کابل چاپ ورځپاڼو په خپلو نننیو ګڼو کې د نورو مطلبو تر څنګ په افغانستان کې د ښځو لپاره د امریکا د متحده ایالاتونو د پراختیايي پروژې پروموټ د ناکامۍ په اړه یو شمېر لیکنې او سر لیکنې چاپ کړي دي.
ویسا:
ویسا خپلواکې ورځپاڼې لیکلي چې د افغان ښځو د وړتیاوو د لوړولو لپاره د امریکا سلګونه ډالره مرسته حیف او میل شوې دي.
ورځپاڼې وړاندې لیکلي چې د افغانستان لپاره د امریکا د سر مفتش ځانګړې ادارې ویلي چې ۲۸۰ میلیونه ډالره چې د افغان ښځو د وړتیاوو د لوړولو لپاره ځانګړې شوې وې حیف او میل شوې دي.
ورځپاڼې د نیو یارک ټایمز او او افغانستان د بیارغونې لپاره د امریکا د سر مفتش جان سپکو په حواله لیکلي چې دغه اندازه پیسې تر ۲۰۲۲مېلادي کاله پورې د ۷۵۰۰۰ ښځو د وړتیاوو د لوړولو لپاره ځانګړې شوې وې چې د پروموټ پروژې د یو شمېر کارکوونکو له خوا حیف او میل شوې دي.
د مطلب په دوام لیکلي شوي چې جان سپکو ویلي په دې برخه کې هیڅ د پام وړ فعالیت نه ترسترګو کېږي.
ماندګار:
ماندګار خپلواکې ورځپاڼې هم په خپل یو مطلب کې دغه پروژه ناکامه بللې ده.
ورځپاڼې لیکلي چې د افغانستان لپاره د امریکا د سر مفتش ځانګړې ادارې ویلي چې د افغان ښځو لپاره د امریکا د نړیوالې پراختیا ادارې دا ابتکاري پروژه ناکامه ده او د امریکا د مالیه ورکوونکو پیسې بې ځایه لګېدلې دي.
د مطلب لیکوال دا هم لیکلي چې د دغې پروژې له پیل راهیسې تر اوسه ۸۵ میلیونه ډالره مصرف شوې چې لاسته راوړنه یې یوازې ښو دندو ته د۵۵ میرمنو رسول ښودل شوي دي.
په مطلب کې د دغې پروژې په اړه د جان سپکو په حواله راغلي چې، د امریکا نړیوالې پراختیايي ادارې په دې برخه کې اضافه ګويي کړې او د امریکا او افغانستان خلکو ته یې درواغ ویلي دي.
په مطلب کې د نوموړي په حواله دا هم راغلي چې، د افغانستان لومړۍ مېرمنې رولا غني ویلي چې د دې پیسو ډېره برخه په اداري کارونو لګېدلې ده.
ملي ارمان:
ملي ارمان خپلواکې ورځپاڼې هم د موضوع په تړاو په خپل یو مطلب لیکلي دي.
ورځپاڼې لیکلي دا پروژه ۵ کاله مخکې پیل شوه، او په ټوله نړۍ کې د ښځو لپاره یوه لویه پروژه ګڼل شوې چې ټاکل شوې وه د لسګونو زرو ښځو لپاره د کار زمینه برابره کړي خو په مطلب کې د افغانستان لپاره د امریکا د سرمفتش په حواله راغلي چې دا اوس ښځو ته له یو رونیز پروګرام پرته بل څه نه دي او موثریت یې هم نه دی معلوم.