د همکاریو په هکله خبرې کوي.

د روسیې ولسشمر ویلادیمیر پوتین دا هم ویلي چې د تاجکستان ولسمشر ته د کابل څخه د روسیې د مرستیال صدراعظم الیکسي اورچوک د وروستۍ لیدنې د نتایجو په هکله هم معلومات ورکوي.

الیکسي اورچوک د یوه روسي پلاوي په مشرۍ د لړم په ۲۱مه کابل ته ورسېده او افغانستان کې د طالبانو حکومت وویل چې د سفر په ترځ کې د افغانستان او د روسیې د خصوصي سکټورونو ترمنځ د ۱۰۳ میلیونه ډالرو په ارزښت ۱۵ هوکړه‌لیکونه لاسلیک شول.

د افغانانو د «ټي‌پي‌اېس» تازه لایحې د کانګرس د ۱۴۴ غړو ملاتړ ترلاسه کړ

ارشیف، د امریکا کانګرس استازو جرګه
ارشیف، د امریکا کانګرس استازو جرګه

امریکا کې د افغان کډوالو د ملاتړ سازمان (افغان‌ایوک) په خپل وېب‌سایټ لیکلي دي چې تر اوسه د استازو د جرګې ۱۴۴ غړو د افغان کډوالو د مؤقتي خونديتوب وضعیت (ټي‌پي‌اېس) د احیا د لایحې ملاتړ کړی دی.

د «افغانستان ټي‌پي‌اېس اکت ۲۰۲۶» په نوم د قانون دا لایحه چې ورباندې د رأی اخیستنې لپاره په غوښتنلیک باندې د کانګرس د دواړو ګوندونو غړو استازو لاسلیکونه کړي، امریکا څخه د افغان کډوالو د ایستلو د مخنیوي په هدف مطرح شوی دی.

په کانګرس کې د قانون په دې لایحه رأی‌ګیری د ۲۱۸ غړو لاسلیک ته اړتیا لري.

دا لایحه وروسته له هغې مطرح شوه چې راپورونو وویل د امریکا حکومت پلان درلوده چې لږ تر لږه ۱۵۰ افغانان د پاکستان له لارې افغانستان ته ډيپورت کړي، خو وروسته دا پلان وځنډېد.

امریکا کې د افغان کډوالو لپاره د «ټي‌پي‌اېس» پخوانی منل شوی امتیاز د ۲۰۲۵ کال د جولای په ۱۴مه لغوه شو.

د عربستان په مشرۍ پوځي ائتلاف پر جازان ولایت د بالستیک توغندیو برید شنډ کړ

ارشیف، د سعودي عربستان د پوځي ائتلاف تر ملاتړ لاندې ځواکونه
ارشیف، د سعودي عربستان د پوځي ائتلاف تر ملاتړ لاندې ځواکونه

د سعودي عربستان په مشرۍ پوځي ائتلاف د جمعې په ورځ وویل چې دافع هوا ځواکونو یې د هغو دوه بالستیک توغندیو مخه ونیوله او له منځه‌یې یوړل چې د یمن د حوثیانو له‌خوا د سعودي عربستان په جنوب کې د جازان ولایت په لور توغول شوي و.

ائتلاف زیاتوي چې د توغندیو ټوټې د الشقیق په سیمه راپرېوتې او مسئول کسان د وضعیت په وړاندې غبرګون لپاره لاس په کار شوي، خو د مرګ‌ژوبلې په هکله‌یې څه ونه‌ویل.

د یمن حوثیانو چې د ایران له ملاتړه برخه‌من دی مخکې ګواښ کړی و چې په دې سیمه کې د انرژي تأسیسات په نښه کوي، خو دا نه‌ده څرګنده شوې چې دغو تأسیساتو ته زیان اوښتی کنه.

ائتلاف مخکې ویلي و چې د حوثیانو د امکاناتو د له منځه وړنې لپاره‌یې د سره سمندرګي په غاړه د حدیده په بندر برید کړی دی.

د ریاض تر ټولو لوړه اسمانڅوکې ودانۍ د حوثیانو په راکټي برید کې زیانمنه شوې

د سعودي عربستان د عامه پانګونې صندوق د دفتر په ګډون د ریاض تر ټولو پر لوړه اسمانڅوکې د پنجشنبې په ورځ، د نومبر په ۱۹مه، د یمن د حوثیانو له لوري راکټي برید شوی او د ودانۍ ځینې برخې او شاوخوا ودانۍ زیانمنې شوې دي.

د سعودي عربستان د ملکي دفاع ادارې ویلي، دې برید د ریاض په مالي مرکز کې د یوې لوړې ودانۍ څو پوړونو ته زیان اړولی، خو د مرګ‌ژوبلې یا ټپي کېدو راپور نه دی ورکړل شوی.

که څه هم سعودي چارواکو د ودانۍ نوم نه دی اعلان کړی، خو د دغه هېواد د رسمي خبري اژانس له لوري په خپره کړې ویډیو کې د عامه پانګونې صندوق ودانۍ ښکاري چې په «پي‌آی‌اېف» نوم پېژندل کېږي.

د رویټرز خبري اژانس د راپور له مخې، د چاودنې زور د ودانۍ د اوو یا اتو پوړونو ښیښې ماتې کړې بهرنۍ برخې یې زیانمنې کړې دي.

حوثیانو ویلي چې د پنجشنبې په ورځ یې دوه ځله د ریاض مالي مرکز په نښه کړی؛ یو ځل سهار او بل ځل ماښام.

دې ډلې همداراز د ریاض د ملک خالد پر نړیوال هوايي ډګر، د سعودي عربستان په جنوب کې د خمیس مشیط پر هوايي اډې او د جبیل ښار پر «صدف» پتروشیمي شرکت د بریدونو ادعا هم کړې ده. سعودي چارواکو تر اوسه دغه ادعاوې نه دي تایید کړې.

د سعودي عربستان د بهرنیو چارو وزارت د دغو بریدونو په غبرګون کې ویلي، دا هېواد د خپلې ځمکنۍ بشپړتیا، د وګړو او ملي شتمنیو د ساتنې لپاره د «ټولو لازمو اقداماتو» د ترسره کولو حق ځان ته خوندي بولي.

پاکستان کې د ګازو لېږدوونکي موټر سره د یوه بس ټکر ۱۰ کسان وژلي

ارشیف، په پاکستان کې په یوه ټرافیکي پېښه کې وژل شوي کسان
ارشیف، په پاکستان کې په یوه ټرافیکي پېښه کې وژل شوي کسان

د پاکستان پولیسو د پنجشنبې په ورځ وویل، د بلوچستان په ایالت کې د مایع ګازو لېږدوونکي موټر سره د یوه مسافر وړونکي بس د ټکر له امله، د درېیو ماشومانو په ګډون ۱۰ کسان مړه شوي دي.

دا پېښه د چهارشنبې په ورځ «د لړم په ۲۷مه» د اورمارې ښارګوټي ته نږدې شوې ده.

بس چې له تربت څخه کراچۍ ته روان و، تر ټکر وروسته‌یې اور واخیست.

د فرانسې خبري اژانس د ځايي پولیسو له قوله راپور ورکړ چې د بس اته سپرلۍ او د بار وړونکي موټر دوه سپرلۍ مړه شوي دي.

لومړنۍ څېړنې ښيي چې بار وړونکی موټر د سړک پر خلاف لوري روان و.

د پېښې ۲۷ ټپیان د درملنې لپاره روغتون ته لېږدول شوي دي.

نور راوښيه

XS
SM
MD
LG