د لاسرسۍ وړ لېنکونه

تازه خبر
شنبه ۲۵ غویی ۱۴۰۰ کابل ۰۹:۴۲

نړۍ

په پاکستان کې د روسي او پاکستاني پوځیانو ګډ پوځي تمرینونه پیل شوي

د پاکستان پوځي مقامات وايي، د روسي پوځیانو یوه ډله له پاکستاني پوځیانو سره د ګډو پوځي تمرینونو لپاره پاکستان ته تللې ده.

د پاکستاني پوځ مطبوعاتي څانګې «ISPR» د دوشنبې په ورځ په دې اړه یو لنډ بیان او د روسي پوځیانو تصویرونه خپاره کړي چې پاکستان ته تر رسېدو وروسته له الوتکې د کوزېدو په حال کې دي.

که څه هم د پاکستان پوځي مقامات وايي چې دا د پاکستاني او روسي پوځیانو ترمنځ درېیم ګډ پوځي تمرینونه دي، خو دا یې نه‌دي ویلي چې دا تمرینونه به تر څو ورځو دوام وکړي.

د پاکستان په خپره کړې خبرپاڼه کې دا تمرینونه د پاکستان او روسيې ترمنځ د دوه اړخیزو پوځي تمرینونو د تړون د لړۍ ۳مه کړۍ بللې ده.

د روسیې د دفاع وزارت هم د تېرې پنجشنبې په ورځ د دغو ګډو پوځي تمرینونو په اړه ویلي وو چې په دې کې به ۷ روسي پوځیان برخه واخلي.

د سیاسي چارو کارپوهان د روسیې او پاکستان د اړیکو د پراخېدو لامل، د پاکستان او امریکا د اړیکو ترینګلتیا او په افغانستان کې د داعش نفوذ چې روسیه‌یې ځان ته ستر ګواښ ګڼي، یادوي.

د ورځې تازه خبرونه دلته ولولئ

تاجزاده، د ایران ولسمشریزو ټاکنو کاندیداتورۍ ته نوم­لیکنه وکړه

په ایران کې د اصلاحپالو یوه وتلی شخصيت او سوداګر سید مصطفی تاجزاده

په ایران کې د اصلاحپالو یوه وتلي شخصيت او سوداګر سید مصطفی تاجزاده، د دغه هېواد د ولسمشرۍ ټاکنو د کاندیداتورۍ لپاره نوم­لیکنه وکړه.

تاجزاده چې ۶۴ کلن دی، د ایران په کورنیو چارو وزارت کې د خپل نوم تر ثبتولو وروسته وویل، د بریا په صورت کې به په نظام کې اساسي بدلونونه راولي: "زه د امریکا او روسیې پر خلاف د ګرانبیه بهرني سیاست مخالف یم. موږ به د خبرو اترو او روغې جوړې لوری خوشې نه کړو، حتی که مقابل لوری له موږ سره جګړه هم غواړي."

سید مصطفي تاجزاده د ایران د پخواني ولسمشر محمد خاتمي په اداره کې د کورنیو چارو وزارت مرستیال په توګه دنده ترسره کړې ده.

په پام کې ده په ایران کې د ولسمشرۍ دیارلسم انتخابات د روان میلادي کال د جون میاشتې پر ۱۸مه وشي.

اسراییل پر غزې خپلې حملې لا پسې شدیدې کړي

اسراییلي ځواک

د اسراییل هوايي ځواک پرون جمعه پر غزه خپلې حملې لا پسې شدیدې کړي.

راپورونه وايي، په دغو حملو کې چې په پرله پسې ډول یې ۴۰ دقیقې دوام وکړ، ۱۳ کسان وژل شوي دي.

په غزه کې روغتیايي چارواکي وايي، په وژل شویو کې یوه مور او د هغې درې ماشومان هم شامل دي.

بل خوا اسراییل وايي، د درنو حملو هدف، د هغې سمڅې له منځه وړل وو چې د حماس ډلې افراطي وسله والو د تګ راتګ لپاره ترې استفاده کوله او راکټونه یې لېږدول.

د حماس ډلې له خوا هم د اسرائیل پر جنوب راکټي حملې روانې وې.

د فلسطین روغتیايي چارواکي وايي، له دوشنبې راهیسې د اسرائیل په حملو کې ۱۲۲ کسان وژل شوي او تر ۹۰۰ زیات نور ټپیان دي.

امریکا د فلسطینیانو او اسرائیل ترمنځ د کړکېچ د بندېدو غوښتنه وکړه 

د امریکا د متحدو ایالاتونو د بهرنیو چارو وزیر انتوني بلېنکن

د امریکا د متحدو ایالاتونو د بهرنیو چارو وزیر، د فلسطینیانو او اسرائیل ترمنځ د روان کړکېچ د بندېدو غوښتنه وکړه.

د اسراییل پوځ نن سهار بیا د حماس ډلې د بریدونو په ځواب کې پر غزې تړانګې د توپونو ډزې او هوايي بریدونه کړي دي.

د حماس ډلې تر ولکې لاندې روغتیايي چارواکي وايي، د وروستیو څلورو ورځو په تاوتریخوالي کې د ښځو او ماشومانو په ګډون لږ تر لږه ۱۱۹ فلسطینیان وژل شوي دي.

اسرائیلي چارواکو د راکټي حملو له کبله د یوه سرتېري او دوو ماشومانو په ګډون د ۸ کسانو د وژل کېدو راپور ورکړی دی.

د امریکا د بهرنیو چارو وزیر، انتوني بلېنکن په واشنګټن کې د خبرو پر مهال وویل: "​موږ د اسرائیل پر سړکونو تاوتریخوالي ته سخت اندېښمن یو. په داسې حال کې چې مسلمانان اختر لمانځي او یهودان د شاووعوت د لمانځلو لپاره چمتو کېږي، اسرائیلیان او فلسطینیان د دې مستحق دي چې له وېرې او تاوتریخوالي پرته دغو مراسمو کې ګډون وکړي."

د ملګرو ملتونو امنیت شورا هم د فلسطین او اسرییل پر وروستیو کړکېچونو د بحث لپاره راروانه یکشنبه یوه غونډه پلان کړې ده. بلخوا د نړیوالې جزايي محکمې مخکښې څارنوالې فاټو بېنسودا ویلي، دغه محکمه ښايي د ناامنیو په تازه پېښو کې د دخیلو کسانو په وړاندې اقدام وکړي.

د امریکا 'کولونیال' شرکت خپل د نللیکې سیسټم بېرته برحاله کړ

د امریکا 'کولونیال' شرکت

د امریکا په متحدو ایالاتونو کې د نللیکې تر ټولو لوی شرکت 'کولونیال' وايي، د خپلې نللیکې ټول سیسټم یې بېرته برحاله کړی دی.

دغه شرکت ویلي چې دغې نللیکې تر انټرنیټي حملې وروسته بېرته د تېلو لېږدول پیل کړي دي.

دغه نللیکه د انټرنیټي حملې له کبله چې واشنګټن وايي، له روسیې شوې، ټکنۍ شوې وه او د تېلو رسولو په اړه یې اندېښنې پارولې وې.

کولونیال پایپلاین شرکت پرون په یوه اعلامیه کې وویل، د ۸۸۵۰ کیلومترو په اوږدوالي د دغې نللیکې له خوا په عادي ډول د تېلو رسول څو ورځې وخت نیسي او ځینې بازارونه ښايي په نوبتي ډول ځنډني خدمات تجربه کړي.

دغه شرکت تېره شنبه اعلان وکړ چې د باج اخیستنې په نیت د یوې سایبري یا انټرنټي حملې ښکار شوی دی.

دا د امریکا د انرژۍ پر اساسي بنسټونو تر ټولو ستره ویجاړوونکې حمله بلل شوې، چې د نللیکې د فعالیت بندېدو سبب شوې وه.

فرانسه: اذربایجان دې خپل ځواکونه د ارمنستان له سرحدي سیمو ژر وباسي

د فرانسې ولسمشر

د فرانسې ولسمشر له اذربایجان غوښتنه وکړه، د ارمنستان له سرحدي سیمو چې د ده په وینا د اذربایجان له خوا اشغال شوي، خپل ځواکونه ژر تر ژره وباسي.

ایمانوئل مکرون نن په خپله فېسبوک پاڼه کې لیکلي چې د اذربایجان ځواکونو "د ارمنستان پر خاوره حمله کړې نو باید ژر تر ژره ورڅخه ووځي."

د فرانسې د ولسمشر د دفتر رئیس هم په یوه اعلامیه کې ویلي چې ښاغلي: "مکرون د ارمنستان له سرپرست صدراعظم نیکول پاشنینان سره په ټیلیفوني خبرو کې د ارمنستان د ځمکنۍ بشپړتیا په برخه کې د فرانسې د ملاتړ پر ژمنه او د ارمنستان له خاورې د اذربایجاني ځواکونو د سمدستي وتلو پر اړتیا ټینګار کړی دی."

د ارمنستان دفاع وزارت پرون ناوخته وویل چې د اذربایجان ځواکونه له دوو سرحدي سیمو ورتېر شوي دي.

خو اذربایجان ټینګار کوي چې ځواکونه یې د ارمنستان خاورې ته نه دي داخل شوي، یوازې د اذربایجان په هغو مورچلونو کې ځای پر ځای شوي چې په مخکېني ژمي کې ورتګ ګران کار و.

شیکاګو کې پیشو د ودانۍ له ۵م پوړه ځان غورځولی او ژوندۍ پاتې

ارشیف

د امریکا په شیکاګو ایالت کې یوه پشۍ د یوې ودانۍ له پنځم پوړه ځان لاندې واچاوه او ژوندۍ پاتې شوه.

د شیکاګو د ایلیناویس ښار د اور وژنې ادارې په خپل ټوېټر په دې اړه یوه ویډیو خپره کړې.

دې ادارې لیکلي چې: "پشکې له خپلو نهو ګانو یا ژوند ګټه واخیسته او له یوې داسې ودانۍ یې جمپ وکړ چې اور یې اخیستی و. پشکه په خپلو پښو ودرېده او وتښتېده."

د دې پېښې عیني شاهدانو هم د پشۍ په ژوندۍ پاتې کېدو تعجب وکړ او شورماشور یې ګډ کړ.

دا یې لنډه ویډیوه ده چې د شیکاګو د اوروژنې ادارې خپره کړې:

د اسراییل پوځ نن د حماس ډلې د بریدونو په ځواب کې بریدونه کړي

آرشیف، په غزه کې د اسراییلو ټانکونه

د اسراییل پوځ نن د حماس ډلې د بریدونو په ځواب کې په غزې تړانګې د توپونو ډزې او هوايي بریدونه کړي دي.

د راپورونو له مخې ځمکنی جنګ اوس درېدلی.


د همدې اوونۍ تاوتریخوالیو کې لږ تر لږه سل کسان د فلسطین خوا ته چې په کې ماشومان هم شامل دي وژل شوي او اسراییل بیا د ځان لور ته د د اوه کسانو د وژل کېدو خبره تایید کړې ده.

د اسراییل پوځ په خپل ټوېټر لیکلي چې ننني هوايي بریدونه او د توپونو ډزې یې د حماس ضد عملیاتو لړۍ ده.

وروسته یې بیا وضاحت ورکړ چې اسراییلي ځواکونه غزې تړانګې ته نه دي ننوتلي او له دې سیمې سره په پوله متمرکز پاتې شوي.

د ملګرو ملتونو امنیت شورا هم د فلسطین او اسرییل وروستیو کړکیچونو ته د رسېدو لپاره د مې شپاړسمه یوه غونډه پلان کړې او د مصر منځګړي هم د اوربند د ټینګښت په هدف اسراییلو ته تللي.

پوتین: کازان کې پر ښوونځي برید دې وڅیړل شي

ولسمشر ولادیمیر پوتین

ولسمشر ولادیمیر پوتین وايي چې د کازان ښار په یوه ښوونځي کې د ډزو پېښې روسیې ته ټکان ورکړی دی.

د سې شنبې ورځې په سهار یو وسله وال کس د روسیې د تاتارستان جمهوریت د مرکز کازان ښار په یوه ښوونځي کې ډزې وکړې، ۷ زده کوونکي او د ښوونځي ۲ کار کوونکي یې ووژل او له ۲۰ زیات کسان یې چې اکثر زده کوونکي ماشومان وو، ټپیان کړل.

چارواکو د دې پېښې د علت په اړه څه نه دي ویلي، خو ولسمشر پوتین د ویډیو کنفرانس له لارې په پرونۍ وینا کې په دې اړه د تحقیقاتو امر وکړ: "د تحقیقاتو کمېټه به هرو مرو هر اړخیز تحقیقات وکړي او د دې تراژیدۍ ټول عوامل به روښانه کړو. په عین حال کې د دې ډول پېښو د مخنیوي لپاره باید ملکي وګړو ته، د وسلو د وېش په مقرراتو کې بدلون راشي."

په دې برید تورن ۱۹ کلن ایلناز ګالیاویېف چې د برید په پای کې ونیول شو، د چهارشنبې په ورځ د قتل په تور په محاکمه کې حاضر شو.

چارواکو ویلي چې نوموړي بې جوازه وسله لرله. پوتین د روسیې د ملي ګارډ مشر ته دنده وسپارله چې د وسلو د جواز د وېش د بدلون په اړه یوه نوې طرح جوړه کړي.

ارمنستان: اذربایجاني ځواکونه له جنوبي سرحده اوښتي

اذري ځواکونه

د ارمنستان سرپرست صدراعظم نیکول پاشینیان چې پر اذربایجاني ځواکونو تور لګولی له جنوبي سرحد څخه اوښتي او د ارضي دعوې هڅه کوي.

دواړو هېوادونو تېرکال د ناګورناقره باغ د بېلتونپالې سیمې پرسره جګړه وکړه چې په نتیجه کې یې زرګونه کسان ووژل شول. دا جګړه د مسکو په منځګړتوب په اوربند سره پای ته ورسېده.

پاشینیان پرون د مې په ۱۳مه نېټه د امنیت شورا په بېړنۍ غونډه کې پر باکو د نوي یرغل تور ولګاوه. هغه د ارمنستان په جنوب ختیځ ولایت سیونیک کې چې د راپورونو له مخې د اذربایجان پوځ د ارمنستان په خاوره کې څو کیلومتره پرمختګ کړی دی، د ډېر حساس وضعیت یادونه وکړه.

له دې وروسته د ارمنستان دفاع وزیر وویل چې اذري ځواکونو د ارمنستان او آذربایجان په ګډ سرحد کې دوه نورې سیمې هم لاندې کړې دي.

پاشینیان تېره میاشت وروسته له هغه استعفا وکړه چې خلکو له اذربایجان سره د دې جګړې د څرنګوالي پر وړاندې پراخ اعتراضونه وکړل.

نوموړی اوس د جون د شلمې تر انتخاباتو پورې د سرپرست صدراعظم په توګه کار کوي.

فلسطینۍ حماس ډلې بیا د اسراییلو پر قلمرو توغندي وویشتل

ارشیف

فلسطینۍ حماس ډلې پرون پنجشنبې یو ځل بیا د اسراییلو پر قلمرو توغندي وویشتل او اسراییلي الوتکو هم د حماس تر ولکې لاندې غزه کې نورې هوايي حملې وکړې.

دا د هغه تشدد لړۍ ده چې د جمعې په ورځ په بیت المقدس کې پیل شو او له دواړو خواوو سره د مصري منځګړو له خبرو سره سره یې تراوسه نتیجه نه ده ورکړې.

د حماس له خوا ویشتل شوي یو شمېر توغندي تر تل ابیب پورې ورسېدل او د اسراییلو په بمباریو کې درې لوړې ودانۍ چې د اسراییلي چارواکو په وینا د حماس غړي پکې دېره وو، ونړېدلې.

د دې تشدد لمن په اسراییلو کې دننه د عربانو او یهودانو ترمنځ نښتو ته هم ورسېده چې په نتیجه کې یې صدراعظم بنیامین نتانیاهو خبرداری ورکړ او ویې ویل چې د نظم د راوستو لپاره به د اړتیا په صورت کې له زوره هم کار واخلي.

عربان د اسراییلو د نهه میلیون وګړو په سلو کې شل نفوس جوړوي.

په غزه کې د اسراییلي الوتکو د تېرو دوو ورځو په حملو کې لږترلږه ۸۳ تنه فلسطینیان او د حماس په راکټي حملو کې اوه تنه اسراییلیان وژل شوي دي.

د خبریالانو د خوندیتوب کمېټه: ایران دې د کردي خبریالانو بندي کول ودروي

د ایران بیرغ

د خبریالانو د خوندیتوب کمېټې (CPJ) پر ایران غږ کړی چې د کردي خبریالانو بندي کول او تاوتریخوالی دې ودروي.

دا هغه څه دي چې د بشري حقونو ډلې یې د کردي اقلیت ځپل ګڼي.

د خبریالانو د خوندیتوب کمېټې پرون په یوې اعلامیه کې د خبري راپورونو او پېښو ته د نږدې کسانو په حواله ویلي چې ایراني چارواکو د ۲۰۲۰ کال له مې میاشتې راهیسې لږترلږه ۸ تنه کردي خبریالان نیولي دي.

له دې کسانو څخه درې تنه‌یې لا هم د ایراني چارواکو په بند کې دي.

یو مدافع وکیل چې د ډېری بندي خبریالانو استازیتوب کوي، دغې کمېټې ته ویلي چې د ایران سپاه پاسداران د هغو کردي خبریالانو او د هغوی د لیکنو په اړه حساس دي چې په ځانګړي ډول د ایران، عراق او ترکي کردانو پر یووالي او دغه‌راز د کردانو پر نورو سیمه‌ییزو موضوعاتو یې کوي.

دغه وکیل د نوم نه‌ښودلو په شرط ویلي ایراني چارواکي هغه وخت حساسیت ښیي چې کردي خبریالان د اربیل په څېر د عراق کردي مېشتو سیمو ته سفر کوي.

د ازبکستان ولسمشر د کوچني اختر په مناسبت ۱۰۰ بندیان وبخښل

د ازبکستان ولسمشر شوکت میرضیایف

د ازبکستان ولسمشر شوکت میرضیایف د کوچني اختر په مناسبت ۱۰۰ تنو بندیانو ته د بخښنې فرمان ورکړ.

د ازبکستان دولتي رسنیو ویلي، د ولسمشر میرضیایف د هغه فرمان له مخې چې د مې پر ۱۲مه لاسلیک شو، درې بندیان په بشپړ ډول خوشې شول، ۴۳ تنه په ضمانت خوشې شوي، د ۱۰ محکومینو په سزا کې نرموالی راغلی او د ۴۴ زندانیانو د بند موده راکمه شوې ده.

په دغو کسانو کې ۱۲ بهرني اتباع، څلور نارینه چې عمرونه‌یې تر ۶۰ کلونو ډېر دي، ۶ ښځې او ۵۲ تنه داسې کسان شامل دي چې د منع شویو ډلو په فعالیتونو کې په برخه اخیستنې تورن ول.

د اسرائیل پوځ د ځمکني عملیاتو د پیل لپاره چمتووالی نیسي

ارشیف، اسرائیلي ځواکونه

د اسرائیل پوځ وایي، ځواکونه‌یې د ځمکني عملیاتو د پیل لپاره چمتووالی نیسي.

دا په داسې حال کې ده چې د حماس فلسطیني ډلې ملېشې په غزې تړانګه کې پر اسرائیلو راکټي بریدونو ته دوام ورکوي.

د حماس تر واک لاندې غزې تړانګه کې د روغتیا وزارت نن وویل چې پر دې سیمه کې د اسرائیل په دوو ورځنیو بریدونو کې تر ۷۰ ډېر فلسطینیان وژل شوي دي.

روغتیایي چارواکو په اسرائیل کې هم د ۷ تنو وژل کېدل تأیید کړل.

د اسرائیل هوایي حملې وروسته له هغه پیل شوې چې حماس ډلې د بیت‌المقدس په ګډون د اسرائیل پر څو سیمو توغندي وویشتل.

اورست غره کې دوه غر ختونکي مړه شوي

اورست غرونو کې د امریکا غر ختونکې ډله

دوه غر ختونکي په اورست غره کې مړه شوي دي.

په نیپال کې د غر ختنې چارو تنظیموونکو نن وویل چې دا پېښه د چهارشنبې په ورځ شوې ده.

دوی د فرانس پرس خبري اژانس ته وویل چې ۵۵ کلن امریکایي او ۴۰ کلن سویسي غر ختونکي د ستړیا له کبله مړه شوي دي.

هر کال په منځني ډول پنځه غر ختونکي په اورست غره کې چې د نړۍ تر ټولو لوړه څوکه ده، مړه کېږي.

د نړۍ مسلمانان د دوهم کال لپاره اختر د کرونا ویروس پر مهال لمانځي

فلسطین کې یو شمېر مسلمانان د اختر لمانځه پر مهال

د نړۍ مسلمانانو د دوهم کال لپاره کوچنی اختر په داسې حال کې لمانځي چې د 'کووېډ-۱۹' ناروغي په ټولې نړۍ کې خوره ده.

کوچنی اختر په ډېری مسلمانو هېوادونو کې نن پیل او درې ورځې به دوام ولري، خو د افغانستان په ګډون ډېری هېوادونه د کرونا ویروس د خطر د کمېدو په هدف د رامنځته شویو محدودیتونو سره لمانځي.

دا اندېښنې هم شته چې خلک به ښایي روغتیایي سپارښتنې سمې رعایت نه‌کړي.

په اندونیزیا کې چې د نړۍ یو له ګڼ مېشتو اسلامي هېوادونو څخه دی، حکومت خلک خپلو اصلي ټاټوبو ته له ورتلو منع کړي دي.

دا اقدام کولای شي لسګونه ملیونه کسان د خپلو کورنیو له لیدو څخه محروم کړي.

نور راوښيه

XS
SM
MD
LG