د لاسرسۍ وړ لېنکونه

تازه خبر
شنبه ۹ وری ۱۳۹۹ کابل ۰۱:۴۲

نړۍ

پامپیو وايي، امریکا به د سلواکيا د امنیت او اقتصاد ملاتړ کوي

د امريکا د بهرنیو چارو وزير مایک پامپیو

د امريکا د بهرنیو چارو وزير مایک پامپیو وايي، امریکا به د سلواکيا د امنیت او اقتصاد ملاتړ کوي.

دا خبره ده مرکزي اروپا ته د خپل سفر پر مهال کړې. د ده د سفر هدف په سيمه کې د روسیې او چين د نفوذ کمول ښودل شوي دي.

ده وویل:

"زه غواړم د سلواکيا خلک پوه شي چې امریکا دخيله ده او موږ بېرته راغلو."

پامپیو دا خبرې په ګاونډي اتريش کې د ازادۍ د وره د یاد څلي په مراسمو کې د ګډون پر مهال وکړې.

دا څلۍ د هغو ۴۰۰ کسانو په یاد جوړ شوی چې په ۱۹۴۵میلادي او ۱۹۸۹میلادي کال کې د هغه مهال چکوسلواکیا پر پولو په داسې حال کې وژل شوي وو چې غوښتل يې تر اوسپنېزې پردې واوړي.

اوسپنيزه پرده د هغه پولې نوم و چې اروپا يې پر دوو برخو وېشلې وه.

دا نوم د شوروي اتحاد د هغو هڅو سمبول دی چې غوښتل يې د شوروي اتحاد او نورو متحدانو مخه ونيسي چې له لويديځ سره تماس ونه‌لري.

د ورځې تازه خبرونه دلته ولولئ

نړۍ کې په کرونا ویروس د اخته کسانو شمېر ۶ لکو ته نږدې شو

ارشیف، انځور تزئیني بڼه لري.

په نړۍ کې د کرونا په ویروس د اخته کسانو شمېر شپږ لکو ته نږدې شو.

پرون (جمعه) په دې ویروس د اخته کسانو تر ټولو زیاتې نوې پېښې د امریکا په متحده ایالاتو کې ثبت شوې.

خو تر ټولو د زیاتو مړینو راپور بیا ایټالیا ورکړ.

پرون په امریکا کې نږدې ۱۵ زره نوې پېښې ثبت شوې، خو په ایټالیا کې چې اوس د کرونا په ویروس د اخته کسانو د شمېر له پلوه تر امریکا وروسته دوهم ځای لري، نږدې ۶ زره نوې قضیې ثبت شوې، خو دې هېواد په عین حال کې وویل چې ۹۱۹ تنه په دې ویروس تازه مړه شوي دي.

د دغو کسانو له مړینې سره تر اوسه پورې په ایټالیا کې د کرونا په ویروس تر ۹ زره زیات کسان مړه شوي دي.

پرون په جرمني کې د کرونا ویروس نږدې ۷ زره او په اسپانیا کې تر ۶ زره ډېرې پېښې تأیید شوې.

په عین حال کې تر اوسه پورې په نړۍ کې تر یو لک او ۳۲ زره زیات کسان ښه شوي دي.

صربیا کې د کرونا ویروس په اړه له شوي امر سرغړوونکی محاکمه شو

ارشیف، د صربیا بلګراد ښار د سترې محکمې مخ ته یو قاضي.

په صربیا کې محکمې یو تن په دې خاطر په ۳ کاله حبس محکوم کړ چې د کرونا ویروس د نه‌خپرېدو په خاطر یې د ځان د تجرید یا له نورو خلکو څخه د جلا کولو امر نه‌و عملي کړی.

د صربیا دولتي ټلوېزیون پرون (جمعه) وویل، محکمې دا پرېکړه د دې هېواد د ختیځ په دایمیتروفګارډ ښارګوټي کې په هغه غونډه کې وکړه چې د وېډیو له لارې دایره شوې وه.

ټاکل شوې وه چې پرون د کرونا ویروس د مخنیوي لپاره د مقرراتو د سرغړونې په خاطر دوه ورته محاکمې د صربیا د ختیځ په یوه بل ښار کې وشي.

په صربیا کې لږترلږه ۱۱۲ تنه د کرونا ویروس د مخنیوي لپاره د روغتیايي اصولو او مقرراتو د نه‌رعایتولو په خاطر په توقیف کې دي.

۴ روسي لوبغاړې د ډوپېنګ په جرم تورنې شوې

ارشیف، نتالیا انتییوخ چې د ۲۰۱۲ کال په ژمني المپیک سیالیو کې له ۴۰۰ متره خنډونو د تېرېدو په مسابقه کې اتله شوې وه.

څلور روسي لوبغاړې چې دوه‌یې د المپیک د سرو زرو د مډال ګټونکې دي، د ډوپېنګ په جرم تورنې شوې.

په المپیک کې د سرو زرو د مډال ګټونکې اندري سیلنووا چې د ۲۰۰۸ کال په المپیک کې د لوړ ټوپ اتله وه او نتالیا انتییوخ چې د ۲۰۱۲ کال په ژمني المپیک سیالیو کې له ۴۰۰ متره خنډونو د تېرېدو په مسابقه کې اتله شوې وه، د منع شویو موادو د کارولو له تورونو سره مخامخې دي.

د دغو قضیو په اړه به د سپورټي سرغړونو په ځانګړې محکمه کې پرېکړه وشي، خو تر اوسه پورې د هغوی د محاکمې لپاره نېټه نه‌ده ټاکل شوې.

د بریتانیا صدراعظم په کرونا ویروس اخته شوی

د بریتانیا صدراعظم بورېس جانسون

د بریتانیا صدراعظم بورېس جانسون نن د مارچ په ۲۷مه، وویل چې په کرونا ویروس اخته شوی دی.

بورېس جانسون دا خبر پر ټویټر خپور کړی او لیکلي یې دي چې د ویروس نښې کمزورې دي، حکومتي چارو ته به دوام ورکوي، خو ځان‌یې له خلکو جلا کړی دی.

بورېس جانسون ویلي: "د کرونا ویروس کمزورې نښې مې په ځان کې احساس کړې او د روغتیايي مسؤل په مشوره مې ځان معاینه کړ او د معاینې نتیجه مثبته وه، له دې کبله به له کوره کار کوم او له نورو ځان لیرې ساتم."

د بریتانیا د رسمي شمېرو پر اساس چې پرون خپرې شوې، ۳۲۷۰ تنه په کرونا ویروس اخته شوي دي.

په بریتانیا کې پرون نور ۴۰ تنه له دې امله مړه شوي چې په ټوله کې د کرونا ویروس له امله په بریتانیا کې د مړو شمېر ۱۴۴ ته ورسره رسېدلی دی.

ایران کې د کرونا ویروس له امله ۱۴۴ تنه نور کسان هم مړه شول

په ایران کې د کرونا له امله مړ شوی کس

په ایران کې چارواکو نن د مارچ په ۲۷مه، د کرونا ویروس له امله د نورو ۱۴۴ کسانو د مړینې خبر ورکړی دی.

له دې سره په ایران کې د کرونا ویروس له امله د مړو شمېر ۲۴۰۰ ته لوړ شو.

د ایران د عامې روغتیا وزارت ویاند کیانوش جهانپور نن دا شمېرې اعلان کړې دي.

هغه ویلي چې په ایران کې د کرونا ویروس د مثبتو پېښو شمېر ۳۲ زره او ۳۳۲ ته لوړ شوی دی.

ایران، چین، ایټالیا، اسپانیا او امریکا د نړۍ له هغو هېوادونو دي چې کرونا ویروس سخت ځپلي دي.

روسیه کې رسټورانتونه او چای‌خانې وتړل شوې

یو روسی وګړی د یوې چای‌خانې د تړلو پر مهال.

د روسیې حکومت د کرونا ویروس د خپرېدو د مخنیوي لپاره نن د مارچ په ۲۷مه، ټول رسټورانتونه او چای‌خانې بندې کړې.

په روسیه کې په کرونا ویروس د اخته کسانو شمېر ۱۰۳۶ ته رسېدلی دی.

په روسیه کې له دې امله د درېیم وګړي د مرګ خبر هم تأیید شوی دی.

د روسیې صدراعظم، همداراز په ټول هېواد کې د هغو ادارو فعالیت بند کړی چې په بازارونو کې د خوراکي موادو کاروبار کوي. دا فرمان به له سبا عملي کېږي.

په روسیه کې همداراز د تفرېح او سیاحت لپاره ځانګړي ځایونه بند شوي دي.

د روسیې ولسمشر ولادیمیر پوتین ویلي چې له سبا ورځې د اپرېل میاشتې تر پنځمې نېټې به عمومي رخصتي وي. په مسکو کې پر خلکو غږ شوی چې له کورونو دې نه‌وځي او له خلکو سره دې راشه درشه کمه کړي.

ټرمپ او پېنګ کرونا ویروس سره د مبارزې په اړه خبرې وکړې

د امریکا ولسمشر ډونالد ټرمپ او د چین ولسمشر شي جین پېنګ

د امریکا او چین ولسمشرانو د کرونا ویروس پر ضد د مبارزې په اړه خبرې کړې دي.

د متحده ایالاتو ولسمشر ویلي چې له چینايي لوري شي جین پېنګ سره له نږدې کار کوي او سخت درناوی ورته لري.

دواړو نن د مارچ په ۲۷مه، ټیلیفوني خبرې کړې دي، خو تر دې خبرو مخکې، ټرمپ په واشنګټن کې خبریالانو ته وویل چې چین لا هم د کرونا ویروس په تړاو شمېرې له نړیوالو پټوي.

دا په داسې حال کې ده چې په متحده ایالاتو کې په کرونا ویروس د اخته وګړو شمېر اوس د چین په پرتله زیات شوی دی.

د امریکا متحده ایالاتو ولسمشر او یو شمېر لوړ رتبه چارواکو مخکې ویلي چې چین په ډسمبر او جنورۍ کې د کرونا ویروس په اړه نړیوال غولولي دي.

کرونا ویروس په ډسمبر کې د چین د هوبې ولایت له ووهان ښاره راپيدا شو.

پلوسي له استازو جرګې د ۲،۲ ټریلیونه ډالرو بودجې تصویب وغوښت

د امریکا کانګرس د استازو مجلس مشره نانسي پلوسي

د امریکا کانګرس د استازو مجلس به نن په متحده ایالاتو کې له کرونا ویروس سره د مبارزې او د اقتصاد د ښه کولو لپاره ۲،۲ ټریلیون ډالر بودجه تصویب کړي.

په کانګرس کې به نن د مارچ په ۲۷مه، په دې اړه رأی‌ګیري وشي او بیا به د توشېح لپاره ولسمشر ته واستول شي.

د استازو مجلس مشرې نانسي پلوسي له خپلو همکارانو غوښتنه کړې چې ژر تر ژره‌یې تصویب کړي. له دې ځانګړې بودجې څخه به ۳۶۷ میلیارده ډالر د کوچنیو تجارتونو مالکانو ته ورکړل شي چې د کرونا ویروس د خپرېدو د مخنیوي لپاره‌یې کارخانې تړل شوې دي.

همداراز هغو مأمورینو ته به معاشونه ورکول کېږي چې د کرونا ویروس د خپرېدو له امله په کورونو ناست دي یا له کورونو کار کولو ته مجبور شوي دي.

په عراق کې ۳ تنه برمته شوي فرانسویان خوشې شول

د عراق ملي بیرغ

د یوې نړیوالې خیریه مؤسسې څلور کارکوونکي په عراق له یرغملو څخه خوشې شول.

د فرانسې حکومت تأیید کړې ده چې د دې هېواد درې تنه له خپل عراقي همکار سره وروسته له دوو میاشتو خوشې شوي دي.

دغو کسانو په عراق کې له «اېس او اېس» مؤسسې سره کار کاوه.

د فرانسې ولسمشر امانوئل مکرون پرون له یرغملو څخه د دې کسانو د خوشې کېدو له امله د عراق له چارواکو مننه وکړه.

تر اوسه دا څرګنده نه‌ده چې څه معامله شوې ده چې دا کسان خوشې شوي دي.

امریکا کې په کرونا ویروس د اخته کسانو شمېر ۸۳۵۰۰ ورسېد

ارشیف، په کرونا ویروس اخته کس درملنه

د امریکا په متحده ایالاتو کې د کرونا ویروس د ناروغانو شمېر تر چین زیات شو.

د جانز هاپکنز پوهنتون د شمېرو له مخې په متحده ایالاتو کې ۸۳ زره ۵۰۰ کسان په کرونا اخته دي. په دې ډول دغه هېواد تر چین چې هلته د کرونا د ناروغانو شمېر ۸۱۷۸۲ کېږي او تر ایټالیا چې هلته ۸۰ زره ۵۸۹ کېږي، مخکې شو.

خو په متحده ایالاتو کې تر اوسه ۱۲۰۰ تنه دې ناروغۍ وژلي دي چې دا شمېره تر ایټالیا او چین ښکته ده.

ټاکل شوې ده چې نن د امریکا استازو جرګه غونډه وکړي او تمه ده چې د کرونا د مخنیوي لپاره د ۲،۲ ټریلیونه ډالرو بودجه تصویب کړي. دا تاریخي بودجه روانه اوونۍ د سنا له لوري تصویب شوه.

د استازو جرګې مشرې نانسي پلوسي پرون د استازو جرګې له استازو وغوښتل چې دا بودجه له ځنډ پرته تصویب کړي.

تر دې مخکې د امریکا د متحده ایالاتو ولسمشر ډونالد ټرمپ له استازو جرګې غوښتي و چې بودجه تصویب کړي او چې هغوی تصویب کړه دی به‌یې له ځنډ پرته توشېح کړي.

امریکا د ونزوئلا ولسمشر د مخدره موادو په ترورېزم تورن کړ

د ونزوئلا ولسمشر نیکولاس مادورو

د امریکا متحده ایالاتو د ونزوئلا ولسمشر نیکولاس مادورو او نور چارواکي د مخدره موادو د تجارت په وسیله په ترورېزم تورن کړي.

د امریکا د عدلیې وزیر ویلیم بار پرون د مارچ په ۲۶مه نېټه وویل، مادورو او د هغه همکاران د فارک په نوم د کلمبیا د چریکي ډلې له هغې څانګې سره لاس یو کړی چې د پخلاینې له بهیر څخه بهر پاتې شوه او د دې ډلې په لاس امریکا ته کوکائین استوي.

ښاغلی بار وايي: "د نیکولاس مادورو او د هغه د نورو تورنو ملګرو په اتهام پاڼه کې د کلمبیا د انقلابي پوځي ځواک یا فارک په نوم د ترورېستي ډلې په وسیله د یوې توطئې تور لګېدلی دی څو دا ډله متحده ایالاتو ته د کوکائینو سېل ورروان کړي."

متحده ایالاتو همداراز د هغو معلوماتو په بدل کې چې په نتیجه کې یې مادورو ونیول شي د ۱۵ میلیونه ډالرو جایزه هم اعلان کړه.

مادورو چې مسکو یې ملاتړ کوي، د امریکا د هغو هڅو په ترڅ کې په نښه شوی دی چې غواړي نوموړی له واکه لیرې کړي.

په نړۍ کې په کرونا ویروس د اخته کسانو شمېر له نیم میلیون واوښت

د کرونا ویروس د ازموینې ټیوب

په ټوله نړۍ کې په کرونا ویروس د اخته کسانو شمېر پرون د مارچ په ۲۶مه له نیم میلیون واوښت او د دې ناروغۍ له کبله د مړو کسانو شمېره ۲۳۰۰۰ ته نږدې شوه.

د جانز هاپکنز پوهنتون له‌خوا د خپرو شویو ارقامو له مخې په دې ویروس تر اوسه له ۵۱۰۰۰۰ زرو زیات کسان اخته شوي.

په ایټالیا کې چې دې ویروس تر ټولو زیات ځپلی دی، له اتو زرو زیات کسان په دې ناروغۍ مړه شوي چې دا د نړۍ په کچه د ټولو مړینو له درېیو تر یوې برخې څخه هم زیاته ده.

ورپسې اسپانیا ده چې د مړو شمېره‌یې ۴۱۵۰ ته نږدې شوې ده.

له بلې خوا د روغتیا نړیوال سازمان عمومي مشر تدروس ادهانوم ګبریاسوس پرون خبرداری ورکړ چې د کرونا ویروس وبا یو نړیوال بحران دی او نړیوال غبرګون ته اړتیا لري.

ښاغلي ګبریاسوس وویل چې کرونا ویروس په چټکۍ سره د سرایت په حال کې دی.

عراق کې د امریکا سفارت ته نږدې توغندي لګېدلي

عراق کې د امریکا سفارت

د عراق پوځ وایي چې نن سهار د پلازمېنه بغداد ښار په زرغون (امنه) سیمه کې چې دولتي ودانۍ او بهرني سفارتونه موقعیت لري، دوه توغندي ولګېدل.

پوځ په یوه بیان کې وویل چې د کتیوشا په نوم دوه توغندي د بغداد عملیاتي مرکز ته څېرمه لګېدلي، تلفات نه‌لري او جزئیات به‌یې وروسته له رسنیو سره شریک کړي.​

د عراق یوې امنیتي سرچینې ویلي چې په نښه شوی هدف د امریکا سفارت و چې د توغندیو د لګېدو له ځایه څو سوه متره لیرې موقعیت لري.​

دا د بغداد پر دې سیمې چې د بهرنیو ډیپلوماتیکو نمایندګیو په ګډون مهمې دولتي ودانۍ په‌کې دي، د تېر کال د اکټوبر له میاشتې راهیسې ۲۶مه دا ډول حمله ده چې ترسره کېږي.​

د دغې نوې حملې مسؤلیت تر اوسه کومې ډلې نه‌دی اخیستی.

تهران د 'اېف بي ای' د پخواني اجنټ په اړه د امریکا ادعا رد کړه

امریکایی رابرټ لیوینسن

تهران وایي نه‌پوهېږي چې امریکایی رابرټ لیوینسن چېرې دی او په دې توګه‌یې د امریکا ادعا رد کړه.

متحده ایالاتو ویلي چې ګومان کوي د پولیسو د فدرالي ادارې دغه پخوانی اجنټ به په ایران کې په زندان کې مړ شوی وي.​

په ملګرو ملتونو کې د ایران د دایمي نمایندګۍ ویاند علي رضا میر یوسفي نن په ټویټرپاڼه ولیکل چې ایران تل پر دې خبرې ټینګار کړی چې چارواکي یې نه‌پوهېږي چې ښاغلی لیوینسن چېرې دی او هغه د ایران په توقیف کې نه‌دی.​

تر دې مخکې د امریکا متحده ایالاتو له ایرانه غوښتي و چې د امریکا د پولیسو د فدرالي ادارې "اېف بي ای" د متقاعد اجنټ رابرټ لیوینسن په اړه دې چې څه ورسره پېښ شوي، بشپړ سپیناوی ورکړي. ګومان کېږي چې نوموړی په ایران کې په زندان کې مړ شوی دی.​

د سپینې ماڼۍ د ملي امنیت سلاکار رابرټ اوبراین پرون په یوه خپاره کړي بیان کې وویل، سره له دې چې د دې پېښې په اړه څېړنه دوام لري، خو دوی ګومان کوي چې رابرټ لیوینسن به څه موده مخکې ساه ورکړې وي.​

لیوینسن ۱۳ کاله مخکې چې هغه مهال ۵۸ کلن و، په ایران کې تری تم شوی دی.​

د سپینې ماڼۍ د ملی امنیت سلاکار زیاته کړه، مخکې له دې چې واشنګټن په دې اړه چې له لیوینسن سره څه پېښ شوي ومني، تهران باید په دې اړه بشپړ معلومات ورکړي.​

پرون د ورځې په پیل کې د لیوینسن کورنۍ ویلي چې د هغه د احتمالي برخلیک په اړه حکومت ورته یو څه معلومات ورکړي دي. له دې مخکې ولسمشر ټرمپ خبریالانو ته ویلي و چې دی به د لیوینسن مړینه ونه‌مني.

ټرمپ وویل، مخکې له دې چې نوموړی ونیول شي، اوږده موده ناروغ و.

امریکا کې په کرونا ویروس د مړو شمېر له ۱۰۰۰ واوښت

ارشیف

د امریکا په متحده ایالاتو کې د کرونا ویروس له امله د مړو شویو شمېر له زرو تنو واوښت او په دې هېواد کې پر دغه ویروس د اخته شویو شمېر نږدې ۷۰ زره کسانو ته رسېدلی دی.

د جان هاپکنز پوهنتون د شمېرو له مخې پرون د ورځې تر ناوخته په متحده ایالاتو کې د کرونا ویروس یا (کووایډ-۱۹) له امله د مړو شویو شمېر ۱۰۳۱ تنو ته ورسېد او پرون هم د دې ویروس ۸۲۷ نورې مثبتې پېښې ثبت شوې دي.​

له چین او ایټالیا وروسته ډېری کسان په امریکا کې پر کرونا ویروس اخته شوي دي.​

په ټوله نړۍ کې پر کرونا ویروس د اخته شویو کسانو شمېر ۴۷۰ زره کسانو او د مړینو یې ۲۱۲۸۷ ته رسېدلی دی.​

کارپوهان وایي چې په نړۍ کې پر کرونا ویروس د اخته شویو کسانو د کره شمېرې معلومول به ناممکنه ځکه وي چې د ډېرو ازموینې نه‌دي ترسره شوي او ښایي د مثبتو پېښو شمېر له دې ډېر زیات وي.

نور راوښيه

XS
SM
MD
LG