د لاسرسۍ وړ لېنکونه

تازه خبر
جمعه ۳۰ غویی ۱۴۰۱ کابل ۰۸:۰۸

نړۍ

د تېلو بیې د ۲۰۱۴ کال له نومبر راهیسې تر ټولو لوړې کچې ته ختلي

په داسې حال کې چې پانګه‌وال د امریکا د ولسمشر پرېکړې ته چې ایا د نړۍ له قدرتونو سره د ایران له اټمي تړونه وځي او که پاتې کېږي، سترګې په لاره دي، د تېلو بیې د ۲۰۱۴ میلادي کال د نومبر له میاشتې راهیسې تر ټولو لوړې کچې ته ختلې دي.

ټاکل شوې چې ډونالد ټرمپ نن سې شنبه د واشنګټن په سیمه‌ییز وخت دوه بجې چې د افغانستان په وخت د شپې ۱۰ نیمې بجې کېږي، په دې اړه خپله پرېکړه اعلان کړي او اکثره پانګه‌وال تمه کوي چې متحده ایالات به له دغه تړونه ووځي.

په دې کار سره به د ایران د تېلو پر سکټور او د هغه هېواد پر مرکزي بانک د امریکا بندیزونه بېرته ولګول شي او د تېلو له دې ستر تولیدوونکي هېواد سره به کړکېچ پورته لاړ شي.

د لندن د تېلو په بازار کې د یوه بېرل اومه تېلو بیه ۷۶ ډالره او ۱۷ سنټو ته وختله چې دا د ۲۰۱۴ کال له وروستیو راپدېخوا د تېلو تر ټولو لوړه بیه ده.

ټرمپ له ایران سره د نړۍ د شپږو قدرتونو د ۲۰۱۵ کال تړون ناقص بللی او خبرداری یې ورکړی و چې که په دې تړون کې اصلاحات رانه‌شي، د مې په ۱۲مه یعنې څلور ورځې وروسته به له دغه تړونه ووځي.

د ورځې تازه خبرونه دلته ولولئ

د اوکراین ولسمشر د ډرون الوتکو په اړه د روسیې وروستۍ ادعا تبلیغات بولي

د اوکراین ولسمشر ولادمیر زیلینسکي

د اوکراین ولسمشر ولادمیر زیلینسکي وایي، د روسې دا ادعا چې وایي، په اوکراین کې د ډرون الوتکو د ویشتلو لپاره د لوړ قدرت لرونکې لایزري وسلې د سیستم تولید ته نږدې شوی، د جګړې د وخت د هغو مشرانو تبلیغات دي چې وېرېږي خپلې وحشتانکې تېروتنې ومني.

د روسیې د ټاس خبري آژانس د راپور له مخې د روسیې د صدراعظم مرستیال یوري بوریسوف پرون چهارشنبې مسکو ته نږدې په یوه کنفرانس کې وویل، چې روسیې د لایزري وسلو داسې سیسټم ته وده ورکړې چې څو چنده ځواکمن دی او د دې توان لري چې مختلف هدفونه وسوځوي.

د راپور له مخې دغه نوی سیسټم پرون چهارشنبې آزمویل شوی او یو ډرون یې په پنځو سانیو کې له منځ وړی دی.

بوریسوف د دې پوښتنې په ځواب کې ایا له دغه سیسټم څخه په اوکراین کې کاراخیستل شوي وویل، هو او زیاته یې کړه چې لومړنۍ نمونې هلته کارول شوي دي.

امریکا په ناټو تړون کې د فنلنډ او سویډن د غړیتوب غوښتنې کلک ملاتړ وکړ

د امریکا ولسمشرجوبایډن

د امریکا ولسمشرجوبایډن په ناټو تړون کې د فنلنډ او سویډن د غړیتوب د غوښتنې کلک ملاتړ کړی او ویلي یې دي، چې متحده ایالات به د دوی امنیت ته د هر ډول ګواښ پر وړاندې بیدار پاتې شي.

هغه په یوه بیان کې د فنلنډ او سویډن دا پرېکړه تاریخي بللې او ویلي یې دي، چې دی به د امریکا له کانګرس او د ټاتو له متحدانو سره کار وکړي څو هرڅومره ژر چې کېدای شي دغه دواړه هېوادونه د ناټو غړیتوب ترلاسه کړي.

د ناټو عمومي منشي ینس ستولتنبرګ پرون وویل، چې په ناټو تړون کې د غړیتوب لپاره یې د دواړو هېوادونه رسمي غوښنلیکونه ترلاسه کړي دي.

سویډن او فنلنډ چې د اروپایي ټولنې غړې دي او تراوسه یې ناپیلی موقف درلود، په ناټو تړون کې د غړیتوب غوښتنه هغو مخ په زیاتېدونکو اندېښنو ته په پام کړې چې پر اوکراین د روسیې د یرغل له امله راپورته شوي دي.

لومړني روسي پوځي په اوکراین کې پر خپل جرم اعتراف وکړ

روسي پوځي وادیم شیشي

لومړني روسي پوځي، چې د جنګي جنایت په تور د اوکراین په پلازمېنه کییف کې یوې محکمې ته حاضر کړای شو، پر خپل جرم اعتراف وکړ.

دا ټیټ رتبه روسي افسر، چې وادیم شیشي مارین نومېږي، د اوکراین د شمال ختیځ په چوپا خیف کا کلي کې د یوه بایسکل چلوونکي د وژلو په باب د محکمې د قاضیانو د پوښتنې په ځواب کې وویل چې دا کار یې کړی دی.

د اوکراین دولتي څارنوال په محکمې کې وویل، چې شیشي مارین ته ویل شوي و چې دا ملکي وګړی ووژني چې په سیمه کې د روسي ځواکونو د حضور په اړه چا ته معلومات ورنه کړي.

روسيې په ماريوپول ښار کې د کلابندو اوکرايني سرتېرو د ورتسليمېدو خبر ورکړی

ارشيف

د روسیې د دفاع وزارت ویاند جنرال ایګور کونا شینکوف نن وویل چې ۶۹۴ اوکرایني جنګیالي په تېرو ۲۴ ساعتونو کې تسلیم شوي چې ۲۹ یې ټپي سرتېري دي.

هغه زیاته کړه چې په دې موده کې ۲۶۵ اوکرایني سرتېرو خپله وسله پر ځمکه ایښې ده چې ۵۱ یې ټپیان دي.

د راپورونو له مخې دغه ټول سرتېري او جنګیالي د اوکراین ختیځ هغو سیمو ته لیږدول شوي چې روس پلوه بېلتون غوښتونکي پرې کنټرول لري.

د اوکراین چارواکو تر اوسه د دغې ادعا په اړه څه نه‌دي ویلي خو له دې مخکې یې ویلي و چې د ازوف د فولادو له فابریکې څخه په سلګونو سرتېري او جنګیالي د سره صلیب او ملګرو ملتونو په همکارۍ تخلیه شوي او د روس پلوه وسله والو تر ولکې لاندې ښارونو ته انتقال شوي دي.

ايران په تاجکستان کې د بې پيلوټه جنګي الوتکو فابريکه فعاله کړې

ارشيف

ایران د بې پیلوټه جنګي الوتکو د تولید لومړۍ فابریکه په تاجکستان کې فعاله کړې ده، چې په دې سره تاجکستان د نړۍ لومړی هېواد دی چې ایران پکې د ډرون د تولید فابریکه فعالوي.

د ایرنا دولتي خبري آژانس راپور ورکوي چې د دې فابریکې د پرانیستو مراسم پرون د غويي په ۲۷مه، تاجکستان ته د ایران د وسله والو ځواکونو د لوی درستیز جنرال محمد حسین باقري د سفر پر مهال جوړ شوي وو.

د ایرنا د راپور له مخې د دې ډرون نوم ابابیل ۲ دی، د ۲۰۰ کیلو مترو په ساحه کې د برید او کشفي فعالیتونو وړتیا لري او د یو نیم ساعت لپاره الوتنه کولای شي.

په راپور کې د دې فابریکې د تولیدي ظرفیت او نورو وړتیاوو په اړه جزییات نه دي ورکړل شوي.

په داسې حال کې چې په افغانستان کې د طالبانو سني مذهبي ډله واکمنه شوې او شیعه ایران او سیکولر تاجکستان یې د ځان لپاره ګواښ بولي، دې اقدام ته په سیمه کې د ځواک د انډول کولو لپاره د تهران د هڅو په سترګه کتل کېږي.

له ايرانه د ملګرو ملتونو غوښتنه: د احمد رضا جلالي له اعدامه لاس واخلئ

ایراني الاصله سویډني ډاکټر او اکاډیمیک احمد رضا جلالي

ملګرو ملتو له ایرانه وغوښتل چې د ایراني الاصله سویډني ډاکټر او اکاډیمیک احمد رضا جلالي له اعدامه لاس واخلي.

د ملګرو ملتو د بشري حقونو د عالي کمشنرۍ ویاندې لی تروسیل په یوه بیان کې چې پرون یې خپور کړ وویل، چارواکي دې په تهران کې د اعدام دا سزا سمدستي لغوه کړي.

جلالي د طب ډاکټر او د ستاکوهلم په کارولینکا انستیتیوت کې استاد و چې په ۲۰۱۶ کال کې په علمي سفر ایران تللی و چې ونیول شو.

دی تورن شوی دی چې اسراییل ته یې څو مهم ایراني ساینسپوهان ورپه نښه کړې دي چې ویې وژني.

د ایران حکومت ویلي دي چې جلالي به د راتلونکې شنبې په ورځ اعدام کړي.

اروپایي ټولنې ته د ورغلو ناقانونه کډوالو شمېر کې زیاتوالی راغلی

یونان کې د کډوالو انځور

د اروپایي ټولنې د پولې ساتنې اداره د روان کال په لومړیو څلورو میاشتو کې دې ټولنې ته د ورغلو ناقانونه کډوالو په شمېر کې د پام وړ زیاتوالي خبر ورکوي.

وارسا میشتې د پولې ساتنې ادارې، فرونتیکس پرون دوشنبې وویل، چې د روان کال په لومړیو څلورو میاشتو کې یې د ۵۷ زره او اته سوه ناقانونه کډوالو دوسیې ثبت کړي چې دا د تېرکال د همدۍ مودې په پرتله په سلو کې ۶۹ زیاتوالی ښیي.

دغې ادارې ویلي، چې په اوکراین کې د جګړې له امله کډوال شوي خلک په دغو شمېرو کې نه دي شامل.

فرونتیکس ویلي، له ۲۷ زره زیات کسان د لویدیځ بالکان له لارې اروپایي ټولنې ته داخل شوي چې دا د تېر کال په همدې موده کې له دې لارې د اروپایي ټولنې غړیو هېوادونو ته د اوښتو ناقانونه کډوالو ۱۳۰ سلنه زیاتوالی ښیي.

د دغې ادارې په وینا اکثره ناقانونه کډوال د افغانستان او سوریې دي.

ناقانونه کډوال له لویدیځ بالکان پرته د ختیځې مدیترانې، د ترکیې له لارې هم یونان او قبرس ته ځانونه رسوي.

پوتين او رحمان د افغانستان او تاجکستان د ګډې پولې پر امنيت خبرې کړي

د عکس ښي لور ته د روسیې ولسمشر او چپ لور ته د تاجکستان ولسمشر

د تاجکستان ولسمشر امام علي رحمان له خپل روسي سیال ولادمیر پوتین سره د افغانستان او تاجکستان د ګډې پولې پر امنیت خبرې کړي دي.

د راپورونو له مخې دغو مشرانو نن د ګډ امنیتي تړون سازمان د غونډې په څنډه کې سره کتلي دي.

تاجکستان او د منځنۍ اسیا یو شمېر نور هېوادونه له افغانستانه خپلې خاورې ته د احتمالي ترهګریز ګواښ ویره لري.

د طالبانو حکومت بیا په وار وار ډاډ ورکړی، چې له افغانستانه به هیچا ته ګواښ نه پېښېږي.

ای پي ایل؛ نن ډیلي او پنجاب سیالي لري

د ډیلي کېپټلز لوبډلې لوبډلمشر شریاس ایر

د هند په غوره لیګ کې نن ډیلي کېپټلز او پنجاب کېنګز لوبډلې لوبېږي.

دا لوبه د ممبيي په ډي پټېل لوبغالي کې د افغانستان په وخت ماښام ۶:۳۰ پیلېږي.

ډیلي او پنجاب لوبډلو د هند غوره لیګ په سږني فصل کې ۱۲ لوبې کړې دي چې دواړو یې خپلې ۶ لوبې ګټلې دي.

دواړو لوبډلو ته د دې لوبې ګټل ځکه مهم دي چې بایلونکې یې به په لیګ کې له مخکې تګ پاتې کېږي او ګټونکې به یې د مخکې تګ فرصت پیدا کوي.

د هند غوره لیګ په سږ کال کې تر دې دمه ګوجرات تیتانز مخکښه لوبډله ده چې درې افغان لوبغاړي هم ورسره دي.

شمالي کوریا په کرونا ویروس د ۸ کسانو مړینه ثبت کړې

شمالي کوریا کې په درې لکه ۹۲زره ۹۲۰ کسانو کې تبه او د کرونا ویروس علایم لیدل شوي دي.

شمالي کوریا نن دوشنبه په کرونا ویروس د ۸ کسانو مړینه ثبت کړې ده.

په دغه هېواد کې په درې لکه ۹۲زره ۹۲۰ کسانو کې تبه او د کرونا ویروس علایم لیدل شوي دي.

د شمالي کوریا رهبر پر خپلو چارواکو د درملو په رسولو کې د ځنډ له کبله انتقاد کړی.

کیم جونګ اون خپل پوځ ته امر کړی، چې د کرونا وبا په وړاندې د مبارزې په چارو کې مرسته وکړي.

د شمالي کوریا چارواکي وايي په تېره اپرېل میاشت کې د کرونا وایروس له خپرېدو راهیسې ۱۲لکه کسان ناروغ شوي او ۵ لکه ۶۴زره ۸۶۰ کسان دا مهال قرنطین دي.

امریکا کې د پرونۍ پېښې له امله یو تن وژل شوی او څلور ټپیان دي

مشکوک کس چې اسیايي بلل شوی او عمر یې تر ۶۰ لوړ دی، نیول شوی او په توقیف کې دی.

د امریکا د متحدو ایالتونو د کلیفورنیا ایالت په یوه کلیسا کې پرون ماسپښین د یوه سړي په ډزو یو تن ووژل شو او څلور تنه نور سخت ټپیان شول.

چارواکي وايي، پېښه په داسې ساحه کې شوې چې اکثریت اوسېدونکي یې پوخ عمره کسان دي.

مشکوک کس چې اسیايي بلل شوی او عمر یې تر ۶۰ لوړ دی، نیول شوی او په توقیف کې دی.

اوکراین د امریکا د پوځي او بشري مرستو غوښتنه وکړه

د عکس ښي لور ته د امریکا د بهرنیو چارو وزیر انتوني بلېنکېن او چپ لور ته د اوکراین د بهرنیو چارو وزیر دیمیتري کولیبا

د اوکراین د بهرنیو چارو وزیر دیمیتري کولیبا له خپل امریکايي سیال انتوني بلېنکېن سره وکتل او له خپل هېواد سره یې د امریکا د پوځي او بشري مرستو غوښتنه وکړه.

کولیبا پرون په برلین کې د ناټو د بهرنیو چارو وزیرانو په غونډه کې ګډون وکړ.

د امریکا د بهرنیو چارو د وزارت ویاند نید پرایس وویل، چې بلېنکېن او کولیبا د روسیې د یرغل له امله د نړۍ د خوړو د امنیت په اغېزمنتیا باندې بحث وکړ.

پر اوکراین د روسیې یرغل اوس په دولسمه اوونۍ کې دی، خو روسیه نه ده توانېدلې چې یو مهم ښار یا سیمه ونیسي.

پېښور کې دوه سک دوکانداران وژل شوي

ارشيف

د پاکستان صدراعظم شهباز شریف په پېښور کې د دوو سکانو وژنه وغندله.

نن سهار په پېښور کې موټرسايکل سپرو وسلوالو دوه سک دکانداران په ډزو ووژل.

په پېښور کې د دې پېښې د غندنې لپاره په لسګونو کسانو لاريون وکړ.

شهباز شريف په ميرانشاه کې د درې عسکرو په وژل کېدو هم سخت خپګان ښودلی.

د يادونې ده چې په دې وروستيو کې پاکستان کې وسله وال بريدونه ډېر شوي دي چې د پاکستان لومړی وزير يې هم اندېښمن کړی دی.

امريکا: نيويارک کې ۱۰ کسان په ډزو وژل شوي

ارشيف

د امریکا د متحدو ایالتونو په نیویارک ایالت کې یوه ۱۸ کلن سپین پوستي ځوان په هغه سیمه کې چې ډېری اوسېدونکي یې تورپوستي دي په ډزو ۱۰ کسان ووژل او درې تنه نور ټپیان کړل.

ډزې د شنبې په ورځ په یوه مغازه کې شوي او تورن کس وروسته پولیسو ته ځان تسلیم کړی دی.

چارواکو د دې پېښې انګېزه هغه تاوتریخوالی بللی چې اساس یې سخت نژادي تبعیض دی.

د امریکا د متحدو ایالتونو ولسمشر جو بایډن دغه پېښه کرکه پاروونکې بللې او غندلې یې ده.

د چارواکو په خبره مشکوک ځوان چې په تهاجمي وسله سمبال و، ظاهراً یې دا حمله په یوازې سر کړې ده.

هغه له خپله کوره تر څو ساعته مزله وروسته بُفالو ساحې ته تللی او دغه حمله یې د خپل ټویچ له اکاونټ څخه چې په ژوندۍ بڼه د ویډیوګانو د خپرولو یوه شبکه ده په ژوندۍ بڼه خپروله، دغه شبکه د امازون ډات کام اړوند ده.

ډېری کسان چې ډزې ورباندې شوي د چارواکو په خبره تورپوستي وګړي دي.

د محکمې په اسنادو کې د مشکوک سړي نوم پېټون ګنډرون (Payton Gendron) ښوول شوی، چې د نیویارک د جنوب د کانکلین ښارګوټي اوسېدونکی دی. په دې ښارګوټي کې شا و خوا ۵۰۰۰ کسان ژوند کوي.

مشکوک تن تر دې پېښې څو ساعته وروسته د لومړي درجه قتل په تور یوې محکمې ته حاضر کړای شو، چې حد اکثر مجازات یې له مشروطې ازادۍ پرته عمري بند کېدای شي.

په نیویارک کې د اعدام سزا نه شته. دغه کس به راروانه پنج شنبه، یعنې د مې میاشتې پر ۱۹مه بیا محکمې ته حاضر کړای شي.

شهباز شريف ميرانشاه کې د پاکستاني سرتېرو پر وژنه خپګان کړی

د پاکستان لومړی وزير شهباز شريف

د پاکستان صدراعظم شهباز شریف د شمالي وزیرستان په میرانشاه کې د درېیو پاکستاني سرتېرو پر وژل کېدو خپګان څرګند کړ.

ښاغلي شریف نن یکشنبه په ټویټر کې لیکلي، چې د دغو سرتېرو تر څنګ په ځانمرګي برید کې د درېیو ماشومانو وژل کېدو سخت خپه کړی دی.

د پاکستان پوځ نن یکشنبه په یوه ځانمرګي برید کې د دغو درېیو سرتېرو وژل کېدل تایید کړل.

د پاکستان صدراعظم ویلي چې د دغو سرتېرو د وینې غچ به اخیستل کېږي.

د دې پېښې مسوولیت تر اوسه چا نه دی منلی، خو تر دې مخکې د دغسې ډېرو بریدونو مسوولیت پاکستانی طالبانو منلی دی.

نور راوښيه

XS
SM
MD
LG