د لاسرسي لېنکونه

شنبه ۳۱ وری ۱۳۹۸ کابل ۰۳:۲۰

خلیل‌زاد: د سولې موافقې په اساسي شرطونو کې مهم پرمختګ شوی


د افغانستان د سولې لپاره د امریکا د بهرنیو چارو وزارت خاص استازی زلمی خلیل‌زاد

د افغانستان د سولې لپاره د امریکا د بهرنیو چارو وزارت خاص استازي زلمي خلیل‌زاد نن د جنورۍ ۳۱مه پر ټوېټر لیکلي چې له ترورېزم سره د مبارزې او له افغانستانه د بهرنیو ځواکونو د ایستلو په اړه چې د سولې د موافقې اساسي شرطونه دي، مهم پرمختګ شوی دی.

​خو د خلیل‌زاد په لیکنه، دا په‌دې معنی نه‌ده چې کار پای ته رسېدلی.

زلمي خلیل‌زاد ویلي چې د بین‌الافغاني خبرو د پېل او د بشپړ اوربند پر ټینګولو هم باید کار وشي چې حیاتي مسئلې دي.

خلیل‌زاد په یوه بل ټویټ کې لیکلي چې په افغانستان کې وضعیت پېچلی دی او د نورو حساسو بهیرونو په څېر د سولې د هڅو جزئیات په عام محضر کې نه‌شي مطرح کولای.

د خلیل‌زاد په لیکنه، شکاک خلک مخکې له وخته او د دې پراخې پروسې د یوې برخې پر اساس داسې قضاوت کوي لکه موږ چې موافقه بشپړه کړې وي.

خو خلیل‌زاد لیکلي چې فیل په یوه ګوله کې نه خوړل کېږي او همداسې د څلوېښتو کلونو جنګ په یوه غونډه کې نه ختمېږي.

خلیل‌زاد په یوه بل ټویټ کې لیکلي چې دا پروسه زیات مسایل، ډېر لوبغاړي او خوځېدونکي برخې لری خو لکه څرنګه چې د امریکا ولسمشر ویلي، د سولې هڅې پر سم لور په حرکت کې دي.

XS
SM
MD
LG