ترکي چارواکي وايي، ۶۰ غیرقانوني افغان کډوال يې نیولي دي.

د ترکي ین ټي وي تلویزیون د جمعې په ورځ راپور ورکړی چې دغو کډوالو په ترکیه کې د پاتي کیدو قانوني اسناد نه درلود.

د ین ټي وي د راپور پر بنسټ، د دې کډوالو له ډلې ۲۱ يې افغانستان ته ډپیورټ شوي دي.

بل پلو، ترکي چارواکو ویلي، درې کسان يې د انساني قاچاق په تور نیولي او عدلي او قضايي اروګانو ته يې سپارلي دي.

د رسمي شمیرو له مخې څه باندې درې لکه افغانان په غیرقانوني توګه په ترکیه کې ژوند کوي.

ترکیه چې اروپا ته د رسیدو پر لار پروت هیواد دی، ډیر کله په کې د افغان کډوالو د نیولو سربیره، د دغو کډوالو د تښول کیدو او وژل کیدو راپورونه هم ورکړل شوي دي.

د پاکستان پوځي عدالت وايي، د عمران پر پلوۍ د تیر کال په خونړیو لاریونونو کې ۲۵ تورونو کسانو ته سزوارې اورولي دي.

د پاکستان پوځ نن شنبې د (ډیمسبر۲۱مه) په یو بیان کې ویلي، دا کسان د ۲۰۲۳ کال د مې په پېښو کې په پاکستان کې د تاواتریخوالي په رامنځته کولو تورن وو.

په بیان کې راغلي، دغو کسانو ته له دوو تر ۱۰ کلونو د بند سزاوې ورکړل شوي دي.

د پوځ په بیان کې وړاندې راغلي، د تیر کال د مې نهمه، چې د پاکستان په تاریخ کې یوه تیاره ورځ ده، د سیاسي انګیزه له کبله رامنځته شوې وه.

خو د پاکستان د تحریک انصاف ګوند چې مشري بندویان عمران خان په غاړه لري، پر ایکس پاڼې/پخواني ټویټر د پوځي عدالت دا پریکړه له بشري حقونو سرغړونه یاده کړې او ویلي دي، "دا عمل شفاف نه دی او له تیر یونیم کال راهیسې د دوی د ګوند شاوخوا ۸۰ کسان نیول شوي دي".

د ۲۰۲۳ کال د مې پر نهمه د القادر ټرسټ په نوم د درغلۍ په یوه قضیه کې د پاکستان د پخواني صداعظم عمران خان تر نیولو وروسته د هغه پلویانو د پاکستان په بیلابیلو ښارونو کې پراخ لاریونونونه پیل کړی چې په دې لړ کې یو شمیر کسانو پر پوځي تاسیساتو، دولتي او خصوصي ودانیو او نورو شخصي ملکیتونو بریدونه وکړل او اور ورته کړ.

د هغوو لاریونونو پر مهال په پېښور کې یو شمیر کسان وژل او ټپیان شوي هم وو.

د اسراییلو پوځ وايي، له یمن څخه توغول شوی توغندی پر تل ابیب لګیدلی دی.

د پوځ په خبره، د توغندي د لګیدو له کبله په سیمه کې د ماتو شیشو په وجه ۱۶ کسان ټپیان شوي دي.

پوځ وړاندې ویلي، ۱۴ نور کسان هغه مهال ټپیان شول چې د خطر زنګ له اوریدو وروسته یې هڅې کولي په امن ځایونو کې پټ شي.

د اسراییلو د پوځ په خبره، دا برید نن سهار وختي شوی دی.

دا دوه بریدونه وروسته له هغې دي چې د اسراییلو پوځ د یمن پر پلازمینه صنعا او حدیده ساحلي ښار چې د حوثي یاغیانو په واک کې دي هوايي بریدونه وکړل.

بل پل، په یمن کې د ایران له ملاتړه برخمنو حوثي یاغیانو د پنجشنبې په ورځ ادعا کړې وه چې د اسراییلو یوه بې پیلوټه الوتکه ویشتلی ده.

د اسراییلو پوځ وايي، حوثي یاغیانو له حماس وسله والي ډلې سره په ګډه ۲۰۰ توغندي د اسراییلو پر لور توغولي دي.

د پوځ په خبره، په دې شمیر کې بې پیلوټه الوتکې هم شاملې وې.

د یمن حوثي یاغیان په احمر بحیرې او عدن خلیج کې په غزه کې د فلسیطنیانو په ملاتړ پر بیړو بریدونه کوي.

د جرمني په ماګدی بورګ کې د کرسمس پر بازار د یو کس د موټر د برابرول په پېښه کې څلور کسان وژل شوي او ۴۱ نور ټپیان دي.

د جرمني بیلت ورځپانې نن شنبې دا تازه شمیرې خپرې کړي دي.

پولیسو هم د څلور کسانو وژل تایید کړي دي.

د چارواکو په خبره، تیره شپه یو جرمن داکټر چې په خټه عرب دی او دوه لسیزې وړاندې جرمني ته راغلی و، یو کرايي موټر يې د کرسمس پر بازار وربرابر کړی چې ډيرو خلکو ته يې مرګژوبله واړوله.

تراوسه د دې کار اصلي علت معلوم نه دی.

د جرمني حکومت د دې ورځ په مناسبت نن شنبې په ټول هیواد کې ملي ماتم اعلان کړی دی.

د جرمني صداعظم اولاف شولز او د دې هیواد د کورنیو چارو وزیر د پېښې ځای ته تللي دي.

د افغانستان پخواني ولسمشر حامد کرزي ویلي، "د پوهنتونونو د پرانستلو لپاره د افغانو نجونو غږ تاییدوم".

ښاغلي کرزي نن د (ډیمسبر۲۱مه) پر خپلې ایکس پاڼې/پخواني ټویټر لیکلي، "تعلیم د نجونو اساسي حق دی او افغانستان به د دې نجونو له زده کړو پرته روښانه راتلونکی ونه لري.

هغه وړاندې د طالبانو له خوا د نجونو پر مخ د پوهنتونونو د بندیدو د دوه کلنۍ په مناسبت غوښتي، نجونو ته د زده کړو اجازه ورکړئ.

طالبانو دوه کاله وړاندې د ډیسمبر په ۲۲مه د نجونو پر مخ د پوهنتونونو د بندیدو فرمان صادر کړ. که څه هم دا طالبانو دا بندیز له کورنیو او بهرنیو غبرګونونو سره مخ شو، خو طالبانو خپله پریکړه بیرته وانخیسته.

یوه سړي د جمعې ناوخته د جرمني د ختيځ په ماګدبورګ ښار کې د کرسمس په یوه بازار کې خپل موټر د خلکو پر یوې ډلې وربرابر کړ.

اسوشیټیډ پریس راپور ورکړی چې د جرمني چارواکو ویلي موټر چلوونکی نیول شوی دی.

ځینو رسنیو ویلي، په پېښه کې یو تن مړ شوی دی.

ماګدبورګ، د برلین په لویدیځ کې، د ساکسوني-انهالټ ایالت مرکز دی او شاوخوا 240,000 وګړي په کې ژوند کوي.

د ۲۰۱۶ کال د ډسمبر پر ۱۹مه په برلین کې یوه افراطي بریدګر د کرسمس په یوه مارکیټ کې پر خلکو یوه لارۍ وربرابره کړې وه چې له امله یې ۱۳ کسان ووژل شول او لسګونه نور ټپیان شول.

هغه برید کوونکی څو ورځې وروسته په ایټالیا کې په ډزو ووژل شو.

د جرمني د کورنیو چارو وزیرې نانسي فایزر تېره میاشت وویل، د سږني کال د کرسمس بازارونو ته د خطر مشخصې نښې نه شته.

خو هغې زیاته کړه چې دا عاقلانه کار دی چې خلک محتاط وي.

تر اوسه کومې ډلې د تازه پېښې پړه پر غاړه نه ده اخیستې.

د افغانستان لپاره د پاکستان ځانګړي استازي د افغان کډوالو پر موضوع د کډوالو په چارو کې د ملګرو ملتونو د لویې کمشنرۍ له استازي سره خبرې وکړې.

محمد صادق د شنبې په ورځ پر خپلې ایکس پاڼې (پخواني ټویټر) لیکلي، په اسلام اباد کې یې د (UNHCR) له استازې فلیپا کنډلر (Philippa Candler) سره، په پاکستان کې د افغان کډوالو پر موضوع خبرې وکړې.

په دغه کتنه کې د شویو بحثونو په اړه معلومات نه دي خپاره شوي، خو دا کتنه داسې وخت کېږي چې له پاکستان څخه د ۲۰۲۳م کال د نومبر له لومړۍ نېټې د بې اسناده افغان کډوالو ډله ییز اخراج روان دی.

سویډن د جمعې په ورځ اعلان وکړ، د فلسطیني کډوالو لپاره د ملګرو ملتونو د بنسټ تمویل بندوي، خو ژمنه یې وکړه، چې د نورو ډلو له لارې به له غزې سره خپلې مرستې نږدې دوه برابره زیاتې کړي.

د سویډن حکومت پرون ویلي په ۲۰۲۵م کال کې به غزې ته ۸۰۰ ملیون سویډني کرونه چې ۷۲ ملیون ډالره کېږي، د مرستې په توګه ورکړي.

سویډن په ۲۰۲۴م کال کې له غزې سره د فلسطیني کډوالو لپاره د ملګرو ملتونو د بنسټ له لارې ۴۵۱ ملیون کرونه (۴۱ ملیون ډالره) مرسته کړې وه، چې نور به د دغې ادارې تمویل ودرول شي.

د اسرائیل د پارلمان وکیلانو یو قانون تصویب کړ، چې په اسرائیل او ختیځ بیت المقدس کې د فلسطیني کډوالو لپاره د ملګرو ملتونو د بنسټ (UNRWA) فعالیت منع کوي او د نورو مرستندویو بنسټونو په وړاندې یې هم ورته اقدام کړی دی.

اسرائیل تور لګولی چې د ۲۰۲۳م کال د اکتوبر پر اوومه د حماس ډلې په حمله کې د دې بنسټ غړو هم لاس درلود، هغه تور چې UNRWA رد کړی دی

په خیبرپښتونخوا ایالت کې چارواکو د جمعې په ورځ ویلي، په پام کې لري د فرقوي شخړو د مخنیوي لپاره، هغه درنې وسلې ټولې کړي، چې د سلګونو کسانو د مړینې سبب شوې دي.

د رویټرز خبري اژانس د راپور له مخې، په کورمه اجنسۍ کې قبایلو ویلي، خپلې وسلې به تسلیم نه کړي.

پر دغه ساحه چې د اوسېدونکو شمېر یې شا و خوا ۶۰۰زره کسانو ته رسېږي، فډرال او ایالتي چارواکي په دودیز ډول محدود کنټرول لري او له لسیزو راهیسې په کې فرقوي شخړې کېږي.

تازه شخړې تېره میاشت د سنیانو او شیعه ګانو ترمنځ وشوې، چې د راپورونو له مخې د سخت بشري بحران سبب شوې.

د هغې لویې لارې د تړل کېدو له کبله چې د کورمې عمده ښار پاړه چنار له پېښور سره وصلوي، په دې ساحه کې د لوږې، د درملو د نشتوالي او روغتونونو کې د اکسیجن د کموالي راپورونه ورکړل شوي دي.

د افغانستان کرکټ بورډ وايي، ملي لوبډله، د زیمبابوې په وړاندې درېیمې پنځوس اووره یا یو ورځنۍ مسابقې ته پوره چمتووالی لري.

دواړه لوبډلې د شنبې په ورځ د زیمبابوې په پلازمېنه هرارې کې د کابل پر وخت د غرمې ۱۲ بجې د لوبې میدان ته راوځي.

د کرکټ بورډ ویاند سید نسیم سادات له ازادۍ راډیو سره په خبرو کې د مسابقې په اړه وویل، د دغې لوبې ګټل به افغان لوبډلې ته مهم وي، چې له دې ګټلو سره به ټوله لوبلړۍ په خپل نوم کړي.

د هغه په خبره، لومړۍ لوبه د باران له کبله بې پایلې اعلان شوه، دویمه سیالي افغانستان په لوی توپیر وګټله او اوس هڅه دا ده چې دا لوبه وګټو او اوسنۍ لوبلړۍ زموږ شي.

افغانستان تېره اوونۍ وتوانېد له زیمبابوې د شلو اوورونو لوبلړۍ هم وګټي او که د شنبې ورځ لوبه په خپل نوم کړي د پنځوسو اوورونو د لوبلړۍ ګټونکی به شي.

افغانستان له کوربه زیمبابوې سره دوې ټیسټ لوبې هم لري، چې لومړۍ به یې د راروانې پنج شنبې په ورځ او دویمه به د مرغومي/ جدي پر ۱۳مه وشي.