د لاسرسۍ وړ لېنکونه

تازه خبر
شنبه ۳۱ غویی ۱۴۰۱ کابل ۰۱:۱۵

افغانستان

اروپایي ټولنه د افغانستان د سولې او ثبات د تامين لپاره مرسته کوي

حمدالله محب او پیری مایدون

په افغانستان کې د اروپايي تولنې استازی وايي چې دا ټولنه اماده ده چې له دولت او افغانانو سره د سولې او ثبات د تامين لپاره مرسته وکړي.

پيري مايدون دا خبره پرون تر غرمې وروسته د افغانستان د ملي امنيت له سلاکار حمدالله محب سره په کابل کې د کتلو پر مهال وکړه.

د افغانستان د ملي امنیت شورا په يوه اعلاميه کې ويلي چې په دې کتنه کې پر بېلابېلو موضوعاتو په ځانګړې توګه، د سولې، امنیت او له ترورېزم سره د مبارزې او د افغانستان او اروپايي ټولنې تر منځ د همکارۍ په اړه خبرې وشوې.

په دې اعلامیه کې راغلي چې ښاغلي محب د دې غونډې پر مهال له طالبانو سره د سولې په خاطر د بين الافغاني مذاکراتو د نويو ميکانيزمونو په اړه خبرې وکړې.

د ورځې تازه خبرونه دلته ولولئ

طالبان د مخکیني نظام پوروړو شرکتونو ته پاتې پیسې ورکوي

د پورونو له ورکړې سره به ساختماني او لوژیستیکي شرکتونه پاتې پروژې هم بشپړوي.

د طالبانو د ټولګټو وزارت وايي، هغه ساختماني او لوژیستیکي شرکتونه چې د تېر نظام پر مهال يې د بېلابېلو پروژو له درکه حکومت پوروړی دی د پورونو د ادا کولو لپاره يې یو کمېسیون جوړ شوی.

دغه وزارت تېره روځ په خپل توېټر پاڼه ولیکل، چې د وزارت چارواکو تېره ورځ د یو شمېر شرکتونو له مسوولینو سره په لیدنه کې دوی ته د پورونو د ورکړې ترڅنګ د نویو پروژو ژمنه هم ورکړې.

وزارت وړاندې لیکلي، چې د پورونو له ورکړې سره به ساختماني او لوژیستیکي شرکتونه پاتې پروژې هم بشپړوي.

دا په داسې حال کې ده، چې د ساختماني شرکتونو یو شمېر مالکانو شاوخوا درې میاشتې وړاندې په کابل کې د پرلپسې لاریونونو له لارې د خپلو پورونو د اخیستو غوښتنه کړې وه.

دوی هغه مهال ویلي و، چې په تېر حکومت کې یې زیاتې پروژې عملي او بشپړې کړې وې خو پیسې یې نه دي ترلاسه کړي.

ملابرادر په دوبۍ کې د یو شمېر لوژیستیکي شرکتونو مشرانو سره لیدلي

د طالبانو د رییس الوزرا لومړی مرستیال او د اقتصادي کمېسیون مشر ملا عبدالغني برادر

د طالبانو حکومت د رییس الوزرا لومړي مرستیال او د اقتصادي کمېسیون مشر ملا عبدالغني برادر په دوبۍ کې د یو شمېر لوژیستیکي شرکتونو مشرانو سره لیدلي.

د لومړي معاونیت په ټوېټر پاڼه لیکل شوي، چې برادر په دوبۍ کې د "څو ملیتي لوژیستکي کمپنۍ" له مشر محمد المعلم سره په لیدنه کې د سوداګرۍ په برخه کې د زیاتو اسانتیاو غوښتنه کړه.

د "څو ملیتي لوژیستیکي کمپنۍ" مسوولینو طالب پلاوي ته د هر ډول همکارۍ ډاډ ورکړی او دواړو خواو په دې هوکړه کړې چې د پاتې کارنو د پرمختګ لپاره یوه کمېټه جوړه شي.

د شوې هوکړې له مخې، هغه افغان سوداګر چې د دوبۍ له لارې نورو هېوادونو ته صادارات او واردات کوي د "څو ملیتي لوژیستیکي کمپنۍ" لخوا به ورته په لوژیستیکي برخو کې اسانتیاوې رامنځته کېږي.

دا په داسې حال کې ده، چې افغان سوداګرو په افغانستان کې د سیاسي بدلون وروسته نړیوال مارکېټ ته د لاسرسي په برخه کې له جدي ستونزو سره مخ دي.

طالبان: د کرومایټ د استخراج مزایده لسو شرکتونو ګټلې

عکس: آرشیف

د طالبانو د حکومت د کانونو او پټرولیم وزارت وايي، د افغانستان د کرومایټ د کانونو د استخراج مزایده لسو شرکتونو ګټلې ده.

دې وزارت په یوه خبرپاڼه کې چې پرون خپره شوه ویلي، دي چې ۲۱۴ شرکتونو په مزایده کې ګډون کړی و.

د خبرپاڼې له مخې د دې مزایدې ګټونکي لس شرکتونه به د کندهار، زابل او لوګر له کانونو څخه کرومایټ استخراجوي.

کرومایټ له اوسپنې ډکه تیږه ده، چې د ډېرو کلکو وسایلو په جوړولو کې کارول کېږي.

په خوست کې د کرکټ جام اتلولي هندوکش لوبډلې وګټله

وروستۍ پایلوبه د هندوکش سټرایکرز او پامیر لجنډز د لوبډلو ترمنځ پرون ترسره شوه.

په خوست کې د زرغون افغانستان په نوم د کرکټ د جام اتلولي د هندوکش سټرایکرز لوبډلې وګټله.

وروستۍ پایلوبه د هندوکش سټرایکرز او پامیر لجنډز د لوبډلو ترمنځ پرون ترسره شوه.

په پرونۍ لوبه کې پامیر لجنډز په ۳۳ اوورنو کې سیالې لوبډلې ته د ۲۰۴ منډو هدف ټاکلی و، چې هندوکش سټرایکرز په وروستي اوور کې ورورسېد.

د زرغون افغانستان د پنځوس اووریزو لوبو ټورنمنټ د مې د میاشتې په اتمه د هندوکش سټرایکرز، پامیر لجنډز او میوند ساتونکو لوبډلو ترمنځ پیل شو او د مې تر شلمې پورې یې دوام وکړ.

د طالبانو حکومت د رسنيزو سرغړونو د څېړنو کمېسيون بيا فعاله کړی

د افغانستان د يو خصوصي ټلوېزيون تخنيک خونه

د طالبانو ویاند او د اطلاعاتو او فرهنګ وزارت مرستیال ذبیح الله مجاهد د پنجشنبې په ورځ یوه ټویټ کې وویل، د دغه کمېسیون فعالول یې د رسنیو د ملاتړ او د رسنیزو شکایتونو د اوریدو په برخه کې د ژمنتوب څرګندونه کوي.

په همدې حال کې د افغانستان د خبریالانو فدراسیون او رسنیزو بنسټونو یوه خبرپاڼه کې ویلي، د رسنیزو سرغړونو د ارزونې کمېسیون هغه مهال ګټور ثابتېدای شي چې په خپلواکه، مسلکي او شفافه بڼه فعالیت وکړي.

طالبان داسې مهال دا اقدام کوي چې د دوی د بیا ځلې حکومت له پيله سلګونه رسنۍ تړل شوي، پر رسنیو محدودیتونه زیات شوي او خبریالان په عام محضر کې وهل ټکول او ان توقیف شوي دي.

دايکندي: ترافيکي پېښه کې درې ښځې وژل شوي او ۷ کسان ژوبل دي

ارشيف

د افغانستان د یو شمېر کورنیو رسنیو د راپور له مخې دایکندي ولایت کې ترافیکي پیښې درې ښځې وژلي او د ښځو او ماشومانو په ګډون یې ۷ تنه ټپیان کړي دي.

دا پېښه پرون د دایکندي په میرامور ولسوالۍ کې هغه مهال وشوه چې یو فلنګکوچ ډوله موټره له سړکه ووت او چپه شو.

د راپورونو له مخې ټپیان د غزني روغتون ته بیول شوي دي.

افغانستان کې د ترافيکي پېښو لاملونه تر ډېره د لويو لارو خرابوالی او د موټر چلوونکو تېز سرعت يادېږي.

د هوا پېژندنې ادارې په اوه ولايتونو کې د سېلابونو د راوتلو خبر ورکړی

ارشيف

د افغانستان د هوا پېژندنې ادارې په ۷ ولایتونو کې د یو څه شدید باران او سېلابونو خبرداری ورکړی دی.

دغه ریاست پرون په یوه بيان کې وویل چې سمنګان، تخار، بدخشان، بامیان، بغلان، پنجشېر او نوروستان ولایتونو کې به د جمعې په ورځ باران وریږي او ممکن سېلونو هم په کې راووځي.

څه باندې دوه اونۍ مخکې هم شدیدو بارانونو او سېلونو افغانستان کې له شلو زیات کسان مړه کړل، سلګونه کورونه یې ویجاړ او شاوخوا درې زره هکتاره کرنیزه ځمکه یې خرابه کړه.

طالبانو بهر ته د غنمو پر انتقال بنديز لګولی

د افغانستان ډېری غنم نورو هېوادونو ته لېږدول کېږي چې ورسره پر کور دننه د غنمو او اوړو بيې هم پورته کېږي.

د طالبانو حکومت ويلي دي، له افغانستان څخه بهر نورو هېوادونو ته يې د غنمو پر لېږد بنديز لګولی دی.

د طالبانو ویاند ذبیح الله مجاهد د مالیې وزارت په حواله پرون ماښام پر خپله ټویټر پاڼه لیکلي، دې برخه کې ټولو ګمرکونو ته لارښوونه لېږل شوې ده.

نوموړي د دې ګام لامل په هېواد کې دننه د غنمو د کمښت مخنیوی بللی دی.

ازادي راډیو ته د فراه، هلمند او یو شمېر نورو ولایتونو اوسیدونکو شکایت کړی و چې سږ کال د غنم لو په وخت کې هم د غنمو بیې د نورو کلونو پرتله لوړې دي او لامل یې همدا ښودلی چې پاکستان ته انتقالیږي.

افغانستان کرکټ ملي لوبډلې زېمبابوې سره د کرکټ سيالۍ لري

د افغانستان د کرکټ ملي لوبډله

ټاکل شوې د افغانستان او کوربه هېواد زېمبابوې ترمنځ د روان کال په جون میاشت کې درې یو ورځنۍ او درې شل اوریزه سیالۍ ترسره شي.

د ورزشي اژانسونو د راپورونو له مخې، دغه سیالۍ چې باید په ۲۰۲۰ م کال کې ترسره شوي وای، خو د بېلابېلو ستونزو له امله تر ۲۰۲۲ م کال وځنډېدې.

د زېمبابوې لخوا د اعلان شوي مهالوېش له مخې د دواړو هېوادونو ترمنځ ۵ شل اوریزه او درې یو ورځنۍ سیالۍ اعلان شوي وې.

خو افغان کرکټ بورډ په خپله وروستۍ خبر پاڼه کې د دواړو هېوادونو ترمنځ د دریو یو ورځنیو او دریو شل اوریزه سیالیو یادونه کړې ده.

کندهار کې د کورش سيالۍ پيلېږي

آرشیف

ټاکل شوې راتلونکې اونۍ د کندهار په سپین بولدک کې د ۹ ولایتونو ترمنځ د کورش سیالۍ پیل شي.

د افغانستان د بدني روزنې او ورزش ریاست په خپل فیسبوک پاڼه لیکلي چې دا سیالۍ د زابل، کندهار، هلمند، ارزګان، نيمروز، فراه، هرات، غور او بادغيس ولايتونو ترمنځ دي.

د دې ریاست په وینا، دغه سیالۍ به د جوزا په درېیمه پیل او د او همدې میاشتې تر ۶ مې دوام وکړي.

د یادو سیالیو هدف ورزش ته د ځوانانو هڅول ښودل شوي.

د افغانستان د ١٦ کلنو فوټبال لوبډلې خپله وروستۍ لوبه ايران ته وبايلله

د افغانستان د ۱٦ کلنو فوټبال ملي لوبډله

د افغانستان د ١٦ کلنو فوټبال ملي لوبډلې د مرکزي اسیا د اتلولۍ په لړ کې خپله څلورمه او وروستۍ لوبه له ایران سره تېره ورځ وکړه چې ۱ پر صفر یې وبایلله.

د افغانستان فوټبال فدراسیون په خپل فیسبوک پاڼه لیکلي، چې دا سیالۍ د تاجیکستان په کوربتوب د دغه هېواد په پلازمېنه دوشنبه ښار کې وشوه.

د فدراسیون په وینا، د دغې لوبې سره افغانستان د مرکزي اسیا په اتلولۍ کې د دوو لوبو په مساوي کولو او دوو لوبو په ماتې خوړولو سره خپل سفر پای ته ورساوه.

د مرکزي اسیا د اتلولۍ سیالۍ د تاجکستان په دوشنبې ښار کې روانې دي، چې د افغانستان ترڅنګ د قرغزستان، تاجکستان، ازبکستان او ایران لوبډلو په کې ګډون کړی دی.

د پکتیکا سوداګر د انګور هډې بندر کې د ستونزو حل غواړي

د انګور هډې د بندر یوه څنډه

د پکتیکا یو شمېر سوداګر د انګور هډې په بندر کې د خپلو ستونزو د حل غوښتنه کوي.

د افغانستان د سوداګرې او پانګونې خونې د یوې اعلامیې په خپرولو سره ویلي، چې دغو سوداګرو تېره ورځ د خونې له چارواکو سره په کابل کې لیدلي.

د خونې د اعلامیې په پر بنسټ، د پکتیکا سوداګرو په انګور هډه کې د ګمرکي ستونزو، لوړو تعرفو، او د ټرانزیټ په وړاندې د خنډونو د لرې کېدو غوښتنه کړې.

په اعلامیه کې وړاندې راغلي، چې د خونې چارواکو راغلو سوداګرو ته د ستونزو د هوارۍ په برخه کې د همکارۍ ډاډ ورکړی.

دا په داسې حال کې ده، چې له دې وړاندې هم په انګور هډه کې د افغان سوداګرو په وړاندې د ګن شمېر ستونزو راپورنه ورکړل شوي وو.

طالبان په اماراتو کې سوداګرو ته: په افغانستان کې پانګونه وکړئ

آرشیف: هرات کې د يوې فابریکې انځور

د طالبانو د صنعت او سوداګرۍ وزارت وايي، عربي متحده اماراتو ته تللي افغان پلاوي هلته له مېشتو افغان سوداګرو سره تر ليدنې وروسته له هغوی غوښتي، چې په خپل هېواد کې پانګونه وکړي.

دغه وزارت تېره ورځ په خپل ټويټر پاڼه لیکلي، چې مسوولينو افغان سوداګرو ته په دننه افغانستان کې د هر ډول همکارۍ ډاډ ورکړی.

وزارت وړاندې لیکلي، چې تللي پلاوي افغان سوداګرو ته په خطاب کې ویلي، اوسمهال په افغانستان کې فساد ختم شوی او د هر ډول پانګونې لپاره زمینه برابره ده.

دا د طالبانو له واکمنېدو وروسته په عربي متحده اماراتو کې د طالب چارواکو او افغان سوداګرو لومړنۍ ناسته ده چې کېږي.

دا لیدنه داسې مهال ترسره شوه، چې د طالبانو له واکمنېدو سره ډېرى افغان سوداګرو خپلې پانګې له افغانستانه بهر ته وویستلې.

سرچینې: ترکیه کې د افغانستان د ژغورنې لپاره د مقاومت عالي شورا جوړه شوه

د عکس ښي لور ته د پخواني ولسمشر محمد اشرف غني لومړی مرستیال مارشال عبدالرشید دوستم او چپ لور ته د بلخ پخوانی والي عطا محمد نور

د طالبانو یو شمېر مخالف مشران چې د ترکیې په پلازمېنه انقره کې راغونډ شوي وو، د افغانستان د ژغورنې لپاره د مقاومت عالي شورا جوړه کړه.

یو شمېر سرچینو چې په دې غونډه کې یې ګډون کړی وو، وایي دا غونډه په انقره کې د مارشال عبدالرشید دوستم په کوربه توب د هغه په کور کې جوړه شوې وه.

د دغې غونډې په اړه د ګډې اعلامیې ترڅنګ د ګډونووالو هغه فهرست چې دغو سرچینو ازادي راډیو ته رااستولی، د شاوخوا څلویښتو سیاسي شخصیتونو له ډلې د شلو کسانو نومونه ذکر شوي دي.

په دغو شخصیتونو کې جهادي مشرعبدرب الرسول سیاف، د جمعیت اسلامي د ګوند د بیلې شوې ډلې مشر عطامحمد نور، د حزب وحدت اسلامي افغانستان مشر حاجي محمد محقق، د ولسي جرګې پخوانی مشر میر رحمان رحماني او د یو شمېر نورو سیاسي څېرو نومونه لیدل کېږي.

د غونډې اکثره ګډونوالو چې د طالبانو د پخوانۍ واکمنۍ د وخت د شمالي ټلوالې ډلې غړي دي، په تېر جمهوري نظام کې لوړې دندې درلودې او ډېر ځلې یې هم د هغه نظام مخالف دریځ غوره کړی و.

د ولسي جرګې پخوانی غړی رحمان اوغلو چې اوس په ترکیه کې اوسي او د دې غونډې یو ګډونوال و، پرون د ورځې ناوخته د دې غونډې په اړه ازادي راډیو ته وویل، دا مشران د افغانستان د ژغورنې لپاره د مقاومت د عالي شورا پر جوړولو خبرې کوي او زیاته یې کړه، دوی هڅه کوي چې لس کمېټې جوړې کړي چې یوه یې هم نظامي کمېټه ده چې پرې توافق شوی دی.

دغو سرچینو دغه راز ویلي، چې د طالبانو ضد د ملي مقاومت د جبهې مشر احمد مسعود هم د دې شورا غړیتوب لري.

د طالبانو حکومت چې ترکیه ورسره ښې اړیکې پالي، تراوسه پورې د دې غونډې په وړاندې غبرګون نه دی ښودلی.

د زابل په شاجوۍ کې لسګونه کسان په یوې ناپېژندل شوې ناروغۍ اخته شوي

د افغانستان په عمومي نقشه کې د زابل ولایت موقعیت

د زابل روغتیايي چارواکي وايي، د دغه ولایت په شاجوۍ ولسوالي کې لسګونه کسان په یوې ناپېژندل شوې ناروغۍ اخته شوي دي.

د زابل د عامې روغتیا رييس عبدالحکیم حکیمي پرون رسنیو ته وویل، چې د شاجوۍ په شیخان کلي کې لسګونه ماشومان او لویان په دې ناروغۍ اخته شوي دي.

د ده په وینا تراوسه پورې د شاوخوا سل تنو درملنه شوې خو د ۲۰ تنو نورو حال نازک دی.

نور راوښيه

XS
SM
MD
LG