- واشنګټن ایګزاماینر
امریکايۍ اوونیزې واشنګټن ایګزاماینر په خپله وروستۍ ګڼه کې د افغانستان د سولې په چارو کې د امریکا د بهرنیو چارو وزارت د ځانګړي استازي زلمي خلیلزاد هغو څرګندونو ته اشاره کړې چې وايي، دی د افغانستان د ولسمشرۍ له انتخاباتو مخکې د سولې یوه توافق ته د رسېدو هڅه کوي.
ښاغلي خلیلزاد د جمعې په ورځ په واشنګټن کې د امریکا د سولې په انسټیټیوټ کې د وینا پر مهال وویل، کافي وخت شته او دی باور لري چې پهدې موده کې د سولې توافق ممکن دی.
خپرونه د دې څرګندونو په اړه لیکي:
خلیلزاد هیلهمند دی چې د ولسمشرۍ له انتخاباتو مخکې به یا د جګړې ښکېل اړخونه د سولې موافقې ته ورسېږي او یا به لږ تر لږه د سولې په خبرو کې دومره پرمختګ وشي چې بااعتباره انتخاباتو ته لاره پرانېزي.
خو واشنګټن ایګزاماینر وړاندې یادونه کوي چې له طالبانو سره د امریکايي چارواکو په خبرو کې د افغانستان حکومت حاضر نهدی.
خپرونه پهدې اړه د ښاغلي خلیلزاد وینا ته اشاره کوي چې ویلي یې دي د افغانانو ترمنځ خبرې باید ډېر ژر پیل شي، څو دوی وکولی شي چې د خپل هېواد د راتلونکي لپاره یو پلان جوړ کړي.
خپرونه زیاتوي:
طالبانو یو ځل بیا له افغان حکومت سره خبرې رد کړي دي، خو واشنګټن ایګزاماینر په دې اړه د ولسمشر اشرف غني د یوې وروستۍ مرکې دا وینا را اخیستې ده چې وايي، د سولې په برخه کې هر راز وروستۍ پریکړه به افغان حکومت کوي.
- نیویارک ټایمز
نیویارک ټایمز ورځپاڼې د افغانستان د ملي امنیت ادارې د هغې اعلامیې په اړه یو مطلب خپور کړی چې وايي، په کابل کې د جرمني د سفارت مخې ته د نژدې دوه کاله مخکې لویې چاودنې او یوې بلې ډلهییزې انتحاري حملې پلان جوړوونکی یې- چې د طالبانو له مهمو فعالانو څخه دی نیولی.
د ۲۰۱۷ میلادي کال په مې میاشت کې د کابل ښار په ډيپلوماتیکه سیمه وزیر اکبر خان کې سترې ټرک بم چاودنې یو نیم سل کسان ووژل.
ملي امنیت د محمد شریف په نوم مشکوک کس د دې چاودنې او په کابل کې د یوې امنیتي کمپنۍ پر ودانۍ د حملې د پلان په جوړولو تورن کړی او له دوو نورو کسانو سره چې وايي، له هغه سره یې مرسته کوله نیولی دی.
نیویارک ټایمز لیکي:
شریف او په کابل کې د اسلامي دولت ډلې یا داعش د جلب و جذب مسوول ابو عبیدالله متوکل د ملي امنیت د ځانګړو ځواکونو په جلا عملیاتو کې نیول شوي.
نیویارک ټایمز د ملي امنیت ادارې د ځانګړو ځواکونو وروستیو عملیاتو ته د اشارې په ترڅ کې لیکي:
په کابل کې، په وروستیو څو میاشتو کې په تروریستي حملو کې نسبي کموالی راغلی دی چې په پلازمېنه کې د دې او نورو افغان ځواکونو تصفیوي عملیات یې یو مهم علت دی.