د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۷:۳۵

نړۍ

ترکي رسنیو انځورونه خپاره کړي چې د خاشقجي په نښه کولو پلان ښیي

ترکي رسنیو داسې انځورونه خپاره کړي چې د دوی په وینا د سعودي عربستان د یوه نامتو خبریال په نښه کولو پلان ښیي.

ترکي چارواکي وېره لري چې جمال خاشقجي به په استانبول کې د سعودي عربستان په قونسلګرۍ کې وژل شوی وي.

د ترکیې حکومت پلوې ورځپاڼې صباح پرون چهارشنبه د سعودي عربستان د ۱۵ اتباعو نومونه او انځورونه خپاره کړل چې د دوی په خبره د خاشقجي په وژنه کې لاس لري.

خاشقجي چې د سعودي یو منتقد خبریال و د اکټوبر له دوهمې نېټې وروسته له هغه لادرکه شو چې په استانبول کې د سعودي قونسلګرۍ ته د ځینو شخصي اسنادو ترلاسه کولو لپاره ورغلی و، خو بېرته له قونسلګرۍ څخه نه‎دی راوتلی.

صباح ورځپاڼه وایي، د سعودي له‎خوا دغه ۱۵ کسیزه ډله چې ګواکې د خبریال وژونکي دي په همدې ورځ په دوو الوتکو کې استانبول ته رسېدلي دي.

په همدې حال کې د امریکا متحده ایالاتو د بهرنیو چارو وزارت ویاندې هدر ناوئرت تېره ورځ په واشنګټن کې د دغه خبریال د لادرکه کېدو په اړه اندېښنه ښودلې ده.

نوموړي ویلي:

"موږ دا قضاوت نه‎کوو چې څه پېښ شوي دي. متحده ایالات یقیناً د هغه د ځای په اړه اندېښنه لري. د امریکا د بهرنیو چارو وزارت لوړپوړي چارواکو له ډیپلوماتیکو چینلونو له سعودي چارواکو سره په‎دې اړه خبرې کړې دي. موږ د سعودي پر حکومت غږ کوو چې د دې قضیې په ارتباط کره او شفاف تحقیقات پیل کړي."

سعودي عربستان د ترکي چارواکو دا ادعا ردوي چې ګواکې خاشقجي دې په قونسلګرۍ کې دننه وژل شوی وي.

د ورځې تازه خبرونه دلته ولولئ

تاجکستان کې ۹ تنه د مسکو د برید په تور نیول شوي

د مسکو د کنسرټونو هغه هال چې تېره اوونۍ برید پرې شوی و - ارشیف
د مسکو د کنسرټونو هغه هال چې تېره اوونۍ برید پرې شوی و - ارشیف

د تاجکستان چارواکو مسکو ته نږدې د کنسرټونو پر یوه هال د تېرې جمعې د حملې په تړاو د نهو کسانو د نیولو خبر ورکړ.

په تاجکستان کې ځايي رسنیو نن د امنیتي سرچینو په حواله دا خبر ورکړی دی.

ویل شوي دغه نهه کسان د دوشنبې ښار په وحدت کلي کې تېره دوشنبه نیول شوي دي.

یوې بلې سرچینې نن د ازادي راډیو تاجکستانۍ څانګې ته ویلي چې په نیول شویو کې ګڼ ځوانان شامل دي.

د تاجکستان د قانون د تنفیذ ادارې تېره سې شنبې هم د هغې تروریستي حملې د پلان په شک د شپږو کسانو د نیولو خبر ورکړی و.

د روسیې د پلازمېنې مسکو په څنډه کې په هغه حمله کې چې مسوولیت یې د اسلامي دولت یا داعش منلی، د وروستیو شمېرو له مخې ۱۴۳ کسان مړه دي او شا و خوا ۱۰۰ کسان لا هم تري تم دي.

اردوغان په مې میاشت کې امریکا ته سفر کوي

د ترکیې ولسمشر، رجب طیب اردوغان
د ترکیې ولسمشر، رجب طیب اردوغان

د ترکیې امنیتي اداره وايي، ټاکل شوې د ترکیې ولسمشر رجب طیب اردوغان د مې میاشتې پر نهمه امریکا متحدو ایالتونو ته لاړ شي.

دا له کله چې په ۲۰۱۹م کال کې اردوغان له پخواني ولسمشر ډونالډ ټرمپ سره کتلي وو، لومړی وار دی چې نوموړی واشنګټن ته سفر کوي.

کله چې جو بایډن د ۲۰۲۰م کال د ولسمشرۍ په ټاکنو کې ګټونکی شو، انقرې د مخ په مخ کتنې د زمینې برابرولو هڅه کړې ده.

ترکیې چې د ناټو غړی هېواد دی، په جنورۍ میاشت کې په ناټو پوځي تړون کې د سویډن د غړیتوب له تایید ډډه وکړه، دې اقدام د انقرې او واشنګټن ترمنځ اړیکې خرابې شوې.

جنوبي افریقا؛ د یوه بس نسکورېدو ۴۵ تنه مړه کړي

تصویر له ارشیفه
تصویر له ارشیفه

د جنوبي افریقا په یوه غرنۍ سیمه کې پرون یو بس موټر له پله لاندې لوېدلی او لږ تر لږه ۴۵ کسان مړه شوي دي.

له دې پېښې یوازنی ژوندی پاتې شوی تن یو ۸ کلن ماشوم دی چې د سختو ټپونو له کبله یې درملنه روانه ده.

تر پېښې وروسته له هغه ځایه لوګي پورته کېدل.

د جنوبي افریقا چارواکي وايي داسې ښکاري چې د بس چلوونکي کنټرول له لاسه ورکړی و.

پاکستان؛ چینایي قراردادیانو د اوبو د دوو لویو بندونو د جوړولو چارې ودرولې

په شنګله کې پر چینایي انجینرانو د برید سیمه - ارشیف
په شنګله کې پر چینایي انجینرانو د برید سیمه - ارشیف

په پاکستان کې د پنځو چینايي انجنیرانو له وژل کېدو وروسته چینايي قراردادیانو په پاکستان کې د اوبو د دوو لویو بندونو داسو او دیامر بهاشا د جوړولو کار ودراوه.

د پاکستان چارواکو نن جمعه د فرانسې خبري اژانس سره په خبرو کې دا خبر ورکړی دی. تېره سې شنبه د خیبرپښتونخوا ایالت په شنګله کې د یوه ځانمرګي برید په نتیجه کې ۵ چینايي انجنیران او یو پاکستانی چلوونکی کس ووژل شول.

یوه پاکستاني چارواکي چې د نوم له اخیستلو یې ډډه کړې، د فرانسې خبري اژانس ته ویلي، چینايي کمپنیو له پاکستاني چارواکو غوښتي چې د بیارغونې د دغو ساحو تر پرانیستل کېدو مخکې له نویو امنیتي پلانونو سره راشي.

په دغو ساحو کې ۱۲۵۰ چینايي وګړي کار کوي.

هم د پاکستان او هم چین لپاره د چینايي وګړو د امنیت موضوع د اندېښنې وړ ده، ځکه چینايي وګړي زیات وخت د افراطي وسلوالو په حملو کې په نښه کېږي.

د ۲۰۲۱م کال په جولای میاشت کې بیا په کوهستان کې په یوه ځانمرګي برید کې د نهو چینايي وګړو په ګډون ۱۳ کسان وژل شوي وو.

چاودنه هغه موټر ته څېرمه وشوه چې چینايي او پاکستاني انجنیران یې لېږدول او تر پېښې وروسته چینايي کمپنیو خپل کارونه وځنډول.

تر هغه وروسته پاکستان د سیپک (CPEC) یا د چین او پاکستان اقتصادي دهلېز د اړوندو پروژو امنیتي تدابیر سخت کړل.

د ملګرو ملتونو د یوې محکمې امر؛ اسرائیل دې د غزې د بشري وضعیت د ښه والي لپاره ګام واخلي

غزه - ارشیف
غزه - ارشیف

د ملګرو ملتونو یوې محکمې پرون پنج شنبه اسرائیل ته امر وکړ چې په غزه کې د بشري وضعیت د بهترۍ لپاره اقدامات وکړي.

د عدالت نړیوالې محکمې له اسرائیل غوښتي چې کلابندې شوې غزې ته د خوړو، اوبو، تېلو او نورو موادو د لېږد لپاره نورې لارې هم پرانیزي.

د عدالت نړیوالې محکمې په هغه قضیه کې چې د اسرائیل خلاف د جنوبي افریقا له خوا په دې محکمه کې ثبت شوې، په اصطلاح دوې نورې فقرې ور زیاتې کړلې.

جنوبي افریقا په خپله قانوني دعوه کې اسرائیل په غزه کې د خپلو پوځي عملیاتو له کبله د نسل وژنې په اقداماتو تورن کړی، خو اسرائیل دا تور رد کړی دی.

د پنج شنبې دستور په داسې حال کې ورکول کېږي چې جنوبي افریقا هڅه وکړه چې په خپله دعوه کې د اوربند په ګډون نور اقدامات هم ورزیات کړل او په هغه دعوه کې په غزه کې د لوږې زیاتېدو ته هم اشاره شوې ده.

اسرائیل د ملګرو ملتونو د عدالت له نړیوالې محکمې غوښتنه کړې چې نوي حکمونه دې نه صادروي.

پولنډ: پر اوکراین د روسیې د توغندیو له برید وروسته زموږ او متحدانو الوتکې فعالې شوې

تصویر له ارشیفه
تصویر له ارشیفه

د پولنډ د وسله والو ځواکونو د عملیاتو د قوماندې مرکز خبر ورکړ چې د پولنډ او متحدانو الوتکې نن وروسته تر دې فعالې شوې چې روسیې پر اوکراین د توغندیو برید وکړ.

د پولنډ د قوماندې دې مرکز په خپله ایکسپاڼه کې لیکلي دي چې دا الوتکې د پولنډ پرفضا ګرځي چې د ډېر غږ سبب شوې دي، په ځانګړې توګه د پولنډ په جنوب لویدیځه برخه کې چې له اوکراین سره سرحد لري.

زیلینسکي د امریکا د استازو جرګې له غړو د مهمو پوځي مرستو غوښتنه وکړه

د اوکراین ولسمشر، ولودومیر زیلینسکي
د اوکراین ولسمشر، ولودومیر زیلینسکي

د اوکراین ولسمشر د امریکا له استازیو جرګې غوښتي دي چې له کییف سره مهمې پوځي مرستې وکړي.

د راپورونو له مخې، ولودومیر زیلینسکي پرون د امریکا د استازیو د جرګې له مشر مایک جانسن سره په ټیلفون خبرې وکړې او هغه َ ته یې د اوکراین د جګړې د وضعیت په اړه معلومات ورکړل.

د اوکراین ولسمشر وایي، هېواد یې د روسیې د هوایي بریدونو د مخنیوي لپاره سمدستي مهمو پوځي مرستو ته اړتیا لري.

د امریکا مشرانو جرګې تېره میاشت له اوکراین سره د ۶۰ میلیارډه ډالرو مرسته تصویب کړه، خو استازیو جرګې دا مرسته نه ده تایید کړې.

په استازیو جرګه کې د جمهوري غوښتونکو شمېر زیات دی او دوی له اوکراین سره د مرستې په ځای د امریکا د سرحدونو خوندیتوب مهم ګڼي.

سوریه؛ د اسراییلي الوتکو په بمبارۍ کې د ۳۶ تنو د وژل کېدو او لسګونه تنو د ټپي کیدو خبر ورکړل شوی

په سوریه کې یوه ودانۍ چې اسراییلي الوتکو بمبار کړې - ارشیف
په سوریه کې یوه ودانۍ چې اسراییلي الوتکو بمبار کړې - ارشیف

په سوریه کې یوه څارونکې ډله وايي چې په شمالي ښار حلب کې د اسرائیل په بمباریو کې د سوریې د دولتي ځواکونو لږ تر لږه ۳۶ غړي وژل شوي او په لسګونو نور ټپیان شوي دي.

د سوریې د بشري حقونو د څار ډلې نن جمعه ویلي چې دغه بمباري نن سهار وختي حلب ته نږدې په جبرین سیمه کې شوې او د وسلو هغه ډیپوګانې یې په نښه کړي چې د لبنان د ایران-پلوه حزب الله ډلې وې.

د سوریې د دې څارونکې ډلې مشر رامي عبدالرحمن ویلي، اسرائیل د اسرائیل په بمباریو کې د السفیره سیمې ځینې تاسیسات په نښه کړي او د حلب په لوېدیځ کې له کفر الجوم سیمې هم د چاودنو غږونه اورېدل شوي دي.

روسي چارواکي: د مسکو د خونړۍ حملې له امله مو د سلو نورو کسانو د نادرکۍ راپور ترلاسه کړی

د پېښې سیمه - ارشیف
د پېښې سیمه - ارشیف

د مسکو په لمنه کې د کروکس د کنسرت په هال کې د خونړۍ حملې په اړه پلټونکي وايي چې د سلو نورو کسانو د بې درکۍ راپورونه یې ترلاسه کړي دي.

په دې پېښه کې چې نن یې اوونۍ پوره شوه، د وژل شویو کسانو شمېر ۱۴۳ تنه اعلان شوی و، خو د پلټونکو تازه څرګندونې ښيي چې ممکن د دې پېښې د قربانیانو شمېر تر دې خورا ډېر وي.

مخکې پلټونکو ویلي وو چې د څه باندې ۱۴۰ تنو د بې درکه کېدو راپورونه یې ترلاسه کړي دي، خو تراوسه څرګنده نه ده چې په دې شمېر کسانو کې څومره موندل شوي او څومره نور بې درکه دي.

د روسیې د بیړنیو پېښو وزارت د چهارشنبې په ورځ د مرګ ژوبلو نوی لیست خپور کړ چې پر اساس یې ۱۴۳ تنه وژل شوي او ۱۸۲ نور ټپیان شوي دي.

راپورونه وايي چې اکثره کسان په ودانۍ کې د لګېدلي اور په لوګي مړه شوي دي.

پوتين: د ناټو پر کوم غړي هېواد د برید نیت نه لرو

د روسیې ولسمشر، ولادیمیر پوتین
د روسیې ولسمشر، ولادیمیر پوتین

د روسیې ولسشمر وایي، روسیه دا نیت نه لري چې د ناټو په کوم غړي هېواد برید وکړي.

ولادیمیر پوتین زیاته کړه چې پر پولنډ به حمله ونه کړي، همداراز پر بالتیک هېوادونو یا پر چک جمهوریت؛ خو که چېرته لویدیځ ایف شپاړس جنګي الوتکې اوکراین ته ورکړي، روسیي ځواکونه به دا الوتکې نسکورې کړي.

ښاغلي پوتین دا خبرې د روسیې د هوایي ځواکونو پیلوټانو ته کولې او زیاته یې کړه چې د امریکا په مشرۍ ایتلاف له نولس سوه یو نویم کال راپه دې خوا چې پخوانی شوروي اتحاد ړنګ شو، د ختیځ خواته پراختیا موندلې ده، خو روسیه د دې هېوادونو پرضد د تېري نیت نه لري.

نور راوښيه

XS
SM
MD
LG