د کابل امنیه قوماندانۍ وايي، په کابل کې د دوشنبې ماښام چاودنه کې څلور تنه وژل شوي او ۹۰ تنه ټپیان دي .
د کابل د امنیه قوماندانۍ ویاند بصیر محاهد زیاتوي ۳ پوځیان د وژل شوېو،۲۳ ماشومان او ۱۲ مېرمنې ددې پېښې د ټپیانو په ډله کې دي.
ښاغلي مجاهد ددې خبرې په ټینګار سره چې ددې پېښې ډیرۍ قربانیان ملکیان دي وايي چې د چاودنې د شدت له امله د سیمې ډېری کورونه زیانمن شوي دي.
تر اوسه کومې وسله والې ډلې ددې پېښې پړه نه ده منلې.
د افغانستان د کورنیو چارو وزارت ویاند نجیب دانش له ازادي راډيو سره په خبرو کې د کابل د نننۍ پېښې ځای د کابل-جلالاباد په لویه لار ګمرک ته نږدې د ګرین وېلېج په نوم د بهرنیانو کمپ وښود.
ده وویل، نن ماښام اووه بجې په ګرین وېلېج د موټر بم په واسطه ترورېستي حمله شوې، خو اوس وضعیت تر کنټرول لاندې دی.
دی وايي، ځانګړي ځواکونه سیمې ته رسېدلي، خو د مرګ ژوبلې په اړه لا جزئیات نهشي ورکولای.
د پېښې مسؤلیت لا کوم چا په غاړه نهدی اخیستی.
د افغانستان د عامې روغتیا وزارت وایي، د کابل د نننۍ چاودنې له ځایه چې څو شېبې وړاندې وشوه، روغتونونو ته تر ۴۰ زیات ټپیان انتقال شوي دي.
د دغه وزارت ویاند وحید مایار ازادي راډيو ته وویل چې تر اوسه د دغې پېښې د وژل شویو په اړه معلومات په لاس کې نهلري.
د ده په خبره، د پېښې ځای د کابل ښار په نهمه حوزه کې ممکن د بهرنیانو یو کمپ وي.