واشنګتن پُسټ:
"د افغان مشرانو او طالب اورپکو ترمنځ خبرې لغوه شوې" واشنګتن پُسټ ورځپاڼې په همدې عنوان یوه مقاله لیکلې ده.
تمه وه چې د جمعې په ورځ د افغانستان د دوه نیم سوه کسیزه پلاوي او طالبانو یوه ناسته په دوحه کې پيل شي.
د واشنګتن پُسټ د یادې مقالې لیکوال د دوحې د ناستې لغوه کېدل د امریکا متحده ایالتونو په مشرۍ د سولې په بهیر کې یو لوی شاتګ بللی دی.
د دوحې د ناستې په لغوه کېدو د افغان سولې لپاره د امریکا خاص استازي زلمي خلیلزاد خواشیني ښودلې.
امریکا هڅه کوي چې د افغانستان اتلس کلنه جګړه پای ته ورسوي.
د مطلب په دوام کې لولو چې تر اوسه معلومه نه ده چې څه وخت به بیا داسې خبرې پلان شي، خو لیکوال زیاته کړې چې په نږدې راتلونکې کې یې د ترسره کېدو احتمال نه تر سترګو کېږي.
د واشنګتن پُسټ ورځپاڼې وړاندې لیکلي چې طالبانو تر اوسه له افغان حکومت سره مستقیمې خبرې رد کړي او دا موضوع په یو ډول د سولې د بهیر د ناکامۍ سبب شوې.
ورځپاڼې لیکلي چې افغان حکومت په یوه اعلامیه کې د قطر حکومت د دوحې د پلان شوې ناستې په لغوه کولو ملامت کړی دی.
د قطر د ناستې تنظیموونکو ویلي چې د ناستې په محتوا نه، بلکې د پلاوي د شمېر په اړه د بحثونو دوام ته ضرورت دی.
طالبانو بیا افغان حکومت تورن کړی چې غوښتل یې دا ناسته له یادې ډلې سره په خبرو بدله کړي.
نېشنل:
د متحده عربي اماراتو نېشنل ورځپاڼې هم د قطر د ناستې په لغوه کېدو مقاله لیکلې ده.
په دوام کې راغلي، دا ناسته په وروستیو شېبو کې له کابله د ورتلونکو ګډونوالو د شمېر د زیاتوالي په سبب لغوه شوه.
نېشنل ورځپاڼې لیکلي، دا ناسته په یوه مهم او داسې وخت کې چې لا هم په افغانستان کې وژنې او جنګ دوام لري، لغوه شوې.
د مقالې لیکوال د ملګرو ملتونو د رپوټونو په اساس په ۲۰۱۸ میلادي کال کې د څه باندې ۳۸۰۰ افغان ملکیانو وژل کېدو ته هم اشاره کړې ده.