د کابل ورځپاڼو نن تر ډېره د انتخاباتو او د انتخاباتي شکایتونو د کمېسیونونو ترمنځ پر موجوده اختلافاتو بحثونه کړي دي.
- ویسا
ویسا ورځپاڼې په خپل لومړي مخ کې د انتخاباتي شکایتونو د کمېسیون پر دې پرېکړې بحث کړی چې ویلي یې دي، د بایو مټریک پرته کارول شوې رأیې باطلې او د اعتماد وړ نهدي.
خو ورځپاڼې پهدې اړه د انتخاباتو د خپلواک کمېسیون غبرګون راخیستی چې ویلي یې دي، د رأیو د باطلولو په اړه د شکایتونو د کمېسیون پرېکړه د قانون خلاف او د دوی په چارو کې مداخله ده.
ورځپاڼې وړاندې د انتخاباتو او د انتخاباتي شکایتونو د کمېسیونونو ترمنځ د موجوده اختلافاتو په اړه د ازادو او عادلانه انتخاباتو د بنسټ غبرګون راخیستی او ویلي یې دي چې دا اختلافات به د ولسي جرګې د انتخاباتو د پایلو اعلان له ځنډ سره مخامخ کړي.
- ملي ارمان
ملي ارمان ورځپاڼې هم په خپل لومړي مخ کې د ازادو او عادلانه انتخاباتو د بنسټ دا اندېښنه راخیستې چې د دواړو کمېسیونونو ترمنځ رامنځته شوی ټکر به نهیوازې د ولسي جرګې د انتخاباتو د نتایجو اعلان له ځنډ سره مخ کړي، بلکې د جمهوري ریاست د انتخاباتو د ځنډ سبب به هم شي.
ورځپاڼه د دغه بنسټ په حواله وړاندې لیکي چې د انتخاباتو او د انتخاباتي شکایتونو د کمېسیونونو ترمنځ اختلافاتو، درغلیو او سرغړونو ته لار هواره کړې ده.
ورځپاڼې په خپله سرلیکنه کې بیا دواړو کمېسیونونو ته سپارښتنه کړې چې په بشپړې همغږۍ سره د انتخاباتو پاتې پړاوونه بشپړ کړي.
- دنیا
دنیا ورځپاڼې بیا د ځینو څارونکو ادارو دا اندېښنه راخیستې چې ممکن د ولسي جرګې د انتخاباتو پایلې د سیاسي معاملې ښکار شي.
ورځپاڼه لیکي چې د رڼو انتخاباتو د بنسټ یا ټیفا مشر په حکومت کې دننه ځینې کړۍ په ګوته کوي چې د یوې معاملې په هڅه کې دي چې له مخې بهیې د انتخاباتو پایلې د خلکو د رأیو پر بنسټ نه، بلکې د سیاسي معاملې پر بنسټ اعلان شي.
ورځپاڼې لیکلي دي چې نعیم ایوبزاده له نړیوالې ټولنې او ملګرو ملتونو څخه غوښتنه کړې چې د دغې معاملې مخه دې ونیسي.
- هېواد
خو هېواد دولتي ورځپاڼې لیکلي دي چې یو شمېر مغرضې کړۍ هڅه کوي چې د ولسي جرګې د انتخاباتو په اړه د خلکو ذهنیت خراب کړي او بالاخره د دغو انتخاباتو د باطلولو زمینه برابره کړي چې د ورځپاڼې په وینا په هېڅ صورت د منلو وړ نهده.
ورځپاڼې لیکلي دي چې دښمن هڅه وکړه چې په ګواښونو سره د ولسي جرګې د انتخاباتو مخه ونیسي، خو کله چې خلکو د ګواښونو سره سره په انتخاباتو کې پراخ ګډون وکړ، نو اوسیې د ځینو مغرضو کړیو په وسیله هڅې پیل کړي چې انتخابات باطل اعلان شي.
ورځپاڼه لیکي چې په انتخاباتو کې د ستونزو په اړه د شکایتونو کمېسیون موجود دی او که څوک کومه ستونزه لري، نو کولای شي چې د شکایتونو کمېسیون تهیې وړاندې کړي، څو ستونزهیې حل کړي له دې پرته چا ته دا حق نهورکول کېږي چې انتخابات دې باطل اعلان کړي.