ولسمشر اشرف غني د کندهار د امنیه قوماندان له وژل کېدو وروسته خلکو ته ډاډ ورکړی چې په دې ښار کې به وضعیت ډېر ژر بیا عادي شي.
جنرال رازق پرون پنجشنبه د کندهار د والي په دفتر کې په ډزو ووژل شو.
چارواکي وايي، د کندهار د والي یوه ساتونکي وروسته له هغه ډزې پیل کړې چې د کندهار سیمه ییز چارواکي د انتخاباتو د امنیت په اړه د بحث لپاره له یوې غونډې د راوتو په حال کې وو.
په غونډه کې د ناټو او امریکا د پوځي ځواکونو عمومي قوماندان جنرال سکاټ مېلر هم ګډون کړی و، خو هغه روغ رمټ دی.
له دې پېښې وروسته د کندهار ښار د امنیت، د انتخاباتو د امنیتي ننګونو او ستونزو په اړه احمدتکل د افغانستان د کورنیو چارو له پخواني وزیر علي احمد جلالي سره مرکه کړې ده.
ښاغلی جلالي د خپلو خبرو په پیل کې وايي چې د کندهار پېښه باید د انتخاباتو د ترسره کولو په وړاندې خنډ ونه ګڼل شي.
د دې مرکې د اورېدو لپاره لاندې لېنک کېکاږئ:
