د لاسرسۍ وړ لېنکونه

تازه خبر
دوشنبه ۵ کب ۱۳۹۸ کابل ۰۷:۳۴

افغانستان

جوزف ووټل: د افغان ځواکونو ټولې اړتیاوې به ارزیابي شي

جنرال جوزف ووټل

د امریکايي ځواکونو د مرکزي قوماندانۍ قومندان جنرال جوزف ووټل وايي، امریکايي پوځ به د افغان ځواکونو د تجهیزاتو او مهارتونو په برخه کې ټولې اړتیاوې وڅېړي، څو یې په اړه بیړني اقدامات وکړي.

د افغانستان د ملي امنیت د شورا له دفتره په خپره شوې خبرپاڼه کې ویل شوي چې ووټل دا خبره د شنبې په ورځ په کابل کې د افغانستان د ملي امنیت سلاکار محمد حنیف اتمر سره په لیدنه کې کړې ده.

خبرپاڼه وايي چې دواړو لورو د افغان ځواکونو پر اړتیاوو او هوايي ځواکونو د تجهیز او همکاریو پر پراختیا خبرې وکړې.

همدا راز د افغانستان د ملي امنیت سلاکار محمد حنیف اتمر امریکايي پلاوي ته د جنګي فصل په پیلېدو د افغان ځواکونو د چمتوالي په اړه وویل او د ناټو د غوڅ ملاتړ د ماموریت په چوکاټ کې یې له افغان ځواکونو سره د هوايي ملاتړ پر زیاتیدو ټینګار وکړ.

دې امریکايي قوماندان افغان لوري ته ډاډ ورکړی چې ځواکونه به یې د ترهګرو پر وړاندې مبارزه کې له افغان ځواکونو سره د بیړنیو اقداماتو په شمول هر ډول همکاریو ته دوام ورکړي.

د ورځې تازه خبرونه دلته ولولئ

کابل کې د فوټبال د ګول ساتونکو تمرینات پیل شوي

دامهال دغه لوبغاړې خپل تمرینات د فوټبال فدراسیون د روزنونکو تر نظر لاندې پیل کړي.

په کابل کې د فوټبال لوبې د ګول ساتونکو یا ګول کیپرانو تمرینات پیل شول.

د افغانستان د فوټبال فدراسیون د مطبوعاتو مرستیال شمس امیني نن ازادي راډیو ته وویل چې دغه ګول کیپرانو چې څو موده وړاندې د استعداد موندنې پروګرام له مخې غوره شوې دا مهال یې د لوبو لپاره خپل تمرینات پیل کړل.

د ښاغلي امیني په خبره، دامهال دغه لوبغاړې خپل تمرینات د فوټبال فدراسیون د روزنونکو تر نظر لاندې پیل کړي.

د فوټبال ګول کیپرانو د استعداد موندنې پروګرام د فبرورۍ میاشتې له پیل نه د ۲۰۰ ګول کیپرانو په ګډون د فوټبال په فدراسیون کې پیل شوی وه چې له ډلې یې ۳۰ کسان غوره شول.

د جاپان ۲۰۲۰ کال المپیک سیالیو ته د افغان لوبغاړي غوره کېدل

ارشیف

په ایران کې افغان کډوال او ملي لوبغاړی شاه محمود نبرد د جاپان د ۲۰۲۰ کال المپیک سیالیو لپاره غوره شو.

د افغانستان د المپیک کمیټې د مطبوعاتو غړي مجیب قاري زاده نن ازادي راډيو ته وویل چې د ۲۰۲۰ کال المپیک سیالیو لپاره نن په کابل کې د مونډو د غوراوي په هدف سیالۍ پیل شوې.

په دغه بهیر کې له بېلابېلو ولایتونو ۹ لوبغاړو ګډون کړی وه.

بلاخره شاه محمود نبرد وتوانېده چې د ۱۰۰ متره واټن په 10.58 ثانیو کې ووهي، خپل سیالان مات او د جاپان د ۲۰۲۰ کال المپیک سیالیو لپاره غوره شي.

د خوست دیني عالمان: ښکېلې خواووې دې جګړه بس او اوربند وکړي

خوست کې د سولې په اړه د دیني عالمانو غونډه

د دوشنبې په ورځ د خوست د مرکز او ولسوالیو لسګونو دیني عالمانو او قومي مخورو د یوې غونډې له لارې له طالبانو سره د تاوتریخوالۍ د کمولو اونۍ له هوکړې ملاتړ وکړ او د دایمي اوربند غوښتنه يې وکړه.

دوی وویل، دیني عالمان او قومي مخور حاضر دي، چې د جګړې له ټولو اړخونو سره د سولې په مسایلو خبرې وکړي او ټول ولسونه ددې بهیر ملاتړ ته راوبولي.

په خوست کې دا ځل لسګونو دیني عالمانو او قومي مخورو په یو غږ د یوې اونۍ لپاره د تاوتریخوالي د کمښت له هوکړې ملاتړ څرګند کړ او د جګړې له ښکېلو خواوو يې وغوښتل، چې په دې هېواد کې د روانو ناخوالو او وژنو د بندولو لپاره دایمي اوربند او سوله وکړي.

قومي مشر حمیدګل منګل غونډې ته په خپلو خبرو کې وویل، دوی د تاوتریخوالي د کمولو له اونۍ ملاتړ کړي او هیله يې داده چې دا بهیر په میاشتو، کلونو او دایمي اوربند بدل شي.

ده زیاته کړه، د جګړې د داوړو لورو قربانیان افغانان دي او دوی باید د دایمي سولې لپاره بین الافغاني مذاکرات ترسره کړي.

دیني عالم مولوي محمدسلیم منصور مشال راډیو ته وویل، دیني عالمان حاضر دي، چې د جګړې له ټولو لورو سره کیني او هغوی په دې هېواد کې د سولې پر حقانیت قانع کړي.

د مجاهدینو شورا مرستیال مولوي عبدالصمد بیا له دیني عالمانو وغوښتل، چې د منبر له لارې د افغان حکومت څخه په ناراضو مخالفینو غږ وکړي، چې سوله ومني،څو افغانان له دې اوږدې جګړې وژغورل شي.

ده له افغان حکومت هم وغوښتل، چې په دې هېواد کې د سولې لپاره دې خپلې هڅې لا ګړندۍ کړي.

د امریکا ولسمشر ډونالد ټرمپ هم د یکشنبې په ورځ هند تر سفر مخکې د خبریالانو د پوښتنې په ځواب کې ویلي وویل، که د تاوتریخوالي د کمښت موده سم کار ورکړي له طالبانو سره به تړون لاسلیک شي.

هغه ویلي خپل نوم به د دې تړون لاندې ولیکي.

له دې سربېره په همدې ورځ د اسلامي همکارۍ سازمان "او ای سي" په افغانستان کې د تاوتریخوالي د کمښت له پیله هرکلی وکړ.

د دغه سازمان په خپره شوې اعلامیه کې راغلي د امریکا او طالبانو ترمنځ د تاوتریخوالي د کمښت موافقه چې د افغان حکومت په مشوره شوې په افغانستان کې به د با ثباته سولې د راتلو لپاره لار هواره کړي.

د چین – حیرتان د اورګاډي پټلۍ له لارې لېږد را لېږد درېدلی

د چین - حیرتان د اورګاډي پټلۍ

د چین-حیرتان د اورګاډي پټلۍ له لارې سوداګریز لېږد رالېږد نه‌ترسره کېږي.

د چین او افغانستان ترمنځ د اورګاډي د پټلۍ له ګټې اخیستنې درې کاله تېرېږي او په پیل کې تمه وه چې د دغې پټلۍ په فعالېدو سره به د هېواد په شمال کې د پانګونې کچه لوړه شي، خو د شمال زون د سوداګرۍ او صنعت خونې مسئولان وايي چې د چین-حیرتان د رېل پټلۍ له لارې د سوداګریزو توکو لېږد رالېږد بیا بند شوی دی.

د شمال زون د سوداګرۍ او صنعت خونې مشر، ارش یونسي وايي چې له درېیو میاشتو راهیسې د چین او افغانستان ترمنځ د اورګاډي د پټلۍ له لارې د توکو لېږد رالېږد په ټپه درېدلی دی.

د هغه په خبره چې د افغانستان د لېږدوونکو سوداګریزو توکو ټیټ کیفیت او د اورګاډي په وسیله د توکو د لېږد لوړې بیې، د چین او افغانستان ترمنځ د رېل له پټلۍ د توکو د لېږد رالېږد کچه صفر ته رسولې.

هغه په دې برخه کې افغان دولت هم ګرم بولي او زیاتوي: "مختلف عوامل سبب شوي چې د اورګاډي د پټلۍ له لارې د افغانستان او چین ترمنځ د توکو لېږد رالېږد بند شي، افغان سوداګر د چین د ضرورت توکي نه‌شي مهیا کولای او همدارنګه چین د سبسایډي (بهر ته د سوداګریزو توکو د انتقال تخفیف) کچه هم د افغانستان په وړاندې کمه کړې ده."

یونسي زیاتوي چې د اورګاډي د پټلۍ څخه په استفادې د توکو لېږد چین او له هغه ځای څخه افغانستان ته ګران تمامېږي، نو په همدې دلیل سوداګر یا د هوا له لارې او یا هم د ګاونډي هېوادونو د سوداګریزو بندرونو له لارې راکړه ورکړه ترسره کوي.افغان سوداګر وايي چې د هېواد په تولیدي کارخانو کې د چین د اړتیا وړ توکو د نشتوالي په دلیل او همداراز د ګمرکي تعرفو د لوړوالي په خاطر هم دوی د اورګاډي د پټلۍ له لارې صادرات نه‌ترسره کوي.

حامد کرزی او سیاف د روانو ټاکنیزو ناندریو د حل منځګړیتوب کوي

تېره ورځ ښاغلي کرزي او سیاف د رامنځته شویو جنجالونو په اړه خبرې هم کړې دي.

پخوانی ولسمشر حامد کرزی او جهادي مشر عبدالرب رسول سیاف په افغانستان کې د روانو ټاکنیزو ناندریو د حل منځګړیتوب کوي.

د حامد کرزي د دفتر مطبوعاتي مسئول یوسف سها ازادي راډیو ته وویل، تېره ورځ ښاغلي کرزي او سیاف د رامنځته شویو جنجالونو په اړه خبرې هم کړې دي.

په همدې حال کې اسلامي جمعیت ګوند د سولې لپاره د امریکا له ځانګړي استازي زلمي خلیل‌زاد سره په کتنه کې د ولسمشریزو ټاکنو د پایلو باطلېدل غوښتي دي.

دغه ګوند دغه‌راز ویلي چې د ولسمشر محمد اشرف غني د لوړې مراسمو مخنیوی باید وشي.

ټاکل شوې د محمد اشرف غني د لوړې مراسم راتلونکې پنجشنبه ترسره شي.

بل لور ته د عبدالله عبدالله په مشرۍ "د ثبات او هم‌پالنې" ټاکنیزې ډلې ویاند فریدون خوځون ویلي، د ښاغلي عبدالله د لوړې مراسمو ته هم چمتووالی روان دی.

غني: بحران څخه د وتو لپاره متحد، منسجم او ملي ټیم ته اړتیا ده

ولسمشر غني

د افغانستان ولسمشر محمد اشرف غني ویلي، د تاریخ په دې پړاو کې یوه متحد، منسجم او ملي ټیم ته اړتیا لري چې د ده په ټکو هېواد له ۴۰ کلن بحران څخه وباسي.

د ارګ خبرپاڼه کې راغلي چې ښاغلي غني دغه څرګندونې نن د هېواد له یو شمېر قومي مشرانو او متنفذینو سره په یوه غونډه کې وکړې.

د خبرپاڼې له مخې، محمد اشرف غني ویلي، د سولې ادرس د افغانستان اسلامي جمهوریت دی او له طالبانو سره د افغان حکومت مذاکره کوونکی پلاوی به محدود واکونه ولري.

هغه ویلي، له طالبانو سره د خبرو هدف د جګړې پای ته رسول دي او له طالبانو یې غوښتي چې د سولې په اړه باید نتیجې ته ورسېږي او د هېواد او ولس د خدمت لپاره د خلکو ارادې ته تسلیم شي.

افغان حکومت له طالبانو سره د خبرو لپاره پلاوی له مخکې جوړ کړی، خو تر اوسه‌یې نومونه په رسمي ډول نه‌دي اعلان کړي.

چارواکي: د مالدارۍ سکټور بودجې ته ۱۰۰ میلیونه افغانۍ اضافه شوي

دا اندازه بودجه د وړو ژویو، د کبانو د روزنې اود لبنیاتو د پروسس او تولید طرحو لپاره ځانګړې شوې ده.

د کرنې او مالدارۍ وزارت وایي په روان کال کې ۱۰۰ میلیونه افغانۍ د مالدارۍ سکټور بودجې ته وراضافه شوې دي.

د دغه وزارت ویاند اکبر رستمي نن ازادي راډيو ته وویل چې تېر کال ۱۰۰ میلیونه افغانۍ د حیواني روغتیايي ریاست او مالدارۍ خدماتو لپاره ځانګړې شوې وې، خو سږ کال دې برخې ته ۲۰۰ میلیونه افغانۍ منظور شوې دي.

نوموړي زیاته کړه، دا اندازه بودجه د وړو ژویو، د کبانو د روزنې اود لبنیاتو د پروسس او تولید طرحو لپاره ځانګړې شوې ده.

د دغه وزارت مسؤلین وایي چې دا مهال د افغانستان د اړتیا وړ ډېره برخه لبني محصولات او کبان له بهره راواردېږي، نو ځکه دې برخې ته پاملرنه او په ځان بسیا کېدل اړین دي.

کانونو او پټرولیم وزارت: د دوه سترو پروژو تړونونه لاسلیکېږي

د ښاغلي مطفي په خبره، د دغو پروژو هرې یوې د پانګونې لګښت ۰،۹ میلیونه ډالر اټکل شوی دی.

د افغانستان د کانونو او پټرولیم وزارت وایي، په نږدې راتلونکي کې به د مرمرو او تراورتین قیمتي ډبرو دوه سترو پروژو تړونونه لاسلیک شي.

د دغه وزارت ویاند عبدالقدیر مطفي نن ازادي راډيو ته وویل چې دغه دوه سترې پروژې له کابینې تأیید شوي او نږدې راتلونکي که به‌یې په ننګرهار، کونړ او پروان ولایتونو کې تړونونه لاسلیک شي.

هغه زیاتوي: "دغه دوه تړونونه به ډېر ژر وشي، په دې سره به په دې درې ولایتونو کې شااوخوا ۱۸۰۰ کسانو ته د کار زمینه برابره شي."

د ښاغلي مطفي په خبره، د دغو پروژو هرې یوې د پانګونې لګښت ۰،۹ میلیونه ډالر اټکل شوی دی.

افغان چارواکي: تر اوسه د کرونا وایروس مثبته پېښه نه‌ده ثبت شوې

روغتیايي کارکوونکی د کرونا وایروس د شکمنې پېښې د معلومولو په حال کې.

افغان چارواکي وايي چې تر اوسه په افغانستان کې د کرونا وایروس هېڅ مثبته پېښه نه‌ده ثبت شوې.

دا خبره د ملي امنیت شورا ویاند جاوېد فیصل بېګا شپه ناوخته په خپل ټویټر لیکلې.

تر دې مخکې پرون د عامې روغتیا وزارت ویلي و چې په کرونا وایروس د مشکوکو اخته درېیو کسانو د وینو سمپلونه‌یې له هراته کابل ته انتقال کړي او څېړنې پرې کوي.

د هرات سیمه‌ییز چارواکو ویلي چې د ایران له قُم ښاره ورستانه شوي ۳۶ کسان‌یې قرنطین کړي دي.

د افغانستان د ملي امنیت شورا له ایرانه د کرونا وایروس د ورتګ د مخنیوي لپاره موقتاً له دغه هېواد سره ځمکنی او هوايي تګ راتګ بند کړی دی.

'اسلامي همکارۍ سازمان' افغانستان کې د تاوتریخوالي د کمښت هرکلی وکړ

ارشیف، په بنګله‌دېش کې د اسلامي همکارۍ سازمان د بهرنیو چارو وزیرانو یوه غونډه.

د اسلامي همکارۍ سازمان "او ای سي" په افغانستان کې د تاوتریخوالي د کمښت له پیله هرکلی کړی دی.

د دغه سازمان په اعلامیه کې چې پرون یکشنبه خپره شوې راغلي د امریکا او طالبانو ترمنځ د تاوتریخوالي د کمښت موافقه چې د افغان حکومت په مشوره شوې په افغانستان کې به د با ثباته سولې د راتلو لپاره لار هواره کړي.

د اسلامي همکارۍ سازمان سکرتر جنرال ډاکتر یوسف بن احمد العثیمین ویلي چې د افغانستان د سولې له پروسې سره هرې ممکنه مرستې ته چمتو دی.

د دغه سازمان په نوښت تېر ۲۰۱۹ او وړم ۲۰۱۸ میلادي کال د سعودي عربستان په مکه ښار کې د اسلامي نړۍ د عالمانو کنفرانسونه نیول شوي و چې په‌کې د افغان جګړې په بندېدو ټینګار وشو.

ټرمپ: که طالبان په خپله ژمنه عمل وکړي تړون به ورسره لاسلیک شي

د امریکا ولسمشر ډونالد ټرمپ

د امریکا ولسمشر ډونالد ټرمپ ویلي که د تاوتریخوالي د کمښت موده سمه کار ورکړي له طالبانو سره به تړون لاسلیک شي.

هغه ویلي خپل نوم به د دې تړون لاندې ولیکي.

ټرمپ یکشنبه هند ته تر سفر مخکې د ګڼو نورو موضوع‌ګانو ترڅنګ د افغانستان په اړه هم د خبریالانو پوښتنې ځواب کړې او له طالبانو سره د تړون یادونه‌یې وکړه.

ښاغلي ټرمپ وویل چې طالبان له جګړو ستړي دي، تړون غواړي او امریکا هم د تړون په لټه کې ده.

د تاوتریخوالي د کمښت ۷ ورځنۍ پروسه له شنبې پيل شوې او نن‌یې درېیمه ورځ ده.

طالبانو ژمنه کړې چې په دې موده کې خپل بریدونه د پام وړ کموي.

د کورنیو چارو وزارت ویلي چې شنبه او یکشنبه طالبانو په ارزګان، کندهار، بلخ، هلمند او کاپیسا کې پر افغان پوځیانو بریدونه کړي چې په‌کې پنځه افغان عسکر وژل شوي دي.

فراه کې د کرونا ویروس د مخنیوي لپاره تدابیر نیول شوي

کابل هوايي دګر کې ډاکتران د مسافرینو معاینې پرمهال

د فراه ولايت محلي چارواکي وايي د کرونا وژونکي ويروس د خپرېدو د مخنيوي لپاره دوى پر سرحد ځينې تدابير سنجولي دي.

د فراه والي محمد شعيب ثابت د دې ويروس د تشخيص لپاره يوه صحي ډله پر پوله ګمارل شوې او راستانه شوي کسان معاينه کوي.

هغه زیاته کړه: "د خلکو د چېک کولو لپاره طبي ټيم لېږلى چې مجهز اسباب او وسايل ورسره دي، څو هغه کسان چې خداى ناخواسته په کرونا ويروس اخته دي، تشخيص کړي، موږ د فراه په مرکز کې ۱۰ بستري روغتون د تداوۍ او ٢٠ بستري روغتون د دغو کسانو د قرنطين لپاره چمتو کړى دى."

د فراه والي وايي تر اوسه په دغه ولايت کې چې د ايران پولې ته څېرمه پروت دى، په کرونا ويروس د خلکو د اخته کېدو کومه پېښه نه ده ثبت شوې.

کابل کې د نجونو د فوټبال سیالۍ

آرشیف

په کابل کې د نجونو د فوټبال سیالۍ پیل شوې.

د افغانستان د فوټبال فدراسیون مطبوعاتی مرستیال شمس امیني نن ازادي راډيو ته وویل، چې په دې سیالیو کې د کابل اته لوبډلې لوبېږي.

نوموړي وویل، دغه لوبې چې نن د کابل د نجونو د فوټبال په لوبغالې کې پیل شوې چې ۱۴ ورځې دوام کوي.

چارواکي: هرات کې د کرونا ويروس ۳ مشکوکې پېښې تائيد شوې

هغه ٣٦ کسان چې په وروستيو کې د ايران له قُم ښار څخه افغانستان ته راستانه شوي وو، د دوو اوونيو لپاره قرنطين شوي دي.

په هرات ولايت کې په کرونا ويروس د ۳ کسانو د اخته مشکوکې پېښې تائيد شوې دي.

د هرات د حوزوي روغتون د انتاني ناروغيو د څانګې مشر محمد ابراهيم بسيم نن ازادۍ راډيو ته وويل، دغه کسان په وروستيو کې له ايرانه راستانه شوي دي.

ښاغلي بسيم زياته کړه، دغه درې کسان د تشخيص لپاره کابل ته لېږل شوي، خو د معاينې نتايج يې لا معلوم نه دي.

بلخوا د هرات په اسلام کلا بندر کې د صحي مرکز مسوول نور احمد محمدي ويلي، هغه ٣٦ کسان چې په وروستيو کې د ايران له قُم ښار څخه راستانه شوي وو، د دوو اوونيو لپاره قرنطين شوي دي.

د ايران په قم ښار کې د کرونا ويروس د خپرېدو پېښې تر نورو سيمو زياتې وي.

کرونا ویروس لومړی ځل د چین په ووهان ښار کې پیدا او په بیا د هغه هېواد نورو ښارونو او یو شمېر هېوادونو ته خپور شو.

د افغنستان د عامې روغتیا وزارت ویاند وحیدالله مایار تېره ورځ له ازادي راډيو سره په خبرو کې ويلي و چې د عامې روغتیا وزیر په دې اړه له بېلابېلو ارګانونو سره بیړنۍ غونډه کړې او روغتیايي ټيمونو ته یې دنده سپارلې چې جدې څارنه وکړي.

روغتیا پالان وايي،حکومت باید د نورو تدابیرو ترڅنګ د سرحد تړل هم د یو ممکنه اقدام په سترګه وګوري.

افغان حکومت تر دې مخکي اعلان کړی و چې د چین له ووهان ایالته افغان محصلین پلازمېنې کابل ته رالېږدوي.

خو د افغانستان د عامې روغتیا وزارت تېره ورځ ویلي چې، دوی په ایران کې د کرونا ویروس د پېښو له ثبتېدو وروسته یو ځل بیا په دې اړه غور کوي، څو دغه محصلین په خوندي ډول انتقال شي.

د راپورنو پر بنسټ ویل شوي چې تر اوسه له دېرشو په ډېرو هېوادونو کې خلک په دې ویروس اخته شوي دي.

د سولې ولسي حرکت د تاوتريخوالي کمولو د اوونۍ هرکلى وکړ

د سولې ولسي حرکت انځور

د سولې ولسي حرکت په بېلابېلو ولايتونو کې د تاوتريخوالي کمولو د اوونۍ هرکلى وکړ.

دغه حرکت وايي ملاتړو يې په هرات، هلمند، کندهار، زابل، غزني، میدان وردګ، کابل، بغلان، کندز، پکتیا، پکتیکا، ننګرهار او خوست ولایتونو کې لاريونونه کړي دي.

د سولې ولسي حرکت وياند بسم الله وطندوست نن په دې اړه رسنيو ته په يوه ويډيويي پيغام کې وويل: "د لاريونونو پر مهال يې د جګړې پر ښکېلو اړخونو غږ وکړ، چې په جديت دغه پروسه وساتي، دغه راز يې د جګړې پر ښکېلو اړخونو غږ وکړو چې وخت يې راغلى دوى د تاوتريخوالي کموالى په دايمي اوربند واړوي."

د سولې ولسي حرکت وايي دوى د لاريون پر مهال له ولسونو هم غوښتنه وکړه، چې دوى هم د جګړې پر ښکېلو اړخونو فشار راولي، څو د تاوتريخوالي کمېدل په دايمي اوربند واړوي.

د امریکا او وسلوالو طالبانو د پرېکړې پر اساس، له تېرې شنبې د راتلونکې شنبې تر ورځې باید تاوتریخوالی تر ډېره حده کم شي.

د تاوتریخوالي د کمېدو یوه اوونۍ د وسله والو طالبانو لپاره جدي ازموینه بلل شوې، چې ثابته کړي د سولې او خبرو لپاره حقیقي ژمنتیا لري.

د امریکا د بهرنیو چارو وزیر مایک پامپیو تېره اوونۍ وویل که د تاوتریخوالي د کمولو پرېکړه په مناسب ډول عملي شوه، د فبرورۍ په ۲۹مه به امریکا له طالبانو سره د سولې هوکړه لاسلیک کړي.

نور راوښيه

XS
SM
MD
LG