د چک جمهوریت یو شمېر رسنیو د هغو درېیو چکي سرتېرو په اړه لیکلي چې په افغانستان کې ووژل شول.
- راډيو پراګ
له دغو رسنيو څخه راډيو پراګ هم په دې اړه مقاله خپره کړې ده او د چک جمهوریت د دفاع وزارت وياند له قولهيې ليکلي چې دا سرتېري په نظامي تشريفاتو سره خاورو ته سپارل کېږي.
ټاکل شوې ده د دغو سرتېرو مړي د چهارشنبې په ورځ چک جمهوریت ته ورسېږي او په مراسمو کې به چې په هوايي ډګر کې جوړېږي، د چک د ولسمشر ميلوش زيمان په ګډون نور نظامي او ملکي لوړپوړي چارواکي هم ګډون کوي.
د چک جمهوريت د دفاع وزارت مطبوعاتي دفتر سرپرستې يانا زاخمايستيرووا ازادي راډیو ته وويل چې د چک جمهوريت بيرغونه به نیمه ځوړند وي.
د يکشنبې په ورځ درې چکي سرتېري په پروان ولايت کې له افغان سرتېرو سره يوځای د ګزمې پر مهال پلي روان وو چې ورباندې ځانمرګی برید وشو.
چک جمهوریت اوسمهال په افغانستان کې د غوڅ ملاتړ مأموریت په چوکاټ کې ۲۸۰ نظامي پرسونل لري.
- اېشیا ټايمز
اېشیا ټايمز خپرونې د افغانستان د سولې بهير په اړه يوه مقاله خپره کړې ده.
په دې مقاله کې د جنوبي او منځنۍ اسيا لپاره د امریکا د لوړپوړي ډیپلوماتې الېس ولز او طالبانو د استازو ترمنځ د جولای مياشتې په وروستيو کې په دوحه کې خبرې د طالب سخت دريځو سره د مذاکراتو د پيل لپاره ډېرې مهمې ګڼل شوي.
مقاله وايي، که څه هم طالبان د افغانستان په ستونزمنه ځمکه يعنې غرو او رودو کې په جګړو روږدي دي، خو دوی د مجاهدینو تر کورنۍ جګړې وروسته په واکمنۍ کې تر ټولو خراب ثابت شوي.
مقاله وايي، طالبانو له ۱۹۹۶م څخه تر ۲۰۰۱م کال پورې د خپلې دورې پر مهال حکومتي ادارې شنډې کړې، د افغانستان اقتصاد له رکود سره مخامخ شو او خلکو ته د روغتیايي خدماتو او ښوونې په ګډون اساسي خدمات قطع شول.
اېشیا ټايمز: په افغانستان کې د تاوتریخوالي سره سره، د اساسي قانون له مخې پرمختلونکي سياسي پروسې هېڅ بديل نهشته.
د مقالې په وينا د ۲۰۱۸م کال افغانستان، د ۱۹۹۰مې لسيزې د افغانستان په پرتله ډېر بدل دی او له ورځني تاوتریخوالي سره سره د اساسي قانون له مخې پرمختلونکې سياسي پروسې هېڅ بديل نهشته.
مقاله وايي په تېرو ۱۷ کلونو کې په اقتصادي، سیاسي او ټولنيزو چارو کې د پام وړ پرمختګونه شوي.
خو د مقالې په وينا، د افغان سیاسي کړيو ترمنځ د زیات واک پر سر اختلافاتو د افغانستان ولس رغونې هڅې تتې کړي او د حکومت واکيې کمزوری کړی دی.
د مقالې په وينا، د جګړې په ډګر کې د طالبانو د پاتې کېدو يو لامل دا هم دی چې د افغانستان مرکزي حکومتونه په خپلو پلانونو کې په بشپړه توګه نهدي بريالي شوي.