افغانستان
د کندز چارواکي: طالبانو په دشت ارچي ولسوالۍ کې حمله کړې
![](https://gdb.rferl.org/688B3045-432B-4CA2-812E-3EE9C11F0DD6_w250_r1_s.png)
په کندز کې امنیتي مسوولین وايي چې وسلهوالو طالبانو په دشت ارچي ولسوالۍ کې حمله کړې ده.
د ملي اردو د پامیر ۲۰ فرقې ویاند، ډګرمن غلام حضرت نن د ازادي راډیو خبریال ته وویل چې د دشت ارچي په حمله کې ۷ عسکر وژل شوي او څلور تنه زخمیان دي.
هغه وویل چې ۱۲ وسله والو طالبان هم وژل شوي او ۱۹ تنه زخمیان شوي دي.
کریمي وویل چې وسله والو طالبانو پرون د شپې په ۱۲ بجو له درېیو خواوو پر دشت ارچي ولسوالۍ حمله وکړه خو د امنیتي ځواکونو د مقاومت له امله وتښتېدل.
خو د وسله والو طالبانو ادعا کړې چې په دشت ارچي کې یې درې پوستې نیولي او د امنیتي ځواکونو ۳۹ تنه وژل شوي دي.
د ورځې تازه خبرونه دلته ولولئ
په کندهار کې ۳۰ ښځې د قابلهګۍ له کورس فارغې شوې
![د افغانستان په عمومي نقشه کې د کندهار ولایت موقعیت](https://gdb.rferl.org/4A5F9128-0B91-4DE1-BF3E-A1E7E7C36639_w250_r1_s.png)
په کندهار کې دېرش ښځې قابلې شوې.
دې ښځو ته د زده کړو دا بهیر د ملګرو ملتونو د کډوالو د چارو د ادارې او "اېسيایچ آراو" موسسې په مرسته چمتو شو.
د ملګرو ملتونو د کډوالو د چارو ادارې د دې ښځو د فراغت خبر نن په خپلې ایکسپاڼه یا ټویټر کې خپور کړی او څرګنده کړې یې ده چې له دوی سره په دې برخه کې د جاپان یوې موسسې هم همکاري کړې ده.
په افغانستان کې د نجونو پر مخ د طب زده کړې له یو کال او څه باندې درې میاشتو راهیسې بندې دي، خو له تېر یوه کال راهیسې طالبانو په یو شمېر ولایتونو کې ښځو ته اجازه ورکړې چې د قابلهتوب زده کړې وکړي.
ډيکر نجونو او ښځو سره د طالبانو پر چلند سخت انتقاد وکړ
![د افغانستان لپاره د امریکا د سفارت شارژدافیړه](https://gdb.rferl.org/01000000-0aff-0242-52b4-08dbb5f9e185_w250_r1_s.jpeg)
د افغانستان لپاره د امریکا د متحدو ایالتونو شارژدافیرې کرن ډیکر له نجونو او ښځو سره د طالبانو پر چلند سخت انتقاد وکړ.
دې پرون ناوخته د قطر له پلازمېنې دوحې څخه په انلاین غونډه کې له یو شمېر افغان رسنیو سره د خبرو پرمهال وویل چې دا درېیم پرله پسې کال دی چې نجونې له شپږم ټولګي ورپورته له زده کړو محرومې دي او طالبانو د څه باندې دوه نیم کلنې واکمنۍ پرمهال د افغان مېرمنو د محدودولو لپاره تر پنځوسو زیات فرمانونه خپاره کړي دي چې څه به کوي، چېرته به ځي او څرنګه به جامې اغوندي.
اغلې ډیکر زیاته کړه چې په نړۍ کې بل هیڅ هېواد په دې ډول خپل نیمایي نفوس نه دی حذف کړی.
د افغانستان لپاره د امریکا شارژدافیرې بیا وویل چې پر ښځو د طالبانو دا بندیز هر کال افغانستان ته په میلیارډونو ډالر زیان اړوي او دا هېواد د دې زیان د زغم توان نه لري.
بښنې نړېوال سازمان: پاکستان دې افغان کډوال نه وباسي
![پاکستان کې يو شمېر افغان کډوالې](https://gdb.rferl.org/01000000-0a00-0242-fe56-08dc00b066be_w250_r1_s.jpg)
د بښني نړیوال سازمان له پاکستانه غواړي چې له خپلې خاورې افغان کډوال ونه باسي او د ښځو او نجونو د امنیت د خوندیتوب لپاره لازم اقدامات وکړي.
د بښني نړیوال سازمان پرون په ایکسپاڼه( پخواني ټویټر) کې ولیکل چې له پاکستانه په زوره د افغان کډوالو ایستل به نجونې او ښځې له زیات خطر سره مخامخ کړي.
د اسلام اباد او په کابل کې د واکمنو طالبانو د وروستیو اختلافاتو په درشل کې داسې راپورونه خپاره شوي دي چې پاکستان به تر اختر وروسته له خپلې خاورې د افغان کډوالو د ایستلو بهیر ګړندی کړي.
يو شمېر معترضو افغان ښځو د منيژه صدیقي د وضعیت په اړه اندېښنه وښوده
![منيژه صدیقي - ارشيف](https://gdb.rferl.org/01000000-0aff-0242-59b9-08dbd48836a7_w250_r1_s.jpg)
د افغان ښځو یوې معترضې ډلې د طالبانو په زندان کې د منیژې صدیقي روغتیایي وضعیت ته اندېښنه ښکاره کړې او ويلي چې د ښځو دا فعاله طالبانو شکنجه کړې ده.
د « زنان از دریچه امید» په نوم د ښځو معترضه ډله چې په پاکستان کې مېشته ده، پرون په ایکسپاڼه( پخواني ټویټر) کې د بشري حقونو پر فعالانو نیوکه کړې ده چې د میرمن صدیقي په ناڅرګند برخلیک پټه خوله پاتې دي.
منیژه صدیقي د جنبش خود جوش زنان غړې د دوه زره درویشتم کال د اکتوبر له میاشتې راهیسې د طالبانو په بند کې د
ه.
د خبریالانو يوه بنسټ د طالبانو له بنده د دوو افغان خبریالانو د خوشې کېدو غوښتنه وکړه
![سمبوليک تصوير - ارشيف](https://gdb.rferl.org/01000000-0aff-0242-3ee5-08dbb9be9e88_w250_r1_s.jpg)
په اروپا او شمالي امریکا کې د افغان خبریالانو بنسټ د طالبانو له بند څخه د هرات د سولې د جهاني تلویزیون د مسوول رامین امیري او په کندوز کې د یک تلویزیون د خبریال عبداله واحدي د خوشې کیدو غوښتنه وکړه.
دغه بنسټ نن په یوه خبرپاڼه کې په افغانستان کې د ملګرو ملتو پر مرستندویه پلاوي( یوناما) غږ کړی چې د دې خبریالانو د خوشې کېدو لپاره زمینه برابره کړي.
تر اوسه د طالبانو له لوري د دې دوو خبریالانو د نیولو علت نه دی معلوم.
تر دې مخکې په بهر کې د افغان خبریالانو دې بنسټ ادعا کړې وه چې په څوارلس زره دوهم کال کې نژدې هره اوونۍ د طالبانو له لوري یا یو خبریال نیول شوی یا یوه امنیتي پېښه خبریال ته پیدا شوې چې په هغې کې طالبان لاس لري.
فراه؛ ترافیکي پېښې ۳ تنه مړه او ۶ نور ټپیان کړل
![د افغانستان په نقشه کې فراه ولایت](https://gdb.rferl.org/857DAE7E-AFE1-4E3F-889E-B6AC532F8BF9_w250_r1_s.png)
د فراه د ترافیک آمریت په وینا، د دوو موټرو د ټکر په پېښه کې ۳ تنه مړه شوي او ۶ نور ټپیان دي.
په فراه کې د ترافیکي پېښو د ادارې امر سنګین شېرزي ازادي راډیو ته وویل چې پرون په بالابلوک ولسوالۍ کې یو سراچه موټر له یوه ټیلري موټر سره ټکر شو.
د شېرزي په وینا، ټپيان د هرات حوزوي روغتون ته لېږدول شوي دي.
شېرزي د پېښې علت د موټروانانو بې پروایي بللې ده.
د فراه په ګاونډ هلمند ولایت کې تېره اوونۍ په یوه ترافیکي پېښه کې لږ تر لږه ۲۱ کسانو خپل ژوند له لاسه ورکړ او ۳۸ نور ټپیان شول.
افغاني سره میاشت: ۲۵ په زړه سوري ماشومان مو د کابل روغتونونو ته معرفي کړل
![د افغاني سرې میاشتې ټولنې لوګو](https://gdb.rferl.org/245D9EDF-8AD9-47DE-BD52-AFC8E5977636_cx0_cy4_cw0_w250_r1_s.jpg)
افغاني سرې میاشتې پنځه ویشت هغه ماشومان چې د سوري زړه له ناروغۍ کړیږي، په کابل کې دوو روغتونونو ته معرفي کړې دي.
سرې میاشتې په یوه خبرپاڼه کې چې پرون یې خپره کړه ویلي دي چې د دې ناروغانو لګښت یې په غاړه اخیستی دی.
په تېر څه باندې یو نیم کال کې افغاني سرې میاشتې نژدې ۳ زره هغه ماشومان چې د سوري زړه ناروغي یې لرله په کورنیو روغتونونو کې بستر کړي دي.
د طالبانو تر بیا واکمنۍ مخکې به د سوري زړه ناروغ ماشومان اکثر د درملنې لپاره جرمني ته استول کېدل.
یوناما: اسلام اباد ته یو پلاوی لېږو چې د افغان کډوالو د ایستو د مخنیوي غوښتنه وکړي
![پاکستان کې یو شمېر افغان کډوال چې هلته د قانوني استوګنې کارتونه یې ښيي](https://gdb.rferl.org/01000000-0aff-0242-43f1-08dc28b5d342_w250_r1_s.jpg)
ټاکل شوې ده چې په افغانستان کې د ملګرو ملتونو د مرستندویه پلاوي( یوناما ) یو هیات په لنډ راتلونکې کې پاکستان ته ولاړ شي او د هغه هېواد له چارواکو سره د افغان کډوالو پر مسالې خبرې وکړي.
په بشري چارو کې د یوناما مرستیال او د افغانستان لپاره د ملګرو ملتونو د بشري او پراختیایي ټولنې مشر اندریکا راټوټ پاکستان ته د یوناما د پلاوي د استولو خبر ورکړی دی، خو دا یې نه دي ویلي چې په کومه ورځ به دا هیات اسلام اباد ته روانیږي.
ښاغلي راټوټ د طالبانو د حکومت د ریاست الوزرا له سیاسي مرستیال مولوي عبدالکبیر سره د سې شنبې په ورځ د یوې غونډې پرمهال پر دې خبرې وکړې چې یوناما به پاکستان وهڅوي چې تر اختر وروسته افغان کډوال په زوره له خپلې خاورې ونه باسي.
پاکستان د دوه زره درویشتم کال له نومبر راپه دې خوا څه باندې پنځه لکه شل زره کډوال افغانستان ته استولي دي.
نوي راپورونه وایي چې له اختر وروسته به هغه افغانان هم له خپلې خاورې وباسي چې د مهاجرت ځانګړي کارتونه لري.
د پاکستان د دفاع وزیر: افغانستان د ټولو ترهګریزو پېښو سرچینه ده
![د پاکستان د دفاع وزیر خواجه محمد اصف](https://gdb.rferl.org/B52ECFA4-E239-4C19-A327-744B0FBB4726_w250_r1_s.jpg)
د پاکستان د دفاع وزیر خواجه محمد اصف وايي، افغانستان د ټولو ترهګریزو پېښو سرچینه ده.
اصف دا څرګندونې نن د مارچ۲۷مه پر خپلې ایکس پاڼې یا پخواني ټویټر لیکلي او ادعا يې کړې چې په پاکستان کې د ترهګرۍ سرچینه په افغانستان کې ده.
نوموړي په افغانستان کې د طالبانو پر حکومت تور پورې کړی چې دوی په افغانستان کې د وسلهوالو له "پټنځایونو خبر دي"، خو د ده په ټکو "د پاکستان پر ضد ازاد بریدونه کوي."
طالبانو تراوسه د اصف څرګندونو ته غبرګون نه دی ښودلی.
اصف وړاندې ویلي، پر ډیورنډ کرښې یوازې هغوو کسانو ته د تګ راتګ اجازه ورکول کېږي چې پاسپورټ او یزه ولري.
د پاکستان حکومت ټولو افغان موټرچلوونکو د مارچ تر پای ته مهلت ورکړی چې د تګ راتګ لپاره پاسپورټ او ویزه ترلاسه کړي، کنه پاکستان ته د داخلېدو اجازه نه ورکول کېږي.
طالبانو له یونسکو څخه د تاریخي سیمو د ساتنې برخه کې د مرستې غوښتنه کړې
![د بودا مجسمې. طالبانو په خپله لومړۍ واکمنۍ کې دغه مجسمې وراندې کړې وې.](https://gdb.rferl.org/e02addbf-b8dc-4c09-b4e2-831a1352b1fe_cx0_cy25_cw0_w250_r1_s.jpeg)
طالبانو د یونسکو له مشر څخه د افغانستان د تاریخي او فرهنګي سیمو د ساتنې په برخه کې د مرستې غوښتنه کړې ده.
د طالبانو تر کنټرول لاندې باختر خبري اژانس نن د مارچ ۲۷مه پر خپلې ایکس پاڼې یا پخواني ټویټر ویلي، د اطلاعاتو او کلتور وزارت د هنر او کلتور مرستیال عتیق الله عزیزي د یونسکو له مشر برانډن سره په کتنه کې د افغانستان د هغو تاریخي او فرهنګي سیمو د ساتنې په برخه کې د مرستې غوښتنه کړې چې د ویجاړېدو له ګواښ سره مخ دی.
طالبان د ملګرو ملتونو ښوونیز، علمي او کلتوري سازمان یا یونسکو څخه دا غوښتنه په داسې حال کې کوي چې د افغانستان په ډېر شمېر سیمو کې فرهنګی او تاریخي اثار د ویجاړېدو له خطر سره مخ دی.