د لاسرسۍ وړ لېنکونه

تازه خبر
سه شنبه ۲۵ غبرګولی ۱۴۰۰ کابل ۰۵:۲۱

افغانستان

چارواکي: بدخشان کې نږدې ۲۰۰ زره ټنه غنم راټول شوي

ارشیف

د بدخشان ولایت د کرنې ریاست وایي، سږ کال په‌دغه ولایت کې نږدې ۲۰۰ زره ټنه غنم راټول شوي دي.

د دغه ولایت د کرنې مشر سید معین‌الدین عیني نن ازادي راډيو سره په خبرو کې خوښي وښوده چې د هېوادونو د نورو ولایتونو برعکس په بدخشان کې وچکالي نه‌وه چې له امله‌یې زیاته اندازه غنم راټول شوي.

د ښاغلي عیني په خبره، راټول شوي غنم یوازې په همدغه ولایت کې مصرفېږي، ځکه د ولایت نفوس زیات او د کرنیزو ځمکو په پرتله غرونه زیات دي.

له دې سره نوموړي ټينګار وکړ چې که په‌دغه ولایت کې ورښتونه همداسې دوام ومومي، راتلونکي کال کې به د کرنیزو محصولاتو حاصلات هم زیات وي.

د ورځې تازه خبرونه دلته ولولئ

ارزګان والي: چوره او خاص ارزګان کې د طالبانو پلانونه شنډ شول

د ارزګان ولایت والي محمد عمر شېرزاد

د ارزګان والي وايي، په چوره او خاص ارزګان ولسوالیو کې د طالبانو هغه پلانونه شنډ شوي چې غوښتل يې یادې ولسوالیو ته سقوط ورکړي.

والي محمد عمر شېرزاد وايي، تېره شپه وسله والو طالبانو د ارزګان په خاص ارزګان او چوره ولسوالۍ کې بریدونه کړي چې په وینا یې افعان پوځيانو يې بریدونه په شا تمبولي دي.

ښاغلي شېرزاد رسنیو ته په لیږلي ویډیويي پیغام کې ویلي: "تېره ورځ طالبانو د ماسپښین پر دريېو بجو پر چورې ولسوالۍ برید وکړ چې د شپې تر ۱۲ بجو پورې یې دوام درلود، دې جګړه کې ۲۰ وسله وال طالبان وژل شوي او تر ۳۰ پورې نور بیا ټپیان دي، په ټپیانو کې د خاص ارزګان ولسوالۍ لپاره د طالبانو نظامي قوماندان چې چورې ولسوالۍ ته د جګړې لپاره ورغلی و، شامل دی."

والي په چوره ولسوالۍ کې د افغان سرتیرو په اړه څه ونه ویل چې مرګ ژوبله ورته اوښتې او که نه؟ خو نوموړي زیاته کړه، یاده ولسوالۍ ته تېره شپه اضافي کمانډو ځواکونو رسیدلي دي.

ښاغلي شېرزاد د خاص ارزګان ولسوالۍ د سقوط اوازې رد کړې او په وینا یې یوازې یو شمیر امنیتي پوستې له ځايه بې ځایه شوي دي.

هاخوا بیا د خاص ارزګان ولسوالۍ ځايي چارواکې وايي چې له ولسوالۍ څخه یې تکتیکي شاتګ کړی دی.

د وسله والو طالبانو ویاند قاري یوسف احمدي بیا رسنیو ته په استولي پیغام کې ویلي چې د خاص ارزګان د ولسوالۍ مرکز، د امنیه قوماندانۍ او څلور امینتي پوستې یې نیولي او پولیس د ملي اردو کمپ ته تللي دي.

قاري یوسف احمدي په چوره ولسوالۍ کې د دوی لورته د اوښتې مرګ ژوبلې خبرې هم رد کړې.

د چک جمهوریت: افغانستان سره به مو مرستې جاري وي

د چک جمهوریت د بهرنیو چارو وزیر یاکوب کولهانیک

د چک جمهوریت د بهرنیو چارو وزیر یاکوب کولهانیک نن سې شنبه (د غبرګولي ۲۵مه) په پراګ کې د افغانستان د سفارت په نوښت جوړ شوي د افغان – چک – سلواک د سوداګرۍ او پانګونې فورم ته په وینا کې وویل چې هېواد یې له افغانستان څخه خپل عسکر راباسي، خو د دې معنی دا نه ده چې دوی افغانستان پرېږدي.

ښاغلي کولهانیک زیاته کړه چې چک جمهوریت به له افغانستان سره په تخنیکي،‌ مالي، اقتصادي،‌ تعلیمي او تجارتي برخو کې مرستو ته دوام ورکړي.‌

هغه د افغانستان د اسلامي جمهوریت او چک جمهوریت ترمنځ د سوداګرۍ د شتو فرصتونو په هکله خبرې وکړې او ویې ویل، دواړه هېوادونه لېوال دي چې په خپلو کې اړیکې پراخې کړي او د دوی حکومت ژمن دی چې له خپل لورې هر راز ممکنه همکاري وکړي.

عبدالصبور قانع د هرات والي وټاکل شو

عبدالصبور قانع

ستر پاسوال عبدالصبور قانع د هرات والي وټاکل شو.

د سیمه ییزو ارګانونو خپلواکه اداره وايي دده مقرریدل ددې ادارې وړاندیز او د جمهوري ریاست حکم وو.

د سیمه ییزو ارګانونو خپلواکه اداره زیاتوي، د ښاغلي قانع پوځي رتبه به خوندې وي.

تر ده مخکې عبدالوحید قتالي د هرات والي و.

دا په داسې حال کې ده چې ددې ولایت په څو ولسوالیو کې د افغان ځواکونو او طالبانو ترمنځ جګړې روانې دي.

نامعلومو وسله‌والو ننګرهار کې ۵ واکسیناتوران وژلي او ۴ نور ټپیان دي

ارشیف، د یوه واکسیناتور په وینو لړلې بکسه

د ننګرهار چارواکي وایي، نامعلومو وسله والو پنځه واکسیناتوران وژلي او څلور نور یې ټپیان کړي دي.

د ننګرهار د والي ویاند عطا الله خوګیاڼی وایي چې دا تلفات د څو بریدونو په ترڅ کې اوښتې دي: "له بده مرغه نن سهار د ننګرهار په مرکز جلال اباد ښار، خوګیاڼو او سره رود ولسوالیو کې پر واکسیناتورانو پنځه بریدونه شوي دي چې پنځه رضاکاران شهیدان شوي او څلور نور ټپیان دي."

ښاغلي خوګیاڼي زیاته کړه چې په ټپیانو کې د دوو روغتیایي وضعیت د اندېښنې وړ دی.

د دې بریدونو مسوولیت تر اوسه چا نه دی منلی.

چارواکي: د  خاص ارزګان ولسوالۍ اداري چارې، پوځي اډې ته انتقال شوي

ارشیف، ارزګان

د ارزګان ولایت د خاص ارزګان ولسوالۍ اداري چارې، پوځي اډې ته انتقال شوي دي.

په خاص ارزګان کې د ملي اردو د کنډک قوماندان خان محمد ازادي راډیو ته وویل چې بازار پخوا هم له طالبانو سره و: "د امنیه قومانداني پرسونل موږ د کمپ څنګ ته را انتقال کړی دی. د ولسوالۍ ودانۍ د استفادې وړ نه وو، ځکه چې تخریب شوې وه، ویجاړه شوې وه."

خان محمد زیاته کړه چې تېره شپه یې په سیمه کې د طالبانو بریدونه په شا تمبولي دي او اووه طالبان یې وژلي دي.

د طالبانو ویاند قاري یوسف احمدي رسنیو ته په استولي پیغام کې ویلي چې د خاص ارزګان د ولسوالي مرکز یې نیولی دی او پولیس د ملي اردو کمپ ته په شا شوي دي.

۲۰۹م شاهین قول اردو: د فاریاب په شیرین تګاب کې ۱۶ طالبان وژل شوي

د افغانستان په نقشه کې د فاریاب ولایت

افغان پوځیان د فاریاب ولایت په شیرین تګاب ولسوالۍ کې د شپاړس طالبانو د وژلو خبر ورکوي.

دوه سوه نهم شاهین قول اردو په خبرپاڼه کې ویلي دي چې طالبانو نن شپه د دوهم ځل لپاره په شیرین تګاب کې پر افغان ځواکونو بریدونه وکړو، خو د افغان ځواکونو په ځوابي برید او د هوایي قواوو په ملاتړ د دې بریدونو مخه ونیول شوه.

د قول اردو ویاند حنیف رضایي ادعا کوي چې د طالبانو یو مهم قوماندان رحمت اله مشهور په بیدار تېره شپه د جګړې پر مهال ټپي شو چې بیا یې له اخېستو ټپونو ساه ورکړه.

طالبانو تر اوسه د دې جګړې په اړه څه نه دي ویلي.

پکتيا کې د ۱۴ ميلیونه افغانیو په ارزښت د اوبو لګولو شبکه جوړیږي

پکتيا کې د اوبو لګولو شبکه

په پکتيا کې د څه باندې ۱۴ ميلیونه افغانیو په ارزښت د اوبو لګولو شبکې د جوړولو چارې پیل شوې.

د کرنې، اوبو لګولو او مالدارۍ وزارت ویاند اکبر رستمي نن سې شنبه (د غبرګولي ۲۴مه) ازادي راډیو ته وویل چې دغه پروژه د کرنې او خوړو خونديتوب بېړنۍ پروژې 'EATS' له خوا د پکتیا مرکز ګردېز کې پلي کېږي.

د ښاغلي رستمي په خبره، د اوبو لګولو دغه شبکه به د یو کال په موده کې بشپړه شي چې په جوړېدو سره به ېې ۱۰۷۰ جریبه کرنیزه ځمکه خړوبه کړي.

نوموړی وایي، د دغه ولایت ډېری خلک په کرنه بوخت دي او هڅه روانه ده چې د دوی د اقتصاد د پیاوړتیا لپاره اړینې پروژې پلي کړي.

د وزارت د معلوماتو پر بنسټ، د کانال د جوړېدو پر مهال به د سیمې ۱۱۰۰ تنو اوسیدونکو ته کاري زمینې برابرې شي چې ترې به مستقیمه ګټه واخلي.

له ۲۰ څخه تر ۳۰ سلنه د اوبو ضایعاتو مخه ونیول شي او بزګران به د کرنیزو ځمکو د اوبو کولو په برخه کې هوسا شي.

چارواکي: د چک او سلواک پانګه وال دې افغانستان کې پانګونه وکړي

د افغانستان،چګ او د سلواک چارواکي

د افغانستان د سوداګرۍ او صنعت وزیر د چک او سلواک له پانګه والو وغوښتل چې په افغانستان کې په بېلابېلو سکتورونو کې پانګونه وکړي.

د دغه وزارت ویاند فواد احمدي نن سې شنبه (د غبرګولي ۲۵مه) ازادي راډیو ته وویل چې نثار احمد غوریاني دا څرګندونې د افغانستان ــــ چک او سلواکیا هېوادونو ترمنځ د سوداګرۍ او پانګونې لومړنۍ ناسته کې وکړې.

نوموړي وویل چې دا ناسته د چک جمهوریت د لومړي وزیر، په کوربه توب د افغانستان د صنعت او سوداګرۍ وزیر ښاغلي نثار احمد غوریاني او ورسره پلاوي په ګډون یادو دوه اروپایي هېوادنو سره د سوداګریزو اړېکو د پراختیا په موخه پرون دوشنبه(د غبرګولي ۲۴مه) د چک جمهوریت په پراګ کې پای ته ورسېده.

نوموړی وايي، په دغې دوه ورځنۍ ناسته کې د صنعت او سوداګرۍ وزیر ښاغلي نثار احمد غوریاني او د هغه مل پلاوي د چک جمهوریت او سلواکیا هېواد، د دولتي او خصوصي سکتور چارواکو سره د افغانستان د سوداګریزو اړیکو د فرصتونو او ننګونو په اړه خبرې وکړې.

د افغانستان د سوداکرۍ او صنعت وزارت وايي، د دې ناستې په بهیر کې ښاغلي غوریاني او ورسره مل پلاوي د اقتصاد، صنعت او سوداګرۍ وزارتونو او د چک جمهوریت او سلواکیا هېواد د خصوصي سکتور استازو سره د افغانستان د اقتصادي، صنعتي، سوداګریزو او ټرانزیټي اړیکو د پراختیا په اړه هم خبرې کړي.

ترکیه: د کابل هوایي ډګر د ساتلو لپاره د امریکا ملاتړ ته اړتیا لرو

د ترکیې ولسمشر رجب طیب اردوغان

د ترکیې ولسمشر رجب طیب اردوغان وایي، هېواد به یې د کابل د هوایي ډګر د ساتلو په صورت کې د امریکا ملاتړ ته اړتیا ولري.

اروغان پرون دوشنبه(د غبرګولي ۲۴مه) د ناټو له سرمشریزې وروسته ویلي، که ناټو نه غواړي ترکي ځواکونه له افغانستانه ووځي، نو د دوی لپاره د امریکا سیاسي، لوژستیکي او مالي ملاتړ مهم دی.

د ناټو عمومي منشي ینس سټولټنبرګ هم ویلي، ترکیه د کابل هوایي ډګر په فعاله ساتلو کې ښه ونډه درلودلی شي: "ناټو او متحدان یې په اوس وخت کې پردې کار کوي چې په څه ډول د کابل د نړیوال هوایي ډګر د فعالیت دوام یقیني کولای شي. د نن ورځې د سرمشریزې ترڅنګ لیدنې کتنې ترسره شوې، بې له شکه چې ترکیه په دغو هڅو کې اساسي ونډه لري. موږ دقیقاً د دې چارې د بشپړولو پر لارو چارو غور کوو، خو د کابل د نړیوال هوایي ډګر د فعالیت د دوام لپاره د ناټو او د متحدانو له خوا یې یوه قوي ژمنه شته. دا د ناټو او زموږ د غیر نظامي حضور د دوام او هم د نړیوالې ټولنې لپاره مهم دی. د همدې لپاره د دې کار د بشپړولو لپاره ریښتینې هڅې کوو."

له دې وړاندې بیا افغان حکومت ویلي، ځواکونه یې د هوایي ډګر د ساتنې وړتیا لري.

طالبانو هم ویلي، د هېڅ یوه هېواد او په هېڅ نوم د بهرنیو ځواکونو پاتې کېدل ورته د منلو نه دي.

افغانستان ایران ته د افغان کډوالو په اړه خپله اندېښنه ښودلې

ارشیف، افغان کډوال

د افغانستان د بهرنیو چارو وزارت وایي، تهران کې یې د افغانستان سفارت ته نژدې د یو شمېر افغانانو د نیول کېدو په اړه ایراني چارواکو ته خپله اندېښنه ښودلې.

دې وزارت په یوه خبرپاڼه کې ویلي، دا موضوع له ډيپلوماتیکو لارو تعقیبوي او په خبره یې ایراني چارواکو هم د هر اړخیزې ارزونې ډاډ ورکړی دی.

د راپورونو له مخې یوه ډله افغان کډوال وړمه ورځ په تهران کې د افغانستان د سفارت له مخې د ایران د امنیتي ځواکونو له خوا نیول شوي دي.

د افغانستان حکومت د ایراني ځواکونو له خوا د نیول شوېو افغانانو شمېر نه دی مشخص کړی، خو ویلې یې دي، وروسته به یې له رسنیو سره جزییات شریک کړي.

د ایراني چارواکو له ژمنو سره سره وخت نا وخت دغه هېواد کې له مېشتو افغان کډوالو سره د زور زیاتي ورته پېښې کېږي.

ناټو د کابل هوایي ډګر د فعالیت د تمویلولو لپاره موافقه وکړه

کابل کې د حامد کرزي نړیوال هوايي ډګر

د ناټو مشرانو له افغانستانه د نړیوالو ځواکونو تر وتلو وروسته د کابل د هوایي ډګر د فعالیت د تمویلولو لپاره موافقه وکړه.

د ناټو سرمنشي ینس سټولټنبرګ پرون دوشنبه (د غبرګولي ۲۴مه) د دې تړون د ۳۰ غړیو هېوادونو د سرمشریزې په پای کې په یوه خبري کنفرانس کې وویل: " ناټو او متحدان یې په اوس وخت کې پردې کار کوي چې په څه ډول د کابل د نړیوال هوایي ډګر د فعالیت دوام یقیني کولای شي. د نن ورځې د سرمشریزې ترڅنګ لیدنې کتنې ترسره شوې، بې له شکه چې ترکیه په دغو هڅو کې اساسي ونډه لري. موږ دقیقاً د دې چارې د بشپړولو پر لارو چارو غور کوو، خو د کابل د نړیوال هوایي ډګر د فعالیت د دوام لپاره د ناټو او د متحدانو له خوا یې یوه قوي ژمنه شته. دا د ناټو او زموږ د غیر نظامي حضور د دوام او هم د نړیوالې ټولنې لپاره مهم دی. د همدې لپاره د دې کار د بشپړولو لپاره ریښتینې هڅې کوو."

په بروکسل کې د ناټو د سرمشریزې د پای په اعلامیه کې ویل شوي چې ناټو د ډیپلوماتیک او نړیوال حضور او هم له نړۍ سره د افغانستان د اړیکو لپاره د کابل د هوایي ډګر اهمیت درکوي او د فعالیت د دوام لپاره به یې بودجه تامین کړې.

ناټو همدارنګه ويلي چې د افغان امنیتي ځواکونو روزنې او تمویل ته به دوام ورکړي او د ډيپلوماتیک حضور د دوام لپاره به په کابل کې د ملکي استازولی دفتر وساتي.

په اعلامیه کې همدا شان د افغانانو په مشرۍ او مالکیت د سولې له پروسې د ناټو په ملاتړ ټینګار شوی دی.

د ناټو د ۳۰ غړیو هېوادونو دغه سرمشریزه چې د لومړي ځل لپاره د امریکا ولسمشر جو بایډن هم په کې ګډون کړی داسې مهال ترسره شوه چې ټول نړیوال ځواکونه به د روان کال د سېپټمبر میاشتې تر ۱۱مې له افغانستانه ووځي.

خلیلزاد د قزاقستان له ولسمشر سره پر افغان سولې غږیدلی

د افغانستان د سولې لپاره د امریکا ځانګړی استازی زلمی خلیلزاد او د قزاقستان ولسمشر جومارت توقاییف

د افغانستان د سولې لپاره د امریکا ځانګړې استازي پرون دوشنبه(د غبرګولي ۲۴مه) د قزاقستان له ولسمشر سره په افغان سوله کې د دې هېواد د همکارۍ پر موضوع خبرې وکړې.

په دې کتنه کې چې پرون دوشنبه په پلازمېنه نور سلطان کې ترسره شوه، زلمي خلیلزاد او قاسم جومارت توقاییف په افغانستان کې د سولې او ثبات د تامین په برخو کې په تېره بیا له دې هېواده د نړیوالو ځواکونو له وتلو وروسته د امریکا د متحدو ایالاتونو او قزاقستان د ستراتیژیکي همکارۍ د پراختیا په اړه خبرې وکړې.

د قزاقستان د رسنیو د راپورونو له مخې خلیلزاد په افغانستان او مرکزي اسیا کې د سولې د تامین لپاره په نړیوالو هڅو کې د قزاقستان هڅې وستایلې.

د قزاقستان ولسمشر هم ویلي چې د روسیې، چین او د نورو هېوادونو او نړیوالو سازمونو له مشرانو سره یې تل د افغانستان مساله راپورته کړې ده.

قزاقستان او د منځنۍ اسیا هېوادونه له افغانستانه د نړیوالو ځواکونو له وتلو وروسته دې ته اندېښنه لري چې ښایي له افغانستانه د سخت دریځو وسله والو فعالیتونه د دوی هېوادونو ته وغځیږي.

پکتیا کې چاودنې ۳ تنه ملکي وګړي ووژل

ارشیف، پکتیا کې د یوې چاودنې له سیمې پورته شوي لوګي

د پکتیا ځایي چارواکي وایي، د وسله‌والو طالبانو د ځای پر ځای شوي ماین چاودنې ۳ تنه ملکي وګړي وژلي دي.

د پکتیا د پولیسو ویاند محمد لعل امیري د دوشنبې په ورځ ماسپښین مهال رسنیو ته وویل چې دغه ملکي وګړي د زرمت ولسوالۍ په مموزیو سیمه کې په عامه لاره کې د خښ شوي ماین چاودنې له امله وژل شوي.

وسله‌والو طالبانو تر اوسه د دې چاودنې په اړه څه نه‌دي ویلي، خو د دې ډلې ویاند ذبیح‌الله مجاهد له دې وړاندې ویلي و چې د ګردېز-زرمت ترمنځ په یو شمېر لارو کې یې د نظامي قطارونو د مخنیوي په هدف ماینونه ځای پر ځای کړي دي.

په ټول افغانستان کې د ماشومانو د ګوزڼ یا پولیو واکسین کمپاین پیل شو

افغانستان کې د پولیو واکسین د کمپاین پيل

نن په ټول افغانستان کې د ماشومانو د ګوزڼ یا پولیو سراسري واکسین پیل شوی دی.

د عامې روغتیا وزارت، د روغتیا نړیوال سازمان او د ماشومانو لپاره د ملګرو ملتونو وجهي صندوق یونېسف په ګډه دا واکسیناسیون پیل کړی.

تمه ده د جون تر ۱۷مې شاوخوا نهه ملیونه او نهه لکه افغان ماشومان چې عمرونه‌یې له پنځو کلونو کم دي، واکسین شي.

د عامې روغتیا وزارت د اعلامیې له مخې د دغه وزارت سرپرست وحید مجروح ویلي له درې ملیونو او درې لکو زیات ماشومان به په یو شمېر سیمو کې د واکسین له اخیستلو محروم وي.

پولیو یوه ساري ناروغي ده چې د ملا د تیر ترمنځ مهمه عصبي رشته یا نخاع زیانمنوي او بالاخره د ناروغ د ګوزڼ سبب ګرځي.

قاضي محمد امین وقاد مړ شو

ارشیف، قاضي محمد وقاد د ازادي راډیو په یوه ژوندۍ خپرونه کې د ګډون پر مهال. 22September2011

جهادي قوماندان او د حزب اسلامي د شوراګانو د اتحاد غړی قاضي محمد امین وقاد نن وفات شو.

د ښاغلي وقاد زوی صهیب وقاد ازادي راډیو ته د هغه مړینه تأیید کړه.

هغه وویل چې پلار یې له دوو کلونو راهیسې ناروغ و او په دې وروستیو کې یې صحي وضعه د زړه او سږو د ناروغۍ له کبله ډېره نازکه وه چې بالاخره نن د اکسیجن د کمښت له امله وفات شو.

دا په داسې حال کې ده چې کرونا وبا هم ګڼې وتلې افغان څېرې اخیستې دي.

تازه نن د ولسمشر سلاکار او فرهنګي څېره محمد نبي مصداق هم ومړ.

ښاغلی مصداق کلونه په رسنیو کې کار کاوه.

تر دې مخکې پرون د اطلاعاتو او کلتور وزارت پخوانی مرستیال او لرغونپوه پروفیسور رسول باوري هم د کرونا له امله ومړ.

نور راوښيه

XS
SM
MD
LG