د بلخ نوی امنیه قوماندان د دغه ولایت د امنیه قوماندانۍ مسؤلانو ته معرفي شو.

عبدالرقیب مبارز، د کورنیو چارو وزارت د یوه جنرال عبدالفتاح فروغ له لوري د امنیه قوماندانۍ مسوولانو ته معرفي شو.

تر دې مخکې د امنیه قوماندانۍ په شاوخوا کې د پخواني امنیه قوماندان د پلویانو او پولیسو ترمنځ نښتې وشوې چې ویل کېږي لږ تر لږه ۱۳ تنه په‌کې ژوبل شوي دي.

د بلخ د ابوعلي سینا روغتون سرطبیب ډاکتر نور محمد فیض ازادي راډیو ته وویل چې په ټپیانو کې ۸ تنه پولیس دي.

له بلې‌خوا د بلخ د ولایتي شورا غړیو نن په‌داسې حال کې چې د پولیسو او غیر مسؤلو وسله‌والو ترمنځ نښته روانه وه، په یوه خبري غونډه کې د جګړې د پای ته رسېدو غوښتنه وکړه.

د ولایتي شورا رئیس افضل حدید وویل چې باید د بلخ د امنیه قوماندان د تبدیلی پر سر له زغمه کار واخېستل شي.

ده وویل چې بلخ د نوي کال د مېلې په درشل کې دی او ټاکل شوې ده چې زرګونه مېلمانه ورته راشي، نو باید په‌دې وخت کې وضعیت ناکرار نه کړل شي.

له بلې خوا د بلخ پخواني والي عطا محمد نور د مزارشریف جګړه دسیسه بللې او له خلکو غوښتي چې د خپل «حیثیت» او «عزت» د دفاع لپاره راپورته شي.

د کورنیو چارو وزارت نن ازادي راډیو ته وویل چې ۲۵ غیر مسؤل وسله‌وال یې نیولي دي.

په همدې حال کې په بلخ کې د شاهین قول اردو مسؤلان وايي چې د اردو ځواکونه هم د پولیسو او د پخواني امنیه قوماندان د وسله‌والو کسانو ترمنځ په نښته کې د بلخ د نوي امنیه قوماندان په ننګه ښار ته استول شوي دي.

د شاهین قول اردو ویاند حنیف رضايي په‌دې اړه نور جزئیات څرګند نه‌کړل، خو ویې ویل چې د خلکو امنیت ته د لومړیتوب ورکولو په خاطر د اردو ځواکونه میدان ته راوتلي دي.

د ملي اردو هليکوپټرونه هم د مزارشریف ښار دپاسه ګرځي.

شاوخوا ۶۰۰ افغان کډوالو د یکشنبې په ورځ له ایران او پاکستانه بیرته افغانستان ته راستانه شوي دي.

د طالبانو تر واک لاندې د افغانستان ملي راډيو تلویزیون پر خپلې ایکس پاڼې لیکي،"۴۶۵ کډوال د سپین بولدک له لارې له پاکستانه او ۱۰۰ نور کډوال د هرات ولایت د اسلام قلعه بندر له لارې له ایرانه بیرته هېواد ته راستانه شوي دي".

په ایران کې د جګړې له پیل راهیسې په زرهاوو افغانې کورنۍ بیرته افغانستان ته راستنې شوي.

بل پلو، د پاکستان حکومت د پلازمینه اسلام اباد په ګډون د دې هېواد له ټولو ښارونو د افغان کډوالو د ایستلو لړۍ چټکه کړې ده.

افغان کډوال په داسې حال کې له پاکستانه افغانستان ته اخراج کیږي چې لا هم د افغانستان او پاکستان ترمنځ جګړه روانه ده او د تورخم دروازه د هر ډول تګ راتګ پرمخ تړلې ده.

په ننګرهار ولایت کې د وروښتونو له کبله دوه کسان مړه او ۱۲ نور ټپیان شوي دي.

د دغه ولایت د رسنیو دفتر نن دوشنبې په یو بیان کې ویلي،"د ننګرهار په اچين، بهسودو، شينوارو، نازيانو، مومندرې، ګوشتې، سپين غر، پچير اګام او کوټ ولسواليو کې د تېرې شپې د سختو اورښتونو له کبله دوه کسان مړه، ۱۲ تنه ټپیان او ۲۷کورونه تخریب شوي دي".

بل پلو، د طالبانو د حکومت د ټولګټو چارو وزارت وايي چې د سیلابونو د راوتو له کبله د افغانستان یو شمیر مهمې ترانزیتي لارې تړل شوي.

د دې وزارت ویاند محمد اشرف حق شناس نن دوشنبې رسنیو ته ویلي،" د سرپل ــ بلخ او بادغیس ـــ فاریاب ولایتونو ترمنځ لوې لارې بندي دي".

خو د هغه په ټکو، د دغو لارو د خلاصیدو چارې روانې دي.

د راپورونو له مخې، په بادغیس ولایت کې د سیلابونو له کبله پنځه کسان مړه او په زرهاوو جریبه کرنیزې ځمکې ویجاړې شوي.

طالب چارواکو ویلي، په تیرو څو ورځو کې په ۱۳ولایتونو کې د سیلابونو او غره ښویدنه له کبله ۱۷کسان مړه او ۲۶نور ټپیان دي.

د طالبانو د حکومت د ټولګټو چارو وزارت وايي، د سیلابونو د راوتو له کبله د افغانستان یو شمیر مهمې ترانزیتي لارې تړل شوي.

د دې وزارت ویاند محمد اشرف حق شناس نن دوشنبې رسنیو ته ویلي،" د سرپل ـ بلخ او بادغیس ـ فاریاب ولایتونو ترمنځ لوې لارې بندي دي".

خو د هغه په ټکو، د دغو لارو د خلاصیدو چارې روانې دي.

د راپورونو له مخې، په بادغیس ولایت کې د سیلابونو له کبله پنځه کسان مړه او په زرهاوو جریبه کرنیزې ځمکې ویجاړې شوي.

طالب چارواکو ویلي، په تیرو څو ورځو کې په ۱۳ولایتونو کې د سیلابونو او غره ښویدنه له کبله ۱۷کسان مړه او ۲۶نور ټپیان دي.

ټاکل شوې ده چې د هېواد په ۱۵ ولایتونو کې د ۱۴۰۵ هـ. ل کال د کانکور آزموینې لومړی پړاو سږکال بیا هم د نجونو له ګډون پرته د راروانې غويي یا ثور میاشتې په ۲۱مه واخیستل شي.

د طالبانو د حکومت د ازموینو ملي ادارې پرون (یکشنبې د وري په ۹مه) اعلان وکړ چې د کانکور ازموینو دوهم پړاو به د غويي په ۲۸مه، دریم پړاو د غبرګولي په ۱۲مه او د متفرقه ازموینې په ګډون څلورم او وروستی پړاو د غبرګولي په ۲۲مه واخیستل شي.

د افغانستان د لوړو او نیمه لوړو زده کړو په موسسو کې د محصلانو د جذب ظرفیت د سږني کال لپاره ۱۱۱۸۸۵ تنه دی.

دا په داسې حال کې ده چې د لوړو زده کړو د موسسو دروازې لاهم د نجونو او ښځو پرمخ تړلې دي.

د طالبانو د حکومت د لوړو زده کړو وزارت په ۱۴۰۱ هـ. ل کال کې اعلان وکړ چې نجونې او ښځې تر ثانوي خبرتیا پورې په دولتي او خصوصي پوهنتونونو کې د زده کړو اجازه نه لري.

د افغانستان د هواپېژندنې ادارې په ۲۴ ولایتونو کې د سختو بارانونو او سېلونو د راوتلو د احتمال په اړه خبرداری ورکړی دی.

د طالبانو د حکومت د ترانسپورت او ملکي هوايي چلند وزارت د هواپېژندنې ادارې د اټکل له مخې په نورستان، کونړ، لغمان، ننګرهار، کاپیسا، پنجشېر، پروان، بغلان، سمنګان، بلخ، تخار، بدخشان، کندز، کابل، میدان وردګو، پکتیا، پکتیکا، لوګر، خوست، غزني، ارزګان، دایکنډي، بامیان او غور کې نن دوشنبې (د وري ۱۰مه) د درنو بارانونو او ناڅاپي سېلونو د راوتلو امکان شته.

دې ادارې ویلي چې په بېلابېلو سیمو کې به د باران کچه د ۱۰ او ۴۵ میلي مترو ترمنځ وي.

باخترخبري آژانس چې طالبان یې اداره کوي پرون د ورځې ترپایه د هېواد په ځینو ولایتونو کې د بارانونو او سېلابونو په نتیجه کې د نژدې شلو کسانو د مړینې او له دېرشو د زیاتو کسانو د ټپي کېدو خبر ورکړ.

د طالبانو حکومت وايي چې د کونړ ولایت د مرکز اسعدآباد ښار پر ځینو سیمو د پاکستان له لوري د هاوانونو او نورو درنو وسلو په ډزو یو ملکي وګړی وژل شوی او ۱۶ نور کسان ټپیان شوي دي.

د حکومت مرستیال ویاند حمدالله فطرت پرون (یکشنبې د وري ۹مه نېټه) پر خپله ایکس پاڼه په یوه بیان کې لیکلي چې په ټپیانو کې ډېری ښځې او ماشومان شامل دي. ښاغلي فطرت په دې اړه نور جزییات نه دي ورکړي.

پاکستاني چارواکو تراوسه په دې اړه څه نه دي ویلي.

د پاکستان د بهرنیوچارو وزارت د تېرې پنجشنبې په ورځ اعلان وکړ چې د اختر په مناسبت د طالبانو له حکومت سره له موقت اوربند وروسته یې یوځل بیا په افغانستان کې خپل پوځي عملیات پیل کړي دي.

د طالبانو د حکومت د ټولګټو وزارت د افغانستان په یوشمیرولایتونو کې د سیلابونو له امله د لویو لارو د بندیدو خبر ورکوي.

دې وزارت نن یکشنبې د وري په نهمه په خپله ایکسپاڼه کې په یوه بیان کې ویلي چې د سرپل ولایت د کوهستانات، البدر او صیاد ولسوالیو، د بلخ ولایت د چهارکنت ولسوالۍ مسیرونه او د بادغیس – فاریاب عمومي لاره لا هم د سیلابونو د جریان له مله د تګ راتګ پرمخ تړلي دي. د ټولګټو وزارت په وینا د ولایتي ریاستونو تخنیکي او عملیاتي ټیمونه په اغیزمنو سیمو کې د لارو د پاکولو او بیا پرانیستلو چارې مخ ته وړي او تراوسه یې یو شمېر تړلي مسیرونه بېرته د ترافیکو پر مخ پرانیستې دي. دې وزارت د سیلابونو له امله د احتمالي ځاني زیانونو یادونه نده کړې خو له هېوادوالو او موټر چلوونکو څخه یې غوښتنه کړې چې د هوا ترعادې کېدو پورې پر سیلابي مسیرونو له سفر څخه ډډه وکړي. تردې مخکې په بادغیس کې ځایي چارواکو د ورښتونو له امله د پنځو تنو د مړه کیدو خبر ورکړی و.

هغه دوه ټولنیزفعالان چې په هرات کې د طالبانو له خوا نیول شوي و، آزاد شول.

په هرات کې یوې سرچینې آزادي راډیو ته وویل، ټولنیز فعالان قدوس خطیبي او فیاض غوري چې د طالبانو ځایي چارواکو پرون شنبې نیولي و، بیرته خوشې شول. دې سرچینې چې د دغو فعالانو نږدې ملګرې ده او د موضوع د حساسیت له امله یې نه غوښتل هویت یې څرګند شي، وویل چې هغوی د خلکو د حضوري او په ټولنیزو شبکو کې د نورو د هڅو په نتیجه کې ازاد شول. په دې وروستیو کې قدوس خطیب په یوه ویډیويي کلیپ کې او فیاض غوري هم په خپله فیسبوک پاڼه کې په یوه پوسټ کې د نجونو پرزده کړو د طالبانو له خوا د لګول شویو بندیزونو د لیرې کیدو غوښتنه کړې وه.

د طالبانو حکومت تر دې مخکې هم لسګونه ټولنیز او مدني فعالان د نجونو د زده ‌کړو د ملاتړ او یا د هغوی پر پالیسیو د نیوکو له امله نیولي او بندیان کړي دي.

یوشمیرسرچینې په هرات کې د نجونو د زده کړې د دوو ټولنیزو فعالانو د نیول کیدو خبرورکوي.

په هرات کې یوې سرچینې ازادي راډیو ته وویل چې د طالبانو ځایي چارواکو په دې ولایت کې دوه ټولنیزفعالان قدوس خطیبي او فیاض غوري د شنبې په ورځ د وري په اتمه نېټه له غرمې وروسته ونیول.

دې سرچینې، چې د دغو فعالانو نږدې ملګرې ده او د موضوع د حساسیت له امله یې نه غوښتل هویت یې څرګند شي، وویل چې هغوی د نجونو د زده ‌کړو په ملاتړ د ویډیوګانو او پوسټونو د خپرولو له امله نیول شوي دي.

د دې سرچینې په وینا، دا ټولنیز فعالان د هرات د اتمې حوزې په توقیف کې دي او تر شنبې شپې پورې د هغوی د خوشې کېدو هڅو نتیجه ورنکړه.

د دې فعالانو د نیولو موضوع ځینو کورنیو رسنیو هم راپور کړې ده.

د طالبانو حکومت تر دې مخکې هم لسګونه ټولنیز او مدني فعالان د نجونو د زده ‌کړو د ملاتړ او یا د هغوی پر پالیسیو د نیوکو له امله نیولي او بندیان کړي دي.

سیمه ییزچارواکي وایي چې د فاریاب ولایت په څو ولسواليو کې د سیلابونو له امله لارې تړل شوي دي.

د طالبانو ترکنټرول لاندې د باختر خبري آژانس د راپورله مخې په دې ولایت کې د ټولګټو د ادارې ریس مولوي حمیدالله دانش ویلي چې د سیلابونو له امله په ګرزیوان، فردوس او بلچراغ کې مواصلاتي لارې بندې شوې دي. نوموړي د احتمالي زیانونو په اړه څه ندي ویلي خو زیاته کړې یې ده چې د دغو لارو د خلاصیدو لپاره د خلکو په همکارۍ د اړوندو ادارو هڅې پیل شوي دي.

په عین حال کې په بادغیس کې د ورښتونو له امله د پنځو تنو د مړه کیدو راپورونه ورکړل شوي دي. په دغهَ ولایت کې د طالبانو د امنیه قومانداني ویاند صدیق الله صدیقي وایي چې د سیلونو له امله درې تنو د قادس ولسوالي په « شش مني ها» کلي کې او دوو تنو د یوې درې کلنې نجلۍ په شمول د دره بوم په ولسوالي کې ژوند له لاسه ورکړی دی.

په بادغیس کې له طبیعي پېښو سره د مبارزې ریاست وایي چې د سیلونو له امله د دغو ځاني تلفاتو ترڅنګ خلکو ته مالي زیانونه اوښتې دي او یوشمیر زراعتي مځکې تخریب شوې دي.