- ډېلي مېل
ډېلي مېل انلاین بریتانوۍ ورځپاڼې په کندهار کې د ولسي جرګې د انتخاباتو په اړه په یوه مطلب کې د امنیتي چارواکو له قوله لیکي چې دا انتخابات له مهمو امنیتي پېښو پرته ترسره شول.
خپرونه لیکي چې کندهار د طالبانو د زېږېدو ټاټوبی او د حکومت ضد وسلهوالو مخالفینو د فعالیتونو مرکز پاتې شوی.
خپرونه د کندهار د پخواني امنیه قوماندان جنرال عبدالرازق وژل کېدو ته چې پهدې ولایت کې د ولسي جرګې د انتخاباتو د ځنډ علت و، اشاره کوي او لیکي، زرګونه امنیتي ځواکونه په کندهار کې د امنیت د ټینګښت پر دنده مؤظف شوي وو، څو د رأی ورکوونکو روحیات چې د جنرال عبدالرازق له وژل کېدو وروسته کمزوري شوي وو، پیاوړي کړي.
ډېلي مېل انلاین د مطلب په وروستۍ برخه کې د وسلهوالو طالبانو حملو او د نړیوالې ټولنې فشارونو ته په پام سره لیکي چې دې انتخاباتو ته د افغانستان د حکومت د اعتبار د یوې مهمې ازموینې په سترګه کتل کېږي.
د افغانستان انتخابات د ډموکراسۍ لپاره بریا ده.
- یورو اېشیا رېویو
یورو اېشیا رېویو انلاین خپرونې په خپله وروستۍ ګڼه کې د ولسي جرګې د انتخاباتو په اړه په یوه مطلب کې د افغانستان انتخابات د ډموکراسۍ لپاره بریا بللې ده او لیکي چې افغانانو د طالبانو او داعش ډلو لهخوا د حملو له خطر او له امنیتي ګواښونو سره سره رأیې ورکړې.
د مطلب لیکوال زیاتوي چې د خلکو پیغام ډېر واضح او روښانه او د رأی ورکولو په بهیر کې د خلکو د ګډون کچه هم لوړه وه.
د لیکوال په وینا خلکو د ګواښونو له وېرې سره سره په انتخاباتو کې ګډون غوره وباله، څو له ډموکراسۍ او د بیان له ازادۍ سره خپل تعهد څرګند کړي.
یورو اېشیا رېویو د مطلب په دوام لیکي چې افغانانو د انتخاباتو په بریالي کولو سره وښودله چې غواړي خپل برخلیک د رأیو په وسیله وټاکي نه د مرمیو په وسیله.
د انتخاباتي کمپاینونو پر مهال د هېواد په کچه ۱۰ کاندیدان ووژل شول چې د یورو اېشیا رېویو لیکوال هغوی د ډموکراسۍ د لارې شهیدان بولي.
مطلب زیاتوي چې د افغانستان د ولسي جرګې انتخابات په هېڅ صورت بېعیبه نهو او په ترڅ کې یې د هېواد په کچه د رأی ورکولو په مرکزونو کې د ځنډ او خنډونو راپورونه ورکړل شول، خو د مطلب لیکوال د دې ستونزو علتونه بیانوي او لیکي:
دا لومړی ځل و چې افغانستان په انتخاباتي سیستم کې د بایو مټریک له پرمختللي سیستمه کار واخیست.
لیکوال د مطلب په دوام لیکي چې که څه هم د انتخاباتو کول ډېره مهمه مسئله ده، خو په ازاده، عادلانه او شفافه بڼه د دې انتخاباتو د نتایجو اعلان بیا حیاتي اهمیت لري.
د یورو اېشیا رېویو د مطلب لیکوال په پای کې لیکي چې پر ډموکراسۍ د افغانانو اعتماد به هغه وخت نور هم یقیني شي چې د انتخاباتو خپلواک کمېسیون خپله دنده په سم ډول بشپړه کړي.