تازه معلومات
له کابل ښار نه د ازادي راډیو خبریالان وايي چې د سهار اته بجې لا هم د ښار په ځینو سیمو کې د رايي ورکولو مرکزونه د خلکو پر مخ نه دي پرانیستل شوي.
دوی وايي، خلک له خپلو کورنو راوتلي خو په سیمو کې اړوند سایټونه پر مخ نه دي پرانیستل شوي.
تر دې وړاندې د انتخاباتو خپلواک کمېسیون ویلي و چې انتخاباتي سایټونه به پر اووه بجې د خلکو پرمخ پرانیستل شي.
ولسمشر غني د خپلې رایې تر کارولو وروسته ولس ته په وینا کې د انتخاباتو مبارکي وویل.
ښاغلي غني د کابل په اماني لیسه کې پر ټاکل شوي وخت یعنې د سهار پر اوو بجو د رایې تر کارولو وروسته د افغانستان د انتخاباتو له خپلواک کمېسیون او افغان امنیتي ځواکونو مننه وکړه چې د دغې پروسې په برخه کې هڅې وکړې.
ښاغلي غني د ولسي جرګې انتخابات د حکومت له لویو لاسته راوڼو وبلل او زیاته یې کړه چې یو شک او تردید په یقین، انتقاد په همکارۍ، بې باوري په باور بدل شو.
ښاغلي غني د ولسي جرګې له ټولو کاندیدانو نه هم مننه وکړه چې ځانونه یې کاندید کړل او خلک یې رای ورکولو ته راوبلل.
نوموړي زیاته کړه چې انتخاباتي مواد هم پر خپل وخت د افغان امنیتي سرتېرو په وسیله ټول افغانستان ته رسېدلي.
ښاغلي غني له خلکو وغوښتل چې په انتخاباتو کې پراخ ګډون وکړي.
غني وویل چې له کندهار او غزني پرته په ټول افغانستان کې نن انتخابات تر سره کېږي.
نوموړي زیاته کړه چې د کندهار انتخابات به یوه اوونۍ وروسته تر سره شي خو د غزني د انتخاباتو نېټه به وروسته معلومه شي.